ହିମାଳୟର ଉଚ୍ଚ ଅଞ୍ଚଳରେ ଶୀତ ଋତୁର ଆଗମନ ସହ ବରଫପାତର ସମ୍ଭାବନା ବଢ଼ିଥାଏ। ଅକ୍ଟୋବର ଓ ନଭେମ୍ବର ମାସରେ କେତେକ ପାହାଡ଼ିଆ ଅଞ୍ଚଳରେ ତାଜା ବରଫପାତ ଦେଖିବାକୁ ମିଳିପାରେ। ଶୀତ ଋତୁର ଭିଡ଼ ଆରମ୍ଭ ହେବା ପୂର୍ବରୁ ହିମାଳୟର ସୌନ୍ଦର୍ଯ୍ୟ ଉପଭୋଗ କରିବାକୁ ଚାହୁଁଥିବା ଯାତ୍ରୀଙ୍କ ପାଇଁ କିଛି ଉଚ୍ଚ ପର୍ବତୀୟ ସ୍ଥାନ ଆକର୍ଷଣୀୟ ବିକଳ୍ପ ହୋଇପାରେ।

ଜମ୍ମୁ-କାଶ୍ମୀର, ଲଦାଖ, ହିମାଚଳ ପ୍ରଦେଶ ଓ ଉତ୍ତରାଖଣ୍ଡର ଏହି ସ୍ଥାନଗୁଡ଼ିକରେ ଆଗୁଆ ବରଫପାତ ଦେଖିବାର ସମ୍ଭାବନା ରହିଛି।

ସୋନମାର୍ଗ, ଜମ୍ମୁ-କାଶ୍ମୀର:

ତାପମାତ୍ରା ହ୍ରାସ ପାଇବା ସହ ସୋନମାର୍ଗର ଉଚ୍ଚ ପାହାଡ଼ଗୁଡ଼ିକ ବରଫରେ ଆଚ୍ଛାଦିତ ହୋଇପାରେ। ଶୀତ ଆରମ୍ଭରେ ଏଠାର ଉପତ୍ୟକା ଓ ପାହାଡ଼ର ଦୃଶ୍ୟ ପର୍ଯ୍ୟଟକଙ୍କୁ ଆକର୍ଷିତ କରେ।

ଜୋଜିଲା ପାସ୍, ଲଦାଖ:

ଉଚ୍ଚତା ଓ ପରିବର୍ତ୍ତନଶୀଳ ପାଣିପାଗ ପାଇଁ ପରିଚିତ ଏହି ପାର୍ବତ୍ୟ ରାସ୍ତାରେ ଆଗୁଆ ବରଫପାତ ହୋଇପାରେ। ଖରାପ ପାଣିପାଗ ଯୋଗୁଁ ଯାତାୟାତ ପ୍ରଭାବିତ ହେବାର ଆଶଙ୍କା ଥିବାରୁ ଯାତ୍ରୀମାନେ ପୂର୍ବରୁ ସୂଚନା ନେବା ଉଚିତ।

ମନାଲି, ହିମାଚଳ ପ୍ରଦେଶ:

ମନାଲିରେ ଶୀତର ଅନୁଭୂତି ଅକ୍ଟୋବର ଶେଷ ଆଡ଼କୁ ବଢ଼ିଥାଏ। ତେବେ ସହର ଅଞ୍ଚଳରେ ବରଫପାତ ନିଶ୍ଚିତ ନୁହେଁ। ଆଖପାଖର ଉଚ୍ଚ ପାହାଡ଼ରେ ବରଫ ଦେଖିବାର ସୁଯୋଗ ପାଣିପାଗ ଉପରେ ନିର୍ଭର କରେ।

ସିସୁ, ହିମାଚଳ ପ୍ରଦେଶ:

ଲାହୌଲ ଉପତ୍ୟକାର ସିସୁ ତୁଳନାମୂଳକ ଶାନ୍ତ ପର୍ଯ୍ୟଟନସ୍ଥଳ। ପ୍ରଥମ ବରଫପାତ ପରେ ଏଠାକାର ପାହାଡ଼ ଓ ଉପତ୍ୟକାର ଦୃଶ୍ୟ ଆହୁରି ସୁନ୍ଦର ହୋଇଉଠେ।

କିନ୍ନୌର, ହିମାଚଳ ପ୍ରଦେଶ:

ପାରମ୍ପରିକ ଗାଁ, ପାହାଡ଼ ଓ ସେଓ ବଗିଚା ପାଇଁ ପ୍ରସିଦ୍ଧ କିନ୍ନୌରର ଉଚ୍ଚ ଅଞ୍ଚଳରେ ଶୀତ ଆରମ୍ଭ ସହ ବରଫପାତ ହୋଇପାରେ। ବରଫାଚ୍ଛାଦିତ ଶୃଙ୍ଗ ଏଠାକାର ପ୍ରାକୃତିକ ଆକର୍ଷଣକୁ ବଢ଼ାଇଥାଏ।

ହେମକୁଣ୍ଡ ସାହିବ, ଉତ୍ତରାଖଣ୍ଡ:

ଉଚ୍ଚ ପର୍ବତୀୟ ଅଞ୍ଚଳରେ ଥିବା ଏହି ସ୍ଥାନ ଶୀତ ଆସିବା ସହ ବରଫପାତର ଅନୁଭବ କରେ। କିନ୍ତୁ ଏଠାକୁ ଯିବାର ରାସ୍ତା ଓ ପ୍ରବେଶ ପାଣିପାଗ ଏବଂ ଋତୁ ଅନୁଯାୟୀ ସୀମିତ ହୋଇପାରେ। ଯାତ୍ରା ପୂର୍ବରୁ ଅନୁମତି ଓ ଯାତାୟାତ ସମ୍ପର୍କିତ ତଥ୍ୟ ଜାଣିବା ଆବଶ୍ୟକ।

