ଆଜିକାଲି ବଡ଼ ସହରରେ ଭଲ ଭଡ଼ାଘର ମିଳିବା ଯେତିକି କଷ୍ଟକର, ସେଥିରେ ରହିବା ତା’ଠାରୁ ବି ଅଧିକ ଚ୍ୟାଲେଞ୍ଜ। ଘର ମିଳିବା ପରେ ଅନେକ ଭଡ଼ାଟିଆଙ୍କୁ ଘର ମାଲିକଙ୍କ ଅଜବ ନିୟମର ସାମ୍ନା କରିବାକୁ ପଡ଼େ। କେଉଁଠି ରାତି ୧୦ଟା ପରେ ଘରକୁ ପ୍ରବେଶ ଉପରେ କଟକଣା, କେଉଁଠି ସାଙ୍ଗମାନଙ୍କ ଆସିବାକୁ ବାରଣ, ଆଉ କେଉଁଠି ହଠାତ୍ ଭଡ଼ା ବୃଦ୍ଧିର ନୋଟିସ୍। କିନ୍ତୁ ଆପଣ ଜାଣନ୍ତି କି? ଭାରତୀୟ ଆଇନ ଅନୁଯାୟୀ ଭଡ଼ାଟିଆ କେବଳ ଜଣେ ଭଡ଼ାରେ ରହୁଥିବା ବ୍ୟକ୍ତି ନୁହେଁ, ବରଂ ସେହି ଘରର ଆଇନଗତ ଅଧିକାର ସହ ଜଣେ 'ଅସ୍ଥାୟୀ ଦଖଲକାରୀ'। ଅର୍ଥାତ୍, ଘର ମାଲିକ ଇଚ୍ଛାମୁତାବକ ନିୟମ ବଦଳାଇ ପାରିବେ ନାହିଁ।

ଆଇନ ବିଶେଷଜ୍ଞଙ୍କ ମତରେ ପ୍ରତ୍ୟେକ ଭଡ଼ାଟିଆଙ୍କୁ ନିଜର କିଛି ମୌଳିକ ଅଧିକାର ବିଷୟରେ ସଚେତନ ରହିବା ଦରକାର। ସବୁଠାରୁ ପ୍ରଥମ କଥା ହେଉଛି ରେଣ୍ଟ୍ ଏଗ୍ରିମେଣ୍ଟ। ବିନା ଲିଖିତ ଚୁକ୍ତିରେ କେବେ ବି ଘରକୁ ସିଫ୍ଟ ହେବା ଉଚିତ୍ ନୁହେଁ। ଏଥିରେ ମାସିକ ଭଡ଼ା, ସିକ୍ୟୁରିଟି ଡିପୋଜିଟ୍, ରହିବାର ଅବଧି ଏବଂ ଅନ୍ୟାନ୍ୟ ସର୍ତ୍ତ ସ୍ପଷ୍ଟ ଭାବେ ଲେଖା ଥିବା ଆବଶ୍ୟକ। ସାଧାରଣତଃ ୧୧ ମାସର ଏଗ୍ରିମେଣ୍ଟ ଉଭୟ ପକ୍ଷଙ୍କୁ ଆଇନଗତ ସୁରକ୍ଷା ପ୍ରଦାନ କରିଥାଏ।

ଦ୍ୱିତୀୟ ଗୁରୁତ୍ୱପୂର୍ଣ୍ଣ ଅଧିକାର ହେଉଛି ଭଡ଼ା ବୃଦ୍ଧି। ଏଗ୍ରିମେଣ୍ଟ ଚାଲିଥିବା ସମୟରେ ଘର ମାଲିକ ହଠାତ୍ ଭଡ଼ା ବଢ଼ାଇ ପାରିବେ ନାହିଁ। ଯଦି ଭଡ଼ା ବଢ଼ାଇବାକୁ ଚାହାନ୍ତି, ତେବେ ଅତିକମରେ ୩ ମାସ ପୂର୍ବରୁ ଲିଖିତ ନୋଟିସ୍ ଦେବା ଆବଶ୍ୟକ। ମୌଖିକ ଭାବେ ଭଡ଼ା ବୃଦ୍ଧିର ଦାବି ଆଇନସମ୍ମତ ନୁହେଁ।

ତୃତୀୟ ଅଧିକାର ହେଉଛି ପ୍ରାଇଭେସି। ଘର ମାଲିକ ଆପଣଙ୍କ ଅନୁମତି ବିନା କିମ୍ବା ଆପଣଙ୍କ ଅନୁପସ୍ଥିତିରେ ଘରକୁ ପ୍ରବେଶ କରିପାରିବେ ନାହିଁ। ଯଦି ଘର ଯାଞ୍ଚ କିମ୍ବା ମରାମତି କରିବାର ଆବଶ୍ୟକତା ଥାଏ, ତେବେ ଅତିକମରେ ୨୪ ଘଣ୍ଟା ପୂର୍ବରୁ ଭଡ଼ାଟିଆଙ୍କୁ ସୂଚନା ଦେବା ଜରୁରୀ। ଆପଣଙ୍କ ଗୋପନୀୟତା ଉପରେ କୌଣସି ପ୍ରକାର ହସ୍ତକ୍ଷେପ ଆଇନ ବିରୋଧୀ।

ଚତୁର୍ଥ ଅଧିକାର ହେଉଛି ସିକ୍ୟୁରିଟି ଡିପୋଜିଟ୍। ଆଇନ ଅନୁସାରେ ଆବାସିକ ଘର ପାଇଁ ଘର ମାଲିକ ସର୍ବାଧିକ ଦୁଇ ମାସର ଭଡ଼ା ପର୍ଯ୍ୟନ୍ତ ସିକ୍ୟୁରିଟି ଭାବେ ନେଇପାରିବେ। ଘର ଖାଲି କରିବା ପରେ କୌଣସି ବୈଧ କାରଣ ନଥିଲେ ସେହି ଟଙ୍କା ଅଯଥା କାଟଛାଣ୍ଟ ନକରି ଫେରସ୍ତ କରିବାକୁ ପଡ଼ିବ।

ପଞ୍ଚମ ଓ ସବୁଠାରୁ ବଡ଼ ଅଧିକାର ହେଉଛି ବେଆଇନ ଭାବେ ଘରୁ ବାହାର କରିଦିଆଯିବାରୁ ସୁରକ୍ଷା। ଘର ମାଲିକ ଚାହିଁଲେ ହଠାତ୍ ଆପଣଙ୍କୁ ଘର ଛାଡ଼ିବାକୁ ବାଧ୍ୟ କରିପାରିବେ ନାହିଁ। ଏଗ୍ରିମେଣ୍ଟର ସର୍ତ୍ତ ଅନୁଯାୟୀ ପୂର୍ବ ସୂଚନା ଦେବା ଏବଂ ଆବଶ୍ୟକ ହେଲେ ଆଇନଗତ ପ୍ରକ୍ରିୟା ଅନୁସରଣ କରିବା ବାଧ୍ୟତାମୂଳକ।

ତେଣୁ ଯଦି ଆପଣ ଭଡ଼ାଘରରେ ରହୁଛନ୍ତି, ତେବେ ନିଜ ଅଧିକାର ବିଷୟରେ ସଚେତନ ରୁହନ୍ତୁ। ଆଇନ ଆପଣଙ୍କ ସହ ଅଛି। ଠିକ୍ ସୂଚନା ଥିଲେ ଆପଣ ଅନାବଶ୍ୟକ ବିବାଦରୁ ଦୂରେ ରହିପାରିବେ ଏବଂ ଘର ମାଲିକଙ୍କ ମନମାନିର ସାମ୍ନା ମଧ୍ୟ ଆତ୍ମବିଶ୍ୱାସର ସହ କରିପାରିବେ।

ଉତ୍ତର ପ୍ରଦେଶର ରାଜ୍ୟପାଳ ଆନନ୍ଦୀବେନ ପଟେଲଙ୍କ ଏକ ବୟାନକୁ ନେଇ ଏବେ ସୋସିଆଲ ମିଡିଆରେ ଜୋରଦାର ଚର୍ଚ୍ଚା ଆରମ୍ଭ ହୋଇଛି। କାନପୁରସ୍ଥିତ ଛତ୍ରପତି ଶାହୁଜୀ ମହାରାଜ ବିଶ୍ୱବିଦ୍ୟାଳୟ (CSJMU)ର ୪୧ତମ ସମାବର୍ତ୍ତନ ଉତ୍ସବରେ ଯୋଗଦେଇ ସେ କହିଥିଲେ, "ଆପଣ IAS ଅଫିସର ହୁଅନ୍ତୁ କିମ୍ବା ଶିକ୍ଷକ, ପ୍ରଥମେ ଜଣେ 'ଏକ୍ସପର୍ଟ ମା' ବା ଦକ୍ଷ ମା' ହୁଅନ୍ତୁ। ଘରେ ପ୍ରସ୍ତୁତ ହେଉଥିବା ଖାଦ୍ୟ ରାନ୍ଧିବା ସମସ୍ତଙ୍କୁ ଜାଣିବା ଉଚିତ।"

