ଖବର ଓଡ଼ିଶା: ଯାହାର ବିକଟାଳ ଅଟହାସ୍ୟରେ ଥରି ଉଠୁଥିଲା ବରଗଡ଼ ଧନୁଯାତ୍ରା ରଙ୍ଗମଞ୍ଚ ସେ ହସ ଆଉ ଶୁଣିବାକୁ ମିଳିବ ନାହିଁ । ଚିରଦିନ ପାଇଁ ନୀରବି ଯାଇଛି ସେ ସ୍ୱର । ମୁକ୍ତାକାଶ ରଙ୍ଗମଞ୍ଚକୁ ବିଦାୟ ନେଇ ଅଫେରା ରାଇଜକୁ ଚାଲିଯାଇଛନ୍ତି ବରଗଡ଼ ଧନୁଯାତ୍ରାର କଂସ ମହାରାଜ ଗୋପାଳ ସାହୁ । ସେ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଦେହ ତ୍ୟାଗ କରିଥିବା ସୂଚନା ମିଳିଛି । ମୃତ୍ୟୁ ବେଳକୁ ତାଙ୍କୁ ୭୦ ବର୍ଷ ବୟସ ହୋଇଥିଲା । 

ବରଗଡ଼ ଜିଲା ବରପାଲି ବ୍ଲକ ଅନ୍ତର୍ଗତ କାଇଁଶିର ଗ୍ରାମରେ ଗୋପାଳ ସାହୁ ଓରଫ୍ ଏଲି ଜନ୍ମ ଗ୍ରହଣ କରିଥିଲେ । ବରଗଡ଼ ଧନୁଯାତ୍ରା ମହୋତ୍ସବର ବୃହତ ମୁକ୍ତାକାଶ ରଙ୍ଗମଞ୍ଚରେ ସର୍ବାଧିକ ୨୩ଥର କଂସ ମହାରାଜର ନିଖୁଣ ଅଭିନୟ କରି ଦର୍ଶକଙ୍କ ବାଃ ବାଃ ଲୁଟିଛନ୍ତି । ରଙ୍ଗମଞ୍ଚରେ ୨୩ଥର ଭଣଜା କୃଷ୍ଣ ତାଙ୍କୁ ବଦ୍ଧ କଲା ପରେ, ସତରେ ଏ ଦୁନିଆଁ ରଙ୍ଗମଞ୍ଚରୁ ବିଦାୟ ନେଇଛନ୍ତି  ଗୋପାଳ ସାହୁ । ରବିବାର ବିଳମ୍ବିତ ରାତିରେ ତାଙ୍କର ପରଲୋକ ହୋଇଛି । ଝାରସୁଗୁଡ଼ାରେ ସାନପୁଅଙ୍କ ପାଖରେ ସେ ରହୁଥିଲେ । ସେଠାରେ ସେ ଅସୁସ୍ଥତା ଅନୁଭବ କରିଥିଲେ । ତାଙ୍କୁ ଏକ ଘରୋଇ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ସ୍ୱର୍ଗତ ସାହୁ ପୋଲିସ ବିଭାଗରେ କାର୍ଯ୍ୟ କରିବା ପରେ ଅବସର ଗ୍ରହଣ କରିଥିଲେ ।