ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀଙ୍କୁ ଦିଲ୍ଲୀର ଏକ ପ୍ରମୁଖ ବ୍ୟବସାୟୀ ସଂଗଠନ ବଡ଼ ଅପିଲ୍ କରିଛି। ଦିଲ୍ଲୀ ଡ୍ରଗ୍ସ ଟ୍ରେଡର୍ସ ଆସୋସିଏସନ୍ (DDTA) ପକ୍ଷରୁ ଶୁକ୍ରବାର ରାହୁଲ ଗାନ୍ଧୀଙ୍କୁ ଏକ ପତ୍ର ଲେଖି ଆସନ୍ତା ନଭେମ୍ବର ୧ ତାରିଖରେ ରାମଲୀଳା ମଇଦାନରେ ହେବାକୁ ଥିବା କଂଗ୍ରେସର ପ୍ରସ୍ତାବିତ ରାଲିକୁ ସ୍ଥଗିତ ରଖିବାକୁ ଅନୁରୋଧ କରାଯାଇଛି। ସଂଗଠନ ପକ୍ଷରୁ କୁହାଯାଇଛି ଯେ, ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି ଏହି ସମୟରେ କୌଣସି ପ୍ରକାର ଶକ୍ତି ପ୍ରଦର୍ଶନ ଠିକ୍ ହେବ ନାହିଁ।

ମକ୍ ପାର୍ଲାମେଣ୍ଟ ସ୍ଥଗିତ ପ୍ରସଙ୍ଗର ଦିଆଗଲା ଦୃଷ୍ଟାନ୍ତ

ଡିଡିଟିଏ (DDTA) ସମ୍ପାଦକ ଆଶିଷ ଗ୍ରୋଭର ରାହୁଲ ଗାନ୍ଧୀଙ୍କୁ ଲେଖିଥିବା ପତ୍ରରେ ଦିଲ୍ଲୀର ବ୍ୟବସାୟୀ ସମୁଦାୟର ଚିନ୍ତା ଏବଂ ବର୍ତ୍ତମାନର ପରିସ୍ଥିତି ଉପରେ ଆଲୋକପାତ କରିଛନ୍ତି। ଆଶିଷ ଗ୍ରୋଭର ଉଲ୍ଲେଖ କରିଛନ୍ତି ଯେ, ଯେପରି କିଛି ପରିସ୍ଥିତିକୁ ଆଖି ଆଗରେ ରଖି ଆଜିର ମକ୍ ପାର୍ଲାମେଣ୍ଟ କାର୍ଯ୍ୟକ୍ରମକୁ ସ୍ଥଗିତ ରଖାଯାଇଛି, ଠିକ୍ ସେହିପରି ନଭେମ୍ବର ୧ରେ ହେବାକୁ ଥିବା ରାଲିକୁ ମଧ୍ୟ ବାତିଲ ବା ସ୍ଥଗିତ ରଖିବାକୁ ବିଚାର କରାଯାଉ। ସମ୍ବିଧାନ ଏବଂ ସାମ୍ବିଧାନିକ ଅନୁଷ୍ଠାନଗୁଡ଼ିକର ମର୍ଯ୍ୟାଦା ରକ୍ଷା କରିବା ଉପରେ ସଂଗଠନ ଗୁରୁତ୍ୱାରୋପ କରିଛି।

ବ୍ୟାପାର ଓ ବାଣିଜ୍ୟ ପ୍ରତି ବିପଦ, ଚିନ୍ତାରେ ବ୍ୟବସାୟୀ

ପତ୍ରରେ କୁହାଯାଇଛି ଯେ, ଯେତେବେଳେ ମାମଲାଟି ପୂର୍ବରୁ ଅଦାଲତରେ ବିଚାରାଧୀନ ରହିଛି ଏବଂ ସମ୍ପୃକ୍ତ ପକ୍ଷଗୁଡ଼ିକ ସୁପ୍ରିମକୋର୍ଟରେ ନିଜର ଜବାବ ଦାଖଲ କରିସାରିଛନ୍ତି, ସେତେବେଳେ ରାଜନୈତିକ ଧକ୍କା ଓ ସର୍ବସାଧାରଣରେ ଶକ୍ତି ପ୍ରଦର୍ଶନ ବଦଳରେ ନ୍ୟାୟିକ ପ୍ରକ୍ରିୟା ଉପରେ ଭରସା ରଖିବା ଅଧିକ ଦାୟିତ୍ୱପୂର୍ଣ୍ଣ ପଦକ୍ଷେପ ହେବ।

ଦିଲ୍ଲୀରେ କ୍ରମଗତ ଭାବେ ହେଉଥିବା ବିରୋଧ ପ୍ରଦର୍ଶନ, ଧାର୍ଷଣା ଏବଂ ରାଲି ଯୋଗୁଁ ବ୍ୟାପାରିକ କାର୍ଯ୍ୟକଳାପ, ଟ୍ରାଫିକ୍ ବ୍ୟବସ୍ଥା ଏବଂ ସାଧାରଣ ଲୋକଙ୍କ ଜୀବନଯାତ୍ରା ପ୍ରଭାବିତ ହେଉଥିବା ନେଇ ଡିଡିଟିଏ ଗଭୀର ଚିନ୍ତା ପ୍ରକଟ କରିଛି। ସଂଗଠନ କହିଛି ଯେ ବେପାରୀ, ଦୋକାନୀ, କ୍ଷୁଦ୍ର ବ୍ୟାପାରୀ ଏବଂ ଦିନମଜୁରିଆମାନେ ପୂର୍ବରୁ ହିଁ ଆର୍ଥିକ କ୍ଷତିର ସମ୍ମୁଖୀନ ହୋଇଛନ୍ତି। ଏଭଳି ପରିସ୍ଥିତିରେ ଏବେ ଆଗକୁ ପର୍ବପର୍ବାଣୀ ଏବଂ ବିବାହର ସିଜିନ୍ ଥିବାରୁ, ରାଲି କାରଣରୁ ବ୍ୟାପାରରେ ବାଧା ସୃଷ୍ଟି ହେଲେ ସ୍ଥିତି ଆହୁରି ଜଟିଳ ହୋଇପଡ଼ିବ।

"ଏହା ରାଜନୈତିକ ଶକ୍ତି ପ୍ରଦର୍ଶନର ସମୟ ନୁହେଁ"

ଶାନ୍ତିପୂର୍ଣ୍ଣ ପ୍ରତିବାଦ ଏବଂ ମତାମତ ପ୍ରକାଶ କରିବାର ଅଧିକାରକୁ ଗଣତାନ୍ତ୍ରିକ ଅଧିକାର ବୋଲି ସ୍ୱୀକାର କରିବା ସହ ଡିଡିଟିଏ କହିଛି ଯେ, ରାଜନୈତିକ କାର୍ଯ୍ୟକ୍ରମ ଯୋଗୁଁ ସାଧାରଣ ଜନତା ଅଯଥା ଅସୁବିଧାର ସମ୍ମୁଖୀନ ହେବା ଏବଂ ସହରର ଅର୍ଥନୀତି ଉପରେ ଏହାର କୁପ୍ରଭାବ ପଡ଼ିବା ଅନୁଚିତ୍।

ପତ୍ରର ଶେଷରେ ଆଶିଷ ଗ୍ରୋଭର ଲେଖିଛନ୍ତି, "ଏହା କୌଣସି ରାଜନୈତିକ ଶକ୍ତି ପ୍ରଦର୍ଶନର ସମୟ ନୁହେଁ, ବରଂ ଗଣତାନ୍ତ୍ରିକ ମୂଲ୍ୟବୋଧକୁ ବଜାୟ ରଖିବା, ସାମ୍ବିଧାନିକ ସଂସ୍ଥାଗୁଡ଼ିକୁ ସମ୍ମାନ ଦେବା ଏବଂ ଦିଲ୍ଲୀର କୋଟି କୋଟି ନାଗରିକ ଓ ବ୍ୟାପାରୀଙ୍କ ସ୍ୱାର୍ଥକୁ ରାଜନୈତିକ ସ୍ୱାର୍ଥଠାରୁ ଉପରେ ରଖିବାର ସମୟ। ଆଶା କରୁଛୁ ଆପଣ ଏହି ଅପିଲ୍‌କୁ ଗ୍ରହଣ କରିବେ ଏବଂ ରାଲି ସ୍ଥଗିତ ରଖିବାକୁ ଘୋଷଣା କରିବେ।"

