ନୂଆଦିଲ୍ଲୀ: ସ୍ପେନ୍‌ର କେନ୍ଦ୍ରାଞ୍ଚଳରେ ଦୁଇଟି ଟ୍ରେନ୍ ମଧ୍ୟରେ ଭୟଙ୍କର ଦୁର୍ଘଟଣା ହୋଇଛି । ବୁଧବାର ସକାଳେ ଟୋଲେଡୋରେ ହୋଇଥିବା ଟ୍ରେନ ଦୁର୍ଘଟଣାରେ ପ୍ରାୟ ୩୯ ଜଣଙ୍କର ମୃତ୍ୟୁ ହୋଇଛି । ଏ ନେଇ ସ୍ପେନ୍‌ର ରେଳ ନେଟୱାର୍କ ପରିଚାଳନା କରୁଥିବା ସଂସ୍ଥା 'ADIF' ସୂଚନା ଦେଇଛି । 

ବ୍ରିଟିଶ୍ ଗଣମାଧ୍ୟମ 'ଦ ଇଣ୍ଡିପେଣ୍ଡେଣ୍ଟ୍'ର ଏକ ରିପୋର୍ଟ ଅନୁଯାୟୀ, ସ୍ପେନ୍‌ରେ ଦୁଇଟି ଦ୍ରୁତଗାମୀ ଟ୍ରେନ୍ ପରସ୍ପର ସହ ଧକ୍କା ହେବା ଫଳରେ ପ୍ରାୟ ୩୯ ଜଣଙ୍କର ମୃତ୍ୟୁ ହୋଇଛି । ଆଗକୁ ଆହୁରି ମୃତ୍ୟୁ ସଂଖ୍ୟା ବଢ଼ିପାରେ ବୋଲି ଅନୁମାନ କରାଯାଉଛି । 

ଦୁଇଟି ଦ୍ରୁତଗାମୀ ଟ୍ରେନ୍ ଗୋଟିଏ ଦିଗରେ ଯାଉଥିଲେ । ଗୋଟିଏ ଟ୍ରେନ୍ ଅନ୍ୟ ଏକ ଟ୍ରେନ୍‌ର ପଛ ଭାଗରେ ଧକ୍କା ହେବା ପରେ ଦୁଇଟି ବଗି ଲାଇନ୍‌ଚ୍ୟୁତ ହୋଇଯାଇଛି । ଉଦ୍ଧାରକାରୀ ଦଳ ପହଁଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲେ । ଆହତମାନଙ୍କୁ ଚିକିତ୍ସା ପାଇଁ ସହରର ଟାଉନ୍ ହଲ୍‌ରେ ଥିବା ଏକ କ୍ରୀଡ଼ା ଭବନକୁ ବ୍ୟବହାର କରିବାକୁ ଅନୁରୋଧ କରିଛନ୍ତି।

ଏହି ଦୁର୍ଘଟଣାକୁ ସ୍ପେନର ହାଇ-ସ୍ପିଡ୍ ରେଳ ନେଟୱାର୍କ ପାଇଁ ଏକ ବିପର୍ଯ୍ୟୟ ବୋଲି ବିବେଚନା କରାଯାଉଛି। ଏଠାରେ ଉଲ୍ଲେଖନୀୟ ଯେ ଚଳିତ ବର୍ଷ ଜାନୁଆରୀ ମାସରେ ଦକ୍ଷିଣ ସ୍ପେନରେ ଏକ ବଡ଼ ଦୁର୍ଘଟଣା ଘଟିଥିଲା। ଏକ ଟ୍ରେନ୍ ଲାଇନଚ୍ୟୁତ ହୋଇ ଅନ୍ୟ ଏକ ଆସୁଥିବା ଟ୍ରେନ୍ ସହିତ ଧକ୍କା ହୋଇଥିଲା, ଯେଉଁଥିରେ ୪୬ ଜଣଙ୍କର ମୃତ୍ୟୁ ହୋଇଥିଲା। ୨୦୧୩ ଦୁର୍ଘଟଣା ପରେ ସେହି ଦୁର୍ଘଟଣା ସ୍ପେନରେ ସବୁଠାରୁ ଭୟଙ୍କର ଥିଲା, ଯେଉଁଥିରେ ୮୦ ଜଣଙ୍କର ଜୀବନ ଯାଇଥିଲା।

ନୂଆଦିଲ୍ଲୀ: ଇସ୍ରାଏଲରେ ଅନୁଷ୍ଠିତ ସଂସଦ ନିର୍ବାଚନ ପରେ ମତ ଗଣନା ଜାରି ରହିଛି । ଏକ୍ସିଟ୍ ପୋଲ୍ ଏବଂ ଭୋଟ୍ ଗଣନାର ପ୍ରାରମ୍ଭିକ ତଥ୍ୟରୁ ଏହା ସ୍ପଷ୍ଟ ହୋଇଛି ଯେ ବେଞ୍ଜାମିନ ନେତନ୍ୟାହୁ ଇସ୍ରାଏଲର ପ୍ରଧାନମନ୍ତ୍ରୀ ପଦ ବଜାୟ ରଖିବେ । ନେତନ୍ୟାହୁଙ୍କ ଦଳ ବିଜୟ ଅଭିମୁଖେ ଅଗ୍ରସର ହେଉଛି । 

ଇସ୍ରାଏଲ୍ ନିର୍ବାଚନର ଆଂଶିକ ଭୋଟ୍ ଗଣନା ଅନୁଯାୟୀ, ନେତାନ୍ୟାହୁଙ୍କ ନେତୃତ୍ୱାଧୀନ ମେଣ୍ଟ ୫୬ଟି ଆସନ ହାସଲ କରିବା ପଥରେ ରହିଛି । ଅନ୍ୟପକ୍ଷରେ ଗାଡି ଆଇଜେନକୋଟଙ୍କ ନେତୃତ୍ୱାଧୀନ ବିରୋଧୀ ଗୋଷ୍ଠୀ ୪୮ଟି ଆସନ ସହ ଆଗରେ ରହିଛି । ନେତାନ୍ୟାହୁଙ୍କ ବିରୋଧୀ ଆରବ ଦଳଗୁଡ଼ିକ ୧୬ଟି ଆସନ ଜିତିବା ସ୍ଥିତିରେ ଥିବା ପରି ମନେହେଉଛି । ୧୨୦ ସଦସ୍ୟ ବିଶିଷ୍ଟ ସଂସଦରେ ସରକାର ଗଠନ କରିବା ପାଇଁ ୬୧ଟି ଆସନ ଆବଶ୍ୟକ। ବର୍ତ୍ତମାନ ସୁଦ୍ଧା ମୋଟ ଭୋଟର ୬୬.୨% ଗଣନା କରାଯାଇଛି ।

ସେପଟେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ନିଜକୁ ନିଜେ ପ୍ରଶଂସାରେ ପୋତି ପକାଇଛନ୍ତି । ଟ୍ରମ୍ପ ସୋସିଆଲ୍ ମିଡ଼ିଆରେ କହିଛନ୍ତି ଯେ ତାଙ୍କ ସମର୍ଥନ ପାଇଁ ନେତନ୍ୟାହୁ ଜିତିବାକୁ ଯାଉଛନ୍ତି । 

ଟ୍ରମ୍ପ ଦାବି କରିଛନ୍ତି ଯେ ତାଙ୍କ ସମର୍ଥନ ଯୋଗୁଁ ପ୍ରଧାନମନ୍ତ୍ରୀ ନେତାନ୍ୟାହୁ ନିର୍ବାଚନରେ ଲାଭବାନ ହୋଇଛନ୍ତି । ତାଙ୍କ ସମର୍ଥନ ପରେ ନିର୍ବାଚନୀ ଦୃଶ୍ୟପଟ ବଦଳି ଯାଇଛି। ଟେକ୍ସାସରେ ଏକ ରାଲି ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଟ୍ରମ୍ପ ଉଲ୍ଲେଖ କରିଛନ୍ତି ଯେ ନେତନ୍ୟାହୁ ପ୍ରାରମ୍ଭିକ ନିର୍ବାଚନରେ ଭଲ ପ୍ରଦର୍ଶନ କରୁଥିବା ପରି ମନେ ହେଉଛି ଏବଂ ତାଙ୍କ ସମର୍ଥନ ଏକ ଗୁରୁତ୍ୱପୂର୍ଣ୍ଣ ପ୍ରୋତ୍ସାହନ ଯୋଗାଇଛି। 

