ନୂଆଦିଲ୍ଲୀ: ଇରାନ ଓ ଆମେରିକା ମଧ୍ୟରେ ଜାରି ଯୁଦ୍ଧକୁ ନେଇ ଭାରତ ସରକାର ଆଲର୍ଟ ମୋଡରେ ଅଛନ୍ତି । କେନ୍ଦ୍ର ଗୃହ ମନ୍ତ୍ରଣାଳୟ ରାଜ୍ୟଗୁଡିକୁ ସତର୍କ ରହିବାକୁ ନିର୍ଦ୍ଦେଶ ଦେଇଛନ୍ତି । ଏହି ସମୟରେ ସାଂପ୍ରଦାୟିକ ହିଂସା ସୃଷ୍ଟି ହେବା ଆଶଙ୍କାକୁ ନେଇ ସତର୍କ ରହିବାକୁ କୁହାଯାଇଛି । ଇରାନର ସର୍ବୋଚ୍ଚ ନେତା ଅୟାତୋଲ୍ଲା ଖାମେନିଙ୍କ ମୃତ୍ୟୁ ପରେ ଭାରତର ଅନେକ ସହରରେ ବିରୋଧ ପ୍ରଦର୍ଶନ  ହୋଇଥିଲା ।

ଫେବୃଆରୀ ୨୮ରେ ଜାରି ପତ୍ରରେ ଚେତାବୀନ ଦିଆଯାଇଛି ଯେ, ଦୁନିଆରେ ହେଉଥିବା ଯୁଦ୍ଧର ପ୍ରଭାବ ଘରେ ମଧ୍ୟ ଦେଖିବାକୁ ମିଳିପାରେ । ବିଶେଷ କରି ଧାର୍ମିକ ଆୟୋଜନରେ ହେଉଥିବା ବୟାନବାଜି ବିଷୟରେ ଉଲ୍ଲେଖ କରାଯାଇଛି । ଚିଠିରେ ଏହା ଉପରେ ଗୁରୁତ୍ୱ ଦିଆଯାଇଛି ଯେ, ଗୁଇନ୍ଦା ସୂଚନାକୁ ଯଥା ଶୀଘ୍ର ଦିଆଯାଉ ଏବଂ ସମୟ ପୂର୍ବରୁ ପଦକ୍ଷେପ ନିଆଯାଉ, ଯଦ୍ୱାରା ଆଇନ ଶୃଙ୍ଖଳା ବ୍ୟବସ୍ଥା ଯେମିତି ନ ବିଗଡେ । 

ମାର୍ଗଦର୍ଶିକାରେ ରହିଛି କଣ

ମାର୍ଗଦର୍ଶିକାରେ ଗୃହ ମନ୍ତ୍ରଣାଳୟ କହିଛି ଯେ, ଉତ୍ତେଜନାମୂଳକ ଭାଷଣ ଦେଉଥିବା ଇରାନ ସମର୍ଥକ ଉପଦେଶକଙ୍କ ଚିହ୍ନଟ କରିବା ଏବଂ ସେମାନଙ୍କ ଉପରେ ନଜର ରଖିବାକୁ କୁହାଯାଇଛି । ଏଏନଆଇ ଅନୁସାରେ, ଦିଲ୍ଲୀରେ ଅଧିକାରୀ ଏହାକୁ ନେଇ ଚିନ୍ତିତ ଯେ, ଅନ୍ତର୍ଜାତୀୟ ଘଟଣାକ୍ରମର ଫାଇଦା ଉଠାଇ ଚରମପନ୍ଥୀ ସଂଗଠନ ସ୍ଥାନୀୟ ସ୍ତରରେ ଉତ୍ତେଜନା ବଢାଇ ପାରନ୍ତି । ତେଣୁ ମାର୍ଗଦର୍ଶିକାରେ ଭାଷଣ ଏବଂ ବୟାନବାଜି କରୁଥିବା ନେତା ଓ ଲୋକଙ୍କ ଉପରେ ନଜର ରଖିବାକୁ କୁହାଯାଇଛି ।

ଆମେରିକା ସହ ଆଲୋଚନା କରିବନି ଇରାନ

ପିଟିଆଇ ଅନୁଯାୟୀ, ଇରାନର ଶୀର୍ଷ ସୁରକ୍ଷା ଅଧିକାରୀ କହିଛନ୍ତି ଯେ, ତାଙ୍କ ଦେଶ ଆମେରିକା ସହ ଆଲୋଚନା କରିବ ନାହିଁ । ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସଙ୍କେତ ଦେଇଥିଲେ ଯେ, ସେ ଇରାନର ନୂଆ ନେତୃତ୍ୱଙ୍କ ସହ ଆଲୋଚନା ପାଇଁ ପ୍ରସ୍ତୁତ । ହେଲେ ଇରାନ ଆମେରିକା ସହ କୌଣସି ପ୍ରକାରର ଆଲୋଚନା କରିବ ନାହିଁ ବୋଲି ସ୍ପଷ୍ଟ କରିଛି ।