ମୁମ୍ବାଇ: ବକ୍ସ ଅଫିସ୍‌ରେ ଜବରଦସ୍ତ ପ୍ରଦର୍ଶନ କରୁଛି ନିତେଶ ତିୱାରୀଙ୍କ ନିର୍ଦ୍ଦେଶିତ ଫିଲ୍ମ ‘ରାମାୟଣ’। ରିଲିଜ୍ ହେବାର ପ୍ରଥମ ଦିନରୁ ହିଁ ଫିଲ୍ମଟି ଦର୍ଶକଙ୍କ ମନ ଜିଣିବା ସହ ଆୟ କ୍ଷେତ୍ରରେ ନୂଆ ରେକର୍ଡ ସୃଷ୍ଟି କରୁଛି। ତୃତୀୟ ଦିନରେ ମଧ୍ୟ ଫିଲ୍ମର ଆୟ ୫୦ କୋଟି ଟଙ୍କା ଅତିକ୍ରମ କରିଛି। ଦୀପାବଳି ଛୁଟି ଏବଂ ୱିକେଣ୍ଡର ଫାଇଦା ଫିଲ୍ମକୁ ମିଳିଥିବା ଦେଖିବାକୁ ମିଳିଛି।

ପ୍ରଥମ ଦିନର ଦମଦାର ଓପନିଂ ପରେ ଦ୍ୱିତୀୟ ଦିନରେ ଫିଲ୍ମର ଆୟରେ ୨୫ ପ୍ରତିଶତରୁ ଅଧିକ ହ୍ରାସ ହୋଇଥିଲା। ହେଲେ ତୃତୀୟ ଦିନରେ ପୁଣିଥରେ ବଡ଼ ଜମ୍ପ ଦେଖିବାକୁ ମିଳିଛି। ଦର୍ଶକଙ୍କ ସକାରାତ୍ମକ ପ୍ରତିକ୍ରିୟା ଓ ସମୀକ୍ଷକଙ୍କ ପ୍ରଶଂସା ମଧ୍ୟ ଫିଲ୍ମର ବ୍ୟବସାୟକୁ ଆହୁରି ମଜବୁତ କରିଛି।

ତୃତୀୟ ଦିନରେ ୬୯.୮୦ କୋଟି ଟଙ୍କା ଆୟ

ବକ୍ସ ଅଫିସ୍ ଟ୍ରାକର୍ ସାକନିଲ୍କର ରିପୋର୍ଟ ଅନୁସାରେ, ‘ରାମାୟଣ’ ପ୍ରଥମ ଦିନରେ ୬୪.୮୫ କୋଟି ଟଙ୍କାର ବ୍ୟବସାୟ କରିଥିଲା। ଦ୍ୱିତୀୟ ଦିନରେ ଏହାର ଆୟ ୪୮.୦୫ କୋଟି ଟଙ୍କା ରହିଥିଲା। କିନ୍ତୁ ତୃତୀୟ ଦିନ ଅର୍ଥାତ୍ ଶନିବାର ଦିନ ଫିଲ୍ମର ଆୟରେ ବଡ଼ ବୃଦ୍ଧି ଘଟିଛି।

ସାକନିଲ୍କର ରାତି ୧୦ଟା ୩୦ ପର୍ଯ୍ୟନ୍ତ ଆକଳନ ଅନୁସାରେ, ତୃତୀୟ ଦିନରେ ଫିଲ୍ମଟି ୬୯.୮୦ କୋଟି ଟଙ୍କା ଆୟ କରିଛି। ଦ୍ୱିତୀୟ ଦିନ ତୁଳନାରେ ଏହାର କଲେକ୍ସନ୍‌ରେ ପ୍ରାୟ ୪୫.୩ ପ୍ରତିଶତ ବୃଦ୍ଧି ହୋଇଛି।

ଫିଲ୍ମର ଅକ୍ୟୁପାନ୍ସି ୪୦.୩ ପ୍ରତିଶତ ରହିଥିବା ବେଳେ ଦେଶବ୍ୟାପୀ ୨୩,୬୪୭ଟି ଶୋ' ମିଳିଥିବା ସୂଚନା ରହିଛି। ଏହାର ଇଣ୍ଡିଆ ଗ୍ରସ୍ କଲେକ୍ସନ୍ ୨୧୮.୨୫ କୋଟି ଟଙ୍କାରେ ପହଞ୍ଚିଥିବା ବେଳେ ନେଟ୍ କଲେକ୍ସନ୍ ୧୮୨.୭୦ କୋଟି ଟଙ୍କା ହୋଇଛି। ଏହି ଆକଳନ ଅନ୍ତିମ ନୁହେଁ।

‘ଦଙ୍ଗଲ୍’, ‘ବାହୁବଳୀ-୨’ ସମେତ ୫ ଫିଲ୍ମର ରେକର୍ଡ ଭାଙ୍ଗିଲା

ତୃତୀୟ ଦିନର ଜବରଦସ୍ତ ଆୟ ସହ ‘ରାମାୟଣ’ ଅନେକ ବଡ଼ ବଲିଉଡ୍ ଓ ଭାରତୀୟ ସିନେମାର ରେକର୍ଡକୁ ପଛରେ ପକାଇଛି। ଏହି ତାଲିକାରେ ‘ଦଙ୍ଗଲ୍’, ‘ଧୁରନ୍ଧର’ ଏବଂ ‘ବାହୁବଳୀ-୨’ ଭଳି ଲୋକପ୍ରିୟ ଫିଲ୍ମ ରହିଛି।

ତୃତୀୟ ଦିନର ଆୟ ଆଧାରରେ ଏହି ଫିଲ୍ମଗୁଡ଼ିକର କଲେକ୍ସନ୍ ନିମ୍ନରେ ଦିଆଗଲା।

ବାହୁବଳୀ-୨ – ୪୬.୫୦ କୋଟି ଟଙ୍କା

ଧୁରନ୍ଧର – ୪୩ କୋଟି ଟଙ୍କା

ଦଙ୍ଗଲ୍ – ୪୧.୩୪ କୋଟି ଟଙ୍କା

ଟାଇଗର୍-୩ – ୪୩.୫୦ କୋଟି ଟଙ୍କା

ବର୍ଡର୍-୨ – ୫୪.୫୦ କୋଟି ଟଙ୍କା

ଏହି ସବୁ ଫିଲ୍ମକୁ ପଛରେ ପକାଇ ‘ରାମାୟଣ’ ତୃତୀୟ ଦିନରେ ୬୯.୮୦ କୋଟି ଟଙ୍କାର ବ୍ୟବସାୟ କରିଛି।

୩ ଦିନରେ ବିଶ୍ୱବ୍ୟାପୀ କଲେକ୍ସନ୍ ୩୭୮ କୋଟିରୁ ଅଧିକ!

୨୦୨୬ ନଭେମ୍ବର ୫ ତାରିଖରେ ଦୀପାବଳି ଅବସରରେ ସିନେମା ହଲ୍‌କୁ ଆସିଥିଲା ‘ରାମାୟଣ’। ରିଲିଜ୍ ହେବା ପରଠାରୁ ଏହା ବକ୍ସ ଅଫିସ୍‌ରେ ଦମଦାର ପ୍ରଦର୍ଶନ କରୁଛି। ୨୦୨୬ର ତୃତୀୟ ସର୍ବାଧିକ ଓପନିଂ କରିଥିବା ଫିଲ୍ମ ଭାବେ ମଧ୍ୟ ଏହା ଚର୍ଚ୍ଚାକୁ ଆସିଛି।

ଏହା ସହ ଅଭିନେତା ରଣବୀର କପୁରଙ୍କ କ୍ୟାରିୟରର ତୃତୀୟ ସର୍ବାଧିକ ଆୟକାରୀ ଫିଲ୍ମ ଭାବେ ମଧ୍ୟ ‘ରାମାୟଣ’ ସ୍ଥାନ ପାଇଥିବା ରିପୋର୍ଟରେ ଦାବି କରାଯାଇଛି। ସାକନିଲ୍କର ଆକଳନ ଅନୁସାରେ, ଫିଲ୍ମର ୱାର୍ଲଡୱାଇଡ୍ କଲେକ୍ସନ୍ ୩୭୮.୫୦ କୋଟି ଟଙ୍କାରେ ପହଞ୍ଚିଛି।

ମୁମ୍ବାଇ: ବଡ଼ ପରଦାରେ ରିଲିଜ୍ ହେବା ମାତ୍ରେ ବକ୍ସ ଅଫିସ୍‌ରେ ଧମାଲ୍ କରିଛି ନୀତେଶ ତିୱାରୀଙ୍କ ବହୁ ପ୍ରତୀକ୍ଷିତ ଫିଲ୍ମ ‘ରାମାୟଣ’। ରଣବୀର କପୁର, ସାଇ ପଲ୍ଲବୀ ଓ ୟଶଙ୍କ ଅଭିନୀତ ଏହି ଫିଲ୍ମ ପ୍ରଥମ ଦିନରେ ଭାରତରେ ୬୪.୮୫ କୋଟି ଟଙ୍କା ନେଟ୍ କଲେକ୍ସନ କରିଥିବା ରିପୋର୍ଟରେ ଦାବି କରାଯାଇଛି। ଏହାର ଗ୍ରସ୍ କଲେକ୍ସନ ୭୭.୫୦ କୋଟି ଟଙ୍କା ରହିଛି। ଅନ୍ୟପଟେ ବିଶ୍ୱବ୍ୟାପୀ ଗ୍ରସ୍ କଲେକ୍ସନ ୧୨୭.୫୦ କୋଟି ଟଙ୍କା ଛୁଇଁଛି।

ପ୍ରଥମ ଦିନରେ ୬୪.୮୫ କୋଟିର କଲେକ୍ସନ

ରିପୋର୍ଟ ଅନୁସାରେ, ଫିଲ୍ମଟି ପ୍ରଥମ ଦିନରେ ଦେଶରେ ୨୫,୨୦୦ଟି ଶୋ'ରୁ ଏହି ଆୟ କରିଛି। ହିନ୍ଦୀ ଭାଷାରେ ଫିଲ୍ମକୁ ସବୁଠାରୁ ଅଧିକ ଦର୍ଶକ ମିଳିଛନ୍ତି।

