କୋଲକାତା: ଦିଲ୍ଲୀ ହାଇକୋର୍ଟର ଆଉ ଜଣେ ବିଚାରପତିଙ୍କୁ ନେଇ ବିବାଦ ବଢ଼ିବାରେ ଲାଗିଛି। ପୂର୍ବରୁ, ବିଚାରପତି ଯଶୱନ୍ତ ବର୍ମାଙ୍କ ଘରୁ ଟଙ୍କା ଉଦ୍ଧାର, ଏହାର ତଦନ୍ତ ଏବଂ ଆହ୍ଲାବାଦ ହାଇକୋର୍ଟକୁ ତାଙ୍କର ସ୍ଥାନାନ୍ତରକୁ ନେଇ ବିବାଦ ହୋଇଥିଲା। ଏବେ ସୁପ୍ରିମକୋର୍ଟ କଲେଜିୟମର ସେହି ନିଷ୍ପତ୍ତି ଉପରେ ପ୍ରଶ୍ନ ଉଠିଛି ଯେଉଁଥିରେ ଦିଲ୍ଲୀ ହାଇକୋର୍ଟର ବିଚାରପତି ଦିନେଶ କୁମାର ଶର୍ମାଙ୍କୁ କଲିକତା ହାଇକୋର୍ଟକୁ ପଠାଇବାକୁ ଅନୁମୋଦନ କରାଯାଇଛି।

କଲିକତା ହାଇକୋର୍ଟ ବାର ଆସୋସିଏସନ, ବାର ଲାଇବ୍ରେରୀ ବିଚାରପତି ଦିନେଶ ଶର୍ମାଙ୍କୁ କଲିକତା ହାଇକୋର୍ଟ ପଠାଇବା ନିଷ୍ପତ୍ତିର ପୁନର୍ବିଚାର ଏବଂ ତାଙ୍କ ନାମ ପ୍ରତ୍ୟାହାର କରିବାକୁ ଦାବି କରିଛନ୍ତି। ସୁପ୍ରିମକୋର୍ଟ କଲେଜିୟମର ଏହି ନିଷ୍ପତ୍ତି ସହିତ କଲିକତା ହାଇକୋର୍ଟ ଓକିଲ ସଂଘ ଅସହମତ।

ସ୍ଥାନାନ୍ତର ନିଷ୍ପତ୍ତିକୁ ବିରୋଧ କରି ମଙ୍ଗଳବାର ଅପରାହ୍ନ ୩ଟା୩୦ ପର୍ଯ୍ୟନ୍ତ ଓକିଲଙ୍କ ଏକ ଗୋଷ୍ଠୀ ମାମଲାର ଶୁଣାଣିରେ ଯୋଗ ଦେଇ ନଥିଲେ। ତଥାପି, ମାମଲାର ଶୁଣାଣି ସମୟରେ କିଛି ଓକିଲ ମଧ୍ୟ ଉପସ୍ଥିତ ଥିବା ଦେଖାଯାଇଥିଲା। କଲିକତା ହାଇକୋର୍ଟର ବାର ଆସୋସିଏସନ ମଧ୍ୟ କିଛି ପୁରୁଣା ମାମଲାର ଉଦାହରଣ ଦେଇଛି ଯେଉଁଠାରେ ଅବସରର ନିକଟତର ବିଚାରପତିମାନଙ୍କୁ କଲିକତା ହାଇକୋର୍ଟକୁ ପଠାଯାଇଥିଲା।

ଅନ୍ୟ ହାଇକୋର୍ଟର ବିଚାରପତିମାନଙ୍କୁ ସେମାନଙ୍କ କାର୍ଯ୍ୟଦକ୍ଷତା ଆଧାରରେ ମୂଲ୍ୟାଙ୍କନ କରି କଲିକତା ହାଇକୋର୍ଟକୁ ପଠାଇବାକୁ ସଂଘ ଆବେଦନ କରିଛି। ସେହିପରି, ଆହ୍ଲାବାଦ ହାଇକୋର୍ଟ ବାର ଆସୋସିଏସନ ଯଶୱନ୍ତ ବର୍ମାଙ୍କୁ ଦିଲ୍ଲୀରୁ ଆହ୍ଲାବାଦ ସ୍ଥାନାନ୍ତର ଉପରେ ପ୍ରଶ୍ନ ଉଠାଇଥିଲା ଏବଂ କହିଥିଲା ଯେ ଆମେ ଡଷ୍ଟବିନ ନୁହେଁ।

ଅଧିକ ପଢ଼ନ୍ତୁ: ଦୁଇଟି ବସ୍‌କୁ ଧକ୍କା ଦେଲା ଏସ୍‌ୟୁଭି