ତାଙ୍କ ଏହି ମନ୍ତବ୍ୟ ଭାଇରାଲ ହେବା ପରେ ସୋସିଆଲ ମିଡିଆରେ ଦୁଇ ପ୍ରକାରର ପ୍ରତିକ୍ରିୟା ଦେଖାଦେଇଛି। ଗୋଟିଏ ପକ୍ଷ ଆନନ୍ଦୀବେନ ପଟେଲଙ୍କ ପରିବାରିକ ମୂଲ୍ୟବୋଧ ଓ ସନ୍ତାନ ଲାଳନପାଳନ ଉପରେ ଦିଆଯାଇଥିବା ଗୁରୁତ୍ୱକୁ ସମର୍ଥନ କରିଛନ୍ତି। ଅନ୍ୟପଟେ ଅନେକ ଲୋକ ପ୍ରଶ୍ନ ଉଠାଇଛନ୍ତି ଯେ, ଏଭଳି ଦାୟିତ୍ୱ କେବଳ ମହିଳାଙ୍କ ପାଇଁ କାହିଁକି? ପୁରୁଷମାନଙ୍କ ପାଇଁ ମଧ୍ୟ କି ସମାନ ଆଶା ରଖାଯାଉଛି?

ସମାବର୍ତ୍ତନ ଉତ୍ସବରେ ଛାତ୍ରଛାତ୍ରୀ, ଅଭିଭାବକ ଓ ଶିକ୍ଷକମାନଙ୍କୁ ସମ୍ବୋଧିତ କରି ରାଜ୍ୟପାଳ କହିଥିଲେ ଯେ, ବିବାହ ପରେ ମହିଳାମାନେ କେବେ ବି ନିଜର ଶିକ୍ଷା ଅଧାରେ ଛାଡ଼ିବା ଉଚିତ ନୁହେଁ। ବରଂ ସେମାନେ ନିଜର ଜ୍ଞାନ ଓ ଦକ୍ଷତାକୁ ପରିବାର, ସମାଜ ଏବଂ ଦେଶର ଉନ୍ନତିରେ ବ୍ୟବହାର କରିବା ଆବଶ୍ୟକ।

ସେ ଆହୁରି କହିଥିଲେ ଯେ, ଅଭିଭାବକଙ୍କ ଦାୟିତ୍ୱ କେବଳ ପିଲାଙ୍କୁ ସ୍କୁଲ କିମ୍ବା କଲେଜରେ ଭର୍ତ୍ତି କରାଇଦେବାରେ ଶେଷ ହୋଇଯାଏ ନାହିଁ। ପିଲାମାନେ ଶିକ୍ଷାନୁଷ୍ଠାନକୁ ଯିବା ପରେ ସେମାନେ କ'ଣ କରୁଛନ୍ତି, କାହା ସହ ମିଶୁଛନ୍ତି ଏବଂ କେଉଁ ଦିଗକୁ ଆଗକୁ ବଢ଼ୁଛନ୍ତି, ସେଥିପ୍ରତି ଅଭିଭାବକଙ୍କ ନଜର ରହିବା ଉଚିତ। ତାଙ୍କ କହିବା ଅନୁସାରେ, ଅଭିଭାବକଙ୍କ ସାମାନ୍ୟ ଅବହେଳା ମଧ୍ୟ ପିଲାଙ୍କ ଭବିଷ୍ୟତକୁ ପ୍ରଭାବିତ କରିପାରେ।

ଆନନ୍ଦୀବେନ ପଟେଲ ସମାଜରେ ବଢ଼ୁଥିବା ଘରୋଇ ହିଂସା ଓ ମହିଳାଙ୍କ ବିରୋଧରେ ଅପରାଧକୁ ନେଇ ମଧ୍ୟ ଚିନ୍ତା ପ୍ରକାଶ କରିଥିଲେ। ତାଙ୍କ ମତରେ, କେବଳ ଡିଗ୍ରୀ ହାସଲ କରିବା ହିଁ ଶିକ୍ଷାର ଉଦ୍ଦେଶ୍ୟ ନୁହେଁ। ଯଦି ଶିକ୍ଷାର ହାର ବଢ଼ୁଥିବା ସତ୍ତ୍ୱେ ସମାଜରେ ମହିଳାଙ୍କ ଉପରେ ଅତ୍ୟାଚାର ଓ ଅପରାଧ କମୁନାହିଁ, ତେବେ ଏହା ଆମ ଶିକ୍ଷା ବ୍ୟବସ୍ଥା ପାଇଁ ଚିନ୍ତାର ବିଷୟ ବୋଲି ସେ କହିଥିଲେ।

ସେ ଶିକ୍ଷା ସହିତ ନୈତିକ ମୂଲ୍ୟବୋଧର ବିକାଶ ଉପରେ ମଧ୍ୟ ଜୋର ଦେଇ କହିଥିଲେ ଯେ, ଜଣେ ଶିକ୍ଷିତ ବ୍ୟକ୍ତି କେବଳ ପେଶାଗତ ସଫଳତା ନୁହେଁ, ବରଂ ଜଣେ ଦାୟିତ୍ୱବାନ ନାଗରିକ ଓ ଭଲ ମଣିଷ ହେବା ମଧ୍ୟ ଆବଶ୍ୟକ।

ତେବେ ତାଙ୍କ "ପ୍ରଥମେ ଏକ୍ସପର୍ଟ ମା' ହୁଅନ୍ତୁ" ବୟାନକୁ ନେଇ ସମର୍ଥନ ଓ ସମାଲୋଚନା ମଧ୍ୟରେ ବିତର୍କ ଜାରି ରହିଛି। କେହି ଏହାକୁ ପରିବାରିକ ମୂଲ୍ୟବୋଧର ସନ୍ଦେଶ ବୋଲି କହୁଥିବା ବେଳେ, ଆଉ କେହି ଏହାକୁ ମହିଳାଙ୍କ ଉପରେ ପାରମ୍ପରିକ ଭୂମିକା ଥୋପିବାର ପ୍ରୟାସ ବୋଲି ମତ ଦେଉଛନ୍ତି। 

କେନ୍ଦ୍ରାପଡ଼ାର ପ୍ରସିଦ୍ଧ ତୁଳସୀ କ୍ଷେତ୍ରରେ ଚଳିତ ବର୍ଷର ରଥଯାତ୍ରା ହେବ ସ୍ୱତନ୍ତ୍ର ଓ ଐତିହାସିକ। ଦୀର୍ଘ ବର୍ଷର ପରମ୍ପରାରେ ଏଥର ଯୋଡ଼ାଯାଉଛି ଏକ ନୂଆ ଅଧ୍ୟାୟ। ପୁରୁଣା ରଥ ବଦଳରେ ପ୍ରଥମ ଥର ପାଇଁ ସମ୍ପୂର୍ଣ୍ଣ ନୂଆ କାଠରେ ନିର୍ମାଣ ହେଉଛି ବିଶାଳ ବ୍ରହ୍ମ ତାଳଧ୍ୱଜ ରଥ। ଏହି ନୂତନ ରଥକୁ ନେଇ ଭକ୍ତମାନଙ୍କ ମଧ୍ୟରେ ଏବେଠାରୁ ଦେଖାଦେଇଛି ଅପାର ଉତ୍ସାହ ଓ ଆଗ୍ରହ।

ତୁଳସୀ କ୍ଷେତ୍ରର ରଥଯାତ୍ରା ଓଡ଼ିଶାର ଅନ୍ୟତମ ପ୍ରମୁଖ ଧାର୍ମିକ ପରମ୍ପରା। ପ୍ରତିବର୍ଷ ହଜାର ହଜାର ଭକ୍ତ ଏଠାରେ ସମବେତ ହୋଇ ମହାପ୍ରଭୁଙ୍କ ରଥଯାତ୍ରାର ସାକ୍ଷୀ ହୁଅନ୍ତି। ଚଳିତ ବର୍ଷ ଏହି ଆୟୋଜନକୁ ଆହୁରି ଭବ୍ୟ କରିବା ପାଇଁ ପ୍ରାୟ ୬୫ ଫୁଟ୍‌ ଉଚ୍ଚତା ବିଶିଷ୍ଟ ବ୍ରହ୍ମ ତାଳଧ୍ୱଜ ରଥ ପାରମ୍ପରିକ ଶୈଳୀରେ ନିର୍ମାଣ କରାଯାଉଛି। ରଥର ପ୍ରତ୍ୟେକ ଅଂଶରେ ଓଡ଼ିଆ କାରିଗରୀର ନିଖୁଣ କଳା ଓ ପୁରାତନ ପରମ୍ପରାର ଛାପ ସ୍ପଷ୍ଟ ଭାବେ ଦେଖିବାକୁ ମିଳୁଛି।

