ତେହେରାନ: ଭାରତ ସମେତ ସମଗ୍ର ବିଶ୍ବରେ ଆଜି ପବିତ୍ର ଇଦ୍‌ ପାଳନ କରାଯାଉଛି। ଇରାନର ବୈଦେଶିକ ମନ୍ତ୍ରୀ ଆବାସ ଆରାଘଚି ଏହି ଅବସରରେ ଏକ ବାର୍ତ୍ତା ଜାରି କରି ଆଞ୍ଚଳିକ ଦେଶମାନଙ୍କ ମଧ୍ୟରେ ଏକତା ଏବଂ ସହଯୋଗର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି।

ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟରେ ଆରାଘଚି କହିଛନ୍ତି ଯେ ଆମେରିକା ଏବଂ ଇସ୍ରାଏଲ ସହିତ ଚାଲିଥିବା ଉତ୍ତେଜନା ମଧ୍ୟରେ ଏହି ଅଞ୍ଚଳର ପରିସ୍ଥିତି ଅତ୍ୟନ୍ତ ସମ୍ବେଦନଶୀଳ ରହିଛି। ସେ କହିଛନ୍ତି, ଆଞ୍ଚଳିକ ସ୍ଥିରତାର ପଥ ସେହି 'ଶାନ୍ତିପ୍ରିୟ ମୁସଲିମ ନେତାମାନେ' ଦେଖାଇଛନ୍ତି ଯେଉଁମାନେ ଆଲୋଚନାକୁ ପ୍ରୋତ୍ସାହିତ କରିବା ଏବଂ ଉତ୍ତେଜନା ହ୍ରାସ କରିବା ପାଇଁ କାନ୍ଧକୁ କାନ୍ଧ ମିଳାଇ ଠିଆ ହୋଇଛନ୍ତି। 

ସେ କହିଛନ୍ତି, ଏହି ସମୟରେ ଆଞ୍ଚଳିକ ଦେଶମାନଙ୍କ ମଧ୍ୟରେ ଏକତା ଏବଂ ସହଯୋଗ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଶାନ୍ତିପ୍ରିୟ ମୁସଲିମ ନେତାମାନେ ଶାନ୍ତି ପ୍ରତିଷ୍ଠା ପାଇଁ କାନ୍ଧକୁ କାନ୍ଧ ମିଳାଇ ଠିଆ ହୋଇଛନ୍ତି। ଏହା ଏକ ଅତ୍ୟନ୍ତ ସମ୍ବେଦନଶୀଳ ସମୟରେ ଘଟୁଛି। ଇତିହାସ ଏହା ରେକର୍ଡ କରିବ। ସମସ୍ତ ପ୍ରିୟ ମୁସଲମାନଙ୍କୁ ଇଦ ମୁବାରକ। 

ଇରାନ ରାଷ୍ଟ୍ରପତି ମାସୁଦ ପେଜେଶକିୟାନ ମଧ୍ୟ ବକ୍ରୀଦ ଅବସରରେ ଶୁଭେଚ୍ଛା ଜଣାଇଛନ୍ତି। ଇରାକ, ଓମାନ, କତାର, ତୁର୍କୀ, ତାଜିକିସ୍ତାନ, ମିଶର, କିର୍ଗିଜସ୍ତାନ ଏବଂ ଆଜରବାଇଜାନର ନେତାମାନଙ୍କ ସହିତ ଆଲୋଚନାରେ ସେ ଈଦ ଅଲ-ଆଧା ଶୁଭେଚ୍ଛା ଜଣାଇ କହିଛନ୍ତି, 'ମୁଁ ଆଶା ପ୍ରକାଶ କରିଛି ଯେ ଆଲ୍ଲାହ ଆମ ମୁସଲମାନମାନଙ୍କ ହୃଦୟକୁ ନିକଟତର କରିବେ ଏବଂ ଆମେ ସମସ୍ତ କ୍ଷେତ୍ରରେ ସହଯୋଗ ବିସ୍ତାର କରିବୁ ଏବଂ ବିପଦର ସାମ୍ନାରେ ପରସ୍ପର ପାଇଁ ଅଧିକ ଦୃଢ଼ ଭାବରେ ଠିଆ ହେବୁ। 

ପେଜେଶକିୟାନ ଈଦ ଅଲ-ଆଧାକୁ ମୁସଲିମ ଦେଶମାନଙ୍କ ମଧ୍ୟରେ ବିଶ୍ୱାସ, ତ୍ୟାଗ ଏବଂ ଏକତାର ଏକ ଦୃଢ଼ ପ୍ରତୀକ ଭାବରେ ବର୍ଣ୍ଣନା କରିଥିଲେ। ସେ କହିଥିଲେ ଯେ ଏହି ଅବସର ଇସଲାମିକ ବିଶ୍ୱର ଦେଶଗୁଡ଼ିକୁ ପାରସ୍ପରିକ ବିଶ୍ୱାସକୁ ମଜବୁତ କରିବା ଏବଂ ଆଞ୍ଚଳିକ ସମ୍ପର୍କକୁ ଆହୁରି ଗଭୀର କରିବା ପାଇଁ ମନେ ପକାଇଥାଏ।

ଭାରତରେ ଇରାନୀ ଦୂତାବାସ ସମସ୍ତ ଭାରତୀୟଙ୍କୁ ଈଦ ଶୁଭେଚ୍ଛା ଜଣାଇଛି। ‘ଏକ୍ସ’ରେ ଏକ ପୋଷ୍ଟରେ, ଦୂତାବାସ କହିଛି, ଇଦ୍‌ ଅବସରରେ ଆମେ ଭାରତ ସରକାର ଏବଂ ପ୍ରିୟ ଲୋକମାନଙ୍କୁ, ବିଶେଷକରି ଆମର ପ୍ରିୟ ମୁସଲିମ ଭାଇ ଏବଂ ଭଉଣୀମାନଙ୍କୁ ଆମର ଶୁଭେଚ୍ଛା ଜଣାଉଛୁ। ଏହି ପବିତ୍ର ପର୍ବ ସମସ୍ତଙ୍କ ପାଇଁ ଶାନ୍ତି, ସମୃଦ୍ଧି ଏବଂ ଖୁସି ଆଣିଦେଉ ଏବଂ ଆମ ଦୁଇ ରାଷ୍ଟ୍ର ମଧ୍ୟରେ ଐତିହାସିକ ଏବଂ ସାଂସ୍କୃତିକ ବନ୍ଧୁତାର ବନ୍ଧନକୁ ଆହୁରି ମଜବୁତ କରୁ। 

ଅଧିକ ପଢ଼ନ୍ତୁ: ବକ୍ରୀଦ ପୂର୍ବରୁ ମାଡ୍ରାସ ହାଇକୋର୍ଟଙ୍କ ବଡ଼ ରାୟ