ଇସ୍ରାଏଲ ସାଧାରଣ ନିର୍ବାଚନରେ ୭୦ ଲକ୍ଷରୁ ଅଧିକ ଭୋଟର ମତଦାନ କରିବେ। ସଂସଦରେ ୧୨୦ଟି ଆସନ ଥିବାବେଳେ ସରକାର ଗଢ଼ିବାକୁ ୬୧ଟି ଆସନ ଆବଶ୍ୟକ । ଆଜି ନିର୍ବାଚନରେ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କ ବ୍ୟତିତ, ପୂର୍ବତନ ସେନା ମୁଖ୍ୟ ଗାଦି ଆଇଜେନକୋଟ, ପୂର୍ବତନ ପ୍ରଧାନମନ୍ତ୍ରୀ ନାଫ୍ଟାଲି ବେନେଟ, ୟାୟର ଲାପିଡ, ପୂର୍ବତନ ପ୍ରତିରକ୍ଷା ମନ୍ତ୍ରୀ ଓ ଆଭିଗଡୋର୍ ଲିବର୍ମ୍ୟାନ୍ ମଇଦାନରେ ଅଛନ୍ତି । ଏହି ନିର୍ବାଚନକୁ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ପାଇଁ ଏପର୍ଯ୍ୟନ୍ତ ସବୁଠାରୁ ବଡ଼ ଏବଂ କଠିନ ପରୀକ୍ଷା ବୋଲି ବିବେଚନା କରାଯାଉଛି । 

ଦୁବାଇରେ ଏବେ ସୁନାର ଚମକରେ ଝଲସିବ ରାସ୍ତା। ସୁନା କିଣିବା ପାଇଁ ନୁହେଁ, ବରଂ ସୁନାରେ ତିଆରି ରାସ୍ତା ଉପରେ ଚାଲିବା ପାଇଁ ମିଳିବ ସୁଯୋଗ। ବିଶ୍ୱର ପ୍ରଥମ ତଥା ସବୁଠାରୁ ଲମ୍ବା ୨୪ କ୍ୟାରେଟ୍ ସୁନାର ୱାକ୍‌ୱେ ନିର୍ମାଣ କରିବାକୁ ଘୋଷଣା କରିଛି ଦୁବାଇ ଗୋଲ୍ଡ ଡିଷ୍ଟ୍ରିକ୍ଟ। ୨୦୨୬ ଶେଷ ସୁଦ୍ଧା ଏହାକୁ ସାଧାରଣ ଲୋକଙ୍କ ପାଇଁ ଖୋଲାଯିବାର ଯୋଜନା ରହିଛି। ଯଦି ଏହି ପ୍ରକଳ୍ପ ଯୋଜନା ଅନୁଯାୟୀ ଆଗକୁ ବଢ଼େ, ତେବେ ଏହା ଦୁବାଇର ଆଉ ଏକ ଆକର୍ଷଣୀୟ ପର୍ଯ୍ୟଟନସ୍ଥଳୀ ପାଲଟିପାରେ।

କେଉଁଠି ନିର୍ମାଣ ହେଉଛି ସୁନାର ରାସ୍ତା?

ଦୁବାଇର ଡେଇରା ଅଞ୍ଚଳରେ ଥିବା ଗୋଲ୍ଡ ଡିଷ୍ଟ୍ରିକ୍ଟରେ ଏହି ୱାକ୍‌ୱେ ନିର୍ମାଣ କରାଯିବାର ଯୋଜନା ରହିଛି। ଡିଷ୍ଟ୍ରିକ୍ଟର କମର୍ସିଆଲ୍ ସେକ୍ଟରର ସିନିୟର ଡାଇରେକ୍ଟର ରାଶିଦ ଅଲ୍ ହରମୂଦିଙ୍କ ସୂଚନା ଅନୁଯାୟୀ, ଏହା ନିଜ ଧରଣର ପ୍ରଥମ ଏବଂ ବିଶ୍ୱର ସବୁଠାରୁ ଲମ୍ବା ୱାକ୍‌ୱେ ହେବ।

ଏହି ସୁନାର ରାସ୍ତାରେ ଚାଲିବା ସହ ପର୍ଯ୍ୟଟକମାନେ ଫଟୋ ଉଠାଇବା ଏବଂ ଏକ ନିଆରା ଅନୁଭୂତି ହାସଲ କରିବାର ସୁଯୋଗ ପାଇପାରିବେ। ତେବେ ଏହାର ପ୍ରକୃତ ଲମ୍ବ, ନିର୍ମାଣ ଖର୍ଚ୍ଚ ଏବଂ କେତେ ପରିମାଣର ସୁନା ବ୍ୟବହାର ହେବ, ସେନେଇ ଏଯାଏଁ ସବିଶେଷ ତଥ୍ୟ ପ୍ରକାଶ ପାଇନାହିଁ।

କେବଳ ସୁନା ନୁହେଁ, ବଡ଼ ବ୍ୟବସାୟିକ ହବ୍ ମଧ୍ୟ

୨୦୨୬ ଜାନୁଆରୀରେ ଆରମ୍ଭ ହୋଇଥିବା ଦୁବାଇ ଗୋଲ୍ଡ ଡିଷ୍ଟ୍ରିକ୍ଟରେ ସୁନା, ଅଳଙ୍କାର, ବୁଲିଅନ୍ ଏବଂ ହୋଲସେଲ୍ ବ୍ୟବସାୟ ସହ ବିଭିନ୍ନ ଲାଇଫ୍‌ଷ୍ଟାଇଲ୍ ସାମଗ୍ରୀର ବଜାର ରହିଛି। ରିପୋର୍ଟ ଅନୁସାରେ, ଏଠାରେ ୧,୦୦୦ରୁ ଅଧିକ ରିଟେଲ୍ ବ୍ୟବସାୟୀ କାର୍ଯ୍ୟ କରୁଛନ୍ତି।

ଏହି ଅଞ୍ଚଳରେ ସୁନା ଓ ଅଳଙ୍କାର ବ୍ୟବସାୟକୁ ଆହୁରି ବଢ଼ାଇବା ସହ ଏକ ବୃହତ୍ ପ୍ରଦର୍ଶନୀ କେନ୍ଦ୍ର ନିର୍ମାଣ କରିବାର ମଧ୍ୟ ଯୋଜନା ରହିଛି। ଏହା ଦୁବାଇକୁ ବିଶ୍ୱର ପ୍ରମୁଖ ସୁନା ବ୍ୟବସାୟ କେନ୍ଦ୍ର ଭାବେ ଆହୁରି ମଜଭୁତ କରିବାରେ ସହାୟକ ହୋଇପାରେ।

କେବେ ଖୋଲିବ ଏହି ସୁନାର ରାସ୍ତା?

ଯୋଜନା ଅନୁଯାୟୀ, ୨୦୨୬ ଶେଷ ସୁଦ୍ଧା ଏହି ୱାକ୍‌ୱେକୁ ଲୋକଙ୍କ ପାଇଁ ଖୋଲିବାର ଲକ୍ଷ୍ୟ ରଖାଯାଇଛି। ଏହାର ନିର୍ମାଣ ପ୍ରଣାଳୀ ଏବଂ ସୁନାର ବ୍ୟବହାର ସମ୍ପର୍କରେ ଅଧିକ ବିବରଣୀ ଆସିବା ବାକି ରହିଛି।

ସୁନାର ବଜାର ପାଇଁ ପରିଚିତ ଦୁବାଇ ଏବେ ସୁନାର ରାସ୍ତା ଜରିଆରେ ପର୍ଯ୍ୟଟକଙ୍କୁ ଆକର୍ଷିତ କରିବାକୁ ଯାଉଛି। ଏହି ପ୍ରକଳ୍ପ ବାସ୍ତବ ରୂପ ନେଲେ, ଦୁବାଇର ବିଳାସପୂର୍ଣ୍ଣ ପର୍ଯ୍ୟଟନ ଜଗତରେ ଆଉ ଏକ ନୂଆ ଅଧ୍ୟାୟ ଯୋଡ଼ି ହେବ। 

