ପୁରୁଲିଆ: ପଶ୍ଚିମବଙ୍ଗର ପୁରୁଲିଆ ଜିଲ୍ଲାରେ ଶୁକ୍ରବାର ସକାଳେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ୯ ଜଣଙ୍କର ମୃତ୍ୟୁ ହୋଇଛି। ମୃତକମାନେ ହେଲେ ନିମଡିହ ଥାନା ଅନ୍ତର୍ଗତ ଲକାଡି ଗ୍ରାମର ତିଲାଇତାଣ୍ଡର ବିରୁ ମହାତୋ, ଅଜୟ ମହାତୋ, ବିଜୟ ମହାତୋ, ସ୍ୱପନ ମହାତୋ, ଗୁରୁପଦ ମହାତୋ, ଶଶାଙ୍କ ମହାତୋ, ଚିତ୍ତ ମହାତୋ, କୃଷ୍ଣ ମହାତୋ ଏବଂ ନିମଡିହ ଥାନା ଅନ୍ତର୍ଗତ ରଘୁନାଥପୁରର ବାସିନ୍ଦା ଚନ୍ଦ୍ରମୋହନ ମହାତୋ। 

ପୁରୁଲିଆ-ଜମସେଦପୁର ୧୮ ନମ୍ବର ଜାତୀୟ ରାଜପଥର ବଳରାମପୁର ଥାନା ଅଞ୍ଚଳର ନାମସୋଲ ପ୍ରାଥମିକ ବିଦ୍ୟାଳୟ ନିକଟରେ ଏହି ଦୁର୍ଘଟଣା ଘଟିଛି। ପୁରୁଲିଆରୁ ଝାଡ଼ଖଣ୍ଡ ଅଭିମୁଖେ ଏକ କାରରେ ୯ ଜଣ ଯାତ୍ରା କରୁଥିଲେ। ବଳରାମପୁର ଥାନା ଅଞ୍ଚଳର ନାମସୋଲ ପ୍ରାଥମିକ ବିଦ୍ୟାଳୟ ନିକଟରେ କାରଟି ପହଞ୍ଚିଥିବା ବେଳେ ସମ୍ମୁଖରୁ ଆସୁଥିବା ଏକ ଦ୍ରୁତଗାମୀ ଟ୍ରକ୍ ଧକ୍କା ଦେଇଥିଲା। ଏହା ଏତେ ଜୋରଦାର ଥିଲା ଯେ କାରଟି ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଥିଲା।

ସୂଚନା ପାଇ ପୋଲିସ ଏବଂ ସ୍ଥାନୀୟ ଲୋକମାନେ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ, ଯେଉଁଠାରେ ଡାକ୍ତର ସମସ୍ତ ନଅ ଜଣ ଯାତ୍ରୀଙ୍କୁ ମୃତ ଘୋଷଣା କରିଥିଲେ। ପୋଲିସ ଟ୍ରକକୁ ଜବତ କରିଛି। ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। 

ଘଟଣାର ସୂଚନା ପାଇବା ପରେ ତିଲାଇତାଣ୍ଡ ଗାଁରେ ଶୋକର ଛାୟା ଖେଳିଯାଇଛି। ସମସ୍ତ ଲୋକ ଇଚ୍ଛାଗଡ଼ ଥାନା ଚିରୁଗୋଡା ଗ୍ରାମରୁ ବାରବଜାର ଥାନାର ଆଡାବଣା ଗ୍ରାମକୁ ବାରତରେ ଯାଇଥିଲେ। ଫେରିବା ସମୟରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଥିଲା। ପୋଲିସ ସମସ୍ତ ମୃତଦେହକୁ ହେପାଜତକୁ ନେଇ ପୋଷ୍ଟମର୍ଟମ ପାଇଁ ହସ୍ପିଟାଲର ଶବଗୃହରେ ରଖିଛି।

ଅଧିକ ପଢ଼ନ୍ତୁ: ଆମେ ଇରାନର ସମସ୍ତ ପରମାଣୁ ସ୍ଥାନକୁ ଧ୍ୱଂସ କରିପାରିବୁ