ନୂଆଦିଲ୍ଲୀ: ଧର୍ମ ପରିବର୍ତ୍ତନ କରି ମୁସଲିମ୍ ହୋଇଥିବା ଲୋକଙ୍କୁ ପୁରୁଣା ଜାତିଗତ ପରିଚୟ ଆଧାରରେ ଆରକ୍ଷଣ ନଦେବା ନେଇ ସୁପ୍ରିମ୍ କୋର୍ଟ ଦେଇଥିବା ରାୟ ବିରୋଧରେ ରିଭ୍ୟୁ ପିଟିସନ୍ ଦାଖଲ କରିବେ ତାମିଲନାଡୁର ଥଲପତି ବିଜୟ ସରକାର। ମଦ୍ରାସ ହାଇକୋର୍ଟଙ୍କ ରାୟକୁ କାଏମ୍ ରଖି ସର୍ବୋଚ୍ଚ ଅଦାଲତ କହିଥିଲେ ଯେ, ଧର୍ମ ପରିବର୍ତ୍ତନ ପରେ ପୁରୁଣା ଜାତିଗତ ପରିଚୟ ଆଧାରରେ ଆରକ୍ଷଣ ଦାବି କରାଯାଇପାରିବ ନାହିଁ।

ସୁପ୍ରିମ୍ କୋର୍ଟଙ୍କ ଗୁରୁତ୍ୱପୂର୍ଣ୍ଣ ରାୟ

ଅକ୍ଟୋବର ୧୫ ରେ ସୁପ୍ରିମ୍ କୋର୍ଟ ତାମିଲନାଡୁ ସରକାରଙ୍କ ଆବେଦନକୁ ଖାରଜ କରିଦେଇଥିଲେ। ବିଚାରପତି ପ୍ରଶାନ୍ତ କୁମାର ମିଶ୍ର ଏବଂ ବିଚାରପତି ଶ୍ରୀ ଚନ୍ଦ୍ରଶେଖରଙ୍କ ପୀଠ ସ୍ପଷ୍ଟ କରିଥିଲେ ଯେ:

• ହିନ୍ଦୁ ସାମାଜିକ ବ୍ୟବସ୍ଥାରୁ ଅନ୍ୟ ଧର୍ମକୁ ଗଲେ ପୁରୁଣା ଜାତି ଆଧାରରେ ସମ୍ବିଧାନର ଅନୁଚ୍ଛେଦ ୧୬(୪) ଅନୁଯାୟୀ ଆରକ୍ଷଣ ଅଧିକାର ସ୍ୱତଃ ମିଳିବ ନାହିଁ।

• ପୂର୍ବରୁ ସାମାଜିକ ସ୍ତରରେ ଅନଗ୍ରସର ଥିବା ବ୍ୟକ୍ତି ନୂଆ ଧର୍ମ ଗ୍ରହଣ କଲେ ତାହା ସେହି ନୂଆ ଧର୍ମର ସ୍ୱୀକୃତିପ୍ରାପ୍ତ ଅନଗ୍ରସର ବର୍ଗର ସଦସ୍ୟତା ବୋଲି ପ୍ରମାଣିତ ହୁଏନାହିଁ।

କିପରି ଆରମ୍ଭ ହୋଇଥିଲା ବିବାଦ?

୨୦୧୫ ରେ ସମୀର ଅହମ୍ମଦ (ପୂର୍ବନାମ ପରମାସିଭମ୍) ଇସଲାମ୍ ଗ୍ରହଣ କରିବା ପରେ 'ମୁସଲିମ୍ ଲେବ୍ବାଇ' ସମ୍ପ୍ରଦାୟର ସାର୍ଟିଫିକେଟ୍ ପାଇଁ ଆବେଦନ କରିଥିଲେ। ତହସିଲଦାର ତାହା ରଦ୍ଦ କରିବାରୁ ସେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ରାଜ୍ୟ ସରକାର ମଧ୍ୟ ୨୦୨୪ ମାର୍ଚ୍ଚ ୯ ରେ ଏକ ନିର୍ଦ୍ଦେଶନାମା (G.O.) ଜାରି କରି ଧର୍ମାନ୍ତରୀକରଣ ହୋଇଥିବା ଲୋକଙ୍କୁ ମୁସଲିମ୍ ଅନଗ୍ରସର ବର୍ଗର ପ୍ରମାଣପତ୍ର ଦେବାକୁ ବ୍ୟବସ୍ଥା କରିଥିଲେ। କିନ୍ତୁ ମଦ୍ରାସ ହାଇକୋର୍ଟ ଏହି ନିର୍ଦ୍ଦେଶନାମାକୁ ଅସାମ୍ବିଧାନିକ ଘୋଷଣା କରିଥିଲେ।

ବିଜୟ ସରକାରଙ୍କ ନୂଆ ଆଭିମୁଖ୍ୟ

ସୁପ୍ରିମ୍ କୋର୍ଟରୁ ଆବେଦନ ଖାରଜ ହେବା ପରେ ତାମିଲନାଡୁ ସରକାର ଏବେ ରିଭ୍ୟୁ ପିଟିସନ୍ ଦାଖଲ କରିବାକୁ ନିଷ୍ପତ୍ତି ନେଇଛନ୍ତି। ଏହାସହ ୨୦୨୭ ଆରମ୍ଭରେ ସାମାଜିକ ସ୍ଥିତିର ସର୍ଭେ କରାଇବାକୁ ଯୋଜନା ରଖାଯାଇଛି। ରାଜନୈତିକ ସମୀକ୍ଷକମାନେ ଏହାକୁ ଥଲପତି ବିଜୟଙ୍କ ଦଳ (TVK) ର ସଂଖ୍ୟାଲଘୁ ଓ ଅନଗ୍ରସର ଭୋଟବ୍ୟାଙ୍କ ମଜବୁତ୍ କରିବାର ଏକ ରଣନୀତି ଭାବେ ଦେଖୁଛନ୍ତି।

ନୂଆଦିଲ୍ଲୀ: ସୁପ୍ରିମ୍ କୋର୍ଟ ଏକ ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି କରି କହିଛନ୍ତି ଯେ, ସମ୍ପର୍କ ଶେଷ ହୋଇଯିବା ପରେ ପୂର୍ବର ପାରସ୍ପରିକ ସହମ୍ମତିପୂର୍ଣ୍ଣ ଶାରୀରିକ ସମ୍ପର୍କକୁ ଦୁଷ୍କର୍ମ ବୋଲି ଧରାଯାଇପାରିବ ନାହିଁ। କୋର୍ଟଙ୍କ ଅନୁଯାୟୀ, ଏପରି ମନୋଭାବ ପୁରୁଷଙ୍କ ସ୍ୱାଧୀନତା ଉପରେ ରୋକ୍ ଲଗାଏ, କାରଣ ଏହା ତାଙ୍କର ନିଜସ୍ୱ ଇଚ୍ଛା କିମ୍ବା ସ୍ୱାଧୀନତାକୁ ସମ୍ପୂର୍ଣ୍ଣ ସମାପ୍ତ କରିଦିଏ। ଏପରି ସ୍ଥିତିରେ, ଜଣେ ପୁରୁଷ ସବୁଦିନ ପାଇଁ ସେହି ସମ୍ପର୍କରେ ବାନ୍ଧିହୋଇ ରହିବାକୁ ବାଧ୍ୟ ହୋଇପାରନ୍ତି।