ରଥ ନିର୍ମାଣରେ ନିୟୋଜିତ ମହାରଣା ସେବାୟତମାନେ ଦିନରାତି ଏକ କରି କାମ କରୁଛନ୍ତି। ନିର୍ଦ୍ଧାରିତ ସମୟ ମଧ୍ୟରେ ରଥ ପ୍ରସ୍ତୁତ କରିବା ପାଇଁ ସେମାନଙ୍କ ପରିଶ୍ରମ ଜାରି ରହିଛି। ପ୍ରତ୍ୟେକ କାଠକୁ ସଠିକ୍ ମାପରେ କାଟିବା, ପାରମ୍ପରିକ ପ୍ରଣାଳୀରେ ଯୋଡ଼ିବା ଏବଂ ରଥର ଦୃଢ଼ତା ସୁନିଶ୍ଚିତ କରିବା ପାଇଁ ସେବାୟତମାନେ ସର୍ବୋଚ୍ଚ ନିଷ୍ଠାର ସହ କାମ କରୁଛନ୍ତି।

ପ୍ରତିବର୍ଷ ରଥ ନିର୍ମାଣରେ ବିଭିନ୍ନ ସମସ୍ୟା ଓ ବ୍ୟାଘାତ ଦେଖାଦେଉଥିବାରୁ ଏଥର ସ୍ଥାୟୀ ସମାଧାନ ଦିଗରେ ପଦକ୍ଷେପ ନିଆଯାଇଛି। ନୂତନ ବ୍ରହ୍ମ ତାଳଧ୍ୱଜ ରଥ ନିର୍ମାଣ ପାଇଁ ରାଜ୍ୟ ସରକାର ୧ କୋଟି ଟଙ୍କା ମଞ୍ଜୁର କରିଛନ୍ତି। ଏହି ସହାୟତା ଫଳରେ ଦୀର୍ଘସ୍ଥାୟୀ ଓ ସୁଦୃଢ଼ ରଥ ନିର୍ମାଣ ସମ୍ଭବ ହୋଇପାରିଛି।

ନୂଆ ରଥ ପ୍ରସ୍ତୁତ ହେବା ପରେ ଚତୁର୍ଦ୍ଧା ମୂର୍ତ୍ତି ଏହି ବ୍ରହ୍ମ ତାଳଧ୍ୱଜ ରଥରେ ଆରୋହଣ କରି ପାରମ୍ପରିକ ଭାବେ ଗୁଣ୍ଡିଚା ମନ୍ଦିରକୁ ଯାତ୍ରା କରିବେ। ଏହି ଐତିହାସିକ ମୁହୂର୍ତ୍ତର ସାକ୍ଷୀ ହେବାକୁ ହଜାର ହଜାର ଭକ୍ତ ଅପେକ୍ଷାରେ ରହିଛନ୍ତି।

ନୂଆ କାଠରେ ନିର୍ମିତ ଏହି ବିଶାଳ ବ୍ରହ୍ମ ତାଳଧ୍ୱଜ ରଥ କେବଳ ଏକ ରଥ ନୁହେଁ, ବରଂ କେନ୍ଦ୍ରାପଡ଼ାର ଧାର୍ମିକ ପରମ୍ପରା, ଐତିହ୍ୟ ଓ ଆସ୍ଥାର ଏକ ନୂଆ ପ୍ରତୀକ ହେବାକୁ ଯାଉଛି। ଚଳିତ ବର୍ଷର ରଥଯାତ୍ରା ତୁଳସୀ କ୍ଷେତ୍ରର ଇତିହାସରେ ଏକ ସ୍ମରଣୀୟ ଅଧ୍ୟାୟ ହୋଇ ରହିବ ବୋଲି ଭକ୍ତମାନେ ଆଶା ପ୍ରକାଶ କରିଛନ୍ତି।

ମୁମ୍ବାଇ: ଟ୍ରେନ୍‌ର ପ୍ରଥମ ଏସି କ୍ୟାବିନକୁ ହନିମୁନ୍ ସୁଇଟ୍‌ରେ ପରିଣତ କରିବା ଘଟଣା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି। ସୋସିଆଲ ମିଡିଆରେ ଏହାର ଭିଡିଓ ଭାଇରାଲ ହେବା ପରେ ଦକ୍ଷିଣ ମଧ୍ୟ ରେଳବାଇ (SCR) କଡ଼ା ପଦକ୍ଷେପ ନେଇ ଡ୍ୟୁଟିରେ ଥିବା ଟିଟିଇଙ୍କୁ ତୁରନ୍ତ ସସପେଣ୍ଡ କରିଛି। ଏହି ଘଟଣା ମୁମ୍ବାଇ ଅଭିମୁଖେ ଯାଉଥିବା ନନ୍ଦୀଗ୍ରାମ ଏକ୍ସପ୍ରେସରେ ଘଟିଥିଲା।

ସୂଚନା ଅନୁଯାୟୀ, ଜୁଲାଇ ୬ରେ ମହାରାଷ୍ଟ୍ରର ଜାଲନା ଷ୍ଟେସନରୁ ଛତ୍ରପତି ଶିବାଜୀ ମହାରାଜ ଟର୍ମିନସ୍‌କୁ ଯାଉଥିବା ଏକ ନବବିବାହିତ ଦମ୍ପତିଙ୍କ ପାଇଁ ଏକ ବେସରକାରୀ ଇଭେଣ୍ଟ ମ୍ୟାନେଜମେଣ୍ଟ ସଂସ୍ଥା ଟ୍ରେନ୍‌ର ପ୍ରଥମ ଏସି କୁପେକୁ ସଜାଇଥିଲା। ବେଲୁନ୍, ଗୋଲାପ ଫୁଲ, ମହମବତୀ ଓ ଗୋଲାପ ପାଖୁଡ଼ାରେ ସମ୍ପୂର୍ଣ୍ଣ କ୍ୟାବିନକୁ ସଜାଯାଇଥିଲା। କାନ୍ଥରେ ବଡ଼ ଅକ୍ଷରରେ "I LOVE YOU" ଲେଖାଯାଇ ଏହାକୁ ଏକ ବିଳାସପୂର୍ଣ୍ଣ ହନିମୁନ୍ ରୁମ୍‌ର ରୂପ ଦିଆଯାଇଥିଲା।

ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ନେଟିଜେନମାନେ ଏହାକୁ "Suhagraat Express" ଏବଂ "Honeymoon-on-Wheels" ନାମ ଦେଇ ମଜାଦାର ମିମ୍ ଓ ପୋଷ୍ଟ କରିଥିଲେ। କେହି କେହି ତ ରେଳବାଇକୁ ପରାମର୍ଶ ଦେଇଥିଲେ ଯେ, କର୍ମଚାରୀଙ୍କୁ ସସପେଣ୍ଡ କରିବା ବଦଳରେ ଏଭଳି ପେଡ୍ ହନିମୁନ୍ ଡେକୋରେସନ୍ ପ୍ୟାକେଜ୍ ଆରମ୍ଭ କରାଯାଉ।

କିନ୍ତୁ ଭାଇରାଲ ଭିଡିଓ ପରେ ରେଳବାଇ ପକ୍ଷରୁ ଘଟଣାକୁ ଗୁରୁତ୍ୱର ସହ ନିଆଯାଇଛି। ଦକ୍ଷିଣ ମଧ୍ୟ ରେଳବାଇ ନିଜର ଏକ୍ସ (ପୂର୍ବତନ ଟ୍ୱିଟର) ପୋଷ୍ଟରେ ସ୍ପଷ୍ଟ କରିଛି ଯେ, ଟ୍ରେନ୍ ଭିତରେ ବାହାରର ଡେକୋରେଟରଙ୍କ ପ୍ରବେଶ ପାଇଁ କୌଣସି ଅନୁମତି ନଥିଲା। ଜାଲନା ଷ୍ଟେସନରେ ବିନା ଅନୁମତିରେ ଡେକୋରେଟରଙ୍କୁ କୋଚ୍ ଭିତରକୁ ଛାଡ଼ିବା ସୁରକ୍ଷା ନିୟମର ଗୁରୁତର ଉଲ୍ଲଂଘନ ବୋଲି କୁହାଯାଇଛି।

ଏହି ଅଭିଯୋଗରେ ସମ୍ପୃକ୍ତ ଟିଟିଇଙ୍କୁ ତୁରନ୍ତ ସସପେଣ୍ଡ କରାଯିବା ସହ ବିଭାଗୀୟ ତଦନ୍ତର ନିର୍ଦ୍ଦେଶ ଦିଆଯାଇଛି। ତଦନ୍ତ ରିପୋର୍ଟ ଆଧାରରେ ପରବର୍ତ୍ତୀ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ରେଳବାଇ ସ୍ପଷ୍ଟ କରିଛି।

