ନୂଆଦିଲ୍ଲୀ: ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଶନିବାର ଦୋହା ଫୋରମରେ 'ଡି-ଡଲାରାଇଜେସନ୍' ଏବଂ ବିଶ୍ୱ କୂଟନୀତି ଉପରେ ନିଜର ମତ ରଖିଛନ୍ତି। ଆମେରିକୀୟ ଡଲାର ଉପରେ ନିର୍ଭରଶୀଳତା ହ୍ରାସ କରିବା ସପକ୍ଷରେ ଭାରତ କେବେ ବି ନାହିଁ ବୋଲି ସେ କହିଛନ୍ତି। ବ୍ରିକ୍ସ ରାଷ୍ଟ୍ରମାନେ ସାଧାରଣ ମୁଦ୍ରା ଉପରେ ବିଚାର କରିବା ଏବଂ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଚେତାବନୀ ପରେ ଏହି ମନ୍ତବ୍ୟ ଦିଆଯାଇଛି। ଜୟଶଙ୍କର ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ବ୍ରିକ୍ସ ମୁଦ୍ରା ଉପରେ ବର୍ତ୍ତମାନ କୌଣସି ପ୍ରସ୍ତାବ ନାହିଁ ଏବଂ ବ୍ରିକ୍ସ ଦେଶଗୁଡିକଏହି ପ୍ରସଙ୍ଗରେ ସମାନ ଆଭିମୁଖ୍ୟ ରଖନ୍ତି ନାହିଁ।

ଜୟଶଙ୍କର କହିଛନ୍ତି ଯେ ଟ୍ରମ୍ପଙ୍କ ମନ୍ତବ୍ୟ ପଛର କାରଣ ସେ ସ୍ପଷ୍ଟ କରିନାହାଁନ୍ତି, କିନ୍ତୁ ଭାରତ ସର୍ବଦା କହି ଆସୁଛି ଯେ ଏହା 'ଡି-ଡଲାରାଇଜେସନ୍'ର ସମର୍ଥକ ନୁହେଁ। ସେ କହିଛନ୍ତି ଯେ ଏହି ପ୍ରସଙ୍ଗରେ ବ୍ରିକ୍ସ ଦେଶମାନଙ୍କ ମଧ୍ୟରେ ମତଭେଦ ରହିଛି ଏବଂ ଏହା ଏକ ନୂତନ ପ୍ରସ୍ତାବ ନୁହେଁ। ଏଥିସହ ସେ କହିଛନ୍ତି ଯେ ପ୍ରତ୍ୟେକ ଦେଶର ନିଜସ୍ୱ ସ୍ୱାର୍ଥ ରହିଛି ଏବଂ ସେମାନେ ଅନେକ ପ୍ରସଙ୍ଗରେ ସହମତ କିମ୍ବା ଅସହମତ ହୋଇପାରନ୍ତି।

ଜୟଶଙ୍କର ଆହୁରି କହିଛନ୍ତି ଯେ ଭାରତର ଆଭିମୁଖ୍ୟ ଅଧିକ ଅଭିନବ ଏବଂ ଭାଗିଦାରୀ କୂଟନୀତି ଦିଗରେ ରହିଛି। ସେ ଆହୁରି ମଧ୍ୟ କହିଛନ୍ତି ଯେ ବର୍ତ୍ତମାନ ଦେଶଗୁଡ଼ିକ ପାଶ୍ଚାତ୍ୟ ଶକ୍ତିମାନଙ୍କୁ ଦୂରେଇ ରଖିବାକୁ ସାହସ ପ୍ରଦର୍ଶନ କରିବା ଉଚିତ୍। ତାଙ୍କ ମତରେ ବିଶ୍ୱରେ ଚାଲିଥିବା ସଂଘର୍ଷକୁ ଦୃଷ୍ଟିରେ ରଖି କୂଟନୀତିଜ୍ଞମାନେ ଏକ ନୂତନ ରଣନୀତି ଗ୍ରହଣ କରିବାର ଆବଶ୍ୟକତା ରହିଛି ଏବଂ ଭାରତ ଏ ଦିଗରେ ନିଜର ନେତୃତ୍ୱ ଦେଖାଉଛି।

ଦୋହା ଫୋରମରେ ନିଜର ମତ ରଖି ଜୟଶଙ୍କର କହିଛନ୍ତି ଯେ ବିଶ୍ୱର ବାସ୍ତବତା ଅତ୍ୟନ୍ତ ଜଟିଳ ଏବଂ ସୂକ୍ଷ୍ମ। ସେ କହିଛନ୍ତି ଯେ ପ୍ରତ୍ୟେକ ଦେଶ ନିଜର ଜାତୀୟ ସ୍ୱାର୍ଥ ଅନୁଯାୟୀ ଅନ୍ତର୍ଜାତୀୟ ସ୍ତରରେ ନିଜର ରଣନୀତି ଅନୁସରଣ କରନ୍ତି ଏବଂ ବେଳେବେଳେ ଗୋଟିଏ ଦେଶ ଅନେକ ପ୍ରସଙ୍ଗରେ ଏକାଧିକ ମିଶ୍ରଣରେ କାର୍ଯ୍ୟ କରିଥାଏ।