ଭୁବନେଶ୍ୱର: ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ (FSSAI) କ୍ଷୀର ପ୍ୟାକେଟର୍ ପରିବର୍ତ୍ତନ କରିବାକୁ ଯାଉଛି । ଏଣିକି ନୂତନ ପ୍ୟାକେଜିଂର ଆସିବ କ୍ଷୀର । ଯେଉଁଥିରେ ଏକ ସ୍ୱତନ୍ତ୍ର ରହିବା ବାଧ୍ୟତାମୂଳକ । ପ୍ୟାକେଟର ସାଇଜ୍ ହିସାବରେ ଲୋଗୋର ଆକାର ମଧ୍ୟ ଭିନ୍ନ ଭିନ୍ନ ରହିବ । 

ନଭେମ୍ବର ୬ ତାରିଖରେ FSSAI ଦ୍ୱାରା ଏ ନେଇ ବିଜ୍ଞପ୍ତି ଜାରି କରିଛି । ନଭେମ୍ବର ୯ ତାରିଖରେ ଭାରତ ରାଜପତ୍ରରେ ପ୍ରକାଶିତ ତଥ୍ୟ ଅନୁସାରେ  ଏହି ନୂତନ ନିୟମ ୧ ଜୁଲାଇ, ୨୦୨୮ରେ ସମସ୍ତ ଦୁଗ୍ଧ କମ୍ପାନୀ ପାଇଁ ଲାଗୁ କରାଯିବ । ଏ ନେଇ ୨୦୨୫ରେ ମଧ୍ୟ ଏକ ବିଜ୍ଞପ୍ତି ପ୍ରକାଶ ପାଇଥିଲା । ୬୦ ଦିନ ଦିନ ମଧ୍ୟରେ ନିଜର ଆପତ୍ତି ଅଭିଯୋଗ ଜଣାଇବାକୁ ସମୟ ଦିଆଯାଇଥିଲା । ସମସ୍ତ ପରାମର୍ଶ ଓ ଅଭିଯୋଗକୁ ଭିତ୍ତି କରି FSSAI ନୂତନ ସଂଶୋଧିତ ବିଜ୍ଞପ୍ତି ଜାରି କରିଛି । 

ନୂତନ ନିୟମ ଆଧାରରେ କ୍ଷୀର ପ୍ୟାକେଟ୍ ଉପରେ ଉତ୍ପାଦର ସମ୍ପୂର୍ଣ୍ଣ ବିବରଣୀ ରହିଛି । ଏହା ସହିତ ଏକ ସ୍ୱତନ୍ତ୍ର ଲୋଗୋ ମଧ୍ୟ ରହିବ । ନୂତନ ଲୋଗୋର ଡିଜାଇନ୍ ମଧ୍ୟ ସ୍ଥିର ହୋଇସାରିଛି, ଯେଉଁଥିରେ ନୀଳ ରଙ୍ଗର ଏକ ବର୍ଗାକାର ଚିତ୍ର ରହିବ ଓ ସେଥିରେ ଧଳା ରଙ୍ଗର କ୍ଷୀର ବୁନ୍ଦା ରହିବ । ଦୁଗ୍ଧ ଉତ୍ପାଦ କମ୍ପାନୀମାନେ ଏହି ନିର୍ଦ୍ଦିଷ୍ଟ ଲୋଗୋକୁ ନିଜର ପ୍ୟାକେଟରେ ରଖିବେ । ସେହିପରି ପ୍ରତି ପ୍ୟାକେଟର ଆକାର ଅନୁଯାୟୀ ପାଇଁ ଭିନ୍ନ ଭିନ୍ନ ଆକାର ଲୋଗୋ ରହିବ । ଯେପରିକି ୧୦୦ ବର୍ଗ ସେମି ପ୍ୟାକେଟ୍ ପାଇଁ ୬ ମିମି, ୧୦୦ରୁ ୫୦୦ ବର୍ଗ ସେମି ପାଇଁ ୮ ମିମି, ୫୦୦ରୁ ୨୫୦୦ ବର୍ଗ ସେମି ପାଇଁ ୧୨ ମିମି ଏବଂ ୨୫୦୦ ବର୍ଗ ସେମି ଅଧିକ ଆକାର ପ୍ୟାକେଟ୍ ପାଇଁ ୧୬ ମିମି ଆକାରର ଲୋଗୋ ରହିବ । କମ୍ପାନୀମାନେ ଧାର୍ଯ୍ୟ ଆକାର ଲୋଗୋ ଠାରୁ ବଡ଼ ଆକାର ଲୋଗୋ ବ୍ୟବହାର କରିପାରିବେ କିନ୍ତୁ ତା ଠାରୁ ଛୋଟ ଆକାରର ଲୋଗୋ ବ୍ୟବହାର କରିପାରିବେ ନାହିଁ ବୋଲି FSSAIର ନିର୍ଦ୍ଦେଶ ରହିଛି । 

ବିଶ୍ୱର ସବୁଠାରୁ ବଡ଼ ଟେକ୍ କମ୍ପାନୀ ମଧ୍ୟରୁ ଗୋଟିଏ, Nvidia, ବର୍ତମାନ ଏହାର ବ୍ୟବସାୟ ଅପେକ୍ଷା ନିଜ CEO ଜେନସେନ୍ ହୁଆଙ୍ଗଙ୍କ ପାଇଁ ଅଧିକ ଚର୍ଚ୍ଚାରେ ରହିଛି। ହୁଆଙ୍ଗ ସମ୍ପ୍ରତି ତାଙ୍କ ପତ୍ନୀଙ୍କ ପ୍ରତି ବିଶ୍ୱାସଘାତକତା ସ୍ୱୀକାର କରିଛନ୍ତି ଏବଂ କମ୍ପାନୀର କର୍ମଚାରୀମାନଙ୍କୁ କ୍ଷମା ମାଗିଛନ୍ତି। ଆମେରିକାର ଗୁଇନ୍ଦା ସଂସ୍ଥାଗୁଡ଼ିକର ରିପୋର୍ଟରେ ତାଙ୍କ ନିକଟତର ଜଣେ ଚୀନ୍ ବ୍ୟବସାୟୀ ଆଲିସ୍ ହୁଆଙ୍ଗଙ୍କୁ ଚୀନ୍ ପାଇଁ ଗୁପ୍ତଚର କରୁଥିବା ସନ୍ଦେହ କରାଯିବା ପରେ ବିବାଦ ଆହୁରି ଗମ୍ଭୀର ହୋଇଗଲା। ଅଭିଯୋଗ ହୋଇଛି ଯେ ସେ Nvidia CEOଙ୍କଠାରୁ ଗୁରୁତ୍ୱପୂର୍ଣ୍ଣ ସୂଚନା ସଂଗ୍ରହ କରିବାକୁ ଚେଷ୍ଟା କରୁଥିଲେ। ତଥାପି, ଏହି ଅଭିଯୋଗଗୁଡ଼ିକର ଏକ ସ୍ୱାଧୀନ ତଦନ୍ତ ଏବେ ବି ଜାରି ରହିଛି।

ଏହି ଘଟଣା ପରେ, Nvidia ର ବୋର୍ଡ ଏକ ତଦନ୍ତ ଆରମ୍ଭ କରିବାକୁ ନିଷ୍ପତ୍ତି ନେଇଛି। କମ୍ପାନୀ କହିଛି ଯେ ବର୍ତ୍ତମାନ ଏହା ବିଶ୍ୱାସ କରିବାର କୌଣସି କାରଣ ନାହିଁ ଯେ ଆମେରିକାର ଜାତୀୟ ସୁରକ୍ଷା କିମ୍ବା Nvidia ର ଗୋପନୀୟ ସୂଚନା ସହ ବିପଦ ସୃଷ୍ଟି ହୋଇଛି। ଜେନସେନ୍ ହୁଆଙ୍ଗ ମଧ୍ୟ ତଦନ୍ତରେ ପୂର୍ଣ୍ଣ ସହଯୋଗ କରିବାକୁ ପ୍ରତିଶ୍ରୁତି ଦେଇଛନ୍ତି। କମ୍ପାନୀ ଏହା ମଧ୍ୟ ସ୍ପଷ୍ଟ କରିଛି ଯେ ସେ CEO ଭାବରେ ତାଙ୍କର ଦାୟିତ୍ୱ ନିର୍ବାହ କରିବେ। ରଏଟର୍ସ ରିପୋର୍ଟ ଅନୁଯାୟୀ, ଏହି ବିବାଦ ମଧ୍ୟ Nvidia ପ୍ରତି ନିବେଶକଙ୍କ ଦୃଷ୍ଟି ଆକର୍ଷଣ କରିଛି।

କିନ୍ତୁ ଏହି ସମ୍ପୂର୍ଣ୍ଣ ବିବାଦ ମଧ୍ୟରେ, ଏକ ପ୍ରଶ୍ନ ମଧ୍ୟ ଉଠୁଛି ଯେ Nvidia ଏତେ ଗୁରୁତ୍ୱପୂର୍ଣ୍ଣ କମ୍ପାନୀ କାହିଁକି ଏବଂ ବିଶ୍ୱର ବଡ଼ ବଡ଼ ଟେକ୍ କମ୍ପାନୀଗୁଡ଼ିକର ବ୍ୟବସାୟ ଏହା ସହିତ କିପରି ଜଡିତ?

