ଜାକର୍ତ୍ତା: ଇଣ୍ଡୋନେସିଆର ରାଜଧାନୀ ଜାକର୍ତ୍ତା ନିକଟରେ ଦୁଇଟି ଟ୍ରେନ୍ ଧକ୍କା ହେବା ପରେ ସାତ ଜଣ ଯାତ୍ରୀଙ୍କ ମୃତ୍ୟୁ ହୋଇଛି। ସରକାରୀ ରେଳ କମ୍ପାନୀର ମୁଖପାତ୍ର ଫ୍ରାନୋଟୋ ୱିବୋଓ ଘଟଣାସ୍ଥଳରୁ କମ୍ପାସ୍ ଟିଭିକୁ କହିଛନ୍ତି, ହସ୍ପିଟାଲ ରେକର୍ଡ ଅନୁଯାୟୀ ସାତ ଜଣ ଆହତଙ୍କ ମୃତ୍ୟୁ ହୋଇଛି। ଫ୍ରାନୋଟୋ ୱିବୋଓ ଆହୁରି କହିଛନ୍ତି ଯେ ସାମରିକ ବାହିନୀ, ଅଗ୍ନିଶମ ବିଭାଗ ଏବଂ ଜାତୀୟ ସନ୍ଧାନ ଏବଂ ଉଦ୍ଧାର ସଂସ୍ଥାର ସହାୟତାରେ ଧ୍ୱଂସାବଶେଷରୁ ପୀଡିତମାନଙ୍କୁ ଉଦ୍ଧାର କରିବା ପାଇଁ ପ୍ରୟାସ ଜାରି ରହିଛି।

ସ୍ଥାନୀୟ ଅନେକ ଗଣମାଧ୍ୟମ ରିପୋର୍ଟ ଅନୁଯାୟୀ, ଜାକର୍ତ୍ତାରୁ ପ୍ରାୟ ୨୫ କିଲୋମିଟର ଦୂରରେ ଥିବା ବେକାସି ତିମୁର ଷ୍ଟେସନ ନିକଟରେ ଏହି ଦୁର୍ଘଟଣା ଘଟିଛି। ଫ୍ରାନୋଟୋ କହିଛନ୍ତି, ‘ପୀଡିତଙ୍କ ବିଷୟରେ ଆମେ ସେମାନଙ୍କୁ ଯଥାଶୀଘ୍ର ନିକଟସ୍ଥ ହସ୍ପିଟାଲକୁ ସ୍ଥାନାନ୍ତର କରିବାକୁ ଯଥାସମ୍ଭବ ଚେଷ୍ଟା କରିଛୁ। ଆମେ ଏପର୍ଯ୍ୟନ୍ତ ତଥ୍ୟ ଏବଂ ପ୍ରମାଣ ସଂଗ୍ରହ କରୁଛୁ। ଦୁର୍ଘଟଣାର କାରଣ ବିଷୟରେ ସମ୍ପୃକ୍ତ କର୍ତ୍ତୃପକ୍ଷ ପରେ ବିସ୍ତୃତ ସୂଚନା ପ୍ରଦାନ କରିବେ। 

ଅଣ୍ଟାରାର ଏକ ରିପୋର୍ଟ ଅନୁଯାୟୀ, ବେକାସି ତିମୁର ଷ୍ଟେସନରେ ଏକ କମ୍ୟୁଟର ଲାଇନ ଟ୍ରେନ୍ ଏବଂ ଏକ ଦୂରଗାମୀ ଡିଜେଲ୍ ଟ୍ରେନ୍ ମଧ୍ୟରେ ଧକ୍କାରେ ଅନେକ ଯାତ୍ରୀ ଆହତ ହୋଇଛନ୍ତି। ଟ୍ରାକ୍ ୧ ରେ କମ୍ୟୁଟର ଲାଇନ ଟ୍ରେନଟି ଅଟକି ଯାଇଥିଲା ଏବଂ ପୂର୍ବ ସିକାଙ୍ଗ ଅଭିମୁଖେ ଯାଉଥିଲା। କିଛି ସମୟ ପରେ, ପଶ୍ଚିମ ଦିଗରୁ ଆସୁଥିବା ଏକ ଦୂରଗାମୀ ଟ୍ରେନ ସମାନ ଟ୍ରାକ୍ ରେ ଆସି କମ୍ୟୁଟର ଲାଇନ ଟ୍ରେନ ସହିତ ମୁହାଁମୁହିଁ ଧକ୍କା ହୋଇଥିଲା।

ସ୍ଥାନୀୟ ଗଣମାଧ୍ୟମ ଘଟଣାସ୍ଥଳରେ ଥିବା ଜଣେ ଯାତ୍ରୀଙ୍କୁ ଉଦ୍ଧୃତ କରି ଏହି ଘଟଣା ବିଷୟରେ ରିପୋର୍ଟ କରିଛି। ଯାତ୍ରୀ କହିଛନ୍ତି, "କ୍ୟୁଟର ଲାଇନ ଟ୍ରେନର ପଛ ପାର୍ଶ୍ୱ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି। କର୍ତ୍ତୃପକ୍ଷ ତୁରନ୍ତ ଆମକୁ ସ୍ଥାନାନ୍ତର କରିଥିଲେ। 

ଅଧିକ ପଢ଼ନ୍ତୁ: ନିଖୋଜ ପିଲାଙ୍କ ପାଇଁ ବାୟୋମେଟ୍ରିକ୍ ଚିହ୍ନଟ ବ୍ୟବସ୍ଥା ପାଇଁ ଦାବି ନେଇ ଶୁଣାଣି