ନୂଆଦିଲ୍ଲୀ: ଭାରତ ଦ୍ରୁତ ଗତିରେ ଏକ ଡିଜିଟାଲ୍ ବିଶ୍ୱ ଆଡକୁ ଗତି କରୁଛି, ଏବଂ ଏହି ଦିଗରେ ଏବେ ଏକ ଐତିହାସିକ ପଦକ୍ଷେପ ନିଆଯାଇଛି। ଗୁଗଲ୍ ଘୋଷଣା କରିଛି ଯେ ଆମେରିକା ପରେ ଆନ୍ଧ୍ରପ୍ରଦେଶର ବିଶାଖାପାଟଣାରେ ଏହାର ସର୍ବବୃହତ ଡାଟା ସେଣ୍ଟର ପ୍ରତିଷ୍ଠା କରିବ। ଏହି ପଦକ୍ଷେପ ଭାରତର ଡିଜିଟାଲାଇଜେସନ୍ରେ ଟର୍ଣ୍ଣିଂ ପଏଣ୍ଟ ପ୍ରମାଣିତ ହୋଇପାରେ। 

ଆନ୍ଧ୍ରପ୍ରଦେଶ ସରକାରଙ୍କ ଦ୍ୱାରା ଜାରି ଏକ ସରକାରୀ ବିଜ୍ଞପ୍ତି ଅନୁଯାୟୀ, ଗୁଗଲ୍ ଏକ ୧-ଗିଗାୱାଟ୍ ଡାଟା ସେଣ୍ଟର ନିର୍ମାଣ ପାଇଁ ପ୍ରାୟ ୧୦ ବିଲିୟନ ଆମେରିକୀୟ ଡଲାର (ପ୍ରାୟ ₹୮୮,୭୩୦ କୋଟି) ନିବେଶ କରିବ। ଏହି ନିବେଶ ଭାରତରେ ଡାଟା ସୁରକ୍ଷା, କ୍ଲାଉଡ୍ ସେବା ଏବଂ ଏଆଇ ଭିତ୍ତିଭୂମିକୁ ନୂତନ ଉଚ୍ଚତାରେ ପହଞ୍ଚାଇବ।

ମୁଖ୍ୟମନ୍ତ୍ରୀ ଏନ. ଚନ୍ଦ୍ରବାବୁ ନାଇଡୁଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ ରାଜ୍ୟ ନିବେଶ ପ୍ରୋତ୍ସାହନ ବୋର୍ଡ (ଏସଆଇପିବି) ବୈଠକରେ ₹୧.୧୪ ଲକ୍ଷ କୋଟି ଟଙ୍କାର ମୋଟ ୩୦ ଟି ନିବେଶ ପ୍ରସ୍ତାବକୁ ଅନୁମୋଦନ କରାଯାଇଛି। ଏହି ପ୍ରସ୍ତାବଗୁଡ଼ିକ ମଧ୍ୟରେ ଆଇଟି, ଇନ୍ଧନ, ପର‌୍ୟ୍ୟଟନ, ଅନ୍ତରୀକ୍ଷ, ଖାଦ୍ୟ ପ୍ରକ୍ରିୟାକରଣ ଏବଂ ଅନ୍ୟାନ୍ୟ କ୍ଷେତ୍ରର ପ୍ରକଳ୍ପ ଅନ୍ତର୍ଭୁକ୍ତ। ଏହି ନିବେଶଗୁଡ଼ିକ ରାଜ୍ୟରେ ପ୍ରାୟ ୬୭,୦୦୦ ନୂତନ ନିଯୁକ୍ତି ସୃଷ୍ଟି କରିବ ବୋଲି ଆଶା କରାଯାଉଛି।

ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ କହିଛନ୍ତି, ନିବେଶକଙ୍କୁ ଆକର୍ଷିତ କରିବା ପାଇଁ ଗତ ୧୫ ମାସ ଧରି କରାଯାଇଥିବା ପ୍ରୟାସ ଏବେ ଫଳପ୍ରଦ ହେଉଛି। ରାଜ୍ୟରେ ବଡ଼ ଧରଣର ନିଯୁକ୍ତି ସୃଷ୍ଟି ଏବଂ ଆର୍ଥିକ ଅଭିବୃଦ୍ଧି ପାଇଁ ନୂତନ ସୁଯୋଗ ଖୋଲିବାରେ ଲାଗିଛି। ବୈଠକ ସମୟରେ, ସରକାର ପ୍ରତ୍ୟେକ ପ୍ରମୁଖ ପ୍ରକଳ୍ପ ପାଇଁ ଜଣେ ସ୍ୱତନ୍ତ୍ର ଅଧିକାରୀ (ପ୍ରକଳ୍ପ ଅଧିକାରୀ) ନିଯୁକ୍ତ କରିବାକୁ ମଧ୍ୟ ନିଷ୍ପତ୍ତି ନେଇଛନ୍ତି, ଯିଏ ପ୍ରକଳ୍ପ କାର‌୍ୟ୍ୟକାରୀ କରିବା ପାଇଁ ଉତ୍ତରଦାୟୀ ରହିବେ।