ଶିକ୍ଷା ଓ ଦକ୍ଷତା ବିକାଶର ଦୁଇଟି ସ୍ତମ୍ଭକୁ ଉପଯୋଗ କରି ମିଳିତ ଆକାଂକ୍ଷା ଉପରେ କାର୍ଯ୍ୟ କରିବା ସହ କମନ୍ ଷ୍ଟ୍ରାଟେଜି ବା ସାଧାରଣ ରଣନୀତି ପ୍ରସ୍ତୁତ କରିବା ଜରୁରୀ ବୋଲି ଗତ କାଲି ଦ୍ୱିତୀୟ ଭଏସ୍ ଅଫ୍ ଗ୍ଲୋବାଲ ସାଉଥ୍ ସମ୍ମିଟର ‘ଶିକ୍ଷା ମନ୍ତ୍ରୀ ଅଶନ’ର ଅଧ୍ୟକ୍ଷତା କରିବା ଅବସରରେ ଆହ୍ବାନ କରିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

'ସମସ୍ତଙ୍କ ଅଭିବୃଦ୍ଧି ପାଇଁ ଏକାଠି, ସମସ୍ତଙ୍କ ବିଶ୍ବାସ' କଥାବସ୍ତୁ ଅଧୀନରେ ଚାଲିଥିବା ଏହି ଶିଖର ସମ୍ମିଳନୀରେ ବିଶେଷ କରି ଶିକ୍ଷା କ୍ଷେତ୍ରରେ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହୋଇଥିଲା । 'ମାନବ ସମ୍ବଳକୁ ଭବିଷ୍ୟତ ପାଇଁ ପ୍ରସ୍ତୁତ କରିବା' ଶୀର୍ଷକ ଉପରେ ଶିକ୍ଷା ମନ୍ତ୍ରୀମାନେ ଆଲୋଚନା କରିଥିଲେ । ଏହି ଅବସରରେ କେନ୍ଦ୍ରମନ୍ତ୍ରୀ କହିଛନ୍ତି ଯେ ଆମ ସମସ୍ତଙ୍କୁ ନିଜର ଆକାଂକ୍ଷା ଉପରେ ଆଲୋଚନା କରି ଶିକ୍ଷା ଓ ଦକ୍ଷତା ବିକାଶର ଦୁଇଟି ସ୍ତମ୍ଭ ଆଧାରରେ ରଣନୀତି ପ୍ରସ୍ତୁତ କରିବାକୁ ହେବ ଏବଂ ଭାରତର ଅନୁଭବ ଏକ ଉଦାହରଣ ଭାବରେ ସମସ୍ତଙ୍କୁ ସହାୟକ ହୋଇପାରିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ଭାରତ ଜାତୀୟ ଶିକ୍ଷା ନୀତିକୁ କାର୍ଯ୍ୟକାରୀ କରୁଛି । ଏହା ଆମ ଶିକ୍ଷା ପରିସଂସ୍ଥାନରେ ବ୍ୟାପକ ସଂସ୍କାର ଆଣିଛି । ସର୍ବବ୍ୟାପୀ, ସର୍ବସ୍ପର୍ଶୀ, ଗୁଣାତ୍ମକ, ସୁଲଭ ଓ ଉତ୍ତରଦାୟିତ୍ଵ ଭଳି ୫ଟି ସ୍ତମ୍ଭ ଉପରେ ପ୍ରସ୍ତୁତ ଜାତୀୟ ଶିକ୍ଷା ନୀତି ଭାରତର ମୂଳ ଚରିତ୍ର ସହ ଯୋଡିହେବା ସହ ୨୦୩୦ ସ୍ଥାୟୀ ବିକାଶର ଏଜେଣ୍ଡା ସହ ସମ୍ମିଳିତ ରହିବ । ଏହା ଆମର ଯୁବପିଢିଙ୍କୁ ବୈଶିକ ନାଗରିକ ଭାବରେ ବିକଶିତ କରିବ । ଜାତୀୟ ଶିକ୍ଷା ନୀତି ଏକ ଦାର୍ଶନିକ ଦସ୍ତାବିଜ । ଏହି ଶିକ୍ଷା ନୀତି ଉଭା ହେଉଥିବା ଅର୍ଥନୀତି ଗୁଡିକ ଉପରେ ବିସ୍ତୃତ ରଣନୀତି ସହ ମାନବ ସମ୍ବଳ ବିକାଶ ପାଇଁ ନୀତି ପ୍ରସ୍ତୁତ କରିବାର ଏକ ଦସ୍ତାବିଜ୍ ହେବ ।