ଭାଷା ଅନୁସାରେ ପ୍ରଥମ ଦିନର କଲେକ୍ସନ:

• ହିନ୍ଦୀ: ୪୭.୫୦ କୋଟି ଟଙ୍କା
• କନ୍ନଡ଼: ୭.୨୫ କୋଟି ଟଙ୍କା
• ତେଲୁଗୁ: ୬ କୋଟି ଟଙ୍କା
• ତାମିଲ: ୨.୬୦ କୋଟି ଟଙ୍କା
• ମାଲାୟାଲମ୍: ୧.୫୦ କୋଟି ଟଙ୍କା

‘ପଠାନ୍’କୁ ପଛରେ ପକାଇଲା ରାମାୟଣ

ପ୍ରଥମ ଦିନର କଲେକ୍ସନ ଆଧାରରେ ଶାହରୁଖ ଖାନ୍‌ଙ୍କ ‘ପଠାନ୍’ (୫୭ କୋଟି) ଏବଂ ‘ଆନିମଲ୍’ (୬୩ କୋଟି)ର ଓପନିଂ କଲେକ୍ସନକୁ ପଛରେ ପକାଇଛି ‘ରାମାୟଣ’। କିନ୍ତୁ ଶାହରୁଖ ଖାନ୍‌ଙ୍କ ‘ଜୱାନ୍’ (୭୫ କୋଟି) ଏବଂ ରଣବୀର ସିଂହଙ୍କ ‘ଧୁରନ୍ଧର ୨’ (୧୦୨ କୋଟି)ର ରେକର୍ଡ ଭାଙ୍ଗିବାରେ ଫିଲ୍ମଟି ସଫଳ ହୋଇନାହିଁ।

ହିନ୍ଦୀ ଭର୍ସନରେ 3D ଶୋ'କୁ ଅଧିକ ପସନ୍ଦ

ପ୍ରଥମ ଦିନରେ ହିନ୍ଦୀ ଭର୍ସନର 3D ଶୋ'ର ଅକ୍ୟୁପାନ୍ସି ୩୩.୯୬ ପ୍ରତିଶତ ରହିଥିବା ବେଳେ 2D ଶୋ'ରେ ଏହା ୨୭.୭୯ ପ୍ରତିଶତ ରହିଥିଲା। ଗୁରୁବାର କାର୍ଯ୍ୟଦିବସ ଥିବାରୁ ଦର୍ଶକଙ୍କ ଉପସ୍ଥିତି କିଛି ମାତ୍ରାରେ କମ୍ ରହିଥିବା ଅନୁମାନ କରାଯାଉଛି। ତେବେ ଦୀପାବଳି ଛୁଟି ଆରମ୍ଭ ହେବା ସହ ଆଗାମୀ ଦିନରେ ଫିଲ୍ମର ଆୟ ବଢ଼ିବା ଆଶା କରାଯାଉଛି।

୪,୦୦୦ କୋଟିରେ ନିର୍ମାଣ ହୋଇଛି ଦୁଇ ଭାଗର ରାମାୟଣ

ନୀତେଶ ତିୱାରୀଙ୍କ ନିର୍ଦ୍ଦେଶିତ ଏହି ଫିଲ୍ମରେ ରଣବୀର କପୁର ରାମ, ସାଇ ପଲ୍ଲବୀ ସୀତା ଏବଂ ୟଶ ରାବଣ ଭୂମିକାରେ ନଜର ଆସିଛନ୍ତି। ଏହା ସହ ରକୁଲ ପ୍ରୀତ ସିଂହ, ବିବେକ ଓବରଏ, ଅରୁଣ ଗୋଭିଲ, ରବି ଦୁବେ, ଲାରା ଦତ୍ତା ଓ ସନ୍ନି ଦେଓଲଙ୍କ ଭଳି କଳାକାର ମଧ୍ୟ ଅଭିନୟ କରିଛନ୍ତି।

ଏହି ମହାକାବ୍ୟ ଆଧାରିତ ଫିଲ୍ମକୁ ଦୁଇଟି ଭାଗରେ ନିର୍ମାଣ କରାଯାଉଛି। ଉଭୟ ଭାଗର ମିଳିତ ବଜେଟ୍ ପ୍ରାୟ ୪,୦୦୦ କୋଟି ଟଙ୍କା ବୋଲି ରିପୋର୍ଟ ରହିଛି। ଦ୍ୱିତୀୟ ଭାଗ ୨୦୨୮ରେ ରିଲିଜ୍ ହେବାର ଯୋଜନା ରହିଛି।

ତାମିଲ ଚଳଚ୍ଚିତ୍ରର ପ୍ରସିଦ୍ଧ ଅଭିନେତା ବିଜୟ ସେଥୁପତି ତାଙ୍କର ଦମଦାର୍ ଅଭିନୟ ପାଇଁ ଜଣାଶୁଣା। ବର୍ତ୍ତମାନ ଅଭିନେତା ଜଣକ ଇଣ୍ଟରନେସନାଲ୍ ଏମି ଏୱାର୍ଡ୍ସରେ ପ୍ରେଜେଣ୍ଟର (ଉପସ୍ଥାପକ) ହେବାକୁ ଯାଉଛନ୍ତି। ଏଭଳି କରିବାରେ ବିଜୟ ହେବେ ପ୍ରଥମ ଭାରତୀୟ।

ସାଉଥ୍ ଅଭିନେତା ବିଜୟ ସେଥୁପତି ତାଙ୍କର ଦମଦାର୍ ଅଭିନୟ ପାଇଁ ଜଣାଶୁଣା। ତାଙ୍କର ଅନ୍ଦାଜକୁ ଫ୍ୟାନ୍ସମାନେ ବେଶ୍ ପସନ୍ଦ କରନ୍ତି। ସେପଟେ, ବର୍ତ୍ତମାନ ବିଜୟ ସେଥୁପତିଙ୍କ ନାମରେ ଏକ ବଡ଼ ସଫଳତା ଯୋଡ଼ି ହେବାକୁ ଯାଉଛି। ତାମିଲ ଚଳଚ୍ଚିତ୍ରର ପ୍ରସିଦ୍ଧ ଅଭିନେତା ବିଜୟ ସେଥୁପତିଙ୍କୁ ନଭେମ୍ବର ୨୩, ୨୦୨୬ରେ ନ୍ୟୁୟର୍କଠାରେ ଅନୁଷ୍ଠିତ ହେବାକୁ ଥିବା ୫୪ତମ ଇଣ୍ଟରନେସନାଲ୍ ଏମି ଏୱାର୍ଡ୍ସରେ ପ୍ରେଜେଣ୍ଟର ଭାବେ ଚୟନ କରାଯାଇଛି। 'THR India' ରୁ ମିଳିଥିବା ସୂଚନା ଅନୁଯାୟୀ, ବିଜୟ ସେଥୁପତି ଏହି ପ୍ରତିଷ୍ଠିତ ସମାରୋହରେ ପୁରସ୍କାର ପ୍ରଦାନ କରିବାକୁ ଥିବା ପ୍ରଥମ ଭାରତୀୟ ହେବେ।

ବିଜୟ ସେଥୁପତିଙ୍କ ଏହି ସଫଳତା ଗ୍ଲୋବାଲ୍ ଏଣ୍ଟରଟେନମେଣ୍ଟ ଦୁନିଆରେ ଭାରତୀୟ କଳାକାରମାନଙ୍କ ବର୍ଦ୍ଧିତ ପରିଚୟକୁ ଦର୍ଶାଉଛି। ତାଙ୍କୁ ଏହି ବଡ଼ ମଞ୍ଚ ପର୍ଯ୍ୟନ୍ତ ପହଞ୍ଚାଇବାରେ ଇଣ୍ଟରନେସନାଲ୍ ଏକାଡେମି ଅଫ୍ ଟେଲିଭିଜନ ଆର୍ଟସ୍ ଆଣ୍ଡ ସାଇନ୍ସେସ୍ର ବୋର୍ଡ ମେମ୍ବର ତଥା ପ୍ରଯୋଜକ କବିତା ଗୁପ୍ତାଙ୍କ ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି।

ବୀର ଦାସ୍ ସାଜି ସାରିଛନ୍ତି ହୋଷ୍ଟ

କବିତା ଗୁପ୍ତା କ୍ରମାଗତ ଭାବରେ ଭାରତୀୟ କଳାକାରମାନଙ୍କୁ ଆନ୍ତର୍ଜାତୀୟ ମଞ୍ଚ ଏବଂ ଏଣ୍ଟରଟେନମେଣ୍ଟ ଇଣ୍ଡଷ୍ଟ୍ରି ସହିତ ଜଡ଼ିତ ବଡ଼ ନେଟୱାର୍କରେ ପହଞ୍ଚାଇବା ପାଇଁ ପ୍ରୟାସ କରିଆସୁଛନ୍ତି। ବିଜୟ ସେଥୁପତିଙ୍କ ପୂର୍ବରୁ ଅଭିନେତା ବୀର ଦାସ୍ ଇଣ୍ଟରନେସନାଲ୍ ଏମି ଏୱାର୍ଡ୍ସରେ ହୋଷ୍ଟ ବନିଥିଲେ। ଏଥିରେ ମଧ୍ୟ କବିତା ଗୁପ୍ତା ଏକ ପ୍ରମୁଖ ଭୂମିକା ନିର୍ବାହ କରିଥିଲେ। ବୀର ଦାସ୍ ଏହି ସମାରୋହକୁ ହୋଷ୍ଟ କରିଥିବା ପ୍ରଥମ ଭାରତୀୟ ବନିଥିଲେ।

