ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୧୨୫ ତମ ମନ୍ କି ବାତ୍ ରେ ଓଡ଼ିଆ ଝିଅ ରଶ୍ମିତା ସାହୁଙ୍କ ସହ କଥା ହୋଇଛନ୍ତି । ଶ୍ରୀନଗରରେ ଆୟୋଜିତ ୱାଟର ସ୍ପୋର୍ଟସରେ ଭାଗ ନେଇଥିବା ରଶ୍ମିତାଙ୍କୁ ପ୍ରଶଂସା କଲେ । ନୌଚାଳନାରେ ଭାଗ ନେଇଥିବା ରଶ୍ମିତାଙ୍କୁ ୨ଟି ସ୍ବର୍ଣ୍ଣ ପଦକ ପାଇଁ ଶୁଭେଚ୍ଛା ଜଣାଇଲେ । କିପରି କ୍ରୀଡ଼ା ଜୀବନ ଆରମ୍ଭ କଲେ, କଣ ସଂଘର୍ଷ ଥିଲା ରଶ୍ମିତାଙ୍କୁ ପଚାରି ବୁଝିଥିଲେ ପ୍ରଧାନମନ୍ତ୍ରୀ । ଏହାସହ ସଂଘର୍ଷ ସତ୍ତ୍ବେ ଖେଳକୁ ନ ଛାଡ଼ି ଜାରି ରଖିବାକୁ ମୋଦି ପରାମର୍ଶ ଦେଇଛନ୍ତି ।

ସୂଚନା ଅନୁଯାୟୀ ଓଡ଼ିଶାର ରଶ୍ମିତା ସାହୁ ଶ୍ରୀନଗରର ଡାଲ୍‌ ହ୍ରସରେ ଚାଲିଥିବା ଖେଲୋ ଇଣ୍ଡିଆ ଜଳକ୍ରୀଡ଼ା ମହୋତ୍ସବରେ କାନୋଇଂ ୨୦୦ ମିଟର୍‌ ଏକକ ପ୍ରତିଯୋଗିତାରେ ସ୍ବର୍ଣ୍ଣପଦକ ଜିତିଥିଲେ   । ୫୩.୫୩ ସେକେଣ୍ଡ ସମୟ ନେଇ ରଶ୍ମିତା କେରଳ ଓ ମଧ୍ୟପ୍ରଦେଶର ପ୍ରତିଦ୍ବନ୍ଦ୍ବୀଙ୍କୁ ପଛରେ ପକାଇ ସ୍ବର୍ଣ୍ଣପଦକ ହାସଲ କରିଥିଲେ ।  ସ୍ବଳ୍ପ ବୟସରୁ ନିଜ ପିତା, ମାତାଙ୍କ ଦୁର୍ଘଟଣା, ମାଆଙ୍କ ପରଲୋକ, ବାପାଙ୍କ ଅସହାୟତା ଓ ଦାରିଦ୍ର୍ୟର ତାଡ଼ନା ଦେଖିବା ସତ୍ତ୍ବେ ସବୁ ଝଡ଼ଝଞ୍ଜାକୁ ପଛରେ ପକାଇ ରଶ୍ମିତା ପାଇଥିବା ସଫଳତା ପ୍ରତ୍ୟେକ କ୍ରୀଡ଼ାପ୍ରେମୀଙ୍କ ସମେତ ପ୍ରତିଟି ଓଡ଼ିଆଙ୍କୁ ବି ରୋମାଞ୍ଚିତ କରିଛି । ୨୩ ବର୍ଷୀୟା ରଶ୍ମିତାଙ୍କ ସଫଳତାର ଯାତ୍ରା କୌଣସି ସିନେମା କାହାଣୀଠାରୁ କମ୍ ନୁହେଁ  ।