ପ୍ରଧାନମନ୍ତ୍ରୀ ମୋଦିଙ୍କ ଦୂରଦର୍ଶୀ ନେତୃତ୍ୱରେ ଭାରତ ଗ୍ଲୋବାଲ ସାଉଥର ଉଦ୍ଦେଶ୍ୟକୁ ସମର୍ଥନ କରିଛି ଏବଂ ଏକ ପରିବାର' ଭାବରେ ମିଳିତ ସମୃଦ୍ଧି ଏବଂ ଅଭିବୃଦ୍ଧି ପାଇଁ ସହଯୋଗ ଦେଇଛି । ଆମ ଡେମୋଗ୍ରାଫିକ ଡିଭିଡେଣ୍ଡ ଆମର ଶକ୍ତି । ଭାରତର ଯୁବବର୍ଗଙ୍କ ଉତ୍ତମ ଭବିଷ୍ୟତ ଗଢିବା ପାଇଁ ସ୍କୁଲ ଓ ଦକ୍ଷତା ବିକାଶକୁ ଏକତ୍ରୀକରଣ କରିବା ପାଇଁ ଜାତୀୟ ଶିକ୍ଷା ନୀତିରେ ପ୍ରାଧାନ୍ୟ ଦିଆଯାଇଛି । ଡିଜିଟାଲ  ଭିତ୍ତିଭୂମିକୁ ପ୍ରୋତ୍ସାହିତ କରିବାରେ ଭାରତର ପଦକ୍ଷେପକୁ ବିଶ୍ବ ଅନୁସରଣ କରୁଛି । ଭାରତର ଡିଜିଟାଲ ପେମେଣ୍ଟ ଫ୍ରେମୱାର୍କ ତଥା ୟୁପିଆଇ ମାସିକ ହଜାର କୋଟିରୁ ଉର୍ଦ୍ଧ୍ୱ ହୋଇସାରିଲାଣି ।

ଜାତୀୟ ଶିକ୍ଷା ନୀତି ଶିକ୍ଷା କ୍ଷେତ୍ରରେ ଡିଜିଟାଲ ପବ୍ଲିକ ଇନଫ୍ରାଷ୍ଟକଚର ଗଠନ କରିବାକୁ ପ୍ରାଧାନ୍ୟ ଦେଉଛି । ସ୍କିଲ୍ ଇଣ୍ଡିଆ ଡିଜିଟାଲ ପୋର୍ଟାଲ ମଧ୍ୟ ଆରମ୍ଭ କରାଯାଇଛି, ଯାହା ଶ୍ରମଶକ୍ତିଙ୍କୁ ଶିଳ୍ପସଂସ୍ଥା ତଥା ରୋଜଗାରଦାତାଙ୍କ ସହ ସିଧା ଯୋଡୁଅଛି । ଜାତୀୟ ଶିକ୍ଷା ନୀତି ଶିକ୍ଷାରେ ଲିଙ୍ଗଗତ ସମାନତାକୁ ଗୁରୁତ୍ଵ ଦେଉଛି । ଶିକ୍ଷା ତଥା ନବସୃଜନ ସମେତ ବିଭିନ୍ନ କ୍ଷେତ୍ରରେ ମହିଳା ତଥା ଝିଅଙ୍କ ନେତୃତ୍ଵ ବୃଦ୍ଧି, ସ୍କୁଲରେ ନାମଲେଖା ସହ ସେମାନଙ୍କୁ ଅଧିକରୁ ଅଧିକ ଯୋଡିବା ଦିଗରେ ଆମେ କାର୍ଯ୍ୟ କରୁଛୁ ।

