ଆଲିଗଡ଼: ଉତ୍ତର ପ୍ରଦେଶର ଆଲିଗଡ଼ ଅଞ୍ଚଳରେ ରବିବାର ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ରାସ୍ତାରେ ଠିଆ ହୋଇଥିବା ଏକ ଟ୍ରକ୍କୁ ଅନିୟନ୍ତ୍ରିତ ହୋଇ ବାଇକ୍ ଧକ୍କା ଦେଇଛି। ଏହି ଦୁର୍ଘଟଣାରେ ୪ ଜଣ ଯୁବକଙ୍କର ମୃତ୍ୟୁ ହୋଇଛି। ମୃତକମାନେ ଗୋଟିଏ ଗାଁର ବୋଲି ଜାତୀୟ ଗଣମାଧ୍ୟମ ରିପୋର୍ଟ କରିଛି।
ରିପୋର୍ଟ ଅନୁଯାୟୀ, ଆଲିଗଡ଼ ଥାନା ଅଧୀନ ଦୌଲତପୁର ଖୋର୍ଦ ନିବାସୀ ୪ ଜଣ ଯୁବକ କୌଣସି କାମରେ ଏକ ବାଇକରେ ଯାଉଥିଲେ। ସେମାନେ ଦ୍ରୁତଗତିରେ ଆସୁଥିବାରୁ ନିୟନ୍ତ୍ରଣ ହରାଇଥିଲେ। ଏଥି ସହିତ ରାସ୍ତାରେ ଠିଆ ହୋଇଥିବା ଟ୍ରକ୍କୁ ଧକ୍କା ଦେଇଥିଲେ। ବାଇକରେ ଥିବା ୪ ଜଣ ଯୁବକଙ୍କ ଗୁରୁତର ଆହତ ହୋଇଥିଲେ। ଦୁର୍ଘଟଣା ସଂପର୍କିତ ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚି ଥିଲା। ୪ ଜଣ ଯୁବକଙ୍କୁ ଉଦ୍ଧାର କରାଯାଇ ଡାକ୍ତରଖାନା ନିଆଯାଇଥିଲା। ସେଠାରେ ସେମାନଙ୍କୁ ଡାକ୍ତର ମୃତ ଘୋଷଣା କରିଥିଲେ।
ପୁଲିସ ଦୁର୍ଘଟଣାଗ୍ରସ୍ତ ବାଇକ ଓ ଟ୍ରକକୁ ଜବତ କରିଛି। ମାମଲା ରୁଜୁ କରି ଘଟଣାର ଅଧିକ ତଦନ୍ତ କରୁଛି। ସ୍ଥାନୀୟ ଲୋକଙ୍କ କହିବା ଅନୁସାରେ ୪ ଜଣ ଯୁବକଙ୍କ ମଧ୍ୟରୁ କେହି ହେଲମେଟ୍ ପିନ୍ଧି ନଥିଲେ।
ଅଧିକ ପଢ଼ନ୍ତୁ: ପାଟନାରେ ମୃତ୍ୟୁର ତାଣ୍ଡବ ରଚିଲା ଦ୍ରୁତଗାମୀ କାର