ସମ୍ବଲପୁର: ସମ୍ବଲପୁର ବୁର୍ଲା ଥାନା ଅନ୍ତର୍ଗତ ବାବୁବନ୍ଧ ଗ୍ରାମରେ ଜଣେ ରାଇସ ମିଲ୍ ମାଲିକଙ୍କ ଘରେ ଏକ ବଡ଼ ଧରଣର ଡକାୟତି ହୋଇଛି । ଭେଙ୍କେଟେଶ୍ୱର ରାଇସ ମିଲ୍ ମାଲିକ ମୋତିଆଲା ରାକେଶଙ୍କ ଘରେ ସୋମବାର ଡକାୟତି ହୋଇଥିବା ନେଇ ଅଭିଯୋଗ ହୋଇଛି l ବୁର୍ଲା ଥାନା ଅଧିକାରୀ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛନ୍ତି ।
ମିଳିଥିବା ସୂଚନା ମୁତାବକ, ଗତକାଲି ବିଳମ୍ବିତ ରାତ୍ରିରେ ମିଲ୍ ମାଲିକ ମୋତିଆଲା ରାକେଶ ଓ ତାଙ୍କ ପରିବାର ସଦସ୍ୟ ଶୋଇଥିବା ବେଳେ ଡକାୟତମାନେ ଘରେ ପଶିଥିଲେ । ଏହା ସହ ଘର ଥିବା ସମସ୍ତ ସଦସ୍ୟଙ୍କୁ ବାନ୍ଧି ଘରେ ଥିବା ୨୦୦ ଗ୍ରାମ ସୁନା, ନଗଦ ୧ ଲକ୍ଷ ଟଙ୍କା ଓ ୫ଟି ମୋବାଇଲ ଫୋନ ନେଇ ଫେରାର ହୋଇଯାଇଥିଲେ । ଏ ନେଇ ମୋତିଆଲା ରାକେଶ ବୁର୍ଲା ଥାନାରେ ଲିଖିତ ଅଭିଯୋଗ କରିଛନ୍ତି l ଥାନା ଅଧିକାରୀ ଏବଂ ବୁର୍ଲା ଏସଡିପିଓ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଘରେ ଲାଗିଥିବା ସିସିଟିଭି ଫୁଟେଜକୁ ମଧ୍ୟ ଯାଞ୍ଚ କରୁଥିବା ନେଇ ସୂଚନା ରହିଛି l ଏହା ସହ ପୋଲିସ ପରିବାର ଲୋକଙ୍କୁ ପଚରାଉଚରା ଜାରି ରଖିଛି ।