ଭୁବନେଶ୍ୱର: ଆଜିକାଲିକା ଯୁବପିଢୀ ଏବେ ସମସ୍ତେ ଅନଲାଇନ୍ ଗେମରେ ମାତିଛନ୍ତି । ଗାଁ ହେଉ ଅବା ସହର ସବୁଠି ଯୁବପିଢୀ ଏବେ ଅନଲାଇନ୍ ଗେମ୍ ଖେଳୁଥିବା ଦେଖିବାକୁ ମିଳିଛି । ଘଣ୍ଟା ଘଣ୍ଟା ଧରି ମୋବାଇଲରେ ଅନଲାଇନ୍ ଗେମ୍ ଖେଳି ଟଙ୍କା ହାରିବା ପରେ ସେମାନେ ମାନସିକ ଅବସାଦକୁ ପଳାଇ ଯାଉଛନ୍ତି । ଶେଷରେ ଆତ୍ମହତ୍ୟା ଭଳି ଚରମ ପଦକ୍ଷେପକୁ ଆପଣାଇ ନେଉଛନ୍ତି । ଏକ ସର୍ଭେରୁ ଏହା ସ୍ପଷ୍ଟ ହେବା ପରେ ପୋଲିସ ଏବେ ଯୁବପିଢୀଙ୍କୁ ସଚେତନ କରିଛି । କୌଣସି ଗେମ୍‌ରେ ଟଙ୍କା ରୋଜଗାର କରିବା ଆଶାରେ ଟଙ୍କା ନ ଲଗାଇବାକୁ ପରାମର୍ଶ ଦେଇଛି ।

ରାତାରାତି ଧନୀ ହେବା ଲୋଭରେ ଅନଲାଇନରେ ଖେଳି ହଜାର ହଜାର, ଲକ୍ଷ ଲକ୍ଷ ଟଙ୍କା ହରାଉଛନ୍ତି ଯୁବପିଢୀ । ଏବେ ଅନଲାଇନ ଗେମ୍ ବିଷମ ପରିସ୍ଥିତି ସୃଷ୍ଟି କରୁଛି । ଅନଲାଇନ୍ ଗେମରେ ଅନେକ ଯୁବକ ଟଙ୍କା ହରାଇ ସର୍ବସ୍ୱାନ୍ତ ହୋଇପଡୁଥିବାବେଳେ ଗତ ଏପ୍ରିଲ ୧୨ ତାରିଖ ଶନିବାର ଚନ୍ଦ୍ରଶେଖରପୁର ଅଞ୍ଚଳର ଜଣେ ଯୁବକ ୧୭ ଲକ୍ଷ ଟଙ୍କା ହରାଇଛନ୍ତି। ଅନଲାଇନ୍ ଗେମ୍ ଖେଳି ଟଙ୍କା ରୋଜଗାର କରିବ ବୋଲି ଭାବିଥିଲେ । ପ୍ରଥମେ ପ୍ରଥମେ କିଛି ଟଙ୍କା ମିଳିଥିଲା । ହେଲେ ଏହାପରେ ଧୀରେ ଧୀରେ ସେ ହାରିଥିଲେ। ଚନ୍ଦ୍ରଶେଖରପୁର ଅଞ୍ଚଳର ରାଜୁ ବାରିକ ଏଭଳି ଠକାମୀର ଶିକାର ହୋଇଛନ୍ତି। ସେ ଏନେଇ ସାଇବର ଥାନାରେ ଅଭିଯୋଗ କରିବା ପରେ ସାଇବର୍ ଥାନା ପୋଲିସ ଘଟଣାର ତଦନ୍ତ କରୁଛି। 

ଗତବର୍ଷ ନଭେମ୍ବର ମାସରେ ପୁରୀ ଜିଲ୍ଲାରେ ଏଭଳି ଘଟଣା ଦେଖିବାକୁ ମିଳିଥିଲା। ଜଣେ ଯୁବକ ଟଙ୍କା ହରାଇବା ପରେ ଆତ୍ମହତ୍ୟା ଉଦ୍ୟମ କରିଥିଲେ । ତେଣୁ ଅନଲାଇନ ଗେମ୍ ଉପରେ ନିୟନ୍ତ୍ରଣ ନରହିଲେ ଗୁରୁତର ପରିସ୍ଥିତି ସୃଷ୍ଟି ହେବାର ଆଶଙ୍କା ରହିଥିବା ବିଶେଷଜ୍ଞ ମତ ଦେଇଛନ୍ତି। ସେହିପରି ପୁରୀ ଜିଲ୍ଲା ସତ୍ୟବାଦୀର ମନୋଜ ବାରିକ ମଧ୍ୟ ଗେମ୍ ଖେଳି ସର୍ବସ୍ଵ ହରାଇଛନ୍ତି। ବିୟୁଟି ପାର୍ଲର କରି ସଞ୍ଚୟ କରିଥିବା ଟଙ୍କା ଅନଲାଇନ ଗେମ୍ ଖେଳି ହରାଇଛନ୍ତି । ରାଗରେ ନିଜ ଦାମୀ ମୋବାଇଲ ପୋନ୍ ଭାଙ୍ଗି ଦେଇଥିଲେ ମନୋଜ ।

ମିଳିଥିବା ତଥ୍ୟ ଅନୁସାରେ ଗତ ୪ବର୍ଷରେ ଅନଲାଇନ୍ ଗେମ ଖେଳି ୧୨୦ ଜଣ ଯୁବକ ଆତ୍ମହତ୍ୟା କଲେଣି। ବର୍ତ୍ତମାନ ଯେଉଁଭଳି ଭାବେ ଯୁବପିଢି ଗେମ୍ ଖେଳୁଛନ୍ତି ଆଗକୁ ପରିସ୍ଥିତି ଭୟଙ୍କର ହେବ ବୋଲି ବରିଷ୍ଠ ବ୍ୟକ୍ତିମାନେ ଆଶଙ୍କା କରୁଛନ୍ତି । ବିଶେଷ କରି ଅନଲାଇନରେ ଅଭିନେତାଙ୍କ ବିଜ୍ଞାପନ ଦେଖ୍ ଯୁବପିଢ଼ି ଓ କୋମଳମତି ପିଲାମାନେ ଲୋଭରେ ପଡୁଛନ୍ତି । ୟୁ-ଟ୍ୟୁବର ଏବଂ ଇନଷ୍ଟାଗ୍ରାମରେ ଏକାଧିକ ବ୍ୟକ୍ତି ଟଙ୍କା ନେଇ ଗେମ୍ ଖେଳିବାକୁ ଯୁବ ପିଢିଙ୍କୁ କହୁଛନ୍ତି। ଘରେ ବସି ଟଙ୍କା ରୋଜଗାର କରିବା ଲୋଭରେ ଯୁବପିଢି ଲକ୍ଷାଧିକ ଟଙ୍କା ହରାଇ ସର୍ବସ୍ୱାନ୍ତ ହେଉଛନ୍ତି । ଶେଷରେ କିଛି ଉପାୟ ନପାଇ ଆତ୍ମହତ୍ୟା ଭଳି ପନ୍ଥାକୁ ଆପଣାଇବାକୁ ବାଧ୍ୟ ହେଉଛନ୍ତି । ତେଣୁ ଏବେଠୁ ଏଥିପ୍ରତି ସର୍ତକ ନ ରହିଲେ ଆଗକୁ ପରିସ୍ଥିତି ଆହୁରି ଭୟଙ୍କର ହେବ ଏବଂ ଏହି ଅବସାଦ ଜନିତ ଆତ୍ମହତ୍ୟା ସଂଖ୍ୟା ଆହୁରି ବୃଦ୍ଧି ପାଇବ ବୋଲି କୁହାଯାଉଛି । 