ପାଣିପାଗ ଯାଞ୍ଚ କରି ଯାତ୍ରା କରନ୍ତୁ

ଅକ୍ଟୋବର ଓ ନଭେମ୍ବରରେ ବରଫପାତର ସମୟ ଓ ପରିମାଣ ପ୍ରତିବର୍ଷ ଭିନ୍ନ ହୋଇପାରେ। ତେଣୁ କେବଳ ବରଫ ଦେଖିବା ଆଶାରେ ଯାତ୍ରା ନକରି, ଯିବା ପୂର୍ବରୁ ସଦ୍ୟତମ ପାଣିପାଗ ପୂର୍ବାନୁମାନ ଓ ରାସ୍ତାର ସ୍ଥିତି ଯାଞ୍ଚ କରନ୍ତୁ। ଉଚ୍ଚ ପାହାଡ଼ିଆ ଅଞ୍ଚଳରେ ତାପମାତ୍ରା ହଠାତ୍ ହ୍ରାସ ପାଇପାରୁଥିବାରୁ ଉପଯୁକ୍ତ ଶୀତବସ୍ତ୍ର ସହ ଯାତ୍ରା କରିବା ଜରୁରୀ।

ପୁରୀ: ଓଡ଼ିଶାର କଳା, ସଂସ୍କୃତି ଓ ପରମ୍ପରାର ଅନନ୍ୟ ପରିଚୟ ରଘୁରାଜପୁର ଏବେ ପାଇବ ନୂଆ ରୂପ। ପୁରୀ ଜିଲ୍ଲାର ଏହି ପ୍ରସିଦ୍ଧ ହେରିଟେଜ୍ କ୍ରାଫ୍ଟସ୍ ଭିଲେଜ୍‌କୁ ବିଶ୍ୱସ୍ତରୀୟ ସାଂସ୍କୃତିକ ପର୍ଯ୍ୟଟନସ୍ଥଳୀ ଭାବେ ବିକଶିତ କରିବାକୁ ରାଜ୍ୟ ସରକାର ନେଇଛନ୍ତି ବଡ଼ ପଦକ୍ଷେପ।

ରଘୁରାଜପୁରର ଭିତ୍ତିଭୂମି ଓ ପର୍ଯ୍ୟଟନ ସୁବିଧାର ବିକାଶ ପାଇଁ ୨୩ କୋଟି ଟଙ୍କା ବ୍ୟୟ କରାଯିବ। ମଙ୍ଗଳବାର ଏହି ବୃହତ୍ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରିଛନ୍ତି ଓଡ଼ିଶାର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା।

ଏହି ପ୍ରକଳ୍ପ ଅଧୀନରେ ରଘୁରାଜପୁରରେ ମୌଳିକ ଭିତ୍ତିଭୂମିକୁ ମଜବୁତ କରାଯିବା ସହ ପର୍ଯ୍ୟଟକଙ୍କ ପାଇଁ ଆହୁରି ଉନ୍ନତ ସୁବିଧା ଉପଲବ୍ଧ କରାଯିବ। ସେହିପରି ସ୍ଥାନୀୟ କଳାକାର ଓ ହସ୍ତଶିଳ୍ପୀଙ୍କ ପାଇଁ ମଧ୍ୟ ଉନ୍ନତ ଭିତ୍ତିଭୂମି ଏବଂ ସୁଯୋଗ ସୃଷ୍ଟି କରାଯିବ।

ରଘୁରାଜପୁରର ପ୍ରସିଦ୍ଧ ପଟ୍ଟଚିତ୍ର, ଗୋଟିପୁଅ ନୃତ୍ୟ, କାଠ ଖୋଦେଇ ଓ ଟେରାକୋଟା କଳାକୁ ଦେଶ ଓ ବିଦେଶରେ ଆହୁରି ବ୍ୟାପକ ଭାବେ ପହଞ୍ଚାଇବା ଏହି ପ୍ରକଳ୍ପର ମୁଖ୍ୟ ଲକ୍ଷ୍ୟ।

ଭିତ୍ତିପ୍ରସ୍ତର ସ୍ଥାପନ କାର୍ଯ୍ୟକ୍ରମରେ ପ୍ରଭାତୀ ପରିଡ଼ା ରଘୁରାଜପୁରକୁ “ଓଡ଼ିଶାର କଳା ଓ ସଂସ୍କୃତିର ହୃଦୟ” ବୋଲି ବର୍ଣ୍ଣନା କରିଥିଲେ। ଏହି ପଦକ୍ଷେପ ରଘୁରାଜପୁରର ପର୍ଯ୍ୟଟନ ବିକାଶରେ ନୂଆ ଅଧ୍ୟାୟ ଆଣିବ ବୋଲି ସେ କହିଛନ୍ତି।

ସରକାରଙ୍କ ଲକ୍ଷ୍ୟ ହେଉଛି ରଘୁରାଜପୁରକୁ କେବଳ ଦେଶର ନୁହେଁ, ବରଂ ବିଶ୍ୱ ମାନଚିତ୍ରରେ ଏକ ପ୍ରମୁଖ ସାଂସ୍କୃତିକ ପର୍ଯ୍ୟଟନସ୍ଥଳୀ ଭାବେ ପରିଚିତ କରାଇବା। ଏହାଦ୍ୱାରା ପର୍ଯ୍ୟଟନ ବଢ଼ିବା ସହ ସ୍ଥାନୀୟ କଳାକାର ଓ ହସ୍ତଶିଳ୍ପୀଙ୍କ ଆୟ ଏବଂ ରୋଜଗାର ସୁଯୋଗ ମଧ୍ୟ ବଢ଼ିବ ବୋଲି ଆଶା କରାଯାଉଛି।

କାର୍ଯ୍ୟକ୍ରମରେ ପିପିଲି ବିଧାୟକ ଆଶ୍ରିତ ପଟ୍ଟନାୟକ, ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା, ପର୍ଯ୍ୟଟନ ବିଭାଗର ଅତିରିକ୍ତ ସଚିବ ସରୋଜ କୁମାର ପ୍ରଧାନଙ୍କ ସମେତ ସ୍ଥାନୀୟ ପ୍ରତିନିଧି, କଳାକାର ଓ ହସ୍ତଶିଳ୍ପୀମାନେ ଉପସ୍ଥିତ ଥିଲେ।

