ପ୍ରୟାଗରାଜ: ପ୍ରୟାଗରାଜ ମହାକୁମ୍ଭ ମେଳାରେ ବଡ଼ ଧରଣର ଅଘଟଣ । ମହାକୁମ୍ଭ ମେଳାରେ ଭୟଙ୍କର ଅଗ୍ନିକାଣ୍ଡ ଘଟିଛି । ଶାସ୍ତ୍ରୀ ବ୍ରିଜ୍ ନିକଟ କ୍ୟାମ୍ପରେ ଅଗ୍ନିକାଣ୍ଡ ହୋଇଥିବା ସୂଚନା । ନିଆଁ ଲାଗିବା ପରେ ଚାରିଆଡ ଧୂଆଁମୟ ହୋଇଯାଇଛି । ଗୋଟିଏ ପରେ ଗୋଟିଏ ଟେଣ୍ଡକୁ ଏହି ନିଆଁ ବ୍ୟାପିବାରେ ଲାଗିଛି । 

ନିଆଁ ଲାଗିବାର ଖବର ପାଇବା ମାତ୍ରେ ତୁରନ୍ତ ଅଗ୍ନିଶମ ବାହୀନି ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବାକୁ ଉଦ୍ୟମ କରୁଛି । ତେବେ ଏଇ ଭୟଙ୍କର ଅଗ୍ନିକାଣ୍ଡ ସର୍ଟସର୍କିଟରୁ ଲାଗିଥିବା ଜଣାପଡ଼ିଛି । 

ସୂଚନା ମୁତାବକ, ମେଳା ଅଞ୍ଚଳର ସେକ୍ଟର-୫ସ୍ଥିତ କ୍ୟାମ୍ପରେ ଏହି ଅଗ୍ନିକାଣ୍ଡ ଘଟିଛି । ୪ ଦମକଳ ଗାଡ଼ି ନିଆଁ ଲିଭାଇବାରେ ନିୟୋଜିତ ହୋଇଛନ୍ତି । ଏହି ଅଗ୍ନିକାଣ୍ଡରେ ୨୦ରୁ ୨୫ଟି ଟେଣ୍ଟ ଜଳି ପାଉଁଶ ହୋଇଯାଇଛି । ଅଗ୍ନିକାଣ୍ଡକୁ ନେଇ ଶ୍ରଦ୍ଧାଳୁମାନେ ଭୟଭୀତ ହୋଇପଡ଼ିଛନ୍ତି । ଲୋକମାନଙ୍କୁ ସେଠାରୁ ସୁରକ୍ଷିତ ଜାଗାକୁ ନିଆଯାଉଛି । ତେବେ ସେକ୍ଟର-୫ରେ ଲାଗିଥିବା ନିଆଁ ଧୀରେ ଧୀରେ ସେକ୍ଟର-୧୯ ଓ ୨୦କୁ ମଧ୍ୟ ବ୍ୟାପିଯାଇଛି । ଜୋରରେ ପବନ ହେତୁ ନିଆଁ ଦ୍ରୁତ ଗତିରେ ବ୍ୟାପିବାରେ ଲାଗିଥିଲା । ହେଲେ କିଛି ସମୟ ମଧ୍ୟରେ ନିଆଁକୁ ଆୟତ କରାଯାଇଛି । ଏଭଳି ସ୍ଥିତିରେ ଜିଲ୍ଲା ପ୍ରଶାସନ ଗୁଜବ ଉପରେ ଧ୍ୟାନ ନ ଦେବାକୁ ଲୋକଙ୍କୁ ନିବେଦନ କରିଛି ।