🚨Dubai Plans World's Longest 24-Karat Gold Walkway by end of 2026. https://t.co/FU1EY7iWkG

— Indian Infra Report (@Indianinfoguide) October 27, 2026

ନୂଆଦିଲ୍ଲୀ: ଅପରେସନ ସିନ୍ଦୂର ପରେ ଭାରତ-ପାକିସ୍ତାନ ସମ୍ପର୍କରେ ତିକ୍ତତା ଲାଗି ରହିଥିବା ବେଳେ ଏବେ ସାମ୍ନାକୁ ଆସିଛି ଏକ ବଡ଼ କୂଟନୈତିକ ଖବର। ସାଂଘାଇ ସହଯୋଗ ସଂଗଠନ (SCO)ର ପ୍ରଥମ ସଭ୍ୟତା ସଂଳାପ ଫୋରମ୍‌ରେ ଯୋଗଦେବା ପାଇଁ ଭାରତ ପାକିସ୍ତାନ ସମେତ ସମସ୍ତ ୧୦ଟି ସଦସ୍ୟ ଦେଶକୁ ନିମନ୍ତ୍ରଣ କରିଛି। ନଭେମ୍ବର ୨୦ରୁ ୨୨ ପର୍ଯ୍ୟନ୍ତ ନୂଆଦିଲ୍ଲୀରେ ଏହି ଫୋରମ୍ ଅନୁଷ୍ଠିତ ହେବ।

ଏହି ନିମନ୍ତ୍ରଣ ଅପରେସନ ସିନ୍ଦୂରର ପ୍ରାୟ ୧୮ ମାସ ପରେ ଆସିଥିବାରୁ ଏହାକୁ ନେଇ ଚର୍ଚ୍ଚା ବଢ଼ିଛି। ପାକିସ୍ତାନର ଜାତୀୟ ଐତିହ୍ୟ ଓ ସଂସ୍କୃତି ମନ୍ତ୍ରୀ ଔରଙ୍ଗଜେବ ଖାନ ଖିଚିଙ୍କୁ ମଧ୍ୟ ଏହି କାର୍ଯ୍ୟକ୍ରମ ପାଇଁ ନିମନ୍ତ୍ରଣ ମିଳିଥିବା ସୂଚନା ରହିଛି।

ତେବେ ଏହି ପଦକ୍ଷେପକୁ ଭାରତ-ପାକିସ୍ତାନ ଦ୍ୱିପାକ୍ଷିକ ସମ୍ପର୍କରେ ସୁଧାରର ସଙ୍କେତ ବୋଲି ଧରିନେବା ଠିକ୍ ହେବ ନାହିଁ। ଅଧିକାରୀଙ୍କ ଅନୁସାରେ, ଏହା ଏକ ବହୁପକ୍ଷୀୟ କାର୍ଯ୍ୟକ୍ରମ ଏବଂ SCOର ସମସ୍ତ ସଦସ୍ୟ ଦେଶକୁ ନିମନ୍ତ୍ରଣ କରାଯାଇଛି। ତେଣୁ ଏହାକୁ ଦୁଇ ଦେଶର ଦ୍ୱିପାକ୍ଷିକ ସମ୍ପର୍କଠାରୁ ଅଲଗା କରି ଦେଖିବାକୁ ହେବ।

କାହିଁକି ତିକ୍ତ ହୋଇଥିଲା ସମ୍ପର୍କ?

୨୦୨୫ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ପରେ ଭାରତ ମେ’ ୭ ତାରିଖରେ ଅପରେସନ ସିନ୍ଦୂର ଆରମ୍ଭ କରିଥିଲା। ଏହି ସାମରିକ ଅଭିଯାନରେ ପାକିସ୍ତାନ ଓ ପାକ୍ ଅଧିକୃତ କାଶ୍ମୀରରେ ଥିବା ଆତଙ୍କବାଦୀ ଶିବିରଗୁଡ଼ିକୁ ଟାର୍ଗେଟ କରାଯାଇଥିଲା। ମେ’ ୧୦ ତାରିଖରେ ଯୁଦ୍ଧବିରତି ଘୋଷଣା ହୋଇଥିଲେ ମଧ୍ୟ ଦୁଇ ଦେଶ ମଧ୍ୟରେ ତିକ୍ତତା ଜାରି ରହିଛି।

ଆତଙ୍କବାଦ ପ୍ରସଙ୍ଗରେ ଭାରତର ଆଭିମୁଖ୍ୟ ସ୍ପଷ୍ଟ

ଏସସିଓ ବୈଠକରେ ଭାରତ ଆତଙ୍କବାଦ ବିରୋଧରେ କଠୋର ଆଭିମୁଖ୍ୟ ଜାରି ରଖିଛି। ଅକ୍ଟୋବର ୨୦ରେ ତାଜିକିସ୍ତାନର ଦୁଶାନବେରେ ଅନୁଷ୍ଠିତ ଏସସିଓ ସରକାର ମୁଖ୍ୟମାନଙ୍କ ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆତଙ୍କବାଦକୁ ମୂଳପୋଛ କରିବା ପାଇଁ ମିଳିତ ପଦକ୍ଷେପ ନେବାକୁ ଆହ୍ୱାନ ଦେଇଥିଲେ।

ଏସସିଓରେ ଭାରତ, ପାକିସ୍ତାନ, ଚୀନ୍, ରୁଷିଆ, ଇରାନ, ବେଲାରୁସ, କାଜାଖସ୍ତାନ, କିର୍ଗିଜସ୍ତାନ, ତାଜିକିସ୍ତାନ ଓ ଉଜବେକିସ୍ତାନ ସଦସ୍ୟ ରହିଛନ୍ତି। ନଭେମ୍ବରରେ ହେବାକୁ ଥିବା ଏହି ସଂଳାପ ଫୋରମ୍‌ରେ ପାକିସ୍ତାନର ଅଂଶଗ୍ରହଣ ଏବଂ ଆଞ୍ଚଳିକ ସମ୍ପର୍କ ଉପରେ ଏହାର ପ୍ରଭାବକୁ ନେଇ ନଜର ରହିବ।

ନୂଆଦିଲ୍ଲୀ: ନିଜ ଜୀବନକୁ ବାଜିରେ ଲଗାଇ ଶତାଧିକ ଯାତ୍ରୀଙ୍କ ଜୀବନ ବଞ୍ଚାଇଥିବା କ୍ୟାପଟେନ୍ ସ୍ମିତ ମଚ୍ଛାରଙ୍କୁ ୟୁନାଇଟେଡ୍ ଆରବ୍ ଏମିରେଟ୍ସ ସମ୍ମାନୀତ କରିଛି । ମଙ୍ଗଳବାର ୟୁଏଇ ରାଷ୍ଟ୍ରପତି ଶେଖ ମହମ୍ମଦ ବିନ ଜାୟଦ ଅଲ୍ ନାହୟାନ କ୍ୟାପଟେନ୍ ମଚ୍ଛାର ଏବଂ ଫ୍ଲାଇଦୁବାଇ ବିମାନର କ୍ର୍ୟୁ ସଦସ୍ୟଙ୍କୁ “ଫାଷ୍ଟ କ୍ଲାସ୍ ଅର୍ଡର୍ ଅଫ୍ ଜାୟଦ-2ୟ” ସମ୍ମାନରେ ସମ୍ମାନୀତ କରିଛନ୍ତି । 