ଡେରାଡୁନ: ଉତ୍ତରାଖଣ୍ଡରେ ଲଗାଣ ବର୍ଷା ଓ ବିଭିନ୍ନ ସ୍ଥାନରେ ଭୂସ୍ଖଳନ ପରିସ୍ଥିତି ସୃଷ୍ଟି ହେବା ପରେ ପ୍ରସିଦ୍ଧ ଚାରଧାମ ଯାତ୍ରାକୁ ମଙ୍ଗଳବାର ଓ ବୁଧବାର ପାଇଁ ସ୍ଥଗିତ କରାଯାଇଛି। ଯାତ୍ରୀଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ଏହି ନିଷ୍ପତ୍ତି ନିଆଯାଇଥିବାବେଳେ ପାଗ ସୁଧୁରିବା ଏବଂ ରାସ୍ତା ସମ୍ପୂର୍ଣ୍ଣ ସୁରକ୍ଷିତ ଘୋଷଣା ହେବା ପରେ ଯାତ୍ରା ପୁଣି ଆରମ୍ଭ ହେବ ବୋଲି ପ୍ରଶାସନ ସ୍ପଷ୍ଟ କରିଛି।

ଗଡ଼ୱାଳ ମଣ୍ଡଳ କମିଶନର କହିଛନ୍ତି ଯେ, ପ୍ରବଳ ବର୍ଷା କାରଣରୁ ବହୁ ସ୍ଥାନରେ ଯାତ୍ରାପଥ ବିପଦପୂର୍ଣ୍ଣ ହୋଇପଡ଼ିଛି। ବିଶେଷକରି କେଦାରନାଥ ଜାତୀୟ ରାଜପଥର ମୁଙ୍କଟିଆ ଅଞ୍ଚଳରେ ପାହାଡ଼ରୁ ବଡ଼ ବଡ଼ ପଥର ଓ ମାଟି ଖସିପଡ଼ିବାରୁ ରାସ୍ତା ଅବରୋଧ ହୋଇଛି। ଏହାକୁ ସଫା କରିବା ପାଇଁ ଭାରୀ ଯନ୍ତ୍ରପାତି ନିୟୋଜିତ ହୋଇଥିବାବେଳେ ଯୁଦ୍ଧକାଳୀନ ଭିତ୍ତିରେ କାମ ଚାଲିଛି।

ରୁଦ୍ରପ୍ରୟାଗ ଜିଲ୍ଲା ବିପର୍ଯ୍ୟୟ ପରିଚାଳନା ଅଧିକାରୀ ନନ୍ଦନ ସିଂ ରାଜୱାର କହିଛନ୍ତି ଯେ, ଲଗାଣ ବର୍ଷା ଯୋଗୁଁ ଅନେକ ସ୍ଥାନରେ ରାସ୍ତା ଯେକୌଣସି ସମୟରେ ବନ୍ଦ ହୋଇପାରେ। ମୁଙ୍କଟିଆରେ ରାସ୍ତା ଅଳ୍ପ ସମୟ ପାଇଁ ଖୋଲାଯାଇଥିଲେ ମଧ୍ୟ ପାହାଡ଼ରୁ ଲଗାତାର ପଥର ଖସିବାର ଆଶଙ୍କା ରହିଛି। ସେଥିପାଇଁ ସୁରକ୍ଷା ଦୃଷ୍ଟିରୁ ଯାତ୍ରୀମାନଙ୍କୁ ସତର୍କତାର ସହ ପାର କରାଯାଉଛି ଏବଂ ବିପଦପୂର୍ଣ୍ଣ ସ୍ଥାନରେ ଅଟକି ନରହିବାକୁ ପରାମର୍ଶ ଦିଆଯାଇଛି।

ଯାତ୍ରା ନିୟନ୍ତ୍ରଣ କକ୍ଷ ପକ୍ଷରୁ ପାଗ ସ୍ଥିତି ଉପରେ ୨୪ ଘଣ୍ଟା ନଜର ରଖାଯାଉଛି। ମାଇକ୍ ଯୋଗେ ଯାତ୍ରୀ, ଦୋକାନୀ, ସୁରକ୍ଷାକର୍ମୀ ଏବଂ ସେକ୍ଟର ଅଧିକାରୀଙ୍କୁ ନିୟମିତ ସୂଚନା ଓ ସତର୍କ ବାର୍ତ୍ତା ଦିଆଯାଉଛି। ଯେଉଁ ଯାତ୍ରୀମାନେ ପୂର୍ବରୁ କେଦାରନାଥ ମାର୍ଗରେ ଅଛନ୍ତି, ସେମାନଙ୍କୁ ସୁରକ୍ଷିତ ସ୍ଥାନରେ ରହିବାକୁ କୁହାଯାଇଛି।

ଅନ୍ୟପଟେ, ଡେରାଡୁନ ଏସଏସପି ପ୍ରମେନ୍ଦ୍ର ଡୋଭାଲ କହିଛନ୍ତି ଯେ, ଡେରାଡୁନ ସମେତ ପାହାଡ଼ିଆ ଜିଲ୍ଲାଗୁଡ଼ିକରେ ପୁଲିସକୁ ହାଇ ଆଲର୍ଟରେ ରଖାଯାଇଛି। ନଦୀକୂଳ, ଝରଣା ଓ ବନ୍ୟାପ୍ରବଣ ଅଞ୍ଚଳରେ ଲଗାତାର ପାଟ୍ରୋଲିଂ କରାଯାଉଛି। ଲାଉଡ୍ ସ୍ପିକର ମାଧ୍ୟମରେ ଲୋକଙ୍କୁ ନଦୀ ନିକଟକୁ ନଯିବାକୁ ସତର୍କ କରାଯାଉଛି। ବିପଦପୂର୍ଣ୍ଣ ଅଞ୍ଚଳରେ ରହୁଥିବା ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର ମଧ୍ୟ କରାଯାଉଛି।

ଏହାଛଡ଼ା ଶ୍ରୀନଗର ଡ୍ୟାମରୁ ଜଳ ଛଡ଼ାଯିବା ପରେ ଋଷିକେଶ ଅଞ୍ଚଳରେ ଗଙ୍ଗା ନଦୀର ଜଳସ୍ତର ବଢ଼ିଛି। ଗଙ୍ଗା ଘାଟରେ ପୁଲିସ ମୁତୟନ ହୋଇଥିବା ବେଳେ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କୁ ନଦୀ ନିକଟକୁ ନଯିବାକୁ ଅନୁରୋଧ କରାଯାଇଛି।