ବିଜୟ ସେଥୁପତିଙ୍କ ଆଗାମୀ ଚଳଚ୍ଚିତ୍ର

ବିଜୟ ସେଥୁପତିଙ୍କୁ ଶେଷଥର ପାଇଁ ‘ବାଥା’ ଚଳଚ୍ଚିତ୍ରରେ ଦେଖିବାକୁ ମିଳିଥିଲା। ବାଲାଜୀ ଥରନୀଥରନଙ୍କ ନିର୍ଦ୍ଦେଶନାରେ ନିର୍ମିତ ଏହି ଚଳଚ୍ଚିତ୍ରରେ ଜଣେ ଗ୍ୟାଙ୍ଗଷ୍ଟରଙ୍କ ନୈତିକ ପରିବର୍ତ୍ତନର କାହାଣୀ ଦର୍ଶାଯାଇଥିଲା। ଚଳଚ୍ଚିତ୍ରଟି ସମୀକ୍ଷକମାନଙ୍କଠାରୁ ଭଲ ପ୍ରତିକ୍ରିୟା ପାଇଥିଲା। ବର୍ତ୍ତମାନ ବିଜୟ ସେଥୁପତି ଖୁବଶୀଘ୍ର ମଣିରତ୍ନମଙ୍କ ଚଳଚ୍ଚିତ୍ର ‘ଇଞ୍ଜି ଭେଲ୍ଲମ୍’ରେ ନଜର ଆସିବେ। ଏହି ଚଳଚ୍ଚିତ୍ରରେ ତାଙ୍କ ସହିତ ସାଇ ପଲ୍ଲବୀ ମଧ୍ୟ ନଜର ଆସିବେ। ଏହାଛଡ଼ା ସେ ତ୍ୟାଗରାଜନ କୁମାରରାଜାଙ୍କ ଚଳଚ୍ଚିତ୍ର ‘ପକେଟ୍ ନୋଭେଲ୍’ରେ ମଧ୍ୟ ଅଭିନୟ କରିବେ। ଏଥିରେ ତାଙ୍କ ସହିତ ରାଜ ବି ଶେଷୀ ଏବଂ ମାଲବିକା ମୋହନନ ପ୍ରମୁଖ ଭୂମିକାରେ ରହିବେ।

ସରିଲା ଦୀର୍ଘଦିନର ଅପେକ୍ଷା। ବଡ଼ ପରଦାକୁ ଆସିଲା ବହୁ ପ୍ରତୀକ୍ଷିତ ମେଗା ବଜେଟ୍ ଫିଲ୍ମ 'ରାମାୟଣ ପାର୍ଟ-୧'। ନିର୍ଦ୍ଦେଶକ ନିତେଶ ତିୱାରୀଙ୍କ ଏହି ମହାକାବ୍ୟ ଆଧାରିତ ଫିଲ୍ମକୁ ନେଇ ସିନେପ୍ରେମୀଙ୍କ ମଧ୍ୟରେ ଖୁବ୍ ଉତ୍ସାହ ଦେଖିବାକୁ ମିଳିଛି। ପ୍ରାୟ ୨୦୦୦ କୋଟି ଟଙ୍କାର ବିଶାଳ ବଜେଟ୍‌ରେ ନିର୍ମିତ ଏହି ଫିଲ୍ମରେ ରଣବୀର କପୁର ଶ୍ରୀରାମ, ସାଇ ପଲ୍ଲବୀ ମାତା ସୀତା ଏବଂ ୟଶ୍ ରାବଣ ଭୂମିକାରେ ନଜର ଆସିଛନ୍ତି।

ଦେବତା ଓ ଅସୁରଙ୍କ ଯୁଦ୍ଧରୁ ଆରମ୍ଭ କାହାଣୀ

ଫିଲ୍ମର କାହାଣୀ ଆରମ୍ଭ ହୋଇଛି ପକ୍ଷୀରାଜ ଜଟାୟୁଙ୍କଠାରୁ। ତାଙ୍କ ଚରିତ୍ରକୁ ନିଜ ସ୍ୱର ଦେଇଛନ୍ତି ଅନୁପମ ଖେର। ଜଟାୟୁଙ୍କ ବର୍ଣ୍ଣନା ମାଧ୍ୟମରେ ଦର୍ଶକଙ୍କୁ ନିଆଯାଇଛି ସେହି ପୌରାଣିକ ଯୁଗକୁ, ଯେଉଁଠାରେ ଦେବତା ଓ ଅସୁରଙ୍କ ମଧ୍ୟରେ ଭୟଙ୍କର ଯୁଦ୍ଧ ହୋଇଥିଲା। ଏହି ଯୁଦ୍ଧରେ ଦେବତାମାନେ ବିଜୟୀ ହେବା ପରେ ଲଙ୍କାର ଶାସନ ଦାୟିତ୍ୱ କୁବେରଙ୍କୁ ଦିଆଯାଇଥିଲା। ଅନ୍ୟପଟେ ରାକ୍ଷସ କୁଳକୁ ଲଙ୍କା ଛାଡ଼ି ରସାତଳକୁ ଯିବାକୁ ପଡ଼ିଥିଲା।

ନିଜ କୁଳର ହଜିଯାଇଥିବା ଗୌରବ ଫେରାଇ ଆଣିବାକୁ ମାତା କୈକସୀ ପୁତ୍ର ଦଶାନନଙ୍କୁ ପ୍ରେରଣା ଦିଅନ୍ତି। ଏହାପରେ ଦଶାନନ କଠୋର ତପସ୍ୟା କରି ବ୍ରହ୍ମାଙ୍କଠାରୁ ବର ପ୍ରାପ୍ତ କରନ୍ତି। ବରଦାନ ପାଇବା ପରେ ସେ କୁବେରଙ୍କଠାରୁ ଲଙ୍କାର ସିଂହାସନ ଛଡ଼ାଇ ନିଅନ୍ତି। ଧୀରେ ଧୀରେ ତାଙ୍କ ଅହଂକାର ଓ ଅତ୍ୟାଚାର ବଢ଼ିବାକୁ ଲାଗେ।

ଅତ୍ୟାଚାରର ଅନ୍ତ ପାଇଁ ଶ୍ରୀରାମଙ୍କ ଅବତାର

ରାବଣର ଅତ୍ୟାଚାରରେ ଯେତେବେଳେ ତିନିଲୋକ ଅତିଷ୍ଠ ହୋଇପଡ଼େ, ସେତେବେଳେ ଭଗବାନ ବିଷ୍ଣୁ ଶ୍ରୀରାମ ରୂପରେ ଧରାବତରଣ କରନ୍ତି। ଏହାପରେ ଆରମ୍ଭ ହୁଏ ରାମାୟଣର ସେହି ମହାନ ଗାଥା, ଯାହାକୁ ଭାରତୀୟମାନେ ପିଢ଼ି ପରେ ପିଢ଼ି ଶୁଣି ଆସୁଛନ୍ତି।

ଫିଲ୍ମରେ ରଣବୀରଙ୍କ ଶ୍ରୀରାମ ଅବତାର ଓ ୟଶଙ୍କ ଦଶାନନ ରୂପକୁ ନେଇ ବିଶେଷ ଉତ୍ସୁକତା ରହିଛି। ଅନ୍ୟପଟେ ଅନୁପମ ଖେରଙ୍କ ସ୍ୱରରେ ଜଟାୟୁଙ୍କ ଚରିତ୍ର ମଧ୍ୟ କାହାଣୀକୁ ଆକର୍ଷଣୀୟ କରିବ ବୋଲି ଆଶା କରାଯାଉଛି।

ତ୍ରେତୟା ଯୁଗର ଏହି ମହାଗାଥାକୁ ଆଧୁନିକ ଟେକ୍ନୋଲୋଜି ଓ ଭବ୍ୟ ଭିଜୁଆଲ୍ସ ସହ ବଡ଼ ପରଦାରେ ଦେଖାଇବାକୁ ନିର୍ମାତାଙ୍କ ଏହା ଏକ ବଡ଼ ପ୍ରୟାସ। ଏବେ ଦର୍ଶକଙ୍କ ଅପେକ୍ଷା, ଏହି ଫିଲ୍ମ କେତେଦୂର ସମସ୍ତଙ୍କ ମନ ଜିଣିପାରୁଛି।

ନୂଆଦିଲ୍ଲୀ: ରେକର୍ଡ ପରେ ରେକର୍ଡ, ମଇଦାନରେ ଦମଦାର ପ୍ରଦର୍ଶନ ଆଉ ଅଗଣିତ ପ୍ରଶଂସକଙ୍କ ଭଲପାଇବା। ଆଜି ନିଜର ୩୮ତମ ଜନ୍ମଦିନ ପାଳନ କରୁଛନ୍ତି ଭାରତୀୟ କ୍ରିକେଟ୍‌ର ରନ୍ ମେସିନ୍ ବିରାଟ କୋହଲି। ୨୦୦୮ରେ ଅନ୍ତର୍ଜାତୀୟ କ୍ରିକେଟ୍‌ରେ ପାଦ ଥାପିଥିବା କୋହଲି ଦୀର୍ଘ ୧୮ ବର୍ଷର କ୍ୟାରିୟରରେ ନିଜ ବ୍ୟାଟିଂର ଯାଦୁରେ ଅନେକ ଅସମ୍ଭବ ଲାଗୁଥିବା ରେକର୍ଡକୁ ସମ୍ଭବ କରି ଦେଖାଇଛନ୍ତି।

ସଚିନ ତେନ୍ଦୁଲକରଙ୍କ ଭଳି ମହାନ ବ୍ୟାଟରଙ୍କ ରେକର୍ଡକୁ ପଛରେ ପକାଇ ସେ ହାସଲ କରିଛନ୍ତି ଅନେକ ଐତିହାସିକ ସଫଳତା। ତାଙ୍କୁ ପ୍ରଶଂସକ 'କିଙ୍ଗ୍ କୋହଲି' ଓ 'ଚେଜ୍ ମାଷ୍ଟର' ବୋଲି ଡାକନ୍ତି। ଆସନ୍ତୁ ଜାଣିବା ତାଙ୍କ କ୍ୟାରିୟରର ଏଭଳି ୧୦ଟି ରେକର୍ଡ ବିଷୟରେ।

