ଭାରତ-ଚୀନରୁ ଯୋଗାଣ ଠପ୍, ଜୀବନରକ୍ଷକ ଔଷଧ ପାଇଁ ଛଟପଟ ପାକିସ୍ତାନ
Khabar Odisha:international-odisha-pak-grapples-with-shortage-of-anti-rabies-vaccine-as-india-china-halts-supply
କରାଚି,ଅକ୍ଟୋବର୧୫(ଖବର ଓଡ଼ିଶା):

କାଶ୍ମୀରକୁ ସ୍ଵତନ୍ତ୍ର ରାଜ୍ୟ ମାନ୍ୟତା ପ୍ରଦାନ କରୁଥିବା ସାମ୍ବିଧାନିକ ଧାରା ୩୭୦ ଉଚ୍ଛେଦ ପରେ ରକ୍ତଚାଉଳ ଚୋବାଉଥିବା ପାକିସ୍ତାନ ଭାରତ ସହିତ ବାଣିଜ୍ୟିକ ସଂପର୍କ ତ ଛିନ୍ନ କରିଦେଲା, ମାତ୍ର ଏହା ଏବେ ତାକୁ ଭାରି ପଡ଼ିଛି। ଭାରତ ଓ ଚୀନରୁ ଶସ୍ତା ଔଷଧ ଯୋଗାଣ ବନ୍ଦ ହେବା ପରେ ପାକିସ୍ତାନରେ ଜୀବନ ରକ୍ଷକ ଔଷଧର ଘୋର ଅଭାବ ଦେଖା ଦେଇଛି। ପାକିସ୍ତାନ ପାଇଁ ଏହା ଏକ ବଡ଼ ସଙ୍କଟ ଭାବେ ଉଭା ହୋଇଛି, କାରଣ ସାଂପ୍ରତିକ ସ୍ଥିତିରେ ସିନ୍ଧ ପ୍ରାନ୍ତରେ କୁକୁର କାମୁଡ଼ା ମାମଲା ବଢିବାରେ ଲାଗିଛି। ୟୁରୋପରୁ ଏହି ଔଷଧ ମଗାଇଲେ ପାକିସ୍ତାନକୁକ ୭୦ ପ୍ରତିଶତ ଅଧିକ ଖର୍ଚ୍ଚ କରିବାକୁ ପଡ଼ିବ। ସଂପ୍ରତି ପାକିସ୍ତାନ ଗୁରୁତର ଆର୍ଥିକ ସଙ୍କଟ ଦେଇ ଗତି କରୁଛି। ଏମିତି ସ୍ଥିତିରେ ୟୁରୋପରୁ ଜୀବନରକ୍ଷାକାରୀ ଔଷଧ ମଗାଇବା ପାକିସ୍ତାନ ପକ୍ଷେ ଏତେ ସହଜ ନୁହଁ।

ରେବିଜ ଫ୍ରି କରାଚି କାର୍ଯ୍ୟକ୍ରମର ନିର୍ଦ୍ଦେଶକ ନସିମ ସଲାହୁଦ୍ଦୀନ କହିଛନ୍ତି ଯେ, ଭାରତ ପରିବର୍ତ୍ତେ ଅନ୍ୟ ଦେଶରୁ ଭ୍ୟାକ୍ସିନ ମଗାଇଲେ ବହୁତ ଖର୍ଚ୍ଚ ପଡୁଛି। ଭାରତରୁ ଆସୁଥିବା  ଜୀବନରକ୍ଷାକାରୀ ଔଷଧର ମୂଲ୍ୟ ହଜାରେ ଟଙ୍କା ଥିବା ବେଳେ ୟୁରୋପରୁ ଆସୁଥିବା ଔଷଧର ମୂଲ୍ୟ ୭୦ ହଜାର ଟଙ୍କା। ଏହି  ଜୀବନରକ୍ଷକ ଔଷଧ କେବଳ ସରକାରୀ ହସ୍ପିଟାଲରେ ଉପଲବ୍ଧ ରହିଛି। ସିନ୍ଧ ପ୍ରାନ୍ତ ଓ କରାଚିର ସରକାରୀ ହସ୍ପିଟାଲରେ ମଧ୍ୟ ଏହାର ଘୋର ଅଭାବ ରହିଛି।

ନିକଟ କିଛି ମାସରେ କରାଚିର ଗଳି କନ୍ଦିରେ ବୁଲାରିଆ କୁକୁରଙ୍କ ଦୌରାତ୍ମ୍ୟ ବୃଦ୍ଧି ପାଇଛି। ଗତ କିଛି ସପ୍ତାହରେ ଶତାଧିକ ମାମଲା ସାମ୍ନାକୁ ଆସିଛି। ସୋମବାର ରାତିରେ ୧୨ ଜଣଙ୍କୁ କୁକୁଟ କାମୁଡ଼ିବାରୁ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। 

ଗତ କିଛି ମାସରେ ପାକିସ୍ତାନର ଭାରତରୁ ଆମଦାନୀ ବନ୍ଦ ରହିଛି ଏବଂ ଚୀନଠୁ ମଧ୍ୟ ଆମଦାନୀ ନିଲମ୍ବିତ ରହିଛି। ପାକିସ୍ତାନ ନିଜର ଆବଶ୍ୟକତା ପାଇଁ ବଡ଼ ପରିମାଣରେ ଔଷଧ ଭାରତଠୁ ଆମଦାନୀ କରିଥାଏ। ପାକ୍ ଜୀବନରକ୍ଷକ ଔଷଧଠୁ ନେଇ ସାପ-କୁକୁର କାମୁଡା ଔଷଧ ଯାଏ ବହୁ ମାତ୍ରାରେ ଭାରତ ଉପରେ ନିର୍ଭରଶୀଳ। କାରଣ ଏସବୁ ପାକିସ୍ତାନରେ ତିଆରି ହୁଏ ନାହିଁ। ଜୁଲାଇରେ ପ୍ରକାଶିତ ଏକ ରିପୋର୍ଟ ଅନୁସାରେ, ପାକିସ୍ତାନ ୧୬ ମାସରେ ଭାରତଠୁ ୨୫୦ କୋଟି ଟଙ୍କାରୁ ଅଧିକ ପରିମାଣର ଔଷଧ କ୍ରୟ କରିଛି।

Subscribe

National International State Sports Entertainment