ଏକ ୪.୫ ଟ୍ରିଲିୟନ ଡଲାରର ସାମ୍ରାଜ୍ୟ

ଗେମିଂ ପାଇଁ ଗ୍ରାଫିକ୍ସ ପ୍ରୋସେସିଂ ୟୁନିଟ୍ (GPU) ତିଆରି କରୁଥିବା Nvidia ଏବେ କୃତ୍ରିମ ବୁଦ୍ଧିମତ୍ତା (AI) ଜଗତର ସବୁଠାରୁ ଗୁରୁତ୍ୱପୂର୍ଣ୍ଣ କମ୍ପାନୀ ମଧ୍ୟରୁ ଗୋଟିଏ। ଏହାର ଚିପ୍ସ AI ମଡେଲ ତିଆରି କରିବା, ଡାଟା ସେଣ୍ଟର ଚଲାଇବା ଏବଂ ବଡ଼ ପରିମାଣର କମ୍ପ୍ୟୁଟିଂ କରିବା ପାଇଁ ବ୍ୟବହୃତ ହୁଏ। 

କେବେଳେ ଗେମିଂ ପାଇଁ ଗ୍ରାଫିକ୍ସ ଚିପ୍ ତିଆରି କରୁଥିବା Nvidia ଆଜି AI ଦୁନିଆର ସବୁଠାରୁ ବଡ଼ ଟେକ୍ନୋଲୋଜି କମ୍ପାନୀ ମଧ୍ୟରୁ ଗୋଟିଏ। ଏହାର GPU ଚିପ୍‌ ଉପରେ ନିର୍ଭର କରୁଛନ୍ତି OpenAI, Microsoft, Oracle ସମେତ ଅନେକ ବଡ଼ କମ୍ପାନୀ।

AI ମଡେଲ୍ ତିଆରି, ଡାଟା ସେଣ୍ଟର ପରିଚାଳନା ଏବଂ ବିଶାଳ ପରିମାଣର କମ୍ପ୍ୟୁଟିଂ କାର୍ଯ୍ୟ ପାଇଁ Nvidiaର ଚିପ୍‌ର ଚାହିଦା ରହିଛି। ଏହି କାରଣରୁ କମ୍ପାନୀର ବଜାର ମୂଲ୍ୟ ପ୍ରାୟ ୪.୫ ଟ୍ରିଲିୟନ ଡଲାରରେ ପହଞ୍ଚିଛି। ଜେନସେନ୍ ହୁଆଙ୍ଗଙ୍କ ନେତୃତ୍ୱରେ ଏହି କମ୍ପାନୀ ଗେମିଂ ଚିପ୍‌ରୁ AI ଶିଳ୍ପର କେନ୍ଦ୍ରବିନ୍ଦୁ ପାଲଟିଛି।

OpenAIଠାରୁ Microsoft, Oracle ପର୍ଯ୍ୟନ୍ତ ବ୍ୟବସାୟିକ ସମ୍ପର୍କ

Nvidia ଓ ChatGPT ନିର୍ମାତା OpenAI ମଧ୍ୟରେ ଗଭୀର ବ୍ୟବସାୟିକ ସମ୍ପର୍କ ରହିଛି। OpenAIର AI ମଡେଲ୍ ଓ କମ୍ପ୍ୟୁଟିଂ କ୍ଷମତା ବଢ଼ାଇବା ପାଇଁ Nvidia ୧୦୦ ବିଲିୟନ ଡଲାର ପର୍ଯ୍ୟନ୍ତ ନିବେଶ କରିବାକୁ ଯୋଜନା କରିଥିବା ରିପୋର୍ଟ ରହିଛି।

ସେହିପରି Microsoft ଓ Oracle ମଧ୍ୟ Nvidiaର ଚିପ୍‌ର ବଡ଼ ଗ୍ରାହକ। Oracleର ଡାଟା ସେଣ୍ଟର ଓ କ୍ଲାଉଡ୍ ସେବାରେ Nvidia ଚିପ୍‌ର ବ୍ୟବହାର ହେଉଛି। ଏହା ବ୍ୟତୀତ CoreWeave, xAI, AMD ଓ ଅନ୍ୟାନ୍ୟ କମ୍ପାନୀ ମଧ୍ୟ ଏହି ବିଶାଳ AI ବ୍ୟବସାୟିକ ନେଟୱର୍କର ଅଂଶ।

ଚୀନ୍ ଗୁଇନ୍ଦାଗିରି ଅଭିଯୋଗ କାହିଁକି ବଢ଼ାଇଲା ଚିନ୍ତା?

ଆମେରିକା ଓ ଚୀନ୍ ମଧ୍ୟରେ ଉନ୍ନତ AI ଚିପ୍‌ର ଯୋଗାଣକୁ ନେଇ ପୂର୍ବରୁ ହିଁ ଉତ୍ତେଜନା ରହିଛି। ଆମେରିକା ଚୀନ୍‌କୁ ଅତ୍ୟାଧୁନିକ AI ଚିପ୍‌ ରପ୍ତାନି ଉପରେ ବିଭିନ୍ନ କଟକଣା ଲଗାଇଛି। ଏଭଳି ସ୍ଥିତିରେ ଆଲିସ୍ ହୁଆଙ୍ଗଙ୍କ ସହ ଜଡ଼ିତ ଗୁଇନ୍ଦାଗିରି ଅଭିଯୋଗ Nvidiaର ବ୍ୟବସାୟିକ ସମ୍ପର୍କ ଏବଂ ସମ୍ବେଦନଶୀଳ ଟେକ୍ନୋଲୋଜିର ସୁରକ୍ଷାକୁ ନେଇ ପ୍ରଶ୍ନ ଉଠାଇଛି।

ଆମେରିକାର କିଛି ସାଂସଦ ମଧ୍ୟ ଏହି ମାମଲାରେ ଜେନସେନ୍ ହୁଆଙ୍ଗଙ୍କଠାରୁ ସ୍ପଷ୍ଟୀକରଣ ଚାହିଁଛନ୍ତି। ଏହାର ଅର୍ଥ ଏହି ବିବାଦ ଏବେ କେବଳ ଜଣେ CEOଙ୍କ ବ୍ୟକ୍ତିଗତ ଜୀବନ ମଧ୍ୟରେ ସୀମିତ ନାହିଁ। ଏହା ଆମେରିକାର ଜାତୀୟ ସୁରକ୍ଷା, ଚୀନ୍ ସହ ବୈଷୟିକ ପ୍ରତିଯୋଗିତା ଏବଂ ବିଶ୍ୱର AI ଶିଳ୍ପ ସହ ଜଡ଼ିତ ହୋଇପଡ଼ିଛି।

ଆଗାମୀ ଦିନରେ Nvidia ବୋର୍ଡର ତଦନ୍ତ ରିପୋର୍ଟ ଏହି ବିବାଦର ଦିଗ ନିର୍ଣ୍ଣୟ କରିବ। ତଦନ୍ତରେ କୌଣସି ଗୋପନୀୟ ତଥ୍ୟ କିମ୍ବା ଜାତୀୟ ସୁରକ୍ଷା ସମ୍ବନ୍ଧୀୟ ସୂଚନା ପ୍ରଭାବିତ ହୋଇଛି କି ନାହିଁ, ତାହା ଉପରେ ଏବେ ସମସ୍ତଙ୍କ ନଜର।

ନୂଆଦିଲ୍ଲୀ: ବିଶ୍ୱର ସବୁଠାରୁ ପ୍ରଭାବଶାଳୀ ଟେକ୍ନୋଲୋଜି କମ୍ପାନୀ ମଧ୍ୟରୁ ଅନ୍ୟତମ Nvidia ଏବେ ନିଜର ଚିପ୍‌ କିମ୍ବା ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ବ୍ୟବସାୟ ପାଇଁ ନୁହେଁ, ବରଂ ଏହାର CEO ଜେନସେନ୍ ହୁଆଙ୍ଗଙ୍କୁ ନେଇ ବିବାଦରେ। ନିଜ ବୈବାହିକ ଜୀବନରେ ବିଶ୍ୱାସ ଭାଙ୍ଗିଥିବା ସ୍ୱୀକାର କରି ସେ ପତ୍ନୀ, ପରିବାର ଓ କମ୍ପାନୀର କର୍ମଚାରୀଙ୍କୁ କ୍ଷମା ମାଗିଛନ୍ତି। ଅନ୍ୟପଟେ, ଚୀନ୍‌ର ଜଣେ ମହିଳା ବ୍ୟବସାୟୀଙ୍କ ସହ ତାଙ୍କ ସମ୍ପର୍କ ଏବଂ ଗୁଇନ୍ଦାଗିରି ଅଭିଯୋଗକୁ ନେଇ Nvidia ବୋର୍ଡ ସ୍ୱାଧୀନ ତଦନ୍ତ ଆରମ୍ଭ କରିଛି।

ଆମେରିକୀୟ ଗଣମାଧ୍ୟମର ରିପୋର୍ଟ ଅନୁସାରେ, ଆଲିସ୍ ହୁଆଙ୍ଗ ନାମକ ଜଣେ ଚୀନ୍‌ ସଂପୃକ୍ତ ବ୍ୟବସାୟୀ ମହିଳାଙ୍କ ଉପରେ ଚୀନ୍ ପାଇଁ ଗୁଇନ୍ଦାଗିରି କରିବାର ସନ୍ଦେହ ରହିଛି। ସେ ଜେନସେନ୍ ହୁଆଙ୍ଗଙ୍କ ନିକଟତର ଥିବା ଏବଂ ତାଙ୍କଠାରୁ ସମ୍ବେଦନଶୀଳ ତଥ୍ୟ ହାସଲ କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ତେବେ ଏହି ଅଭିଯୋଗର ସତ୍ୟତା ଏଯାଏଁ ପ୍ରମାଣିତ ହୋଇନାହିଁ।

