ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଓ୍ଵାକଫ ସଂଶୋଧନ ବିଧେୟକକୁ ନେଇ ଦେଶର ରାଜନୀତି ବେଶ ସରଗରମ ରହିଛି । ଏହି ବିଧେୟକ ଉପରେ ଏନଡିଏର ସବୁଠୁ ବଡ ସହଯୋଗୀ ଜେଡିୟୁ ବିଜେପିକୁ ସମର୍ଥନ ଦେବ କି ନାହିଁ ତାକୁ ନେଇ କଳ୍ପନା ଜଳ୍ପନା ଲାଗି ରହିଥିଲା । ତେବେ ଏହି ବିଧେୟକକୁ ସମର୍ଥନ ଦେବ ବୋଲି ଘୋଷଣା କରିଛି ବିହାରର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ପାର୍ଟି ଜନତା ଦଳ ୟୁନାଇଟେଡ।
ଜେଡିୟୁ ସଂସଦରେ ଓ୍ଵାକଫ ବିଲ୍ ଉପରେ ମୋଦୀ ସରକାରଙ୍କ ସମର୍ଥନ କରିବାକୁ ନିଷ୍ପତ୍ତି ନେଇଛି। ଲୋକସଭାରେ ଜେଡିୟୁର ମୁଖ୍ୟ ସଚେତକ ସୁନୀଲ କୁମାର ହ୍ଵିପ୍ ଜାରି କରି ପାର୍ଟିର ସମସ୍ତ ସାଂସଦଙ୍କୁ ଏପ୍ରିଲ ୨ରୁ ୪ ତାରିଖ ପର୍ୟ୍ୟନ୍ତ ଗୃହରେ ଉପସ୍ଥିତ ରହିବାକୁ କହିଛନ୍ତି। ଓ୍ଵାକଫ ସଂଶୋଧନ ବିଧେୟକକୁ ଲୋକସଭାରେ ଆଲୋଚନା ପାଇଁ ବୁଧବାର ଉପସ୍ଥାପନ କରାଯିବ। ଅନ୍ୟପଟେ ସମସ୍ତ ବିରୋଧୀ ଦଳ ଓ ବଡ଼ ସଂଖ୍ୟାରେ ମୁସଲିମ ସଂଗଠନ ଏହି ବିଧେୟକକୁ ତୀବ୍ର ବିରୋଧ କରିଛନ୍ତି। ତେଣୁ ବୁଧବାର ଓ୍ଵାକଫ ବିଧେୟକକୁ ନେଇ ସଂସଦ ତୁମ୍ବି ତୋଫାନ ଦେଖିବାକୁ ମିଳିପାରେ ।
ବିହାରରେ ଚଳିତ ବର୍ଷ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ଏହି ପ୍ରସଙ୍ଗକୁ ନେଇ ରାଜନୀତି ଜୋର ଧରିଛି। ଏହା ମଧ୍ୟରେ ନୀତିଶ କୁମାରଙ୍କ ପାର୍ଟି ନିଜର ଆଭିମୁଖ୍ୟ ସ୍ପଷ୍ଟ କରି ଓ୍ଵାକଫ ବିଲ୍କୁ ସମର୍ଥନ ଘୋଷଣା କରିଛି। ତଥାପି ଜେଡିୟୁ ଭିତରେ ଏହି ବିଧେୟକକୁ ନେଇ ବିରୋଧର ସ୍ଵର ଉଠିଛି। ବିଶେଷ କରି ପାର୍ଟିର ମୁସଲିମ ନେତା ଏହି ବିଧେୟକକୁ ବିରୋଧ କରିବା ସହ ଏହାକୁ ପ୍ରତ୍ୟାହାର କରିବାକୁ ଦାବି କରିଛନ୍ତି।
ଜେଡିୟୁ ଏମଏଲସି ଗୁଲାମ ଗୌସ ଓ ପୂର୍ବତନ ସାଂସଦ ଅହମ୍ମଦ ଅଶଫାକ କରିମ ଖୋଲାଖୋଲି ବିଧେୟକକୁ ବିରୋଧ କରିଛନ୍ତି। ଏହା ସତ୍ତ୍ଵେ ଦଳର ଶୀର୍ଷ ନେତୃତ୍ଵ ବିଧେୟକକୁ ସମର୍ଥନ କରିବାକୁ ନିଷ୍ପତ୍ତି ନେଇଛନ୍ତି। ଏଥିରେ ପାର୍ଟି ଭିତରେ ଆଭ୍ୟନ୍ତରୀଣ କନ୍ଦଳ ବଢିବାର ସମ୍ଭାବନା ରହିଛି।