ନୂଆଦିଲ୍ଲୀ: ଦେଶରେ ପ୍ରଥମଥର ପାଇଁ ପ୍ରକାଶ ପାଇଛି ମାସିକ ବେକାରୀ ହାର । ଚଳିତ ବର୍ଷ ଏପ୍ରିଲ ମାସର ବେକାରୀ ହାର ରହିଛି ୫.୧ % । ଗୁରୁବାର ପରିସଂଖ୍ୟାନ ଏବଂ କାର୍ଯ୍ୟକ୍ରମ କାର୍ଯ୍ୟାନ୍ୱୟନ ମନ୍ତ୍ରଣାଳୟ (MoSPI) ଦ୍ୱାରା ପ୍ରକାଶିତ ସରକାରୀ ତଥ୍ୟରେ ଏନେଇ ସୂଚନା ଦିଆଯାଇଛି । 

ଏପ୍ରିଲ ୨୦୨୫ ପାଇଁ ୧୫ ବର୍ଷ ଏବଂ ତଦୁର୍ଦ୍ଧ୍ୱ ବୟସର ବ୍ୟକ୍ତିଙ୍କ ପାଇଁ ବେକାରୀ ହାର ୫.୧% ରେକର୍ଡ କରାଯାଇଥିଲା, ଯେଉଁଥିରେ ପୁରୁଷଙ୍କ ପାଇଁ ବେକାରୀ ହାର ଟିକିଏ ଅଧିକ ଅର୍ଥାତ୍ ୫.୨% ଥିଲାବେଳେ ମହିଳାଙ୍କ ପାଇଁ ହାର ୫.୦% ଥିଲା। ଗ୍ରାମାଞ୍ଚଳରେ ବେକାରୀ ହାର ୪.୫% ଥିବା ବେଳେ ସହରାଞ୍ଚଳରେ ଏହା ୬.୫% ରହିଥିଲା, ଯାହା ସହରୀ ଅଞ୍ଚଳରେ ଅଧିକ ରୋଜଗାର ଚ୍ୟାଲେଞ୍ଜକୁ ସୂଚାଇଛି।

୧୫-୨୯ ବର୍ଷ ବୟସର ଯୁବକଙ୍କ ମଧ୍ୟରେ ବେକାରୀ ହାର ୧୩.୮% ରହିଥିଲା, ଯେଉଁଥିରେ ମହିଳାଙ୍କ ବେକାରୀ ହାର ୧୪.୪% (ସହରୀ ଅଞ୍ଚଳରେ ୨୩.୭%, ଗ୍ରାମାଞ୍ଚଳରେ ୧୦.୭%) ଏବଂ ପୁରୁଷଙ୍କ ମଧ୍ୟରେ ୧୩.୬% (ସହରୀ ଅଞ୍ଚଳରେ ୧୫%, ଗ୍ରାମାଞ୍ଚଳରେ ୧୩%) ରହିଥିଲା। ଏହା ଯୁବ ଜନସଂଖ୍ୟା, ବିଶେଷ କରି ସହରୀ ମହିଳାଙ୍କ ମଧ୍ୟରେ ରୋଜଗାର ସୁଯୋଗର ଅଭାବକୁ ପ୍ରତିଫଳିତ କରୁଛି।

ଶ୍ରମଶକ୍ତି ଅଂଶଗ୍ରହଣ ହାର (LFPR) ଏପ୍ରିଲରେ ୫୫.୬% ରହିଥିଲା, ଯେଉଁଥିରେ ଗ୍ରାମାଞ୍ଚଳରେ ୫୮% ଏବଂ ସହରାଞ୍ଚଳରେ ୫୦.୭% ରହିଥିଲା। ପୁରୁଷଙ୍କ ମଧ୍ୟରେ LFPR ଗ୍ରାମାଞ୍ଚଳରେ ୭୯% ଏବଂ ସହରାଞ୍ଚଳରେ ୭୫.୩% ଥିବା ବେଳେ, ମହିଳାଙ୍କ ମଧ୍ୟରେ ଏହା ଗ୍ରାମାଞ୍ଚଳରେ ୩୮.୨% ରହିଥିଲା। କାର୍ଯ୍ୟକ୍ଷେତ୍ର ଅନୁପାତ (WPR) ଜାତୀୟ ସ୍ତରରେ ୫୨.୮% ରହିଥିଲା, ଯେଉଁଥିରେ ଗ୍ରାମାଞ୍ଚଳରେ ୫୫.୪% ଏବଂ ସହରାଞ୍ଚଳରେ ୪୭.୪% ରହିଥିଲା।

ଏହି ତଥ୍ୟ ସଂଗ୍ରହ ପାଇଁ ମନ୍ତ୍ରଣାଳୟ ଜାନୁଆରୀ ୨୦୨୫ରୁ ଏକ ନୂଆ ମଲ୍ଟିସ୍ଟେଜ ଷ୍ଟ୍ରାଟିଫାଇଡ ସାମ୍ପଲିଂ ପଦ୍ଧତି ଗ୍ରହଣ କରିଛି। ଏପ୍ରିଲ ମାସରେ ୭,୫୧୧ଟି ପ୍ରଥମ-ପର୍ଯ୍ୟାୟ ସାମ୍ପଲିଂ ୟୁନିଟ ସର୍ଭେ କରାଯାଇଥିଲା, ଯେଉଁଥିରେ ୮୯,୪୩୪ଟି ପରିବାର (ଗ୍ରାମାଞ୍ଚଳରେ ୪୯,୩୨୩ ଏବଂ ସହରାଞ୍ଚଳରେ ୪୦,୧୧୧) ଏବଂ ୩,୮୦,୮୩୮ ବ୍ୟକ୍ତି (ଗ୍ରାମାଞ୍ଚଳରେ ୨,୧୭,୪୮୩ ଏବଂ ସହରାଞ୍ଚଳରେ ୧,୬୩,୩୫୫) ସାମିଲ ହୋଇଥିଲେ। ଏହି ସର୍ଭେ ସାପ୍ତାହିକ ସ୍ଥିତି (CWS) ଆଧାରରେ ତଥ୍ୟ ସଂଗ୍ରହ କରିଛି, ଯାହା ସର୍ଭେ ପୂର୍ବବର୍ତ୍ତୀ ୭ ଦିନର କାର୍ଯ୍ୟକଳାପକୁ ବିଶ୍ଲେଷଣ କରେ।

