ଭୁୁବନେଶ୍ୱର: ରାଜ୍ୟର ବିଭିନ୍ନ ପ୍ରାଥମିକ ଓ ମାଧ୍ୟମିକ ସ୍କୁଲରେ ଛାତ୍ରଛାତ୍ରୀଙ୍କ ଡ୍ରପଆଉଟକୁ ନେଇ ସଂପ୍ରତି ରାଜ୍ୟ ରାଜନୀତି ସରଗରମ । ଶୁକ୍ରବାର ଏହି ପ୍ରସଙ୍ଗରେ ବିଧାନସଭା ଶୀତ ଅଧିବେଶନରେ ଶାସକ ବିଜେପି ଓ ବିରୋଧୀ ବିଜେଡି ମଧ୍ୟରେ ବିତର୍କ ହୋଇଥିଲା । ତେବେ ରାଜ୍ୟର ବିଭିନ୍ନ ପ୍ରାଥମିକ ଓ ମାଧ୍ୟମିକ ସ୍କୁଲରେ ୧,୮୩,୨୧୬ଜଣ ଛାତ୍ରଛାତ୍ରୀ ଡ୍ରପଆଉଟ୍ ଥିବାବେଳେ ‘ଆସ ସ୍କୁଲ ଯିବା’ ଅଭିଯାନ ମାଧ୍ୟମରେ ବର୍ତ୍ତମାନ ସୁଦ୍ଧା ୬୦,୭୨୯ଜଣ ଛାତ୍ରଛାତ୍ରୀଙ୍କୁ ସ୍କୁଲକୁ ଫେରାଇ ଅଣାଯାଇଛି।ବିଧାନସଭାରେ ପ୍ରଶ୍ନକାଳରେ ବିଧାୟିକା ସୁବାସିନୀ ଜେନାଙ୍କ ବସ୍ତା ନିର୍ବାଚନୀ ମଣ୍ଡଳୀର ବିଭିନ୍ନ ସ୍କୁଲରେ କେତେ ଡ୍ରପ୍ଆଉଟ୍ ଓ ଏହାକୁ ରୋକିବାକୁ କ’ଣ ପଦକ୍ଷେପ ନିଆଯାଉଛି ସମ୍ପର୍କିତ ଏକ ପ୍ରଶ୍ନର ଉତ୍ତର ଉପରେ ଆଲୋଚନାବେଳେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଏହି ସୂଚନା ଦେଇଛନ୍ତି।
ମନ୍ତ୍ରୀ ଗୃହରେ କହିଛନ୍ତି, ୯ମ ଓ ଏକାଦଶ େଶ୍ରଣୀରେ ଅଧିକ ଡ୍ରପ୍ଆଉଟ୍ ହେଉଥିବାରୁ ମାଧୋସିଂହ ହାତପାଣ୍ଠି ଖର୍ଚ୍ଚ ଯୋଜନାରେ ଏସ୍ଟି ପିଲାଙ୍କୁ ବାର୍ଷିକ ୫ହଜାର ଟଙ୍କା ଲେଖାଏଁ ଦିଆଯାଉଛି। ସବୁ ସ୍କୁଲରେ ୯ମ ଓ ୧୦ମ ଶ୍ରେଣୀର ପ୍ରାୟ ୧୦ ଲକ୍ଷ ୮୦ହଜାର ପିଲାଙ୍କୁ ସିଏମ୍-ପୋଷଣରେ ମଧ୍ୟାହ୍ନ ଭୋଜନ ଦିଆଯାଉଛି। ବସ୍ତାରେ ୩୨୯ ଜଣ ଡ୍ରପ୍ଆଉଟ୍ ଥିବାବେଳେ ୩୦୦ ଜଣଙ୍କୁ ସ୍କୁଲକୁ ଫେରାଇ ଅଣାଯାଇଛି।
ମନ୍ତ୍ରୀ ଶ୍ରୀ ଗଣ୍ଡ କହିଥିଲେ, ଆସ ସ୍କୁଲ ଯିବା ଅଭିଯାନରେ ଶିକ୍ଷକମାନେ ଡ୍ରପ୍ଆଉଟ୍ ପିଲାଙ୍କ ଘରକୁ ଯାଇ ସେମାନଙ୍କ ଅଭିଭାବକଙ୍କ ସହ ଆଲୋଚନା କରୁଛନ୍ତି। ପିଲାଙ୍କୁ ସ୍କୁଲ ଫେରାଇ ଆଣିବାକୁ ପଦକ୍ଷେପ ନେଉଛନ୍ତି। ଆମେ ସ୍କୁଲରେ ସମସ୍ତଙ୍କୁ ମଧ୍ୟାହ୍ନ ଭୋଜନ, ୟୁନିଫର୍ମ, ବହି ଦେଉଛୁ। ଛାତ୍ରବୃତ୍ତି, ସ୍ଥାନୀୟ ଭାଷାରେ ପଢ଼ାଯାଉଛି।
ସବୁ ଓଡ଼ିଶା ଆଦର୍ଶ ବିଦ୍ୟାଳୟରେ ହଷ୍ଟେଲ ନଥିବାରୁ ପିଲା ସ୍କୁଲ ଛାଡ଼ୁଛନ୍ତି। ତେଣୁ ସବୁ ସ୍କୁଲରେ ହଷ୍ଟେଲ କରିବା ଯୋଜନା ହୋଇଛି। ଆମକୁ ୭୬୨ଟି ପିଏମ୍-ଶ୍ରୀ ସ୍କୁଲ ମିଳିଛି। ୨୦ରୁ କମ୍ ପିଲା ଥିବାରୁ ଯେଉଁ ସ୍କୁଲ ବନ୍ଦ ହୋଇଥିଲା ତାକୁ ପୁଣି ଖୋଲିବାକୁ କିଛି ନିଷ୍ପତ୍ତି ହୋଇନି। ଗତ ସରକାର ତରବରିଆ ଭାବେ ଏଭଳି ନିଷ୍ପତ୍ତି ନେଇଥିଲେ। କିନ୍ତୁ ପୂର୍ବରୁ ଅନ୍ୟ ଯେଉଁ ସ୍କୁଲ ବନ୍ଦ ହୋଇଥିଲା େସଗୁଡ଼ିକୁ ପୁଣି ଖୋଲିବାକୁ ଜିଲ୍ଲାସ୍ତରୀୟ କମିଟିକୁ ପ୍ରସ୍ତାବ ଦିଅନ୍ତୁ ବୋଲି ଗଣ ଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଗୃହରେ ବିରୋଧୀଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇ କହିଛନ୍ତି ।
Also read: ଓଡ଼ିଶା ବିଧାନସଭାରେ ବଙ୍ଗାଳିରେ ଯୁକ୍ତି