ଖବର ଓଡ଼ିଶା: ଆସନ୍ତାକାଲି ୨୦୨୪-୨୫ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରାଯିବ । ଏହା ପୂର୍ବରୁ ଆଜି ସଂସଦରେ ୨୦୨୩-୨୪ ଆର୍ଥିକ ବର୍ଷର ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପନ କରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ବର୍ତ୍ତମାନ ଦେଶର ଅର୍ଥନୀତି ଦୃଢ ସ୍ଥିତିରେ ଅଛି । ୨୦୨୩-୨୪ ଆର୍ଥିକ ବର୍ଷରେ ଦେଶର ବିକାଶ ହାର ୮.୨ ପ୍ରତିଶତ ବୃଦ୍ଧି ପାଇଛି, ୨୦୨୪-୨୫ ଆର୍ଥିକ ବର୍ଷରେ ଅଭିବୃଦ୍ଧି ହାର ୬.୫ ରୁ ୭ପ୍ରତିଶତ ବୃଦ୍ଧି ପାଇବ ବୋଲି ଆକଳନ କରାଯାଇଛି । 

ଅର୍ଥମନ୍ତ୍ରୀ କହିଛନ୍ତି ଯେ, ବିଶ୍ଵସ୍ତରରେ ଅନେକ ଆହ୍ୱାନ ସତ୍ୱେ ଭାରତୀୟ ଅର୍ଥନୀତି ଆଗକୁ ବଢ଼ିଛି । ସମଷ୍ଟି ଅର୍ଥନୀତିରେ ସ୍ଥିରତା ଯୋଗୁଁ ବିଶ୍ଵସ୍ତରରେ ସୃଷ୍ଟି ହୋଇଥିବା ଚ୍ୟାଲେଞ୍ଜର ପ୍ରଭାବ ଭାରତୀୟ ଅର୍ଥନୀତି ଉପରେ କମ୍ ମାତ୍ରାରେ ପଡ଼ିଛି ।  ବିଶ୍ୱର ଅର୍ଥନୈତିକ ଅନିଶ୍ଚିତତା ସତ୍ୱେ ଘରୋଇ ନିବେଶକମାନେ ୨୦୨୩-୨୪ ଆର୍ଥିକ ବର୍ଷରେ ଅର୍ଥନୈତିକ ଅଭିବୃଦ୍ଧିକୁ ସହଯୋଗ କରିଛନ୍ତି । ୨୦୨୪-୨୫ ବର୍ଷରେ ମୁଦ୍ରାସ୍ଫୀତି ହାର ୪.୫ ପ୍ରତିଶତ ହେବ ବୋଲି ଆକଳନ କରାଯାଇଛି । ଏହା ସହ ୨୦୨୫-୨୬ ଆର୍ଥିକ ବର୍ଷରେ ମୁଦ୍ରାସ୍ଫୀତି ହାର ୪.୧ ପ୍ରତିଶତ ହେବ ବୋଲି ଆକଳନ କରାଯାଇଛି ।

ସେହିପରି ସର୍ବଭାରତୀୟ ବାର୍ଷିକ ବେରୋଜଗାର ହାର ମଧ୍ୟ ହ୍ରାସ ପାଉଛି । କରୋନା ମହାମାରୀ ପରଠାରୁ ବେରୋଜଗାର ହାର ହ୍ରାସ ପାଇବାରେ ଲାଗିଛି । ଏହି ସମୟରୁ ସହରାଞ୍ଚଳ ଏବଂ ଗ୍ରାମାଞ୍ଚଳରେ ନିଯୁକ୍ତି କ୍ଷେତ୍ରର ପୁନରୁଦ୍ଧାର ହୋଇଛି । ୧୫ରୁ ଉର୍ଦ୍ଧ୍ୱ ବୟସ ବର୍ଗଙ୍କ ପାଇଁ ସହରୀ ବେକାରୀ ହାର ଗତ ବର୍ଷ ମାର୍ଚ୍ଚ ସୁଦ୍ଧା ୬.୭% କୁ ହ୍ରାସ ପାଇଛି । ଯୁବ ବେକାରୀ ହାର ୨୦୧୭-୧୮ ରେ ୧୭.୮% ରୁ ୨୦୨୨-୨୩ ରେ ୧୦% କୁ ଖସି ଆସିଥିବା ସର୍ଭେ ରିପୋର୍ଟରେ ଉଲ୍ଲେଖ କରାଯାଇଛି । କୃଷି ଛାଡିଥିବା ଶ୍ରମିକମାନଙ୍କ ପାଇଁ ରୋଜଗାରର ଆବଶ୍ୟକତା ଉପରେ ସର୍ଭେରେ ଗୁରୁତ୍ୱାରୋପ କରାଯାଇଛି । ସେବା କ୍ଷେତ୍ର ହେଉଛି ସର୍ବାଧିକ ନିଯୁକ୍ତି ସୃଷ୍ଟି କରୁଥିବା କ୍ଷେତ୍ର । ଭିତ୍ତିଭୂମିକୁ ମଜବୁତ କରିବାକୁ ନିର୍ମାଣ କ୍ଷେତ୍ର ଦ୍ରୁତ ଗତିରେ ବିକାଶ କରୁଛି ।