ତେବେ ଏହି ମାସିକ ପ୍ରକାଶନର ଲକ୍ଷ୍ୟ ନିଯୁକ୍ତି ତଥ୍ୟ ରିପୋର୍ଟିଂରେ ଦୀର୍ଘକାଳୀନ ଶୂନ୍ୟସ୍ଥାନ ପୂରଣ କରିବା। ପୁନଃଗଠିତ PLFS ଡିଜାଇନ୍ ସର୍ବଭାରତୀୟ ସ୍ତରରେ CWS ରେ ଗ୍ରାମୀଣ ଏବଂ ସହରାଞ୍ଚଳ ପାଇଁ ମାସିକ ଆଧାରରେ ପ୍ରମୁଖ ନିଯୁକ୍ତି ଏବଂ ବେକାରୀ ସୂଚକ (ଶ୍ରମ ଶକ୍ତି ଅଂଶଗ୍ରହଣ ହାର, ଶ୍ରମିକ ଜନସଂଖ୍ୟା ଅନୁପାତ ଏବଂ ବେକାରୀ ହାର) ଆକଳନ କରିବା ପାଇଁ ପରିକଳ୍ପନା କରାଯାଇଛି। PLFS ର ମାସିକ ବୁଲେଟିନ୍ ଆକାରରେ ମାସିକ ଫଳାଫଳ ପ୍ରକାଶ କରିବାକୁ ଯୋଜନା କରାଯାଇଛି। ବର୍ତ୍ତମାନର ମାସିକ ବୁଲେଟିନ୍ ହେଉଛି ୨୦୨୫ ଏପ୍ରିଲ ମାସ ପାଇଁ ସିରିଜର ପ୍ରଥମ। 

ନୂଆଦିଲ୍ଲୀ: ଦକ୍ଷତା ଭିତ୍ତିକ ନିଯୁକ୍ତିକୁ ଭାରତୀୟ କମ୍ପାନୀଗୁଡ଼ିକ ଅଧିକ ଗୁରୁତ୍ୱ ଦେଉଛନ୍ତି । ଦେଶର ପ୍ରାୟ ୮୦ ପ୍ରତିଶତ ନିଯୁକ୍ତିଦାତା ପାରମ୍ପରିକ ଶିକ୍ଷାଗତ ଯୋଗ୍ୟତା ଅପେକ୍ଷା ବ୍ୟବହାରିକ ଜ୍ଞାନ (ଦକ୍ଷତା)କୁ ଅଧିକ ପ୍ରାଥମିକତା ଦେଉଛନ୍ତି । ଏନେଇ ଇନଡିଡ୍ ପକ୍ଷରୁ ହୋଇଥିବା ଗବେଷଣାରୁ ସ୍ପଷ୍ଟ ହୋଇଛି ଯେ, ଅଧିକାଂଶ କମ୍ପାନୀ ସାର୍ଟିଫିକେଟ୍ ଅପେକ୍ଷା ଦକ୍ଷତା ଉପରେ ଗୁରୁତ୍ୱ ଦେଉଛନ୍ତି । 

ଇନଡିଡ୍ ପକ୍ଷରୁ ହୋଇଥିବା ସର୍ଭେ ଜଣାପଡ଼ିଛି, ୪୨ ପ୍ରତିଶତ ନିଯୁକ୍ତିଦାତା କୁହନ୍ତି, ବର୍ତ୍ତମାନ ନିଯୁକ୍ତି ଆଶାୟୀଙ୍କ ନିକଟରେ ଆବଶ୍ୟକ ଦକ୍ଷତାର ଅଭାବ ରହିଛି । ତେଣୁ କମ୍ପାନୀ ଗୁଡ଼ିକ ଶିକ୍ଷାଗତ ଆବଶ୍ୟକତାକୁ ହ୍ରାସ କରିବା ସହିତ ଦକ୍ଷତାର ପୁନଃ ମୂଲ୍ୟାୟନ କରୁଛନ୍ତି । ଏହି ଟ୍ରେଣ୍ଡ ବିଶେଷକରି ପ୍ରଯୁକ୍ତିବିଦ୍ୟା, କୃତ୍ରିମ ବୃଦ୍ଧିମତ୍ତା(ଏଆଇ) ଏବଂ ସାଇବର ସୁରକ୍ଷା କ୍ଷେତ୍ରରେ ଅଧିକ ରହିଛି । ଏହି କ୍ଷେତ୍ରରେ ଶ୍ରେଣୀ ଗୃହ ଶିକ୍ଷା ଅପେକ୍ଷା ବ୍ୟବହାରିକ ଜ୍ଞାନର ଯଥେଷ୍ଟ ଆବଶ୍ୟକତା ରହିଛି । 

ଅଧିକ ପଢନ୍ତୁ: ଭାରତର ଚିନ୍ତା ଆମେ କାହିଁକି ନେବୁ ?  USAIDକୁ ନେଇ ଡୋନାଲ୍ଡ ଟ୍ରମ୍ପଙ୍କ ବଡ ବୟାନ

ବର୍ତ୍ତମାନ ସ୍ଥିତିରେ ନିଯୁକ୍ତିକ୍ଷେତ୍ରରେ ବ୍ୟାପକ ପରିବର୍ତ୍ତନ ଘଟୁଛି । ଶିକ୍ଷାଗତ ଯୋଗ୍ୟତାର ଯଥେଷ୍ଟ ଗୁରୁତ୍ୱ ଥିଲେ ମଧ୍ୟ ନିଯୁକ୍ତି ପାଇବା ପାଇଁ ଏହା ଏକମାତ୍ର ମାନଦଣ୍ଡ ହୋଇ ରହିନାହିଁ । ପ୍ରାର୍ଥୀ କେଉଁଠାରେ ପଢିଛନ୍ତି, ତାହା ଅପେକ୍ଷା ପ୍ରାର୍ଥୀ କଣ କରିପାରିବେ ତାହା ଉପରେ ନିଯୁକ୍ତିଦାତା ଅଧିକ ଗୁରୁତ୍ୱ ଦେଉଛନ୍ତି । ପ୍ରାର୍ଥ ନିକଟରେ କେତେ ଅଧିକ ଦକ୍ଷତା ରହିଛି, ତାହାକୁ ଫୋକସ୍ କରୁଛନ୍ତି ବିଭିନ୍ନ କମ୍ପାନୀ । କାରଣ ଏବେ ପ୍ରଯୁକ୍ତିବିଦ୍ୟା ବିକଶିତ ହେଉଥିବାରୁ ଏହାକୁ ଗ୍ରହଣ କରିପାରିବା ଭଳି କର୍ମଚାରୀଙ୍କୁ ନିଯୁକ୍ତିଦାତା ପ୍ରାଥମିକତା ଦେଉଛନ୍ତି । 

ନୂଆଦିଲ୍ଲୀ: ଦେଶର ଦ୍ୱିତୀୟ ବୃହତ ଆଇଟି କମ୍ପାନୀ ଇନଫୋସିସ୍ ନାଁରେ ସଙ୍ଗୀନ ଅଭିଯୋଗ । କମ୍ପାନୀ ୩୦୦ରୁ ଅଧିକ ଟ୍ରେନି କର୍ମଚାରୀଙ୍କୁ ଚାକିରୀରୁ ବହିଷ୍କୃତ କରିଛି । ଇଣ୍ଟରନାଲ ଆସେସମେଣ୍ଟ ଫେଲ କାରଣ ଦର୍ଶାଇ କମ୍ପାନୀ କର୍ମଚାରୀଙ୍କୁ ଛଟେଇ କରିଛି । ତେବେ ଏହି ଘଟଣା ପରେ ଚାରିଆଡୁ କମ୍ପାନୀକୁ ସମାଲୋଚନାର ଶିକାର ହେବାକୁ ପଡିବ । 