କୋହଲିଙ୍କ ଏହି ୧୦ ରେକର୍ଡ ଉପରେ ରହିଛି ସମସ୍ତଙ୍କ ନଜର

୧. ଦିନିକିଆରେ ସର୍ବାଧିକ ଶତକ: ODI କ୍ରିକେଟ୍‌ରେ ୫୫ଟି ଶତକ ସହ ବିଶ୍ୱର ସର୍ବାଧିକ ଶତକ ହାସଲକାରୀ ବ୍ୟାଟର ହେଉଛନ୍ତି ବିରାଟ। ୨୦୨୩ ବିଶ୍ୱକପ୍‌ରେ ସଚିନଙ୍କ ୪୯ ଶତକର ରେକର୍ଡ ଭାଙ୍ଗିଥିଲେ ସେ।

୨. ଦ୍ରୁତତମ ୧୫ ହଜାର ODI ରନ୍: ୨୦୨୬ ସେପ୍ଟେମ୍ବରରେ ମାତ୍ର ୩୧୫ ଇନିଂସରେ ୧୫ ହଜାର ଦିନିକିଆ ରନ୍ ପୂରଣ କରି ନୂଆ ଇତିହାସ ରଚିଛନ୍ତି କୋହଲି।

୩. ଗୋଟିଏ ବିଶ୍ୱକପ୍‌ରେ ସର୍ବାଧିକ ରନ୍: ୨୦୨୩ ODI ବିଶ୍ୱକପ୍‌ରେ ୧୧ଟି ମ୍ୟାଚ୍‌ରୁ ୭୬୫ ରନ୍ ସଂଗ୍ରହ କରିଥିଲେ ବିରାଟ। ଏହା ଗୋଟିଏ ବିଶ୍ୱକପ୍‌ରେ ଜଣେ ବ୍ୟାଟରଙ୍କ ସର୍ବାଧିକ ରନ୍‌ର ରେକର୍ଡ।

୪. IPLର ଗୋଟିଏ ସିଜିନ୍‌ରେ ସର୍ବାଧିକ ରନ୍: ୨୦୧୬ IPL ସିଜିନ୍‌ରେ ମାତ୍ର ୧୬ଟି ମ୍ୟାଚ୍‌ରୁ ୯୭୩ ରନ୍ କରିଥିଲେ କୋହଲି। ଏଥିରେ ଥିଲା ୪ଟି ଶତକ ଓ ୭ଟି ଅର୍ଦ୍ଧଶତକ।

୫. ଭାରତର ସଫଳତମ ଟେଷ୍ଟ ଅଧିନାୟକ: ଟେଷ୍ଟ କ୍ରିକେଟ୍‌ରେ ଭାରତକୁ ୬୮ଟି ମ୍ୟାଚ୍‌ରେ ନେତୃତ୍ୱ ଦେଇ ୪୦ଟି ବିଜୟ ଦେଇଛନ୍ତି କୋହଲି। ଭାରତୀୟ ଟେଷ୍ଟ ଅଧିନାୟକ ଭାବେ ତାଙ୍କ ନାମରେ ସର୍ବାଧିକ ବିଜୟ ରେକର୍ଡ ରହିଛି।

୬. ୮ ହଜାରରୁ ୧୫ ହଜାର ରନ୍ ପର୍ଯ୍ୟନ୍ତ ଦ୍ରୁତତମ: ODI କ୍ରିକେଟ୍‌ରେ ୮,୦୦୦ରୁ ୧୫,୦୦୦ ପର୍ଯ୍ୟନ୍ତ ପ୍ରତ୍ୟେକ ରନ୍ ମାଇଲଖୁଣ୍ଟକୁ ସବୁଠାରୁ କମ୍ ଇନିଂସରେ ହାସଲ କରିଛନ୍ତି କୋହଲି।

୭. ଟେଷ୍ଟରେ ଅଧିନାୟକ ଭାବେ ସର୍ବାଧିକ ଦ୍ୱିଶତକ: ଟେଷ୍ଟ ଅଧିନାୟକ ଭାବେ ୭ଟି ଦ୍ୱିଶତକ ହାସଲ କରିଛନ୍ତି ବିରାଟ। ଏହି ରେକର୍ଡ ଆଜି ବି ତାଙ୍କ ନାମରେ ରହିଛି।

୮. ରନ୍ ଚେଜ୍‌ରେ ସର୍ବାଧିକ ଶତକ: ଦିନିକିଆରେ ଦ୍ୱିତୀୟ ଇନିଂସରେ ବ୍ୟାଟିଂ କରି ୩୦ଟି ଶତକ ହାସଲ କରିଛନ୍ତି କୋହଲି। ଏହି କାରଣରୁ ତାଙ୍କୁ ଚେଜ୍ ମାଷ୍ଟର କୁହାଯାଏ।

୯. ODI ଚେଜ୍‌ରେ ସର୍ବାଧିକ ରନ୍: ରନ୍ ପିଛା କରିବା ସମୟରେ ୮,୭୪୧ ରନ୍ କରି ସଚିନ ତେନ୍ଦୁଲକରଙ୍କ ୮,୭୨୦ ରନ୍‌ର ରେକର୍ଡକୁ ପଛରେ ପକାଇଛନ୍ତି କୋହଲି।

୧୦. ସର୍ବାଧିକ Player of the Series ପୁରସ୍କାର: ଅନ୍ତର୍ଜାତୀୟ କ୍ରିକେଟ୍‌ରେ ୨୨ ଥର Player of the Series ପୁରସ୍କାର ଜିତିଛନ୍ତି ବିରାଟ। ଏହା ମଧ୍ୟ ତାଙ୍କ କ୍ୟାରିୟରର ଏକ ବଡ଼ ଉପଲବ୍ଧି।

୩୮ ବର୍ଷରେ ବି କମିନି କ୍ରିକେଟ୍‌ ପ୍ରତି ଜୋସ୍

କୋହଲିଙ୍କ ଯାତ୍ରା କେବଳ ରନ୍ ଓ ଶତକର କାହାଣୀ ନୁହେଁ, ବରଂ ନିଷ୍ଠା, ପରିଶ୍ରମ ଓ ଲଢ଼େଇର ଏକ ଉଦାହରଣ। ଟେଷ୍ଟ ଓ T20 ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ନେଇଥିଲେ ମଧ୍ୟ ଦିନିକିଆ କ୍ରିକେଟ୍‌ରେ ତାଙ୍କ ବ୍ୟାଟ୍‌ର ଚମକ ଜାରି ରହିଛି।

୩୮ତମ ଜନ୍ମଦିନରେ କିଙ୍ଗ୍ କୋହଲିଙ୍କୁ ଅଗଣିତ ଶୁଭେଚ୍ଛା। ଆଗାମୀ ଦିନରେ ତାଙ୍କ ବ୍ୟାଟ୍‌ରୁ ଆହୁରି କେତେ ରେକର୍ଡ ଓ ଶତକ ଦେଖିବାକୁ ମିଳିବ, ତାହା ଉପରେ ରହିଛି କ୍ରିକେଟ୍ ପ୍ରେମୀଙ୍କ ନଜର।

ମୁମ୍ବାଇ: ରାତି ପାହିଲେ ହେବ ରିଲିଜ, ହେଲେ ପରଦାକୁ ଆସିବା ପୂର୍ବରୁ ହିଁ ବକ୍ସ ଅଫିସ୍‌ରେ ଚହଳ ପକାଇଛି ନିତେଶ ତିୱାରୀଙ୍କ ମହାକାବ୍ୟ ଆଧାରିତ ଫିଲ୍ମ ‘ରାମାୟଣ: ପାର୍ଟ ୱାନ୍’। ରିଲିଜ୍ ପୂର୍ବରୁ ଗ୍ଲୋବାଲ୍ ଆଡଭାନ୍ସ ଟିକେଟ୍ ବୁକିଂ ୧୦୦ କୋଟି ଟଙ୍କାର ମ୍ୟାଜିକ୍ ଫିଗର୍ ପାର୍ କରିଛି। ମଙ୍ଗଳବାର ବ୍ୟବସାୟ ଶେଷ ସୁଦ୍ଧା ଫିଲ୍ମଟି ପ୍ରାୟ ୧୧୧.୫୦ କୋଟି ଟଙ୍କାର ଗ୍ରସ୍ ଆଡଭାନ୍ସ ବୁକିଂ କରିଥିବା ରିପୋର୍ଟ ଆସିଛି।

ଘରୋଇ ବଜାରରୁ ୫୭ କୋଟିରୁ ଅଧିକ ଆୟ

ଆଡଭାନ୍ସ ବୁକିଂରେ ଭାରତୀୟ ବଜାରର ଯୋଗଦାନ ପ୍ରାୟ ୫୭.୨୫ କୋଟି ଟଙ୍କା ଗ୍ରସ୍ ରହିଛି। ଏହାର ନେଟ୍ କଲେକ୍ସନ୍ ପ୍ରାୟ ୪୮ କୋଟି ଟଙ୍କା। ଅନ୍ୟପଟେ ବିଦେଶୀ ବଜାରରୁ ପ୍ରାୟ ୫୪.୨୫ କୋଟି ଟଙ୍କା ଅର୍ଥାତ୍ ୫.୭ ମିଲିୟନ୍ ଡଲାରର ଆଡଭାନ୍ସ ବୁକିଂ ହୋଇଛି।

ଫିଲ୍ମ ରିଲିଜ୍ ପୂର୍ବରୁ ବୁକିଂରେ ଆହୁରି ବୃଦ୍ଧି ହେବାର ଆକଳନ କରାଯାଉଛି। ଏହା ୧୫୦ କୋଟି ଟଙ୍କାର ମାଇଲଖୁଣ୍ଟ ଛୁଇଁପାରେ ବୋଲି ବ୍ୟବସାୟିକ ଟ୍ରାକିଂରେ ଆଶା ପ୍ରକାଶ କରାଯାଇଛି।

