ଲିସବନ: ୨୦୨୮ ଟି୨୦ ବିଶ୍ୱକପ୍ ଯୋଗ୍ୟତା ପର୍ଯ୍ୟାୟ ପାଇଁ ପର୍ତ୍ତୁଗାଲ ଦଳ ଘୋଷଣା କରାଯାଇଛି। ଅଷ୍ଟ୍ରେଲିୟ ଖେଳାଳି ମୋଇସେସ୍ ହେନରିକ୍ସଙ୍କୁ ଅଧିନାୟକ ନିଯୁକ୍ତ କରାଯାଇଛି। ଏହା ପ୍ରଥମ ଥର ହେବ ଯେତେବେଳେ ୩୯ ବର୍ଷୀୟ ପର୍ତ୍ତୁଗାଲର ଅଧିନାୟକ ହେବେ।

ଗତ ମାସରେ ମୋଇସେସ୍ ହେନରିକ୍ସ ଅଷ୍ଟ୍ରେଲିଆ ଘରୋଇ କ୍ରିକେଟରୁ ଅବସର ନେବାକୁ ନିଷ୍ପତ୍ତି ନେଇଥିଲେ। କିନ୍ତୁ ବିଦେଶରେ ଖେଳିବା ଜାରି ରଖିଥିଲେ। ସୋମବାର ଦଳ ଘୋଷଣାରେ ହେନରିକ୍ସଙ୍କୁ ପର୍ତ୍ତୁଗାଲ କ୍ରିକେଟ୍ ଦଳର ଅଧିନାୟକ ନିଯୁକ୍ତ କରାଯାଇଛି।

ଅଷ୍ଟ୍ରେଲିଆ ପାଇଁ ଅନ୍ତର୍ଜାତୀୟ କ୍ରିକେଟ୍ ଖେଳିଥିବା ମୋଇସେସ୍ ପର୍ତ୍ତୁଗାଲର ଫଞ୍ଚଲରେ ଜନ୍ମଗ୍ରହଣ କରିଥିଲେ। ତାଙ୍କ ପରିବାର ତାଙ୍କ ପିଲାଦିନେ ଅଷ୍ଟ୍ରେଲିଆକୁ ସ୍ଥାନାନ୍ତରିତ ହୋଇଥିଲେ। ଅଷ୍ଟ୍ରେଲିଆରେ ରହୁଥିବା ସମୟରେ ସେ କ୍ରିକେଟ୍ ଖେଳିବା ଆରମ୍ଭ କରିଥିଲେ। ସେ ନ୍ୟୁ ସାଉଥ୍ ୱେଲ୍ସ ପାଇଁ ଘରୋଇ କ୍ରିକେଟ୍ ଖେଳିଥିଲେ ଏବଂ ତାଙ୍କର ପ୍ରଭାବଶାଳୀ ପ୍ରଦର୍ଶନ ସହିତ ଅନ୍ତର୍ଜାତୀୟ ଦଳରେ ସ୍ଥାନ ପାଇଥିଲେ। ସମସ୍ତ ତିନୋଟି ଫର୍ମାଟରେ ସେ ଅଷ୍ଟ୍ରେଲିଆ ପାଇଁ ମୋଟ ୪୪ଟି ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି।

ଆଇସିସି ଟି୨୦ ରାଙ୍କିଙ୍ଗରେ ୩୭ ତମ ସ୍ଥାନରେ ଥିବା ପର୍ତ୍ତୁଗାଲ, ଟି୨୦ ବିଶ୍ୱକପ୍ ୟୁରୋପ ଉପ-ଆଞ୍ଚଳିକ ଯୋଗ୍ୟତା ପର୍ଯ୍ୟାୟର ଗ୍ରୁପ୍ ବିରେ ଇସ୍ରାଏଲ, ଜର୍ମାନୀ, ଗ୍ରୀସ୍ ଏବଂ ଚେକିଆ ସହିତ ମୁକାବିଲା କରିବ। ଦଳଗୁଡ଼ିକ ଅଗଷ୍ଟ ୧୪ରୁ ୨୦ ତାରିଖ ମଧ୍ୟରେ ଏହି ମ୍ୟାଚ୍ ଖେଳିବେ। ଗ୍ରୁପ୍ ବିଜେତା ଅଗଷ୍ଟ ୨୧ ତାରିଖରେ ଫାଇନାଲରେ ‘ଗ୍ରୁପ୍-ଏ’ର ବିଜେତା ସହିତ ଖେଳିବ।

ଯୋଗ୍ୟତା ପର୍ଯ୍ୟାୟର ବିଜେତା ୟୁରୋପୀୟ ଆଞ୍ଚଳିକ ଫାଇନାଲରେ ସ୍କଟଲାଣ୍ଡ, ଜର୍ସି ଏବଂ ଡେନମାର୍କ ସହିତ ଯୋଗଦେବ। ସେହି ଇଭେଣ୍ଟର ଶ୍ରେଷ୍ଠ ଦୁଇଟି ଦଳ ଗ୍ଲୋବାଲ କ୍ୱାଲିଫାୟରକୁ ଯିବେ। ଏହି ଦଳଗୁଡ଼ିକ ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡରେ ଅନୁଷ୍ଠିତ ହେବାକୁ ଥିବା ୨୦୨୮ ଟି୨୦ ବିଶ୍ୱକପରେ ସ୍ଥାନ ସୁରକ୍ଷିତ କରିବାକୁ ଲକ୍ଷ୍ୟ ରଖିବେ। ଟି୨୦ ବିଶ୍ୱକପ୍ ପାଇଁ ଯୋଗ୍ୟତା ଅର୍ଜନ କରିବା ପାଇଁ ପର୍ତ୍ତୁଗାଲ କେତେ ଦୂର ପହଞ୍ଚିପାରିବ ତାହା ଦେଖିବା ଆକର୍ଷଣୀୟ ହେବ।

ପର୍ତ୍ତୁଗାଲର ଦଳ: ମୋଇସେସ୍ ହେନରିକ୍ସ (ଅଧିନାୟକ), କ୍ରେଗ୍ କାଚୋପା, ଏଡୱାର୍ଡ ଫ୍ଲେମିଂ, କ୍ରିଷ୍ଟୋଫର ଡି ଫ୍ରେଇଟାସ୍, ରାହୁଲକୁମାର ହାଶୁ, ସିରାଜ ଉଲ୍ଲା ଖାଦେମ, ହରଦୀପ ଖୁଟାନ୍, ଜେରେମି ମାର୍ଟିନ୍ସ, ଧାୱଲକୁମାର ନୋରୋଥାମ୍ (ୱିକେଟକିପର), ଜୋର୍ଡାନ ନେଟୋ, କାର୍ଲୋସ୍ ନୁନ୍ସ, ସେବାଷ୍ଟିଆନ୍ ଡି ଅଲିଭେରା, ଉପେନ ଶାଣ୍ଟୁ, କ୍ୟାମେରନ୍ ସାକଲେଟନ୍।

ଅଧିକ ପଢ଼ନ୍ତୁ: ଆପଣ କ'ଣ ନିରାମିଷ ଭୋଜନ କରନ୍ତି? ଆପଣ ମଦ୍ୟପାନ କରନ୍ତି ନାହିଁ ତ?