ପ୍ରଶାସନ ପକ୍ଷରୁ କୁହାଯାଇଛି, ଯାତ୍ରୀଙ୍କ ଜୀବନର ସୁରକ୍ଷା ସର୍ବପ୍ରଥମ। ପାଗ ଅନୁକୂଳ ହେବା, ଭୂସ୍ଖଳନ ପ୍ରଭାବିତ ରାସ୍ତା ସଫା ହେବା ଏବଂ ସୁରକ୍ଷା ଯାଞ୍ଚ ଶେଷ ହେବା ପରେ ହିଁ ଚାରଧାମ ଯାତ୍ରା ପୁଣି ଆରମ୍ଭ କରାଯିବ।

ଭୁବନେଶ୍ୱର: ରାଜଧାନୀ ଭୁବନେଶ୍ୱରର ଐତିହାସିକ ଗୌରବ ଖଣ୍ଡଗିରି ଓ ଉଦୟଗିରିର ଏବେ ବଦଳିବାକୁ ଯାଉଛି ଚେହେରା। ଏହି ଯୁଗ୍ମ ପାହାଡ଼କୁ ବିଶ୍ୱସ୍ତରୀୟ ପର୍ଯ୍ୟଟନ ସ୍ଥଳୀରେ ପରିଣତ କରିବାକୁ ହୋଇଛି ବଡ଼ ଯୋଜନା। ଏଥିପାଇଁ ପ୍ରାୟ ୧୦୦ କୋଟି ଟଙ୍କାର ପ୍ରକଳ୍ପ ପାଇଁ ପର୍ଯ୍ୟଟନ ବିଭାଗ ସୁପାରିସ କରିଛି।

ବିଭାଗୀୟ ସ୍ଥାୟୀ କମିଟି-୩ ପକ୍ଷରୁ ଖଣ୍ଡଗିରି-ଉଦୟଗିରିର ସର୍ବାଙ୍ଗୀନ ବିକାଶ ପାଇଁ ଏହି ଗୁରୁତ୍ୱପୂର୍ଣ୍ଣ ପ୍ରସ୍ତାବ ଆଗତ କରାଯାଇଛି। ଏହି ଯୋଜନାର ସବୁଠୁ ବଡ଼ ଆକର୍ଷଣ ହେବ କଳିଙ୍ଗ ସମ୍ରାଟ ମହାମେଘବାହନ ଐର ଖାରବେଳଙ୍କ ବିଶାଳ ପ୍ରତିମୂର୍ତ୍ତି ସ୍ଥାପନ। ଐତିହ୍ୟ ଓ ଆଧୁନିକତାର ସମନ୍ୱୟରେ ଏହି ସ୍ଥାନକୁ ନୂଆ ପରିଚୟ ଦେବାକୁ ଲକ୍ଷ୍ୟ ରଖାଯାଇଛି।

ପ୍ରସ୍ତାବ ଅନୁଯାୟୀ, ପାହାଡ଼ ଉପରକୁ ଯିବା ପାଇଁ ସୁନ୍ଦର ୱାକିଂ ପାର୍କ ତିଆରି ହେବ। ପର୍ଯ୍ୟଟକଙ୍କ ମନୋରଞ୍ଜନ ପାଇଁ ମ୍ୟୁଜିକାଲ ଫାଉଣ୍ଟେନ ଓ ଆଧୁନିକ ଆଲୋକୀକରଣ ବ୍ୟବସ୍ଥା କରାଯିବ। ରାତିରେ ଏହି ଐତିହାସିକ ସ୍ଥଳୀର ଚକଚକି ଦେଖିବାକୁ ମିଳିବ।

ବୟସ୍କ ଓ ଦିବ୍ୟାଙ୍ଗ ପର୍ଯ୍ୟଟକଙ୍କ ସୁବିଧାକୁ ମଧ୍ୟ ଗୁରୁତ୍ୱ ଦିଆଯାଇଛି। ସେମାନଙ୍କ ପାଇଁ ରାମ୍ପ କିମ୍ବା ଲିଫ୍ଟ ବ୍ୟବସ୍ଥା କରିବା ପ୍ରସ୍ତାବ ରହିଛି। ଏହା ସହ ଓପନ ଏୟାର ଆମ୍ଫି-ଥିଏଟର ଓ ଇଣ୍ଟରପ୍ରିଟେସନ ସେଣ୍ଟର ନିର୍ମାଣ ହେବ, ଯେଉଁଠାରେ ଖଣ୍ଡଗିରି-ଉଦୟଗିରିର ଐତିହ୍ୟ ଓ କଳିଙ୍ଗ ସଭ୍ୟତା ସମ୍ପର୍କରେ ପର୍ଯ୍ୟଟକମାନେ ତଥ୍ୟ ପାଇପାରିବେ।

ସେହିପରି, ଦୁଇ ପାହାଡ଼ ମଧ୍ୟ ଦେଇ ଯାଇଥିବା ରାସ୍ତାକୁ ସଂପୂର୍ଣ୍ଣ ବନ୍ଦ କରି ଏକ ସ୍ଥାୟୀ ପ୍ରବେଶ ପଥ ନିର୍ମାଣ ପାଇଁ ମଧ୍ୟ ପ୍ରସ୍ତାବ ରହିଛି। ଯଦି ଏହି ପ୍ରକଳ୍ପ କାର୍ଯ୍ୟକାରୀ ହୁଏ, ତେବେ ଖଣ୍ଡଗିରି-ଉଦୟଗିରି ଓଡ଼ିଶା ପର୍ଯ୍ୟଟନର ନୂଆ ଆକର୍ଷଣ କେନ୍ଦ୍ର ପାଲଟିପାରେ। 

