ସିଓଲ: ଦକ୍ଷିଣ କୋରିଆରେ ଅନୁଷ୍ଠିତ ସ୍ୱତନ୍ତ୍ର ରାଷ୍ଟ୍ରପତି ନିର୍ବାଚନରେ ଲିବରାଲ୍ ଡେମୋକ୍ରାଟିକ୍ ପାର୍ଟିର ପ୍ରାର୍ଥୀ ଲି ଜାଏ-ମ୍ୟୁଙ୍ଗ୍ ରକ୍ଷଣଶୀଳ ପ୍ରାର୍ଥୀ କିମ୍ ମୁନ୍-ସୁଙ୍କ ଠାରୁ ବିପୁଳ ବ୍ୟବଧାନରେ ବିଜୟୀ ହୋଇଛନ୍ତି। ରିପୋର୍ଟ ଲେଖାଯିବା ବେଳକୁ ୮୫% ରୁ ଅଧିକ ଭୋଟ୍ ଗଣନା ସମାପ୍ତ ହୋଇଛି ଏବଂ କିମ୍ ମୁନ୍-ସୁ ତାଙ୍କର ପରାଜୟକୁ ସ୍ୱୀକାର କରିଛନ୍ତି। ଏହି ବିଜୟ କେବଳ ଏକ ରାଜନୈତିକ ପରିବର୍ତ୍ତନ ନୁହେଁ ବରଂ ଏକ ଗଣତାନ୍ତ୍ରିକ ପୁନର୍ଜାଗରଣର ପ୍ରତୀକ ପାଲଟିଛି।

ଦକ୍ଷିଣ କୋରିଆରେ ଏକ ସ୍ୱତନ୍ତ୍ର ନିର୍ବାଚନର ଆବଶ୍ୟକତା ସେତେବେଳେ ଦେଖାଦେଲା ଯେତେବେଳେ ପୂର୍ବତନ ରାଷ୍ଟ୍ରପତି ୟୁନ୍ ସୁକ୍ ୟୋଲ୍ ଗତବର୍ଷ ଡିସେମ୍ବର ୩ରେ ସାମରିକ ଆଇନ ଲାଗୁ କରିଥିଲେ, ଯାହା ସାରା ଦେଶରେ ଗଣତନ୍ତ୍ରର ମୂଳଦୁଆକୁ ହଲାଇ ଦେଇଥିଲା। ୧୯୮୭ରେ ଦକ୍ଷିଣ କୋରିଆରେ ଗଣତନ୍ତ୍ର ପୁନରୁଦ୍ଧାର ପରେ ଏହା ପ୍ରଥମ ଥର ଥିଲା ଯେତେବେଳେ ଜଣେ ରାଷ୍ଟ୍ରପତି ସେନା ସାହାଯ୍ୟରେ ଶାସନ କରିବାକୁ ଚେଷ୍ଟା କରିଥିଲେ।

ଦକ୍ଷିଣ କୋରିଆର ବିରୋଧୀ ଡେମୋକ୍ରାଟିକ୍ ପାର୍ଟିର ନେତୃତ୍ୱ ନେଇଥିଲେ ଲି ଜାଏ-ମ୍ୟୁଙ୍ଗ, ଯିଏ ସଂସଦରେ ୟୁନ୍‌ଙ୍କ ବିରୋଧରେ ମହାଭିଯୋଗ ପ୍ରସ୍ତାବ ପାରିତ କରିଥିଲେ। ଗତ ଏପ୍ରିଲ୍‌ରେ, ସାମ୍ବିଧାନିକ ଅଦାଲତ ୟୁନ୍‌ଙ୍କୁ ପଦରୁ ବହିଷ୍କାର କରିଥିଲେ। ତାଙ୍କ ବିରୁଦ୍ଧରେ ଦେଶଦ୍ରୋହ ଏବଂ କ୍ଷମତାର ଅପବ୍ୟବହାରର ଫୌଜଦାରୀ ମାମଲା ଆରମ୍ଭ ହୋଇଥିଲା। ଏହି ରାଜନୈତିକ ଅସ୍ଥିରତା ଯୋଗୁଁ, ଚଳିତ ଜୁନ୍‌ରେ ସ୍ୱତନ୍ତ୍ର ନିର୍ବାଚନ କରିବା ଜରୁରୀ ହୋଇପଡ଼ଥିଲା।

