ଦୁବାଇ, ମଧ୍ୟ ପ୍ରାଚ୍ୟରେ ଜାରି ରହିଥିବା ଉତ୍ତେଜନା ମଧ୍ୟରେ UAE ଏବଂ ଇରାନର ଶତ୍ରୁତା ସ୍ପଷ୍ଟ ଭାବେ ସାମ୍ନାକୁ ଆସିଛି। ଦୁଇ ଦେଶର ସମ୍ପର୍କ ଇତିହାସର ସବୁଠାରୁ ଖରାପ ସ୍ତରରେ ପହଞ୍ଚିଛି। ବୁଧବାର ଦିନ ତିନୋଟି ପ୍ରମୁଖ ଏୟାରଲାଇନ୍ସ ସୂଚନା ଦେଇଛନ୍ତି ଯେ, ଯୁଦ୍ଧ କାରଣରୁ UAE ଇରାନୀମାନଙ୍କୁ ନିଜ ଦେଶରେ ପ୍ରବେଶ କରିବା କିମ୍ବା ତା ଦେଶ ଦେଇ ଯାତ୍ରା କରିବା ଉପରେ ରୋକ ଲଗାଇଛି। ଦୂରଗାମୀ ଏୟାରଲାଇନ୍ ଏମିରେଟ୍ସ ଏବଂ ଏତିହାଦ୍ ସହିତ କମ୍ ଖର୍ଚ୍ଚ ବିଶିଷ୍ଟ ଏୟାରଲାଇନ୍ ଫ୍ଲାଇ ଦୁବାଇ ନିଜ ୱେବସାଇଟ୍‌ରେ ଏହି ଘୋଷଣା କରିଛନ୍ତି।

ଇରାନ ଏବଂ UAEର ଏହି ଶତ୍ରୁତା କୌଣସି ନୂଆ ନୁହେଁ। ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ ଅନୁଯାୟୀ, UAE ଆମେରିକାକୁ ଇରାନ ସହ ଯୁଦ୍ଧ ଜାରି ରଖିବାକୁ ଅପିଲ୍ କରିଛି। ଏହାର ବଦଳରେ ଆମେରିକାକୁ ସାମରିକ ସହାୟତା ପ୍ରଦାନ କରିବାକୁ ପ୍ରସ୍ତାବ ଦେଇଛି। UAE ଚାହୁଁଛି ଯେ ଇରାନ ସମ୍ପୂର୍ଣ୍ଣ ଭାବେ ବରବାଦ ହୋଇଯାଉ। ଦୁଇ ଦେଶ ମଧ୍ୟରେ ୧୨୦ ବର୍ଷ ପୁରୁଣା ଶତ୍ରୁତା ରହିଛି।

ପ୍ରକୃତରେ ୧୯୦୫ ମସିହାରେ ଇରାନ ଅଲ-ମୁସା, ଦ ଗ୍ରେଟର ଏବଂ ତୁମ୍ବ ଦ୍ୱୀପ ଉପରେ ନିଜର ଦାବି ଉପସ୍ଥାପନ କରିଥିଲା। ସେହି ସମୟରେ ବ୍ରିଟେନର ସହାୟତାରେ UAE ଏହି ଦ୍ୱୀପଗୁଡ଼ିକୁ ରକ୍ଷା କରିବାରେ ସଫଳ ହୋଇଥିଲା, କିନ୍ତୁ ୧୯୭୧ ମସିହାରେ ଇରାନ ଏହା ଉପରେ ନିଜର ନିୟନ୍ତ୍ରଣ ହାସଲ କରିନେଲା। ଏହି ତିନୋଟି ଯାକ ଦ୍ୱୀପକୁ ପାରସ୍ୟ ଉପସାଗରରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନେ କରାଯାଏ। ଏହି ଦ୍ୱୀପଗୁଡ଼ିକ ହୋର୍ମୁଜ୍‌ର ପ୍ରବେଶ ପଥ  ଅଟେ।

ଇରାନ ସହ କାହିଁକି ଶତ୍ରୁତା ରଖୁଛି UAE?

ଇରାନ ,୩୦ ନଭେମ୍ବର ୧୯୭୧ରେ ବ୍ରିଟିଶ ସେନାବାହିନୀ ସେହି ଅଞ୍ଚଳରୁ ପ୍ରତ୍ୟାହାର କରିବାର ତୁରନ୍ତ ପରେ ସାମରିକ କାର୍ଯ୍ୟାନୁଷ୍ଠାନ ଜରିଆରେ ଆବୁ ମୁସା, ଗ୍ରେଟର ତୁମ୍ବ ଏବଂ ଲେସର ତୁମ୍ବ ଦ୍ୱୀପଗୁଡ଼ିକୁ ଦଖଲ କରିନେଇଥିଲା। ଏହି କାର୍ଯ୍ୟାନୁଷ୍ଠାନ ସମୟରେ ଗ୍ରେଟର ତୁମ୍ବରେ ଏକ ସଂକ୍ଷିପ୍ତ ସଶସ୍ତ୍ର ସଂଘର୍ଷ ହୋଇଥିଲା, ଯେଉଁଥିରେ କିଛି ଲୋକ ମୃତାହତ ହୋଇଥିଲେ।