କେନ୍ଦ୍ରାପଡ଼ା: ଓଡ଼ିଶାର ପ୍ରସିଦ୍ଧ ପର୍ଯ୍ୟଟନ ସ୍ଥଳ ଭିତରକନିକା ଏବେ କିଛି ଦିନ ପାଇଁ ପର୍ଯ୍ୟଟକ ଲାଗି “ନୋ ଏଣ୍ଟ୍ରି”। ମେ ୧ରୁ ଜୁଲାଇ ୩୧ ପର୍ଯ୍ୟନ୍ତ ଦୀର୍ଘ ୩ ମାସେ ଯାଏଁ ଏହା ସମ୍ପୂର୍ଣ୍ଣ ବନ୍ଦ ରହିବ। ରାଜନଗର ବନ ବିଭାଗ ପକ୍ଷରୁ ଏହି ନିଷ୍ପତି ନିଆଯାଇଛି। ଏହାର ମୁଖ୍ୟ   କାରଣ ହେଲା ବଉଳା କୁମ୍ଭୀରଙ୍କ ପ୍ରଜନନ ଋତୁ ଆରମ୍ଭ ହୋଇଛି। ନଦୀ ଓ ନାଳମାନଙ୍କରେ କୁମ୍ଭୀରମାନେ ବସା ବାନ୍ଧି ଅଣ୍ଡା ଦେବେ। ସେମାନଙ୍କ ମିଳନ ପର୍ବ ଓ ଅଣ୍ଡା ଦେବା ପ୍ରକ୍ରିୟାରେ ବାଧା ନଉପୁଜିବା ପାଇଁ ପର୍ଯ୍ୟଟକମାନଙ୍କ ପାଇଁ ଭିତରକନିକା ଜାତୀୟ ଉଦ୍ୟାନ ବନ୍ଦ ରହିବ।

ସାଧାରଣତଃ ଶୀତକାଳରେ ଭିତରକନିକାରେ  ହଜାର ହଜାର ପର୍ଯ୍ୟଟକ ଭିଡ଼ ହୁଏ। ବିଶେଷକରି ବଉଳ କୁମ୍ଭୀର ଦେଖିବା ଓ ମ୍ୟାଙ୍ଗ୍ରୋଭ ଜଙ୍ଗଲର ସୌନ୍ଦର୍ଯ୍ୟ ଉପଭୋଗ ପାଇଁ ଏଠାକୁ ଲୋକେ ଭିଡ଼ କରନ୍ତି। କିନ୍ତୁ ଏବେ ପ୍ରକୃତି ଓ ବନ୍ୟଜନ୍ତୁଙ୍କ ସୁରକ୍ଷା ପାଇଁ ଏହି ସ୍ଥଳ କିଛି ଦିନ ପାଇଁ ପର୍ଯ୍ୟଟକଙ୍କ ଲାଗି ବନ୍ଦ ରହିବ। ତେଣୁ ଯଦି ଆପଣ ଭିତରକନିକା ଭ୍ରମଣ ପ୍ଲାନ୍ କରୁଛନ୍ତି, ତେବେ ଏହି ତିନି ମାସ ପାଇଁ ଯୋଜନା କରନ୍ତୁ ନାହିଁ।

ଚଳିତ ବର୍ଷ ୨୨ ଏପ୍ରିଲରୁ ଆରମ୍ଭ ହେଉଛି କେଦାରନାଥ ବାବାଙ୍କ ଦର୍ଶନ । କେଦାରନାଥ ଯାଇ ମହାଦେବଙ୍କୁ ଦର୍ଶନ କରିବା ସହ କେଦାରନାଥର ସୌନ୍ଦର୍ଯ୍ୟ ଉପଭୋଗ କରିବା ଅନେକ ଶ୍ରଦ୍ଧାଳୁ ପ୍ରତିବର୍ଷ ଓଡିଶାରୁ ନିଜ ଯାତ୍ରା ଆରମ୍ଭ କରନ୍ତି । ପ୍ରତିବର୍ଷ କେଦାରନାଥ ବାବାଙ୍କ ଦର୍ଶନ ପାଇଁ ଲକ୍ଷାଧିକ ନୂଆ ଶ୍ରଦ୍ଧାଳୁ ଆସିଥାନ୍ତି । ପ୍ରଥମ ଥର ପାଇଁ କେଦାରନାଥ ଯାଉଥିଲେ କେଦାରନାଥ ବାବାଙ୍କ ବ୍ୟତୀତ ଅନ୍ୟ କେଉଁଠି ବୁଲିବାକୁ ଯିବେ ଆସନ୍ତୁ ଜାଣିବା । 

ବଦ୍ରୀନାଥ :- ଉତ୍ତରାଖଣ୍ଡରେ ବଦ୍ରୀନାଥ ଧାମ ରହିଛି ଯାହା ଭାରତର ଚାରି ଧାମରୁ ଗୋଟିଏ ଧାମ। ତେଣୁ ଆପଣ ଯଦି କେଦାରନାଥ ଯାଉଛନ୍ତି ତେବେ ଆପଣ ବଦ୍ରୀନାଥ ମଧ୍ୟ ଯାଇପାରିବେ । ବଦ୍ରୀନାଥ ହେଉଛି କେଦାରନାଥ ଠାରୁ ୨୧୧ ରୁ ୨୫୦ କିମି ଦୂର । ବସ, ବାଇକ କିମ୍ବା କାର ଯୋଗେ ଗଲେ ୮ ରୁ ୧୦ ଘଣ୍ଟାର ସମୟ ଲାଗିବ ।  

ଗଙ୍ଗୋତ୍ରୀ ଓ ଯମୁନତ୍ରୀ  :- ଭାରତରେ ଯେଉଁଭଳି ୪ ଧାମ ରହିଛି ସେହିଭଳି ଉତ୍ତରାଖଣ୍ଡରେ ମଧ୍ୟ ୪ ଧାମ ରହିଛି, ଯାହା ହେଉଛି କେଦାରନାଥ, ବଦ୍ରୀନାଥ, ଗଙ୍ଗୋତ୍ରୀ ଓ ଯମୁନତ୍ରୀ । ଗଙ୍ଗୋତ୍ରୀରେ ଗଙ୍ଗୋତ୍ରୀ ମନ୍ଦିର ରହିଛି ଯାହା କେଦାରନାଥ ଠାରୁ ୩୧୦ ରୁ ୩୫୦ କିମି ଦୂର । ସେହିଭଳି ଯମୁନତ୍ରୀରେ ମଧ୍ୟ ଯମୁନତ୍ରୀ ମନ୍ଦିର ରହିଛି ଯାହା କେଦାରନାଥ ଠାରୁ ୨୬୦ ରୁ ୩୮୭ କିମି ଦୂର । 