ପତ୍ନୀଙ୍କୁ ଧୋକା ଦେଇଥିବା ସ୍ୱୀକାର କଲେ CEO

ରଏଟର୍ସ ରିପୋର୍ଟ ଅନୁସାରେ, ଜେନସେନ୍ ହୁଆଙ୍ଗ ନିଜ କର୍ମଚାରୀଙ୍କୁ ଏକ ବାର୍ତ୍ତା ଦେଇ ପତ୍ନୀଙ୍କ ପ୍ରତି ଅବିଶ୍ୱସ୍ତ ରହିଥିବା ସ୍ୱୀକାର କରିଛନ୍ତି। ଏଥିପାଇଁ ସେ ପରିବାର ଓ ସହକର୍ମୀଙ୍କୁ କ୍ଷମା ମାଗିବା ସହ ନିଜ କାର୍ଯ୍ୟର ସମ୍ପୂର୍ଣ୍ଣ ଦାୟିତ୍ୱ ନେଇଛନ୍ତି।

ଏହି ଘଟଣା ପରେ Nvidia ବୋର୍ଡ ଏକ ସ୍ୱାଧୀନ ତଦନ୍ତ କମିଟି ଗଠନ କରିଛି। କମ୍ପାନୀର ସ୍ୱାଧୀନ ନିର୍ଦ୍ଦେଶକମାନଙ୍କ ଏକ କମିଟି ବାହ୍ୟ ଆଇନଗତ ପରାମର୍ଶଦାତାଙ୍କ ସହ ମିଶି ତଦନ୍ତର ତଦାରଖ କରିବେ।

କମ୍ପାନୀ ସ୍ପଷ୍ଟ କରିଛି ଯେ ଏଯାଏଁ ଏପରି କୌଣସି କାରଣ ମିଳିନାହିଁ, ଯାହାରୁ ଆମେରିକାର ଜାତୀୟ ସୁରକ୍ଷା କିମ୍ବା Nvidiaର ଗୋପନୀୟ ତଥ୍ୟ ଲିକ୍ ହୋଇଥିବା ଆଶଙ୍କା କରାଯାଇପାରେ। ହୁଆଙ୍ଗ ମଧ୍ୟ ତଦନ୍ତରେ ପୂର୍ଣ୍ଣ ସହଯୋଗ କରିବେ ବୋଲି କହିଛନ୍ତି। ସେ CEO ଭାବେ ନିଜ ଦାୟିତ୍ୱ ଜାରି ରଖିବେ। 

ମୋବାଇଲ୍ ରିଚାର୍ଜକୁ ନେଇ ଚିନ୍ତା କରୁଥିବା ଗ୍ରାହକଙ୍କ ପାଇଁ ଆସିଛି ବଡ଼ ଖବର। ଟେଲିକମ୍ ବଜାରରେ ନିଜର ଦବଦବା ବଜାୟ ରଖିବାକୁ ରିଲାଏନ୍ସ Jio ଆଣିଛି ଆକର୍ଷଣୀୟ ରିଚାର୍ଜ ପ୍ଲାନ୍। ଏହି ପ୍ଲାନ୍‌ରେ ଗ୍ରାହକଙ୍କୁ କଲିଂ, ଡାଟା ଓ SMS ସହ ଅନେକ ଡିଜିଟାଲ୍ ସୁବିଧା ମିଳିବ। ବିଶେଷ କଥା ହେଉଛି, ଏହାର ବୈଧତା ୩ ବର୍ଷ ରହିଛି।

ମାତ୍ର ଥରେ ରିଚାର୍ଜ, ୩ ବର୍ଷ ଯାଏଁ ବୈଧତା

Jioର ଏହି ପ୍ଲାନ୍‌ର ମୂଲ୍ୟ ୧୦,୦୦୦ ଟଙ୍କା (ସମସ୍ତ ଟିକସ ସହିତ)। ଏଥିରେ ଗ୍ରାହକଙ୍କୁ ୩ ବର୍ଷର ବୈଧତା ମିଳିବ। ଅର୍ଥାତ୍ ପ୍ରତିମାସ କିମ୍ବା ପ୍ରତିବର୍ଷ ରିଚାର୍ଜ କରିବାର ଝିନ୍‌ଝଟରୁ ମିଳିବ ମୁକ୍ତି।

ପ୍ରତିଦିନ ୨.୫GB ଡାଟା ସହ ଅନଲିମିଟେଡ୍ କଲିଂ

ଏହି ପ୍ଲାନ୍‌ରେ ଗ୍ରାହକଙ୍କୁ ଅନେକ ସୁବିଧା ମିଳିବ।

• ମୂଲ୍ୟ: ୧୦,୦୦୦ ଟଙ୍କା
• ବୈଧତା: ୩ ବର୍ଷ (୩୬ ମାସ)
• ଡାଟା: ପ୍ରତିଦିନ ୨.୫GB ହାଇସ୍ପିଡ୍ ଡାଟା
• ୫G: ଅନଲିମିଟେଡ୍ ୫G ଡାଟା (ଯୋଗ୍ୟତା ଓ ନେଟୱର୍କ ସର୍ତ୍ତ ଅନୁସାରେ)
• କଲିଂ: ସମଗ୍ର ଭାରତରେ ଅନଲିମିଟେଡ୍ ଭଏସ୍ କଲ୍
• ରୋମିଂ: ମାଗଣା ନ୍ୟାସନାଲ୍ ରୋମିଂ
• SMS: ପ୍ରତିଦିନ ୧୦୦ଟି ମାଗଣା SMS

ଏହି ହିସାବରେ ୩ ବର୍ଷରେ ମୋଟ ୨,୭୩୭.୫GB ହାଇସ୍ପିଡ୍ ଡାଟା ବ୍ୟବହାର କରିପାରିବେ ଗ୍ରାହକ।

ମାଗଣାରେ ମିଳିବ JioHotstar ଓ Canva Pro Lite

କେବଳ କଲ୍ ଓ ଡାଟା ନୁହେଁ, ଏହି ପ୍ଲାନ୍‌ରେ ଅତିରିକ୍ତ ଡିଜିଟାଲ୍ ସୁବିଧା ମଧ୍ୟ ରହିଛି।

• JioHotstar: Mobile + Hollywood ସବ୍ସକ୍ରିପ୍ସନ୍।
• JioAICloud: ୫୦GB ମାଗଣା କ୍ଲାଉଡ୍ ଷ୍ଟୋରେଜ୍।
• Canva Pro Lite: ୧୨ ମାସ ପାଇଁ ମାଗଣା ସବ୍ସକ୍ରିପ୍ସନ୍।

କେଉଁଠି କରିବେ ରିଚାର୍ଜ?

ଗ୍ରାହକମାନେ MyJio ଆପ୍ କିମ୍ବା Jioର ଅଫିସିଆଲ୍ ୱେବସାଇଟ୍ ମାଧ୍ୟମରେ ଏହି ପ୍ଲାନ୍‌ର ଉପଲବ୍ଧତା ଓ ସର୍ତ୍ତ ଯାଞ୍ଚ କରିପାରିବେ। ଏହା ବ୍ୟତୀତ Jioର ୧ ବର୍ଷିଆ ପ୍ଲାନ୍ ମଧ୍ୟ ରହିଛି। ରିପୋର୍ଟ ଅନୁସାରେ, ୧,୭୪୮ ଟଙ୍କାର ପ୍ଲାନ୍‌ରେ ଅନଲିମିଟେଡ୍ କଲିଂ ସୁବିଧା ରହିଥିବାବେଳେ ୩,୫୯୯ ଟଙ୍କାର ଅନ୍ୟ ଏକ ବାର୍ଷିକ ପ୍ଲାନ୍ ମଧ୍ୟ ଉପଲବ୍ଧ।

ତେବେ ଏକାଥରେ ୧୦ ହଜାର ଟଙ୍କା ଖର୍ଚ୍ଚ କରିବା ପୂର୍ବରୁ ନିଜର ଆବଶ୍ୟକତା ଓ ବଜେଟ୍ ଉପରେ ଧ୍ୟାନ ଦିଅନ୍ତୁ। ରିଚାର୍ଜ ପୂର୍ବରୁ MyJio ଆପ୍‌ରେ ପ୍ଲାନ୍‌ର ସମସ୍ତ ସର୍ତ୍ତ ନିଶ୍ଚିତ ଯାଞ୍ଚ କରନ୍ତୁ। 

ମୁମ୍ବାଇ: ନାସନାଲ କମ୍ପାନୀ ଲ ଟ୍ରିବ୍ୟୁନାଲ୍ ଭିଡ଼ିଓକନ୍ କମ୍ପାନୀର ପୂର୍ବତନ ପ୍ରମୋଟର୍ ଏବଂ ନିର୍ଦ୍ଦେଶକ ବେଣୁଗୋପାଳ ନନ୍ଦଲାଲ ଧୂତଙ୍କୁ ଦେବାଳିଆ ଘୋଷିତ କରିଛି । ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ ଏବଂ ସହଯୋଗୀ ବ୍ୟାଙ୍କରୁ ନେଥିବା ୧୨,୬୬୮.୦୬ କୋଟି ଟଙ୍କା ଋଣ ପରିଶୋଧ ନ କରିପାରିବାରୁ ଏନସିଏଲଟି ବେଣୁଗୋପାଳଙ୍କୁ ଦେବାଳିଆ ଘୋଷିତ କରିଛି । 

ଏନସିଏଲଟିର ମୁମ୍ବାଇ ବେଞ୍ଚ ଆଇବିସି ଧାରା ୧୨୧ ଆଧାରରେ ଏସବିଆଇର ବ୍ୟାଙ୍କ ଠକେଇ ଅଭିଯୋଗକୁ ସ୍ୱୀକାର କରିଛନ୍ତି । ୩୬ ମାସ ମଧ୍ୟରେ ୬୦୦ କୋଟି ଦେଇ ବକେୟା ଦାୟିତ୍ୱ ସମାଧାନ କରିବା ପାଇଁ ଧୂତଙ୍କ ପ୍ରସ୍ତାବକୁ ଋଣଦାତାମାନେ ପ୍ରତ୍ୟାଖ୍ୟାନ କରିବା ପରେ ଧୂତଙ୍କ ବ୍ୟକ୍ତିଗତ ଦେବାଳିଆ ସମାଧାନ ପ୍ରକ୍ରିୟା ବିଫଳ ହେବା ପରେ ଏହି ନିର୍ଦ୍ଦେଶ ଦିଆଯାଇଛି। 

