ମୁମ୍ବାଇ: ୧୭ ବର୍ଷ ପରେ ନାଗପୁର ଜେଲରୁ ବାହାରକୁ ଆସିଛନ୍ତି ଅଣ୍ଡରୱାର୍ଲ୍ଡ ଡନ୍ ଅରୁଣ ଗାୱଲି। ୨୦୦୭ରେ ଶିବସେନା ନେତା କମଳାକର ଜାମସାଣ୍ଡେକରଙ୍କ ହତ୍ୟା ପାଇଁ ତାଙ୍କୁ ଗିରଫ କରାଯାଇଥିଲା। ନିକଟରେ ସୁପ୍ରିମକୋର୍ଟ ଅରୁଣ ଗାୱଲିଙ୍କୁ ଜାମିନ ପ୍ରଦାନ କରିଥିଲେ। ଏହା ପରେ ଡନ୍ ଅରୁଣ ଗାୱଲି ବୁଧବାର ଦିନ ନାଗପୁର ଜେଲରୁ ଜାମିନରେ ମୁକ୍ତ ହୋଇଥିଲେ।

ନାଗପୁର ପୋଲିସ ସୁରକ୍ଷା ମଧ୍ୟରେ ଅରୁଣ ଗାୱଲିଙ୍କୁ ମୁକ୍ତ କରାଯାଇଥିଲା। କୁହାଯାଉଛି ଯେ ପୋଲିସ ଦଳ ତାଙ୍କୁ ବୁଧବାର ଦିନ ନାଗପୁରର ବାବା ସାହେବ ଆମ୍ବେଦକର ବିମାନବନ୍ଦରକୁ ଆଣିଥିଲା, ତା'ପରେ ବିମାନ ଯୋଗେ ମୁମ୍ବାଇ ଚାଲିଯାଇଥିଲା।

୨୦୦୪ ମସିହାରେ ମୁମ୍ବାଇ ବିଧାନସଭା ଆସନରୁ ବିଧାୟକ ଭାବେ ନିର୍ବାଚିତ ହୋଇଥିବା ଅରୁଣ ଗାୱଲି ମୁମ୍ବାଇ ଶିବସେନା କାଉନସିଲର କମଳାକର ଜାମସାଣ୍ଡେକରଙ୍କ ହତ୍ୟା ମାମଲାରେ ନାଗପୁର କେନ୍ଦ୍ରୀୟ ଜେଲରେ ଆଜୀବନ କାରାଦଣ୍ଡ ଭୋଗୁଥିଲେ।

୨୦୦୭ ମସିହାରେ ଶିବସେନା କାଉନସିଲର କମଳାକର ଜାମସାଣ୍ଡେକରଙ୍କ ହତ୍ୟା ମାମଲାରେ ଗୱଲିଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା। ୨୦୧୨ ମସିହାରେ ମୁମ୍ବାଇ ସେସନ୍ସ କୋର୍ଟ ଏହି ମାମଲାରେ ଗାୱଲିଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ଏହା ପରେ ତାଙ୍କୁ ନାଗପୁର କେନ୍ଦ୍ରୀୟ କାରାଗାରକୁ ସ୍ଥାନାନ୍ତର କରାଯାଇଥିଲା।

ଗିରଫ ହେବା ପରେ ଅରୁଣ ଗାୱଲି ସମୟ ସମୟରେ କୋର୍ଟର ଦ୍ୱାରସ୍ଥ ହୋଇଥିଲେ। ସେ ବମ୍ବେ ହାଇକୋର୍ଟରେ ସେସନ୍ସ କୋର୍ଟର ନିଷ୍ପତ୍ତିକୁ ଚ୍ୟାଲେଞ୍ଜ କରିଥିଲେ। ୨୦୧୯ ମସିହାରେ, ହାଇକୋର୍ଟ ନିମ୍ନ ଅଦାଲତର ନିଷ୍ପତ୍ତିକୁ ବଜାୟ ରଖିଥିଲେ।

ଗାୱଲିଙ୍କ ପକ୍ଷରୁ ଜାମିନ ପାଇଁ ଆବେଦନ ଦାଖଲ କରାଯାଇଥିଲା। ଶେଷରେ ଅରୁଣ ଗାୱଲି ସୁପ୍ରିମକୋର୍ଟର ଦ୍ୱାରସ୍ଥ ହୋଇଥିଲେ। ଗତ ସପ୍ତାହରେ ଅଗଷ୍ଟ ୨୮ ତାରିଖରେ, ସୁପ୍ରିମକୋର୍ଟ ଶିବସେନା କାଉନସିଲର ହତ୍ୟା ମାମଲାରେ ଗାୱଲିଙ୍କୁ ଜାମିନ ପ୍ରଦାନ କରିଥିଲେ। ଗାୱଲିଙ୍କ ଦୀର୍ଘ ଦଣ୍ଡ ଅବଧି (୧୮ ବର୍ଷ ଜେଲ୍) ବିଚାର କରି କୋର୍ଟ ଜାମିନ ପ୍ରଦାନ କରିଥିଲେ।

ଗାୱଲି ବାଇକୁଲାର ଏକ ଅଞ୍ଚଳ ଦାଗଡି ଚାୱଲରୁ ପ୍ରସିଦ୍ଧ ହୋଇଥିଲେ ଏବଂ ଅଖିଳ ଭାରତୀୟ ସେନାର ପ୍ରତିଷ୍ଠାତା। ସେ ୨୦୦୪ ରୁ ୨୦୦୯ ପର୍ଯ୍ୟନ୍ତ ମୁମ୍ବାଇର ଚିଞ୍ଚପୋକଲି ବିଧାନସଭା ନିର୍ବାଚନମଣ୍ଡଳୀର ବିଧାୟକ ଥିଲେ।

ଅଧିକ ପଢ଼ନ୍ତୁ: କୋଚିଂ ପ୍ରତିଷ୍ଠାନରେ ଆଉ କରିପାରିବେନି ମନଇଚ୍ଛା କାର୍ଯ୍ୟ