ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ଟେସଲା ସିଇଓ ଏଲନ ମସ୍କଙ୍କ ମଧ୍ୟରେ ମତଭେଦର ଖବର ପ୍ରାୟତଃ ସାମ୍ନାକୁ ଆସୁଛି। ଏହି ସମୟରେ ଟ୍ରମ୍ପ ଏକ ମାଷ୍ଟରଷ୍ଟ୍ରୋକ୍ କରିଛନ୍ତି। ସେ ମସ୍କଙ୍କ ସହଯୋଗୀ ଜାରେଡ୍ ଆଇଜାକମ୍ୟାନଙ୍କୁ ନାସାର ନୂତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଭାବରେ ନିଯୁକ୍ତ କରିଛନ୍ତି। ଜାରେଡ୍ ଏବେ ଆମେରିକୀୟ ମହାକାଶ ସଂସ୍ଥାର ନେତୃତ୍ୱ ନେବେ। ଜାରେଡ୍ ନିଜେ ସୋସିଆଲ ମିଡିଆ ପ୍ଲାଟଫର୍ମ ଟ୍ୱିଟରରେ ଏହି ସୂଚନା ସେୟାର କରିଛନ୍ତି। ସେ ଟ୍ରମ୍ପଙ୍କ ସହିତ ଏକ ଫଟୋ ମଧ୍ୟ ପୋଷ୍ଟ କରିଛନ୍ତି।

ଆକର୍ଷଣୀୟ କଥା ହେଉଛି ମସ୍କଙ୍କ ସହ ସମ୍ପର୍କ ଖରାପ ହେବା ପରେ ଟ୍ରମ୍ପ ନିଜେ ଜାରେଡ୍ ଆଇଜାକମ୍ୟାନଙ୍କୁ ନାସାରୁ ବହିଷ୍କାର କରିଥିଲେ। ତାଙ୍କ ସ୍ଥାନରେ ଆମେରିକା ପରିବହନ ସଚିବ ସିଆନ୍ ଡଫିଙ୍କୁ ମଧ୍ୟବର୍ତ୍ତୀକାଳୀନ ନାସା ମୁଖ୍ୟ ଭାବରେ ନିଯୁକ୍ତ କରାଯାଇଥିଲା। ତଥାପି, ଟ୍ରମ୍ପ ଏବେ ଜାରେଡ଼ଙ୍କ ପଦବୀକୁ ପୁନଃସ୍ଥାପିତ କରିଛନ୍ତି।

ସୋସିଆଲ ମିଡିଆରେ ଏହା ଘୋଷଣା କରି ଟ୍ରମ୍ପ କହିଛନ୍ତି, ମୁଁ ଜଣେ ଉତ୍କୃଷ୍ଟ ବ୍ୟବସାୟ ନେତା, ପାଇଲଟ୍ ଏବଂ ମହାକାଶଚାରୀ ଜାରେଡ୍ ଆଇଜାକମ୍ୟାନଙ୍କୁ ନାସାର ପ୍ରଶାସନିକ ଅଧିକାରୀ ଭାବରେ ମନୋନୀତ କରି ଖୁସି। ଟ୍ରମ୍ପଙ୍କ ପ୍ରସ୍ତାବକୁ କଂଗ୍ରେସ ଦ୍ୱାରା ଅନୁମୋଦନ କରିବାକୁ ପଡିବ, ଏବଂ ଟ୍ରମ୍ପଙ୍କ ଦଳ ବର୍ତ୍ତମାନ ସଂଖ୍ୟାଗରିଷ୍ଠତା ରଖିଛି। ଜାରେଡ୍ ଖୁବ୍ ଶୀଘ୍ର ନାସାର କମାଣ୍ଡ ଗ୍ରହଣ କରିପାରନ୍ତି।

ଜାରେଡଙ୍କୁ ପ୍ରଶଂସା କରି ଟ୍ରମ୍ପ ଆହୁରି କହିଛନ୍ତି, ଜାରେଡଙ୍କ ମହାକାଶ ପ୍ରତି ଆଗ୍ରହ ଏବଂ ତାଙ୍କ ଅଭିଜ୍ଞତା ବ୍ରହ୍ମାଣ୍ଡର ରହସ୍ୟ ସମାଧାନ କରିବାରେ ସାହାଯ୍ୟ କରିବ। ଏହା ମହାକାଶ ଅର୍ଥନୀତିକୁ ବୃଦ୍ଧି କରିବ। ଏହି କାରଣରୁ ସେ ନାସାର ନେତୃତ୍ୱ ନେବା ପାଇଁ ଉପଯୁକ୍ତ ପ୍ରାର୍ଥୀ। 

ଜାନୁଆରୀ-୨୦୨୫ରେ କ୍ଷମତା ଗ୍ରହଣ କରିବା ପରେ ଟ୍ରମ୍ପ ମସ୍କଙ୍କ ଅନୁରୋଧରେ ଜାରେଡଙ୍କୁ ନାସାର ମୁଖ୍ୟ ଭାବରେ ନିଯୁକ୍ତ କରିଥିଲେ। ଜାରେଡଙ୍କୁ ଏଲୋନ ମସ୍କଙ୍କ ନିକଟତର ବୋଲି ବିବେଚନା କରାଯାଏ। ଜାରେଡ ହେଉଛନ୍ତି ସେହି ବ୍ୟକ୍ତି ଯିଏ ୨୦୨୧ରେ ମସ୍କଙ୍କ ସ୍ପେସଏକ୍ସ କମ୍ପାନୀର ପ୍ରଥମ ବେସାମରିକ କ୍ୟାପସୁଲ କ୍ରୁର ନେତୃତ୍ୱ ନେଇଥିଲେ। ଏବେ ସେ ମଙ୍ଗଳ ଗ୍ରହକୁ ନାସାର ମିଶନରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବେ।

ଅଧିକ ପଢ଼ନ୍ତୁ: କିସ୍ତୱାଡ଼ରେ ସୁରକ୍ଷା ବାହିନୀ ଏବଂ ଆତଙ୍କବାଦୀଙ୍କ ମଧ୍ୟରେ ଏନକାଉଣ୍ଟର