ଟ୍ରିବ୍ୟୁନାଲ୍ ଧୂତଙ୍କ ବ୍ୟକ୍ତିଗତ ସମ୍ପତ୍ତି ପରିଚାଳନା ଏବଂ ବଣ୍ଟନ କରିବା ପାଇଁ ଆଶିଷ ନାରାୟଣଙ୍କୁ ଦେବାଳିଆ ଟ୍ରଷ୍ଟି ଭାବରେ ନିଯୁକ୍ତ କରିଥିଲେ। ଏନସିଏଲଟିର ନିର୍ଦ୍ଦେଶ ଅନୁଯାୟୀ, ଧୂତଙ୍କ ସମ୍ପୂର୍ଣ୍ଣ ସମ୍ପତ୍ତି ଏବେ ଟ୍ରଷ୍ଟିଙ୍କ ପାଖରେ ଅଛି, ଯାହାକୁ ଋଣଦାତାଙ୍କଠାରୁ ଦାବି ଆମନ୍ତ୍ରଣ କରି ଏକ ସାର୍ବଜନୀନ ନୋଟିସ୍ ଜାରି କରିବାକୁ ଏବଂ ୯୦ ଦିନ ମଧ୍ୟରେ ଟ୍ରିବ୍ୟୁନାଲ୍‌କୁ ଏକ ପ୍ରାରମ୍ଭିକ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି।

ବେଣୁଗୋପାଳ ଧୂତ ଭିଡିଓକନ୍ ଇଣ୍ଡଷ୍ଟ୍ରିଜ୍ ଲିମିଟେଡ୍ ଏବଂ ଭିଡିଓକନ୍ ଟେଲିକମ୍ୟୁନିକେସନ୍ ଲିମିଟେଡ୍ କୁ ପ୍ରଦାନ କରାଯାଇଥିବା ଋଣ ସୁବିଧା ପାଇଁ ବ୍ୟକ୍ତିଗତ ଗ୍ୟାରେଣ୍ଟି ପ୍ରଦାନ କରିଥିଲେ। ଏସବିଆଇ ଫାଇଲିଂ ଅନୁଯାୟୀ, ସେପ୍ଟେମ୍ବର ୩୦, ୨୦୨୬ ସୁଦ୍ଧା ମୋଟ ବକେୟା ପରିମାଣ ୧୨,୬୬୮.୦୬ କୋଟି ଟଙ୍କା ହୋଇଥିଲା । ଏଥିରେ ରୂପୟା ଟର୍ମ ଲୋନ୍ ସୁବିଧା ଅଧୀନରେ ୯,୩୨୨.୧୦ କୋଟି, ଭିଡିଓକନ୍ ଟେଲିକମ୍ୟୁନିକେସନ୍ ଲିମିଟେଡ୍ ସୁବିଧା ଅଧୀନରେ ୧,୪୩୭.୭୬ କୋଟି ଏବଂ କାର‌୍ୟ୍ୟକାରୀ ପୁଞ୍ଜି ସୁବିଧା ଅଧୀନରେ ୧,୯୦୮.୧୯ କୋଟି ଅନ୍ତର୍ଭୁକ୍ତ।

ଭିଡିଓକନ୍ ଗ୍ରୁପ୍ କମ୍ପାନୀଗୁଡ଼ିକ ଆର୍ଥିକ ସମସ୍ୟାରେ ପଡ଼ିବା ପରେ ଋଣ ଆକାଉଣ୍ଟଗୁଡ଼ିକ ପ୍ରାରମ୍ଭିକ ଭାବରେ ଡିଫଲ୍ଟ ହୋଇଥିଲା, ଯାହା ଫଳରେ ଜୁନ୍ ୨୦୧୮ରେ ଭିଡିଓକନ୍ ଇଣ୍ଡଷ୍ଟ୍ରିଜ୍ ବିରୁଦ୍ଧରେ କର୍ପୋରେଟ୍ ଇନସଲଭେନ୍ସି ସମାଧାନ ପ୍ରକ୍ରିୟା ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ଝଈଓ ଧୂତଙ୍କ ବ୍ୟକ୍ତିଗତ ଗ୍ୟାରେଣ୍ଟି ଆବେଦନ କରିଥିଲା ଏବଂ ବକେୟା ରାଶି ଆଦାୟ ପାଇଁ ଏନସିଏଲଟି ସହିତ ଯୋଗାଯୋଗ କରିଥିଲା। କୋର୍ଟ ଧୂତଙ୍କୁ ସାତ ଦିନ ମଧ୍ୟରେ ଦେବାଳିଆ ଟ୍ରଷ୍ଟିଙ୍କ ନିକଟରେ ତାଙ୍କର ଆର୍ଥିକ ସ୍ଥିତିର ସମ୍ପୂର୍ଣ୍ଣ ବିବରଣୀ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ।

ମୁମ୍ବାଇ: ଦୀପାବଳି ପୂର୍ବରୁ ଭାରତୀୟ ସେୟାର ବଜାରରେ ଦେଖିବାକୁ ମିଳିଛି ଜବରଦସ୍ତ ଉତ୍ସାହ। ଶୁକ୍ରବାର (ନଭେମ୍ବର ୬) କାରବାର ଶେଷରେ ସେନସେକ୍ସ ଓ ନିଫ୍ଟିରେ ବଡ଼ ଧରଣର ବୃଦ୍ଧି ରେକର୍ଡ ହୋଇଛି। ଲଗାତାର ସପ୍ତମ ଦିନ ପାଇଁ ଲାଭରେ ବନ୍ଦ ହୋଇଛି ଘରୋଇ ସେୟାର ବଜାର।

ସେନସେକ୍ସ ୧,୪୮୩.୨୮ ପଏଣ୍ଟ ବା ୨.୧୭ ପ୍ରତିଶତ ବୃଦ୍ଧି ପାଇ ୮୧,୦୨୮.୦୨ ପଏଣ୍ଟରେ ବନ୍ଦ ହୋଇଛି। ସେହିପରି ନିଫ୍ଟି ୪୯୩.୭୫ ପଏଣ୍ଟ ବା ୨.୦୧ ପ୍ରତିଶତ ବୃଦ୍ଧି ସହ ୨୫,୦୩୦.୩୫ ପଏଣ୍ଟରେ କାରବାର ଶେଷ କରିଛି।

୩୫ ବର୍ଷରେ ଦୀପାବଳି ପୂର୍ବରୁ ସବୁଠାରୁ ବଡ଼ ଲାଭ

ଏହି ଲାଭକୁ ଗତ ୩୫ ବର୍ଷ ମଧ୍ୟରେ ଦୀପାବଳି ପୂର୍ବରୁ ସବୁଠାରୁ ଶକ୍ତିଶାଳୀ ୭ ଦିନିଆ ବଜାର ଉତ୍ଥାନ ବୋଲି କୁହାଯାଉଛି। ଗତ ୭ଟି କାରବାର ଦିନରେ ସେନସେକ୍ସ ୭,୭୮୨ ପଏଣ୍ଟ ବା ୧୦.୬ ପ୍ରତିଶତ ବୃଦ୍ଧି ପାଇଥିବା ବେଳେ ନିଫ୍ଟିରେ ୨,୩୩୧ ପଏଣ୍ଟ ବା ୧୦.୩ ପ୍ରତିଶତ ବୃଦ୍ଧି ହୋଇଛି।

କାହିଁକି ହଠାତ୍ ଦୌଡ଼ିଲା ସେୟାର ବଜାର?

ବଜାରର ଏହି ଜବରଦସ୍ତ ଉତ୍ଥାନ ପଛରେ ରହିଛି ଅନେକ କାରଣ।

FIIଙ୍କ ବଡ଼ ନିବେଶ:

ବିଦେଶୀ ସଂସ୍ଥାଗତ ନିବେଶକମାନେ ଭାରତୀୟ ସେୟାର ବଜାରରେ ପୁଣି ଜୋରଦାର କିଣାକିଣି ଆରମ୍ଭ କରିଛନ୍ତି। ୬ଟି ମଧ୍ୟରୁ ୫ଟି କାରବାର ଦିନରେ ସେମାନେ ପ୍ରାୟ ୧୮,୬୬୧ କୋଟି ଟଙ୍କା ନିବେଶ କରିଛନ୍ତି।

ଅଶୋଧିତ ତୈଳ ଦର ହ୍ରାସ:

ପଶ୍ଚିମ ଏସିଆରେ କୂଟନୈତିକ ସମାଧାନ ନେଇ ଆଶା ବଢ଼ିବା ପରେ ବ୍ରେଣ୍ଟ କ୍ରୁଡ୍ ଦର ବ୍ୟାରେଲ୍ ପିଛା ୯୫ ଡଲାର ତଳକୁ ଖସିଛି।

ଆମେରିକାର ରାଜନୈତିକ ପରିବର୍ତ୍ତନ:

ଆମେରିକାର ମଧ୍ୟବର୍ତ୍ତୀ ନିର୍ବାଚନ ଫଳାଫଳ ପରେ ବିଶ୍ୱ ବଜାରରେ ସକାରାତ୍ମକ ମାହୋଲ ସୃଷ୍ଟି ହୋଇଛି।

ଟିକସ ହ୍ରାସ ନେଇ ଆଶା:

୨୦୨୭ ଫେବୃଆରୀ ବଜେଟ୍‌ରେ LTCG ଓ STCG ଟିକସ ବ୍ୟବସ୍ଥାରେ ପରିବର୍ତ୍ତନ ହୋଇପାରେ ବୋଲି ବଜାରରେ ଚର୍ଚ୍ଚା ହେଉଛି।

