ଭୁବନେଶ୍ୱର: ନୂଆ ବର୍ଷ ପୂର୍ବରୁ କମିଶନରେଟ ପୋଲିସକୁ ଏକ ବଡ଼ ସଫଳତା ମିଳିଛି । ଚୋରା ବନ୍ଧୁକ କାରବାର କରୁଥିବା ଏକ କୁଖ୍ୟାତ ଗ୍ୟାଙ୍ଗକୁ ଧରିଛି ଭୁବନେଶ୍ୱର କମିଶନରେଟ୍ ପୋଲିସ । ଖୋର୍ଦ୍ଧା ଅଞ୍ଚଳର ଦୁର୍ଦ୍ଦାନ୍ତ ଅପରାଧୀ ଚନ୍ଦନ ପ୍ରଧାନଙ୍କ ସମେତ ୫ ଜଣଙ୍କୁ ଗିରଫ କରାଯାଇଛି । ସେମାନଙ୍କ ନିକଟରୁ ୫ଟି ବନ୍ଧୁକ, ୨୦ଟି ଅଫୁଟା ଗୁଳି, ୮୪ ହଜାର ଟଙ୍କା, କାର ଆଦି ଜବତ ହୋଇଛି । ନାକାବନ୍ଦୀ ବେଳେ ସେମାନଙ୍କୁ ଧରିବାରେ ପୋଲିସ ସଫଳ ହୋଇଛି ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୋଲିସ କମିଶନର ଏସ୍ ଦେବଦତ୍ତ ସିଂ । 

ଗତ ଡିସେମ୍ବର ୨୪-୨୫ ମଧ୍ୟ ରାତିରେ କମିଶନରେଟ୍ ପୋଲିସ ପକ୍ଷରୁ ନାକାବନ୍ଦୀ କରାଯାଇ ଚେକିଂ କରାଯାଇଥିଲା । ଏଥିରେ ପୋଲିସକୁ ବଡ଼ ସଫଳତା ମିଳିଛି । ଚୋରା ବନ୍ଧୁକ କାରାବାରରେ ଥିବା ଏକ ଅପରାଧିକ ଗ୍ୟାଙ୍ଗକୁ ପୋଲିସ ଧରିଛି । କେବଳ ଭୁବନେଶ୍ୱର ନୁହେଁ ବରଂ ଏମାନଙ୍କ ଅପରାଧର ଚେର ଅନ୍ୟ ଜିଲ୍ଲାକୁ ମାଡ଼ିଛି । ଭୁବନେଶ୍ୱର ସମେତ ପୁରୀ, କଟକ, ଖୋର୍ଦ୍ଧା ଏବଂ ଜଗତସିଂପୁରରେ ମଧ୍ୟ ଅନେକ ଅପରାଧରେ ସାମିଲ ରହିଛନ୍ତି ।  ବିଭିନ୍ନ ଥାନାରେ ଏମାନଙ୍କ ନାଁରେ ଅପରାଧିକ ମାମଲା ରହିଛି ବୋଲି କମିଶନର କହିଛନ୍ତି ।