ଲି ଜାଏ-ମ୍ୟୁଙ୍ଗ ତାଙ୍କ ନିର୍ବାଚନ ଅଭିଯାନକୁ "ଜନତା ନ୍ୟାୟ ଦିବସ" ବୋଲି କହିଥିଲେ ଏବଂ ୟୁନ୍‌ଙ୍କ ସରକାରଙ୍କୁ ଅଗଣତାନ୍ତ୍ରିକ ମାନସିକତା, ନ୍ୟାୟିକ ପ୍ରତିଷ୍ଠାନ ପ୍ରତି ଅବମାନନା ଏବଂ ଲୋକଙ୍କ ଅଧିକାର ଦମନ କରୁଥିବା ଭାବରେ ଉପସ୍ଥାପନ କରିଥିଲେ। ସେ କହିଥିଲେ ଯେ ଏହି ନିର୍ବାଚନ କେବଳ କ୍ଷମତା ପରିବର୍ତ୍ତନ ନୁହେଁ, ବରଂ ଲୋକଙ୍କ ଆତ୍ମସମ୍ମାନର ପୁନରାବୃତ୍ତି।

ଏହି ସ୍ୱତନ୍ତ୍ର ନିର୍ବାଚନରେ ୮୦%ରୁ ଅଧିକ ଭୋଟର ମତଦାନ ହୋଇଥିଲା, ଯାହା ୧୯୯୭ ପରଠାରୁ ସର୍ବାଧିକ। ଏହା ଦର୍ଶାଉଛି ଯେ ଜନସାଧାରଣ ରାଜନୈତିକ ଅସ୍ଥିରତାରେ ବିରକ୍ତ ଥିଲେ। ସେମାନେ ଗଣତନ୍ତ୍ରକୁ ସୁରକ୍ଷା ଦେବା ପାଇଁ ମତଦାନ କେନ୍ଦ୍ରକୁ ଆସିଥିଲେ ଏବଂ ଲି ଜାଏ-ମ୍ୟୁଙ୍ଗଙ୍କୁ ନୂତନ ନେତା ଭାବରେ ନିର୍ବାଚିତ କରିବା ପାଇଁ ଏକତ୍ରିତ ହୋଇଥିଲେ। ଏହା କେବଳ ଭୋଟ ଦାନ ନୁହେଁ ବରଂ ଏକ ଗଣ ବିଦ୍ରୋହ ଏବଂ ଗଣତାନ୍ତ୍ରିକ ଆନ୍ଦୋଳନ ଥିଲା।

ଦକ୍ଷିଣ କୋରିଆରେ ନିର୍ବାଚନ ବିଜୟ ପୂର୍ବରୁ, ଲି ଜାଏ-ମ୍ୟୁଙ୍ଗ କହିଥିଲେ ଯେ ସେ ଦେଶରେ ରାଜନୈତିକ ଧ୍ରୁବୀକରଣକୁ ସମାପ୍ତ କରିବାକୁ ଚାହାଁନ୍ତି। ସେ ଅର୍ଥନୈତିକ ପୁନରୁଦ୍ଧାର ଉପରେ ବିଶେଷ ଧ୍ୟାନ ଦେବେ। ବିଶେଷକରି ଯୁବପିଢ଼ି ଏବଂ ମଧ୍ୟବିତ୍ତ ବର୍ଗ ପାଇଁ କାମ କରିବା ପ୍ରଥମ ପ୍ରାଥମିକତା ହେବ। ଉତ୍ତର କୋରିଆ ସହିତ ଶାନ୍ତି ଏବଂ ସହଯୋଗର ଉପାୟ ଅନୁସନ୍ଧାନ କରାଯିବ। ତଥାପି, ଏହା ଦେଖିବା ଆକର୍ଷଣୀୟ ହେବ ଯେ ତାଙ୍କର ନୀତି ଦକ୍ଷିଣ କୋରିଆକୁ ସ୍ଥିରତା, ସୁରକ୍ଷା ଏବଂ ସମୃଦ୍ଧିର ଏକ ନୂତନ ଦିଗରେ ନେଇପାରିବ କି ନାହିଁ।

ୟୁନ୍ ସୁକ୍ ୟୋଲଙ୍କ ଘନିଷ୍ଠ ବନ୍ଧୁ ଏବଂ ପୂର୍ବତନ ଶ୍ରମ ମନ୍ତ୍ରୀ କିମ୍ ମୁନ୍-ସୁ ତାଙ୍କ ପରାଜୟକୁ ଗ୍ରହଣ କରିଥିଲେ ଏବଂ ଲିଙ୍କୁ ତାଙ୍କ ବିଜୟ ପାଇଁ ଅଭିନନ୍ଦନ ଜଣାଇଥିଲେ। କିମ୍ ମୁନ୍-ସୁ ରକ୍ଷଣଶୀଳ ପିପୁଲ୍ ପାୱାର ପାର୍ଟିର ପ୍ରାର୍ଥୀ ଥିଲେ। 

ଅଧିକ ପଢ଼ନ୍ତୁ: ଆଜିଠାରୁ ଷ୍ଟିଲ୍-ଆଲୁମିନିୟମ ଉପରେ ୫୦% ଶୁଳ୍କ ଲାଗୁ