ଇସ୍ରାଏଲ ରାଜନୀତିରେ ବଡ଼ ହଲଚଲ। ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କୁ ଲାଗିଛି ଜୋରଦାର ଝଟକା। ସରକାର ଗଠନ ପାଇଁ ବିରୋଧୀ ନେତା ଗାଡି ଆଇଜେନକୋଟଙ୍କୁ ପ୍ରଥମ ସୁଯୋଗ ଦେଇଛନ୍ତି ଇସ୍ରାଏଲର ରାଷ୍ଟ୍ରପତି ଆଇଜାକ୍ ହର୍ଜୋଗ୍। ନିର୍ବାଚନ ପରେ କୌଣସି ରାଜନୈତିକ ମେଣ୍ଟ ସଂସଦରେ ସ୍ପଷ୍ଟ ବହୁମତ ହାସଲ କରିନଥିବାରୁ ଏବେ ସରକାର ଗଠନକୁ ନେଇ ଆରମ୍ଭ ହୋଇଛି ରାଜନୈତିକ ଅଙ୍କକଷା।

ରାଷ୍ଟ୍ରପତିଙ୍କ କାର୍ଯ୍ୟାଳୟ ଅନୁସାରେ, ଅକ୍ଟୋବର ୨୭ରେ ହୋଇଥିବା ନିର୍ବାଚନ ପରେ ୬୭ ଜଣ ସାଂସଦ ଆଇଜେନକୋଟଙ୍କୁ ସମର୍ଥନ କରିଥିବା ବେଳେ ୪୬ ଜଣ ସାଂସଦ ନେତାନ୍ୟାହୁଙ୍କ ସପକ୍ଷରେ ମତ ଦେଇଥିଲେ। ଏହାକୁ ଆଧାର କରି ରାଷ୍ଟ୍ରପତି ଆଇଜେନକୋଟଙ୍କୁ ସରକାର ଗଠନ ପାଇଁ ପ୍ରଥମ ସୁଯୋଗ ଦେଇଛନ୍ତି।

୨୮ ଦିନ ମଧ୍ୟରେ ଗଢ଼ିବାକୁ ପଡ଼ିବ ସରକାର

ପୂର୍ବତନ ସେନାମୁଖ୍ୟ ଆଇଜେନକୋଟଙ୍କୁ ସରକାର ଗଠନ ପାଇଁ ୨୮ ଦିନ ସମୟ ମିଳିଛି। ଆବଶ୍ୟକ ପଡ଼ିଲେ ଆଉ ୧୪ ଦିନ ସମୟ ବୃଦ୍ଧି କରାଯାଇପାରିବ। ତେବେ ଭିନ୍ନ ଭିନ୍ନ ବିଚାରଧାରା ଓ ରାଜନୈତିକ ସ୍ୱାର୍ଥ ରଖୁଥିବା ଦଳଗୁଡ଼ିକୁ ଏକାଠି କରି ସରକାର ଗଠନ କରିବା ତାଙ୍କ ପାଇଁ ବଡ଼ ଚ୍ୟାଲେଞ୍ଜ ହେବ।

ରାଷ୍ଟ୍ରପତିଙ୍କ ଘୋଷଣା ପରେ ଆଇଜେନକୋଟ କହିଛନ୍ତି, ଏହା ଏକ ଜାତୀୟ ଜରୁରୀକାଳୀନ ସରକାର ଗଠନ କରିବାର ସମୟ। ଦେଶବାସୀଙ୍କ ଭରସା ଜିତିବା ପାଇଁ ସେ ସମସ୍ତ ପ୍ରୟାସ କରିବେ ବୋଲି କହିଛନ୍ତି।

ସରକାର ଗଠନ ନହେଲେ କ'ଣ ହେବ?

ଯଦି ଆଇଜେନକୋଟ ସରକାର ଗଠନରେ ବିଫଳ ହୁଅନ୍ତି, ତେବେ ରାଷ୍ଟ୍ରପତି ଅନ୍ୟ କୌଣସି ସାଂସଦଙ୍କୁ ସୁଯୋଗ ଦେଇପାରିବେ। ଏହି ପରିସ୍ଥିତିରେ ନେତାନ୍ୟାହୁଙ୍କୁ ମଧ୍ୟ ପୁଣିଥରେ ସରକାର ଗଠନ ପାଇଁ ସୁଯୋଗ ମିଳିପାରେ। 

୨୦୨୩ ଅକ୍ଟୋବରରେ ଗାଜା ଯୁଦ୍ଧ ଆରମ୍ଭ ହେବା ପରେ ଇସ୍ରାଏଲରେ ଏହା ପ୍ରଥମ ନିର୍ବାଚନ। ଯୁଦ୍ଧ ପରିଚାଳନା ଓ ଦେଶର ସୁରକ୍ଷା ବ୍ୟବସ୍ଥାକୁ ନେଇ ନେତାନ୍ୟାହୁ ସରକାର ଦୀର୍ଘଦିନ ଧରି ଚାପରେ ରହିଛନ୍ତି। ଏବେ ସମସ୍ତଙ୍କ ନଜର ଆଇଜେନକୋଟଙ୍କ ଉପରେ। ସେ ବିଭିନ୍ନ ଦଳକୁ ଏକାଠି କରି ସରକାର ଗଢ଼ିପାରିବେ ନା ଇସ୍ରାଏଲ ପୁଣି ରାଜନୈତିକ ଅନିଶ୍ଚିତତା ଆଡ଼କୁ ଗତି କରିବ, ତାହା ଆଗାମୀ ଦିନରେ ସ୍ପଷ୍ଟ ହେବ।