ବ୍ୟାଙ୍କିଂ ସେୟାରରେ ଜବରଦସ୍ତ ଚମକ

ଶୁକ୍ରବାରର ବଜାର ରାଲିରେ ବ୍ୟାଙ୍କିଂ ଓ ଫାଇନାନ୍ସିଆଲ୍ ସେକ୍ଟର ଆଗରେ ରହିଥିଲା। HDFC ବ୍ୟାଙ୍କ, ICICI ବ୍ୟାଙ୍କ ଓ Yes ବ୍ୟାଙ୍କ ଭଳି ସେୟାରରେ କିଣାକିଣି ବଢ଼ିଥିଲା।

ଅନ୍ୟପଟେ Cholamandalam Financial Holdingsର ସେୟାର ୭.୦୩ ପ୍ରତିଶତ ବଢ଼ି ୧,୫୧୨ ଟଙ୍କାରେ ପହଞ୍ଚିଥିଲା। କମ୍ପାନୀର ଦ୍ୱିତୀୟ ତ୍ରୈମାସିକ ନିଟ୍ ଲାଭରେ ୧୬.୯ ପ୍ରତିଶତ ବୃଦ୍ଧି ଏହାର ମୁଖ୍ୟ କାରଣ ଥିଲା।

Hindalco Industriesର ଲାଭରେ ମଧ୍ୟ ବଡ଼ ଉନ୍ନତି ହୋଇଛି। କମ୍ପାନୀର Q2FY27 ସମନ୍ୱିତ ନିଟ୍ ଲାଭ ୫୯ ପ୍ରତିଶତ ବୃଦ୍ଧି ପାଇ ୭,୫୩୩ କୋଟି ଟଙ୍କା ହୋଇଛି।

ସବୁ ସେକ୍ଟରରେ ଲାଭ ନାହିଁ, AI ସମ୍ପର୍କିତ ସେୟାରରେ ଚାପ

ବଜାରରେ ସବୁଆଡ଼େ ଲାଭ ଦେଖାଯାଇନଥିଲା। BSE Capital Goods Index ପ୍ରାୟ ୪ ପ୍ରତିଶତ ହ୍ରାସ ପାଇଥିଲା। Thermax, Apar Industries ଓ Astral ଭଳି କମ୍ପାନୀର ସେୟାରରେ ଦ୍ୱିତୀୟ ତ୍ରୈମାସିକ ଫଳାଫଳ ନିରାଶାଜନକ ରହିବାରୁ ଚାପ ଦେଖାଯାଇଥିଲା।

ମିଡ୍‌କ୍ୟାପ୍ ଓ ସ୍ମଲ୍‌କ୍ୟାପ୍ ସେୟାର ମଧ୍ୟ ମୁଖ୍ୟ ସୂଚକାଙ୍କ ତୁଳନାରେ ପଛରେ ରହିଥିଲା। Nifty Midcap 100ରେ ୦.୦୨ ପ୍ରତିଶତ ଏବଂ Nifty Smallcap 100ରେ ୦.୮୨ ପ୍ରତିଶତ ହ୍ରାସ ହୋଇଥିଲା।

ଭୁବନେଶ୍ୱର: ଧନତେରାସରେ ସୁନା ଓ ରୁପା କିଣିବାକୁ ଯୋଜନା କରୁଥିବା ଗ୍ରାହକଙ୍କ ପାଇଁ ଖୁସି ଖବର। ପାର୍ବଣ ସମୟରେ ସୁନା ଓ ରୁପା କିଣିବାକୁ ବଜାରରେ ଗ୍ରାହକଙ୍କ ଭିଡ଼ ଜମୁଥିବା ବେଳେ ଖସିଛି ଉଭୟ ମୂଲ୍ୟବାନ ଧାତୁର ଦର। ସୁନା ଦରରେ ହଜାର ହଜାର ଟଙ୍କା ହ୍ରାସ ହୋଇଥିବା ବେଳେ ରୁପା ଦାମ୍‌ ମଧ୍ୟ କମିଛି। ଏହା ଗ୍ରାହକଙ୍କୁ କିଛିଟା ଆଶ୍ୱସ୍ତି ଦେଇଛି।

ଶୁକ୍ରବାର ମଲ୍ଟି କମୋଡିଟି ଏକ୍ସଚେଞ୍ଜ (MCX)ରେ ଡିସେମ୍ବର ଡେଲିଭରି ସୁନା ଦର ୧୦ ଗ୍ରାମ ପିଛା ପ୍ରାୟ ୨,୩୯୫ ଟଙ୍କା ହ୍ରାସ ପାଇ ୧,୪୧,୭୦୦ ଟଙ୍କା ନିକଟରେ କାରବାର କରିଥିଲା। ସେହିପରି ରୁପା ଦର କିଲୋଗ୍ରାମ ପିଛା ପ୍ରାୟ ୩,୧୩୯ ଟଙ୍କା ହ୍ରାସ ପାଇ ୧,୮୪,୦୦୧ ଟଙ୍କା ନିକଟରେ ପହଞ୍ଚିଥିଲା।

କେତେ ରହିଛି ଆଜିର ସୁନା ଦର?

ନଭେମ୍ବର ୬ ତାରିଖରେ ୨୪ କ୍ୟାରେଟ୍ ସୁନା ଦର ୧୦ ଗ୍ରାମ ପିଛା ୨,୫୬୦ ଟଙ୍କା ହ୍ରାସ ପାଇ ୧,୪୩,୪୬୦ ଟଙ୍କା ରହିଛି। ସେହିପରି ୨୨ କ୍ୟାରେଟ୍ ସୁନା ଦର ୨,୩୫୦ ଟଙ୍କା କମି ୧,୩୧,୫୦୦ ଟଙ୍କା ହୋଇଛି। ୧୮ କ୍ୟାରେଟ୍ ସୁନା ଦର ମଧ୍ୟ ୧,୯୩୦ ଟଙ୍କା ହ୍ରାସ ପାଇ ୧,୦୭,୫୯୦ ଟଙ୍କା ରହିଛି।

ରୁପା ଦରରେ ବି ବଡ଼ ହ୍ରାସ

ସୁନା ସହ ରୁପା ଦରରେ ମଧ୍ୟ ହ୍ରାସ ଦେଖିବାକୁ ମିଳିଛି। କିଲୋଗ୍ରାମ ପିଛା ରୁପା ଦର ୫,୦୦୦ ଟଙ୍କା କମି ୨,୦୫,୦୦୦ ଟଙ୍କା ରହିଛି। ଧନତେରାସରେ ରୁପା କିଣିବାକୁ ଚାହୁଁଥିବା ଲୋକଙ୍କ ପାଇଁ ଏହା ଏକ ଆଶ୍ୱସ୍ତିକର ଖବର।

ପ୍ରମୁଖ ସହରରେ ଆଜିର ସୁନା ଦର

ହାଇଦ୍ରାବାଦ:

୨୪ କ୍ୟାରେଟ୍ – ୧,୪୩,୪୬୦ ଟଙ୍କା

୨୨ କ୍ୟାରେଟ୍ – ୧,୩୧,୫୦୦ ଟଙ୍କା

୧୮ କ୍ୟାରେଟ୍ – ୧,୦୭,୫୯୦ ଟଙ୍କା

ମୁମ୍ବାଇ:

୨୪ କ୍ୟାରେଟ୍ – ୧,୪୩,୪୬୦ ଟଙ୍କା

୨୨ କ୍ୟାରେଟ୍ – ୧,୩୧,୫୦୦ ଟଙ୍କା

୧୮ କ୍ୟାରେଟ୍ – ୧,୦୭,୫୯୦ ଟଙ୍କା

ଦିଲ୍ଲୀ:

୨୪ କ୍ୟାରେଟ୍ – ୧,୪୩,୬୧୦ ଟଙ୍କା

୨୨ କ୍ୟାରେଟ୍ – ୧,୩୧,୬୫୦ ଟଙ୍କା

୧୮ କ୍ୟାରେଟ୍ – ୧,୦୭,୬୪୦ ଟଙ୍କା

କୋଲକାତା:

୨୪ କ୍ୟାରେଟ୍ – ୧,୪୩,୪୬୦ ଟଙ୍କା

୨୨ କ୍ୟାରେଟ୍ – ୧,୩୧,୫୦୦ ଟଙ୍କା

୧୮ କ୍ୟାରେଟ୍ – ୧,୦୭,୫୯୦ ଟଙ୍କା

ଚେନ୍ନାଇ:

୨୪ କ୍ୟାରେଟ୍ – ୧,୪୩,୩୫୦ ଟଙ୍କା

୨୨ କ୍ୟାରେଟ୍ – ୧,୩୧,୪୦୦ ଟଙ୍କା

୧୮ କ୍ୟାରେଟ୍ – ୧,୦୭,୬୦୦ ଟଙ୍କା

ତେବେ ଧନତେରାସରେ ସୁନା ଓ ରୁପା କିଣିବା ପୂର୍ବରୁ ନିଜ ସହରର ଜୁଏଲର୍ସଙ୍କଠାରୁ ଚୂଡ଼ାନ୍ତ ଦର ଜାଣିନିଅନ୍ତୁ। ଅଳଙ୍କାର କିଣିବା ସମୟରେ ଜିଏସ୍‌ଟି ଓ ମେକିଂ ଚାର୍ଜ ମଧ୍ୟ ଧ୍ୟାନ ଦିଅନ୍ତୁ।

