ସିମଲା: ହିମାଚଳ ପ୍ରଦେଶର ସିମଲାର ରାମପୁରର ଟାକଲେଚରେ ବୁଧବାର ବିଳମ୍ବିତ ରାତିରେ ବାଦଲଫଟା ବର୍ଷା ହୋଇଛି। ସାଧାରଣଜନତାଙ୍କ ସୁରକ୍ଷା ଦୃଷ୍ଟିରୁ ପ୍ରଶାସନ ତରଫରୁ ନୋଗଲି ନଦୀକୂଳରେ ଥିବା ଅଞ୍ଚଳଗୁଡ଼ିକୁ ଖାଲି କରାଯାଇଛି। ବାଦଲଫଟା ବର୍ଷା ଯୋଗୁଁ ବଜାର ଜଳମଗ୍ନ ହୋଇଯାଇଥିଲା। ଏପର୍ଯ୍ୟନ୍ତ ଜୀବନହାନିର କୌଣସି ସୂଚନା ନାହିଁ। 

ରାଜ୍ୟରେ ପ୍ରବଳ ବର୍ଷା ଏବଂ ଭୂସ୍ଖଳନ ଯୋଗୁଁ ସାଧାରଣ ଜୀବନଯାତ୍ରା ବାଧାପ୍ରାପ୍ତ ହୋଇଛି। ପାଣିପାଗ ବିଭାଗ ଅନୁଯାୟୀ, ଅଗଷ୍ଟ ୧୨ ତାରିଖ ପର୍ଯ୍ୟନ୍ତ ରାଜ୍ୟର ଅନେକ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି।

ରାଜ୍ୟର ତଳିଆ ଅଞ୍ଚଳରେ ନିରନ୍ତର କ୍ଷତିର ଧାରା ଜାରି ରହିଛି। ବିଶେଷକରି ପବ୍ଲିକ୍ ୱାର୍କସ୍ ଡିଭିଜନ ଏପର୍ଯ୍ୟନ୍ତ ୨୧୧ କୋଟି ଟଙ୍କାର ବିପୁଳ କ୍ଷତି ସହିଛି। ଏହି ସୂଚନା ବିଭାଗର ମୁଖ୍ୟ ଯନ୍ତ୍ରୀ ବିଜୟ ଚୌଧୁରୀ ଦେଇଛନ୍ତି। ହମିରପୁର, ବିଳାସପୁର ଏବଂ ଉନା ଜିଲ୍ଲାରେ ରାସ୍ତା ଏବଂ ସେତୁ ବ୍ୟାପକ କ୍ଷତି ହୋଇଛି। ଉନା ଜିଲ୍ଲା ସର୍ବାଧିକ କ୍ଷତି ସହିଛି, ଯେଉଁଠାରେ ବର୍ଷା ଏବଂ ଭୂସ୍ଖଳନ ଯୋଗୁଁ ୭୦ କୋଟି ଟଙ୍କାରୁ ଅଧିକ କ୍ଷତି ଆକଳନ କରାଯାଇଛି। ଏଠାରେ ଚାରୋଟି ପ୍ରମୁଖ ସେତୁ ମଧ୍ୟ କ୍ଷତିଗ୍ରସ୍ତ ହୋଇଛି।

ହିମାଚଳରେ ପ୍ରବଳ ବର୍ଷା ଯୋଗୁଁ ତୀର୍ଥପଥ କ୍ଷତିଗ୍ରସ୍ତ ହେବା ପରେ କିନ୍ନୌର କୈଳାସ ଯାତ୍ରାକୁ ସ୍ଥଗିତ ରଖାଯାଇଥିଲା ଏବଂ ଫସି ରହିଥିବା ୪୧୩ ଜଣ ତୀର୍ଥଯାତ୍ରୀଙ୍କୁ ଉଦ୍ଧାର କରାଯାଇଥିଲା। ଏହି ଯାତ୍ରା ଜୁଲାଇ ୧୫ରେ ଆରମ୍ଭ ହୋଇଥିଲା ଏବଂ ଅଗଷ୍ଟ ୩୦ରେ ଶେଷ ହେବ। ରାଜ୍ୟର ମୋଟ ୬୧୭ଟି ରାସ୍ତା ଅବରୋଧ କରାଯାଇଛି। ଶିକ୍ଷାନୁଷ୍ଠାନ ବନ୍ଦ କରାଯାଇଛି। ଏଥିମଧ୍ୟରୁ ୩୭୭ଟି ରାସ୍ତା ମଣ୍ଡି ଜିଲ୍ଲାରେ ଏବଂ ୯୦ ଟି ରାସ୍ତା କୁଲୁ ଜିଲ୍ଲାରେ ଅଛି। ରାସ୍ତା ବନ୍ଦ ହେବା ଯୋଗୁଁ ଅନେକ ସ୍ଥାନରେ ଟ୍ରାଫିକ ଜାମ୍ ହୋଇଥିଲା। ସିମଲା ସହରର ଅନେକ ସ୍କୁଲ ବନ୍ଦ ହୋଇଯାଇଛି କିମ୍ବା ଅନଲାଇନ୍ ମୋଡ୍ ରେ ପାଠପଢ଼ା ଚାଲିଛି। ଜୁନ ୨୦ରେ ମୌସୁମୀ ଆରମ୍ଭ ହେବା ପରଠାରୁ ହିମାଚଳ ପ୍ରଦେଶରେ ୧୮୫୨କୋଟି ଟଙ୍କାର କ୍ଷତି ହୋଇଛି। ବର୍ଷାଜନିତ ଘଟଣାରେ ପ୍ରାୟ ୧୦୮ ଜଣଙ୍କର ମୃତ୍ୟୁ ହୋଇଛି, ଯେତେବେଳେ ୩୬ ଜଣ ନିଖୋଜ ଅଛନ୍ତି। 

ଅଧିକ ପଢ଼ନ୍ତୁ: ଦୁର୍ନୀତି ବିରୋଧୀ ଆଇନ ସଚ୍ଚୋଟ ଅଧିକାରୀଙ୍କୁ ସୁରକ୍ଷା ଦିଏ