ରାଷ୍ଟ୍ରପତି ଶେଖ ମହମ୍ମଦ, ଦୁବାଇ ରାଷ୍ଟ୍ରପତି, ପ୍ରଧାନମନ୍ତ୍ରୀ ଏବଂ ଶେକ ମହମ୍ମଦ ବିନ୍ ରାଶିଦ ଅଲ୍ ମକତୁମ ସମସ୍ତ କ୍ର୍ୟୁ ସଦସ୍ୟଙ୍କ ସାକ୍ଷାତ କରିବା ସହିତ ଆଲୋଚନା କରିଥିଲେ । ମଚ୍ଛାରଙ୍କ ସାହସିକତା ପାଇଁ ପ୍ରଶଂସା କରିଛନ୍ତି । ବୈଠକ ସମୟରେ କ୍ରୁ ସଦସ୍ୟଙ୍କ ଭୂମିକା ଏବଂ ସାହସ ପାଇଁ ପ୍ରଶଂସା କରିଥିଲେ। ଯାତ୍ରୀମାନଙ୍କ ସୁରକ୍ଷା ସୁନିଶ୍ଚିତ କରିବାରେ କ୍ରୁ ସଦସ୍ୟଙ୍କ ଦ୍ୱାରା ପ୍ରଦର୍ଶିତ ଉଚ୍ଚସ୍ତରୀୟ ଦାୟିତ୍ୱର ପ୍ରଶଂସା କରିଥିଲେ। ସମସ୍ତେ ଗୁରୁତ୍ୱାରୋପ କରିଥିଲେ ଯେ ମାନବ ସୁରକ୍ଷା ଏବଂ ଉଦ୍ଧାର ୟୁଏଇର ପ୍ରମୁଖ ପ୍ରାଥମିକତା ରହିଛି।

ଏଠାରେ ଉଲ୍ଲେଖ ଯୋଗ୍ୟ, ସେପ୍ଟେମ୍ବର ୩୦ ତାରିଖରେ, ଦୁବାଇରୁ ତେଲ ଅଭିଭ୍ ଯାଉଥିବା ଫ୍ଲାଇଦୁବାଇ ବିମାନ FZ 1073, କକପିଟ୍ ଭିତରେ କୋ-ପାଇଲଟ୍, କ୍ୟାପଟେନ୍ ସ୍ମିତଙ୍କ ଉପରେ ମରଣାନ୍ତକ ଆକ୍ରମଣ କରିଥିଲେ । ସେ ବିମାନକୁ ନିଜ ଅଧିନକୁ ନେଇ ଏକ ବଡ଼ ବିସ୍ଫୋରଣ କରିବା ପାଇଁ ଆତଙ୍କୀ ଷଡ଼ଯନ୍ତ୍ର ରଚିଥିଲେ । ମାତ୍ର ସ୍ମିତ ମଚ୍ଛାର ଗମ୍ଭୀର ଆହତ ହୋଇ ମଧ୍ୟ ନିଜର ସାହସିକତା ଦେଖାଇ କକପିଟ୍ ଦ୍ୱାର ଖୋଲି ଦେଇଥିଲେ ଫଳରେ ଅନ୍ୟ ସଦସ୍ୟମାନେ ଆକ୍ରମଣକାରୀଙ୍କୁ କାବୁ କରି ନେଇଥିଲେ । ଆଉ ବିମାନକୁ ସୁରକ୍ଷିତ ଭାବେ ଜରୁରୀ ଅବତରଣ କରାଯାଇଥିଲା । ସମସ୍ତ ୧୭୨ ଜଣ ଯାତ୍ରୀ ଓ କର୍ମଚାରୀ ସୁରକ୍ଷିତ ଥିଲେ।

ନୂଆଦିଲ୍ଲୀ: ସାଉଦି ଆରବର ରାଜଧାନୀ ରିୟାଦ ଏବଂ ଏହାର ଆଖପାଖ ଅଞ୍ଚଳରେ ହୁତି ବିଦ୍ରୋହୀମାନଙ୍କ ଦ୍ୱାରା ହୋଇଥିବା ଆକ୍ରମଣ ପରେ ସେଠାରେ ରହୁଥିବା ପ୍ରବାସୀ ଭାରତୀୟଙ୍କ ସୁରକ୍ଷାକୁ ନେଇ ଭାରତ ସରକାର ସତର୍କ ହୋଇଛନ୍ତି। ରିୟାଦସ୍ଥିତ ଭାରତୀୟ ଦୂତାବାସ ପକ୍ଷରୁ ଗତ ମଙ୍ଗଳବାର ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ଜରୁରୀ ଆଡଭାଇଜରୀ ଜାରି କରାଯାଇଛି।

ସାଉଦି ପ୍ରଶାସନ ଏବଂ ସ୍ଥାନୀୟ କର୍ତ୍ତୃପକ୍ଷଙ୍କ ଦ୍ୱାରା ଜାରି କରାଯାଇଥିବା ସମସ୍ତ ସୁରକ୍ଷା ନିର୍ଦ୍ଦେଶାବଳୀକୁ କଡ଼ାକଡ଼ି ଭାବେ ପାଳନ କରିବାକୁ ଭାରତୀୟ ମାନଙ୍କୁ ଅନୁରୋଧ କରାଯାଇଛି। ଭାରତୀୟ ଦୂତାବାସ ପକ୍ଷରୁ ସାଉଦି  ଆରବର ସିଭିଲ ଡିଫେନ୍ସ ଜେନେରାଲ ଡାଇରେକ୍ଟୋରେଟ୍ (DCD)ର ସେୟାର କରାଯାଇଥିବା ସତର୍କତା ସୂଚନାକୁ ପୁନଃ-ପ୍ରକାଶ କରାଯାଇ ନାଗରିକଙ୍କୁ ସୁରକ୍ଷିତ ରହିବାକୁ ପରାମର୍ଶ ଦିଆଯାଇଛି।

ସାଉଦି  ଆରବର ସିଭିଲ ଡିଫେନ୍ସ ଡାଇରେକ୍ଟୋରେଟ୍ ଅନୁଯାୟୀ, ହରୀକ୍ ଗଭର୍ଣ୍ଣରରେଟ୍‌ରେ ନେସନାଲ ଅର୍ଲି ୱାର୍ଣ୍ଣିଂ ପ୍ଲାଟଫର୍ମ ଜରିଆରେ ବିପଦ ସମ୍ପର୍କିତ ସତର୍କ ସୂଚନା ଦିଆଯାଇଛି। ଯଦି ନାଗରିକମାନଙ୍କୁ ଜରୁରୀକାଳୀନ ଆଲର୍ଟ ମିଳେ, ତେବେ ସେମାନଙ୍କୁ ପ୍ରଥମେ ନିଜକୁ ଶାନ୍ତ ରଖିବା ସହ ଅଫିସିଆଲ ନିର୍ଦ୍ଦେଶ ଅନୁସରଣ କରିବାକୁ କୁହାଯାଇଛି। ଆଲର୍ଟ ମିଳିବା ମାତ୍ରେ ତୁରନ୍ତ କୌଣସି ସୁରକ୍ଷିତ ପକ୍କା କୋଠା ଭିତରକୁ ଚାଲିଯାଆନ୍ତୁ ଏବଂ ଝରକା କିମ୍ବା କାଚଠାରୁ ଦୂରରେ ଥିବା ରୁମ୍‌ରେ ବିପଦ ନଟଳିବା ପର୍ଯ୍ୟନ୍ତ ରୁହନ୍ତୁ।

ବିପଦ ସମ୍ପୂର୍ଣ୍ଣ ନଟଳିବା ପର୍ଯ୍ୟନ୍ତ ନିଜର ଘର କିମ୍ବା ଆଶ୍ରୟସ୍ଥଳ ଛାଡ଼ି ବାହାରକୁ ଆସନ୍ତୁ ନାହିଁ। ବାଲକୋନି, ଛାତ କିମ୍ବା ଖୋଲା ଜାଗାକୁ ଆଦୌ ଯାଆନ୍ତୁ ନାହିଁ। ଯଦି ଆପଣ ଘର ବାହାରେ ଅଛନ୍ତି, ତେବେ ନିକଟସ୍ଥ କୌଣସି ମଜଭୁତ କୋଠା ଭିତରକୁ ଚାଲିଯାଆନ୍ତୁ କିମ୍ବା କୌଣସି ପ୍ରତିବନ୍ଧକ ପଛରେ ଲୁଚି ରୁହନ୍ତୁ। ଜନଗହଳିପୂର୍ଣ୍ଣ କିମ୍ବା ବିପଦପୂର୍ଣ୍ଣ ସ୍ଥାନକୁ ଯିବାରୁ ବିରତ ରୁହନ୍ତୁ ଏବଂ କୌଣସି ଘଟଣାସ୍ଥଳର ଫଟୋ କିମ୍ବା ଭିଡିଓ ଉତ୍ତୋଳନ କରନ୍ତୁ ନାହିଁ। ସରକାରୀ ଓ ଅଫିସିଆଲ ମାଧ୍ୟମ ଜରିଆରେ ଆସୁଥିବା ନିର୍ଦ୍ଦେଶକୁ କଡ଼ାକଡ଼ି ପାଳନ କରିବାକୁ ପ୍ରଶାସନ ପକ୍ଷରୁ ସୂଚନା ଦିଆଯାଇଛି।