ସର୍ବୋଚ୍ଚ ଅଦାଲତ ସ୍ପଷ୍ଟ କରିଛନ୍ତି ଯେ, ଆଇନ ପ୍ରଣେତାମାନଙ୍କର କେବେବି ଏହି ଉଦ୍ଦେଶ୍ୟ ନଥିଲା ଯେ ପାରସ୍ପରିକ ସମ୍ମତିରୁ ଗଢ଼ିଉଠିଥିବା ପ୍ରେମ ସମ୍ପର୍କ ସମୟରେ ବୟସ୍କମାନଙ୍କ ମଧ୍ୟରେ ହୋଇଥିବା ଯୌନ ସମ୍ପର୍କକୁ, ସମ୍ପର୍କ ଶେଷ ହୋଇଯିବା ପରେ ଅତୀତରୁ ଲାଗୁ କରି ଅପରାଧ ବୋଲି ମାନିନିଆଯାଉ। ବିବାହର ମିଥ୍ୟା ପ୍ରତିଶ୍ରୁତି ଦେଇ ଯୌନ ସମ୍ପର୍କ ରଖିଥିବା ଅଭିଯୋଗରେ ଜଣେ ବ୍ୟକ୍ତିଙ୍କୁ ଦୁଷ୍କର୍ମ ମାମଲାରୁ ନିର୍ଦ୍ଦୋଷରେ ଖଲାସ କରିବା ଅବସରରେ ଦେଶର ଶୀର୍ଷ ଅଦାଲତ ଏହି ଗୁରୁତ୍ୱପୂର୍ଣ୍ଣ ଟିପ୍ପଣୀ ଦେଇଛନ୍ତି।

‘ସହମ୍ମତିର ସମ୍ପର୍କକୁ ଅପରାଧରେ ରୂପାନ୍ତରିତ କରିବା ଚିନ୍ତାଜନକ’

ବିଚାରପତି ବି.ଭି. ନାଗରତ୍ନା ଏବଂ ବିଚାରପତି ଆର୍. ମହାଦେବନଙ୍କ ବେଞ୍ଚ୍ ନିକଟ ଅତୀତରେ ଦେଖାଦେଇଥିବା ଏକ ଚିନ୍ତାଜନକ ପ୍ରବୃତ୍ତି ଆଡ଼କୁ ଅଙ୍ଗୁଳି ନିର୍ଦ୍ଦେଶ କରିଛନ୍ତି। କୋର୍ଟ କହିଛନ୍ତି ଯେ, ଭାଙ୍ଗିଯାଇଥିବା ସମ୍ମତିପୂର୍ଣ୍ଣ ସମ୍ପର୍କଗୁଡ଼ିକୁ ପରବର୍ତ୍ତୀ ସମୟରେ ଏପରି ଭାବେ ଯାଞ୍ଚ କରାଯାଉଛି, ଯେପରି ସେହି ଘଟଣାଗୁଡ଼ିକୁ ହିଂସା କିମ୍ବା ଯୌନ ନିର୍ଯାତନା ଭାବେ ଦର୍ଶାଯାଇପାରିବ।

ସୁପ୍ରିମ୍ କୋର୍ଟ ଶୁଣାଣି ସମୟରେ ଦୁଇଟି ସ୍ଥିତି ମଧ୍ୟରେ ସ୍ପଷ୍ଟ ପାର୍ଥକ୍ୟ ଦର୍ଶାଇଛନ୍ତି:

• ପ୍ରଥମ ସ୍ଥିତି: ଯେଉଁଠାରେ ସହମ୍ମତିର ଅଭାବ ଆରମ୍ଭରୁ ହିଁ ପ୍ରତାରଣା, ଛଳନା ଏବଂ ମିଥ୍ୟାର ଜାଲ ଉପରେ ଆଧାରିତ ଥିବ।

• ଦ୍ୱିତୀୟ ସ୍ଥିତି: ଯେଉଁଠାରେ ସମ୍ପର୍କ ଶେଷ ହେବା ପରେ ବ୍ୟକ୍ତିଙ୍କୁ ନିଜର ଅତୀତର ଯୌନ ସମ୍ପର୍କକୁ ନେଇ ଅନୁତାପ ହୋଇଥାଏ।

କୋର୍ଟଙ୍କ କହିବା କଥା ଯେ, ଦ୍ୱିତୀୟ ସ୍ଥିତି ଦୁର୍ଭାଗ୍ୟଜନକ ହୋଇପାରେ, କିନ୍ତୁ ଏହାକୁ ପାରସ୍ପରିକ ସମ୍ମତିପୂର୍ଣ୍ଣ ସମ୍ପର୍କକୁ ଅପରାଧ ମାନିବାର ଆଧାର କରାଯାଇପାରିବ ନାହିଁ। କିମ୍ବା ଏହା ଆଧାରରେ ଅପରାଧିକ ନ୍ୟାୟ ବ୍ୟବସ୍ଥାକୁ ସକ୍ରିୟ କରାଯାଇ ଅଭିଯୁକ୍ତଙ୍କ ସ୍ୱାଧୀନତା ଏବଂ ପ୍ରତିଷ୍ଠା ହାନି କରାଯାଇପାରିବ ନାହିଁ।

ପୁରୁଷଙ୍କ ବ୍ୟକ୍ତିଗତ ସ୍ୱାଧୀନତା ଓ ଅଧିକାର

ସର୍ବୋଚ୍ଚ ଅଦାଲତ କହିଛନ୍ତି ଯେ, ଏହିପ୍ରକାରର ମନୋଭାବ ପୁରୁଷଙ୍କ ସ୍ୱାଧୀନତା ଉପରେ ରୋକ୍ ଲଗାଏ, କାରଣ ଏହା ତାଙ୍କର ନିଜସ୍ୱ ଇଚ୍ଛା କିମ୍ବା ସ୍ୱାଧୀନତାକୁ ସମ୍ପୂର୍ଣ୍ଣ ଶେଷ କରିଦିଏ। ଏହାଦ୍ୱାରା ପରବର୍ତ୍ତୀ ସମୟରେ ଦୁଷ୍କର୍ମ ଅଭିଯୋଗ ଲାଗିବାର ଭୟରେ ଜଣେ ପୁରୁଷ ସବୁଦିନ ପାଇଁ ସେହି ସମ୍ପର୍କରେ ବାନ୍ଧିହୋଇ ରହିବାକୁ ବାଧ୍ୟ ହୋଇପାରନ୍ତି।

କୋର୍ଟ ପ୍ରଶ୍ନ ଉଠାଇଛନ୍ତି ଯେ, ଏପରି ପରିସ୍ଥିତିରେ କ’ଣ କୁହାଯାଇପାରିବ ଯେ ପୁରୁଷଙ୍କୁ ସମ୍ପର୍କରୁ ବାହାରିବାର କୌଣସି ଅଧିକାର ନାହିଁ? କ’ଣ ତାଙ୍କର ଏହି ନିଷ୍ପତ୍ତିକୁ ପ୍ରତାରଣା କିମ୍ବା ଠକେଇ କୁହାଯାଇପାରିବ? ଏହାର ଉତ୍ତରରେ କୋର୍ଟ କହିଛନ୍ତି- ସମ୍ପୂର୍ଣ୍ଣ ନୁହେଁ।

ଦୁଷ୍କର୍ମ ଆଇନର ଗାମ୍ଭୀର୍ଯ୍ୟ ରକ୍ଷା କରିବା ଜରୁରୀ

କୋର୍ଟ ସ୍ପଷ୍ଟ କରିଛନ୍ତି ଯେ, କେବଳ ସମ୍ପର୍କ ଖରାପ ହୋଇ ଭାଙ୍ଗିଯାଇଥିବା କାରଣରୁ ପୂର୍ବର ଶାରୀରିକ ସମ୍ପର୍କକୁ ଦୁଷ୍କର୍ମ ମାନିନିଆଯାଇପାରିବ ନାହିଁ। ଦୁଷ୍କର୍ମ ଏକ ଅତ୍ୟନ୍ତ ଗୁରୁତର ଅପରାଧ। ଏହାକୁ କେବଳ ସେହି ମାମଲାଗୁଡ଼ିକ ପାଇଁ ସଂରକ୍ଷିତ ରଖାଯିବା ଉଚିତ୍, ଯେଉଁଠାରେ ବାସ୍ତବରେ ଯୌନ ହିଂସା ହୋଇଥିବ, ଜୋର୍-ଜବରଦସ୍ତି କରାଯାଇଥିବ, କିମ୍ବା ସମ୍ମତି ହାସଲ କରିବାରେ କୌଣସି ପ୍ରତାରଣା କରାଯାଇଥିବ। ସମ୍ପର୍କ ବିଗିଡ଼ିଯିବା ପରେ ତାହାକୁ ଦୁଷ୍କର୍ମ ଅଭିଯୋଗରେ ବଦଳାଇଦେବା ଦ୍ୱାରା ଅପରାଧର ଗାମ୍ଭୀର୍ଯ୍ୟ କମିଯାଏ।