ବେଙ୍ଗାଲୁରୁରେ ବୃଦ୍ଧି ପାଉଥିବା ମହଙ୍ଗା ମାଡ଼ର ପ୍ରଭାବ ଏବେ ହୋଟେଲ୍ ଶିଳ୍ପ ଉପରେ ମଧ୍ୟ ପଡ଼ିବାକୁ ଲାଗିଛି। ଚାଉଳ, କ୍ଷୀର, ଦହି ଏବଂ ଡାଲି ଜାତୀୟ ସାମଗ୍ରୀର ମୂଲ୍ୟ ବୃଦ୍ଧି ଯୋଗୁଁ ସହରର ଅନେକ ହୋଟେଲ୍ ମେନ୍ୟୁ ଦର ୧୦ ରୁ ୧୫ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିଛନ୍ତି।

କ୍ଷୀର ଏବଂ ଚାଉଳ ସମେତ ଅନେକ ଆବଶ୍ୟକୀୟ ସାମଗ୍ରୀର ବର୍ଦ୍ଧିତ ମୂଲ୍ୟର ପ୍ରଭାବ ଏବେ ବେଙ୍ଗାଲୁରୁ ହୋଟେଲ୍ ଶିଳ୍ପ ଉପରେ ସ୍ପଷ୍ଟ ଦେଖାଯାଉଛି। ଉତ୍ପାଦନ ଖର୍ଚ୍ଚ ବୃଦ୍ଧି ପାଇବା କାରଣରୁ ସହରର ଅନେକ ହୋଟେଲ୍ ମେନ୍ୟୁରେ ଥିବା ଖାଦ୍ୟ ସାମଗ୍ରୀର ଦାମ୍ ୧୦ ରୁ ୧୫ ପ୍ରତିଶତ ପର୍ଯ୍ୟନ୍ତ ବଢ଼ାଇ ଦେଇଛନ୍ତି। ଚା’ ଏବଂ କଫି ବ୍ୟତୀତ କିଛି ସ୍ଥାନରେ ଇଡ୍ଲି ଓ ଡୋସା ମୂଲ୍ୟ ମଧ୍ୟ ବୃଦ୍ଧି ପାଇଛି। ହୋଟେଲ୍ ମାଲିକମାନଙ୍କ କହିବା କଥା ହେଲା ଯେ ଖାଦ୍ୟ ପ୍ରସ୍ତୁତି ପାଇଁ ଆବଶ୍ୟକ ହେଉଥିବା ଜରୁରୀ କଞ୍ଚାମାଲର ଦାମ୍ ବହୁତ ବଢ଼ିଯାଇଛି।

କ୍ରମାଗତ ଭାବେ ବଢ଼ୁଥିବା ଦରଦାମ୍ ଯୋଗୁଁ କ୍ଷତିରୁ ବଞ୍ଚିବା ପାଇଁ ମେନ୍ୟୁରେ ଖାଦ୍ୟ ସାମଗ୍ରୀର ମୂଲ୍ୟ ବୃଦ୍ଧି କରିବା ବାଧ୍ୟତାମୂଳକ ହୋଇପଡ଼ିଛି। ବୃହତ୍ ବେଙ୍ଗାଲୁରୁ ହୋଟେଲିୟର୍ସ ଆସୋସିଏସନ୍ (BBHA) ର ସଭାପତି ପି.ସି. ରାଓ ସୂଚନା ଦେଇଛନ୍ତି ଯେ, ଗତ ଗୋଟିଏ ମାସ ମଧ୍ୟରେ ଚାଉଳର ଦାମ୍ କିଲୋଗ୍ରାମ୍ ପ୍ରତି ୬୫ ଟଙ୍କାରୁ ବୃଦ୍ଧି ପାଇ କିଛି ସ୍ଥାନରେ ୯୫ ଟଙ୍କାରେ ପହଞ୍ଚିଛି। ସେ ଆହୁରି ମଧ୍ୟ କହିଛନ୍ତି ଯେ ଡାଲି ଜାତୀୟ ସାମଗ୍ରୀର ମୂଲ୍ୟରେ ମଧ୍ୟ ଯଥେଷ୍ଟ ବୃଦ୍ଧି ଘଟିଛି।

ହୋଟେଲ୍ ଶିଳ୍ପ ଉପରେ ବଢ଼ୁଛି ବୋଝ

ପି.ସି. ରାଓ କହିଛନ୍ତି ଯେ କେବଳ ସେତିକି ନୁହେଁ, କ୍ଷୀର ଏବଂ ଦହିର ମୂଲ୍ୟ ବୃଦ୍ଧି ହୋଟେଲ୍ ଶିଳ୍ପ ଉପରେ ଅତିରିକ୍ତ ବୋଝ ପକାଇଛି। ‘ଡେକାନ୍ ହେରାଲ୍ଡ’ର ରିପୋର୍ଟ ଅନୁଯାୟୀ, ଅନେକ ହୋଟେଲ୍ ପୂର୍ବରୁ ମେନ୍ୟୁରେ ଥିବା ଖାଦ୍ୟ ସାମଗ୍ରୀର ଦାମ୍ ୧୦ ରୁ ୧୫ ପ୍ରତିଶତ ବଢ଼ାଇ ସାରିଛନ୍ତି। ଉତ୍ତର ବେଙ୍ଗାଲୁରୁର ହୋଟେଲ୍ ବ୍ୟବସାୟୀ ମହେଶ କେ.କେ.ଙ୍କ କହିବା ଅନୁଯାୟୀ, ଯେତେବେଳେ କଞ୍ଚାମାଲର ଦାମ୍ ବଢ଼େ, ସେତେବେଳେ ଖାଦ୍ୟ ପଦାର୍ଥର ମୂଲ୍ୟ ବୃଦ୍ଧି କରିବା ଜରୁରୀ ହୋଇପଡ଼େ।

ସେ କହିଛନ୍ତି ଯେ ମଧ୍ୟପ୍ରାଚ୍ୟରେ ଅଶାନ୍ତି ଆରମ୍ଭ ହେବା ପରଠାରୁ କ୍ରମାଗତ ଭାବେ ଦରଦାମ୍ ବୃଦ୍ଧି ପାଉଛି। ଚାଉଳ ଏବଂ କ୍ଷୀର ହୋଟେଲ୍ ଶିଳ୍ପରେ ବ୍ୟବହୃତ ହେଉଥିବା ଦୁଇଟି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସାମଗ୍ରୀ। ହୋଟେଲ୍ ବ୍ୟବସାୟୀଙ୍କ କହିବା କଥା ଯେ ଏଗୁଡ଼ିକର ବର୍ଦ୍ଧିତ ମୂଲ୍ୟର ସମ୍ପୂର୍ଣ୍ଣ ବୋଝ ହୋଟେଲ୍ ମାଲିକଙ୍କ ଉପରେ ପଡ଼ୁଛି। ତେବେ ସମସ୍ତ ହୋଟେଲ୍ ସମାନ ଭାବେ ଦାମ୍ ବଢ଼ାଇ ନାହାନ୍ତି। କିଛି ହୋଟେଲ୍ କେବଳ ଚା’ ଏବଂ କଫିର ଦାମ୍ ବଢ଼ାଇଛନ୍ତି।

ଅନେକ ହୋଟେଲ୍ରେ ଚା’ ଓ କଫି ୩ ରୁ ୫ ଟଙ୍କା ମହଙ୍ଗା

ସହରର ଅନେକ ହୋଟେଲ୍ରେ ଚା’ ଏବଂ କଫିର ମୂଲ୍ୟ ହାରାହାରି ୩ ରୁ ୫ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଛି। ଅନ୍ୟାନ୍ୟ ଖାଦ୍ୟ ପଦାର୍ଥର ଦାମ୍ ବୃଦ୍ଧି ହାର ଭିନ୍ନ ଭିନ୍ନ ହୋଟେଲ୍ରେ ଅଲଗା ଅଲଗା ରହିଛି। ଉଦାହରଣ ସ୍ୱରୂପ, ଯେଉଁ ଡୋସା ପୂର୍ବରୁ ପ୍ରାୟ ୧୦୦ ଟଙ୍କାରେ ମିଳୁଥିଲା, ଏବେ କିଛି ସ୍ଥାନରେ ତାହାର ଦାମ୍ ୧୧୦ ରୁ ୧୧୫ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଛି। ତେବେ ଗ୍ରାହକମାନେ ଏହି ମୂଲ୍ୟ ବୃଦ୍ଧିକୁ ଅତ୍ୟାଧିକ କହି ସମାଲୋଚନା କରିଛନ୍ତି।

ଗ୍ରାହକଙ୍କ ମତରେ, ଯଦି ଲିଟର ପ୍ରତି କ୍ଷୀର ଦାମ୍ ୮ ଟଙ୍କା ବୃଦ୍ଧି ପାଇଛି, ତେବେ ପ୍ରତ୍ୟେକ କପ୍ ଚା’ କିମ୍ବା କଫିର ଦାମ୍ ୫ ଟଙ୍କା ବଢ଼ାଇବା ଆଦୌ ଯୁକ୍ତିଯୁକ୍ତ ନୁହେଁ। କ୍ଷୀର ଦାମ୍ ବୃଦ୍ଧିକୁ ବାହାନା କରି ସମସ୍ତ ମେନ୍ୟୁ ଆଇଟମ୍ର ଦାମ୍ ନ ବଢ଼ାଇବାକୁ ଏବଂ ଗ୍ରାହକଙ୍କ ଉପରୁ ବୋଝ କମାଇବାକୁ ସେମାନେ ହୋଟେଲ୍ ମାଲିକମାନଙ୍କୁ ନିବେଦନ କରିଛନ୍ତି।

