ଢାକା: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ଝିଅ ସାଇମା ୱାଜେଡ୍ ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ)ର ଦକ୍ଷିଣ-ପୂର୍ବ ଏସିଆ ଆଞ୍ଚଳିକ ନିର୍ଦ୍ଦେଶକ ପଦରୁ ଇସ୍ତଫା ଦେଇଛନ୍ତି। ଜାତିସଂଘ ଏଜେନ୍ସି ଏବଂ ବାଂଲାଦେଶୀ ଅଧିକାରୀଙ୍କ ଦ୍ୱାରା ଠକେଇ ଏବଂ ଜାଲିଆତିର ତଦନ୍ତ ମଧ୍ୟରେ ତାଙ୍କର ଇସ୍ତଫା ଆସିଛି। ଗତ ବର୍ଷ ସଂଗଠନ ଦ୍ୱାରା ସାଇମାଙ୍କୁ ଅବୈତନିକ ପ୍ରଶାସନିକ ଛୁଟିରେ ରଖାଯାଇଛି। ସେ ୨୦୨୪ରୁ ପାଞ୍ଚ ବର୍ଷ ପାଇଁ ଆଞ୍ଚଳିକ ନିର୍ଦ୍ଦେଶକ ପଦ ଗ୍ରହଣ କରିଥିଲେ।

ବୁଧବାର ଦିନ ହୁ ନିର୍ଦ୍ଦେଶକ-ଜେନେରାଲ ଟେଡ୍ରୋସ୍ ଆଧାନମ୍ ଘେବ୍ରେୟସସ୍‌ଙ୍କୁ ପଠାଯାଇଥିବା ତାଙ୍କ ଇସ୍ତଫା ପତ୍ରରେ ସେ ଲେଖିଛନ୍ତି ଯେ ତାଙ୍କ ଦାୟିତ୍ୱ ନିର୍ବାହ କରିବାରୁ ବାରଣ କରାଯିବା ପରେ ସେ ଟେଡ୍ରୋସ୍ ଙ୍କ ନେତୃତ୍ୱ ଉପରେ ବିଶ୍ୱାସ ହରାଇଛନ୍ତି। ୱାଜେଡ୍ ତାଙ୍କ ଇସ୍ତଫା ପତ୍ରରେ ଲେଖିଛନ୍ତି ଯେ ସେ ତାଙ୍କ ଅଞ୍ଚଳର ଦେଶଗୁଡ଼ିକୁ ଅତ୍ୟନ୍ତ ଆନ୍ତରିକତାର ସହିତ ସେବା କରିଛନ୍ତି କିନ୍ତୁ ସଂଗଠନର ନେତୃତ୍ୱ ଉପରେ ଆଉ ଭରସା ନାହିଁ।

ମୋ ଅଞ୍ଚଳର ଦେଶଗୁଡ଼ିକର ସେବା କରିବା ପାଇଁ ମୋତେ ମନୋନୀତ କରାଯାଇଥିଲା, ଯେଉଁ କାମ ମୁଁ ଅତ୍ୟନ୍ତ ଆନ୍ତରିକତାର ସହିତ କରିଥିଲି। ମୋତେ ନିୟମିତ ଭାବରେ ମୋର କର୍ତ୍ତବ୍ୟ ସଠିକ୍ ଭାବରେ ସମ୍ପାଦନ କରିବାରୁ ବାରଣ କରାଯାଇଛି, ଯାହା ‘ହୁ’ରେ ଆପଣଙ୍କ ନେତୃତ୍ୱ ଉପରେ ମୋର ବିଶ୍ୱାସକୁ ହ୍ରାସ କରିଛି।

ସାଇମା କହିଛନ୍ତି ଯେ ମୋତେ ଅବୈତନିକ ଛୁଟିରେ ପଠାଇବାର ନିଷ୍ପତ୍ତି ଫଳରେ ମୁଁ ଗୋଟିଏ ବର୍ଷ ପାଇଁ ବିନା ଦରମାରେ ରହିବା ପରେ ମୋର ଆର୍ଥିକ ପରିସ୍ଥିତି ଅତ୍ୟନ୍ତ ଖରାପ ହୋଇଯାଇଛି। ଏହି ପରିସ୍ଥିତିରେ, ମୁଁ ଇସ୍ତଫା ଦେବାକୁ ନିଷ୍ପତ୍ତି ନେଉଛି। ବାଂଲାଦେଶ ଦୁର୍ନୀତି ନିବାରଣ କମିଶନ ସେହି ବର୍ଷ ମାର୍ଚ୍ଚ ମାସରେ ତାଙ୍କ ବିରୁଦ୍ଧରେ ଠକେଇ ଏବଂ ଜାଲିଆତି ଅଭିଯୋଗ ଆଣିବା ପରେ, ଜୁଲାଇ ୨୦୨୫ରେ ତାଙ୍କୁ ପ୍ରଥମେ ଛୁଟିରେ ପଠାଯାଇଥିଲା।

ହୁ ଏହା ମଧ୍ୟ ଅଭିଯୋଗ କରିଛି ଯେ ସେ ବାଂଲାଦେଶରେ ବେଆଇନ ଭାବରେ ଏକ ଜମି ଅଧିଗ୍ରହଣ କରିଥିଲେ। ତଥାପି  ‘ହୁ’ରେ ଯୋଗଦେବା ପୂର୍ବରୁ ସେ ଏହି ସମ୍ପତ୍ତି ଅଧିଗ୍ରହଣ କରିଥିଲେ ବୋଲି ୱାଜେଡ୍ ଦାବି କରିଛନ୍ତି। ବାଂଲାଦେଶୀ ଆଇନ ଅନୁଯାୟୀ ସେ ଏହାର ହକଦାର ଥିଲେ, ଯାହା ତାଙ୍କ ପିତାମହ ଏବଂ ବାଂଲାଦେଶର ପ୍ରତିଷ୍ଠାତା ନେତା ଶେଖ ମୁଜିବୁର ରହମାନଙ୍କ ପରିବାରକୁ ଅନ୍ତର୍ଭୁକ୍ତ କରେ।

ଅଧିକ ପଢ଼ନ୍ତୁ: ଫିଲିପାଇନ୍ସର ପର୍ଯ୍ୟଟନସ୍ଥଳ ନିକଟ ଫେରିରେ ଅଗ୍ନିକାଣ୍ଡ