ଏହାସହ କୋର୍ଟ ଦୋହରାଇଛନ୍ତି ଯେ, ଦୁଷ୍କର୍ମ କୌଣସି ମହିଳାଙ୍କ ଶାରୀରିକ ସ୍ୱାଧୀନତା ଏବଂ ମର୍ଯ୍ୟାଦା ଉପରେ ଗଭୀର ଆଘାତ କରିଥାଏ। ଅନେକ ସମୟରେ ପୀଡ଼ିତାମାନେ ଲୋକଲଜ୍ଜା ଭୟରେ ନୀରବ ରହନ୍ତି। ସେଥିପାଇଁ ଯେଉଁଠାରେ ସ୍ପଷ୍ଟ ଭାବେ ଯୌନ ନିର୍ଯାତନା ଏବଂ ହିଂସା ହୋଇଥିବ, ସେଠାରେ କଠୋର କାର୍ଯ୍ୟାନୁଷ୍ଠାନ ହେବା ଆବଶ୍ୟକ। କିନ୍ତୁ କେବଳ ସମ୍ପର୍କ ଭାଙ୍ଗିଯିବା କାରଣରୁ ନ୍ୟାୟ ପ୍ରଣାଳୀର ଦୁରୁପଯୋଗ କରି କାହାକୁ ହଇରାଣ କରାଯିବା ଉଚିତ୍ ନୁହେଁ।

ଏମ୍ସ ଗୋରଖପୁରର କାର୍ଯ୍ୟକାରୀ ନିର୍ଦ୍ଦେଶକ ଡକ୍ଟର ବିଭା ଦତ୍ତାଙ୍କର ପ୍ରାଇଭେଟ୍ ହସ୍ପିଟାଲରେ ଚିକିତ୍ସା କରାଇବା ଖବର ସାମ୍ନାକୁ ଆସିଥିଲା। ଏହାପରେ ଏମ୍ସର ସ୍ୱାସ୍ଥ୍ୟ ସେବା ବ୍ୟବସ୍ଥା ଉପରେ ପ୍ରଶ୍ନ ଉଠିବାକୁ ଲାଗିଲା। ଏସବୁ ମଧ୍ୟରେ ଏବେ ଡକ୍ଟର ବିଭା ଦତ୍ତାଙ୍କ ଆନୁଷ୍ଠାନିକ ପକ୍ଷ ସାମ୍ନାକୁ ଆସିଛି। ଏକ ଘରୋଇ ନ୍ୟୁଜ୍ ଚ୍ୟାନେଲ ସହ କଥା  ହୋଇ କାର୍ଯ୍ୟକାରୀ ନିର୍ଦ୍ଦେଶକ ଡକ୍ଟର ବିଭା ଦତ୍ତା ସ୍ପଷ୍ଟ କରିଛନ୍ତି ଯେ ଡାକ୍ତରମାନଙ୍କୁ ହୃଦୟ ସହ ଜଡ଼ିତ କୌଣସି ଗୁରୁତର ସମସ୍ୟା (କ୍ୟାଥ୍ ଲ୍ୟାବ୍ର ଆବଶ୍ୟକତା) ର ସନ୍ଦେହ ହୋଇଥିଲା,ଯେଉଁଥିପାଇଁ ତାଙ୍କୁ ସାବଧାନତା କାରଣରୁ ପ୍ରାଇଭେଟ୍ ହସ୍ପିଟାଲକୁ ନିଆଯାଇଥିଲା। 

ଡକ୍ଟର ବିଭା ଦତ୍ତା ଜଣାଇଛନ୍ତି ଯେ ହଠାତ୍ ସ୍ୱାସ୍ଥ୍ୟାବସ୍ଥା ବିଗିଡ଼ିବାରୁ ସହକର୍ମୀମାନଙ୍କୁ ଲାଗିଲା ଯେ କାଳେ ହୃଦୟର କୌଣସି ଗୁରୁତର ସମସ୍ୟା ଥାଇପାରେ ଏବଂ କ୍ୟାଥ୍ ଲ୍ୟାବର ଆବଶ୍ୟକତା ପଡ଼ିପାରେ। ଯେହେତୁ ଏମ୍ସରେ କ୍ୟାଥ୍ ଲ୍ୟାବ୍ ନିର୍ମାଣାଧୀନ ଅଛି, ସେଥିପାଇଁ ସାବଧାନତା ବଶତଃ ସେମାନେ ତାଙ୍କୁ ପ୍ରାଇଭେଟ୍ ହସ୍ପିଟାଲକୁ ନେଇଯାଇଥିଲେ।

ସେ କହିଛନ୍ତି, "ପ୍ରାଇଭେଟ୍ ହସ୍ପିଟାଲରେ ଡାକ୍ତରମାନେ ମୋର ଟେଷ୍ଟ୍ ରିପୋର୍ଟ ଦେଖିଲେ, ଯାହା ସମ୍ପୂର୍ଣ୍ଣ ନର୍ମାଲ୍ ଥିଲା। ସେମାନେ କୌଣସି ଚିକିତ୍ସା କିମ୍ବା ଆଡ୍ମିଶନ୍ (ଭର୍ତ୍ତି) କଲେନାହିଁ ଏବଂ ଆମେ ମାତ୍ର ଆଧା ଘଣ୍ଟା ମଧ୍ୟରେ ସେଠାରୁ ଫେରିଆସିଲୁ।" ସେହିପରି, ଏମ୍ସରେ ଅତ୍ୟାବଶ୍ୟକ ‘କ୍ୟାଥ୍ ଲ୍ୟାବ୍’ର ଅନୁପଲବ୍ଧତା ଏବଂ ନିର୍ମାଣ ପ୍ରକ୍ରିୟା ଉପରେ ନିର୍ଦ୍ଦେଶକ ବିସ୍ତୃତ ସୂଚନା ଦେଇଛନ୍ତି। ଡକ୍ଟର ବିଭା ଦତ୍ତା ଜଣାଇଛନ୍ତି ଯେ କ୍ୟାଥ୍ ଲ୍ୟାବ୍ କୌଣସି ଛୋଟ ସେଟ୍ଅପ୍ ନୁହେଁ, ଏଥିରେ ବ୍ୟବହୃତ ହେଉଥିବା ଉପକରଣଗୁଡ଼ିକ ଅତ୍ୟନ୍ତ ମହଙ୍ଗା ଏବଂ ଅତ୍ୟାଧୁନିକ ହୋଇଥାଏ। ଏଥିପାଇଁ ସେ ମନ୍ତ୍ରଣାଳୟରୁ ୧୪ ରୁ ୧୫ କୋଟି ଟଙ୍କାର ସ୍ୱତନ୍ତ୍ର ବଜେଟ୍ ମାଗିଥିଲେ ଏବଂ ମଞ୍ଜୁରୀ ମଧ୍ୟ ମିଳିସାରିଛି।

‘ଗୋରଖପୁରର କୌଣସି ବି ସରକାରୀ ହସ୍ପିଟାଲରେ କ୍ୟାଥ୍ ଲ୍ୟାବ୍ ନାହିଁ’