ଅନ୍ୟପଟେ ଆଇଟି କର୍ମଚାରୀ ସଂଘ ଏନଆଇଟିଜ (NITES) ଦାବି କରିଛି ଯେ, ଇନଫୋସିସରୁ ବାହାର କରାଯାଇଥିବା କର୍ମଚାରୀଙ୍କ ସଂଖ୍ୟା କୁହାଯାଇଥିବା ସଂଖ୍ୟାଠାରୁ ଢେର୍ ଅଧିକ । ଏନେଇ ସଂଘ ଇନଫୋସିସ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଶ୍ରମ ଓ ରୋଜଗାର ମନ୍ତ୍ରଣାଳୟ ନିକଟରେ ଅଭିଯୋଗ କରିବାକୁ ଧମକ ଦେଇଛି ।

ଏକ ରିପୋର୍ଟ ମୁତାବିକ, ଛଟେଇ କରାଯାଇଥିବା କର୍ମଚାରୀଙ୍କୁ ସେଦିନ ହିଁ କ୍ୟାମ୍ପସ ଛାଡ଼ିବାକୁ ନିଦେ୍ର୍ଦଶ ଦିଆଯାଇଥିଲା । ଏପରିକି ରାତିଟିଏ ରହିବାକୁ ଯିଏ ଯେତେ ନେହୁରା ହୋଇଥିଲେ ବି ଶୁଣିନଥିଲେ କମ୍ପାନୀ କର୍ତୃପକ୍ଷ । କମ୍ପାନୀରୁ ବାହାରିଥିବା ଏକ ଟ୍ରେନି କର୍ମଚାରୀ କହିବା ମୁତାବିକ, ତାଙ୍କର ଜଣେ ମହିଳା ସହକର୍ମୀ ରାତିଟିଏ କ୍ୟାମ୍ପସରେ ରହିବାକୁ ଯେତେ କାନ୍ଦି କାନ୍ଦି ନେହୁରା ହୋଇଥିଲା, ହେଲେ କମ୍ପାନୀ ତାଙ୍କ ଅନୁରୋଧ ଶୁଣିନଥିଲା, ବରଂ ତାଙ୍କୁ ଚାଲିଯିବାକୁ କହିଥିଲା । 

ଅଧିକ ପଢନ୍ତୁ: ଆମେରିକୀୟ ଡଲାର ତୁଳନାରେ ଭାରତୀୟ ଟଙ୍କାର ଐତିହାସିକ ହ୍ରାସ, ୮୭ ଟଙ୍କା ଅତିକ୍ରମ

ଛଟେଇ ହୋଇଥିବା ମହିଳା ଟ୍ରେନି କର୍ମଚାରୀ ଜଣକ ମ୍ୟାନେଜମେଣ୍ଟକୁ ରାତିଟିଏ ରହିବାକୁ ଅନୁମତି ମାଗିଥିଲେ । ୭ ଫେବୃୟାରୀରେ ହଠାତ୍ ତାଙ୍କୁ ଚାକିରୀରୁ ଛଟେଇ କରିଦିଆଥିଲା । ଏହାପରେ ତୁରନ୍ତ କ୍ୟାମ୍ପସ ଖାଲି କରିବାକୁ ନୋଟିସ୍ କରାଗଲା । ଏଥିପାଇଁ ସେ ମ୍ୟାନେଜମେଣ୍ଟ କାନ୍ଦି  କାନ୍ଦି ଅନୁରୋଧ କରିଥିଲେ, ରାତିଟିଏ ରହିବା ପାଇଁ । ଏବେ ରାତିରେ ସେ କୁଆଡେ ଯିବେ? କାଲି ସକାଳ ହେଲେ କ୍ୟାମ୍ପସ ଛାଡ଼ିଦେବେ ବୋଲି କହିଥିଲେ । ହେଲେ ମହିଳା କର୍ମଚାରୀଙ୍କ ନେହୁରା ଶୁଣିନଥିଲେ ମ୍ୟାନେଜମେଣ୍ଟ କର୍ତୃପକ୍ଷ । ଓଲଟା ଜବାବ ମିଳିଥିଲା, ତୁମେ କୁଆଡେ ଯିବ, ମୁଁ କେମିତି କହିବି? ଏବେ ଆପଣ ଏ କମ୍ପାନୀର କର୍ମଚାରୀ ନୁହଁନ୍ତି, ତେଣୁ ସନ୍ଧ୍ୟା ୬ଟା ସୁଦ୍ଧା ଶ୍ରୀଘ କ୍ୟାମ୍ପସ ଖାଲି କରିବାକୁ ନିଦେ୍ର୍ଦଶ ଦିଆଯାଇଥିଲା ।

ଅଧିକ ପଢନ୍ତୁ: ଶେଖ ମୁଜିବୁରଙ୍କ ବାସଭବନ ଉପରେ ଆକ୍ରମଣ ନେଇ ଦୁଃଖ ପ୍ରକାଶ କଲା ଭାରତ, କ୍ରୋଧିତ ହେଲା ବାଂଲାଦେଶ

ନ୍ୟୁଜ ଏଜେନ୍ସି PTI ଅନୁସାରେ, ଛଟେଇ ଟ୍ରେନି କର୍ମଚାରୀମାନେ କ୍ୟାମ୍ପସରେ ଫଣ୍ଡାମେଣ୍ଟାଲ ଟ୍ରେନିଂ ନେଇଥିଲେ । କିନ୍ତୁ ୩ ଥରର ପ୍ରଚେଷ୍ଟା ସତ୍ତ୍ୱେ ଇଣ୍ଟରନାଲ ଆସେସମେଣ୍ଟ ପାସ୍ କରି ପାରିନଥିଲେ, ଯାହାକି କମ୍ପାନୀରେ ରହିବା ପାଇଁ ଆବଶ୍ୟକ ଥିଲା । ସେପଟେ କମ୍ପାନୀ ପକ୍ଷରୁ କୁହାଯାଇଛି,  ଇନଫୋସିସରେ ନିଯୁକ୍ତି ପ୍ରକ୍ରିୟା ଖୁବ୍ କଠିନ । ସବୁ ଫ୍ରେସର କ୍ୟାମ୍ପସରେ ଫଣ୍ଡାମେଣ୍ଟାଲ ଟ୍ରେନିଂ ପରେ ଇଣ୍ଟରନାଲ ଆସେସମେଣ୍ଟ ପାସ୍ କରିବା ଜରୁରୀ ହୋଇଥାଏ । ଏଥିରେ ପାସ୍ ହେବାକୁ ୩ଟି ସୁଯୋଗ ଦିଆଯାଏ । ବିଫଳ ହେଲେ କମ୍ପାନୀରୁ ବାହାର କରି ଦିଆଯାଏ ।