ହିନ୍ଦୀ ସହ କନ୍ନଡ଼ ଭର୍ସନରେ ବି ଜବରଦସ୍ତ କ୍ରେଜ୍

ଭାରତରେ ହିନ୍ଦୀ ଭର୍ସନ୍‌ର ଓପନିଂ ଡେ ଆଡଭାନ୍ସ ବୁକିଂ ବୁଧବାର ସକାଳ ସୁଦ୍ଧା ପ୍ରାୟ ୧୭.୫୦ କୋଟି ଟଙ୍କା ନେଟ୍ ରହିଥିବା ରିପୋର୍ଟରେ କୁହାଯାଇଛି।ଅନ୍ୟପଟେ ସୁପରଷ୍ଟାର ୟଶଙ୍କ ଲୋକପ୍ରିୟତାର ପ୍ରଭାବ କନ୍ନଡ଼ ଭର୍ସନ୍‌ରେ ଦେଖିବାକୁ ମିଳିଛି। କନ୍ନଡ଼ରେ ଡବ୍ ହୋଇଥିବା ଫିଲ୍ମଗୁଡ଼ିକ ମଧ୍ୟରେ ଏହା ପ୍ରାୟ ୫ କୋଟି ଟଙ୍କାର ଗ୍ରସ୍ ଆଡଭାନ୍ସ ବୁକିଂ ସହ ରେକର୍ଡ କରିଥିବା ଦାବି କରାଯାଇଛି। ଘରୋଇ ବଜାରରେ ୫ ଦିନର ଆଡଭାନ୍ସ ବୁକିଂ ପ୍ରାୟ ୪୦ କୋଟି ଟଙ୍କା ନେଟ୍‌ରେ ପହଞ୍ଚିଛି।

ଆମେରିକାରେ ବି ରାମାୟଣର କ୍ରେଜ୍

ବିଦେଶୀ ବଜାରରେ ଆମେରିକାରୁ ସର୍ବାଧିକ ବୁକିଂ ହୋଇଛି। ଏଠାରେ ଆଡଭାନ୍ସ ଟିକେଟ୍ ବିକ୍ରି ୩.୨୦ ମିଲିୟନ୍ ଡଲାରରେ ପହଞ୍ଚିଛି। ଏହି ପରିମାଣ ହିନ୍ଦୀ ଫିଲ୍ମ ‘ଧୁରନ୍ଧର: ଦି ରିଭେଞ୍ଜ’ ପରେ ଦ୍ୱିତୀୟ ସର୍ବାଧିକ ଆଡଭାନ୍ସ ବୁକିଂ ବୋଲି ରିପୋର୍ଟରେ ଦାବି କରାଯାଇଛି।

ବର୍ତ୍ତମାନର ଟ୍ରାକିଂ ଅନୁସାରେ ଫିଲ୍ମର ଗ୍ଲୋବାଲ୍ ଓପନିଂ ୱିକେଣ୍ଡ ୨୦ ମିଲିୟନ୍ ଡଲାରରୁ ଅଧିକ ହୋଇପାରେ ବୋଲି ଆକଳନ କରାଯାଉଛି। ରିଲିଜ୍ ପୂର୍ବରୁ ଏତେ ବଡ଼ ଆଡଭାନ୍ସ ବୁକିଂ ଫିଲ୍ମକୁ ନେଇ ଦର୍ଶକଙ୍କ ଉତ୍ସାହକୁ ଦର୍ଶାଉଛି। ଏବେ ସମସ୍ତଙ୍କ ନଜର ଫିଲ୍ମର ପ୍ରଥମ ଦିନର ବକ୍ସ ଅଫିସ୍ କଲେକ୍ସନ୍ ଉପରେ।

ମୁମ୍ବାଇ: 'ବେବି ଡଲ୍ ମେଁ ସୋନେ ଦି' ଭଳି ହିଟ୍ ଗୀତ ଦେଇଥିବା ବଲିଉଡ୍ ଗାୟିକା କନିକା କପୁରଙ୍କ ବୈବାହିକ ସମ୍ପର୍କରେ ଝଡ଼ ଉଠିଛି । ବିବାହର ଚାରି ବର୍ଷ ପରେ କନିକା ନିଜ ସ୍ୱାମୀଙ୍କଠାରୁ ଅଲଗା ହେବା ନେଇ ଘୋଷଣା କରିଛନ୍ତି । 

ଗାୟିକା କନିକା କାପୁର ଏକ ପୋଷ୍ଟ ମାଧ୍ୟମରେ ନିଜ ପ୍ରଶଂସକଙ୍କୁ ନିଜ ବିବାହ ବିଚ୍ଛେଦର ଖବର ଦେଇଛନ୍ତି । କନିକା କପୁର ଲେଖିଛନ୍ତି ଯେ ସେ ଏ ବିଷୟରେ ବହୁତ ଚିନ୍ତା କରିବା ପରେ ସେ ଏବଂ ତାଙ୍କ ସ୍ୱାମୀ ଅଲଗା ହେବାକୁ ନିଷ୍ପତ୍ତି ନେଇଛନ୍ତି । ଉଭୟ ଏକାଠି ବିତାଇଥିବା ସମୟ ପାଇଁ ସେ ନିଜର କୃତଜ୍ଞତା ଜଣାଇଛନ୍ତି  । ଏହା ସହିତ ତାଙ୍କ ସ୍ୱାମୀଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି । ଏହି ବିଷୟରେ ସମ୍ବେଦନଶୀଳ ହୋଇ ତାଙ୍କ ବ୍ୟକ୍ତିଗତ ଜୀବନକୁ ସମ୍ମାନ ଦେବାକୁ ସେ ଅନୁରୋଧ କରିଛନ୍ତି । 

ଦୀର୍ଘ ୧୫ ବର୍ଷ ଧରି ପ୍ରେମ ସମ୍ପର୍କରେ ରହିବା ପରେ କନିକା କପୁର ଏବଂ ଏନଆରଆଇ ବ୍ୟବସାୟୀ ଗୌତମ ହାଥିରମାଣୀଙ୍କ ବିବାହ ହୋଇଥିଲା । ୨୦୨୨, ମେ ୨୦ ତାରିଖରେ ଲଣ୍ଡନ ଠାରେ ଉଭୟ ପରିବାରର ଉପସ୍ଥିତିରେ  ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ । କନିକାଙ୍କର ଏହା ଦ୍ୱିତୀୟ ବିବାହ ଅଟେ । ସେ ୧୯୯୮ ମସିହାରେ ବ୍ୟବସାୟୀ ରାଜ ଚାନ୍ଦୋକଙ୍କୁ ବିବାହ କରିଥିଲେ। ସେହି ସମୟରେ କନିକା କପୁରଙ୍କ ବୟସ ମାତ୍ର ୧୮ ବର୍ଷ ଥିଲା। କନିକା ଏବଂ ରାଜଙ୍କର ତିନୋଟି ସନ୍ତାନ ଅଛନ୍ତି, ଦୁଇ ଝିଅ ଅନାୟା ଓ ସମାୟରା, ଏବଂ ପୁଅ ଯୁବରାଜ। ରାଜଙ୍କ ସହ ବିବାହ ପରେ, କନିକା କପୁର ଲଣ୍ଡନ ଚାଲିଯାଇଥିଲେ। ୨୦୧୨ ମସିହାରେ ସେ ନିଜ ସ୍ୱାମୀଙ୍କଠାରୁ ଅଲଗା ହୋଇଯାଇଥିଲେ ଏବଂ ଏହା ପରେ ସେ ଭାରତ ଫେରି ଆସି ଏଠାରେ ନିଜର ସଙ୍ଗୀତ କ୍ୟାରିୟର ଗଢ଼ି ତୋଳିଥିଲେ ।

ମୁମ୍ବାଇ: ପରିବେଶ ଅନୁକୂଳ ଏବଂ ପ୍ରଦୂଷଣ ମୁକ୍ତ ଦୀପାବଳି ପାଳନ ପାଇଁ ବଲିଉଡ୍ ଅଭିନେତ୍ରୀ ଦିୟା ମିର୍ଜା ଜାରି କରିଥିବା ଭିଡ଼ିଓକୁ ହଟାଇବାକୁ ନେଇ କ୍ଷୋଭ ପ୍ରକାଶ କରିଛନ୍ତି ବମ୍ବେ ହାଇକୋର୍ଟ । ପୁନର୍ବାର ତାଙ୍କର ଭିଡ଼ିଓ ସାମାଜିକ ଗଣମାଧ୍ୟମରେ ଅପଲୋଡ୍ କରିବାକୁ ହାଇକୋର୍ଟ ବମ୍ବେ ମହାନଗର ନିଗମକୁ ନିର୍ଦ୍ଦେଶ ଦେଇଛନ୍ତି । 

ବମ୍ବେ ହାଇକୋର୍ଟ ବିଚାରପତି ଗିରିଶ କୁଲକର୍ଣ୍ଣି ଏବଂ ବିଚାରପତି ନୀଲା ଗୋଖଲେଙ୍କୁ ନେଇ ଗଠିତ ଖଣ୍ଡପୀଠ ଶୁଣାଣିରେ କହିଛନ୍ତି ଯେ କିଛି ବ୍ୟକ୍ତି ବିଶେଷ, ବିଶେଷକରି ଜନପ୍ରତିନିଧିମାନଙ୍କ, ସଂକୀର୍ଣ୍ଣ ମାନସିକତା ଗଭୀର ଆଘାତ ଦେଇଛି। ପରିବେଶ ତଥା ବାୟୁ ଓ ଶବ୍ଦ ପ୍ରଦୂଷଣ ସମ୍ପର୍କରେ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ପ୍ରସ୍ତୁତ ଏକ ଭିଡିଓକୁ ଯେଭଳି ଭାବେ ଭିନ୍ନ ରୂପ ଦିଆଗଲା, ତାହା ଅତ୍ୟନ୍ତ ଦୁର୍ଭାଗ୍ୟଜନକ। 