ନୂଆଦିଲ୍ଲୀ: ଆଜି ଇସ୍ରାଏଲରେ ସାଧାରଣ ନିର୍ବାଚନ ଅନୁଷ୍ଠିତ ହେଉଛି । ଗୋଟିଏ ଦିନରେ ମତଦାନ କରାଯାଇ ଆଜି ହିଁ ଫଳାଫଳ ଘୋଷଣା କରାଯିବ । ହମାସ ଆକ୍ରମଣ ଓ ଇରାନ ସହିତ ଯୁଦ୍ଧ ପରେ ଏହା ଇସ୍ରାଏଲର ପ୍ରଥମ ଜାତୀୟ ନିର୍ବାଚନ, ଯାହା ଉପରେ ସାରା ବିଶ୍ୱର ନଜର ରହିଛି । ଦେଶରେ ପ୍ରାୟ ୭୩ ଲକ୍ଷ ଯୋଗ୍ୟ ଭୋଟର ଅଛନ୍ତି । ଏହି ନିର୍ବାଚନ ବର୍ତ୍ତମାନର ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାବିନ ନେତନ୍ୟାହୁଙ୍କ ଭାଗ୍ୟ ନିର୍ଦ୍ଧାରଣ କରିବ । ନେତନ୍ୟାହୁଙ୍କ ସମ୍ମୁଖରେ ପୂର୍ବତନ ପ୍ରଧାନମନ୍ତ୍ରୀ ନାଫ୍ଟାଲି ବେନେଟ୍ ଏବଂ ଆଇଡିଏଫ୍ ର ପୂର୍ବତନ ମୁଖ୍ୟ ଗାଦି ଆଇଜେନକୋଟ୍‌ଙ୍କ ଭଳି ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ରହିଛନ୍ତି ।

୨୦୨୩ ଅକ୍ଟୋବର ୭ ତାରିଖରେ ହମାସ୍‌ର ଆକ୍ରମଣ ଏବଂ ତା’ ପରଠାରୁ ଗାଜା, ଲେବାନନ୍ ଓ ଇରାନ ସହ ଚାଲିଥିବା ସଂଘର୍ଷ ପରେ ଏହା ପ୍ରଥମ ଜାତୀୟ ନିର୍ବାଚନ ଅଟେ। ପ୍ରାୟ ୬୭,୦୦୦ରୁ ଅଧିକ ଇସ୍ରାଏଲୀ ନାଗରିକ ନିଜର ମତଦାନ ସାବ୍ୟସ୍ତ କରିବା ପାଇଁ ବିଭିନ୍ନ ଦେଶରୁ ଫେରି ଆସିଛନ୍ତି । 

ଇସ୍ରାଏଲରେ ସରକାର ଗଠନ କରିବା ପାଇଁ ୬୧ଟି ଆସନ ବିଶିଷ୍ଟ ସଂଖ୍ୟା ଗରିଷ୍ଠତା ଆବଶ୍ୟକ । ଏହି ନିର୍ବାଚନରେ ଗାଜା ପରିସ୍ଥିତି, ହମାସ୍ ବିରୋଧରେ କାର୍ଯ୍ୟାନୁଷ୍ଠାନ, ଜାତୀୟ ସୁରକ୍ଷା, ସାମରିକ ସେବା ଏବଂ ନ୍ୟାୟିକ ସଂସ୍କାର ଭଳି ପ୍ରସଙ୍ଗଗୁଡ଼ିକ ମୁଖ୍ୟ ଆଲୋଚ୍ୟ ବିଷୟ ପାଲଟିଛି । ଇସ୍ରାଏଲର ନିର୍ବାଚନ ପ୍ରକ୍ରିୟା ଅନୁଯାୟୀ, ମତଦାନ ଶେଷ ହେବା ପରେ ତୁରନ୍ତ ଗଣତି ଆରମ୍ଭ ହେବ ଏବଂ ଫଳାଫଳ ଘୋଷଣା କରାଯିବ । 

ଇସ୍ରାଏଲ ନିର୍ବାଚନ ପୂର୍ବରୁ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବେଞ୍ଜାମିନ୍ ନେତନ୍ୟାହୁଙ୍କ ପ୍ରତି ନିଜର ସମର୍ଥନ ବ୍ୟକ୍ତ କରିଛନ୍ତି। ସେ କହିଛନ୍ତି ଯେ, ଅତ୍ୟନ୍ତ କଠିନ ପରିସ୍ଥିତିରେ ମଧ୍ୟ ନେତନ୍ୟାହୁ ନିଜର ଦାୟିତ୍ୱଗୁଡ଼ିକୁ ଅତ୍ୟନ୍ତ ଉତ୍ତମ ଭାବରେ ପାଳନ କରିଛନ୍ତି। ଅତ୍ୟନ୍ତ ଆହ୍ୱାନପୂର୍ଣ୍ଣ ପରିସ୍ଥିତିରେ ସେ ପ୍ରଧାନମନ୍ତ୍ରୀ ଭାବରେ ବହୁତ ଭଲ କାମ କରିଛନ୍ତି ବୋଲି ଟ୍ରମ୍ପ କହିଛନ୍ତି । 

ଇଂଲଣ୍ଡର ପୂର୍ବତନ ଅଧିନାୟକ କେଭିନ୍ ପିଟରସନ୍, ପିଏମ୍ ମୋଦୀ ସରକାରର ମୁଖିଆ ଭାବେ ୨୫ ବର୍ଷ ପୂରଣ କରିବା ପୂର୍ବରୁ ଏକ ବିଶେଷ କଥା କହିଛନ୍ତି। ସେ ଜଣାଇଛନ୍ତି ଯେ କିପରି ସେ ମୋଦୀଜୀଙ୍କୁ ପ୍ରଥମ ଥର ଭେଟିଥିଲେ ଏବଂ କାହିଁକି ସେ ତାଙ୍କୁ ବହୁତ ପସନ୍ଦ କରନ୍ତି। ପିଟରସନ୍ ଏକ ସମ୍ବାଦପତ୍ରରେ ମୋଦୀଜୀଙ୍କ ସହ ନିଜର ସାକ୍ଷାତ ଏବଂ ତାଙ୍କ କାର୍ଯ୍ୟଶୈଳୀ ଉପରେ ଏକ ପ୍ରବନ୍ଧ ଲେଖିଛନ୍ତି।