୨୦୦୨ ମସିହାରେ କଟକ ଚୌଦ୍ବାରର ଏକ ମତ୍ସ୍ୟଜୀବୀ ପରିବାରରେ ରଶ୍ମିତାଙ୍କ ଜନ୍ମ । ପିଲାବେଳେ ଦୁଇଦୁଇଟି ଶକ୍ତ ପାରିବାରିକ ଧକ୍କା ତାଙ୍କ ଜୀବନରେ ଦୁଃଖ ଆଣିଥିଲା। ତାଙ୍କୁ ମାତ୍ର ୯ ବର୍ଷ ହୋଇଥିଲାବେଳେ ‌୨୦୧୧ରେ ତାଙ୍କ ବାପା ଏକ ଦୁର୍ଘଟଣାରେ ଗୁରୁତର ଆହତ ହୋଇଥିଲେ। ଫଳରେ ୫ ସଦସ୍ୟ ବିଶିଷ୍ଟ ସେମାନଙ୍କ ପରିବାରର ପେଟପାଟଣା ସଂକଟରେ ପଡ଼ିଥିଲା। ଏହାର ୪ ବର୍ଷ ପରେ ୨୦୧୫ରେ ରଶ୍ମିତାଙ୍କ ମାଆ ବି ଏକ ସଡ଼କ ଦୁର୍ଘଟଣାର ସମ୍ମୁଖୀନ ହୋଇ ଜୀବନ ହାରିଥିଲେ। ଏହା ରଶ୍ମିତାଙ୍କ ସମେତ ପୂରା ପରିବାରକୁ ଭାଙ୍ଗି ପକାଇଥିଲା। କଟକ ଜଗତପୁରରେ ସାଇ ପରିଚାଳିତ ଜାତୀୟ ଉତ୍କର୍ଷ ଜଳକ୍ରୀଡ଼ା କେନ୍ଦ୍ରରେ ନାମ ଲେଖାଇଲେ ଖେଳରେ ତାଲିମ ଦିଆଯିବା ସହ ତାଙ୍କୁ ସରକାରଙ୍କ ତରଫରୁ ଭତ୍ତା ମିଳିବ ବୋଲି ରଶ୍ମିତାଙ୍କୁ ତାଙ୍କର ଜଣେ ବନ୍ଧୁ ପରାମର୍ଶ ଦେଇଥିଲେ। ଏହା ଶୁଣିବା ପରେ ଆଉ ଦ୍ବିତୀୟ ଥର ଚିନ୍ତା ନକରି ରଶ୍ମିତା ତୁରନ୍ତ କାନୋଇଂରେ ନାମଲେଖା ପାଇଁ ଚୟନ ପରୀକ୍ଷା ଦେଇଥିଲେ ଓ ଉତ୍ତୀର୍ଣ୍ଣ ହୋଇଥିଲେ ରଶ୍ମିତା। ସେବେଠାରୁ ସେ ଆଉ ପଛକୁ ଫେରି ଚାହିଁ ନାହାନ୍ତି।

ଉତ୍ତରାଖଣ୍ଡରେ ଅନୁଷ୍ଠିତ ଗତ ଜାତୀୟ କ୍ରୀଡ଼ାରେ, ସେ କାନୋଇଂ ଯୁଗଳ ମହିଳାରେ ରୌପ୍ୟ ଓ କାନୋଇଂ ଏକକ ମହିଳା ଇଭେଣ୍ଟରେ କାଂସ୍ୟ ପଦକ ଜିତିଥିଲେ। ଏହା ପୂର୍ବରୁ, ସେ ଭୋପାଳରେ କାନୋଇଂ ଏକକ ମହିଳା ପ୍ରତିଯୋଗିତାରେ ସ୍ୱର୍ଣ୍ଣ ପଦକ ଜିତିଥିଲେ। ଏକ ଜାତୀୟ ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିବା ପରେ, ରଶ୍ମିତା ଓଡ଼ିଶା ପୁଲିସରେ ନିଯୁକ୍ତି ପାଇଁ ଯୋଗ୍ୟ ହୋଇଥିଲେ। ୨୦୨୪ ମସିହାରୁ ସେ ଜଣେ ପୁଲିସ ଅଧିକାରୀ ଭାବେ କାର୍ଯ୍ୟରତ ଅଟନ୍ତି।