ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ହୋଇଥିବା ସାମରିକ ସଂଘର୍ଷକୁ ନେଇ ଏକ ବଡ଼ ଖୁଲାସା ହୋଇଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ‘ଅପରେସନ୍ ସିନ୍ଦୂର’ ସମୟରେ ପାକିସ୍ତାନର ପରମାଣୁ ଅସ୍ତ୍ରଶସ୍ତ୍ର ଏବଂ ଏହାର ପ୍ରତିରୋଧକ କ୍ଷମତା ସମ୍ପୂର୍ଣ୍ଣ ପ୍ରଭାବହୀନ ବା ଅକାମୀ ସାବ୍ୟସ୍ତ ହୋଇଛି। ଭାରତର ଦୃଢ଼ ଜବାବୀ କାର୍ଯ୍ୟାନୁଷ୍ଠାନ ଆଗରେ ପାକିସ୍ତାନର ପରମାଣୁ ଧମକ ସମ୍ପୂର୍ଣ୍ଣ ଭାବେ ଫେଲ୍ ମାରିଥିବା ଏହି ରିପୋର୍ଟରେ ସ୍ପଷ୍ଟ କରାଯାଇଛି।

ପାକିସ୍ତାନର ରଣନୀତିରେ ପରିବର୍ତ୍ତନ ଏବଂ ପ୍ରକୃତ ସତ୍ୟ

ରିପୋର୍ଟରେ ପ୍ରକାଶ ପାଇଛି ଯେ ପାକିସ୍ତାନର ସାମରିକ ନେତୃତ୍ୱ ଦୀର୍ଘ ଦିନରୁ ନିଜର ପରମାଣୁ ଅସ୍ତ୍ରକୁ ଏକ ସୁରକ୍ଷା କବଚ ଭାବରେ ବ୍ୟବହାର କରିଆସୁଥିଲା। ମାତ୍ର ଭାରତର କଡ଼ାକଡ଼ି ସାମରିକ ପଦକ୍ଷେପ ଏବଂ ‘ଅପରେସନ୍ ସିନ୍ଦୂର’ ସମୟରେ ଏହି ଧାରଣା ଭୁଶୁଡ଼ି ପଡ଼ିଛି। ପାକିସ୍ତାନ ସେନା ଏବଂ ସରକାର ଏହି ସଂଘର୍ଷକୁ ନେଇ ବିଭିନ୍ନ ପ୍ରକାରର ଦାବି କରିଥିଲେ ମଧ୍ୟ, ବାସ୍ତବ ସ୍ଥିତି ସମ୍ପୂର୍ଣ୍ଣ ଭିନ୍ନ ଥିଲା ବୋଲି ପ୍ରକାଶ ପାଇଛି।

ଭାରତ ବିରୁଦ୍ଧରେ ପାକିସ୍ତାନର ପରମାଣୁ ଅସ୍ତ୍ର ପ୍ରୟୋଗ କରିବାର ଭୟ ଦେଖାଇବାର ରଣନୀତି ଏଥର ଆଉ କାମ କରିନାହିଁ। ଭାରତୀୟ ସେନାର ପରାକ୍ରମ ଆଗରେ ପାକିସ୍ତାନର ଏହି ଅହଂକାର ଚୂର୍ଣ୍ଣ ହୋଇଯାଇଛି।ପାକିସ୍ତାନୀ ସେନା ବର୍ତ୍ତମାନ ନିଜର ଦୁର୍ବଳ ପ୍ରତିରୋଧକ କ୍ଷମତାକୁ ନେଇ ଗଭୀର ଚିନ୍ତାରେ ଅଛି। ଦେଶ ଭିତରେ ବଢ଼ୁଥିବା ଅସନ୍ତୋଷ ଏବଂ ସାମରିକ ବିଫଳତାକୁ ଲୁଚାଇବା ପାଇଁ ସେମାନେ ବିଭିନ୍ନ ପ୍ରକାରର ମିଥ୍ୟା ପ୍ରଚାର କରୁଥିବା ଜଣାପଡ଼ିଛି।

ରିପୋର୍ଟ ଅନୁଯାୟୀ, ଏହି ସଂଘର୍ଷ ପରେ ପାକିସ୍ତାନର ସାମରିକ ନେତୃତ୍ୱ ବୁଝିସାରିଛି ଯେ ଯୁଦ୍ଧ ସମୟରେ ପରମାଣୁ ଅସ୍ତ୍ର କୌଣସି ବଡ଼ କାମରେ ଆସେ ନାହିଁ। ସେଥିପାଇଁ ବର୍ତ୍ତମାନ ପାକିସ୍ତାନ ପରମାଣୁ ପ୍ରଦର୍ଶନ ଅପେକ୍ଷା ପାରମ୍ପରିକ ସାମରିକ ଶକ୍ତି ଏବଂ କ୍ଷେପଣାସ୍ତ୍ର କ୍ଷମତା ବୃଦ୍ଧି କରିବା ଦିଗରେ ଅଧିକ ଧ୍ୟାନ ଦେଉଛି।