ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୁଧବାର ଠାରୁ ୯ ଦିନିଆ ବିଦେଶ ଗସ୍ତରେ ଅଛନ୍ତି। ସେ ଏହି ଗସ୍ତର ପ୍ରଥମ ଦୁଇ ଦିନି ଘାନାରେ ବିତାଉଛନ୍ତି। ପଶ୍ଚିମ ଆଫ୍ରିକୀୟ ଦେଶକୁ ଏହା ହେଉଛି ତାଙ୍କର ପ୍ରଥମ ଦ୍ୱିପାକ୍ଷିକ ଗସ୍ତ। ଆକ୍ରାର କୋଟୋକା ଅନ୍ତର୍ଜାତୀୟ ବିମାନବନ୍ଦରରେ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା ଏବଂ ୨୧ ତୋପର ସହିତ ସଲାମୀ ଦିଆଯାଇଥିଲା। 

ପ୍ରଧାନମନ୍ତ୍ରୀ ମୋଦୀଙ୍କୁ ଘାନାର ଦ୍ୱିତୀୟ ଜାତୀୟ ସର୍ବୋଚ୍ଚ ନାଗରିକ ସମ୍ମାନ ପ୍ରଦାନ କରାଯାଇଥିଲା। ପ୍ରଧାନମନ୍ତ୍ରୀ ମୋଦୀଙ୍କୁ ଘାନାର ରାଷ୍ଟ୍ରପତି ଜନ୍ ମହାମା 'ଅର୍ଡର ଅଫ୍ ଦି ଷ୍ଟାର ଅଫ୍ ଘାନା'ରେ ସମ୍ମାନିତ କରିଥିଲେ। ଜାତୀୟ ସମ୍ମାନରେ ସମ୍ମାନିତ ହେବା ପରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ଘାନାର ଜାତୀୟ ସମ୍ମାନ ପାଇବା ମୋ ପାଇଁ ବହୁତ ଗର୍ବ ଏବଂ ସମ୍ମାନର ବିଷୟ। ମୁଁ ରାଷ୍ଟ୍ରପତି ମହାମା, ଘାନା ସରକାର ଏବଂ ଘାନାର ଲୋକଙ୍କ ପ୍ରତି ମୋର ହୃଦୟର କୃତଜ୍ଞତା ପ୍ରକାଶ କରୁଛି। ମୁଁ ୧.୪ ବିଲିୟନ ଭାରତୀୟଙ୍କ ପକ୍ଷରୁ ଏହି ସମ୍ମାନକୁ ନମ୍ରତାର ସହିତ ଗ୍ରହଣ କରୁଛି। ମୁଁ ଏହି ସମ୍ମାନକୁ ଆମର ଯୁବପିଢ଼ିଙ୍କ ଆକାଂକ୍ଷା, ସେମାନଙ୍କର ଉଜ୍ଜ୍ୱଳ ଭବିଷ୍ୟତ, ଆମର ସମୃଦ୍ଧ ସାଂସ୍କୃତିକ ବିବିଧତା ଏବଂ ପରମ୍ପରା ଏବଂ ଭାରତ ଏବଂ ଘାନା ମଧ୍ୟରେ ଐତିହାସିକ ସମ୍ପର୍କ ପାଇଁ ଉତ୍ସର୍ଗ କରୁଛି। 

ପୂର୍ବରୁ ପ୍ରଧାନମନ୍ତ୍ରୀ ମୋଦୀ ଘାନାର ମାଟିରେ ତାଙ୍କୁ ମିଳିଥିବା ଉଷ୍ମ ସ୍ୱାଗତ ପାଇଁ କୃତଜ୍ଞତା ପ୍ରକାଶ କରିଥିଲେ ଏବଂ କହିଥିଲେ ଯେ ରାଷ୍ଟ୍ରପତି ନିଜେ ବିମାନବନ୍ଦରକୁ ଆସିବା ତାଙ୍କ ପାଇଁ ଏକ ବଡ଼ ସମ୍ମାନର କଥା। ଏକ ମିଳିତ ବିବୃତ୍ତି ଜାରି କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ ଭାରତ-ଘାନାର ବନ୍ଧୁତାର କେନ୍ଦ୍ରରେ ଆମର ସମାନ ମୂଲ୍ୟବୋଧ, ସଂଘର୍ଷ ଏବଂ ଏକ ଅନ୍ତର୍ଭୁକ୍ତ ଭବିଷ୍ୟତ ପାଇଁ ସମାନ ସ୍ୱପ୍ନ ରହିଛି, ଯାହା ଅନ୍ୟ ଦେଶମାନଙ୍କୁ ମଧ୍ୟ ପ୍ରେରଣା ଦେଇଛି।

