ନୂଆଦିଲ୍ଲୀ: ବଲିଉଡ୍ର ‘ରାମାୟଣ’ ଚଳଚ୍ଚିତ୍ରକୁ ନେଇ ବଢ଼ିଛି ଚର୍ଚ୍ଚା। ଫିଲ୍ମରେ ଜଟାୟୁ ଓ ରାବଣଙ୍କ ମଧ୍ୟରେ ହୋଇଥିବା ଭୀଷଣ ଯୁଦ୍ଧର ଦୃଶ୍ୟ ଦର୍ଶକଙ୍କୁ ଆକର୍ଷିତ କରିଥିବା ବେଳେ ଏହାର ପ୍ରଭାବ ଏବେ କେରଳର ପର୍ଯ୍ୟଟନ ଉପରେ ମଧ୍ୟ ପଡ଼ିଛି। କେରଳର କୋଲ୍ଲାମ ଜିଲ୍ଲାରେ ଥିବା ପ୍ରସିଦ୍ଧ ‘ଜଟାୟୁ ଆର୍ଥ ସେଣ୍ଟର’କୁ ଦେଶବିଦେଶର ପର୍ଯ୍ୟଟକଙ୍କ ଆଗମନ ବଢ଼ିବାରେ ଲାଗିଛି। ଏପରିକି ଖୁବଶୀଘ୍ର ଏହି ସ୍ଥାନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗସ୍ତ କରିପାରନ୍ତି ବୋଲି ସୂଚନା ମିଳିଛି।
ଜଟାୟୁ ଆର୍ଥ ସେଣ୍ଟରକୁ ଯାଇପାରନ୍ତି ମୋଦୀ
କେନ୍ଦ୍ର ପର୍ଯ୍ୟଟନ ରାଷ୍ଟ୍ରମନ୍ତ୍ରୀ ସୁରେଶ ଗୋପୀ ଗୁରୁବାର ସାମ୍ବାଦିକମାନଙ୍କୁ ଏନେଇ ସୂଚନା ଦେଇଛନ୍ତି। ତାଙ୍କ କହିବା ଅନୁସାରେ, ପ୍ରଧାନମନ୍ତ୍ରୀଙ୍କ ସମ୍ଭାବ୍ୟ ଗସ୍ତ ପୂର୍ବରୁ କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଗଜେନ୍ଦ୍ର ସିଂ ଶେଖାୱତ ପ୍ରଥମେ କୋଲ୍ଲାମର ଚଦୟମଙ୍ଗଳମସ୍ଥିତ ଜଟାୟୁପାରା ପରିଦର୍ଶନ କରିବେ।
ଏହା ସହ ଜଟାୟୁ ପ୍ରକଳ୍ପକୁ ଦିଲ୍ଲୀ ବିଏନାଲେରେ ପ୍ରଦର୍ଶିତ କରିବାକୁ ମଧ୍ୟ ଆଗ୍ରହ ପ୍ରକାଶ କରାଯାଇଛି। ଦୁଇ ଦିନ ପୂର୍ବରୁ ଶେଖାୱତ ଏହି ପ୍ରକଳ୍ପର ନିର୍ମାତା ରାଜୀବ ଅଞ୍ଚଳଙ୍କୁ ଭେଟି ଏନେଇ ଆଲୋଚନା କରିଥିଲେ। ଏହି ପ୍ରସ୍ତାବ ସମ୍ପର୍କରେ ପ୍ରଧାନମନ୍ତ୍ରୀଙ୍କୁ ମଧ୍ୟ ଅବଗତ କରାଯାଇଛି।
ପାହାଡ଼ ଉପରେ ବିଶାଳ ଜଟାୟୁ ପ୍ରତିମୂର୍ତ୍ତି, ଦେଖିବାକୁ ଛୁଟୁଛନ୍ତି ପର୍ଯ୍ୟଟକ
ଜଟାୟୁ ଆର୍ଥ ସେଣ୍ଟର’ର ସବୁଠାରୁ ବଡ଼ ଆକର୍ଷଣ ହେଉଛି ପାହାଡ଼ ଉପରେ ନିର୍ମିତ ବିଶାଳକାୟ ଜଟାୟୁଙ୍କ ପ୍ରତିମୂର୍ତ୍ତି। ରାମାୟଣରେ ମାତା ସୀତାଙ୍କୁ ରାବଣ କବଳରୁ ରକ୍ଷା କରିବାକୁ ଜଟାୟୁ କରିଥିବା ସଂଗ୍ରାମର ସ୍ମୃତିକୁ ଏହି ପ୍ରତିମୂର୍ତ୍ତି ଜୀବନ୍ତ କରିଥାଏ।
ଡେଣା କଟା ଅବସ୍ଥାରେ ପାହାଡ଼ ଉପରେ ପଡ଼ିଥିବା ଜଟାୟୁଙ୍କ ଏହି ବିଶାଳ ମୂର୍ତ୍ତି ପର୍ଯ୍ୟଟକଙ୍କୁ ରାମାୟଣର ସେହି ବୀରତ୍ୱ ଓ ବଳିଦାନର କାହାଣୀ ମନେ ପକାଇ ଦେଉଛି।
କ'ଣ ରହିଛି ଜଟାୟୁ ଆର୍ଥ ସେଣ୍ଟରର ବିଶେଷତ୍ୱ?