ଏହି ଘଟଣା ପୁଣିଥରେ ରେଳବାଇର ସୁରକ୍ଷା ବ୍ୟବସ୍ଥା ଓ ଯାତ୍ରୀ ସୁବିଧାକୁ ନେଇ ଚର୍ଚ୍ଚା ସୃଷ୍ଟି କରିଥିବାବେଳେ, ସୋସିଆଲ ମିଡିଆରେ ଏହାକୁ ନେଇ ହସ-ମଜା ଚାଲିଥିଲେ ମଧ୍ୟ ରେଳବାଇ ଏହାକୁ ସୁରକ୍ଷା ଦୃଷ୍ଟିରୁ ଗୁରୁତର ଉଲ୍ଲଂଘନ ଭାବେ ବିବେଚନା କରିଛି।

ଭୁବନେଶ୍ୱର: ପୃଥିବୀର ମହାସାଗରଗୁଡ଼ିକ ଏବେ ଚିନ୍ତାର ନୂଆ କାରଣ ପାଲଟିଛି। ସମୁଦ୍ର ପୃଷ୍ଠର ତାପମାତ୍ରା ଏପରି ଭାବେ ବଢ଼ୁଛି ଯେ, ଜୁନ୍ ମାସର ସମସ୍ତ ପୁରୁଣା ରେକର୍ଡ ଭାଙ୍ଗିଯାଇଛି। ବିଶେଷଜ୍ଞମାନଙ୍କ ମତରେ, ଏହା କେବଳ ଗୋଟିଏ ତାପମାତ୍ରାର ରେକର୍ଡ ନୁହେଁ, ବରଂ ବିଶ୍ୱ ପାଇଁ ଏକ ବଡ଼ ବିପଦର ସଙ୍କେତ ହୋଇପାରେ।

ୟୁରୋପର କୋପରନିକସ୍ କ୍ଲାଇମେଟ୍ ଚେଞ୍ଜ ସର୍ଭିସ ପକ୍ଷରୁ ପ୍ରକାଶିତ ସଦ୍ୟ ତଥ୍ୟ ଅନୁଯାୟୀ, ଜୁନ୍ ୨୧ରେ ବିଶ୍ୱର ହାରାହାରି ସମୁଦ୍ର ପୃଷ୍ଠ ତାପମାତ୍ରା ୨୦.୮୬ ଡିଗ୍ରୀ ସେଲସିୟସ୍ରେ ପହଞ୍ଚିଥିଲା। ଏହା ୨୦୨୪ରେ ସ୍ଥାପିତ ହୋଇଥିବା ପୂର୍ବ ଜୁନ୍ ମାସର ସର୍ବୋଚ୍ଚ ରେକର୍ଡକୁ ମଧ୍ୟ ଅତିକ୍ରମ କରିଛି।

ଅନ୍ୟପକ୍ଷରେ, କୋପରନିକସ୍ ମେରାଇନ୍ ସର୍ଭିସର ତଥ୍ୟ ମଧ୍ୟ ସମାନ ଚିତ୍ର ଦେଖାଇଛି। ସେଠାରେ ମଧ୍ୟ ଜୁନ୍ ୨୧ରେ ସମୁଦ୍ରର ହାରାହାରି ତାପମାତ୍ରା ୨୧ ଡିଗ୍ରୀ ସେଲସିୟସ୍ ଛୁଇଁଥିବା ରେକର୍ଡ କରାଯାଇଛି। ଏହା ପୂର୍ବ ରେକର୍ଡଠାରୁ ଅଧିକ ଥିବାରୁ ବୈଜ୍ଞାନିକମାନଙ୍କ ଚିନ୍ତା ଦ୍ୱିଗୁଣିତ ହୋଇଛି।

ବିଶେଷଜ୍ଞମାନଙ୍କ କହିବା ଅନୁସାରେ, ଏହି ଅସ୍ୱାଭାବିକ ଉତ୍ତାପ ପଛରେ ଏଲ୍ ନିନୋ (El Niño)ର ପ୍ରଭାବ ମୁଖ୍ୟ କାରଣ। ଏଲ୍ ନିନୋ ଏବେ କେବଳ ଆରମ୍ଭ ହୋଇଥିବାବେଳେ, ଆଗାମୀ ମାସଗୁଡ଼ିକରେ ଏହା ଆହୁରି ଶକ୍ତିଶାଳୀ ହୋଇପାରେ। ଫଳରେ ବିଶ୍ୱର ତାପମାତ୍ରା ପୁଣି ନୂଆ ନୂଆ ରେକର୍ଡ ସୃଷ୍ଟି କରିପାରେ।

ବ୍ରିଟିଶ୍ ଆଣ୍ଟାର୍କାଟିକ୍ ସର୍ଭେର ସାମୁଦ୍ରିକ ବିଜ୍ଞାନୀ ମାଇକେଲ ମେରେଡିଥ୍ କହିଛନ୍ତି, ସମୁଦ୍ର ଉଷ୍ମ ହେବା ସ୍ୱାଭାବିକ ପ୍ରକ୍ରିୟା ହେଲେ ମଧ୍ୟ ବର୍ତ୍ତମାନ ଯେଉଁ ହାରରେ ତାପମାତ୍ରା ବଢ଼ୁଛି, ତାହା ଅତ୍ୟନ୍ତ ଅସାଧାରଣ। ଏହା କେବଳ ସାମୟିକ ପରିବର୍ତ୍ତନ ନା ଦୀର୍ଘମିଆଦି ସଙ୍କଟର ଆରମ୍ଭ, ତାହା ନେଇ ବୈଜ୍ଞାନିକମାନେ ଗବେଷଣା ଜାରି ରଖିଛନ୍ତି।

ସେହିପରି କୋପରନିକସ୍ କ୍ଲାଇମେଟ୍ ଚେଞ୍ଜ ସର୍ଭିସର ନିର୍ଦ୍ଦେଶକ କାର୍ଲୋ ବୁଓନଟେମ୍ପୋ କହିଛନ୍ତି, ବର୍ତ୍ତମାନର ସ୍ଥିତି ଜଳବାୟୁ ପରିବର୍ତ୍ତନର ଏକ ନୂଆ ଏବଂ ଅଜଣା ପର୍ଯ୍ୟାୟକୁ ସୂଚାଇପାରେ। ଯଦି ଏହି ଧାରା ଜାରି ରହେ, ତେବେ ବିଶ୍ୱକୁ ଅପ୍ରତ୍ୟାଶିତ ପ୍ରାକୃତିକ ବିପର୍ଯ୍ୟୟର ସାମ୍ନା କରିବାକୁ ପଡ଼ିପାରେ।

ସମୁଦ୍ରର ଏହି ଅତ୍ୟଧିକ ଉତ୍ତାପର ପ୍ରଭାବ କେବଳ ସମୁଦ୍ର ମଧ୍ୟରେ ସୀମିତ ରହିବ ନାହିଁ। ଏହା ବିଶ୍ୱ ପାଣିପାଗ ବ୍ୟବସ୍ଥାକୁ ଗୁରୁତର ଭାବେ ପ୍ରଭାବିତ କରିବ। ଅଧିକ ଉଷ୍ମ ସମୁଦ୍ର ବାୟୁମଣ୍ଡଳକୁ ଗରମ କରିବା ସହ ତାପପ୍ରବାହର ତୀବ୍ରତା ବଢ଼ାଇବ। ଘୂର୍ଣ୍ଣିଝଡ଼ ଅଧିକ ଶକ୍ତିଶାଳୀ ହେବା ସହ ବର୍ଷା ଓ ବନ୍ୟାର ଆଶଙ୍କା ମଧ୍ୟ ବଢ଼ିବ।

ଏହାଛଡ଼ା ପ୍ରବାଳ ପ୍ରାଚୀର (କୋରାଲ୍ ରିଫ୍) ନଷ୍ଟ ହେବା, ସାମୁଦ୍ରିକ ଜୀବଙ୍କ ବିଲୁପ୍ତି, ମାଛ ଉତ୍ପାଦନରେ ହ୍ରାସ ଏବଂ ସମୁଦ୍ରପତ୍ତନ ବୃଦ୍ଧି ପରି ଘଟଣା ଉପକୂଳବର୍ତ୍ତୀ ଅଞ୍ଚଳ ପାଇଁ ବଡ଼ ବିପଦ ସୃଷ୍ଟି କରିପାରେ। ବୈଜ୍ଞାନିକମାନଙ୍କ ସତର୍କବାଣୀ ସ୍ପଷ୍ଟ,ମହାସାଗରର ବଢ଼ୁଥିବା ଉତ୍ତାପକୁ ଯଦି ଏବେଠାରୁ ଗୁରୁତ୍ୱର ସହ ନିଆନଯାଏ, ତେବେ ଆଗାମୀ ଦିନରେ ଜଳବାୟୁ ପରିବର୍ତ୍ତନ ମାନବ ସଭ୍ୟତା ପାଇଁ ଆହୁରି ବଡ଼ ଆହ୍ୱାନ ପାଲଟିପାରେ। 