ବିଏମସି କମିଶନରଙ୍କ କାର୍ଯ୍ୟର ପ୍ରଶଂସା କରି କୋର୍ଟ କହିଲେ ଯେ, ସଚେତନତା ଅଭିଯାନ ପାଇଁ ବିଶିଷ୍ଟ ବ୍ୟକ୍ତିତ୍ୱ ବା ସେଲିବ୍ରିଟିମାନଙ୍କୁ ଚୟନ କରିବାର ନିଷ୍ପତ୍ତି ସମ୍ପୂର୍ଣ୍ଣ ଉପଯୁକ୍ତ ଥିଲା। ଏଭଳି ଏକ ମହତ୍ ଉଦ୍ୟମକୁ ନେଇ ଅନାବଶ୍ୟକ ବିବାଦ ସୃଷ୍ଟି କରିବା ସମ୍ପୂର୍ଣ୍ଣ ଅଯୌକ୍ତିକ ଅଟେ। ଯେଉଁମାନେ ଏହି ଭିଡିଓକୁ ବିରୋଧ କରିଥିଲେ, ସେମାନଙ୍କୁ ସତର୍କ କରାଇ କୋର୍ଟ କହିଲେ ଯେ ସମାଜର ପ୍ରତ୍ୟେକ ବ୍ୟକ୍ତି ଧର୍ମ, ଜାତି କିମ୍ବା ମତ ନିର୍ବିଶେଷରେ ସମ୍ମାନ ପାଇବାର ଯୋଗ୍ୟ ଅଟନ୍ତି । କୋର୍ଟ ଗୁରୁତ୍ୱାରୋପ କରି କହିଛନ୍ତି ଯେ ଆମ ଦେଶ ଏକ ଧର୍ମନିରପେକ୍ଷ ରାଷ୍ଟ୍ର ଏବଂ ଏହାର ନାଗରିକମାନେ ଏହି ଭାବନାକୁ ବଜାୟ ରଖିବା ଉଚିତ।

ଉଲ୍ଲେଖ ଯୋଗ୍ୟ, ପ୍ରଦୂଷଣ ମୁକ୍ତ ଦୀପାବଳି ପାଳନ ପାଇଁ ବିଏମସି ଏକ ସ୍ୱତନ୍ତ୍ର ଅଭିଯାନ ଚଳାଇଥିଲା । ଏଥିରେ ସାମିଲ ହେବାକୁ ସମସ୍ତ ଅଭିନେତା ଓ ଅଭିନେତ୍ରୀ ଏବଂ ବିଶିଷ୍ଟବ୍ୟକ୍ତିଙ୍କୁ ଆହ୍ୱାନ କରିଥିଲା । ଅଭିନେତ୍ରୀ ଦିୟା ମିର୍ଜା ମଧ୍ୟ ଏଥିରେ ସାମିଲ ହୋଇ ପରିବେଶ ଅନୁକୂଳ ଦୀପାବଳି ପାଳନ ପାଇଁ ଅନୁରୋଧ କରିଥିଲେ । କିନ୍ତୁ ବିଜେପି ଏହା ଉପରେ ଆପତ୍ତି ଜଣାଇବାରୁ ବିବାଦ ଆରମ୍ଭ ହୋଇଥିଲା । ଶେଷରେ ବିଏମସି ଉକ୍ତ ଭିଡ଼ିଓଟିକୁ ହଟାଇ ଦେଇଥିଲା । 

ନିକଟରେ ରିଲିଜ୍ ହୋଇଥିବା ଫିଲ୍ମ 'ହନୁମାନ୍ ଅଂଶ'କୁ ନେଇ ବେଶ୍ ଚର୍ଚ୍ଚା ଚାଲିଥିଲା। ମାତ୍ର ୨ କୋଟି ଟଙ୍କା ବ୍ୟୟରେ ନିର୍ମିତ ଏହି ଫିଲ୍ମଟି ସାରା ବିଶ୍ୱରେ ପ୍ରାୟ ₹୪୫୨.୮୬ କୋଟି ଟଙ୍କାର ବ୍ୟବସାୟ କରିଛି। ହେଲେ, ଏବେ ଏହି ଫିଲ୍ମର ନିର୍ମାତା ମାନଙ୍କ ମଧ୍ୟରେ ବିବାଦର ଖବର ସାମ୍ନାକୁ ଆସୁଛି। ଏବେ ମେକର୍ସମାନେ ଫିଲ୍ମକୁ ନେଇ ଏକ ଅଫିସିଆଲ୍ ବକ୍ତବ୍ୟ  ଜାରି କରିଛନ୍ତି।

ଆଧ୍ୟାତ୍ମିକ ଏବଂ ଧାର୍ମିକ ଗୁରୁ ନିମ୍ କରୋଲି ବାବାଙ୍କ କାହାଣୀ ଉପରେ ନିର୍ମିତ ଫିଲ୍ମ 'ହନୁମାନ୍ ଅଂଶ' ସିନେମାଘରଗୁଡ଼ିକରେ ରେକର୍ଡ ପରେ ରେକର୍ଡ ଗଢ଼ିଥିଲା। ମାତ୍ର ୨ ରୁ ୩ କୋଟି ଟଙ୍କାର ବଜେଟରେ ନିର୍ମିତ ଏହି ଫିଲ୍ମକୁ ଲୋକମାନେ ବହୁତ ପସନ୍ଦ କରିଥିଲେ। ଦେଶରୁ ଆରମ୍ଭ କରି ସାରା ବିଶ୍ୱରେ ଫିଲ୍ମ ଏବଂ ଏହାର ନିର୍ମାତାମାନଙ୍କର ବେଶ୍ ପ୍ରଶଂସା ହୋଇଥିଲା। କିନ୍ତୁ, ଏବେ ପରଦା ପଛର ମାହୋଲ୍ କିଛିଟା ଗରମ ରହିଛି। ଖବର ଅନୁଯାୟୀ, ଫିଲ୍ମ ମେକର୍ସଙ୍କ ମଧ୍ୟରେ ଏହି ଫିଲ୍ମକୁ ନେଇ ବହୁ ସମୟରୁ ମନୋମାଳିନ୍ୟ ଚାଲିଛି। ଏସବୁ ମଧ୍ୟରେ 'ହନୁମାନ୍ ଅଂଶ'ର ପ୍ରୋଡ୍ୟୁସରମାନେ ଏକ ଅଫିସିଆଲ୍ ଷ୍ଟେଟ୍‌ମେଣ୍ଟ ଜାରି କରି ନମ୍ରତା ସିଂହ ଏବଂ ବିଶାଳ ଚାତୁର୍ବେଦୀଙ୍କୁ ଏକ୍ସିକ୍ୟୁଟିଭ୍ ଡାଇରେକ୍ଟର ବୋଲି ଦର୍ଶାଇଛନ୍ତି। ଏହି ଷ୍ଟେଟ୍‌ମେଣ୍ଟରେ କୁହାଯାଇଛି ଯେ କେବଳ ସେମାନେ ହିଁ ପବ୍ଲିକ୍ ରିଲେସନ୍ସ , ମାର୍କେଟିଂ, ଆୱାର୍ଡସ ଏବଂ ପାର୍ଟନରସିପ୍ ନିୟନ୍ତ୍ରଣ କରିବା ପାଇଁ ଅଧିକୃତ  ଅଟନ୍ତି।

'ହନୁମାନ୍ ଅଂଶ' ଅତ୍ୟନ୍ତ ଧୀମା ଆରମ୍ଭ କରିଥିଲା ଏବଂ ଫିଲ୍ମ ରିଲିଜ୍ ହେବା ସମୟରେ ଲୋକଙ୍କୁ ଏ ବିଷୟରେ ଜଣା ମଧ୍ୟ ନଥିଲା। ଧୀରେ ଧୀରେ ଫିଲ୍ମର ରୋଜଗାର କମିବାକୁ ଲାଗିଥିଲା, କିନ୍ତୁ ୧୭ତମ ଦିନରେ ଏହା କମବ୍ୟାକ୍ କରିଥିଲା ଏବଂ ବକ୍ସ ଅଫିସ୍‌ରେ ରକେଟ୍ ଭଳି ଦ୍ରୁତ ଗତିରେ ଆଗେଇଥିଲା। ତା’ପରେ ଏହି ଫିଲ୍ମ ସାମ୍ନାରେ ଅନେକ ବଡ଼ ବଡ଼ ଫିଲ୍ମ ଧରାଶାୟୀ ହୋଇଯାଇଥିଲେ। ୱାର୍ଲ୍ଡୱାଇଡ୍ (ସାରା ବିଶ୍ୱରେ) ଏହି ଫିଲ୍ମଟି ପ୍ରାୟ ₹୪୫୨.୮୬ କୋଟି ଟଙ୍କା କଲେକ୍ସନ୍ କରି ଇତିହାସ ରଚିଥିଲା। ଗୋଟିଏ ପଟେ ଫିଲ୍ମ ନିଜର ସଫଳତା ଉତ୍ସବ ପାଳନ କରୁଥିବା ବେଳେ ଅନ୍ୟପଟେ ବଢ଼ୁଥିବା ଲୋକପ୍ରିୟତା ମଧ୍ୟରେ ଫିଲ୍ମ ନିର୍ମାଣ ଦଳ ମଧ୍ୟରେ ମତଭେଦ ଆରମ୍ଭ ହୋଇଛି। ଅନୁମାନ କରାଯାଉଛି ଯେ ଫିଲ୍ମର ନିର୍ଦ୍ଦେଶକ ଡକ୍ଟର ବିଶାଳ ଚାତୁର୍ବେଦୀ ଏବଂ ପ୍ରୋଡ୍ୟୁସର ନମ୍ରତା ଜି ସିଂହ, ରାଗିଣୀ ସୋନା ଓ ଅନୁପ୍ରିୟା ନାଗରଙ୍କ ମଧ୍ୟରେ କିଛି ବିବାଦ ଜାରି ରହିଛି।