ଆରମ୍ଭ ହୋଇଯାଇଛି ପ୍ଲେସମେଣ୍ଟ ସିଜିନ୍ । ଇଞ୍ଜିନିୟରିଂ ପାଠପଢାରେ ଦେଶର ପ୍ରମୁଖ ଅନୁଷ୍ଠାନ ପାଲଟିଥିବା ଆଇଆଇଟି କ୍ୟାମ୍ପସ ଗୁଡିକରେ ଏଥିପାଇଁ ଭିଡ ଦେଖିବାକୁ ମିଳିଛି । ଦେଶବିଦେଶର ବହୁ ନାମୀଦାମୀ କମ୍ପାନୀ ଆଇଆଇଟିରୁ ଛାତ୍ରଛାତ୍ରୀଙ୍କୁ ନେବାକୁ ଆଗ୍ରହ ଦେଖାଉଛନ୍ତି । ଏଥିପାଇଁ ଦେଶର ବିଭିନ୍ନ ଆଇଆଇଟି କ୍ୟାମ୍ପସରେ କମ୍ପାନୀ ଗୁଡିକରେ ଭିଡ ଦେଖିବାକୁ ମିଳିଛି । 

କୋଟି କୋଟି ଟଙ୍କାର ଦରମା ସାଙ୍ଗକୁ ସ୍ୱତନ୍ତ୍ର ପ୍ୟାକେଜ୍ ସହ ଛାତ୍ରଛାତ୍ରୀଙ୍କୁ ନିଯୁକ୍ତି ଦେବାକୁ ଆଗ୍ରହ ଦେଖାଉଛନ୍ତି ବହୁ କମ୍ପାନୀ । ନିକଟରେ ଆଇଆଇଟି ମାଡ୍ରାସରୁ ଏକ ବିଟେକ୍ ଛାତ୍ରଙ୍କୁ ୟୁଏସର ଟ୍ରେଡିଂ ଫିର୍ମ ଜେନ ଷ୍ଟ୍ରିଟ୍ ପକ୍ଷରୁ ୪କୋଟି ୩୦ ଲକ୍ଷର ନିଯୁକ୍ତି ଅଫର ମିଳିଛି । ଏଥିସହ ଡି-ଇ-ସ୍‌, ବ୍ଲାକରକ୍‌, ମାଇକ୍ରୋସଫ୍ଟ ଭଳି ବହୁ ନାମୀଦାମୀ କମ୍ପାନୀ ମଧ୍ୟ ପ୍ରତିଭାବାନ୍ ଛାତ୍ରଙ୍କୁ ନେବାକୁ କ୍ୟାମ୍ପସ ଆଗରେ ଡେରା ପକାଉଛନ୍ତି ।

ଚଳିତ ମାସ ପହିଲାରୁ ଆଇଆଇଟି ଦିଲ୍ଲୀ, ବମ୍ବେ, ମାଡ୍ରାସ, କାନପୁର, ଖଡ଼ଗପୁର, ଗୌହାଟୀ ଓ ବାରଣାସୀରେ ଚୂଡ଼ାନ୍ତ ପ୍ଲେସ୍‌ମେଣ୍ଟ ଆରମ୍ଭ ହୋଇଛି। ଅନେକ ଛାତ୍ରଛାତ୍ରୀ ଦେଶ ଭିତରେ ଏକ କୋଟି ଟଙ୍କା ପାଖାପାଖିର ନିଯୁକ୍ତି ପ୍ରସ୍ତାବ ପାଇଛନ୍ତି। ବିଦେଶୀ କମ୍ପାନିର ଚାକିରିକୁ ଗ୍ରହଣ କରୁଥିବା ପିଲାମାନଙ୍କ ଲାଗି ବିଦେଶ ଭ୍ରମଣ ଓ ରହଣୀର ସୁଯୋଗ ମଧ୍ୟ ରହିଛି। ଚଳିତ ବର୍ଷ ଆଇଆଇଟିଗୁଡ଼ିକର ଯେଉଁଭଳି ଭାବେ ନିଯୁକ୍ତି ଚାଲିଛି ସେଥିରୁ ବିଶ୍ଵ ଅର୍ଥନୀତି ସୁଧାର ଆଡ଼କୁ ଗତି କରୁଥିବା ଜଣାପଡ଼ୁଛି । 

ଅଧିକ ପଢନ୍ତୁ: ଭାରତୀୟଙ୍କୁ ସାହାର୍ଯ୍ୟ ପାଇଁ ଆଗେଇ ଆସିଲା ପାକିସ୍ତାନ, ମଝି ସମୁଦ୍ରରୁ ଭାରତୀୟଙ୍କୁ ଉଦ୍ଧାର କରି ଦେଖାଇଲା ମାନବିକତା

ଆଜି ହେଉଛି ବିଶ୍ୱ ମଧୁମେହ ଦିବସ। ସାରା ବିଶ୍ୱରେ ଭାରତ ମଧୁମେହ ରୋଗର ଅବାଂଛିତ ରାଜଧାନୀ ଭାବେ ଆଖ୍ୟା ପାଇସାରିଛି। ଏକ ସମୟ ଥିଲା ଯେବେ ମଧୁମେହ କେବଳ ବୟସ୍କ ବ୍ୟକ୍ତି ବିଶେଷ ଙ୍କ ପାଖରେ ଦେଖା ଦେଉଥିଲା ତାହା ଏବେ ଯୁବପିଢ଼ିଙ୍କ ଠାରୁ ଆରମ୍ଭ କରି ଛୋଟ ଛୋଟ ଶିଶୁ ଙ୍କ ଠାରେ ମଧ୍ୟ ଦେଖା ଦେଉଛି। ମଧୁମେହ ଏକ ସାଧାରଣ ରକ୍ତରେ ଶର୍କରାର ବୃଦ୍ଧି ଜନିତ ରୋଗ ନୁହେଁ, ଏହି ରୋଗ ଆହୁରି ଭୟଙ୍କର ରୋଗ ଗୁଡିକୁ ସାଥିରେ ନେଇ ଆସିଥାଏ। ଖରାପ ଜୀବନଶୈଳୀ, ବିପର୍ଯ୍ୟସ୍ତ ଦିନଚର୍ଯ୍ୟା, ଶାରୀରିକ ଅଭାବ ଓ ଖରାପ ଖାଦ୍ୟଗ୍ରହଣ ଯୋଗୁଁ ଏହି ରୋଗ ବର୍ତମାନ ତା'ର କାୟାବିସ୍ତାର କରିଚାଲିଛି। 

ଏହି ରୋଗ ସମ୍ପର୍କରେ ସମସ୍ତଙ୍କୁ ସଚେତନ କରିବା ଉଦେଶ୍ୟରେ ପ୍ରତିବର୍ଷ ନଭେମ୍ବର ୧୪ କୁ ବିଶ୍ୱ ଡାଇବେଟିସ ବା ମଧୁମେହ ରୋଗ ଦିବସ ଭାବେ ପାଳନ କରାଯାଏ। ଏହି ରୋଗ ବିଷୟରେ ସଚେତନତା ସୃଷ୍ଟି କରିବା ସହ ଆବଶ୍ୟକୀୟ ସ୍ୱାସ୍ଥ୍ୟ ସେବା ଯୋଗାଇଦେବା ନିମନ୍ତେ ପାଳନ କରାଯାଏ। ଏହି ଦିନ ମଧୁମେହ ରୋଗର କାରଣ, ନିରାକରଣ ତଥା କିପରି ଏହି ରୋଗଠାରୁ ଦୁରେଇ ରହିବାପାଇଁ ଜୀବନଚର୍ଯା ପାଳନ କରିବା ସେ ସମ୍ବନ୍ଧରେ ସଚେତନତା ସୃଷ୍ଟି କରାଯାଏ।