ଭୁବନେଶ୍ୱର: ଓଡ଼ିଆ ସଂସ୍କୃତି ଓ ପରମ୍ପରାର ଅନନ୍ୟ ନିଦର୍ଶନ 'ଲକ୍ଷ୍ମୀପୁରାଣ'କୁ ନେଇ ରାଜ୍ୟ ସରକାର ବଡ଼ ପଦକ୍ଷେପ ନେଇଛନ୍ତି। ସଂଶୋଧିତ ୧ କୋଟି 'ଲକ୍ଷ୍ମୀପୁରାଣ' ରାଜ୍ୟବ୍ୟାପୀ ବଣ୍ଟନ କରାଯିବ ବୋଲି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ସୂଚନା ଦେଇଛନ୍ତି।

ସେ କହିଛନ୍ତି, ସଂଶୋଧିତ 'ଲକ୍ଷ୍ମୀପୁରାଣ'କୁ ବିଶିଷ୍ଟ କଣ୍ଠଶିଳ୍ପୀ ନମିତା ଅଗ୍ରୱାଲ ଓ ଗୀତା ଦାସ ସ୍ୱର ଦେବେ। ଏହା ମାଧ୍ୟମରେ ନୂଆ ପିଢ଼ିଙ୍କ ପାଖରେ ଓଡ଼ିଆ ପରମ୍ପରା ଓ ଭକ୍ତି ସାହିତ୍ୟକୁ ପହଞ୍ଚାଇବାକୁ ସରକାର ଉଦ୍ୟମ କରୁଛନ୍ତି।

ଏହାସହ ବଳରାମ ଦାସଙ୍କ ଜନ୍ମପୀଠରେ 'ମହାଲକ୍ଷ୍ମୀ କରିଡର' ନିର୍ମାଣ କରାଯିବ ବୋଲି ମଧ୍ୟ ସେ ଘୋଷଣା କରିଛନ୍ତି। ଏହି କରିଡରରେ ବଳରାମ ଦାସଙ୍କ ଜୀବନ ଓ ସାହିତ୍ୟକୁ ନେଇ ଏକ ସ୍ୱତନ୍ତ୍ର ଗ୍ୟାଲେରୀ ସହ ମା' ଲକ୍ଷ୍ମୀଙ୍କ ଉପରେ ଗବେଷଣା ପାଇଁ ଏକ ରିସର୍ଚ୍ଚ ଗ୍ୟାଲେରୀ ମଧ୍ୟ ସ୍ଥାପନ କରାଯିବ।

ଉପମୁଖ୍ୟମନ୍ତ୍ରୀଙ୍କ କହିବା ଅନୁସାରେ, ଏହି ପ୍ରକଳ୍ପ କେବଳ ଧାର୍ମିକ ଓ ସାଂସ୍କୃତିକ ଦୃଷ୍ଟିରୁ ନୁହେଁ, ସ୍ଥାନୀୟ ଅଞ୍ଚଳର ପର୍ଯ୍ୟଟନ ଓ ରୋଜଗାର ସୃଷ୍ଟିରେ ମଧ୍ୟ ସହାୟକ ହେବ।

ସେହିପରି, ଆଗାମୀ ଦିନରେ ୫୦୦ ମହିଳା ଏକାଠି ହୋଇ 'ଲକ୍ଷ୍ମୀପୁରାଣ' ଗାନ କରିବାକୁ ନେଇ ମଧ୍ୟ ଯୋଜନା ରହିଥିବା ସେ ପ୍ରକାଶ କରିଛନ୍ତି। ଏହା ମାଧ୍ୟମରେ ଓଡ଼ିଶାର ସାଂସ୍କୃତିକ ଐତିହ୍ୟକୁ ଅଧିକ ଲୋକପ୍ରିୟ କରିବା ସହ ମହିଳାଙ୍କ ସକ୍ରିୟ ଅଂଶଗ୍ରହଣକୁ ପ୍ରୋତ୍ସାହନ ଦିଆଯିବ।

ରାଜଧାନୀ ଭୁବନେଶ୍ୱର... ସ୍ମାର୍ଟ ସିଟିର ପରିଚୟ, କିନ୍ତୁ ଏବେ ଏହି ସ୍ମାର୍ଟ ସିଟି ଦିନକୁ ଦିନ ସ୍ଲୋ-ସିଟି ହେଇଯାଇଛି। କାରଣ ଟ୍ରାଫିକ ଜାମ୍ ଏବେ ଏଠାକାର ଲୋକଙ୍କ ପାଇଁ ସବୁଠୁ ବଡ଼ ସମସ୍ୟା ପାଲଟିଛି। ପ୍ରତିଦିନ ସକାଳ ଓ ସନ୍ଧ୍ୟାରେ ରାଜଧାନୀର ବିଭିନ୍ନ ସ୍ଥାନରେ ଏମିତି ଘଣ୍ଟା ଘଣ୍ଟା ଧରି ଜାମ୍ ହେଉଛି। ବିଶେଷ କରି ହଂସପାଳ ଛକ ଏବଂ ବାଣୀବିହାର ଫୁଟ୍ ଓଭରବ୍ରିଜ୍ ନିକଟରେ ଗାଡ଼ିଗୁଡିକର ଲମ୍ବା ଧାଡ଼ି ଦେଖିବାକୁ ମିଳୁଛି।

୫ ମିନିଟର ରାସ୍ତା ପାର ହେବାକୁ ଲାଗୁଛି ଅଧ ଘଣ୍ଟାରୁ ଅଧିକ ସମୟ। ଅଫିସ୍ ଯାତ୍ରୀ, ଛାତ୍ରଛାତ୍ରୀ, ରୋଗୀ ଓ ସାଧାରଣ ଲୋକେ ପ୍ରତିଦିନ ଏହି ଯନ୍ତ୍ରଣା ଭୋଗୁଛନ୍ତି। ବଢ଼ୁଥିବା ଯାନବାହନ ସଂଖ୍ୟା, ଅବ୍ୟବସ୍ଥିତ ଟ୍ରାଫିକ ପରିଚାଳନା ଏବଂ ବ୍ୟସ୍ତ ଛକଗୁଡ଼ିକରେ ଯଥେଷ୍ଟ ବିକଳ୍ପ ବ୍ୟବସ୍ଥା ନଥିବାରୁ ସ୍ଥିତି ଦିନକୁ ଦିନ ଅଧିକ ଜଟିଳ ହେଉଛି।

ଏଠି ପ୍ରଶ୍ନ ଉଠୁଛି... ସ୍ମାର୍ଟ ସିଟିରେ ଟ୍ରାଫିକ ସମସ୍ୟାରୁ କେବେ ମିଳିବ ମୁକ୍ତି? ହଂସପାଳ ଓ ବାଣୀବିହାରର ଏହି ନିତିଦିନିଆ ଜାମ୍ ର ସମାଧାନ କେବେ କରିବ ପ୍ରଶାସନ? ଏଠାକାର ଟ୍ରାଫିକ ପ୍ଲାନିଂ ଫେଲ୍ ମାରିଛି ବୋଲି ଏବେ ପ୍ରତିଦିନ ଜାମ୍ ରେ ଫସିରହୁଥିବା ଏହି ଲୋକମାନେ ବି ପ୍ରଶ୍ନ ଉଠାଇଲେଣି। ତେବେ ଆଉ କେତେ ଦିନ ଏମିତି ଅଚଳ ହୋଇ ରହିବ ରାଜଧାନୀ? କେବେ ହେବ ଏହାର ସ୍ଥାୟୀ ପ୍ରତିକାର ତାହା ଦେଖିବାକୁ ବାକି ରହିଲା।

ଭୁବନେଶ୍ୱର: ଭାରତୀୟ ଲୋକତନ୍ତ୍ରର ଇତିହାସରେ ଜୁନ୍ ୨୫ ତାରିଖକୁ ଏକ ବିବାଦୀୟ ଓ ଐତିହାସିକ ଦିନ ଭାବେ ମନେ ରଖାଯାଏ। ଆଜିକୁ ପୂରିଛି ଜରୁରୀ ସ୍ଥିତି ବା ‘ଏମରଜେନ୍ସି’ ଘୋଷଣାର ୫୧ ବର୍ଷ। ୧୯୭୫ ମସିହା ଜୁନ୍ ୨୫ ତାରିଖରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଦେଶରେ ଜରୁରୀ ସ୍ଥିତି ଘୋଷଣା କରିଥିଲେ। ଅଲ୍ ଇଣ୍ଡିଆ ରେଡିଓ ମାଧ୍ୟମରେ ଏହି ଘୋଷଣା ହେବା ପରେ ସମଗ୍ର ଦେଶର ରାଜନୈତିକ ଓ ସାମାଜିକ ପରିସ୍ଥିତି ବଦଳି ଯାଇଥିଲା।