ସେ ଦାବି କରିଛନ୍ତି ଯେ ଗୋରଖପୁରର କୌଣସି ବି ସରକାରୀ ହସ୍ପିଟାଲରେ କ୍ୟାଥ୍ ଲ୍ୟାବ୍ ନାହିଁ, କିନ୍ତୁ ଏମ୍ସରେ ଏହାର ପ୍ରତିଷ୍ଠା ପ୍ରକ୍ରିୟା ଶେଷ ପର୍ଯ୍ୟାୟରେ ଅଛି ଏବଂ ଡିସେମ୍ବର ୨୦୨୬ ସୁଦ୍ଧା ଏହା ସମ୍ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇଯିବ। ଏହାପରେ ଏଞ୍ଜିଓପ୍ଲାଷ୍ଟି, ଷ୍ଟଣ୍ଟ୍ ଏବଂ ପେସ୍ମେକର୍ ଲଗାଇବା ଭଳି ସମସ୍ତ କାମ ଏମ୍ସରେ ହିଁ ହେବ। ନିର୍ଦ୍ଦେଶକ କହିଛନ୍ତି ଯେ କାର୍ଡିଓଲୋଜି ସହ ଜଡ଼ିତ ବାକି ସମସ୍ତ ଜରୁରୀ ପରୀକ୍ଷାଗୁଡ଼ିକର ବ୍ୟବସ୍ଥା ଏମ୍ସ ଗୋରଖପୁରରେ ପୂର୍ବରୁ ସମ୍ପୂର୍ଣ୍ଣ ଭାବେ ଉପଲବ୍ଧ ରହିଛି।

ତାମିଲନାଡୁରେ କ୍ଷମତା ପରିବର୍ତ୍ତନ ପରେ ଆକ୍ସନ ମୋଡ୍‌ରେ ନୂଆ TVK ସରକାର। ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ଏବେ ସରକାରୀ ଚାକିରି ଆଶାୟୀଙ୍କ ପାଇଁ ନେଇଛନ୍ତି ବଡ଼ ନିଷ୍ପତ୍ତି। ସରକାରୀ ନିଯୁକ୍ତି ପାଇଁ ଆବେଦନ କରୁଥିବା ପ୍ରାର୍ଥୀଙ୍କ ବୟସ ସୀମାକୁ ୫ ବର୍ଷ ବୃଦ୍ଧି କରିବାକୁ ଘୋଷଣା କରିଛନ୍ତି ସେ। ଏହି ନିୟମ ଆଗାମୀ ୫ ବର୍ଷ ପର୍ଯ୍ୟନ୍ତ ଲାଗୁ ରହିବ।

ସରକାରଙ୍କ ପକ୍ଷରୁ ଜାରି ଅଧିକାରିକ ବିବୃତ୍ତି ଅନୁସାରେ, ପ୍ରତିଯୋଗିତାମୂଳକ ପରୀକ୍ଷା ଦେଉଥିବା ଚାକିରି ଆଶାୟୀଙ୍କ ଦାବିକୁ ବିଚାର କରି ମୁଖ୍ୟମନ୍ତ୍ରୀ ଏହି ନିଷ୍ପତ୍ତି ନେଇଛନ୍ତି। ପୂର୍ବରୁ ଲାଗୁ ଥିବା ବୟସ ସୀମା ସହ ଅତିରିକ୍ତ ୫ ବର୍ଷର ରିହାତି ମିଳିବ।

ଏହାଦ୍ୱାରା ଗ୍ରୁପ୍-୧ ଚାକିରି ପାଇଁ ସାଧାରଣ ବର୍ଗର ପ୍ରାର୍ଥୀଙ୍କ ବୟସ ସୀମା ୩୨ରୁ ୩୭ ବର୍ଷ ହେବ। ସେହିପରି ସଂରକ୍ଷିତ ବର୍ଗ ପାଇଁ ୩୭ରୁ ୪୨ ବର୍ଷକୁ ବୃଦ୍ଧି ପାଇବ। ଦିବ୍ୟାଙ୍ଗ ପ୍ରାର୍ଥୀଙ୍କ କ୍ଷେତ୍ରରେ ସାଧାରଣ ବର୍ଗର ବୟସ ସୀମା ୪୨ରୁ ୪୭ ବର୍ଷ ଏବଂ ସଂରକ୍ଷିତ ବର୍ଗ ପାଇଁ ୪୭ରୁ ୫୨ ବର୍ଷ ହେବ।

ସେହିପରି ଗ୍ରୁପ୍-୨ ଓ ଗ୍ରୁପ୍-୨ଏ ସେବା ପାଇଁ ସାଧାରଣ ବର୍ଗର ବୟସ ସୀମା ୩୦ରୁ ୩୫ ବର୍ଷ ଏବଂ ଦିବ୍ୟାଙ୍ଗ ସାଧାରଣ ବର୍ଗଙ୍କ ପାଇଁ ୪୦ରୁ ୪୫ ବର୍ଷକୁ ବୃଦ୍ଧି କରାଯିବ। ସରକାରଙ୍କ ଏହି ନିଷ୍ପତ୍ତି ଫଳରେ ବୟସ ସୀମା ଅତିକ୍ରମ କରିଥିବା ଅନେକ ଆଶାୟୀଙ୍କୁ ପୁଣିଥରେ ସରକାରୀ ଚାକିରି ପାଇଁ ସୁଯୋଗ ମିଳିବ।

ନୂଆଦିଲ୍ଲୀ: ବଦ୍ରିନାଥରୁ ଡେରାଡୁନ ଅଭିମୁଖେ ଆସୁଥିବା ହେଲିକପ୍ଟର କ୍ରାସ୍ ହେବା ଘଟଣାରେ ସମସ୍ତ ୬ ଜଣ ଯାତ୍ରୀଙ୍କର ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ ଜଣେ ପାଇଲଟ୍ ଏବଂ ୫ ଜଣ ଯାତ୍ରୀ ରହିଛନ୍ତି । କ୍ୟାପଟେନ୍ ହିମାଂଶୁ ଓ ୫ ଜଣ ଯାତ୍ରୀ ପ୍ରଥାପା, ଅରୁଣ. ଶଙ୍କର ଗୌଡ଼ା, ସୁଧୀର କେ ଏବଂ ଏସଏସ ନଟରାଜ । ସମସ୍ତ ଯାତ୍ରୀ ବେଙ୍ଗାଲୁରୁରୁ ଉତ୍ତରାଖଣ୍ଡ ବୁଲିବାକୁ ଆସିଥିଲେ । ଏ ନେଇ ଉତ୍ତରାଖଣ୍ଡ ସରକାରଙ୍କ ପକ୍ଷରୁ ସୂଚନା ଦିଆଯାଇଛି । 

ଶୁକ୍ରବାର ଦିନ ଖରାପ ପାଗ ସତ୍ତ୍ୱେ ବଦ୍ରିନାଥକୁ ବିମାନ ଚଳାଚଳ ଜାରି ରହିଥିଲା। ଅପରାହ୍ନ ୧:୧୨ ସମୟରେ ହେଲିକପ୍ଟରଟି ଡେରାଡୁନ୍ ଅଭିମୁଖେ ଉଡ଼ାଣ ଭରି ଥିଲା । କିନ୍ତୁ ହଠାତ ଏହା ଆକାଶରେ ନିଖୋଜ ହୋଇଗଲା।

ଜୋଶୀନାଥ ଅନ୍ତର୍ଗତ ଚାଇ ଗ୍ରାମ ନିକଟରେ ହେଲିକପ୍ଟରଟି ଦୁର୍ଘଟଣାଗ୍ରସ ହୋଇଥିବା ଜଣାପଡ଼ିଥିଲା । ତୁରନ୍ତ ସେନା, ଏସଡିଆରଏଫ୍ ଏବଂ ଏନଡିଆରଏଫ୍ ଟିମ ଉଦ୍ଧାର କାର୍ଯ୍ୟରେ ଲାଗି ଯାଇଥିଲେ । ତେବେ ସମସ୍ତ ଯାତ୍ରୀଙ୍କର ମୃତ୍ୟୁ ହୋଇଥିବା ବିପର୍ଯ୍ୟୟ ପରିଚାଳନା ବିଭାଗର ଅଧିକାରୀ  ସୂଚନା ଦେଇଛନ୍ତି । 

ବଦ୍ରିନାଥ ଏବଂ ଯୋଶୀମଠ ନିକଟସ୍ଥ ପାଣ୍ଡୁକେଶ୍ୱରର 'ଭେଦ ଗଡେରା' ନିକଟ ଏକ ପାହାଡ଼ିଆ ଅଞ୍ଚଳରେ ଏହି ଘଟଣା ଘଟିଥିବା ସୂଚନା ମିଳିଛି। ହେଲିକପ୍ଟରଟି 'ଟ୍ରାନ୍ସ ଭାରତ' (Trans Bharat) ନାମକ କମ୍ପାନୀ ଦ୍ୱାରା ପରିଚାଳିତ ହେଉଥିଲା । 