ପିଟରସନ୍ କଲେ ପିଏମ୍ ମୋଦୀଙ୍କ ପ୍ରଶଂସା

କେଭିନ୍ ପିଟରସନ୍ ଲେଖିଛନ୍ତି, ‘ମୁଁ ପ୍ରଥମ ଥର ୨୦୦୩ ରେ ଭାରତ ଆସିଥିଲି। ସେହି ସମୟରେ ମୁଁ ନରେନ୍ଦ୍ର ମୋଦୀଙ୍କ ବିଷୟରେ ଅଧିକ କିଛି ଜାଣିନଥିଲି। ସେ ଦୁଇ ବର୍ଷ ହେବ ଗୁଜରାଟର ମୁଖ୍ୟମନ୍ତ୍ରୀ ଥିଲେ। ଯେତେବେଳେ ମୁଁ ଶୁଣିଲି ଯେ ସେ ସରକାରର ମୁଖିଆ ଭାବେ ୨୫ ବର୍ଷ ପୂରଣ କରିବାକୁ ଯାଉଛନ୍ତି, ସେହି ଚିନ୍ତାଧାରା ମୋତେ ଗଭୀର ଭାବେ ସ୍ପର୍ଶ କଲା। କୌଣସି ବି ଗଣତନ୍ତ୍ରରେ ଏହା ବହୁତ ଲମ୍ବା ସମୟ। କ୍ରିକେଟ୍ ଭାଷାରେ କହିବାକୁ ଗଲେ ଏହା ଏକ ସମ୍ପୂର୍ଣ୍ଣ କ୍ୟାରିଅର୍ ଏବଂ ତା’ଠାରୁ ମଧ୍ୟ ଅଧିକ। ବ୍ରିଟେନ୍‌ରେ ମୋଦୀ ପ୍ରଧାନମନ୍ତ୍ରୀ ହେବା ପରଠାରୁ ଛଅ ଜଣ ପ୍ରଧାନମନ୍ତ୍ରୀ ଆସିସାରିଛନ୍ତି ଏବଂ ଯାଇସାରିଛନ୍ତି। ସେଥିପାଇଁ ଏକ ଜୀବନ୍ତ ଗଣତନ୍ତ୍ରରେ ଏତେ ଲମ୍ବା ସମୟ ଅତ୍ୟନ୍ତ ସ୍ୱତନ୍ତ୍ର। ମୁଁ ମୋ ଜୀବନର ବଡ଼ ଅଂଶ ଭାରତ ଆସି କ୍ରିକେଟ୍ ଖେଳିବାରେ ଏବଂ ବୁଲାବୁଲି କରିବାରେ ବିତାଇଛି। ସେଠାରେ ମୋତେ ଅସାଧାରଣ ଲୋକ ମିଳିଥିଲେ ଏବଂ ସେମାନେ ମୋର ଘନିଷ୍ଠ ବନ୍ଧୁ ପାଲଟିଥିଲେ। ବାହାରୁ ଆସିବା ସତ୍ତ୍ୱେ ମୁଁ ଭାରତକୁ ଖୁବ୍ ନିକଟରୁ ବଦଳୁଥିବାର ଦେଖିଛି।’

ଭାରତରେ ରହିଛି ନୂଆ ଆତ୍ମବିଶ୍ୱାସ

କେଭିନ୍ ପିଟରସନ୍ ଆଗକୁ ଲେଖିଛନ୍ତି, ‘ଆଜି ମୋତେ ସବୁଠାରୁ ଅଧିକ ଯେଉଁ ଜିନିଷଟି ପ୍ରଭାବିତ କରେ, ତାହା ହେଉଛି ସମଗ୍ର ଦେଶରେ ଦେଖାଯାଉଥିବା ଆତ୍ମବିଶ୍ୱାସ। ଯେତେବେଳେ ମୁଁ ପ୍ରଥମ ଥର ଭାରତ ଆସିଥିଲି, ସେତେବେଳେ ଏକ ଖାସ୍ ପ୍ରକାରର ଦ୍ୱିଧା କିମ୍ବା ସଙ୍କୋଚ ଥିଲା, ଯାହା ଲାଗୁଥିଲା ଯେପରି ଦେଶ ନିଜର ସାମର୍ଥ୍ୟକୁ ସମ୍ପୂର୍ଣ୍ଣ ଭାବେ ଅନୁଭବ କରିପାରୁନାହିଁ। ଆଜି ଏକ ଭିନ୍ନ ଅନୁଭୂତି ରହିଛି। ଆଜିର ଭାରତୀୟମାନେ ବଡ଼ ଚିନ୍ତା କରନ୍ତି ଏବଂ କଠିନ ପ୍ରତିଯୋଗିତା କରନ୍ତି। ସେମାନେ ନିଜଠାରୁ ଏବଂ ନିଜ ଦେଶଠାରୁ ଅଧିକ ଆଶା ରଖନ୍ତି। ମୁଁ ଏହାକୁ କ୍ରୀଡ଼ା କ୍ଷେତ୍ରରେ ବହୁତ ସ୍ପଷ୍ଟ ଭାବେ ଦେଖିଛି। ଭାରତୀୟ କ୍ରିକେଟ୍‌କୁ ଦେଖିନିଅନ୍ତୁ। ଯେତେବେଳେ ମୁଁ ପ୍ରଥମ ଥର ଆସିଥିଲି, ଚମତ୍କାର ଖେଳାଳି ଏବଂ ଜବରଦସ୍ତ ଉତ୍ସାହ ଥିଲା। କିନ୍ତୁ ଭାରତର ବହୁତ ସଫଳତା ଅତ୍ୟନ୍ତ ପ୍ରତିଭାଶାଳୀ ସୁପରଷ୍ଟାରମାନଙ୍କର ଏକ ଛୋଟ ଗୋଷ୍ଠୀ ଉପରେ ନିର୍ଭର କରୁଥିଲା। ଆଜି ଭାରତୀୟ ଟିମର ଗଭୀରତା ଅସାଧାରଣ। ବେଞ୍ଚ୍‌ରେ ବସିଥିବା ଗୋଟିଏ ଟିମ୍ ବିଶ୍ୱର ସର୍ବଶ୍ରେଷ୍ଠ ଟିମ୍‌କୁ ହରାଇପାରିବ।’

ପିଏମ୍ ମୋଦୀଙ୍କ ନୀତି ସବୁ କିଛି ବଦଳାଇଦେଲା

କେଭିନ୍ ପିଟରସନ୍ କହିଛନ୍ତି ଯେ ଭାରତରେ ଏକ କ୍ରୀଡ଼ା ସଂସ୍କୃତି ବିକଶିତ ହେଉଛି ଏବଂ ପିଏମ୍ ମୋଦୀଙ୍କ କ୍ରୀଡ଼ା ପ୍ରତି ଥିବା ନିଜର ଭଲପାଇବା ଏହାକୁ ଆହୁରି ଆଗକୁ ନେଉଛି। ସେ ଲେଖିଛନ୍ତି, ମୋଦୀଙ୍କ 'ଫିଟ୍ ଇଣ୍ଡିଆ' ଆହ୍ୱାନ ସମଗ୍ର ଦେଶରେ ଦେଖାଯାଉଥିବା ପରିବର୍ତ୍ତନକୁ ପ୍ରୋତ୍ସାହିତ କରେ ଏବଂ ସଚେତନତା ବଢ଼ାଇବାରେ ଭୂମିକା ଗ୍ରହଣ କରେ। ଯୁବ ଭାରତୀୟମାନେ ମ୍ୟାରାଥନ୍ ଦୌଡ଼ୁଛନ୍ତି, ନୂଆ ପ୍ରକାରର ଫିଟ୍‌ନେସ୍ ଆପଣାଉଛନ୍ତି ଏବଂ ନିଜକୁ ନୂଆ ଉପାୟରେ ଆହ୍ୱାନ ଦେଉଛନ୍ତି। ପ୍ରଧାନମନ୍ତ୍ରୀ ନିଜେ ଯୋଗାଭ୍ୟାସ କରନ୍ତି। ଯୋଗ ପ୍ରାଚୀନ ଭାରତର ଏକ ମୂଳ ଐତିହ୍ୟ କିନ୍ତୁ ଅତ୍ୟନ୍ତ ଆଧୁନିକ ମଧ୍ୟ। କୌଣସି ଆଶ୍ଚର୍ଯ୍ୟର କଥା ନୁହେଁ ଯେ ଯୋଗ ବୈଶ୍ୱିକ ସ୍ତରରେ ଲୋକପ୍ରିୟ ହୋଇପାରିଛି ଏବଂ ଜାତିସଂଘ ପିଏମ୍ ମୋଦୀଙ୍କ ପ୍ରସ୍ତାବ କ୍ରମେ ୨୧ ଜୁନ୍‌କୁ ଆନ୍ତର୍ଜାତୀୟ ଯୋଗ ଦିବସ ଭାବେ ଘୋଷଣା କରିଛି। ଭାରତ କେବଳ ମାନସିକ ସ୍ତରରେ ନୁହେଁ, ବରଂ ଭୌତିକ ସ୍ତରରେ ମଧ୍ୟ ପରିବର୍ତ୍ତିତ ହୋଇଛି। ବିମାନବନ୍ଦରଗୁଡ଼ିକ ଅଲଗା। ରାସ୍ତା ଏବଂ ମେଟ୍ରୋ ଅଲଗା। ହୋଟେଲ୍ ଏବଂ ତାହାର ମାନକ ଅଲଗା। ପୂର୍ବରୁ ବ୍ରିଟେନ୍‌ର ବନ୍ଧୁମାନେ ମୋତେ ଭାରତର ଗ୍ରୀଷ୍ମ, ଭିଡ଼ ଏବଂ ଖାଦ୍ୟ ବିଷୟରେ ପଚାରୁଥିଲେ। ଏବେ ସେମାନେ ଭାରତରୁ ପଠାଯାଇଥିବା କୋଭିଡ୍-୧୯ ଟିକା, ଭାରତର ଷ୍ଟାର୍ଟ-ଅପ୍ସ, ଚନ୍ଦ୍ରରେ ଲ୍ୟାଣ୍ଡିଂ ଏବଂ ଡିଜିଟାଲ୍ ପେମେଣ୍ଟ ବିଷୟରେ କଥା ହୁଅନ୍ତି।