'ହନୁମାନ୍ ଅଂଶ'ର ପରବର୍ତ୍ତୀ ଭାଗର ଭବିଷ୍ୟତ ବିପଦରେ

'ସ୍କ୍ରିନ୍'ର ରିପୋର୍ଟ ଅନୁଯାୟୀ, ଫିଲ୍ମର ପବ୍ଲିସିଟିକୁ ନେଇ ଲଗାତାର ବିବାଦ ହେଉଛି ଏବଂ ଜଣେ ନିର୍ଦ୍ଦିଷ୍ଟ ପ୍ରୋଡ୍ୟୁସରଙ୍କୁ ଅନ୍ୟମାନଙ୍କ ତୁଳନାରେ ଅଧିକ ଆଟେନ୍ସନ୍  ମିଳୁଥିବା ନେଇ ମେକର୍ସଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଏପରି ସ୍ଥିତିରେ 'ହନୁମାନ୍ ଅଂଶ'ର ପରବର୍ତ୍ତୀ ଭାଗର ଭବିଷ୍ୟତ ମଧ୍ୟ ବିପଦରେ ପଡ଼ିଥିବା ଦେଖାଯାଉଛି। ଏବେ ନମ୍ରତା ସିଂହ ଏବଂ ଡକ୍ଟର ବିଶାଳ ଚାତୁର୍ବେଦୀ ଫିଲ୍ମର ରାଇଟ୍ସ (ଅଧିକାର) ଏବଂ ଡିଷ୍ଟ୍ରିବ୍ୟୁସନ୍ ବିବରଣୀ ବିଷୟରେ ଏକ ଅଫିସିଆଲ୍ ଷ୍ଟେଟ୍‌ମେଣ୍ଟ ଜାରି କରିଛନ୍ତି।

'କୌଣସି ଜଣେ ବ୍ୟକ୍ତିଙ୍କ ପାଖରେ ସେହି ଅଧିକାର ନାହିଁ'

ସୋମବାର ଦିନ ନମ୍ରତା ଜି ସିଂହ ଏବଂ ଡକ୍ଟର ବିଶାଳ ଚାତୁର୍ବେଦୀ 'ସ୍ୱୟମ୍ଭୂ ମିଡିଆ ନେଟୱାର୍କ' ଦ୍ୱାରା ଶେୟାର କରାଯାଇଥିବା ଏକ ଅଫିସିଆଲ୍ ଷ୍ଟେଟ୍‌ମେଣ୍ଟରେ ନିଜକୁ ଏକ୍ସିକ୍ୟୁଟିଭ୍ ଡାଇରେକ୍ଟର ବୋଲି କହିଛନ୍ତି। ଷ୍ଟେଟ୍‌ମେଣ୍ଟ ଅନୁଯାୟୀ, "ହନୁମାନ୍ ଅଂଶ (ଫିଲ୍ମ) ନିମ୍ କରୋଲି ବାବା, ମହାରାଜଜୀଙ୍କ ଜୀବନକୁ ସ୍କ୍ରିନ୍‌କୁ ଆଣୁଛି, ଯିଏ କ୍ୟାଞ୍ଚି ଧାମରୁ ସିଲିକନ୍ ଭ୍ୟାଲି ପର୍ଯ୍ୟନ୍ତ ପୂଜା ପାଉଥିବା ସନ୍ଥ, ଯାହାଙ୍କ ଭକ୍ତ ଭାରତ, UK ଏବଂ ସାରା ବିଶ୍ୱରେ ଅଛନ୍ତି। ମାର୍କେଟ୍ ଏବଂ ମିଡିଆରେ ଚାଲିଥିବା ବିଭିନ୍ନ ରିପୋର୍ଟକୁ ଦୃଷ୍ଟିରେ ରଖି କମ୍ପାନୀ ସ୍ପଷ୍ଟ କରୁଛି ଯେ (ଜଣେ ବ୍ୟକ୍ତି ନିଜକୁ ଫିଲ୍ମର ରାଇଟ୍ସ ଡିଲ୍ କରିବା ପାଇଁ ଅଧିକୃତ କହୁଛନ୍ତି), କୌଣସି ଗୋଟିଏ ବ୍ୟକ୍ତିଙ୍କ ପାଖରେ ସେହି ଅଧିକାର ନାହିଁ।"

ଆପୋଷ ବୁଝାମଣା ଜରିଆରେ ହିଁ ଡିଲ୍ ହୋଇପାରିବ

ସୋସିଆଲ ମିଡିଆରେ ଶେୟାର କରାଯାଇଥିବା ଏହି ଷ୍ଟେଟ୍‌ମେଣ୍ଟରେ ଆଗକୁ ଲେଖାଯାଇଛି ଯେ, "ଭାରତ ଏବଂ ଆନ୍ତର୍ଜାତୀୟ ସ୍ତରରେ ଫିଲ୍ମର ସମସ୍ତ ରାଇଟ୍ସ (ଥିଏଟ୍ରିକାଲ୍, ଷ୍ଟ୍ରିମିଂ, ବ୍ରାଡକାଷ୍ଟ, ମ୍ୟୁଜିକ୍, ଗେମିଂ, ଲାଇସେନ୍ସିଂ ଇତ୍ୟାଦି) କେବଳ ପ୍ରୋଡ୍ୟୁସରମାନଙ୍କ ମଧ୍ୟରେ ହୋଇଥିବା ଆପୋଷ ଚୁକ୍ତିରେ ଦର୍ଶାଯାଇଥିବା ପ୍ରକ୍ରିୟା ଜରିଆରେ ହିଁ ଡିଲ୍ କରାଯାଇପାରିବ। ନମ୍ରତା ଜି ସିଂହ ଏବଂ ଡକ୍ଟର ବିଶାଳ ଚାତୁର୍ବେଦୀ କମ୍ପାନୀ ପକ୍ଷରୁ ପବ୍ଲିକ୍ ରିଲେସନ୍ସ, ମାର୍କେଟିଂ, ଆୱାର୍ଡସ ଏବଂ ପାର୍ଟନରସିପ୍ ପରିଚାଳନା ପାଇଁ ସମ୍ପୂର୍ଣ୍ଣ ଭାବେ ଅଧିକୃତ ଅଟନ୍ତି। ମିଡିଆ ଏବଂ ପ୍ଲାଟଫର୍ମଗୁଡ଼ିକ ସହ ସମସ୍ତ କୋଅର୍ଡିନେସନ୍ ସେମାନଙ୍କ ଜରିଆରେ ହିଁ ହେବ।"

ଫିଲ୍ମର ଅଫିସିଆଲ୍ କମ୍ୟୁନିକେସନ୍ ଚ୍ୟାନେଲ୍ ସହ କୋଅର୍ଡିନେଟ୍ କରିବାକୁ ପଡ଼ିବ

ବୟାନରେ କୁହାଯାଇଛି ଯେ, "କୌଣସି ପକ୍ଷକୁ ଏକାକୀ ଫିଲ୍ମର ଡିଲ୍ କରିବାର ଅଧିକାର ନାହିଁ। ଏପରି କୌଣସି ଡିଲ୍ ଅସିଦ୍ଧ ଅଟେ। ଏହି ପ୍ରକ୍ରିୟା ବାହାରେ କରାଯାଇଥିବା କୌଣସି ବକ୍ତବ୍ୟ, ଆୱାର୍ଡ ଦାବି କିମ୍ବା ବିଜନେସ୍ ଚୁକ୍ତିକୁ କମ୍ପାନୀ ଦ୍ୱାରା ମାନ୍ୟତା ଦିଆଯିବ ନାହିଁ। କାଷ୍ଟ୍ ଏବଂ କ୍ରୁ ସଦସ୍ୟଙ୍କ ସମେତ ଯେକୌଣସି ବ୍ୟକ୍ତି ଯିଏ ହନୁମାନ୍ ଅଂଶ ପକ୍ଷରୁ କୌଣସି ପବ୍ଲିକ୍ ପ୍ଲାଟଫର୍ମ, ମିଡିଆ ଚ୍ୟାନେଲ୍, ପୋଡକାଷ୍ଟ୍, YouTube ଚ୍ୟାନେଲ୍, ଇଣ୍ଟରଭ୍ୟୁ କିମ୍ବା ପ୍ରମୋସନାଲ୍ କାର୍ଯ୍ୟକ୍ରମରେ ବକ୍ତବ୍ୟ ଦେବାକୁ ଚାହୁଁଛନ୍ତି, ତାଙ୍କୁ ପ୍ରଥମେ ଫିଲ୍ମର ଅଫିସିଆଲ୍ କମ୍ୟୁନିକେସନ୍ ଚ୍ୟାନେଲ୍‌ରୁ ଅନୁମତି ନେବାକୁ ପଡ଼ିବ।"

"ଫିଲ୍ମର ଶ୍ରେୟ  ଏହାର ଅଫିସିଆଲ୍ କ୍ରେଡିଟ୍ସରେ ଦିଆଯାଇଛି। କମ୍ପାନୀ ଫିଲ୍ମ, ଏହାର କ୍ରେଡିଟ୍ସ ଏବଂ ଅଧିକାରର ସୁରକ୍ଷା ପାଇଁ ସବୁ ସ୍ଥାନରେ ମଜବୁତ ଭାବେ କାର୍ଯ୍ୟ କରିବ। ହନୁମାନ୍ ଅଂଶ ସାରା ବିଶ୍ୱରେ ମହାରାଜଜୀଙ୍କ ଭକ୍ତମାନଙ୍କର। - ନମ୍ରତା ଜି ସିଂହ ଏବଂ ଡକ୍ଟର ବିଶାଳ ଚାତୁର୍ବେଦୀ, ଏକ୍ସିକ୍ୟୁଟିଭ୍ ଡାଇରେକ୍ଟର୍ସ।"