ସେତେବେଳେ ଇନ୍ଦିରା ଗାନ୍ଧୀ କହିଥିଲେ ଯେ ଦେଶରେ ବଢ଼ୁଥିବା ଆଭ୍ୟନ୍ତରୀଣ ଅସ୍ଥିରତାକୁ ଦୃଷ୍ଟିରେ ରଖି ରାଷ୍ଟ୍ରପତି ଫକରୁଦ୍ଦିନ ଅଲ୍ଲୀ ଅହମ୍ମଦ ଜରୁରୀ ସ୍ଥିତିକୁ ଅନୁମୋଦନ କରିଛନ୍ତି। କିନ୍ତୁ ବିରୋଧୀ ଦଳ ଏହାକୁ ଲୋକତନ୍ତ୍ର ଉପରେ ସବୁଠାରୁ ବଡ଼ ଆଘାତ ବୋଲି ବର୍ଣ୍ଣନା କରିଥିଲେ।

ଏମରଜେନ୍ସି ଲାଗୁ ହେବା ପରେ ଦେଶବାସୀଙ୍କ ଅନେକ ମୌଳିକ ଅଧିକାର ସ୍ଥଗିତ କରାଯାଇଥିଲା। ମୁକ୍ତ ଅଭିବ୍ୟକ୍ତି, ସରକାର ବିରୋଧରେ ପ୍ରତିବାଦ କରିବା ଓ ଗଣତାନ୍ତ୍ରିକ ଅଧିକାର ଉପରେ କଟକଣା ଲାଗିଥିଲା। ଗଣମାଧ୍ୟମ ଉପରେ କଠୋର ସେନ୍ସରସିପ୍ ଲାଗୁ ହୋଇଥିଲା ଏବଂ ସରକାର ବିରୋଧୀ ଖବର ପ୍ରକାଶ କରିବା ଉପରେ ନିଷେଧାଦେଶ ଥିଲା।

ଏହି ସମୟରେ ହଜାର ହଜାର ବିରୋଧୀ ନେତା, କର୍ମୀ ଓ ସାମାଜିକ କର୍ମୀଙ୍କୁ ଗିରଫ କରାଯାଇଥିଲା। ଜୟପ୍ରକାଶ ନାରାୟଣ, ମୋରାରଜୀ ଦେଶାଇ, ରାଜ ନାରାୟଣ ପରି ପ୍ରମୁଖ ବିରୋଧୀ ନେତାମାନେ ଜେଲ୍‌ରେ ବନ୍ଦ ରହିଥିଲେ। ପ୍ରାୟ ୨୧ ମାସ ଧରି ଜାରି ରହିଥିବା ଏହି ଜରୁରୀ ସ୍ଥିତି ୧୯୭୭ ମସିହାରେ ପ୍ରତ୍ୟାହାର କରାଯାଇଥିଲା।

ଏହା ମଧ୍ୟରେ କେନ୍ଦ୍ର ସରକାର ଜୁନ୍ ୨୫କୁ ‘ସମ୍ବିଧାନ ହତ୍ୟା ଦିବସ’ (Constitution Murder Day) ଭାବେ ପାଳନ କରିବାକୁ ଘୋଷଣା କରିଛନ୍ତି। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏମରଜେନ୍ସିକୁ ଏକ ‘ଏକଛତ୍ରବାଦୀ ପଦକ୍ଷେପ’ ବୋଲି କହିଥିବା ବେଳେ, ସେହି ସମୟରେ ଲୋକତନ୍ତ୍ର ଓ ସ୍ୱାଧୀନତା ପାଇଁ ସଂଘର୍ଷ କରିଥିବା ଲୋକଙ୍କୁ ସ୍ମରଣ କରିବାର ଆହ୍ୱାନ ଦେଇଛନ୍ତି।

୫୧ ବର୍ଷ ପରେ ମଧ୍ୟ ଏମରଜେନ୍ସି ଭାରତୀୟ ଲୋକତନ୍ତ୍ରର ଏକ କଳା ଅଧ୍ୟାୟ ଭାବେ ଚର୍ଚ୍ଚିତ ହୋଇ ରହିଛି, ଯାହା ଆଜି ମଧ୍ୟ ସ୍ୱାଧୀନତା ଓ ଗଣତନ୍ତ୍ରର ମୂଲ୍ୟକୁ ମନେ ପକାଇଦିଏ। 

ଘରେ ତାଲା ପକାଇ ଦୀର୍ଘ ଦିନ ପାଇଁ ବାହାରକୁ ଯାଉଛନ୍ତି କି? ତେବେ ଆଉ ଚୋରିକୁ ନେଇ ଚିନ୍ତା କରିବାକୁ ପଡ଼ିବନି। ଘର ଖାଲି ରହିବା ସମୟରେ ଏହାର ସୁରକ୍ଷା ଦାୟିତ୍ୱ ନେବ ପୋଲିସ। ଲଗାତାର ବଢ଼ୁଥିବା ଚୋରି ଘଟଣାକୁ ରୋକିବା ପାଇଁ ଉତ୍ତର ପ୍ରଦେଶର ଗୋରଖପୁର ପୋଲିସ ଆରମ୍ଭ କରିଛି ଏକ ନୂଆ ପଦକ୍ଷେପ।

ନିକଟରେ ସହରରେ ଅନେକ ଚୋରି ଘଟଣା ସାମ୍ନାକୁ ଆସିଥିଲା। ବିଶେଷ କରି ଯେଉଁ ଘରଗୁଡ଼ିକ ଦୀର୍ଘ ଦିନ ଧରି ବନ୍ଦ ରହୁଥିଲା, ସେଗୁଡ଼ିକୁ ଟାର୍ଗେଟ କରୁଥିଲେ ଚୋର। ଏହାକୁ ଗୁରୁତ୍ୱର ସହ ନେଇ ଗୋରଖପୁର ପୋଲିସ ଏବେ ଖାଲି ଘର ଉପରେ ବିଶେଷ ନଜର ରଖିବାକୁ ନିଷ୍ପତ୍ତି ନେଇଛି।

ନୂଆ ବ୍ୟବସ୍ଥା ଅନୁଯାୟୀ, କୌଣସି ପରିବାର ଛୁଟି, ବିବାହ କିମ୍ବା ଅନ୍ୟ କୌଣସି କାରଣରୁ କିଛି ଦିନ ପାଇଁ ଘର ଛାଡ଼ି ବାହାରକୁ ଯାଉଥିଲେ, ସେମାନେ ନିଜ ଅଞ୍ଚଳର ଥାନା, ପୋଲିସ ଚୌକି କିମ୍ବା ବିଟ୍ କନଷ୍ଟେବଳଙ୍କୁ ଏ ସମ୍ପର୍କରେ ଜଣାଇପାରିବେ। ଏହାପରେ ସେହି ଘରକୁ ପୋଲିସର ବିଶେଷ ନଜରଦାରୀ ତାଲିକାରେ ସାମିଲ କରାଯିବ।

ପୋଲିସ କହିଛି, ଚୋରମାନେ ପ୍ରଥମେ ଅଞ୍ଚଳରେ ରେକି କରିଥାନ୍ତି ଏବଂ ଦୀର୍ଘ ସମୟ ଧରି ବନ୍ଦ ଥିବା ଘରକୁ ଟାର୍ଗେଟ କରନ୍ତି। ଘରେ କେହି ନଥିବାର ସୁଯୋଗ ନେଇ ସେମାନେ ଚୋରି କରିଥାନ୍ତି। ଏହି ସମସ୍ୟାକୁ ରୋକିବା ପାଇଁ ପୋଲିସର ଏହି ନୂଆ ପ୍ରୟାସ।

ଏହି ଅଭିଯାନକୁ ସଫଳ କରିବା ପାଇଁ ଗୋରଖପୁର ପୋଲିସ ସଚେତନତା ଅଭିଯାନ ମଧ୍ୟ ଆରମ୍ଭ କରିଛି। ଅଟୋ ଓ ଇ-ରିକ୍ସାରେ ଲାଉଡସ୍ପିକର ଲଗାଇ ଲୋକଙ୍କୁ ସଚେତନ କରାଯାଉଛି। ସେହିପରି ହ୍ୱାଟସଆପ୍ ଗ୍ରୁପ ଓ ସ୍ଥାନୀୟ ସ୍ତରରେ ମଧ୍ୟ ସଚେତନତା ସୃଷ୍ଟି କରାଯାଉଛି।

ପୋଲିସ ଅଧିକାରୀଙ୍କ କହିବା ଅନୁସାରେ, ଏହି ବ୍ୟବସ୍ଥା ଫଳରେ ଚୋରି ଘଟଣା କମିବା ସହ ଲୋକମାନେ ନିଶ୍ଚିନ୍ତରେ ନିଜ ଯାତ୍ରା କରିପାରିବେ। ଘର ଛାଡ଼ି ବାହାରକୁ ଯିବା ପୂର୍ବରୁ ପୋଲିସକୁ ସୂଚନା ଦେଲେ, ଆପଣଙ୍କ ଅନୁପସ୍ଥିତିରେ ଘରର ସୁରକ୍ଷା ଉପରେ ରହିବ ପୋଲିସର କଡ଼ା ନଜର।

