ରାଞ୍ଚି: ଓଡ଼ିଶାର ଝିଅ ତଥା ବରିଷ୍ଠ ଆଇପିଏସ୍ ଅଧିକାରୀ ତଦାଶା ମିଶ୍ର ଇତିହାସ ରଚିଛନ୍ତି। ସେ ଝାଡ଼ଖଣ୍ଡର ପ୍ରଥମ ମହିଳା ଆରକ୍ଷୀ ମହାନିର୍ଦ୍ଦେଶକ ବା ଡିଜିପିଭାବେ ଦାୟିତ୍ୱ ନେଇଛନ୍ତି । ତଦାଶା ମିଶ୍ର କାର୍ଯ୍ୟକାରୀ ଡିଜିପିଭାବେ ନିଯୁକ୍ତି ପାଇଛନ୍ତି । ସେ ତାଙ୍କର ଅବସର ପର୍ଯ୍ୟନ୍ତ ଅର୍ଥାତ୍ ଆସନ୍ତା ଡିସେମ୍ବର ୩୧ ଯାଏଁ ପୋଲିସ ମୁଖ୍ୟ ଦାୟିତ୍ୱ ସମ୍ଭାଳିବେ । ତଦାଶା ମିଶ୍ରଙ୍କ ନିଯୁକ୍ତି କେବଳ ପୋଲିସ ବିଭାଗରେ ଏକ ଗୁରୁତ୍ୱପୂର୍ଣ୍ଣ ପ୍ରଶାସନିକ ପଦକ୍ଷେପ ନୁହେଁ ବରଂ ମହିଳା ସଶକ୍ତିକରଣ ଦିଗରେ ଏକ ମାଇଲଖୁଣ୍ଟ ଭାବରେ ବିବେଚନା କରାଯାଉଛି।

ଓଡ଼ିଶାରେ ଜନ୍ମିତ ତଦାଶା ମିଶ୍ର  ୧୯୯୪ ବ୍ୟାଚର ଆଇପିଏସ୍ ଅଧିକାରୀ । ଝାଡ଼ଖଣ୍ଡ ରାଜ୍ୟ  ଗଠନ ପରେ ସେ କ୍ୟାଡରରେ ଯୋଗ ଦେଇଥିଲେ । ପୋଲିସ ଡିଜି ଅନୁରାଗ ଗୁପ୍ତାଙ୍କ ସ୍ୱେଚ୍ଛାକୃତ ଅବସରରେ ପରେ ତଦାଶାଙ୍କୁ ଏହି ଗୁରୁ ଦାୟିତ୍ୱ ମିଳିଛି । ତାଙ୍କର ତିନି ଦଶନ୍ଧିର ପୋଲିସ କ୍ୟାରିୟର ମଧ୍ୟରେ, ସେ ଅନେକ ଗୁରୁତ୍ୱପୂର୍ଣ୍ଣ ପଦବୀରେ ରହିଛନ୍ତି । ଝାଡ଼ଖଣ୍ଡର ଆଇନଶୃଙ୍ଖଳା ପରିସ୍ଥିତି, ମାଓ ଦମନ, ପୋଲିସ କ୍ଷେତ୍ରରେ ମହିଳା କର୍ମଚାରୀଙ୍କ ଅଧିକ ଯୋଗଦାନ ଭଳି ବିଭିନ୍ନ ପ୍ରସଙ୍ଗ ତାଙ୍କ ପାଇଁ ଚ୍ୟାଲେଞ୍ଜ ଅଟେ । 

ବୋକାରୋର ଏବଂ ଗିରିଡିହରେ ପୋଲିସ ଅଧିକ୍ଷକ (ଏସପି), ରେଳବାଇ ଏଡିଜି ଏବଂ ଗୃହ, ଜେଲ ଏବଂ ବିପର୍ଯ୍ୟୟ ପରିଚାଳନା ବିଭାଗରେ ସ୍ୱତନ୍ତ୍ର ସଚିବ ଭାବରେ ଦାୟିତ୍ୱ ତୁଲାଇଛନ୍ତି । ତାଙ୍କର ସବୁଠାରୁ ଦୀର୍ଘ କାର୍ଯ୍ୟକାଳ ରାଜ୍ୟ ସରକାରଙ୍କ ଏକ ଗୁରୁତ୍ୱପୂର୍ଣ୍ଣ ବିଭାଗ ଗୃହ, କାରାଗାର ଏବଂ ବିପର୍ଯ୍ୟୟ ପରିଚାଳନା ବିଭାଗରେ ଥିଲା। ଏଠାରେ, ସେ ସ୍ୱତନ୍ତ୍ର ସଚିବ ଭାବରେ କାର୍ଯ୍ୟ କରିଥିଲେ ଏବଂ ପୋଲିସ କଲ୍ୟାଣ ସହିତ ଜଡିତ ଫାଇଲଗୁଡ଼ିକୁ ଅତ୍ୟନ୍ତ ଦକ୍ଷତାର ସହିତ ପରିଚାଳନା କରିଥିଲେ। ସେ ସର୍ବଦା ତାଙ୍କର କଠୋର କାର୍ଯ୍ୟ ନୀତି, ସମ୍ବେଦନଶୀଳତା ଏବଂ ମହିଳା ସୁରକ୍ଷା ପ୍ରତି ପ୍ରତିବଦ୍ଧତା ପାଇଁ ବେଶ ପରିଚିତ । ତାଙ୍କର ଏହି ନିଯୁକ୍ତି ଝାଡ଼ଖଣ୍ଡ ପୋଲିସ ଇତିହାସର ଏକ ନୂଆ ଅଧ୍ୟାୟ ଲେଖିଛି । ଏହା ସହିତ ଲିଙ୍ଗଗତ ସମାନତା ପାଇଁ ମଧ୍ୟ ସେ ସବୁବେଳେ ସ୍ୱର ଉତ୍ତୋଳନ କରିଛନ୍ତି । 

ତାଦାଶା ମିଶ୍ର ଏପର୍ଯ୍ୟନ୍ତ ଡିଜି ପଦବୀ ପାଇ ନଥିଲେ। ରାଜ୍ୟ ସରକାର ବର୍ତ୍ତମାନ କେବଳ ୧୯୯୩ ବ୍ୟାଚ୍ ପର୍ଯ୍ୟନ୍ତ ଆଇପିଏସ୍ ଅଧିକାରୀମାନଙ୍କୁ ଡିଜି ରାଙ୍କ ପ୍ରଦାନ କରିଛନ୍ତି । ଡିଜି ରାଙ୍କ କେବଳ ସେତେବେଳେ ଉପଲବ୍ଧ ହୁଏ ଯେତେବେଳେ ଏକ ପଦବୀ ଖାଲି ଥାଏ।