ପିଏମ୍ ମୋଦୀଙ୍କର ବନ୍ୟଜନ୍ତୁଙ୍କ ପ୍ରତି ରହିଛି ଭଲପାଇବା

କେଭିନ୍ ପିଟରସନ୍ ଲେଖିଛନ୍ତି ଯେ ପ୍ରକୃତି ତାଙ୍କ ହୃଦୟର ବହୁତ ନିକଟତର। ପିଟରସନ୍ ଲେଖିଛନ୍ତି, ‘ମୁଁ କାଜିରଙ୍ଗାରେ ସମୟ ବିତାଇସାରିଛି ଏବଂ ଗଣ୍ଡାମାନଙ୍କ ସଂରକ୍ଷଣକୁ ନେଇ ଭାବପ୍ରବଣ ରହିଛି। ମୁଁ ଭାରତର ବନ୍ୟଜନ୍ତୁଙ୍କ ସୁରକ୍ଷା ପାଇଁ କରାଯାଉଥିବା କାର୍ଯ୍ୟକୁ ଦେଖିଛି ଏବଂ ଏହା ଏପରି କିଛି ଯାହାକୁ ମୁଁ ବହୁତ ପ୍ରଶଂସା କରେ। ଚିତାମାନଙ୍କ ପ୍ରତ୍ୟାବର୍ତ୍ତନ ସମଗ୍ର ଦେଶର କଳ୍ପନାକୁ ଆକର୍ଷିତ କରିଥିଲା। ମୁଁ ଗୁଜରାଟରେ ଦୁର୍ଲଭ ଏସୀୟ ସିଂହମାନଙ୍କ ସଂରକ୍ଷଣ ବିଷୟରେ ମଧ୍ୟ ଜାଣିବାକୁ ପାଇଲି। ଯେତେବେଳେ ମୁଁ ପିଏମ୍ ମୋଦୀଙ୍କୁ ଭେଟିଲି, ଜଙ୍ଗଲୀ ଜନ୍ତୁଙ୍କ ପାଇଁ ତାଙ୍କର ଉତ୍ସାହ ସ୍ପଷ୍ଟ ଥିଲା। ଆମେ ଚିତାମାନଙ୍କୁ ଜଙ୍ଗଲରେ ଛାଡ଼ିବା ବିଷୟରେ ଭାବପ୍ରବଣ ହୋଇ କଥା ହେଲୁ ଏବଂ ମୁଁ ଦେଖିପାରୁଥିଲି ଯେ ସେ କେତେ ଉତ୍ସାହିତ ଥିଲେ। ସେ 'ଇଣ୍ଟରନ୍ୟାସନାଲ୍ ବିଗ୍ କ୍ୟାଟ୍ ଆଲାଏନ୍ସ' (IBCA) ପ୍ରତିଷ୍ଠା କରିବାରେ ମଧ୍ୟ ସାହାଯ୍ୟ କଲେ। ଏଗୁଡ଼ିକ ସେହି ଜିନିଷ ଯାହା ମୋତେ ଆଜିର ଭାରତ ବିଷୟରେ ଆକର୍ଷଣୀୟ ଲାଗେ। ୨୦୨୨ ରେ ପିଏମ୍ ମୋଦୀଙ୍କଠାରୁ ଏକ ଚମତ୍କାର ଚିଠି ପାଇବା ପରେ ମୁଁ ସୋସିଆଲ ମିଡିଆରେ ପୋଷ୍ଟ କରିଥିଲି ଯେ ୨୦୦୩ ରେ ପ୍ରଥମ ଥର ପାଦ ଥାପିବା ପରଠାରୁ ମୁଁ ପ୍ରତ୍ୟେକ ଗସ୍ତରେ ଏହି ଦେଶକୁ ଆହୁରି ଅଧିକ ଭଲ ପାଇବାକୁ ଲାଗିଛି।’

ଭାରତ ଏବଂ ଚୀନ୍ ମଧ୍ୟରେ ଅରୁଣାଚଳ ପ୍ରଦେଶ ସୀମାରେ ଉତ୍ତେଜନା  ମଧ୍ୟରେ ଚୀନ୍ ପକ୍ଷରୁ ଭାରତୀୟ ସୀମାକୁ ନେଇ ଏକ ଗୁରୁତ୍ୱପୂର୍ଣ୍ଣ ପ୍ରତିକ୍ରିୟା ସାମ୍ନାକୁ ଆସିଛି। ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଗୁଓ ଜିଆକୁନ୍ ସୋମବାର (୨୬ ଅକ୍ଟୋବର) କହିଛନ୍ତି ଯେ ତାଙ୍କ ସୈନିକମାନେ ସୀମାରେ ସାଧାରଣ ପେଟ୍ରୋଲିଂ (Patrolling) କରୁଛନ୍ତି। ସେ ଏହା ମଧ୍ୟ କହିଛନ୍ତି ଯେ ଚୀନ୍ ସମ୍ପୂର୍ଣ୍ଣ ନିୟମର ଧ୍ୟାନ ରଖୁଛି ଏବଂ ଭାରତଠାରୁ ମଧ୍ୟ ଏହି ସମାନ ଆଶା ରଖୁଛି। ଗୁରୁତ୍ୱପୂର୍ଣ୍ଣ କଥା ହେଉଛି, ଆଇଟିବିପି (ITBP) ର ଡିଜି ଶତ୍ରୁଜୀତ୍ କପୁରଙ୍କ ବକ୍ତବ୍ୟ ଆସିବା ପରେ ହିଁ ସୀମାରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିବା ଖବର ବାହାରକୁ ଆସିଥିଲା।

ଚୀନ୍ ବୈଦେଶିକ ମନ୍ତ୍ରଣାଳୟ କହିଛି ଯେ ତାଙ୍କ ପକ୍ଷରୁ ପେଟ୍ରୋଲିଂ ନିର୍ଦ୍ଧାରିତ ନୀତିନିୟମ ଅନୁଯାୟୀ ହିଁ ହୋଇଥାଏ। ‘ଗ୍ଲୋବାଲ୍ ଟାଇମ୍ସ’ (Global Times) ର ରିପୋର୍ଟ ଅନୁଯାୟୀ ଗୁଓ ଜିଆକୁନ୍ କହିଛନ୍ତି, "ଚୀନ୍ ଦୁଇ ଦେଶ ମଧ୍ୟରେ ହୋଇଥିବା ଚୁକ୍ତିକୁ କଠୋର ଭାବେ ପାଳନ କରିବା ସହିତ  ପାରସ୍ପରିକ ସମ୍ମତି ଉପରେ କାର୍ଯ୍ୟ ମଧ୍ୟ କରିଛି। ଚୀନ୍ ଆଞ୍ଚଳିକ ସାର୍ବଭୌମତ୍ୱ ଏବଂ ସୀମାରେ ସ୍ଥିରତା ବଜାୟ ରଖିବା ପାଇଁ ସୀମାନ୍ତ ଅଞ୍ଚଳରେ ନିୟମିତ ପେଟ୍ରୋଲିଂ କରେ। ସେ ଏହାର ପରିଚାଳନା କାର୍ଯ୍ୟ ମଧ୍ୟ କରିଥାଏ।"

ଭାରତଠାରୁ ଚୀନ୍ କ’ଣ ଆଶା ରଖିଛି?

