ବ୍ଲାକ୍ ସିରେ ଏକ ବ୍ୟାବସାୟିକ ଜାହାଜ ଉପରେ ହୋଇଥିବା ଆକ୍ରମଣରେ ଭାରତୀୟ ନାବିକଙ୍କ ମୃତ୍ୟୁକୁ ନେଇ ଭାରତ ସରକାର କଡ଼ା ଅସନ୍ତୋଷ ପ୍ରକାଶ କରିଛନ୍ତି। ସରକାର ସ୍ପଷ୍ଟ କରିଛନ୍ତି ଯେ ବ୍ୟାବସାୟିକ ଜାହାଜ ଏବଂ ନାବିକମାନଙ୍କୁ ନିଶାନା କରିବା ଆଦୌ ଗ୍ରହଣଯୋଗ୍ୟ ନୁହେଁ। ବୈଦେଶିକ ବ୍ୟାପାର ମନ୍ତ୍ରାଳୟ (MEA) ଏହି ଘଟଣାକୁ ନିନ୍ଦା କରିବା ସହ ସାମୁଦ୍ରିକ ଗମନାଗମନ ଏବଂ ବୈଶ୍ୱିକ ବାଣିଜ୍ୟର ସୁରକ୍ଷା ସୁନିଶ୍ଚିତ କରିବାକୁ ଆହ୍ୱାନ ଦେଇଛି।

ବ୍ଲାକ୍ ସି’ରେ ଏକ ବାଣିଜ୍ୟିକ ଜାହାଜ ଉପରେ ହୋଇଥିବା ଆକ୍ରମଣରେ ଜଣେ ଭାରତୀୟ ନାବିକଙ୍କ ଜୀବନ ଯାଇଛି। ଏହି ଘଟଣାରେ ଭାରତ ସରକାର କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ବାଣିଜ୍ୟିକ ଜାହାଜ ଏବଂ ସେଥିରେ କାର୍ଯ୍ୟରତ ନାଗରିକଙ୍କୁ ଟାର୍ଗେଟ୍ କରିବା କୌଣସି ପରିସ୍ଥିତିରେ ବି ବରଦାସ୍ତ କରାଯିବ ନାହିଁ ବୋଲି ସରକାର ସ୍ପଷ୍ଟ କରିବା ସହ ନାବିକମାନଙ୍କ ସୁରକ୍ଷା ଦାବି କରିଛନ୍ତି।

ଏହି ଘଟଣା ଜୁଲାଇ ୧୮ ତାରିଖରେ ଘଟିଥିଲା। ମିଳିଥିବା ସୂଚନା ଅନୁଯାୟୀ, ବ୍ଲାକ୍ ସି ଦେଇ ଗତି କରୁଥିବା ସମୟରେ ଏକ ବ୍ୟାବସାୟିକ ଜାହାଜ ଉପରେ ଆକ୍ରମଣ କରାଯାଇଥିଲା, ଯେଉଁଥିରେ ଜଣେ ଭାରତୀୟ ନାବିକଙ୍କ ମୃତ୍ୟୁ ଘଟିଛି। ଜାହାଜ ଉପରେ ଆକ୍ରମଣ ହୋଇଥିବା ସମୟରେ ତାହା ରୁଷର ସାମୁଦ୍ରିକ ସୀମା ମଧ୍ୟରେ ଥିଲା। MV OMORFI ଜାହାଜଟି ବ୍ଲାକ୍ ସି’ରେ ଆଗକୁ ବଢ଼ୁଥିବା ବେଳେ ଏହି ଆକ୍ରମଣର ଶିକାର ହୋଇଥିଲା।

ଜାହାଜରେ ମୋଟ ୧୦ ଜଣ କ୍ରୁ ସଦସ୍ୟ ଥିଲେ

ବୈଦେଶିକ ବ୍ୟାପାର ମନ୍ତ୍ରାଳୟ (MEA) ଶୁକ୍ରବାର ସୂଚନା ଦେଇଛି ଯେ, ୧୮ ଜୁଲାଇ ୨୦୨୬ରେ ବ୍ୟାବସାୟିକ ଜାହାଜ MV OMORFI ବ୍ଲାକ୍ ସି ଦେଇ ଯାଉଥିବା ବେଳେ ଏହା ଉପରେ ଆକ୍ରମଣ ହୋଇଥିଲା। MEA ଅନୁଯାୟୀ, ସେହି ସମୟରେ ଜାହାଜଟି ରୁଷର ସାମୁଦ୍ରିକ ସୀମା ଭିତରେ ଥିଲା। ମନ୍ତ୍ରାଳୟ ଆହୁରି ଜଣାଇଛି ଯେ ଜାହାଜରେ ମୋଟ ୧୦ ଜଣ କ୍ରୁ ସଦସ୍ୟ ଥିଲେ, ଯେଉଁଥିରେ ୩ ଜଣ ଭାରତୀୟ ନାଗରିକ ସାମିଲ ଥିଲେ। ଏହି ଆକ୍ରମଣରେ ଜଣେ ଭାରତୀୟ ନାବିକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇଜଣ ଭାରତୀୟ ସୁରକ୍ଷିତ ଅଛନ୍ତି।