୨୦୦୪ ମସିହାରେ ମଞ୍ଜୁରୀ ପାଇଥିବା ଜଟାୟୁ ନେଚର ପାର୍କ ବା ଜଟାୟୁ ଆର୍ଥ ସେଣ୍ଟର ଏକ ଅନନ୍ୟ ଇକୋ-ଟୁରିଜିମ୍ ପ୍ରକଳ୍ପ। ପ୍ରଖ୍ୟାତ ଚଳଚ୍ଚିତ୍ର ନିର୍ମାତା ଓ ଭାସ୍କର୍ଯ୍ୟ ଶିଳ୍ପୀ ରାଜୀବ ଅଞ୍ଚଳଙ୍କ ପରିକଳ୍ପନାରେ ଏହା ନିର୍ମାଣ ହୋଇଛି। ପ୍ରକୃତି, ପୌରାଣିକ କାହାଣୀ ଓ କଳାର ଅଦ୍ଭୁତ ସମନ୍ୱୟ ଏହି ପର୍ଯ୍ୟଟନସ୍ଥଳୀକୁ ଏକ ସ୍ୱତନ୍ତ୍ର ପରିଚୟ ଦେଇଛି।
ସିନେମାରୁ ପର୍ଯ୍ୟଟନ ପର୍ଯ୍ୟନ୍ତ, ବଢ଼ୁଛି ଜଟାୟୁଙ୍କ ଲୋକପ୍ରିୟତା
‘ରାମାୟଣ’ ଚଳଚ୍ଚିତ୍ରରେ ଜଟାୟୁଙ୍କ ବୀରତ୍ୱର ଦୃଶ୍ୟ ପ୍ରଦର୍ଶିତ ହେବା ପରେ ଏହି ପୌରାଣିକ ସ୍ଥାନ ପ୍ରତି ଲୋକଙ୍କ ଆଗ୍ରହ ବଢ଼ିଛି। ଏବେ ଦେଶର ବିଭିନ୍ନ ଅଞ୍ଚଳ ସହ ବିଦେଶରୁ ମଧ୍ୟ ପର୍ଯ୍ୟଟକ ଏଠାକୁ ଆସିବାକୁ ଆଗ୍ରହ ଦେଖାଉଛନ୍ତି।
ସିନେମା କେବଳ ମନୋରଞ୍ଜନର ମାଧ୍ୟମ ନୁହେଁ, ବରଂ ଦେଶର ଐତିହ୍ୟ, ପୌରାଣିକ ଗାଥା ଓ ପର୍ଯ୍ୟଟନସ୍ଥଳୀକୁ ବିଶ୍ୱ ଦରବାରରେ ପହଞ୍ଚାଇବାର ଏକ ବଡ଼ ମାଧ୍ୟମ ହୋଇପାରେ, ଜଟାୟୁ ଆର୍ଥ ସେଣ୍ଟର ଏହାର ଏକ ଉଦାହରଣ ପାଲଟିଛି। ଏବେ ସମସ୍ତଙ୍କ ନଜର ପ୍ରଧାନମନ୍ତ୍ରୀ ମୋଦୀଙ୍କ ସମ୍ଭାବ୍ୟ ଗସ୍ତ ଉପରେ।