ନୂଆଦିଲ୍ଲୀ,ମେ୧୯(ଖବର ଓଡ଼ିଶା):
ଲୋକସଭା ନିର୍ବାଚନ ପାଇଁ ଦେଶର ୫୪୨ ସିଟରେ ମତଦାନ ଆଜି ସଂପନ୍ନ ହୋଇଛି। ଫଳାଫଳ ମେ ୨୩ରେ ଘୋଷିତ ହେବ। ମାତ୍ର ଏହା ପୂର୍ବରୁ ଅନେକ ସଂସ୍ଥା ଓ ଜାତୀୟ ଗଣମାଧ୍ୟମ ପକ୍ଷରୁ ଘୋଷିତ ହୋଇଛି ଏଗଜିଟ୍ ପୋଲ। ଏଗଜିଟ୍ ପୋଲ ମୁତାବକ ତାମିଲନାଡୁରେ ୟୁପିଏ ପାଇଁ ଆସିଛି ଖୁସିର ଖବର। କଂଗ୍ରେସ ମେଣ୍ଟକୁ ତାମିଲନାଡୁରେ ୩୪ ରୁ ୩୮ ସିଟ୍ ମିଳିବାର ଅନୁମାନ କରାଯାଇଛି। ଏଠାରେ ପଦ୍ମ ମଉଳି ଯାଇଛି। ଏନଡିଏକୁ ମାତ୍ର ୦ ରୁ ୪ ସିଟ୍ ମିଳିପାରେ।
ତାମିଲନାଡୁରେ ସର୍ବଦା ଦୁର୍ବଳ ଥିବା ବିଜେପିର ପ୍ରଦର୍ଶନ ଏଥର ମଧ୍ୟ କିଛି ଖାସ୍ ହୋଇନାହିଁ। ଆଜତକ୍ ଓ ଏକ୍ସିସ ମାଇଁ ଇଣ୍ଡିଆର ଏଗଜିଟ୍ ପୋଲ ମୁତାବକ ୫ ସିଟରେ ଲଢିଥିବା ବିଜେପି ୦ ରୁ ୧ ସିଟ୍ ଜିତିପାରେ। ଅନ୍ୟ ପଟେ ୨୦୧୪ ନିର୍ବାଚନରେ ୩୭ ସିଟ୍ ଜିତିଥିବା ଏଆଇଏଡିଏମକେ ଏଥର ୦ ରୁ ୪ ସିଟରେ ସୀମିତ ରହିପାରେ। ଏଆଇଏଡିଏମକେ ଏଥର ୨୦ ସିଟରେ ନିର୍ବାଚନ ଲଢୁଥିଲା। ଉଲ୍ଲେଖଯୋଗ୍ୟ, ୨୦୧୪ ଲୋକସଭା ନିର୍ବାଚନରେ ବିଜେପି ମେଣ୍ଟ ସମସ୍ତ ୩୯ ସିଟରେ ବିଜୟୀ ହୋଇଥିଲା।
ଏଥର ବିଜେପି ଆଉ ଏକ ସହଯୋଗୀ ପିଏମକେ ତାମିଲନାଡୁରେ ୭ ସିଟରେ ନିର୍ବାଚନ ଲଢିଥିଲା। ଦଳକୁ ୦ ରୁ ୨ ସିଟ୍ ମିଳିବାର ଅନୁମାନ କରାଯାଇଛି। ଅନ୍ୟ ପଟେ ଡିଏମଡିକେକୁ ମଧ୍ୟ ଗୋଟିଏ ସିଟ୍ ମିଳିବାର ସମ୍ଭାବନା ରହିଛି।
କଂଗ୍ରେସକୁ ୭ ରୁ ୯ ସିଟ୍ ମିଳିବାର ଅନୁମାନ
ତାମିଲନାଡୁରେ କଂଗ୍ରେସ ପୁଣି ଥରେ ପ୍ରତ୍ୟାବର୍ତ୍ତନ କରୁଥିବା ଦେଖିବାକୁ ମିଳିଛି। ୨୦୧୪ରେ ନିରାଶଜନକ ପ୍ରଦର୍ଶନ କରିଥିବା କଂଗ୍ରେସକୁ ଏଥର ୭ ରୁ ୯ ସିଟ୍ ମିଳିବାର ସମ୍ଭାବନା ରହିଛି। କଂଗ୍ରେସ ଏହି ରାଜ୍ୟରୁ ୯ଟି ସିଟରେ ନିର୍ବାଚନ ଲଢିଛି। ଏହାର ସହଯୋଗୀ ଡିଏମକେ ୨୦ ରୁ ୨୨ ସିଟ୍ ଜିତିବାର ସମ୍ଭାବନା ରହିଛି। କଂଗ୍ରେସର ଅନ୍ୟ ସହଯୋଗୀ ଭିସିକେ ୦ ରୁ ୨, ସିପିଆଇ ୧ ରୁ ୨, ସିପିଆଇଏମ ୧ ରୁ ୨ ଓ ଆଇୟୁଏମଏଲ ୦ ରୁ ୧ ସିଟରେ ବିଜୟୀ ହେବାର ଅନୁମାନ କରାଯାଇଛି। ୨୦୧୪ ନିର୍ବାଚନରେ କଂଗ୍ରେସ ମେଣ୍ଟକୁ ଗୋଟିଏ ହେଲେ ସିଟ୍ ମିଳିନଥିଲା।