ମୁମ୍ବାଇ: ବର୍ଷର ଶେଷ ଦିନ ଅର୍ଥାତ୍ ଡିସେମ୍ବର ୩୧ରେ ଷ୍ଟକ ମାର୍କେଟ ପାଇଁ ଖରାପ ସମୟ ଆସିଛି। ବମ୍ବେ ଷ୍ଟକ ଏକ୍ସଚେଞ୍ଜର ୩୦ ସେୟାର ବିଶିଷ୍ଟ ସେନ୍ସେକ୍ସ ସୂଚକାଙ୍କ ଖୋଲିବା ମାତ୍ରେ ୪୫୦ ପଏଣ୍ଟରୁ ଅଧିକ ହ୍ରାସ ପାଇଥିବା ବେଳେ ନ୍ୟାସନାଲ ଷ୍ଟକ ଏକ୍ସଚେଞ୍ଜର ନିଫ୍ଟି ଇଣ୍ଡେକ୍ସ ମଧ୍ୟ ୧୦୦ ପଏଣ୍ଟରୁ ଅଧିକ ହ୍ରାସ ପାଇଛି। ବଜାରରେ ହ୍ରାସ ମଧ୍ୟରେ ବିଏସଇର ୩୦ଟି ଷ୍ଟକ ମଧ୍ୟରୁ ୨୬ଟି ରେ ଲାଲ ରଙ୍ଗରେ କାରବାର ହେଉଥିଲା। 

୨୦୨୪ ବର୍ଷର ଶେଷ ଦିନ ମଙ୍ଗଳବାର ବିଏସ୍ଇ ସେନ୍ସେକ୍ସ ୭୮,୨୪୮.୧୩ ବନ୍ଦରୁ ହ୍ରାସ ପାଇ ୭୭,୯୮୨.୫୭ରେ ପହଞ୍ଚିଛି। ପ୍ରାରମ୍ଭିକ କାରବାରରେ ଏହା ୪୫୦ ପଏଣ୍ଟରୁ ଅଧିକ ହ୍ରାସ ପାଇ ୭୭,୭୭୯.୯୯ ସ୍ତରରେ ପହଞ୍ଚିଥିଲା। ଅନ୍ୟପକ୍ଷରେ ସେନସେକ୍ସ ଭଳି ଏନ୍ ଏସ୍ ଇ ନିଫ୍ଟି ୫୦ରେ ମଧ୍ୟ ହ୍ରାସ ଦେଖିବାକୁ ମିଳିଥିଲା ଏବଂ ସୂଚକାଙ୍କ ପୂର୍ବ ବନ୍ଦ ୨୩,୬୪୪.୯୦ରୁ ହ୍ରାସ ପାଇ ୨୩,୫୬୦ ସ୍ତରରେ ଖୋଲିଥିଲା। ଏହାପରେ ଏହି ହ୍ରାସ ଆହୁରି ବୃଦ୍ଧି ପାଇଥିବାରୁ ନିଫ୍ଟି ୧୦୦ ପଏଣ୍ଟରୁ ଅଧିକ ହ୍ରାସ ପାଇ ୨୩,୫୨୭.୮୫ ସ୍ତରରେ ପହଞ୍ଚିଛି।  

ବର୍ଷର ଶେଷ ଅଧିବେଶନରେ ଆଇଟି ସେକ୍ଟରର ଷ୍ଟକ ବଜାର ର ମୁଡ୍ ଖରାପ କରିଛି। ଆଇଟି ସେୟାରରେ ବିକ୍ରି ଯୋଗୁଁ ନିଫ୍ଟିର ଆଇଟି ଇଣ୍ଡେକ୍ସ ପ୍ରାୟ ୧୦୦୦ ପଏଣ୍ଟ ହ୍ରାସ ସହ କାରବାର କରୁଛି। ଏହାବ୍ୟତୀତ ବ୍ୟାଙ୍କିଂ, ଏଫଏମସିଜି, ଧାତୁ, ଉପଭୋକ୍ତା ସାମଗ୍ରୀ, ସ୍ୱାସ୍ଥ୍ୟସେବା, ଶକ୍ତି, ଗଣମାଧ୍ୟମ କ୍ଷେତ୍ରର ସେୟାର ହ୍ରାସ ପାଇଛି। କେବଳ ଫାର୍ମା ଏବଂ ତୈଳ ଓ ଗ୍ୟାସ କ୍ଷେତ୍ରର ଷ୍ଟକଗୁଡ଼ିକରେ ବୃଦ୍ଧି ଦେଖିବାକୁ ମିଳୁଛି। ମିଡ୍ କ୍ୟାପ୍ ଓ ସ୍ମଲ୍ କ୍ୟାପ୍ ସେୟାରରେ ମଧ୍ୟ ହ୍ରାସ ଘଟିଛି। ନିଫ୍ଟି ମିଡ୍ କ୍ୟାପ୍ ସୂଚକାଙ୍କ ୫୧୮ ପଏଣ୍ଟ ହ୍ରାସ ପାଇଥିବା ବେଳେ ସ୍ମଲ୍ କ୍ୟାପ୍ ସୂଚକାଙ୍କ ୧୧୫ ପଏଣ୍ଟ ହ୍ରାସ ପାଇଛି।  

ଏପରିକି ବର୍ଷର ଶେଷ ଅଧିବେଶନରେ ନିବେଶକମାନେ ୩ ଲକ୍ଷ କୋଟିରୁ ଅଧିକ ଟଙ୍କା ହରାଇଛନ୍ତି। ବିଏସଇ ତାଲିକାଭୁକ୍ତ ଷ୍ଟକଗୁଡ଼ିକର ବଜାର ପୁଞ୍ଜି ଗତ ଅଧିବେଶନରେ ୪୪୧.୩୫ ଲକ୍ଷ କୋଟି ଟଙ୍କାରୁ ହ୍ରାସ ପାଇ ୪୩୭.୮୨ ଲକ୍ଷ କୋଟି ଟଙ୍କାରେ ପହଞ୍ଚିଛି। ଅର୍ଥାତ୍ ଆଜିର ଅଧିବେଶନରେ ନିବେଶକମାନେ ୩.୫୩ ଲକ୍ଷ କୋଟି ଟଙ୍କା ହରାଇଛନ୍ତି। 

ଅଧିକ ପଢ଼ନ୍ତୁ: ଟ୍ରେଜେରୀ ଡିପାର୍ଟମେଣ୍ଟକୁ ହ୍ୟାକ୍ କଲେ ଚୀନ୍ ହ୍ୟାକର