କିପରି ମଧୁମେହ ରୋଗର ସମ୍ଭାବନା ଏଡାଇପାରିବେ ଚାଲନ୍ତୁ ଜାଣିବା:

-ସୁଷମା ଖାଦ୍ୟ ଖାଆନ୍ତୁ 

-ନିୟମିତ ବ୍ୟାୟାମ କରନ୍ତୁ 

-ଆବଶ୍ୟକ ପଡିଲେ ଓଜନ ହ୍ରାସ କରନ୍ତୁ 

-ମାନସିକ ଚାପରୁ ମୁକ୍ତ ରୁହନ୍ତୁ 

-ଡ଼ାକ୍ତରଙ୍କ ନିର୍ଦେଶକ୍ରମେ ଔଷଧ ସେବନ କରନ୍ତୁ 

-ରକ୍ତ ଶର୍କରାର ନିୟମିତ ଯାଞ୍ଚ କରନ୍ତୁ 

-ଶର୍କରାଯୁକ୍ତ ପାନୀୟ ଠାରୁ ଦୁରେଇ ରୁହନ୍ତୁ 

-ଧୂମପାନ ଓ ମଦ୍ୟପାନ ଠାରୁ ଦୁରେଇ ରୁହନ୍ତୁ 

ଭୁବନେଶ୍ୱର: ଆସନ୍ତା ନଭେମ୍ବର ମାସ ୧୧ ତାରିଖ ଠାରୁ ୨୦ ତାରିଖ ପର୍ଯ୍ୟନ୍ତ ବିହାରର ରାଜଗିର ଠାରେ ଏସିଆନ୍ ମହିଳା ହକି ଚାମ୍ପିୟନସିପ୍ ଅନୁଷ୍ଠିତ ହେବ। ଭାରତ ସମେତ ଚୀନ୍‌, ଜାପାନ, ଦକ୍ଷିଣ କୋରିଆ, ମାଲେସିଆ ଏବଂ ଥାଇଲାଣ୍ଡ ଦେଶର ମହିଳା ହକିଦଳ ପ୍ରତିଯୋଗିତାରେ ଅଂଶଗ୍ରହଣ କରିବେ। ଏହି ପରିପ୍ରେକ୍ଷୀରେ ଆଜି ଓଡିଶା କ୍ରୀଡା ଓ ଯୁବସେବା ବିଭାଗର ମନ୍ତ୍ରୀ ଶ୍ରୀ ସୂର୍ଯ୍ୟବଂଶୀ ସୂରଜ ଆଭାସୀ ମାଧ୍ୟମରେ ଭାରତୀୟ ମହିଳା ରାଷ୍ଟ୍ରୀୟ ହକି ଟିମ୍ ର କ୍ରୀଡ଼ାବିତ୍ ମାନଙ୍କୁ ଆଗାମୀ ଏସିଆନ୍‌ ମହିଳା ହକି ଚାମ୍ପିୟନସିପ୍ ପାଇଁ ଶୁଭେଚ୍ଛା ଓ ଶୁଭକାମନା ଜଣାଇବା ସହ ଟିମ୍ ର ପ୍ରସ୍ତୁତି ସମ୍ବନ୍ଧରେ ପଚାରି ବୁଝିଥିଲେ।

ଆଜି ଆଭାସୀ ମାଧ୍ୟମରେ ହୋଇଥିବା ଆଲୋଚନାରେ ଭାରତୀୟ ମହିଳା ରାଷ୍ଟ୍ରୀୟ ହକି ଟିମ୍ ତରଫରୁ କ୍ୟାପଟେନ୍‌ ସଲୀମା ଟେଟେ, ଭାଇସ୍‌ କ୍ୟାପଟେନ୍‌ ନଭନୀତ କୋୖର, କୋଚ୍ ହରେନ୍ଦ୍ର ସିଂ, ଓଡ଼ିଶାର ହକି କ୍ରୀଡାବିତ୍ ସୁନେଲିତା ଟପ୍ପୋ ଏବଂ ଟିମ୍ ର ଅନ୍ୟାନ୍ୟ କ୍ରୀଡାବିତ୍‌ ଓ ସଦସ୍ୟମାନେ ଉପସ୍ଥିତ ଥିଲେ।

ଭାରତୀୟ ମହିଳା ରାଷ୍ଟ୍ରୀୟ ହକି ଟିମ୍ ର କ୍ରୀଡ଼ାବିତ୍‌ ମାନଙ୍କୁ ମନ୍ତ୍ରୀ ଶ୍ରୀ ସୂରଜ କହିଥିଲେ, "ଆପଣମାନେ ସମସ୍ତେ ହେଲେ ଆମ ଦେଶର ଗର୍ବ ଓ ଗୌରବ, ସମସ୍ତ ଯୁବ କ୍ରୀଡାବିତ୍ ମାନଙ୍କ ପାଇଁ ହେଲେ ପ୍ରେରଣାର ଉତ୍ସ। ନିଜର ଉତ୍କୃଷ୍ଟ ପ୍ରଦର୍ଶନ ମାଧ୍ୟମରେ ଆଗାମୀ ଏସିଆନ୍‌ ମହିଳା ହକି ଚାମ୍ପିୟନସିପ୍ ରେ ଆପଣମାନେ ନିଶ୍ଚିତ ରୂପେ ଆମ ଦେଶ ପାଇଁ ଗର୍ବ ଓ ଗୌରବ ଅର୍ଜନ କରିବେ ବୋଲି ମୋର ଆଶା ଓ ବିଶ୍ୱାସ।" ଭାରତୀୟ ମହିଳା ରାଷ୍ଟ୍ରୀୟ ହକି ଟିମ୍ ର କ୍ୟାପଟେନ୍‌ ସଲୀମା ଟେଟେଙ୍କୁ ମନ୍ତ୍ରୀ ଶ୍ରୀ ସୂରଜ ଆଗାମୀ ପ୍ରତିଯୋଗିତା ପାଇଁ ଶୁଭେଚ୍ଛା ଜଣାଇଥିଲେ। ଏଥିସହ ଓଡ଼ିଶାର କ୍ରୀଡାବିତ୍‌ ସୁନେଲିତା ଟପ୍ପୋ ଓଡ଼ିଶାର ଗର୍ବ ବୋଲି ମତପ୍ରକାଶ କରିବା ସହ ସୁନ୍ଦରଗଡ଼ର ଯୁବ କ୍ରୀଡାବିତ୍‌ଙ୍କ ପାଇଁ ସୁନେଲିତା ପ୍ରେରଣାର ଉତ୍ସ ବୋଲି ମନ୍ତ୍ରୀ ଶ୍ରୀ ସୂରଜ କହିଥିଲେ।

