ସୁପ୍ରିମକୋର୍ଟ ବେଞ୍ଚ୍ ସମ୍ମୁଖରେ କାଗଜ ଫିଙ୍ଗିବା ଏବଂ ଗାଳି ଦେଇଥିବା ଆବେଦନକାରୀଙ୍କ ବିରୋଧରେ ସିଜେଆଇ ସୂର୍ଯ୍ୟକାନ୍ତ କୌଣସି ପଦକ୍ଷେପ ନନେବାକୁ ନିଷ୍ପତ୍ତି ଶୁଣାଇଛନ୍ତି। ଜଷ୍ଟିସ କେ.ଭି. ବିଶ୍ୱନାଥନ ଏବଂ ଜଷ୍ଟିସ ଆଲୋକ ଅରାଧେଙ୍କ ବେଞ୍ଚ୍ ସମ୍ମୁଖରେ ଜଣେ ଆବେଦନକାରୀ ଏଭଳି କାଣ୍ଡ ଭିଆଇଥିଲେ, ଯାହା ପରେ ସୁରକ୍ଷାକର୍ମୀ ତାଙ୍କକୁ ସଙ୍ଗେ ସଙ୍ଗେ ହେପାଜତକୁ ନେଇ କୋର୍ଟରୁମ୍ ବାହାରକୁ ଚାଲିଯାଇଥିଲେ। ସୁପ୍ରିମକୋର୍ଟ ରେଜିଷ୍ଟ୍ରାରଙ୍କ ପକ୍ଷରୁ ଏହି ଆବେଦନକାରୀଙ୍କ ବିରୋଧରେ ଏଫ୍ଆଇଆର୍ ରୁଜୁ କରାଯାଇପାରିଥାନ୍ତା, କିନ୍ତୁ କୌଣସି ପଦକ୍ଷେପ ନନେବାକୁ ନିଷ୍ପତ୍ତି ହୋଇଛି।

ସୁପ୍ରିମକୋର୍ଟଙ୍କ ବିଚାର ଅନୁସାରେ, ଶସ୍ତା ଲୋକପ୍ରିୟତା ହାସଲ କରିବା ପାଇଁ ମଧ୍ୟ ଏଭଳି ଘଟଣା ଘଟାଯାଇଥାଏ। ଏଭଳି ପରିସ୍ଥିତିରେ କାର୍ଯ୍ୟାନୁଷ୍ଠାନ ଗ୍ରହଣ କଲେ ସମ୍ପୃକ୍ତ ବ୍ୟକ୍ତି ନିଜ ଉଦ୍ଦେଶ୍ୟରେ ସଫଳ ହୋଇଯିବେ। ରେଜିଷ୍ଟ୍ରାରଙ୍କ ପକ୍ଷରୁ ଯେତେବେଳେ ସିଜେଆଇଙ୍କୁ ଏହି ଘଟଣା ବାବଦରେ ସୂଚନା ଦିଆଗଲା, ସେ ମଧ୍ୟ ଏହି ମାମଲାରେ ଆଗକୁ କୌଣସି ପଦକ୍ଷେପ ନନେବାକୁ ନିର୍ଦ୍ଦେଶ ଦେଇଥିଲେ।

କଣ ଅଛି ପୂରା ମାମଲା?

ବାସ୍ତବରେ, ଶୁକ୍ରବାର ଦିନ ସୁପ୍ରିମକୋର୍ଟରେ ଶୁଣାଣି ଚାଲିଥିବା ସମୟରେ ଜଣେ ଆବେଦନକାରୀ ହଙ୍ଗାମା କରିଥିଲେ। ସେ କୋର୍ଟରେ ଅପଶବ୍ଦ କହିବା ସହ କୋର୍ଟରୁମ୍ ଭିତରେ କେସ୍ ଫାଇଲ୍ ଫିଙ୍ଗି ଦେଇଥିଲେ। ସେହି ସମୟରେ ପ୍ରଧାନ ବିଚାରପତି ସୂର୍ଯ୍ୟକାନ୍ତ କୋର୍ଟରୁମ୍ରେ ଉପସ୍ଥିତ ନଥିଲେ। ଜଷ୍ଟିସ କେ.ଭି. ବିଶ୍ୱନାଥନ ଏବଂ ଜଷ୍ଟିସ ଆଲୋକ ଅରାଧେଙ୍କ ବେଞ୍ଚ୍ ଏହି ଆବେଦନର ଶୁଣାଣି କରୁଥିଲେ। ଆବେଦନକାରୀଜଣଙ୍କ କୌଣସି ଓକିଲ ନରଖି ନିଜେ ହିଁ ନିଜ କେସ୍ ଲଢ଼ୁଥିଲେ।

ଶୁଣାଣି ସମୟରେ ସେ ନିଜକୁ "ସାର୍ବଭୌମ" ବୋଲି କହି କେସ୍ ଫାଇଲର କାଗଜପତ୍ର ଗୁଡ଼ିକୁ ପବନରେ ଉଡ଼ାଇ ଦେଇଥିଲେ। ଆବେଦନକାରୀଙ୍କ ଏଭଳି ଆଚରଣ ଯୋଗୁଁ କୋର୍ଟରୁମ୍ରେ କିଛି ସମୟ ପାଇଁ ସ୍ତବ୍ଧତା ଖେଳିଯାଇଥିଲା ଏବଂ ସୁରକ୍ଷାକର୍ମୀମାନେ ତୁରନ୍ତ ତାଙ୍କକୁ କୋର୍ଟରୁମ୍ ବାହାରକୁ ବାହାର କରିଦେଇଥିଲେ।

'ACP ବିରୋଧରେ FIR'

ଯେମିତି ହିଁ ଶୁଣାଣି ଆରମ୍ଭ ହେଲା, ପିଟିସନର କହିଥିଲେ, "ୟୋର ଅନର୍, ମୁଁ ଆପଣଙ୍କୁ ଲକ୍ଷ୍ନୌ ACPଙ୍କ ବିରୋଧରେ FIR ରୁଜୁ କରିବାକୁ ଆଦେଶ ଦେଉଛି।" ଏହା ଶୁଣି ଜଷ୍ଟିସ କେ.ଭି. ବିଶ୍ୱନାଥନ ଆଶ୍ଚର୍ଯ୍ୟ ପ୍ରକଟ କରି ପଚାରିଥିଲେ, "ଆପଣ ମତେ ଆଦେଶ ଦେଉଛନ୍ତି କି?"

ପିଟିସନର ଜବାବ ଦେଇଥିଲେ, "ମୋ ତରଫରୁ ବସ୍ ଏତିକି, ସବୁକିଛି ରେକର୍ଡରେ ଅଛି।" ଏହାପରେ ସେ କେସ୍ ଫାଇଲ୍ ପବନରେ ଫିଙ୍ଗି ଦେଇଥିଲେ ଏବଂ ଗାଳିଗୁଲଜ କରିବାକୁ ଲାଗିଥିଲେ। ସେଠାରେ ଥିବା ସୁରକ୍ଷାକର୍ମୀମାନେ ତୁରନ୍ତ ମଝିରେ ପଶି ତାଙ୍କକୁ କୋର୍ଟରୁମ୍ ବାହାରକୁ ନେଇଯାଇଥିଲେ।