ଶିକ୍ଷାର ଅନ୍ତର୍ଜାତୀୟକରଣ ହେଉଛି ଜାତୀୟ ଶିକ୍ଷା ନୀତିର ମୂଳ ଅଂଶ । ଜାତୀୟ ଶିକ୍ଷା ନୀତି ଭାରତକୁ ଗ୍ଲୋବାଲ ଷ୍ଟଡି ଡେଷ୍ଟିନେସନ ଭାବରେ ପ୍ରୋତ୍ସାହିତ କରୁଛି । ଭାରତରେ ଥିବା ଶିକ୍ଷାନୁଷ୍ଠାନ ବିଦେଶର ଉଚ୍ଚ ଶିକ୍ଷାନୁଷ୍ଠାନ ସହ ମିଶି ଛାତ୍ରଛାତ୍ରୀଙ୍କୁ ଡୁଆଲ ଡିଗ୍ରୀ ପ୍ରଦାନ କରିବା ପାଇଁ ପଦକ୍ଷେପ ନିଆଯାଇଛି । ଆଇଆଇଟି ଦିଲ୍ଲୀ, ୟୁଏଇ ଏବଂ ଆଇଆଇଟି ମାଡ୍ରାସ ତାଞ୍ଜାନିଆରେ ନିଜ କ୍ୟାମ୍ପସ ଆରମ୍ଭ କରିଛନ୍ତି । ଆମ ବିଶ୍ବବିଦ୍ୟାଳୟ ଗୁଡିକ ଜଏଣ୍ଟ, ଡୁଆଲ ଡିଗ୍ରୀ ଓ ଟ୍ୱିନିଂ ପ୍ରୋଗ୍ରାମ ମାଧ୍ଯମରେ ବିଦେଶର ପ୍ରମୁଖ ବିଶ୍ବବିଦ୍ୟାଳୟ ସହ ସହଭାଗୀ ହେଉଛନ୍ତି । ଭାରତରେ ଏବେ ବିଶ୍ବବିଦ୍ୟାଳୟ ସ୍ଥାପନ ପାଇଁ ଯୋଜନା କରାଯାଇଛି । ଭାରତ ନବସୃଜନ ଏବଂ ମାନବ ସମ୍ବଳ ବିକାଶରେ ନେତୃତ୍ବ ନେଉଛି । ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ବରେ ମାନବ ସମ୍ବଳକୁ ଭବିଷ୍ୟତ ପ୍ରସ୍ତୁତ କରିବା ଲକ୍ଷ୍ୟ ହାସଲ କରିବା ଦିଗରେ ଭାରତ 'ସମସ୍ତଙ୍କ ଅଭିବୃଦ୍ଧି ପାଇଁ ଏକାଠି, 

ସମସ୍ତଙ୍କ ବିଶ୍ୱାସ ସହିତ ଏକାଠି' କାର୍ଯ୍ୟ କରିବ ବୋଲି ଶ୍ରୀ ପ୍ରଧାନ କହିଛନ୍ତି ।

ଗ୍ଲୋବାଲ ସାଉଥର ୧୪ଟି ଦେଶର ମନ୍ତ୍ରୀ, ବ୍ୟକ୍ତିବିଶେଷମାନେ ଭର୍ଟୁଆଲ୍ ପ୍ଲାଟଫର୍ମରେ ଅଂଶଗ୍ରହଣ କରିଥିଲେ । ସେମାନେ ହେଲେ ବୋତ୍ସୱାନା, ବ୍ରୁନେଇ ଦାରୁସଲାମ, ଜର୍ଜିଆ, ତୁନିସିଆ, ଇରାନ, ଲାଓ ପିଡିଆର, ମାଲାମ୍ବି, ମିଆଁମାର, ରିପବ୍ଲିକ ଅଫ୍ ପଲାଉ, ଡେମୋକ୍ରାଟିକ୍ ରିପବ୍ଲିକ୍ ଅଫ୍ ସାଓ ଟମେ ଏବଂ ପ୍ରିନ୍ସିପ୍‌, ଆଲବେନିଆ, ମାଲେସିଆ, ଜିମ୍ବାୱେ, କ୍ୟାମେରୁନ୍ ଆଦି ଦେଶର ବିଶିଷ୍ଟ ବ୍ୟକ୍ତିମାନେ ଏହି କାର୍ଯ୍ୟକ୍ରମରେ ସାମିଲ ହୋଇ ନିଜର ମତ ରଖିଥିଲେ ।