ଗୁଓ ଜିଆକୁନ୍ କହିଛନ୍ତି ଯେ, "ଭାରତ ସହ କୂଟନୈତିକ ଆଲୋଚନାର ରାସ୍ତା ସର୍ବଦା ଖୋଲା ରହିବ। ଚୀନ୍ ଆଶା କରେ ଯେ ଭାରତ ମଧ୍ୟ ପାରସ୍ପରିକ ସହମ୍ମତିର ଧ୍ୟାନ ରଖିବ ଏବଂ ଶାନ୍ତି ବଜାୟ ରଖିବା ପାଇଁ ମଜବୁତ୍ ପଦକ୍ଷେପ ଗ୍ରହଣ କରିବ। ସୀମାନ୍ତ ଅଞ୍ଚଳରେ ଏହାର ବିଶେଷ ଧ୍ୟାନ ରଖିବ।"

ଭାରତ-ଚୀନ୍ ସୀମାରେ କ’ଣ ଘଟିଥିଲା?

ପ୍ରକାଶଯୋଗ୍ୟ ଯେ, ITBP ର ଡିଜି ଶତ୍ରୁଜୀତ୍ କପୁର ଭାରତ-ଚୀନ୍ ସୀମା ସମ୍ପର୍କରେ ନିକଟରେ ଏକ ବକ୍ତବ୍ୟ ଦେଇଥିଲେ। ସେ କହିଥିଲେ ଯେ ଦୁଇ ଦେଶ ମଧ୍ୟରେ ଅରୁଣାଚଳ ପ୍ରଦେଶ ସୀମାରେ ମୁହାଁମୁହିଁ ପରିସ୍ଥିତି ଅନେକ ଥର ସୃଷ୍ଟି ହୋଇଛି। ଶତ୍ରୁଜୀତ୍ କପୁର ଏହା ମଧ୍ୟ କହିଥିଲେ ଯେ ମୁହାଁମୁହିଁ ପରିସ୍ଥିତି ସମୟରେ ଭାରତୀୟ ଯବାନମାନେ ଦୃଢ଼ତାର ସହ କାର୍ଯ୍ୟ କରିଛନ୍ତି ଏବଂ ନିଜର ଦାୟିତ୍ୱ ତୁଲାଇଛନ୍ତି। ତାଙ୍କର ଏହି ବକ୍ତବ୍ୟ ପରେ ରାଜନୀତି ମଧ୍ୟ ଆରମ୍ଭ ହୋଇଯାଇଥିଲା। ବିରୋଧୀ ଦଳଗୁଡ଼ିକ ଏହାକୁ ନେଇ କେନ୍ଦ୍ର ସରକାରଙ୍କୁ ଘେରିଥିଲେ।

ବ୍ରାଜିଲର ରାଜନୀତିରେ ନୂଆ ଇତିହାସ। ଦକ୍ଷିଣପନ୍ଥୀ ନେତା ଫ୍ଲାଭିଓ ବୋଲସୋନାରୋଙ୍କୁ ପରାସ୍ତ କରି ପୁଣିଥରେ ବାଜି ମାରିଛନ୍ତି ଲୁଇଜ୍ ଇନାସିଓ ଲୁଲା ଦା ସିଲଭା। ଏହି ବିଜୟ ସହ ସେ ଚତୁର୍ଥ ଥର ପାଇଁ ବ୍ରାଜିଲର ରାଷ୍ଟ୍ରପତି ହେବାକୁ ଯାଉଛନ୍ତି ବୋଲି ରିପୋର୍ଟରେ ଦାବି କରାଯାଇଛି। ତାଙ୍କ ବିଜୟ ପରେ ସମର୍ଥକଙ୍କ ମଧ୍ୟରେ ଉତ୍ସବର ମାହୋଲ ଦେଖାଦେଇଛି।

ରିପୋର୍ଟ ଅନୁଯାୟୀ, ଲୁଲା ୫୧.୭୫ ପ୍ରତିଶତ ଭୋଟ୍ ପାଇଥିବା ବେଳେ ଫ୍ଲାଭିଓ ବୋଲସୋନାରୋ ୪୮.୨୫ ପ୍ରତିଶତ ଭୋଟ୍ ପାଇଛନ୍ତି। ଏହି ଫଳାଫଳ ଦକ୍ଷିଣ ଆମେରିକାରେ ଦେଖାଦେଇଥିବା ଦକ୍ଷିଣପନ୍ଥୀ ରାଜନୈତିକ ଲହରକୁ ଚ୍ୟାଲେଞ୍ଜ କରିଛି।

ବିଜୟ ପରେ ଲୁଲା କହିଛନ୍ତି ଯେ, ବ୍ରାଜିଲରେ ଗଣତନ୍ତ୍ରର ସୁରକ୍ଷା ପାଇଁ ମତଦାନ ଅତ୍ୟନ୍ତ ଜରୁରୀ ବୋଲି ସେ ଲୋକଙ୍କୁ ବୁଝାଇବାରେ ସଫଳ ହୋଇଛନ୍ତି। ଦେଶର ସାର୍ବଭୌମତ୍ୱ ଓ ଗଣତାନ୍ତ୍ରିକ ମୂଲ୍ୟବୋଧକୁ ସୁରକ୍ଷିତ ରଖିବା ତାଙ୍କ ସରକାରର ପ୍ରମୁଖ ଲକ୍ଷ୍ୟ ହେବ ବୋଲି ସେ ସଙ୍କେତ ଦେଇଛନ୍ତି।

ଅନ୍ୟପଟେ, ଲୁଲାଙ୍କ ବିଜୟ ପରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ଅଭିନନ୍ଦନ ଜଣାଇଛନ୍ତି। ‘ଏକ୍ସ’ରେ ମୋଦି ଲେଖିଛନ୍ତି, “ମୋର ପ୍ରିୟ ବନ୍ଧୁ ରାଷ୍ଟ୍ରପତି ଲୁଲାଙ୍କୁ ଏହି ଉଲ୍ଲେଖନୀୟ ବିଜୟ ପାଇଁ ହାର୍ଦ୍ଦିକ ଅଭିନନ୍ଦନ।” ଭାରତ-ବ୍ରାଜିଲ୍‌ ମଧ୍ୟରେ ରଣନୈତିକ ସହଭାଗିତାକୁ ଆହୁରି ମଜବୁତ ଓ ବ୍ୟାପକ କରିବା ସହ ଉଭୟ ଦେଶ ବିଭିନ୍ନ କ୍ଷେତ୍ରରେ ସହଯୋଗ ବଢ଼ାଇବେ ବୋଲି ସେ ଆଶା ପ୍ରକାଶ କରିଛନ୍ତି। ଏହାସହ ଗ୍ଲୋବାଲ୍‌ ସାଉଥ୍‌ର ସାମୂହିକ ପ୍ରାଥମିକତାକୁ ଆଗକୁ ନେବା ଦିଗରେ ମିଳିତ ଭାବେ କାମ କରିବାକୁ ସେ ଆଗ୍ରହ ପ୍ରକାଶ କରିଛନ୍ତି।

ତେବେ ଲୁଲାଙ୍କ ଆଗାମୀ କାର୍ଯ୍ୟକାଳ ସହଜ ହେବ ନାହିଁ। ଦେଶର ପ୍ରାୟ ଅଧା ଭୋଟର ତାଙ୍କ ବିପକ୍ଷରେ ମତ ଦେଇଥିବାରୁ ରାଜନୈତିକ ବିଭାଜନ ଏକ ବଡ଼ ଚ୍ୟାଲେଞ୍ଜ ହୋଇପାରେ। ଏହାସହ ଅର୍ଥନୈତିକ ଅଭିବୃଦ୍ଧିର ମନ୍ଥରତା, ଅପରାଧ ନିୟନ୍ତ୍ରଣ ଓ ଦକ୍ଷିଣପନ୍ଥୀଙ୍କ ପ୍ରଭାବ ଥିବା କଂଗ୍ରେସରେ ସମର୍ଥନ ହାସଲ କରିବା ତାଙ୍କ ପାଇଁ ବଡ଼ ପରୀକ୍ଷା ହେବ।

Heartiest congratulations to my dear friend, President Lula, on his remarkable re-election victory. I look forward to working closely with him to further deepen and expand the multifaceted India-Brazil Strategic Partnership. Together, we will continue to strengthen our cooperation across diverse sectors, advance the shared priorities of the Global South and work towards a more inclusive, equitable and sustainable world. @LulaOficial

— Narendra Modi (@narendramodi) October 26, 2026