କଳାହାଣ୍ଡି: ଏକ ଅଭିନବ ଉପାୟରେ ଚୋରି । ଖାକି ପୋଷାକରେ ଆସି ଚୋରି କରିଛନ୍ତି ଚୋର । ଏଭଳି ଏକ ଘଟଣା ଘଟିଛି କଳାହାଣ୍ଡି ଜିଲ୍ଲା ମୋହନଗିରି ଫାଣ୍ଡି ଅନ୍ତର୍ଗତ ରୁବେନ ଗାଁରେ । ଗ୍ରାମବାସୀ ୩ ଜଣ ଚୋରଙ୍କୁ କାବୁ କରିଥିବାବେଳେ ଆଉ ୪ ଜଣ ଚୋର ଲକ୍ଷାଧିକ ଟଙ୍କା ନେଇ ଫେରାର ହୋଇଯାଇଛନ୍ତି । ସେମାନେ ଆସିଥିବା ବୋଲରୋ ଗାଡ଼ିକୁ ମଧ୍ୟ ଜବତ କରାଯାଇଛି । 

ମିଳିଥିବା ପ୍ରାଥମିକ ସୂଚନା ମୁତାବକ, ସୋମବାର ବିଳମ୍ବିତ ରାତିରେ ୭ ଜଣ ଦୁର୍ବୃତ୍ତ ଖାକି ପୋଷାକରେ ଆସି ମୋହନଗିରି ଫାଣ୍ଡି ଅନ୍ତର୍ଗତ ରୁବେନ ଗାଁରେ ପ୍ରବେଶ କରିଥିଲେ । ଏହା ପରେ ରୀପା ମାଝୀଙ୍କ ଘରେ ଅତର୍କିତ ଚଢ଼ାଉ କରିଥିଲେ । ତୁମୁଡ଼ିବନ୍ଧର ଜଣେ ପୁଅ ଓ ଝିଅ ଏବଂ ରାମପୁରର ଗୋଟେ ପୁଅକୁ ଘରେ ଲୁଚାଇ ରଖିଛ ବୋଲି ରୀପାଙ୍କୁ କହିଥିଲେ । ଏହା ପରେ ଘରେ ପଶି ମିଛି ମିଛିକା ଯାଞ୍ଚ ମଧ୍ୟ କରିଥିଲେ । ଯାଞ୍ଚ ଆଳରେ ଘରେ ଥିବା ୨ ଲକ୍ଷ ୪୦ ହଜାର ଟଙ୍କା ନେଇ ଫେରାର ହେବାକୁ ଉଦ୍ୟମ କରିଥିଲେ । 

ଏହି ସମୟରେ ରୀପା ମାଝୀ ଗ୍ରାମବାସୀଙ୍କୁ ଜଣାଇବାରୁ ଗ୍ରାମବାସୀମାନେ ସେମାନଙ୍କ ପିଛା କରି ୩ ଜଣ ଲୁଟେରାଙ୍କୁ ଗାଡ଼ି ସହିତ କାବୁ କରି ନେଇଥିଲେ । ମାତ୍ର ମଉକା ଦେଖି ଅନ୍ୟ ୪ ଜଣ ଲୁଟେରା ଟଙ୍କା ନେଇ ସେଠାରୁ ଖସି ପଳାଇ ଯିବାରେ ସଫଳ ହୋଇଥିଲେ । ତେବେ ଗାଁ ଲୋକ ଅନ୍ୟ ୩ ଜଣଙ୍କୁ ପୁଲିସ ଜିମା ଦେଇଛନ୍ତି । ମୋହନଗିରି ଫାଣ୍ଡି ପୁଲିସ ସେମାନଙ୍କୁ ହେପାଜତକୁ ନେଇ ପଚରାଉଚରା ଜାରି ରଖିଛି ।