ସେ ଘାନାକୁ ଏକ ସ୍ପନ୍ଦନଶୀଳ ଗଣତନ୍ତ୍ର ଏବଂ ପଶ୍ଚିମ ଆଫ୍ରିକାରେ "ଆଶାର ଆଲୋକ" ଭାବରେ ପ୍ରଶଂସା କରିଥିଲେ। ଏହି ଗସ୍ତ ସମୟରେ ଦୁଇ ଦେଶ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିଲା। ପ୍ରଧାନମନ୍ତ୍ରୀ ମୋଦୀ ଘୋଷଣା କରିଥିଲେ, 'ଆଜି ଆମେ ଘାନାର ପାଇଁ ଆଇସିଇସି ଏବଂ ଆଇସିସିଆର ଛାତ୍ରବୃତ୍ତିକୁ ଦ୍ୱିଗୁଣିତ କରିବାକୁ ନିଷ୍ପତ୍ତି ନେଇଛୁ। ଯୁବକମାନଙ୍କ ବୃତ୍ତିଗତ ଶିକ୍ଷା ପାଇଁ, ଏକ ଦକ୍ଷତା ବିକାଶ କେନ୍ଦ୍ର ପ୍ରତିଷ୍ଠା ପାଇଁ କାର୍ଯ୍ୟ କରାଯିବ। କୃଷି କ୍ଷେତ୍ରରେ, ଆମେ ରାଷ୍ଟ୍ରପତି ମହାମା ଜୀଙ୍କ "ଫିଡ୍ ଘାନ" କାର୍ଯ୍ୟକ୍ରମରେ ସହଯୋଗ କରିବାକୁ ଖୁସି ହେବୁ।'

ଏହା ବ୍ୟତୀତ, ଜନ ଔଷଧି କେନ୍ଦ୍ର ମାଧ୍ୟମରେ ଘାନାର ନାଗରିକମାନଙ୍କୁ ସୁଲଭ ଏବଂ ନିର୍ଭରଯୋଗ୍ୟ ସ୍ୱାସ୍ଥ୍ୟ ସେବା ପ୍ରଦାନ କରିବା ପାଇଁ ଏକ ପ୍ରସ୍ତାବ ଦିଆଯାଇଥିଲା। ଟୀକା ଉତ୍ପାଦନରେ ସହଯୋଗ ବିଷୟରେ ମଧ୍ୟ ଆଲୋଚନା କରାଯାଇଥିଲା। ଆତଙ୍କବାଦ ବିରୋଧରେ ଲଢ଼େଇରେ ଘାନାର ସହଯୋଗକୁ ପ୍ରଶଂସା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଦୁଇ ଦେଶ ଆତଙ୍କବାଦ ବିରୋଧୀ ସହଯୋଗକୁ ଆହୁରି ମଜବୁତ କରିବାକୁ ନିଷ୍ପତ୍ତି ନେଇଛନ୍ତି। ଦୁଇ ଦେଶ ଜାତିସଂଘ ସଂସ୍କାର ଉପରେ ମଧ୍ୟ ସମାନ ଦୃଷ୍ଟିକୋଣ ବାଣ୍ଟିଥିଲେ।

ଅଧିକ ପଢ଼ନ୍ତୁ: ଦୋଷୀମାନଙ୍କୁ ବିଳମ୍ବ ନକରି ଦଣ୍ଡ ଦିଆଯିବା ଉଚିତ