ଧାରୀ ଦେବୀ :- ଶ୍ରୀନଗରରୁ ରୁଦ୍ରପ୍ରୟାଗ ଦେଇ କେଦାରନାଥ ଯିବା ରାସ୍ତାରେ ଆପଣ ଧାରୀ ଦେବୀଙ୍କୁ ଦର୍ଶନ କରିବାର ସୁଯୋଗ ପାଇବେ ।  ଅଳକନନ୍ଦା ନଦୀ କୂଳରେ ମାଆ ଙ୍କ ମନ୍ଦିର ରହିଛି । ମା ଧାରୀ ଦେବୀଙ୍କୁ ଉତ୍ତରାଖଣ୍ଡର ରକ୍ଷକ ବୋଲି ମଧ୍ୟ କୁହାଯାଏ । 

ଯଦି ଆପଣ ଚଳିତ ବର୍ଷ କେଦାରନାଥ ଯିବାପାଇଁ ଚିନ୍ତା କରୁଛନ୍ତି, ତେବେ ଆପଣ ଉତ୍ତରାଖଣ୍ଡର ଏହି ତୀର୍ଥସ୍ଥଳୀ ମଧ୍ୟ ଦର୍ଶନ କରିପାରିବେ ।

ପ୍ରାକୃତିକ ସୌନ୍ଦର୍ଯ୍ୟ ଓ ବନ୍ୟଜନ୍ତୁ ସମ୍ପଦରେ ସମୃଦ୍ଧ ଡେବ୍ରିଗଡ଼ ଅଭୟାରଣ୍ୟ ଏବେ ପର୍ଯ୍ୟଟକଙ୍କ ପାଇଁ ହଟ୍‌ସ୍ପଟ୍‌ ଭାବେ ଉଭା ହେଉଛି। ଇକୋଟୁରିଜିମର ଆକର୍ଷଣ ବଢିବା ସହିତ 2025-26 ଆର୍ଥିକ ବର୍ଷରେ ଏଠାରେ ୬.୦୨ କୋଟି ଟଙ୍କାର ରେକର୍ଡ ରାଜସ୍ୱ ସଂଗ୍ରହ ହୋଇଛି। ଗତ ବର୍ଷ ତୁଳନାରେ ପ୍ରାୟ ୧ କୋଟି ଅଧିକ ଆୟ ହେବା ସହିତ, ୧.୪ ଲକ୍ଷରୁ ଅଧିକ ପର୍ଯ୍ୟଟକ ଏଠାକୁ ଆସିଥିବାରୁ ଡେବ୍ରିଗଡ଼ର ଲୋକପ୍ରିୟତା ସ୍ପଷ୍ଟ ହେଉଛି।

ପର୍ଯ୍ୟଟନକୁ ଆହୁରି ଆକର୍ଷଣୀୟ କରିବାକୁ ଡେବ୍ରିଗଡ଼ରେ ଶୀଘ୍ର ଆସୁଛି ନୂଆ ପରିକଳ୍ପନା। ଗ୍ରୀଷ୍ମ ଋତୁ ଶେଷ ସୁଦ୍ଧା ଧୋଡ୍ରୋକୁସୁମରେ “ସବୁଜ ଗ୍ରାମ” ପ୍ରସ୍ତୁତି ସହିତ କ୍ୟାନୋପି ୱାକ୍, ସଫାରି, କ୍ରୁଜ୍ ସୁବିଧା, ନୂଆ ଯାନବାହନ ଓ ଡଙ୍ଗା ବ୍ୟବସ୍ଥା ସହ ୩୨ଟି ଆଧୁନିକ କଟେଜ୍ ଖୋଲାଯିବ। ଏହି ନୂତନ ପଦକ୍ଷେପ ପର୍ଯ୍ୟଟକଙ୍କ ଅନୁଭବକୁ ଆଉ ମଧୁର କରିବ।

ତେବେ ପୂର୍ବବର୍ଷ ୫.୦୧ କୋଟି ଆୟ ଓ ୮୫ ହଜାର ପର୍ଯ୍ୟଟକ ସହ ଡେବ୍ରିଗଡ଼ ଉନ୍ନତିର ପଥରେ ଥିବା ବେଳେ, ଏବେ ଆଇଲ୍ୟାଣ୍ଡ କାଫେ, ବନ୍ୟପ୍ରାଣୀ ପାଠାଗାର ଭଳି ନୂଆ ଆକର୍ଷଣ ଏହାକୁ ଆହୁରି ଆଗକୁ ନେଇଯାଇଛି। ଭାରତୀୟ ବାଇସନ, ଚିତାବାଘ, ସମ୍ବର, ସ୍ଲଥ୍ ଭାଲୁ ଭଳି ବନ୍ୟଜନ୍ତୁଙ୍କ ଉପସ୍ଥିତି ଡେବ୍ରିଗଡ଼କୁ ବିଶେଷ ପରିଚୟ ଦେଇଛି।

ସବୁଠାରୁ ବଡ କଥା ହେଉଛି ଏହା ସ୍ଥାନୀୟ ଲୋକଙ୍କୁ ଜୀବିକା ଯୋଗାଉଛି। ପ୍ରାୟ ୧୨୦ ପରିବାର ଏଠାରେ ଗାଇଡ୍, ସଫାରି ଡ୍ରାଇଭର, ଡଙ୍ଗାଚାଳକ ଓ ହୋମଷ୍ଟେ ମାଧ୍ୟମରେ ରୋଜଗାର କରୁଛନ୍ତି। ୪୦% ମହିଳା ସଫାରି ଡ୍ରାଇଭର ଓ ଇକୋଗାଇଡ୍ ଭାବେ କାମ କରୁଥିବା ବେଳେ, ହୋମଷ୍ଟେଗୁଡ଼ିକ ଆଦିବାସୀ ମହିଳାଙ୍କ ଦ୍ୱାରା ପରିଚାଳିତ ହେଉଛି। ପ୍ରତି ପରିବାର ମାସକୁ ୧୦ ହଜାରରୁ ୧୫ ହଜାର ପର୍ଯ୍ୟନ୍ତ ଆୟ କରୁଛନ୍ତି। 