ଆକ୍ରମଣକୁ ନିନ୍ଦା କଲା ଭାରତ

MEA ଏହି ଆକ୍ରମଣକୁ କଡ଼ା ଭାଷାରେ ନିନ୍ଦା କରିବା ସହ ଏହାକୁ ଏକ ଗମ୍ଭୀର ଚିନ୍ତାର ବିଷୟ ବୋଲି କହିଛି। ରୁଷରେ ଥିବା ଭାରତୀୟ ଦୂତାବାସ/ମିଶନ୍ ସମ୍ପୃକ୍ତ ଅଧିକାରୀଙ୍କ ସହ ଯୋଗାଯୋଗରେ ଅଛନ୍ତି ଏବଂ ମୃତକଙ୍କ ପରିବାରକୁ ସମସ୍ତ ପ୍ରକାର ସହାୟତା ଯୋଗାଇଦେବାକୁ ଚେଷ୍ଟା କରୁଛନ୍ତି। MEA ସମସ୍ତ ପକ୍ଷକୁ ସାମୁଦ୍ରିକ ଗମନାଗମନର ସୁରକ୍ଷା ଏବଂ ଅନ୍ତର୍ଜାତୀୟ ବାଣିଜ୍ୟର ନିରବଚ୍ଛିନ୍ନ ପ୍ରବାହକୁ ସୁନିଶ୍ଚିତ କରିବା ପାଇଁ ଅନ୍ତର୍ଜାତୀୟ ନିୟମ ଓ ଦାୟିତ୍ୱ ପାଳନ କରିବାକୁ ଆହ୍ୱାନ କରିଛି।

ବୈଦେଶିକ ବ୍ୟାପାର ମନ୍ତ୍ରାଳୟର ସ୍ପୋକ୍ସପର୍ସନ୍ (ପ୍ରବକ୍ତା) ରଣଧୀର ଜୈସୱାଲ ଏକ ବିବୃତି ଜାରି କରି କହିଛନ୍ତି— “କମର୍ସିଆଲ୍ ସିପିଂକୁ ନିଶାନା କରିବା ଏବଂ ନିରୀହ ନାଗରିକ କ୍ରୁ ସଦସ୍ୟଙ୍କ ଜୀବନକୁ ବିପଦରେ ପକାଉଥିବା ଏଭଳି ଆକ୍ରମଣକୁ ଭାରତ ସ୍ପଷ୍ଟ ଭାବେ ନିନ୍ଦା କରୁଛି। ନାଭିଗେସନ୍ (ସାମୁଦ୍ରିକ ଗମନାଗମନ) ଏବଂ ଅନ୍ତର୍ଜାତୀୟ ବାଣିଜ୍ୟର ସ୍ୱାଧୀନତା ପ୍ରତି ବଢ଼ୁଥିବା ବିପଦ ଏକ ଗମ୍ଭୀର ଚିନ୍ତାର ବିଷୟ।”

ଏହାପୂର୍ବରୁ ୪ ଜଣ ଭାରତୀୟଙ୍କ ହୋଇଥିଲା ମୃତ୍ୟୁ

MV OMORFI ଉପରେ ଏହି ଆକ୍ରମଣ, MV Golden Leo ଉପରେ ହୋଇଥିବା ଆକ୍ରମଣର କିଛି ଦିନ ପରେ ଘଟିଛି, ଯେଉଁଥିରେ ୪ ଜଣ ଭାରତୀୟଙ୍କ ମୃତ୍ୟୁ ହୋଇଥିଲା। ୧୯ ଜୁଲାଇରେ MV Golden Leo ନାମକ ଏକ କାର୍ଗୋ ଜାହାଜକୁ ମଧ୍ୟ ଏହିଭଳି ନିଶାନା କରାଯାଇଥିଲା। ୟୁକ୍ରେନର ଓଡେସା ବନ୍ଦରରୁ ବାହାରିବାର କିଛି ସମୟ ପରେ ଜାହାଜଟି ଆକ୍ରମଣର ଶିକାର ହୋଇଥିଲା। ସେହି ଜାହାଜରେ ୧୭ ଜଣ କ୍ରୁ ସଦସ୍ୟ ଥିଲେ, ଯେଉଁଥିରେ ୫ ଜଣ ଭାରତୀୟ ଥିଲେ। ଏହି ଆକ୍ରମଣରେ ୪ ଜଣ ଭାରତୀୟଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଥିଲେ। ରିପୋର୍ଟ ଅନୁଯାୟୀ, ଏହା ଗିନି-ବିସାଉ ପତାକା ବିଶିଷ୍ଟ ଏକ ମର୍ଚାଣ୍ଟ ଜାହାଜ ଥିଲା ଏବଂ ସେଥିରେ ଅଧିକାଂଶ ଭାରତୀୟ ଓ ସିରିଆର ନାଗରିକ କାର୍ଯ୍ୟ କରୁଥିଲେ।