ଗୁଆହାଟୀ: କ୍ୱିଣ୍ଟନ୍ ଡି କକ୍ ଆଇପିଏଲ୍-୨୦୨୫ରେ କୋଲକାତା ନାଇଟ୍ ରାଇଡର୍ସ ପାଇଁ ଖେଳି ଏକ ବଡ଼ ରେକର୍ଡ ସୃଷ୍ଟି କରିଥିଲେ। ସିରିଜର ଷଷ୍ଠ ମ୍ୟାଚ୍‌ରେ ରାଜସ୍ଥାନ ରୟାଲ୍ସ ବିପକ୍ଷରେ ଖେଳି ସେ ଅପରାଜିତ ୯୭ ରନ୍‌ କରିଥିଲେ। ଏହି ଇନିଂସ ଯୋଗୁଁ ତାଙ୍କ ଦଳ ୧୫୨ ରନର ଲକ୍ଷ୍ୟକୁ ସହଜରେ ହାସଲ କରିନେଇଥିଲା। ଡି’ କକ୍‌ଙ୍କ ଚମତ୍କାର ବ୍ୟାଟିଂ ଏବଂ ତାଙ୍କ ଦଳର ବିଜୟ ତାଙ୍କୁ 'ପ୍ଲେୟାର ଅଫ୍ ଦି ମ୍ୟାଚ୍' ଆଖ୍ୟା ଦେଇଥିଲା।

କ୍ୱିଣ୍ଟନ୍ ଡି’ କକ୍ ୬୧ ବଲ୍‌ରେ ୯୭ ରନ୍ କରିଥିଲେ। ତାଙ୍କ ଇନିଂସରେ ଆଠଟି ଚୌକା ଏବଂ ଛଅଟି ଛକା ସାମିଲ ଥିଲା। ଡି’ କକ୍ ଶତକ ହାସଲ କରିବାରୁ ବଞ୍ଚିତ ହୋଇଥିଲେ କିନ୍ତୁ ୧୧ ବର୍ଷର ପୁରୁଣା ରେକର୍ଡ ଭାଙ୍ଗିଥିଲେ। ଏହି ଇନିଂସ ସହିତ, ଡି’ କକ୍ ୨୦୧୪ ଫାଇନାଲରେ କିଙ୍ଗସ୍ ଇଲେଭେନ୍ ପଞ୍ଜାବ (ବର୍ତ୍ତମାନ ପଞ୍ଜାବ କିଙ୍ଗ୍‌ସ) ବିପକ୍ଷରେ ମନୀଷ ପାଣ୍ଡେଙ୍କ ରେକର୍ଡ ଭାଙ୍ଗିଛନ୍ତି। ଏବେ ଡି’ କକ୍ କେକେଆର ପାଇଁ ରନ-ଚେଜ୍‌ରେ ସବୁଠାରୁ ବଡ଼ ଇନିଂସ ଖେଳିଥିବା ଖେଳାଳି ହୋଇଯାଇଛନ୍ତି।

ମନୀଷ ପାଣ୍ଡେ ୨୦୧୪ ଫାଇନାଲରେ ୯୪ ରନ କରିଥିଲେ। ତାଙ୍କ ଇନିଂସ କେକେଆରକୁ ଦ୍ୱିତୀୟ ଟାଇଟଲ ଜିତିବାରେ ସାହାଯ୍ୟ କରିଥିଲା। ଏବେ ଏହି ରେକର୍ଡ ଦକ୍ଷିଣ ଆଫ୍ରିକାର ପୂର୍ବତନ ୱିକେଟକିପର ବ୍ୟାଟସମ୍ୟାନଙ୍କ ନାମରେ ପଞ୍ଜିକୃତ ହୋଇଛି।

‌କୋଲକାତା ପାଇଁ ସର୍ବାଧିକ ସ୍କୋର

• କ୍ୱିଣ୍ଟନ୍ ଡି କକ୍: ୯୭ ରନ୍ ବିପକ୍ଷରେ ଆରଆର, ୨୦୨୫
• ମନୀଷ ପାଣ୍ଡେ: ପିବିକେଏସ ବିପକ୍ଷରେ ୯୪ ରନ, ୨୦୧୪
• କ୍ରିସ୍ ଲିନ୍: ୯୩ ରନ୍ ବିପକ୍ଷରେ ଗୁଜରାଟ୍‌ ଲାୟନ୍ସ, ୨୦୧୭
• ମନବିନ୍ଦର ବିସ୍ଲା: 92 ରନ ବିପକ୍ଷରେ ଚେନ୍ନାଇ, ୨୦୧୩
• ଗୌତମ ଗମ୍ଭୀର: ୯୦ ରନ୍ ବିପକ୍ଷରେ ସନ୍‌ରାଇଜର୍ସ ହାଇଦ୍ରାବାଦ୍‌, ୨୦୧୬

ଗୌହାଟୀର ବରସାପାରା କ୍ରିକେଟ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍‌ରେ କୋଲକାତା ନାଇଟ୍ ରାଇଡର୍ସ ଚମତ୍କାର ପ୍ରଦର୍ଶନ କରି ରାଜସ୍ଥାନ ରୟାଲ୍ସକୁ ଆଠ ୱିକେଟ୍‌ରେ ପରାସ୍ତ କରି ସିଜିନର ପ୍ରଥମ ବିଜୟ ହାସଲ କରିଛି। ଅଜିଙ୍କ୍ୟ ରାହାଣେଙ୍କ ଅଧିନାୟକତ୍ୱରେ ଖେଳୁଥିବା କେକେଆରକୁ ତା'ର ପ୍ରଥମ ମ୍ୟାଚ୍‌ରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ହାତରୁ ସାତ ୱିକେଟରେ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା। ପ୍ରଥମେ ବ୍ୟାଟିଂ କରି ରାଜସ୍ଥାନ ନିର୍ଦ୍ଧାରିତ ୨୦ ଓଭରରେ ୧୫୧/୯ ରନ କରିଥିଲା। କୋଲକାତା ୧୭.୩ ଓଭରରେ ୨ ୱିକେଟ୍ ହରାଇ ୧୫୩ ରନ୍ କରି ଏକ ସହଜ ବିଜୟ ହାସଲ କରିଥିଲା।

ଅଧିକ ପଢ଼ନ୍ତୁ: ଉଡ଼ାଣ ପରେ ଏୟାର ’ଏସିଆ’ର ଇଞ୍ଜିନରେ ନିଆଁ ଲାଗିଲା