ଏହି ତିନୋଟି ଦ୍ୱୀପର ଗୁରୁତ୍ୱ ମୁଖ୍ୟତଃ ପାରସ୍ୟ ଉପସାଗରରେ ବହୁତ ଅଧିକ ଏବଂ ଏଗୁଡ଼ିକ ହୋର୍ମୁଜ୍ ଷ୍ଟ୍ରେଟ୍କୁ ନିୟନ୍ତ୍ରଣ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି। ଏହି ଦ୍ୱୀପଗୁଡ଼ିକ ଏହି ଅଞ୍ଚଳରେ ନୌସେନା ବାଣିଜ୍ୟ ପାଇଁ ଏକ କରିଡର ତିଆରି କରନ୍ତି, ଯାହାର ଅର୍ଥ ହେଉଛି ଏଗୁଡ଼ିକୁ ଦଖଲ କରିବା ଏକ ଗୁରୁତ୍ୱପୂର୍ଣ୍ଣ ସମ୍ପତ୍ତି ଯାହାକୁ ଉଭୟ ଶକ୍ତି ହାସଲ କରିବାକୁ ଚାହାନ୍ତି।

ଆର୍ଥିକ ଦୃଷ୍ଟିକୋଣରୁ ଆରବ ଉପଦ୍ୱୀପ ଏବଂ ଇରାନରେ ତୈଳ ସନ୍ଧାନ ଏହି ଛୋଟ ଦ୍ୱୀପଗୁଡ଼ିକର ଗୁରୁତ୍ୱକୁ ବହୁଗୁଣିତ କରିଦେଇଛି। ବିଶ୍ୱର ପ୍ରାୟ ୪୦ ପ୍ରତିଶତ ତୈଳ ବାଣିଜ୍ୟ ହୋର୍ମୁଜ୍ ଷ୍ଟ୍ରେଟ୍ ଦେଇ ଗତି କରିଥାଏ। ଏହା ବ୍ୟତୀତ, ଏହା ଜଣାପଡ଼ୁଛି ଯେ ଆବୁ ମୁସା ଦ୍ୱୀପର ଆଞ୍ଚଳିକ ଜଳରାଶିରେ ତୈଳ ଏବଂ ଗ୍ୟାସ୍‌ର ପ୍ରଚୁର ସମ୍ବଳ ରହିଛି। ନିଜର ସ୍ଥିତି କାରଣରୁ ଏହି ଦ୍ୱୀପଗୁଡ଼ିକର ଗୁରୁତ୍ୱପୂର୍ଣ୍ଣ ସାମରିକ କ୍ଷମତା ମଧ୍ୟ ରହିଛି। ଏଠାରେ ଅବସ୍ଥିତ ସାମରିକ ଘାଟିଗୁଡ଼ିକ ଏହି ଅଞ୍ଚଳରେ ଯାତାୟାତ କରୁଥିବା ସମସ୍ତ ପରିବହନ ଉପରେ ପ୍ରବଳ ନିୟନ୍ତ୍ରଣ ରଖିପାରିବେ।

କ’ଣ ଇରାନ ବିରୋଧରେ ଯୁଦ୍ଧରେ ସାମିଲ ହେବ UAE?

ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ ଏମିରାତି ଅଧିକାରୀଙ୍କ ସୂତ୍ରରୁ ଜଣାଇଛି ଯେ, UAE ଏବେ କୁଆଡ଼େ ଜାତିସଂଘ ସୁରକ୍ଷା ପରିଷଦ (UNSC)ରୁ ଏକ ପ୍ରସ୍ତାବ ପାରିତ କରିବାକୁ ଚେଷ୍ଟା କରୁଛି, ଯାହାଦ୍ୱାରା ଇରାନ ବିରୋଧରେ ଏଭଳି କାର୍ଯ୍ୟାନୁଷ୍ଠାନ ପାଇଁ ଅନୁମତି ମିଳିପାରିବ। ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, UAEର କୂଟନୀତିଜ୍ଞମାନେ ଆମେରିକା ଏବଂ ୟୁରୋପ ତଥା ଏସିଆର ସାମରିକ ଶକ୍ତିମାନଙ୍କୁ ଏକଜୁଟ ହୋଇ ଏକ ମେଣ୍ଟ ଗଠନ କରିବାକୁ ଅପିଲ୍ କରିଛନ୍ତି, ଯାହାଦ୍ୱାରା ହୋର୍ମୁଜ୍ ଷ୍ଟ୍ରେଟ୍‌କୁ ପୁଣିଥରେ ଖୋଲାଯାଇପାରିବ।

କୁହାଯାଉଛି ଯେ UAE ବିଶ୍ୱାସ କରେ କି ଏସିଆ ଏବଂ ୟୁରୋପର ଯେଉଁ ଦେଶଗୁଡ଼ିକ ଏବେ ଏହି ମାମଲାରେ ସଙ୍କୋଚବୋଧ କରୁଛନ୍ତି, ସେମାନେ ମଧ୍ୟ ଏହି ଜଳପଥକୁ ସଫା କରିବା ପ୍ରୟାସରେ ସାମିଲ ହୋଇପାରିବେ, ଯଦି ଜାତିସଂଘ ସୁରକ୍ଷା ପରିଷଦ ଏହାର ମଞ୍ଜୁରୀ ଦେଇଦିଏ।