ରାଜ୍ୟରେ ଭାରତୀୟ ଜନତା ପାର୍ଟିର ସରକାର ଗଠନ ହେବା ପରେ ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଶ୍ଚିମବଙ୍ଗର ଦୁଇ ଦିନିଆ ଗସ୍ତରେ ଅଛନ୍ତି। ସେ ପ୍ରଥମ ଆନୁଷ୍ଠାନିକ 'ପଶ୍ଚିମ ବଙ୍ଗ ଦିବସ' ସମାରୋହ ଏବଂ ଆନ୍ତର୍ଜାତୀୟ ଯୋଗ ଦିବସ ସମେତ ଅନେକ କାର୍ଯ୍ୟକ୍ରମରେ ସାମିଲ ହେଉଛନ୍ତି। ପଶ୍ଚିମବଙ୍ଗ ରାଜନୀତିରେ ଗତ କିଛି ସମୟ ହେବ ରାଜ୍ୟ ପ୍ରତିଷ୍ଠା ଦିବସକୁ ନେଇ ଏକ ବଡ଼ ବିବାଦ ଚାଲିଛି। କେନ୍ଦ୍ର ସରକାର ଓ ବିଜେପି ଜୁନ୍ ୨୦ କୁ ପଶ୍ଚିମବଙ୍ଗ ଦିବସ ଭାବେ ପାଳନ କରୁଥିବା ବେଳେ ଅନ୍ୟପଟେ ମୁଖ୍ୟମନ୍ତ୍ରୀ ଥିବା ମମତା ବାନାର୍ଜୀ ପୋଇଲା ବୈଶାଖକୁ ଆଧିକାରିକ ଭାବେ ରାଜ୍ୟ ଦିବସ ଭାବେ ଘୋଷଣା କରିଥିଲେ।

ଏହିପରି ଭାବେ ଗୋଟିଏ ରାଜ୍ୟର ଦୁଇଟି ଜନ୍ମଦିନ ଏବଂ ଏହା ପଛରେ ଥିବା ରାଜନୈତିକ ଯୁଦ୍ଧକୁ ବୁଝିବା ପାଇଁ ଇତିହାସ ଏବଂ ରାଜନୀତିର ପୃଷ୍ଠା ଓଲଟାଇବା ଜରୁରୀ। ଆସନ୍ତୁ ଏହାକୁ ବିସ୍ତାର ଭାବେ ବୁଝିବା।

ଜୁନ୍ ୨୦ ର ଐତିହାସିକ ଗୁରୁତ୍ୱ

୨୦ ଜୁନ୍ ୧୯" ବେଙ୍ଗଲ ବିଧାନ ପରିଷଦର ସଦସ୍ୟମାନେ ଏକ ଐତିହାସିକ ମତଦାନ କରିଥିଲେ। ଏହି ମତଦାନ ଜରିଆରେ ସ୍ଥିର ହୋଇଥିଲା ଯେ ବଙ୍ଗଳାର ବିଭାଜନ ହେବ। ହିନ୍ଦୁ ବହୁଳ ପଶ୍ଚିମ ଅଞ୍ଚଳ ଭାରତ ସହିତ ରହିବାକୁ ନିଷ୍ପତ୍ତି ନେଇଥିଲା, ଯାହାକୁ ଆଜି ଆମେ ପଶ୍ଚିମବଙ୍ଗ ବୋଲି କହୁଛୁ। ଅନ୍ୟପଟେ ମୁସଲିମ୍ ବହୁଳ ପୂର୍ବ ଅଞ୍ଚଳ ପାକିସ୍ତାନର ଅଂଶ ସାଜିଥିଲା, ଯାହା ପରବର୍ତ୍ତୀ ସମୟରେ ବାଂଲାଦେଶ ହେଲା। ଏହି ଘଟଣା ଦେଶ ସ୍ୱାଧୀନ ହେବାର ଠିକ୍ ପୂର୍ବରୁ ଘଟିଥିଲା। ୧୫ ଅଗଷ୍ଟ ୧୯୪୭ ରେ ଏହା ଆନୁଷ୍ଠାନିକ ଭାବେ ଭାରତର ଏକ ଅଭିନ୍ନ ରାଜ୍ୟ ପାଲଟିଲା। ଅନେକ ଇତିହାସକାର ଯୁକ୍ତି କରନ୍ତି ଯେ, ଯଦି ୨୦ ଜୁନ୍ ୧୯୪୭ ରେ ଏହି ନିଷ୍ପତ୍ତି ନିଆଯାଇ ନଥାନ୍ତା, ତେବେ ଆଜିର ପଶ୍ଚିମବଙ୍ଗ ମଧ୍ୟ ବାଂଲାଦେଶର ଅଂଶ ହୋଇଥାନ୍ତା। ସେଥିପାଇଁ ବିଜେପି ଏବଂ ଅନ୍ୟ କେତେକ ଦଳ ଏହି ଦିନକୁ ରାଜ୍ୟର ଅସ୍ତିତ୍ୱ ରକ୍ଷାର ଦିବସ ଭାବେ ମାନନ୍ତି।

ମମତା ସରକାରଙ୍କ ବିରୋଧ କାହିଁକି?

ରାଜ୍ୟରେ ଯେତେବେଳେ ତୃଣମୂଳ କଂଗ୍ରେସର ସରକାର ଥିଲା, ସେତେବେଳେ ମୁଖ୍ୟମନ୍ତ୍ରୀ ଭାବେ ମମତା ବାନାର୍ଜୀ ଏବଂ ତାଙ୍କ ଦଳ ଜୁନ୍ ୨୦ କୁ ପ୍ରତିଷ୍ଠା ଦିବସ ଭାବେ ପାଳନ କରିବା ସପକ୍ଷରେ ଆଦୌ ନଥିଲେ। ସେମାନଙ୍କ କହିବା କଥା ଯେ, ଜୁନ୍ ୨୦ ତାରିଖଟି ଦେଶ ବିଭାଜନର ପିତା ଅନୁଭୂତି, ଦଙ୍ଗା ଏବଂ କୋଟି କୋଟି ଲୋକଙ୍କ ବିସ୍ଥାପନର ପ୍ରତୀକ ଅଟେ। ମମତା ବାନାର୍ଜୀଙ୍କ ଅନୁଯାୟୀ, ବଙ୍ଗଳାର ଜନ୍ମ କୌଣସି ଉତ୍ସବରୁ ନୁହେଁ, ବରଂ ବିଭାଜନର ଯନ୍ତ୍ରଣାରୁ ହୋଇଥିଲା। ସେମାନଙ୍କ ପାଇଁ ଏହି ଦିନଟି ଖୁସି ମନାଇବାର ନୁହେଁ, ବରଂ ଶୋକ ପାଳନ କରିବାର ଦିନ। ମମତା ବାନାର୍ଜୀ ବିଶ୍ୱାସ କରନ୍ତି ଯେ ପଶ୍ଚିମବଙ୍ଗ ଦିବସ ନାମରେ ବିଭାଜନର ସ୍ମୃତିକୁ ପୁଣି ସଜୀବ କରିବା ଦ୍ୱାରା ସମାଜରେ ଫାଟ ସୃଷ୍ଟି ହୋଇପାରେ।

ପୋଇଲା ବୈଶାଖ ରୂପରେ ମିଳିଲା ଏକ ନୂଆ ବିକଳ୍ପ

ଏହି ବିବାଦର ଅନ୍ତ କରିବା ପାଇଁ ମମତା ବାନାର୍ଜୀ ଏକ ନୂଆ ବାଟ ବାଛିଥିଲେ। ସେ ବଙ୍ଗଳା ନବବର୍ଷର ପ୍ରଥମ ଦିନ ଅର୍ଥାତ୍ 'ପୋଇଲା ବୈଶାଖ'କୁ ରାଜ୍ୟ ପ୍ରତିଷ୍ଠା ଦିବସ ଭାବେ ଘୋଷଣା କରିଦେଲେ। ପୋଇଲା ବୈଶାଖ ହେଉଛି ବଙ୍ଗଳାର ସଂସ୍କୃତି, ଗୌରବ ଓ ପରିଚୟର ସବୁଠାରୁ ବଡ଼ ପର୍ବ। ମମତା ସରକାରଙ୍କ ଯୁକ୍ତି ଥିଲା ଯେ, ଏହି ଦିନଟି ସବୁ ସମୁଦାୟକୁ ପରସ୍ପର ସହ ଯୋଡ଼ିଥାଏ। ଏଥିରେ ନା ବିଭାଜନର କଷ୍ଟ ଅଛି, ନା ସାମ୍ପ୍ରଦାୟିକତାର ଛାୟା। ଏହି ଦିନଟି ସମ୍ପୂର୍ଣ୍ଣ ରୂପେ ବଙ୍ଗାଳୀ ଅସ୍ମିତା ପ୍ରତି ସମର୍ପିତ।