ନୂଆଦିଲ୍ଲୀ: ଉତ୍ତରଖଣ୍ଡରେ ଏକ ହେଲିକପ୍ଟର ମଝି ଆକାଶରେ ଅନ୍ତର୍ଦ୍ଧ୍ୟାନ ହୋଇଯାଇଛି । ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଥିବା ଜଣାପଡ଼ିଛି । ସେଥିରେ ୬ ଜଣ ଯାତ୍ରୀ ଥିବାବେଳେ ସେମାନଙ୍କ ସ୍ଥିତି ସମ୍ପର୍କରେ କୌଣସି ସୂଚନା ମିଳିପାରି ନାହିଁ । ଶୁକ୍ରବାର ବଦ୍ରିନାଥରୁ ଡୋରାଡୁନ ଆସୁଥିବାବେଳେ ଦୁର୍ଘଟଣା ଘଟିଥିବା ଜଣାପଡ଼ିଛି । 

ପ୍ରାଥମିକ ସୂଚନାରୁ ହେଲିକେପ୍ଟରଟି ନିଖୋଜ ହୋଇଯାଇଥିବା ଅନୁମାନ କରାଯାଇଥିଲା । ପରେ ଜୋଶୀନାଥ ଅନ୍ତର୍ଗତ ଚାଇ ଗ୍ରାମ ନିକଟରେ ହେଲିକପ୍ଟରକୁ ଖୋଜିବାକୁ ଟିମ୍ ମୁତୟନ କରାଯାଇଥିଲା । ହେଲିକପ୍ଟରଟି ଦୁର୍ଘଟଣାଗ୍ରସ ହୋଇଥିବା ଜଣାପଡ଼ିଛି । ହେଲିକପ୍ଟରରେ ୫ ଜଣ ଯାତ୍ରୀ ଓ ଜଣେ ପାଇଲଟ୍ ଥିଲେ ବୋଲି ଚମୋଲୀ ଜିଲ୍ଲାପାଳ ସୂଚନା ଦେଇଛନ୍ତି । କ୍ୟାପଟେନ୍ ହିମାଂଶୁ ଓ ପ୍ରଥାପା, ଅରୁଣ. ଶଙ୍କର ଗୌଡ଼ା, ସୁଧୀର କେ ଏବଂ ଏସଏସ ନଟରାଜ । 

ସେଠାରେ ସର୍ଚ୍ଚ ଅପରେସନ୍ ଚାଲିଥିବାର ମୁଖ୍ୟମନ୍ତ୍ରୀ ପୁଷ୍କର ସିଂ ଧାମୀ ସୂଚନା ଦେଇଛନ୍ତି । ସେ କହିଲେ, "ଜୋଶୀମଠର ଚାଇ ଗାଁ ନିକଟରେ ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିବାର ଦୁଃଖଦ ଖବର ପାଇଛି। ଜିଲ୍ଲା ପ୍ରଶାସନ, ବିପର‌୍ୟ୍ୟୟ ପରିଚାଳନା ବିଭାଗ ଏବଂ ଏସଡିଆରଏଫ୍ ଦ୍ୱାରା ମିଳିତ ଭାବେ ଉଦ୍ଧାର କାର‌୍ୟ୍ୟ ଚାଲିଛି। ସେ ବ୍ୟକ୍ତିଗତ ଭାବେ ସମଗ୍ର ପରିସ୍ଥିତି ଉପରେ ନଜର ରଖିଛି । ଗୁରୁତର ଆହତ ବ୍ୟକ୍ତିମାନଙ୍କୁ ଉନ୍ନତ ଚିକିତ୍ସା ପାଇଁ ତୁରନ୍ତ ହେଲିକପ୍ଟର ଯୋଗେ ଉନ୍ନତ ଚିକିତ୍ସା କେନ୍ଦ୍ରକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦିଆଯାଇଛି । ମୁଖ୍ୟମନ୍ତ୍ରୀ ଧାମୀ ସମସ୍ତ ଯାତ୍ରୀଙ୍କ ସୁରକ୍ଷା କାମନା କରିଛନ୍ତି । 

ଖରାପ ପାଗ ସତ୍ତ୍ୱେ, ଶୁକ୍ରବାର ଦିନ ବଦ୍ରିନାଥକୁ ବିମାନ ଚଳାଚଳ ଜାରି ରହିଥିଲା। ଅପରାହ୍ନ ୧:୦୫ ସମୟରେ ଏକ ହେଲିକପ୍ଟର ଉଡ଼ାଣ ଆରମ୍ଭ କରି ଡେରାଡୁନ୍‌ରେ ପହଞ୍ଚିଲା। ଅପରାହ୍ନ ୧:୧୨ ସମୟରେ ଦ୍ୱିତୀୟ ହେଲିକପ୍ଟରଟି ଡେରାଡୁନ୍ ଅଭିମୁଖେ ବାହାରିଲା । କିନ୍ତୁ ଏହା ନିଖୋଜ ହୋଇଗଲା। ଅପରାହ୍ନ ୧:୨୦ ସମୟରେ ଆଉ ଏକ ହେଲିକପ୍ଟର ବଦ୍ରିନାଥରୁ ଉଡ଼ାଣ ଆରମ୍ଭ କଲା ।  ଏହା ସୁରକ୍ଷିତ ଭାବେ ଡେରାଡୁନ୍‌ରେ ପହଞ୍ଚିଥିଲା।

ଦିଲ୍ଲୀରେ ବଢ଼ୁଥିବା ବାୟୁ ପ୍ରଦୂଷଣ ଉପରେ ଲଗାମ ଲଗାଇବାକୁ ଟ୍ରାଫିକ୍ ନିୟମକୁ ଆହୁରି କଡ଼ାକଡ଼ି କରିଛନ୍ତି ସରକାର। ନଭେମ୍ବର ୧, ୨୦୨୬ରୁ ରାଜଧାନୀରେ ଲାଗୁ ହେବ ସଂଶୋଧିତ ଗ୍ରେଡେଡ୍ ରେସପନ୍ସ ଆକ୍ସନ ପ୍ଲାନ୍ (GRAP)। ଏହା ଅନୁସାରେ କେତେକ ବର୍ଗର ଗାଡ଼ି ଦିଲ୍ଲୀରେ ପ୍ରବେଶ କରିପାରିବେ ନାହିଁ। ତେଣୁ ଦିଲ୍ଲୀ ଯିବା ପୂର୍ବରୁ ନିଜ ଗାଡ଼ିର ଯୋଗ୍ୟତା ଯାଞ୍ଚ କରିବାକୁ ଗାଡ଼ି ଚାଳକଙ୍କୁ ପରାମର୍ଶ ଦେଇଛି ଦିଲ୍ଲୀ ଟ୍ରାଫିକ୍ ପୋଲିସ।

ଟ୍ରାଫିକ୍ ପୋଲିସର ସୂଚନା ଅନୁସାରେ, BS-VI ମାନଦଣ୍ଡ ପୂରଣ କରୁଥିବା ଗାଡ଼ି, CNG ଓ ଇଲେକ୍ଟ୍ରିକ୍ ଯାନ ସହ ନିୟମ ଅନୁଯାୟୀ ଛାଡ଼ ପାଇଥିବା ଗାଡ଼ିକୁ ଦିଲ୍ଲୀରେ ପ୍ରବେଶ ଅନୁମତି ମିଳିବ। ଅନ୍ୟପଟେ BS-VI ମାନଦଣ୍ଡ ପୂରଣ କରୁନଥିବା ଗାଡ଼ି ଏବଂ ବୈଧ ପଲ୍ୟୁସନ୍ ଅଣ୍ଡର କଣ୍ଟ୍ରୋଲ୍ (PUCC) ସାର୍ଟିଫିକେଟ୍ ନଥିବା ଗାଡ଼ି ଉପରେ କଟକଣା ଲାଗିବ। ନିୟମ ପାଳନ କରୁନଥିବା ଆନ୍ତଃରାଜ୍ୟ ବସ୍ ମଧ୍ୟ ଦିଲ୍ଲୀରେ ପ୍ରବେଶ କରିପାରିବେ ନାହିଁ।

