ନୂଆଦିଲ୍ଲୀ, ମେ ୨୧ (ଖବର ଓଡ଼ିଶା): କଂଗ୍ରେସ ନେତା ରାହୁଲ ଗାନ୍ଧୀ ଚୀନ ସହିତ ଭାରତର ଜାରି ରହିଥିବା ବିବାଦକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି । ଲଣ୍ଡନରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ରାହୁଲ ଗାନ୍ଧୀ ଅନେକ ପ୍ରସଙ୍ଗରେ ବିସ୍ତୃତ ଭାବେ କହିଛନ୍ତି । ଚୀନ ସହିତ ବାସ୍ତବିକ ନିୟନ୍ତ୍ରଣ ରେଖା (ଏଲଏସି)କୁ ନେଇ ରାହୁଲ ଅଧିକ କହିଛନ୍ତି ।
ରାହୁଲ ଗାନ୍ଧୀ ରୁଷିଆ-ୟୁକ୍ରେନ୍ର ଉଦାହରଣ ଦେଇ ଭାରତ-ଚୀନର ବିବାଦକୁ ଉଜାଗର କରିଛନ୍ତି । ସେ କହିଛନ୍ତି ଯେ, ପୁତିନ୍ କହୁଛନ୍ତି ଯେ, ମୁଁ ୟୁକ୍ରେନ୍ର ୨ଟି ଜିଲ୍ଲା ଉପରେ ଏଥି ପାଇଁ ଆକ୍ରମଣ କରିବି କାରଣ ସେମାନେ ଯେକୌଣସି ଭାବେ ନାଟୋ ଅଥବା ଆମେରିକା ସହିତ ମିଶି ପାରିବେ ନାହିଁ । ଆପଣ ଏଠାରେ ଏହାକୁ ସମାନ୍ତର ଭାବେ ବୁଝିପାରିବେ । ୟୁକ୍ରେନ୍ରେ କ’ଣ ହେଉଛି, ଲଦ୍ଦାଖରେ କ’ଣ ହେଉଛି ।
କଂଗ୍ରେସ ନେତାଙ୍କ ନଜରରେ ରୁଷିଆ ଯେଭଳି ଭାବରେ ୟୁକ୍ରେନ୍ ଉପରେ ଆକ୍ରମଣ ଜାରି ରଖିଛି, ଚୀନ ମଧ୍ୟ ସମାନ ପ୍ରକାର ଉଦ୍ୟମ କରୁଛି । ତାଙ୍କ ନଜରରେ ଭାରତ ସରକାର ଏହି ପ୍ରସଙ୍ଗରେ କଥା ହେବାକୁ ଚାହୁଁ ନାହାନ୍ତି । ଭାରତର ମାଟିରେ ଚୀନ ବସିଛି । ଏଭଳି ପରିଦୃଶ୍ୟ ୟୁକ୍ରେନ୍ରେ ମଧ୍ୟ ଦେଖାଯାଇଛି ।
ରାହୁଲ ଗାନ୍ଧୀ କହିଛନ୍ତି ଯେ, ଭାରତକୁ ଏହି ଜଟିଳ ପରିସ୍ଥିତିରୁ ବର୍ତ୍ତିବାକୁ ହେବ । ଚୀନ ପସଙ୍ଗ ବ୍ୟତୀତ ରାହୁଲ ଗାନ୍ଧୀ ବର୍ତ୍ତମାନ ରାଜନୀତି ଉପରେ ମଧ୍ୟ ଚର୍ଚ୍ଚା କରିଛନ୍ତି । ଗଣତନ୍ତ୍ର ଉପରେ ରାହୁଲଙ୍କୁ ଯେତେବେଳେ ଗଣମାଧ୍ୟମର ପ୍ରତିନିଧିମାନେ ପଚାରିଛନ୍ତି, ସେ ଉତ୍ତର ଦେଇଛନ୍ତି ଯେ, ପ୍ରତିଟି ସ୍ଥାନରେ ଆକ୍ରମଣ କରାଯାଉଛି ।