ଏସିଆନ୍‌ ମହିଳା ହକି ଚାମ୍ପିୟନସିପ୍ ର ପ୍ରସ୍ତୁତି ସମ୍ବନ୍ଧରେ ମନ୍ତ୍ରୀ ଟିମ୍ ର କୋଚ୍ ହରେନ୍ଦ୍ର ସିଂଙ୍କ ସହ ଆଲୋଚନା କରିଥିଲେ। ଓଡିଶା ସରକାରଙ୍କ ହକି ତଥା ହକି କ୍ରୀଡାବିତ୍ ମାନଙ୍କର ବିକାଶ ପାଇଁ ରହିଥିବା ପ୍ରତିବଦ୍ଧତାକୁ ଭାରତୀୟ ମହିଳା ରାଷ୍ଟ୍ରୀୟ ହକି ଟିମ୍ ର ସଦସ୍ୟମାନେ ପ୍ରଶଂସା କରିଥିଲେ।

ଆଜିର ଆଭାସୀ ଆଲୋଚନାରେ ଓଡ଼ିଶା କ୍ରୀଡା ଓ ଯୁବସେବା ବିଭାଗର ପ୍ରମୁଖ ଶାସନ ସଚିବ ଶ୍ରୀ ଭାସ୍କର ଜ୍ୟୋତି ଶର୍ମା, ହକି ଇଣ୍ଡିଆ ପ୍ରେସିଡେଣ୍ଟ ଦିଲୀପ ତିର୍କୀ, କ୍ରୀଡା ଓ ଯୁବସେବା ବିଭାଗର ଅତିରିକ୍ତ ସଚିବ ଶ୍ରୀ ବିଜୟ କୁମାର ସ୍ୱାଇଁ ଆଦି ଉପସ୍ଥିତ ଥିଲେ।

ନୂଆଦିଲ୍ଲୀ: ଭାରତୀୟ କ୍ରିକେଟର ହାର୍ଦ୍ଦିକ ପାଣ୍ଡ୍ୟା ୧୯୯୩ ମସିହା ଆଜିର ଦିନରେ ଗୁଜରାଟର ସୁରଟରେ ଜନ୍ମଗ୍ରହଣ କରିଥିଲେ ଏବଂ ବର୍ତ୍ତମାନ ତାଙ୍କୁ ୩୧ ବର୍ଷ ହୋଇଛି। ଆଜି ହାର୍ଦ୍ଦିକ ଅନ୍ତର୍ଜାତୀୟ କ୍ରିକେଟରେ ୩୮୦୦ରୁ ଅଧିକ ରନ୍ କରିବା ସହ ୧୮୮ ୱିକେଟ୍ ମଧ୍ୟ ନେଇଛନ୍ତି। ସେ ୨୦୨୪ ମସିହାରେ ବିସିସିଆଇର ଗ୍ରେଡ୍ ଏ ଖେଳାଳି, ଯିଏକି ବାର୍ଷିକ ୫ କୋଟି ଟଙ୍କା ଦରମା ପାଆନ୍ତି। ଏହା ବ୍ୟତୀତ ସେ ସ୍ପନ୍ସରସିପ୍, ଆଇପିଏଲ୍ ଏବଂ ଅନ୍ୟାନ୍ୟ ସୂତ୍ରରୁ ବହୁତ ରୋଜଗାର କରନ୍ତି। କିନ୍ତୁ ତାଙ୍କ ଆର୍ଥିକ ଅବସ୍ଥା ସବୁବେଳେ ଏମିତି ନଥିଲା କାରଣ ତାଙ୍କ ପରିବାରକୁ ବହୁତ ସଂଘର୍ଷ ମଧ୍ୟ ଦେଇ ଗତି କରିବାକୁ ପଡିଥିଲା।

ଏକ ସମୟ ଥିଲା ଯେତେବେଳେ ହାର୍ଦ୍ଦିକ ପାଣ୍ଡ୍ୟାଙ୍କ ବାପା ହିମାଂଶୁ ପାଣ୍ଡ୍ୟାଙ୍କ ସୁରଟରେ ବ୍ୟବସାୟ ଧୀରେଧୀରେ ଧୀରେ ଆର୍ଥିକ ସଙ୍କଟ ଯୋଗୁଁ ସେ ପରିବାର ସହ ସୁରତରୁ ବଡୋଦରା ଚାଲି ଆସିଥିଲେ। ନୂଆ ସହରକୁ ଆସିବାର ଅନ୍ୟତମ କାରଣ ଥିଲା ତାଙ୍କ ପୁଅ ହାର୍ଦ୍ଦିକ ଓ କ୍ରୁନାଲ ପାଣ୍ଡ୍ୟାଙ୍କ କ୍ରିକେଟ୍ ପ୍ରଶିକ୍ଷଣ। କିନ୍ତୁ ପ୍ରାରମ୍ଭରେ ତାଙ୍କ ଆର୍ଥିକ ସ୍ଥିତି ଭଲ ନଥିଲା। ହାର୍ଦ୍ଦିକ ଓ ତାଙ୍କ ଭାଇ କ୍ରୁନାଲ ପାଣ୍ଡ୍ୟାଙ୍କ ପାଖରେ କ୍ରିକେଟକିଟ୍ କିଣିବା ପାଇଁ ଟଙ୍କା ନଥିଲା। ତେଣୁ ଦୁହେଁ ସ୍ଥାନୀୟ ଟୁର୍ଣ୍ଣାମେଣ୍ଟରେ ୨୦୦ ଟଙ୍କାରେ ଖେଳୁଥିଲେ, ଯାହା ସେମାନଙ୍କୁ କ୍ରିକେଟ୍ ଉପକରଣ କିଣିବାରେ ସାହାଯ୍ୟ କରୁଥିଲା। 

ହାର୍ଦ୍ଦିକ ପାଣ୍ଡ୍ୟାଙ୍କ ସମ୍ପତ୍ତି ଏବେ ୯୪ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ଅନେକ ଥର ଦେଖିବାକୁ ମିଳିଛି ଯେ ହାର୍ଦ୍ଦିକ ପାଣ୍ଡ୍ୟା ଦାମୀ ଘଡ଼ି ପିନ୍ଧିବାକୁ ବହୁତ ପସନ୍ଦ କରନ୍ତି। ସେମାନଙ୍କ ଘଡ଼ିର ମୂଲ୍ୟ ମଧ୍ୟ କୋଟି କୋଟି ଟଙ୍କା ହୋଇଥାଏ। ତାଙ୍କ ପାଖରେ ୬ କୋଟିରୁ ଅଧିକ ମୂଲ୍ୟର ରୋଲ୍ସ ରଏସ୍ ସମେତ ବିଳାସପୂର୍ଣ୍ଣ କାର୍ ମଧ୍ୟ ରହିଛି। ତାଙ୍କ ପାଖରେ ଲାମ୍ବୋର୍ଗିନୀ ହାର୍କାନ୍ ଏବଂ ରେଞ୍ଜ ରୋଭର ଭୋଗ୍ ଭଳି ଟପ୍ କ୍ଲାସ୍ ଗାଡ଼ି ରହିଛି, ଯାହାର ମୂଲ୍ୟ ଯଥାକ୍ରମେ ୩.୫ କୋଟି ଟଙ୍କା ଏବଂ ୪ କୋଟି ଟଙ୍କା। ହାର୍ଦ୍ଦିକଙ୍କ କଠିନ ପରିଶ୍ରମର ଫଳ ମିଳିଛି ବୋଲି ଏହି ବିଳାସପୂର୍ଣ୍ଣ ଜୀବନଶୈଳୀ ପ୍ରମାଣ କରୁଛି।