ସେହିପରି ଦିଲ୍ଲୀକୁ ଗନ୍ତବ୍ୟସ୍ଥଳ ଭାବେ ନେଇନଥିବା ଟ୍ରକ୍‌ଗୁଡ଼ିକୁ ସହର ଭିତରକୁ ପ୍ରବେଶ ନକରି ପେରିଫେରାଲ୍ ଏକ୍ସପ୍ରେସୱେ ବ୍ୟବହାର କରିବାକୁ ପଡ଼ିବ। ଟ୍ରାକ୍ଟର, ଜୁଗାଡ଼ ଗାଡ଼ି ଏବଂ ନିର୍ଦ୍ଦିଷ୍ଟ ବର୍ଗର ଦିଲ୍ଲୀ ବାହାରେ ପଞ୍ଜୀକୃତ ଗାଡ଼ି ଉପରେ ମଧ୍ୟ କଟକଣା ରହିବ।

ଏନେଇ Xରେ ସୂଚନା ଦେବା ସହ ଯାତ୍ରା ପୂର୍ବରୁ ଗାଡ଼ିର ଯୋଗ୍ୟତା ଯାଞ୍ଚ କରିବାକୁ ଦିଲ୍ଲୀ ଟ୍ରାଫିକ୍ ପୋଲିସ ପରାମର୍ଶ ଦେଇଛି। ଅଧିକ ସୂଚନା ଓ ସହାୟତା ପାଇଁ ୦୧୧-୨୫୮୪୪୪୪୪ ଏବଂ ୧୦୯୫ ହେଲ୍ପଲାଇନ୍ ନମ୍ବର ଜାରି କରାଯାଇଛି।

ଅନ୍ୟପଟେ, ନିୟମ ଉଲ୍ଲଂଘନକାରୀଙ୍କ ବିରୋଧରେ ପୋଲିସର ଯାଞ୍ଚ ମଧ୍ୟ ଜୋରଦାର ହୋଇଛି। ଅକ୍ଟୋବର ୨୭ରେ ଦିଲ୍ଲୀର ସୀମାନ୍ତ ଅଞ୍ଚଳରେ ଉତ୍ତର ରେଞ୍ଜ ଟ୍ରାଫିକ୍ ପୋଲିସ ପକ୍ଷରୁ ସ୍ୱତନ୍ତ୍ର ଅଭିଯାନ ଚଳାଯାଇଥିଲା। ଏହି ସମୟରେ ନକଲି No Entry Permission (NEP) ବ୍ୟବହାର କରୁଥିବା ତିନୋଟି ବାଣିଜ୍ୟିକ ଗାଡ଼ି ଧରାପଡ଼ିଥିଲା। ସେମାନଙ୍କ ବିରୋଧରେ ଭାରତୀୟ ନ୍ୟାୟ ସଂହିତା (BNS)ର ଧାରା ୩୧୮(୨) ଏବଂ ୩୪୦(୨) ଅନୁଯାୟୀ ତିନୋଟି ଏଫଆଇଆର୍ ରୁଜୁ ହୋଇଛି।

ଉଲ୍ଲେଖଯୋଗ୍ୟ, ଦିଲ୍ଲୀର ବାୟୁ ଗୁଣବତ୍ତା 'Poor' ବର୍ଗକୁ ଖସିବା ପରେ ଅକ୍ଟୋବର ୨୧ରୁ CAQM ପକ୍ଷରୁ GRAPର ପ୍ରଥମ ପର୍ଯ୍ୟାୟ ଲାଗୁ କରାଯାଇଥିଲା। ଏବେ ପ୍ରଦୂଷଣ ନିୟନ୍ତ୍ରଣ ପାଇଁ ନୂଆ କଟକଣା ସହ ଯାଞ୍ଚକୁ ଆହୁରି କଡ଼ାକଡ଼ି କରିବାକୁ ଯୋଜନା ରହିଛି।

From 1 November 2026, vehicle entry into Delhi will be restricted under the revised GRAP rules. ✅ Allowed: BS-VI, CNG, electric and exempted vehicles, subject to applicable rules. ⛔ Restrictions apply to: * Vehicles below BS-VI standards * Vehicles without a valid PUCC * Non-compliant interstate buses * Trucks not destined for Delhi (use peripheral expressways) * Tractors and jugaad vehicles, as applicable * Certain vehicles registered outside Delhi 📅 Check your vehicle’s eligibility before travelling and follow official traffic advisories. 📞 Traffic Helpline: 011-25844444 / 1095 #DTPUpdates #GRAP2026

— Delhi Traffic Police (@dtptraffic) October 29, 2026

ଲକ୍ଷ୍ନୌ: କେନ୍ଦ୍ର ମନ୍ତ୍ରୀ ଅମିତ ଶାହ ଉତ୍ତର ପ୍ରଦେଶରେ ଏକ ଦଳୀୟ କାର୍ଯ୍ୟକ୍ରମରେ ଯୋଗ ଦେବା ଅବସରରେ ବଡ଼ ଘୋଷଣା କରିଛନ୍ତି । ଉତ୍ତର ପ୍ରଦେଶ ତୃତୀୟ ଥର ପାଇଁ ବିଜେପି ସରକାରକୁ ଆସିଲେ 'ୟୁନିଫର୍ମ ସିଭିଲ୍ କୋଡ୍' (UCC) ବା ସମାନ ନାଗରିକ ସଂହିତା ଲାଗୁ କରାଯିବ ବୋଲି ଶାହ ପ୍ରତିଶ୍ରୁତି ଦେଇଛନ୍ତି । 

ଭାରତୀୟ ଜନତା ପାର୍ଟି ର ଶୀର୍ଷ ନେତୃତ୍ୱ ୨୦୨୭ ଉତ୍ତର ପ୍ରଦେଶ ବିଧାନସଭା ନିର୍ବାଚନ ପାଇଁ ପ୍ରସ୍ତୁତିକୁ ଜୋରଦାର କରିଛନ୍ତି । ଦଳର ମୁଖ୍ୟ ରଣନୀତିଜ୍ଞ ଭାବେ ବିବେଚିତ ଅମିତ ଶାହଙ୍କ ତତ୍ତ୍ୱାବଧାନରେ, ବିଜେପି ନିଜର ନିର୍ବାଚନ ପ୍ରଚାରକୁ ଅଧିକ ପ୍ରଭାବଶାଳୀ କରିବା ପାଇଁ ସାଙ୍ଗଠନିକ କାର୍ଯ୍ୟକଳାପକୁ ତ୍ୱରାନ୍ୱିତ କରିଛି । ବିଜେପି କାର୍ଯ୍ୟକାରିଣୀ କମିଟିର ଏକ ବୈଠକ ଉଦ୍‌ଘାଟନ କରିବା ପାଇଁ କେନ୍ଦ୍ର ମନ୍ତ୍ରୀ ଶାହ ଲକ୍ଷ୍ନୌରେ ପହଞ୍ଚିଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, ରାଜ୍ୟ ସଭାପତି ପଙ୍କଜ ଚୌଧୁରୀ, ରାଜ୍ୟ ସାଧାରଣ ସମ୍ପାଦକ (ସଙ୍ଗଠନ) ଧର୍ମପାଲ ସିଂହ, ରାଜ୍ୟ ପ୍ରଭାରୀ ବିନୋଦ ତାୱଡେ ଏବଂ ଉପ-ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଓ ବ୍ରଜେଶ ପାଠକ ମଧ୍ୟ ଉପସ୍ଥିତ ଥିଲେ।

ଦଳର ବରିଷ୍ଠ ନେତାମାନଙ୍କ ଉପସ୍ଥିତିରେ, ଶାହ ଉତ୍ତର ପ୍ରଦେଶ ବିଜେପି ଟିମ୍‌ରେ ଉତ୍ସାହ ଭରିଦେଇଛନ୍ତି। ସେ ଘୋଷଣା କରିଛନ୍ତି ଯେ ଯଦି ରାଜ୍ୟରେ ବିଜେପି କ୍ରମାଗତ ତୃତୀୟ ଥର ପାଇଁ କ୍ଷମତାକୁ ଆସେ ରାଜ୍ୟରେ ୟୁସିସି ଲାଗୁ କରାଯିବ । 