ଡେବ୍ରିଗଡ଼ ହୋମଷ୍ଟେ ଅଭିଜ୍ଞତା ପର୍ଯ୍ୟଟକଙ୍କୁ ପ୍ରକୃତି ସହ ଏକ ନିଆରା ସମ୍ପର୍କ ଦେଇଥାଏ। ଏହା କେବଳ ଦେଶୀୟ ନୁହେଁ, ବିଦେଶୀ ପର୍ଯ୍ୟଟକଙ୍କୁ ମଧ୍ୟ ଆକର୍ଷିତ କରୁଛି। ଇଟାଲୀ, ଫ୍ରାନ୍ସ, ଆମେରିକା, ୟୁକେ ସହ ଅନେକ ଦେଶରୁ ଏଠାକୁ ଲୋକ ଆସୁଛନ୍ତି।

ଭୁବନେଶ୍ୱର: ରାଜ୍ୟ ପର୍ଯ୍ୟଟନକୁ ବିଶ୍ୱ ସ୍ତରରେ ପହଁଚାଇବାକୁ ସରକାର ଉଦ୍ୟମ ଆରମ୍ଭ କରିଛନ୍ତି । “ଥିଙ୍କ୍ ଇଣ୍ଡିଆ, ଥିଙ୍କ୍ ଓଡ଼ିଶା” ଆଧାରରେ ବିଦେଶୀ ପ୍ରଥମ ପସନ୍ଦ କରିବେ ଓଡ଼ିଶାକୁ । ସେଥିପାଇଁ ଆଜି ମୁଖ୍ୟ ଶାସନ ସଚିବ ଅନୁ ଗର୍ଗଙ୍କ ଅଧ୍ୟକ୍ଷତାରେ ବସିଥିବା ଗୁରୁତ୍ୱପୂର୍ଣ୍ଣ ବୈଠକରେ ବିସ୍ତୃତ ଆଲୋଚନା ହୋଇଛି । 

ପର୍ଯ୍ୟଟନକୁ ବିଶ୍ୱ ସ୍ତରରେ ପ୍ରଥମ ପସନ୍ଦ କରିବାକୁ ଆଜିର ବୈଠକରେ ଗୁରୁତ୍ୱ ଦିଆଯାଇଛି । ବିଶେଷ କରି ପର୍ଯ୍ୟଟନ ବିଭାଗ ସହିତ ଅନ୍ୟ ସମସ୍ତ ବିଭାଗକୁ ଯୋଡ଼ିବାକୁ ପ୍ରୟାସ କରାଯାଇଛି । ସେଥିପାଇଁ “ଥିଙ୍କ୍ ଇଣ୍ଡିଆ, ଥିଙ୍କ୍ ଓଡ଼ିଶା”କୁ ଗୁରୁତ୍ୱ ଦିଆଯାଇଛି । ଅର୍ଥାତ୍ ଦେଶ ବାହାର ଲୋକ ଭାରତ ଆସିବାକୁ ଯୋଜନା କଲେ ସେମାନଙ୍କ ପ୍ରଥମ ପସନ୍ଦ ଓଡ଼ିଶା ହେବା ଉଚିତ୍ । ତାହା ଉପରେ ଗୁରୁତ୍ୱ ଦିଆଯାଉଛି ବୋଲି କହିଛନ୍ତି ମୁଖ୍ୟ ଶାସନ ସଚିବ । 

ଉଲ୍ଲେଖ ଯୋଗ୍ୟ, ଗତ ପାଞ୍ଚ ବର୍ଷ ମଧ୍ୟରେ ରାଜ୍ୟରେ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ଭୁବନେଶ୍ୱର ଏବଂ ଦୁବାଇ, ବ୍ୟାଙ୍କକ୍, ସିଙ୍ଗାପୁର ମଧ୍ୟରେ ସିଧାସଳଖ ବିମାନ ସେବା ଆରମ୍ଭ ହେବା ପରେ ରାଜ୍ୟ ପର୍ଯ୍ୟଟନ ଶିଳ୍ପରେ ବିଦେଶୀ ପର୍ଯ୍ୟଟକଙ୍କ ଆଗମନରେ ଉଲ୍ଲେଖନୀୟ ଅଭିବୃଦ୍ଧି ଘଟିଛି । ଗତ ଡିସେମ୍ବରରେ ବିଧାନସଭାରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ରଖିଥିବା ଲିଖିତ ଉତ୍ତର ଅନୁଯାୟୀ, ୨୦୨୦ ରୁ ୨୦୨୪ ଆର୍ଥିକ ବର୍ଷ ମଧ୍ୟରେ ୧ ଲକ୍ଷ ୩୩ ହଜାର ୧୬୧ ବିଦେଶୀ ପର୍ଯ୍ୟଟକ ଓଡ଼ିଶା ଆସିଥିଲେ। ୨୦୨୦ରେ ୧୦,୨୦୬ ଜଣ, ୨୦୨୧ ମସିହାରେ ୨,୨୬୯ ଜଣ, ୨୦୨୨ ମସିହାରେ ୨୨,୧୭୨ ଜଣ, ୨୦୨୩ ମସିହାରେ ୪୫,୧୭୩ ଜଣ ଏବଂ ୨୦୨୪ରେ ୫୩,୩୯୨ ଜଣ ବିଦେଶୀ ପର୍ଯ୍ୟଟକ ଓଡ଼ିଶା ଆସିଛନ୍ତି । 