ବୌଦ୍ଧ: ସରସ୍ଵତୀ ଶିଶୁ ବିଦ୍ୟା ମନ୍ଦିର ବୌଦ୍ଧ ଠାରେ ଗୁରୁଦିବସ ବହୁତ ଧୁମଧାମରେ ପାଳିତ ହୋଇଯାଇଛି। ବିଦ୍ୟାଳୟର ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ଶ୍ରୀବତ୍ସ ମିଶ୍ର ଅତିଥି ପରିଚୟ ପ୍ରଦାନ କରିଥିଲେ। ଏହି ଉତ୍ସବରେ ମୁଖ୍ୟ ଅତିଥି ଭାବେ ଅବସରପ୍ରାପ୍ତ ଶିକ୍ଷୟିତ୍ରୀ ଶ୍ରୀମତୀ ପଦ୍ମାଳୟା ମିଶ୍ରଙ୍କ କର କମଳରେ ଜ୍ଞାନ ଦୀପ ପ୍ରଜ୍ବଳିତ ହୋଇଥିଲା। ବିଦ୍ୟାଳୟର ସମ୍ପାଦକ ଶ୍ରୀଯୁକ୍ତ ସାର ପ୍ରଧାନ, ସହ ପ୍ରଧାନ ଆଚାର୍ଯ୍ୟ ଶ୍ରୀଯୁକ୍ତ ଅଶୋକ କୁମାର ପୁରୋହିତ ମଞ୍ଚରେ ଉପସ୍ଥିତ ଥିଲେ। ବିଦ୍ୟାଳୟର ବରିଷ୍ଠ ଆଚାର୍ଯ୍ୟ ଶ୍ରୀଯୁକ୍ତ ଗଣେଶ ମହାକୁଳ , ଶ୍ରୀଯୁକ୍ତ ଅରବିନ୍ଦ ଗିରି ଓ  ଛାତ୍ରଛାତ୍ରୀ ଗୁରୁଦିବସର ମହତ୍ତ୍ଵ ପ୍ରତିପାଦନ କରିଥିଲେ। ଶିକ୍ଷାର୍ଥୀ ମାନଙ୍କ ଦ୍ଵାରା ମୁଖ୍ୟ ଅତିଥି ତଥା ଅନ୍ୟ ଉପସ୍ଥିତ ସଦସ୍ୟ ମାନଙ୍କୁ ଗୁରୁ ପୂଜନ କରାଯାଇଥିଲା । ଶିକ୍ଷାର୍ଥୀ ମାନେ ଗୁରୁଜୀ ଗୁରୁମା ମାନଙ୍କୁ ପୁଷ୍ପ ପ୍ରଦାନ ପୂର୍ବକ ପୂଜାର୍ଚ୍ଚନା କରିଥିଲେ । ମୁଖ୍ୟ ଅତିଥି ବର୍ତ୍ତମାନ ସମାଜରେ ତଥା ପୁରାତନ କାଳର ଗୁରୁଙ୍କ ସମ୍ବନ୍ଧରେ ଆଲୋକପାତ କରିବା ସହ ଗୁରୁ ଶିଷ୍ୟ ସମ୍ପର୍କ ଏକ ଅତୁଟ ବନ୍ଧନ ବୋଲି କହିଥିଲେ। ବରିଷ୍ଠା ଆଚlର୍ଯ୍ୟା ଶ୍ରୀମତୀ ସନ୍ତୋଷିନୀ ରାଉତଙ୍କ ସଂଯୋଜନାରେ ସଭାକାର୍ଯ୍ୟ ସମ୍ପାଦିତ ହୋଇଥିଲା। ଶେଷରେ ବରିଷ୍ଠ ଆଚାର୍ଯ୍ୟ ଶ୍ରୀଯୁକ୍ତ ଶଙ୍କରଲାଲ୍ ସାହୁ ଧନ୍ୟବାଦ୍ ଅର୍ପଣ କରିଥିଲେ।

ସମ୍ବଲପୁର: ଆଜି ହେଉଛି ଜାତୀୟ କ୍ରୀଡା ଦିବସ। ଏହି ଦିବସ ପାଳନ ଅବସରରେ ସମ୍ବଲପୁର ଜିଲ୍ଲା ପ୍ରଶାସନ ପକ୍ଷରୁ, ସମ୍ବଲପୁର ଠାରେ ମିନି ମାରାଥନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ସହରର ଭିଏସଏସ ଷ୍ଟାଡିୟମ ଠାରୁ ଲକ୍ଷ୍ମୀ ଟକିଜ ଛକ ପର୍ଯ୍ୟନ୍ତ ଅନୁଷ୍ଠିତ, ଏହି ମାରାଥନ୍ କୁ ଜିଲ୍ଲାପାଳ ସିଦ୍ଧେଶ୍ୱର ବଲିରାମ ବୋନ୍ଦର ମୁଖ୍ୟ ଅତିଥି ଭାବରେ ଯୋଗଦେଇଥିଲେ ଏବଂ ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ। ଏହି କାର୍ଯ୍ୟକ୍ରମରେ ମହାନଗର ନିଗମ କମିଶନର ବେଦଭୁଷଣଙ୍କ ସମେତ ବହୁ ପ୍ରଶାସନିକ ଅଧିକାରୀ ତଥା କ୍ରିଡା ସଂଗଠକ ମାନେ ଉପସ୍ଥିତ ଥିଲେ। ବିଶେଷ କରି ବିଭିନ୍ନ କ୍ରୀଡ଼ା କ୍ଷେତ୍ରରେ ସମ୍ବଲପୁର ଜିଲ୍ଲାକୁ ଆହୁରି ଆଗେଇ ନେବାକୁ ସମସ୍ତେ ସଂଙ୍କଳ୍ପ ନେବାକୁ ଜିଲ୍ଲାପାଳ ଆହ୍ୱାନ ଜଣାଇବା ସହ ପିଲାମାନଙ୍କୁ ଫିଟ୍ ରଖିବାକୁ ଏହି ମିନି ମାରାଥନ କାର୍ଯ୍ୟକ୍ରମ ଅନୁଷ୍ଠିତ କରାଯାଇଥିବା ଜିଲ୍ଲାପାଳ କହିଛନ୍ତି। ଅନ୍ୟପକ୍ଷରେ ଏହି ମିନି ମାରାଥନରେ ସ଼ହରର ବିଭିନ୍ନ ଶିକ୍ଷାନୁଷ୍ଠାନର ଛାତ୍ରଛାତ୍ରୀଙ୍କ ସମେତ ଏନସିସି କ୍ୟାଡେଟ ମାନେ ମଧ୍ୟ ଖୁବ ଉତ୍ସାହ ସହକାରେ ଏଥିରେ ଭାଗ ନେଇଥିଲେ।