ନୂଆପଡ଼ା: ଆଜି ନୂଆପଡ଼ାକୁ ମିଳିବ ନୂଆ ବିଧାୟକ । ନୂଆପଡ଼ା ବିଧାନସଭା ଉପନିର୍ବାଚନ ଫଳାଫଳ ଶୁକ୍ରବାର ପ୍ରକାଶ ପାଇବ । ସେଥିପାଇଁ ଆଶା ଆଶଙ୍କାରେ ରହିଛନ୍ତି ତିନି ପ୍ରମୁଖ ରାଜନୈତିକ ଦଳ ବିଜେପି, ବିଜେଡ଼ି ଏବଂ କଂଗ୍ରେସ । ସକାଳ ୮ଟାରୁ ନୂଆପଡ଼ା ନ୍ୟାସନାଲ କଲେଜରେ ଭୋଟ୍ ଗଣତି ଆରମ୍ଭ ହେବ । 

ନୂଆପଡ଼ାରେ ୩୫୮ଟି ବୁଥ୍ ପାଇଁ ୧୪ଟି ଟେବୁଲରେ ଭୋଟ ଗଣତି କରାଯିବ । ମୋଟ ୨୬ ରାଉଣ୍ଡରେ ଗଣତି ହେବ । ସକାଳ ୮ଟାରେ ପ୍ରଥମେ ପୋଷ୍ଟାଲ୍ ବାଲାଟ୍ ପେପର୍ ଗଣତି କରାଯିବ । ଏହା ପରେ ସାଢ଼େ ୮ଟାରେ ଇଭିଏମ୍ ମେସିନ୍ ଖୋଲାଯିବ । ଗୋଟିଏ ଟେବୁଲରେ ୩ ଜଣ ଅଧିକାରୀ ଏବଂ ବିଭିନ୍ନ ରାଜନୈତିକ ଦଳର ଏଜେଣ୍ଟମାନେ ରହିବେ । ସମସ୍ତ ରାଜନୈତିକ ଦଳର ଏଜେଣ୍ଟ୍ ଏବଂ ଅଧିକାରୀଙ୍କ ଉପସ୍ଥିତିରେ ଇଭିଏମ୍ ମେସିନ ଖୋଲାଯିବ ଏବଂ ଏହା ପରେ ଗଣତି ଆରମ୍ଭ ହେବ । ଏହା ପୂର୍ବରୁ ସମସ୍ତ କାଉଣ୍ଟିଂ ଅଧିକାରୀ ଏବଂ ଅଧିକୃତ ଏଜେଣ୍ଟମାନେ କଲେଜରେ ପହଁଚି ନିଜର ପ୍ରମାଣ ପତ୍ର ଦେଖାଇ ମତଗଣନା ଗୃହକୁ ପ୍ରବେଶ କରିବେ । 

ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଆର୍.ଏସ୍. ଗୋପାଳନଙ୍କ ସୂଚନା ମୁତାବକ, ଚଳିତ ଥର ଗଣତି ନିୟମରେ ସାମାନ୍ୟ ପରିବର୍ତ୍ତନ କରାଯାଇଛି । ପୂର୍ବରୁ ଯେତେବେଲେ କଣ୍ଟ୍ରୋଲ ୟୁନିଟର ତ୍ରୁଟି ବାହାରୁଥିବା ତାକୁ ଅଲଗା ରଖି ଗଣତି ଚାଲୁ ରହୁଥିଲା । କିନ୍ତୁ ଚଳିତ ଥର ଯେଉଁ କଣ୍ଟ୍ରୋଲ ୟୁନିଟର ତ୍ରୁଟି ବାହାରିବ, ତାର ଭିଭିପାଟ୍ ମେସିନର ଭୋଟ୍ ଗଣତି କରାଯିବ ।  ଯେଉଁଠି ମକ୍ ପୋଲ୍ ବେଳେ ତ୍ରୁଟି ଦେଖାଯାଇଥିଲା ସେହି ବୁଥର ଭିଭିପାଟ୍ ମେସିନର ଗଣତି କରାଯିବ । ପ୍ରତି ରାଉଣ୍ଡର ଗଣତି ପରେ ଫଳାଫଳ ଘୋଷଣା କରାଯିବ । 

ଅଧିକ ପଢ଼ନ୍ତୁ:-ନୂଆପଡ଼ା ପାଇଁ ଭକ୍ତଙ୍କ ଭବିଷ୍ୟବାଣୀ: କହିଲେ, ଘାସିରାମ ମାଝୀଙ୍କୁ ମିଳିଛି ଜନ ସମର୍ଥନ, ୫ ହଜାରରୁ ଅଧିକ ଭୋଟରେ ଜିତିବ କଂଗ୍ରେସ

ପ୍ରତି ଟେବୁଲ ପାଇଁ ଜଣେ ଲେଖାଏଁ କାଉଣ୍ଟି ସୁପର ଭାଇଜର ଦାୟିତ୍ୱରେ ରହିବେ । ତାଙ୍କୁ କାଉଣ୍ଟି ଆସିଷ୍ଟାଣ୍ଟ ସହଯୋଗ କରିବେ । ଜଣେ ମାଇକ୍ରୋ ଅବଜରଭର କାଉଣ୍ଟିଂ ଟେବୁଲରେ ରହିବେ । ଗଣତି ପ୍ରକ୍ରିୟାକୁ ତଦାରଖ କରିବେ ରିଟର୍ଣ୍ଣିଂ ଅଫିସର । ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଭିତରେ ଭୋଟ୍ ଗଣତି ହେବ । ଏଥିପାଇଁ ଦୁଇ କମ୍ପାନି କେନ୍ଦ୍ରୀୟ ସୁରକ୍ଷା ଟିମ୍ ମୁତୟନ କରାଯାଇଛି । 

ନୂଆପଡ଼ା ଉପନିର୍ବାଚନରେ ଐତିହାସିକ ୮୩.୪୫% ମତଦାନ ହୋଇଛି। ନୂଆପଡ଼ାରେ ଗତ ୨୦୨୪ ସାଧାରଣ ନିର୍ବାଚନ ଅପେକ୍ଷା ମତଦାନ ବୃଦ୍ଧି ପାଇଛି । ଗତ ନିର୍ବାଚନରେ ୭୫.୪୯ପ୍ରତିଶତ ମତଦାନ ହୋଇଥିଲା ।