ବେଙ୍ଗାଲୁରୁ ଓ ରାଜସ୍ଥାନ ମଧ୍ୟରେ ଖେଳାଯାଇଥିବା ମ୍ୟାଚରେ ୬ ୱିକେଟରେ ବାଜି ମାରିଛି ରାଜସ୍ଥାନ ରୟାଲସ। ଜୟପୁରର ସୱାଇ ମାନସିଂହ ଷ୍ଟାଡିୟମରେ ବେଙ୍ଗାଲୁରୁ ଦେଇଥିବା ୧୮୩ ରନର ଲକ୍ଷ୍ୟକୁ ପିଛା କରି ୧୯.୧ ଓଭରରେ ରାଜସ୍ଥାନ ଏକ ସହଜ ବିଜୟ ହାସଲ କରିଥିଲା। ସଞ୍ଜୁ ସାମସନ ଓ ଜସ ବଟଲର ସୁନ୍ଦର ବ୍ୟାଟିଂର ପ୍ରଦର୍ଶନ କରିଥିଲେ। ବଟଲର ଅପରାଜିତ ରହି ମ୍ୟାଚ ଜିତାଇବା ସହ ଶତକ ହାସଲ କରିଥିଲେ। ଯାହାଫଳରେ ବଟଲରଙ୍କୁ ମ୍ୟାଚର ଶ୍ରେଷ୍ଠ ଖେଳାଳି ରୂପେ ଚୟନ କରାଯାଇଥିଲା। 

ପ୍ରଥମ ଇନିଂସରେ ବେଙ୍ଗାଲୁରୁ ଓ ଫାଫ ଡୁ ପ୍ଲେସିସ ଏକ ଶତକୀୟ ପାରି ଖେଳିଥିଲେ। ୧୩ ଓଭର ଶେଷରେ ବେଙ୍ଗାଲୁରୁ ପ୍ରଥମ ୱିକେଟ ହରାଇଥିଲେ ମଧ୍ୟ ୧୮୩ ରନରେ ସୀମିତ ରହିଥିଲା। ବିରାଟ କୋହଲି ଅପରାଜିତ ରହି ୭୨ ବଲରେ ୧୧୩ ରନ ସଂଗ୍ରହ କରିଥିଲେ ଯେଉଁଥିରେ ୧୨ ଟି ଚୌକା ଏବଂ ୪ ଟି ଛକ୍କା ସାମିଲ ଥିଲା। ଡୁ ପ୍ଲେସିସ ୪୪ ରନ କରିଥିଲେ। ଏହା ଛଡା ଅନ୍ୟ କୌଣସି ଖେଳାଳି ଦୁଇ ଅଙ୍କ ବିଶିଷ୍ଠ ସ୍କୋର କରିବାରେ ଅସଫଳ ରହିଥିଲେ। ଦ୍ଵିତୀୟ ଇନିଂସରେ ରାଜସ୍ଥାନ ପ୍ରଥମରୁ ୟଶସ୍ବୀ ଜେସୱାଲଙ୍କ ୱିକେଟ ହରାଇଥିଲା। ଦଳର ଅଧିନାୟକ ସଞ୍ଜୁ ସାମସନ ପାରିକୁ ସମ୍ଭାଳିବା ସହ ୪୨ ବଲରେ ୬୯ ରନ କରିଥିଲେ। ଜସ ବଟଲର ୫୮ ବଲରେ ଶତକ ହାସଲ କରିଥିଲେ ଯେଉଁଥିରେ ୯ ଟି ଚୌକା ଏବଂ 4ଟି ଛକ୍କା ସାମିଲ ଥିଲା। ଏହା ସହ ରାଜସ୍ଥାନ ୪ ଟି ମ୍ୟାଚରେ ୪ ଟି ବିଜୟ ସହ ପଏଣ୍ଟସ ଟେବୁଲର ଶୀର୍ଷରେ ପହଁଚିଛି ଏବଂ ବେଙ୍ଗାଲୁରୁ ୫ ମ୍ୟାଚରେ ଗୋଟିଏ ବିଜୟ ସହ ପଏଣ୍ଟସ ଟେବୁଲର ଅଷ୍ଟମ ସ୍ଥାନରେ ଅଛି।