ଶାହ କହିଛନ୍ତି ଯେ ଅନ୍ୟ କେତେକ ରାଜ୍ୟରେ ୟୁସିସି ପୂର୍ବରୁ ହିଁ ଲାଗୁ ହୋଇସାରିଛି ଏବଂ ବର୍ତ୍ତମାନ ଉତ୍ତର ପ୍ରଦେଶର ପାଳି ଆସିଛି। ସେ ବିଜେପି ସରକାର ଗଠନ କରିବାକୁ ଜନତାଙ୍କୁ ଆହ୍ୱାନ ଦେଇଛନ୍ତି ଏବଂ ପ୍ରତିଶ୍ରୁତି ଦେଇଛନ୍ତି ଯେ ଏହା ପରେ ୟୁସିସି ଲାଗୁ କରାଯିବ।

ପୂର୍ବରୁ ୟୁସିସି ଗୁଜରାଟ ଓ ଆସାମରେ ଲାଗୁ ହୋଇ ସାରିଛି । ୟୁସିସି ଲାଗୁ ହେବା ପରେ ରାଜ୍ୟରେ ସମସ୍ତ ସମ୍ପ୍ରଦାୟ ପାଇଁ ବିବାହ, ଛାଡ଼ପତ୍ର, ଉତ୍ତରାଧିକାରୀ ଏବଂ ଲିବ୍ ଇନ୍ ରିଲେସନସିପ୍ ପାଇଁ ସମାନ ନିୟମ ଲାଗୁ ହେବ । ପଞ୍ଜିକୃତ ହେବ ଲିଭ୍-ଇନ୍ ରିଲେସନସିପ୍, ସମସ୍ତ ଧର୍ମରେ ବିବାହ ପଞ୍ଜିକରଣ ବାଧ୍ୟତା ମୂଳକ, ସବୁ ଧର୍ମରେ ବିବାହ ବୟସ ସମାନ ଏବଂ ଉତ୍ତରାଧିକାରୀ ପାଇଁ ସମାନ ନିୟମ ଲାଗୁ ହେବ । 

ଅହମ୍ମଦାବାଦ: ଦେଶର ଯୁବଶକ୍ତି ବିକଶିତ ଭାରତ ନିର୍ମାଣ କରିବାକୁ ଚାହୁଁଛନ୍ତି । କିନ୍ତୁ ଦୁର୍ଭାଗ୍ୟର ବିଷୟ କିଛି ଲୋକଙ୍କୁ ଏହା ପସନ୍ଦ ଆସୁନାହିଁ । ଦେଶରେ ସଙ୍କଟ ଆସିଲେ ସେମାନଙ୍କୁ ଖୁସି ମିଳୁଛି । ଆଜି ଗୁଜରାଟ ବନାସକାଣ୍ଠାରେ ବିଭିନ୍ନ ଲୋକାଭିମୁଖି ଯୋଜନାର ଶୁଭାରମ୍ଭ କରିବା ଅବସରରେ ବିରୋଧୀଙ୍କ ଉପରେ ଏମିତି ବର୍ଷିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । 

ପ୍ରଧାନମନ୍ତ୍ରୀ ତାଙ୍କର ଅଭିଭାଷଣରେ ଦେଶରେ ଆସୁଥିବା ସଙ୍କଟବେଳେ ବିରୋଧୀଙ୍କ ଆଭିମୁଖ୍ୟକୁ କଡ଼ା ସମାଲୋଚନା କରିଛନ୍ତି । ମୋଦୀ କହିଛନ୍ତି ଯେ ଦେଶରେ ଯେତେବେଳେ ସଙ୍କଟ ଆସେ, କିଛି ଲୋକ ଖୁସୀ ହୁଅନ୍ତି । ଏଭଳି ଲୋକ ଦେଶକୁ ଅସୁବିଧାରେ ଦେଖିବାକୁ ଚାହୁଁଛନ୍ତି । ଇରାନ ଓ ପଶ୍ଚିମ ଏସିଆରେ ଯୁଦ୍ଧ ସମୟରେ ଯେତେବେଳେ ସାରା ଦେଶ ଏକଜୁଟ ହୋଇ ସଙ୍କଟର ସାମ୍ନା କରୁଥିଲା, ସେତେବେଳେ କିଛି ଲୋକ ଗୁଜବ ସୃଷ୍ଟି କରିବାରେ ଲାଗିଥିଲେ । ଚାଷୀଙ୍କୁ ଖତ ମିଳିବ ନାହିଁ ଏବଂ ମହିଳାଙ୍କୁ ଗ୍ୟାସ ମିଳିବ ନାହିଁ କହି ଡରାଉଥିଲେ । ତାଙ୍କର କେବଳ ଗୋଟିଏ ଉଦ୍ଦେଶ୍ୟ, ଦେଶରେ ଅରାଜକତା ସୃଷ୍ଟି କରିବା, କାରଣ ମୋଦୀକୁ ବଦନାମ କରିପାରିବେ । 

ମୋଦୀ ବିରୋଧୀଙ୍କ ନାଁ ନେଇ କହିଛନ୍ତି ଯେ ଯୁଦ୍ଧ ଏବେବି ଜାରି ରହିଛି, କିନ୍ତୁ ଭାରତ ଏବେବି ଏକଜୁଟ ହୋଇ ଏହାର ସାମ୍ନା କରୁଛି । ସରକାର ଚାଷୀଙ୍କୁ କୌଣସି ଅସୁବିଧାରେ ସମ୍ମୁଖୀନ ହେବାକୁ ଦେଇ ନାହାଁନ୍ତି । ଚାଷୀଙ୍କୁ ଆଜି ବି ୩୦୦ ଟଙ୍କାରେ ଖତ ଦିଆଯାଉଛି । 

ପ୍ରଧାନମନ୍ତ୍ରୀ କହିଛନ୍ତି ଯେ ଦେଶର ଯୁବବର୍ଗ ଏକ ବିକଶିତ ଭାରତ ଗଠନ କରିବାକୁ ଆଶା ରଖିଛନ୍ତି, କିନ୍ତୁ ଦୁର୍ଭାଗ୍ୟବଶତଃ କିଛି ଲୋକଙ୍କୁ ଏହା ପସନ୍ଦ ନୁହେଁ। ବିକାଶ ଦିଗରେ କରାଯାଉଥିବା ପ୍ରତ୍ୟେକ ପ୍ରୟାସର ଲକ୍ଷ୍ୟ ହେଉଛି ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା। ସେ ଆହୁରି ମଧ୍ୟ କହିଛନ୍ତି ଯେ, ଅନିଶ୍ଚିତତାରେ ଭରପୂର ଏହି ବିଶ୍ୱ ପରିସ୍ଥିତି ମଧ୍ୟରେ ସମଗ୍ର ବିଶ୍ୱ ଭାରତର ଦ୍ରୁତ ଅଗ୍ରଗତିକୁ ଦେଖୁଛି।

ବନାସକାଣ୍ଠାରେ ଆୟୋଜିତ ଏକ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦୀ ୧୪,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିକାଶମୂଳକ ପ୍ରକଳ୍ପଗୁଡ଼ିକର ଉଦ୍‌ଘାଟନ ଓ ଭିତ୍ତିପ୍ରସ୍ତର ସ୍ଥାପନ କରିଛନ୍ତି। ଏହି ଅବସରରେ ସେ 'ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି'ର ୨୪ତମ କିସ୍ତି ମଧ୍ୟ କୃଷକମାନଙ୍କ ଖାତାକୁ ପ୍ରଦାନ କରିଛନ୍ତି । ପ୍ରାୟ ୪.୫ ଲକ୍ଷ କୋଟି ଟଙ୍କା କ୍ଷୁଦ୍ର ଚାଷୀମାନଙ୍କ ବ୍ୟାଙ୍କ ଖାତାକୁ ସିଧାସଳଖ ହସ୍ତାନ୍ତର କରାଯାଇଛି।