ପୋଷ୍ଟ୍ ଶେଷରେ ଡିଷ୍ଟ୍ରିବ୍ୟୁଟର, ଷ୍ଟ୍ରିମିଂ ପ୍ଲାଟଫର୍ମ ଏବଂ ଅନ୍ୟମାନଙ୍କୁ ସିଧାସଳଖ ନିର୍ଦ୍ଦିଷ୍ଟ ଇମେଲ୍ ID ରେ ସମ୍ପର୍କ କରିବାକୁ ଅନୁରୋଧ କରାଯାଇଛି। ସେମାନେ ଏକ ଡିସକ୍ଲେମର୍ ଯୋଡ଼ି ଲେଖିଛନ୍ତି ଯେ, ଫିଲ୍ମର ପ୍ରୋଡ୍ୟୁସର ହେଉଛନ୍ତି ନମ୍ରତା ଜି ସିଂହ, ଡକ୍ଟର ବିଶାଳ ଚାତୁର୍ବେଦୀ, ରାଗିଣୀ ସୋନା ଏବଂ ଅନୁପ୍ରିୟା ନାଗର। ଫିଲ୍ମର ରାଇଟ୍ସ ମିଳିତ ଭାବେ ରଖାଯାଇଛି ଏବଂ ଯେକୌଣସି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ପାଇଁ ଚାରିଜଣ ପ୍ରଡ୍ୟୁସରଙ୍କ ମଞ୍ଜୁରୀ ଜରୁରୀ। ସୂଚନାଯୋଗ୍ୟ ଯେ, ଫିଲ୍ମ ପ୍ରଚାରରେ ୨୧ ବର୍ଷୀୟା ପ୍ରୋଡ୍ୟୁସର ଅନୁପ୍ରିୟା ନାଗର ଆଗଧାଡ଼ିରେ ରହିଆସିଛନ୍ତି।

ନିତେଶ ତିୱାରୀଙ୍କ ନିର୍ଦ୍ଦେଶନାରେ ନିର୍ମିତ ୪୦୦୦ କୋଟି ଟଙ୍କାର ଫିଲ୍ମ ‘ରାମାୟଣ’ ଆଉ କିଛି ଦିନ ମଧ୍ୟରେ ରିଲିଜ୍ ହେବାକୁ ପ୍ରସ୍ତୁତ ରହିଛି। ଏହି ଫିଲ୍ମକୁ ନେଇ ପ୍ରଶଂସକଙ୍କ ଉତ୍ସାହ ଲଗାତାର ବଢ଼ିବାରେ ଲାଗିଛି। ଏହା ଏକ ମଲ୍ଟିଷ୍ଟାରର୍ ପ୍ୟାନ୍ ୱାର୍ଲ୍ଡ  ଫିଲ୍ମ, ଯାହା ୧୦୦ ରୁ ଅଧିକ ଦେଶରେ ଏବଂ ୪୦ ରୁ ଅଧିକ ଭାଷାରେ ରିଲିଜ୍ ପାଇଁ ପ୍ରସ୍ତୁତ। ଫିଲ୍ମ ଉପରେ ବିଗତ ୫-୬ ବର୍ଷ ହେବ କାମ ଚାଲିଥିଲା ଏବଂ ଏହାକୁ ଦୁଇଟି ପାର୍ଟ୍ରେ ରିଲିଜ୍ କରିବାର ଯୋଜନା ରହିଛି। ପ୍ରଥମ ପାର୍ଟ୍ ଦୀପାବଳି ୨୦୨୬ ଅବସରରେ ଆସୁଥିବା ବେଳେ ଦ୍ୱିତୀୟ ପାର୍ଟ୍ ଦୀପାବଳି ୨୦୨୮ ରେ ଆସିପାରେ। ଏଥିରେ ସାଉଥ୍ ସୁପରଷ୍ଟାର୍ ୟଶ ଲିଡ୍ ଭିଲେନ୍ ‘ରାବଣ’ ରୋଲ୍ ପ୍ଲେ କରିଛନ୍ତି।

ରାବଣ ରୋଲ୍ରେ ୟଶଙ୍କର ପୂର୍ବରୁ ହିଁ ବେଶ୍ ପ୍ରଶଂସା ହେଉଛି। ଏହି ଫିଲ୍ମରେ ତାଙ୍କ ଲୁକ୍ଠାରୁ ଆରମ୍ଭ କରି ଡାଇଲଗ୍ ପର୍ଯ୍ୟନ୍ତ ସବୁକିଛି ବହୁତ ପସନ୍ଦ କରାଯାଉଛି। ଫିଲ୍ମ ବିଷୟରେ କଥା ହୋଇ ୟଶ କହିଛନ୍ତି ଯେ, ଏବେ ସାରା ବିଶ୍ୱକୁ ଭାରତୀୟ ସିନେମା ପ୍ରକୃତରେ କ’ଣ ତାହା ଦେଖାଇବାର ସମୟ ଆସିଯାଇଛି।

ସାଉଥ୍ ସୁପରଷ୍ଟାର୍ ୟଶ କ’ଣ କହିଲେ?

ରାମାୟଣ ଉପରେ କଥା ହୋଇ ୟଶ କହିଛନ୍ତି ଯେ, "ରାମାୟଣର ବ୍ୟାଖ୍ୟା  ପ୍ରତ୍ୟେକ ରାଜ୍ୟ ଏବଂ ପ୍ରତ୍ୟେକ ଭାଷାରେ ଅଲଗା ଅଲଗା। ଆମ ସଂସ୍କୃତିର ଏହା ହିଁ ସବୁଠାରୁ ବଡ଼ ବିଶେଷତ୍ୱ ଯେ ଆମେ କାହାଣୀଗୁଡ଼ିକୁ ପ୍ରତ୍ୟେକ ବ୍ୟକ୍ତିଙ୍କ ଦୃଷ୍ଟିକୋଣରୁ ଦେଖୁ। ରାବଣର ଦୃଷ୍ଟିକୋଣରୁ ମଧ୍ୟ ଏହି ଫିଲ୍ମକୁ ଲୋକଙ୍କୁ ଦେଖାଇବାକୁ ଚେଷ୍ଟା କରାଯାଇଛି। ତେଣୁ ମୋତେ ଲାଗୁଛି ଯେ ରାମାୟଣ ଫିଲ୍ମର କାହାଣୀ ଅତ୍ୟନ୍ତ ରିଲେଟେବଲ୍। ଏହାର ଦୁଇଟି ଦିଗ ରହିଛି। ଯେତେବେଳେ ଆମେ କିଛି ହାସଲ କରିବାକୁ ଚାହୁଁ, ସେତେବେଳେ ତା’ ପାଇଁ ପରିଶ୍ରମ ଓ ନିଷ୍ଠାର ସହ ଲାଗିପଡ଼ୁ। ଯେତେବେଳେ ସେହି ଜିନିଷଟି ଆମକୁ ମିଳିଯାଏ, ସେତେବେଳେ ଆମେ ବହୁତ ଶକ୍ତିଶାଳୀ ହୋଇଯାଉ। ଏହାପରେ ଆମକୁ ସେହି ଜିନିଷକୁ ବଜାୟ ରଖିବା ଅତ୍ୟନ୍ତ ଜରୁରୀ।"

"ଏହି କାହାଣୀରେ ରାବଣ ଜଣେ ମହାନ୍ ଜ୍ଞାନୀ, ସଙ୍ଗୀତଜ୍ଞ ଏବଂ ଯୋଦ୍ଧା ହୋଇଥାଏ। କିନ୍ତୁ ଏହାପରେ ମଧ୍ୟ ଏପରି ଅନେକ କାରଣ ଥାଏ, ଯାହା ଯୋଗୁଁ ତାଙ୍କର ନିଷ୍ପତ୍ତି ଜୀବନରେ ସଠିକ୍ ହୋଇନଥାଏ। ଏହି କଥାକୁ ଫିଲ୍ମରେ ବହୁତ ସୁନ୍ଦର ଭାବେ ଦେଖାଯାଇଛି। ପ୍ରତ୍ୟେକ ବ୍ୟକ୍ତି ନିଜକୁ ରାମଙ୍କ ସହ ମଧ୍ୟ ଯୋଡ଼ିପାରିବେ ଏବଂ ରାବଣ ସହ ମଧ୍ୟ ଯୋଡ଼ିପାରିବେ। କିନ୍ତୁ ରାମ କିପରି ପରିସ୍ଥିତିକୁ ହ୍ୟାଣ୍ଡେଲ୍ କଲେ, ତାହା ମଧ୍ୟ ଏକ ଗୁରୁତ୍ୱପୂର୍ଣ୍ଣ କଥା। ତାହା ଦେଖାଇବା ପାଇଁ ଆମକୁ ରାବଣର ମଧ୍ୟ ଆବଶ୍ୟକତା ରହିଛି।"

ରାମାୟଣ କଥା କହିଲେ, ନମିତ ମଲ୍ଲହୋତ୍ରା ଏହି ଫିଲ୍ମର ନିର୍ମାଣ କରୁଛନ୍ତି। ଫିଲ୍ମଟି ୪୦୦୦ କୋଟି ଟଙ୍କାର ବଜେଟ୍ରେ ନିର୍ମିତ। ଫିଲ୍ମର ନିର୍ଦ୍ଦେଶନା ନିତେଶ ତିୱାରୀ ଦେଉଛନ୍ତି, ଯାହାଙ୍କ ପାଖରେ ପୂର୍ବରୁ ହିଁ ଦେଶର ସବୁଠାରୁ ବଡ଼ ଫିଲ୍ମ 'ଦଙ୍ଗଲ' ଦେବାର ଶ୍ରେୟ ରହିଛି। ଏବେ ତାଙ୍କ ନଜର ନିଜର ଏହି ରେକର୍ଡକୁ ଭାଙ୍ଗିବା ଉପରେ ରହିବ। ଫିଲ୍ମରୁ ବମ୍ପର୍ ରୋଜଗାରର ଆଶା କରାଯାଉଛି। ଓପନିଂ ଡେ’ରେ ହିଁ ଏହି ଫିଲ୍ମ ଅନେକ ଫିଲ୍ମର ରେକର୍ଡ ଭାଙ୍ଗିଦେବ ବୋଲି ଆକଳନ କରାଯାଉଛି। ଫିଲ୍ମଟି ଆଡଭାନ୍ସ ବୁକିଂରେ ହିଁ କମାଲ କରିସାରିଛି ଏବଂ ରିଲିଜ୍ର ୩ ଦିନ ପୂର୍ବରୁ ପ୍ରାୟ ୭୦ କୋଟି ଟଙ୍କା ରୋଜଗାର କରିସାରିଛି। ଏବେ ଆଗାମୀ ସମୟରେ ଏହି ଫିଲ୍ମ କି କମାଲ୍ କରି ଦେଖାଉଛି, ତାହା ଦେଖିବାକୁ ବାକି ରହିଲା।