ୱାଶିଂଟନ୍‌: ଆମେରିକାର କଲୋରାଡୋ ରାଜ୍ୟର ବୋଲ୍ଡର୍ ସହରରେ ରବିବାର ଇସ୍ରାଏଲୀ ବନ୍ଧକଙ୍କ ମୁକ୍ତି ଦାବି କରୁଥିବା ଯିହୁଦୀ ସମ୍ପ୍ରଦାୟର ଲୋକଙ୍କ ଉପରେ ଆକ୍ରମଣ ହେବା ପରେ ବିଶୃଙ୍ଖଳା ସୃଷ୍ଟି ଦେଖାଯାଇଛି। ଲୋକମାନେ ଶାନ୍ତିପୂର୍ଣ୍ଣ ଭାବରେ ପ୍ରତିବାଦ କରୁଥିବା ବେଳେ ହଠାତ୍ ସେମାନଙ୍କ ଉପରେ ଆକ୍ରମଣ ହୋଇଥିଲା। ଏହି ଘଟଣାରେ ୬ ଜଣ ଗୁରୁତର ଭାବରେ ପୋଡ଼ି ଯାଇଥିଲେ ଏବଂ ଅନେକ ଆହତ ହୋଇଥିଲେ। ଏଫବିଆଇ ଏହି ଆକ୍ରମଣକୁ "ଇଚ୍ଛାକୃତ ଆତଙ୍କବାଦୀ ଆକ୍ରମଣ" ବୋଲି ବର୍ଣ୍ଣନା କରିଛି।

ଏଫବିଆଇ ଅନୁଯାୟୀ, ଏହି ଆକ୍ରମଣରେ ୪୫ ବର୍ଷୀୟ ମହମ୍ମଦ ସାବ୍ରି ସୋଲିମାନକୁ ଗିରଫ କରାଯାଇଛି। ସୋଲିମାନ ପର୍ଲ ଷ୍ଟ୍ରିଟରେ ଚାଲିଥିବା ଶାନ୍ତିପୂର୍ଣ୍ଣ ଶୋଭାଯାତ୍ରାରେ ଏକ ମୋଲୋଟୋଭ୍ କକଟେଲ ଫିଙ୍ଗିଥିବା ଅଭିଯୋଗ ହୋଇଛି, ଯାହା ଫଳରେ ପିଲାମାନଙ୍କ ସମେତ ଅନେକ ପ୍ରତିବାଦକାରୀ ଗୁରୁତର ଭାବରେ ପୋଡ଼ି ଯାଇଥିଲେ।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ ଆକ୍ରମଣକାରୀ 'ମୁକ୍ତ ପାଲେଷ୍ଟାଇନ' ସ୍ଲୋଗାନ ଦେଇ ଜଣେ ଲ୍ୟାଣ୍ଡସ୍କେପର୍ ପୋଷାକ ପିନ୍ଧି ବିକ୍ଷୋଭକାରୀଙ୍କ ମଧ୍ୟରେ ପହଞ୍ଚିଥିଲା। ହଠାତ୍ ସେ ଏକ ଅଗ୍ନିବାହୀ ଅସ୍ତ୍ରରେ ଆକ୍ରମଣ କଲେ। ଏହି ଘଟଣା ‘ରନ୍ ଫର୍ ଦେୟାର ଲାଇଭ୍ସ" କାର୍ଯ୍ୟକ୍ରମ ସମୟରେ ଘଟିଥିଲା, ଯାହା ଅକ୍ଟୋବର ୭ ତାରିଖରେ ଗାଜାରେ ଅପହରଣ ହୋଇଥିବା ଇସ୍ରାଏଲୀ ବନ୍ଧକଙ୍କ ସ୍ମୃତିରେ ଆୟୋଜିତ ହୋଇଥିଲା।

ପୋଲିସ କହିଛି ଯେ ଏହା ଘଟଣାସ୍ଥଳକୁ ପହଞ୍ଚିଛି ଏବଂ ତଦନ୍ତ ଚାଲିଛି। ଅଧିକାରୀଙ୍କ ଅନୁଯାୟୀ, ଆକ୍ରମଣ ବିଷୟରେ ଅଧିକ ସୂଚନା ପ୍ରଦାନ କରିବା ପାଇଁ ଏକ ସାମ୍ବାଦିକ ସମ୍ମିଳନୀ କରାଯିବ। ଏଫବିଆଇ ନିର୍ଦ୍ଦେଶକ କାଶ୍ ପଟେଲ ସୋସିଆଲ ମିଡିଆରେ କହିଛନ୍ତି, ଆମର ଏଜେଣ୍ଟ ଏବଂ ସ୍ଥାନୀୟ ସୁରକ୍ଷା ଏଜେନ୍ସିଗୁଡ଼ିକ ଘଟଣାସ୍ଥଳରେ ପହଞ୍ଚିଛନ୍ତି। ସୂଚନା ମିଳିବା ପରେ ଆମେ ଅପଡେଟ୍ ସେୟାର କରିବୁ।

ଅଧିକ ପଢ଼ନ୍ତୁ: ସିକ୍କିମରେ ୩୨ ଜଣଙ୍କ ମୃତ୍ୟୁ