ଉଡୁପି: କର୍ଣ୍ଣାଟକର ଉଡୁପି ଜିଲ୍ଲାରେ ବେଆଇନ ଭାବେ ରହୁଥିବା ୮ ଜଣ ବାଂଲାଦେଶୀ ନାଗରିକଙ୍କୁ ଗିରଫ କରାଯାଇଛି। ବିନା ବୈଧ ପାସପୋର୍ଟ କିମ୍ବା ଭିସାରେ ସେମାନେ ଗତ ୩ ବର୍ଷ ହେଲା ଜିଲ୍ଲାର ହୁଡେ ଗ୍ରାମରେ ରହୁଥିଲେ। ଶନିବାର ପୁଲିସ ଏହି ସୂଚନା ଦେଇଛି।

ଉଡୁପି ଆରକ୍ଷୀ ଅଧୀକ୍ଷକ ଅରୁଣଙ୍କ କହିବାନୁଯାୟୀ, ମହମ୍ମଦ ମାଣିକ ନାମକ ଜଣେ ଅଭିଯୁକ୍ତ ନକଲି ପାସପୋର୍ଟ ବ୍ୟବହାର କରି ଦୁବାଇ ପଳାଇଯିବାକୁ ଉଦ୍ୟମ କରିବାରୁ ବାଂଲାଦେଶୀମାନଙ୍କୁ ଗିରଫ କରାଯାଇଥିଲା। ଦକ୍ଷିଣ କନ୍ନଡ ଜିଲ୍ଲାର ବାଜପେ ବିମାନବନ୍ଦରରୁ ତାଙ୍କୁ ଗିରଫ କରାଯାଇଛି।

ପଚରାଉଚରା ପରେ ମାଣିକ ପ୍ରକାଶ କରିଥିଲେ ଯେ ହୁଡେ ଗ୍ରାମରେ ତାଙ୍କ ସହ ଅନ୍ୟ ୭ ଜଣ ବାଂଲାଦେଶୀ ବେଆଇନ ଭାବେ ରହୁଥିଲେ। ଏହି ସୂଚନା ଉଡୁପି ପୁଲିସକୁ ଦିଆଯାଇଥିଲା, ଯିଏ କି ଏହି ଅଞ୍ଚଳରେ ଚଢ଼ାଉ କରିଥିଲା। ଶୁକ୍ରବାର ପୁଲିସ ୭ ଜଣଙ୍କୁ ଅଟକ ରଖି ପଚରାଉଚରା ଆରମ୍ଭ କରିଛି। 

ଅଭିଯୁକ୍ତଙ୍କ ପାଖରେ ନକଲି ଆଧାରକାର୍ଡ ଥିବା ତଦନ୍ତରୁ ଜଣାପଡ଼ିଥିଲା। ଅଭିଯୁକ୍ତମାନେ କିପରି ଏହି ନକଲି ଆଧାର କାର୍ଡ ହାସଲ କଲେ ଏବଂ ସେମାନେ କିପରି ବାଂଲାଦେଶରୁ ସୀମା ଅତିକ୍ରମ କରି ଭାରତରେ ପ୍ରବେଶ କରିବାରେ ସଫଳ ହେଲେ ସେ ନେଇ ତଦନ୍ତ ଚାଲିଛି। ୮ ଜଣ ବାଂଲାଦେଶୀ ନାଗରିକ ବର୍ତ୍ତମାନ ପୋଲିସ ହେପାଜତରେ ଅଛନ୍ତି ଏବଂ ସେମାନଙ୍କୁ ସ୍ଥାନୀୟ ଅଦାଲତରେ ହାଜର କରାଯିବ ବୋଲି ଆଶା କରାଯାଉଛି।

ନକଲି କାଗଜପତ୍ର ବ୍ୟବହାର କରି ବେଆଇନ ଭାବେ ଭାରତରେ ରହୁଥିବା ଆଉ ୧୦ ଜଣ ପାକିସ୍ତାନୀ ନାଗରିକଙ୍କୁ ମଙ୍ଗଳବାର ବେଙ୍ଗାଲୁରୁ ପୁଲିସ ଗିରଫ କରିଛି। ଏହି ଗିରଫଦାରୀକୁ ମିଶାଇ ଗତ କିଛି ସପ୍ତାହ ମଧ୍ୟରେ ବେଙ୍ଗାଲୁରୁ ଉପକଣ୍ଠ ଜିଗାନି ଅଞ୍ଚଳରେ ଅଟକ ଥିବା ପାକିସ୍ତାନୀ ନାଗରିକଙ୍କ ସଂଖ୍ୟା ୧୭କୁ ବୃଦ୍ଧି ପାଇଛି।

ବେଙ୍ଗାଲୁରୁ ଏବଂ କର୍ଣ୍ଣାଟକର ଅନ୍ୟାନ୍ୟ ସ୍ଥାନରେ ୨୨ ଜଣ ପାକିସ୍ତାନୀ ନାଗରିକଙ୍କୁ ସାହାଯ୍ୟ ଓ ଆଶ୍ରୟ ଦେଇଥିବା ଅଭିଯୋଗରେ ପରଭେଜଙ୍କୁ ଅଟକ ରଖାଯିବା ପରେ ଏହି ଗିରଫଦାରୀ କରାଯାଇଛି। ପରଭେଜ୍ ଏହି ବ୍ୟକ୍ତିମାନଙ୍କୁ ହିନ୍ଦୁ ନାମ ରଖିବାରେ ସାହାଯ୍ୟ କରିଥିଲେ, ଯାହା ଦ୍ୱାରା ସେମାନେ ଏହି ଅଞ୍ଚଳରେ ରହୁଥିବା ସମୟରେ ମିଶିବା ଏବଂ ପରିଚୟରୁ ଦୂରେଇ ରହିଥିଲେ ବୋଲି ଅଭିଯୋଗ ହୋଇଛି।

ଅଧିକ ପଢ଼ନ୍ତୁ: ବାବା ସିଦ୍ଦିକି ହତ୍ୟାକାଣ୍ଡ: ଆଜି ହେବ ଶବ ବ୍ୟବଚ୍ଛେଦ