ପାର୍ବଣ ଋତୁରେ ନିଜ ପାଇଁ ହେଉ କି ପ୍ରିୟଜନଙ୍କୁ ଉପହାର ଦେବା ପାଇଁ, ଏକ ଭଲ ସ୍ମାର୍ଟଫୋନ୍ କିଣିବାକୁ ଯୋଜନା କରୁଛନ୍ତି କି? ଯଦି ଆପଣଙ୍କ ବଜେଟ୍ ପ୍ରାୟ ୫୦ ହଜାର ଟଙ୍କା, ତେବେ ବଜାରରେ ରହିଛି ଏକାଧିକ ଦମଦାର ବିକଳ୍ପ। ଶାନଦାର କ୍ୟାମେରା, ଦମଦାର ପ୍ରୋସେସର, ପ୍ରିମିୟମ୍ ଡିସପ୍ଲେ ଏବଂ ଦୀର୍ଘସ୍ଥାୟୀ ବ୍ୟାଟେରୀ ସହ Samsung, Nothing, vivo, Motorola ଓ Google ଭଳି ବ୍ରାଣ୍ଡ ଦେଉଛନ୍ତି ଜବରଦସ୍ତ ଫୋନ୍। ଆସନ୍ତୁ ଜାଣିବା ଏହି ବଜେଟ୍‌ରେ ଟପ୍-୫ ସ୍ମାର୍ଟଫୋନ୍ ବିଷୟରେ।

୧. Samsung Galaxy S25 5G – ପ୍ରିମିୟମ୍ ଅନୁଭୂତି ସହ AI ଫିଚର୍ସ- ଦାମ୍ ରହିଛି ୫୪,୯୯୯ ଟଙ୍କା

ପ୍ରିମିୟମ୍ ସ୍ମାର୍ଟଫୋନ୍ ଖୋଜୁଥିବା ଗ୍ରାହକଙ୍କ ପାଇଁ Samsung Galaxy S25 5G ଏକ ଆକର୍ଷଣୀୟ ବିକଳ୍ପ। ଏଥିରେ Snapdragon 8 Elite for Galaxy ପ୍ରୋସେସର ରହିଛି। ୧୨୦Hz Dynamic AMOLED 2X ଡିସପ୍ଲେ ଦେଖିବାର ଅନୁଭୂତିକୁ ଆହୁରି ଉନ୍ନତ କରେ। ଏହାର ଟ୍ରିପଲ୍ ରିୟର କ୍ୟାମେରା ସେଟଅପ୍‌ରେ 3x Optical Zoom ସୁବିଧା ରହିଛି। ଏଥିସହ Galaxy AI ଫିଚର୍ସ ଏହାକୁ ଆହୁରି ଆକର୍ଷଣୀୟ କରିଛି।

୨. Nothing Phone (4a) – ଷ୍ଟାଇଲିସ୍ ଲୁକ୍ ଓ ଦମଦାର କ୍ୟାମେରା- ଦାମ୍: ୪୪,୯୯୯ ଟଙ୍କା

ଅନ୍ୟମାନଙ୍କଠାରୁ ଅଲଗା ଡିଜାଇନ୍ ପସନ୍ଦ କରୁଥିଲେ Nothing Phone (4a) ଆପଣଙ୍କ ପସନ୍ଦ ହୋଇପାରେ। ଏଥିରେ Snapdragon 7s Gen 4 ପ୍ରୋସେସର ରହିଛି। ଡୁଆଲ୍ ୫୦MP କ୍ୟାମେରା ସହ ଏହାର ସ୍ୱତନ୍ତ୍ର Glyph Bar ଇଣ୍ଟରଫେସ୍ ଫୋନ୍‌କୁ ଏକ ଭିନ୍ନ ପରିଚୟ ଦେଇଥାଏ।

୩. vivo S2 FE – ବ୍ୟାଟେରୀ ପାଇଁ ଜବରଦସ୍ତ ବିକଳ୍ପ- ଦାମ୍ ରହିଛି ୩୮,୯୯୯ ଟଙ୍କା

ବାରମ୍ବାର ଫୋନ୍ ଚାର୍ଜ କରିବାକୁ ଚାହୁଁନଥିଲେ vivo S2 FE ଆପଣଙ୍କ ପାଇଁ ଏକ ଆକର୍ଷଣୀୟ ବିକଳ୍ପ। ଏଥିରେ ବିଶାଳ ୧୦,୦୦୦mAh ବ୍ୟାଟେରୀ ଦିଆଯାଇଛି। ଏହା ସହ IP68/IP69 ରେଟିଂ ଏବଂ Dimensity 7300e ପ୍ରୋସେସର ରହିଛି। ବ୍ୟାଟେରୀ ଓ ଡିଭାଇସ୍ ସୁରକ୍ଷାକୁ ଗୁରୁତ୍ୱ ଦେଉଥିବା ଗ୍ରାହକଙ୍କ ପାଇଁ ଏହା ଏକ ଆକର୍ଷଣୀୟ ପସନ୍ଦ ହୋଇପାରେ।

୪. Motorola Edge 70 Pro – ଡିସପ୍ଲେ ଓ ଫାଷ୍ଟ ଚାର୍ଜିଂର କମ୍ବୋ - ଦାମ୍ ରହିଛି ୪୨,୯୯୯ ଟଙ୍କା

ଗେମିଂ, ଭିଡିଓ ଦେଖିବା ଓ ଫଟୋଗ୍ରାଫି ପସନ୍ଦ କରୁଥିବା ଗ୍ରାହକଙ୍କ ପାଇଁ Motorola Edge 70 Pro ଏକ ଉଲ୍ଲେଖନୀୟ ଫୋନ୍। ଏଥିରେ ୧୪୪Hz AMOLED ଡିସପ୍ଲେ ଓ Dimensity 8500 Extreme ପ୍ରୋସେସର ରହିଛି। ସେଲ୍ଫି ପାଇଁ ୫୦MP ଫ୍ରଣ୍ଟ କ୍ୟାମେରା ସହ ୯୦W ଫାଷ୍ଟ ଚାର୍ଜିଂ ସୁବିଧା ମଧ୍ୟ ମିଳୁଛି।

୫. Google Pixel 10a – ସଫା ସଫ୍ଟୱେର୍ ଓ ଦୀର୍ଘକାଳୀନ ଅପଡେଟ୍- ଦାମ୍ ରହିଛି ୫୦,୮୯୫ ଟଙ୍କା

ସଫା ଆଣ୍ଡ୍ରଏଡ୍ ଅନୁଭୂତି ଓ ଦୀର୍ଘକାଳୀନ ସଫ୍ଟୱେର୍ ସପୋର୍ଟ ଚାହୁଁଥିବା ଗ୍ରାହକଙ୍କ ପାଇଁ Google Pixel 10a ଏକ ବିକଳ୍ପ। ଏଥିରେ Google Tensor G4 ପ୍ରୋସେସର ରହିଛି। କମ୍ପାନୀ ପକ୍ଷରୁ ୭ ବର୍ଷର OS ଅପଡେଟ୍, ସିକ୍ୟୁରିଟି ଅପଡେଟ୍ ଓ Pixel Drop ଅପଡେଟ୍‌ର ପ୍ରତିଶ୍ରୁତି ଦିଆଯାଇଛି।

କେଉଁ ଫୋନ୍ ଆପଣଙ୍କ ପାଇଁ ଭଲ?

• ପ୍ରିମିୟମ୍ ଫିଚର୍ସ: Samsung Galaxy S25 5G

• ଷ୍ଟାଇଲିସ୍ ଡିଜାଇନ୍: Nothing Phone (4a)

• ବଡ଼ ବ୍ୟାଟେରୀ: vivo S2 FE

• ହାଇ ରିଫ୍ରେସ୍ ରେଟ୍ ଓ ଫାଷ୍ଟ ଚାର୍ଜିଂ: Motorola Edge 70 Pro

• ଦୀର୍ଘକାଳୀନ ସଫ୍ଟୱେର୍ ସପୋର୍ଟ: Google Pixel 10a

କିଣିବା ପୂର୍ବରୁ ସାବଧାନ

ଏହି ଫୋନ୍‌ଗୁଡ଼ିକର ଉଲ୍ଲେଖିତ ଦାମ୍ ବଜାର ମୂଲ୍ୟ ଅନୁଯାୟୀ ଦିଆଯାଇଛି। ଅନଲାଇନ୍ ଅଫର୍, ବ୍ୟାଙ୍କ ଡିସକାଉଣ୍ଟ, ଏକ୍ସଚେଞ୍ଜ ଅଫର୍ ଓ ବିକ୍ରେତାଙ୍କ ଅନୁସାରେ ଅନ୍ତିମ ମୂଲ୍ୟରେ ପରିବର୍ତ୍ତନ ହୋଇପାରେ। ତେଣୁ କିଣିବା ପୂର୍ବରୁ ଦାମ୍ ଓ ଫିଚର୍ସ ନିଶ୍ଚିତ ଯାଞ୍ଚ କରନ୍ତୁ।

ନୂଆଦିଲ୍ଲୀ: ଭାରତର ଡିଜିଟାଲ୍ ଭବିଷ୍ୟତକୁ ନେଇ ଦେଶର ଦୁଇ ବଡ଼ ଶିଳ୍ପପତିଙ୍କ ମଧ୍ୟରେ ଆରମ୍ଭ ହୋଇଛି ବଡ଼ ପ୍ରତିଯୋଗିତା। ଗୋଟିଏ ପଟେ ମୁକେଶ ଅମ୍ବାନୀଙ୍କ ରିଲାଏନ୍ସ ଏଆଇ (AI) କ୍ଷେତ୍ରରେ ବିପୁଳ ନିବେଶ ଯୋଜନା କରୁଥିବାବେଳେ, ଅନ୍ୟପଟେ ଗୌତମ ଆଦାନୀ ଡାଟା ସେଣ୍ଟର ବ୍ୟବସାୟରେ ବଡ଼ ଦାଉ ଖେଳିବାକୁ ଯାଉଛନ୍ତି। ନିଜ ଡାଟା ସେଣ୍ଟର ବ୍ୟବସାୟର ସମ୍ପ୍ରସାରଣ ପାଇଁ ଅଡାନୀ ଗ୍ରୁପ୍ ପ୍ରାୟ ୧.୫ ବିଲିୟନ ଡଲାର ବା ୧୨,୫୦୦ କୋଟିରୁ ଅଧିକ ଟଙ୍କାର ବିଦେଶୀ ଋଣ ଉଠାଇବାକୁ ଯୋଜନା କରୁଥିବା ରିପୋର୍ଟ ସାମ୍ନାକୁ ଆସିଛି।