‘ବାଙ୍ଗଲାର ମାଟି ବାଙ୍ଗଲାର ଜଲ୍’ ସାଜିଲା ରାଜ୍ୟ ସଙ୍ଗୀତ

ମମତା ସରକାର କେବଳ ଦିବସ ବଦଳାଇ ନଥିଲେ, ବରଂ ବିଶ୍ୱକବି ରବୀନ୍ଦ୍ରନାଥ ଟାଗୋରଙ୍କ ଦ୍ୱାରା ରଚିତ "ବାଙ୍ଗଲାର ମାଟି ବାଙ୍ଗଲାର ଜଲ୍" (ବଙ୍ଗଳାର ମାଟି, ବଙ୍ଗଳାର ପାଣି)କୁ ଆଧିକାରିକ ଭାବେ ରାଜ୍ୟ ସଙ୍ଗୀତ ଘୋଷଣା କରିଥିଲେ। ଏହି ଗୀତଟି ୧୯୦୫ ମସିହାର ବଙ୍ଗ-ଭଙ୍ଗ ଆନ୍ଦୋଳନ ସମୟରେ ଟାଗୋର ଲେଖିଥିଲେ, ଯାହାଦ୍ୱାରା ବଙ୍ଗଳାକୁ ଏକଜୁଟ ରଖାଯାଇ ପାରିବ। ଏହା ଜରିଆରେ ସରକାର ବାର୍ତ୍ତା ଦେଇଥିଲେ ଯେ ତାଙ୍କ ରାଜନୀତି ଏକତା ଏବଂ ସଂସ୍କୃତି ଉପରେ ଆଧାରିତ।

ଏହି ରାଜନୈତିକ ଲଢ଼େଇର ରହିଛି ଅନେକ କାରଣ

• ବଙ୍ଗାଳୀ ଅସ୍ମିତା ବନାମ ରାଷ୍ଟ୍ରବାଦ: ମମତା ବାନାର୍ଜୀ ନିଜକୁ ବଙ୍ଗଳାର ସଂସ୍କୃତି ଏବଂ ପରିଚୟର ରକ୍ଷକ ଭାବେ ଉପସ୍ଥାପିତ କରୁଥିଲେ। ସେ ବିଜେପିକୁ ବାହାରିଆ ବୋଲି କହି ଏହା ପ୍ରମାଣିତ କରିବାକୁ ଚାହୁଁଥିଲେ ଯେ କେବଳ ତାଙ୍କ ଦଳ ହିଁ ପ୍ରକୃତ ବଙ୍ଗାଳୀ ଭାବନାକୁ ବୁଝିପାରେ।

• ଇତିହାସର ବ୍ୟାଖ୍ୟା: ବିଜେପି ପାଇଁ ଜୁନ୍ ୨୦ ହେଉଛି ଅଖଣ୍ଡ ଭାରତର ଚିନ୍ତାଧାରା ଏବଂ ହିନ୍ଦୁମାନଙ୍କ ପାଇଁ ଏକ ସୁରକ୍ଷିତ ରାଜ୍ୟ ଗଠନର ପ୍ରତୀକ। ସେମାନେ ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀଙ୍କ ଅବଦାନକୁ ମନେ ପକାଇବାକୁ ଚାହାନ୍ତି, ଯିଏ ବଙ୍ଗଳା ବିଭାଜନ ସପକ୍ଷରେ ଓକିଲାତି କରିଥିଲେ ଯେପରି ପଶ୍ଚିମବଙ୍ଗ ଭାରତର ଅଂଶ ହୋଇ ରହିବ। ତେଣୁ ଏହି ଦିନଟି ବିଜେପିର ନୀତିକୁ ସମର୍ଥନ କରେ।

• ଭୋଟ୍ ବ୍ୟାଙ୍କ ରାଜନୀତି: ବିଜେପି ଜୁନ୍ ୨୦ ଜରିଆରେ ହିନ୍ଦୁ ଶରଣାର୍ଥୀ ଏବଂ ସେହି ଲୋକମାନଙ୍କୁ ଆପଣାଇବାକୁ ଚେଷ୍ଟା କରେ, ଯାହାଙ୍କ ପୂର୍ବପୁରୁଷମାନେ ବିଭାଜନର ଶିକାର ହୋଇଥିଲେ। ଅନ୍ୟପଟେ, ତୃଣମୂଳ କଂଗ୍ରେସ ସାଂସ୍କୃତିକ ପ୍ରତୀକ ମାଧ୍ୟମରେ ନିଜକୁ ମଜବୁତ କରିବାକୁ ଚେଷ୍ଟା କରୁଛି।

• ରାଜ୍ୟପାଳ ଏବଂ କେନ୍ଦ୍ର ସହ ବିବାଦ: ଏହି ବିବାଦ ସେତେବେଳେ ଆହୁରି ତେଜିଥିଲା ଯେତେବେଳେ ପଶ୍ଚିମବଙ୍ଗର ରାଜ୍ୟପାଳ ରାଜଭବନରେ ଜୁନ୍ ୨୦ କୁ ପ୍ରତିଷ୍ଠା ଦିବସ ଭାବେ ପାଳନ କରିବାକୁ ପଦକ୍ଷେପ ନେଇଥିଲେ। ସେତେବେଳେ ମମତା ବାନାର୍ଜୀ ଏହାକୁ ରାଜ୍ୟ ସରକାରଙ୍କ ଅବମାନନା ବୋଲି କହିଥିଲେ। ସେହିପରି କେନ୍ଦ୍ର ସରକାର ଆଡଭାଇଜରୀ ଜାରି କରି ଜୁନ୍ ୨୦ କୁ ପଶ୍ଚିମବଙ୍ଗ ଦିବସ ଭାବେ ମାନ୍ୟତା ଦେଇଥିଲେ, ଯାହାକୁ ରାଜ୍ୟ ସରକାର ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଥିଲେ।

ଆମ ଜନତାଙ୍କ ମତାମତ କଣ?

ପଶ୍ଚିମବଙ୍ଗର ସାଧାରଣ ଲୋକଙ୍କ ମଧ୍ୟରେ ଏହାକୁ ନେଇ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳେ। ବୁଦ୍ଧିଜୀବୀମାନଙ୍କର ଏକ ଗୋଷ୍ଠୀ ବିଶ୍ୱାସ କରନ୍ତି ଯେ ଜୁନ୍ ୨୦ ର ସତ୍ୟକୁ ଏଡ଼ାଇ ଦିଆଯାଇପାରିବ ନାହିଁ, କାରଣ ଏହା ଏକ ସାମ୍ବିଧାନିକ ବାସ୍ତବତା। ଅନ୍ୟପକ୍ଷରେ, ଯୁବପିଢ଼ି ଏବଂ ସଂସ୍କୃତି ପ୍ରେମୀଙ୍କର ଏକ ବଡ଼ ଭାଗ ପୋଇଲା ବୈଶାଖକୁ ଉତ୍ସବ ଭାବେ ପାଳନ କରିବାକୁ ଅଧିକ ପସନ୍ଦ କରନ୍ତି।

ସହଜ ଶବ୍ଦରେ କହିବାକୁ ଗଲେ, ପଶ୍ଚିମବଙ୍ଗ ମାଟିରେ ଏହି ତାରିଖଗୁଡ଼ିକର ଯୁଦ୍ଧ ପ୍ରକୃତରେ ବିଚାରଧାରାର ଲଢ଼େଇ ଅଟେ। ଗୋଟିଏ ପଟେ ଇତିହାସର ସେହି ବାସ୍ତବତା ଅଛି ଯେଉଁଥିରେ ବିଭାଜନର କଷ୍ଟ ରହିଛି, ତ ଅନ୍ୟପଟେ ସଂସ୍କୃତିର ସେହି ଚେହେରା ଅଛି ଯାହା ଭବିଷ୍ୟତ ଆଡ଼କୁ ଚାହିଁଥାଏ। ଜୁନ୍ ୨୦ ଏବଂ ପୋଇଲା ବୈଶାଖ ମଧ୍ୟରେ ଚାଲିଥିବା ଏହି ଟଣାଓଟରା ଆଗାମୀ ଦିନରେ ବଙ୍ଗଳା ରାଜନୀତିକୁ ଆହୁରି ମେରୁକରଣ) କରିପାରେ। ବର୍ତ୍ତମାନ ପାଇଁ ପଶ୍ଚିମବଙ୍ଗ ଦୁଇଟି ପରସ୍ପର ବିରୋଧୀ ପରିଚୟ ମଧ୍ୟରେ ଛିଡ଼ା ହୋଇଛି। ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ହୁଗୁଳି ଜିଲ୍ଲାର ତାରକେଶ୍ୱରରେ ଆୟୋଜିତ ପଶ୍ଚିମ ବଙ୍ଗ ଦିବସ ସମାରୋହରେ ଭାଗ ନେଉଛନ୍ତି। ପୋଇଲା ବୈଶାଖ ଏହି ବର୍ଷ ଏପ୍ରିଲ ୧୫ ତାରିଖରେ ନିର୍ବାଚନ ମଧ୍ୟରେ ପଡ଼ିଥିଲା।