୧.୫ ବିଲିୟନ ଡଲାର ଋଣ ପାଇଁ ବିଦେଶୀ ବ୍ୟାଙ୍କ ସହ ଆଲୋଚନା

ରିପୋର୍ଟ ଅନୁସାରେ, ଆଦାନୀ ଗ୍ରୁପ୍‌ର ଯୁଗ୍ମ ଉଦ୍ୟୋଗ କମ୍ପାନୀ ଅଡାନୀକନେକ୍ସ ପ୍ରାଇଭେଟ୍ (AdaniConneX Pvt.) ଏହି ଋଣ ଉଠାଇବା ପ୍ରକ୍ରିୟାରେ ଆଗରେ ରହିଛି। ଏହି କମ୍ପାନୀ ଡାଟା ସେଣ୍ଟର ଅପରେଟର EdgeConneX ସହ ମିଶି ଗଠିତ ହୋଇଛି। ଏହି ବିଦେଶୀ ଋଣ ପାଇଁ ଡିବିଏସ୍ ଗ୍ରୁପ୍, ଫର୍ଷ୍ଟ ଆବୁଧାବି ବ୍ୟାଙ୍କ (FAB), ମିତ୍ସୁବିସି UFJ ଫାଇନାନ୍ସିଆଲ୍ ଗ୍ରୁପ୍ (MUFG) ସମେତ ଅନେକ ବଡ଼ ଅନ୍ତର୍ଜାତୀୟ ବ୍ୟାଙ୍କ ସହ ଆଲୋଚନା ଚାଲିଥିବା ସୂତ୍ରରୁ ଜଣାପଡ଼ିଛି।

ଏହାବ୍ୟତୀତ ନାଟିକ୍ସିସ୍ (Natixis), ING ବ୍ୟାଙ୍କ ଏବଂ ସୋସାଇଟି ଜେନେରାଲ୍ (Societe Generale) ଭଳି ଗ୍ଲୋବାଲ୍ ଫାଇନାନ୍ସିଂ ସଂସ୍ଥା ସହ ମଧ୍ୟ ଆଲୋଚନା ହେଉଛି। ଏହି ଋଣର ଅବଧି ୫ରୁ ୭ ବର୍ଷ ହୋଇପାରେ। ତେବେ ସୁଧ ହାର ଓ ଅନ୍ୟାନ୍ୟ ସର୍ତ୍ତ ଏଯାଏଁ ଚୂଡ଼ାନ୍ତ ହୋଇନାହିଁ।

୨୦୩୫ ସୁଦ୍ଧା ୧୦୦ ବିଲିୟନ ଡଲାର ନିବେଶ ଲକ୍ଷ୍ୟ

ଆଦାନୀ ଗ୍ରୁପ୍ ଏବେ କେବଳ ଶକ୍ତି କ୍ଷେତ୍ରରେ ନୁହେଁ, ଡିଜିଟାଲ୍ ଇନଫ୍ରାଷ୍ଟ୍ରକ୍ଚର କ୍ଷେତ୍ରରେ ମଧ୍ୟ ନିଜର ପ୍ରଭାବ ବଢ଼ାଇବାକୁ ଚାହୁଁଛି। ୨୦୩୫ ସୁଦ୍ଧା ଡାଟା ସେଣ୍ଟର ସମେତ ଅନ୍ୟ ଡିଜିଟାଲ୍ ଭିତ୍ତିଭୂମିରେ ପ୍ରାୟ ୧୦୦ ବିଲିୟନ ଡଲାର ନିବେଶ କରିବାର ଯୋଜନା ରହିଛି। ଏହି ନୂଆ ଋଣ ଯୋଜନାକୁ ଏହି ବଡ଼ ଲକ୍ଷ୍ୟର ଏକ ଅଂଶ ଭାବେ ଦେଖାଯାଉଛି। ଉଲ୍ଲେଖଯୋଗ୍ୟ, କିଛି ମାସ ପୂର୍ବରୁ ଅଡାନୀକନେକ୍ସ ୮୦୦ ମିଲିୟନ ଡଲାରର ଡାଟା ସେଣ୍ଟର ଋଣ ହାସଲ କରିଥିଲା। ଏହି ଋଣର ଅବଧି ୧୮ ମାସ ଥିଲା।

ଅମ୍ବାନୀ ମଧ୍ୟ ପଛରେ ନାହାନ୍ତି, AIରେ ୧୧୦ ବିଲିୟନ ଡଲାର ନିବେଶ ଯୋଜନା

ଡାଟା ସେଣ୍ଟର ଓ ଏଆଇ ଭିତ୍ତିଭୂମି କ୍ଷେତ୍ରରେ ଅଡାନୀଙ୍କୁ କଡ଼ା ଟକ୍କର ଦେବାକୁ ରିଲାଏନ୍ସ ମଧ୍ୟ ପ୍ରସ୍ତୁତ। ମୁକେଶ ଅମ୍ବାନୀଙ୍କ ରିଲାଏନ୍ସ ଗ୍ରୁପ୍ ଆଗାମୀ ୭ ବର୍ଷ ମଧ୍ୟରେ ଏଆଇ ଭିତ୍ତିଭୂମି କ୍ଷେତ୍ରରେ ୧୧୦ ବିଲିୟନ ଡଲାର ପର୍ଯ୍ୟନ୍ତ ନିବେଶ କରିବାର ଯୋଜନା ରଖିଛି। ଏହି ଦୁଇ ବଡ଼ କମ୍ପାନୀଙ୍କ ନିବେଶ ଯୋଜନା ଭାରତର ଡିଜିଟାଲ୍ ଇନଫ୍ରାଷ୍ଟ୍ରକ୍ଚର ବଜାରକୁ ନୂଆ ଦିଗ ଦେଇପାରେ।

କାହିଁକି ବଢ଼ୁଛି ଡାଟା ସେଣ୍ଟରର ଚାହିଦା?

ବର୍ତ୍ତମାନ ଏଆଇ, କ୍ଲାଉଡ୍ କମ୍ପ୍ୟୁଟିଂ ଓ ଡିଜିଟାଲ୍ ସେବାର ବ୍ୟବହାର ଦ୍ରୁତ ଗତିରେ ବଢ଼ୁଛି। ଏହି ସେବାଗୁଡ଼ିକୁ ଚାଲୁ ରଖିବା ପାଇଁ ବିପୁଳ ଡାଟା ସଂରକ୍ଷଣ ଓ ପ୍ରୋସେସିଂ କ୍ଷମତା ଆବଶ୍ୟକ। ଏଥିପାଇଁ ଡାଟା ସେଣ୍ଟରର ଗୁରୁତ୍ୱ ବଢ଼ିଯାଇଛି।

ଏହି କ୍ଷେତ୍ରରେ ଭାରତ ଏକ ବଡ଼ ବଜାର ଭାବେ ଉଭା ହେଉଛି। ରିପୋର୍ଟ ଅନୁସାରେ, ଅଗଷ୍ଟ ୨୦୨୬ ସୁଦ୍ଧା ଭାରତର ଡାଟା ସେଣ୍ଟର କ୍ଷମତା ପ୍ରାୟ ୧.୫୭ ଗିଗାୱାଟ୍ ଥିଲା। ୨୦୩୦ ସୁଦ୍ଧା ଏହା ପ୍ରାୟ ୮ ଗିଗାୱାଟ୍‌ରେ ପହଞ୍ଚିବା ନେଇ ଆକଳନ କରାଯାଇଛି। ଆଗାମୀ ୭ରୁ ୮ ବର୍ଷ ମଧ୍ୟରେ ଭାରତର ଡାଟା ସେଣ୍ଟର ବଜାରରେ ପ୍ରାୟ ୨୦୦ ବିଲିୟନ ଡଲାର ନିବେଶ ଆସିବାର ସମ୍ଭାବନା ରହିଛି।

ଡିଜିଟାଲ୍ ଭାରତରେ ଆରମ୍ଭ ହେବ କର୍ପୋରେଟ୍ ମହାଲଢ଼େଇ?

ଗୋଟିଏ ପଟେ ଆଦାନୀଙ୍କ ୧୦୦ ବିଲିୟନ ଡଲାରର ଡିଜିଟାଲ୍ ଭିତ୍ତିଭୂମି ନିବେଶ ଲକ୍ଷ୍ୟ, ଅନ୍ୟପଟେ ଅମ୍ବାନୀଙ୍କ ୧୧୦ ବିଲିୟନ ଡଲାରର AI ନିବେଶ ଯୋଜନା। ଦୁଇ ଶିଳ୍ପଗୋଷ୍ଠୀଙ୍କ ଏହି ବଡ଼ ଯୋଜନା ଭାରତର ଡାଟା ସେଣ୍ଟର ଓ AI ବଜାରରେ ନୂଆ ପ୍ରତିଯୋଗିତା ସୃଷ୍ଟି କରିବାକୁ ଯାଉଛି। ଏହାର ପ୍ରଭାବ ଆଗାମୀ ଦିନରେ ଦେଶର ଡିଜିଟାଲ୍ ଅର୍ଥନୀତି ଉପରେ କିପରି ପଡ଼ିବ, ତାହା ଉପରେ ସମସ୍ତଙ୍କ ନଜର।