କୋଣାର୍କ: ପୁରୀ ଜିଲ୍ଲାର ସୂର୍ଯ୍ୟ ମନ୍ଦିରକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି। ଆସନ୍ତାକାଲି ଅର୍ଥାତ୍ ଡିସେମ୍ବର ୩୦ ତାରିଖରେ କୋଣାର୍କ ସୂର୍ଯ୍ୟ ମନ୍ଦିରରେ ପ୍ରବେଶ ପାଇଁ ଶୁଳ୍କ ଛାଡ କରାଯାଇଛି। 

ବିଶ୍ବକୁ ରୋଗମୁକ୍ତ ଓ ବିଶ୍ବର କଲ୍ୟାଣ ପାଇଁ ଚଳିତବର୍ଷ ମଧ୍ୟ କୋଣାର୍କ ସୁରକ୍ଷା ସମିତି ଓ ବିଶ୍ବ ହିନ୍ଦୁ ପରିଷଦର ମିଳିତ ଆନୁକୁଲ୍ୟରେ ତ୍ରିଦିବସୀୟ ବିଶ୍ବ କଲ୍ୟାଣ ସୌର ମହାଯଜ୍ଞ ପାଇଁ ଘଟ ସ୍ଥାପନ ଓ କଳସ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ସମିତିର ସଭାପତି ତଥା କୋଣାର୍କ ଏନଏସି କାଉନସିଲର ସୌମ୍ୟସୌରଭ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଭଗବାନ ସୂର୍ଯ୍ୟ ନାରାୟଣଙ୍କ ପୂଜାର୍ଚ୍ଚନା ଓ ହୋମଯଜ୍ଞ କାର୍ଯ୍ୟକ୍ରମ ହେବ। ପବିତ୍ର ଶାମ୍ବଦଶମୀରେ ବିଶ୍ବ କଲ୍ୟାଣ ସୌର ମହାଯଜ୍ଞର ପୂର୍ଣ୍ଣାହୁତି ହେବ। ଆସନ୍ତାକାଲି ଶାମ୍ବଦଶମୀ ଅବସରରେ ଏହି ଶୁଳ୍କ ଛାଡ କରିବାକୁ ନିଷ୍ପତ୍ତି ନିଆଯାଇଛି।

ଅଧିକ ପଢନ୍ତୁ: ସାଧାରଣତନ୍ତ୍ର ଦିବସ ପରେଡ୍‌ରେ ସାମିଲ ହେବ ଓଡ଼ିଶାର ପ୍ରଜ୍ଞାପନ ମେଢ଼

କନ୍ଧମାଳ: ଆସୁଛି ପର୍ଯ୍ୟଟନ ଋତୁ। ଧିରେ ଧିରେ ପର୍ଯ୍ୟଟକ ଦାରିଙ୍ଗବାଡ଼ି ମୁହଁ ହେଲେଣି। ଏହାରି ଭିତରେ ଦାରିଙ୍ଗବାଡ଼ିକୁ ଆକର୍ଷଣ କରୁଥିବା ଇକୋ ରିଟ୍ରିଟ୍‌ ଆସନ୍ତା ନଭେମ୍ବର ୧୫ରେ ଖୋଲିବାକୁ ଯାଉଛି। ଫଳରେ ପର୍ଯ୍ୟଟକଙ୍କ ପାଇଁ ଖୁସି ଆଣିଦେବ ଇକୋ ରିଟ୍ରିଟ୍‌। ସବୁ ବର୍ଷ ଭଳି ଚଳିତ ବର୍ଷ ମଧ୍ୟ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ପଞ୍ଚ ତାରକା ହୋଟେଲର ବ୍ୟବସ୍ଥା ସହ ପ୍ରତିଦିନ ସାଂସ୍କୃତିକ କାର୍ଯ୍ୟକ୍ରମ ପାଇଁ ମଞ୍ଚ ବ୍ୟବସ୍ଥା ଭିୟୁ ଦେଖିବା ପାଇଁ ଓ୍ବାଚ୍‌ ଟାଓ୍ବାର ବ୍ୟବସ୍ଥା ସହ ଡାଇନିଂ ହଲ୍‌, ପର୍ଯ୍ୟଟକଙ୍କୁ ସ୍ବାଗତ କରିବା ବ୍ୟବସ୍ଥା ସହ ବିଭିନ୍ନ ପର୍ଯ୍ୟଟନକ୍ଷେତ୍ର ବୁଲାଇବା ବ୍ୟବସ୍ଥା ଆଦି ପ୍ରସ୍ତୁତି ଚାଲିଛି। 

ଯୁଦ୍ଧକାଳୀନ ଭିତ୍ତିରେ ଇକୋ ରିଟ୍ରିଟ୍‌ରେ ତମ୍ବୁ ପକାଯିବା ସହ ସଜାସଜ୍ଜା କାର୍ଯ୍ୟ ଚାଲିଛି। ହିଲ୍‌ଭିୟୁ ଛକ ନିକଟରେ ଇକୋ ରିଟ୍ରିଟ୍‌ ପ୍ରକଳ୍ପ କାର୍ଯ୍ୟ ଦ୍ରୁତଗତିରେ ଚାଲିଛି । ଦୀର୍ଘ ୪ ବର୍ଷ ହେଲା ଦାରିଙ୍ଗବାଡ଼ିରେ ଇକୋ ରିଟ୍ରିଟ ପ୍ରକଳ୍ପ ହୋଇ ଆସୁଥିବାବେଳେ ପର୍ଯ୍ୟଟକ ଏହାର ସୁବିଧା ନେଉଛନ୍ତି। ଚଳିତ ବର୍ଷ ୨୫ଟି ବିଶାଳପୂର୍ଣ୍ଣ ତମ୍ବୁ ହୋଇଥିବାବେଳେ ପ୍ରତି ତମ୍ବୁର ମୂଲ୍ୟ ୫ ହଜାର ୯୮୬ ଟଙ୍କା ରହିଛି। ଏହାର ଅନ୍‌ଲାଇନ ବୁକିଂ ଏବେ ଆରମ୍ଭ ହୋଇଯାଇଛି। 

ଇକୋ ରିଟ୍ରିଟ୍‌ର ଅଧ୍ୟକ୍ଷ ତଥା ଦାରିଙ୍ଗବାଡ଼ି ବିଡିଓ ପ୍ରୀତିରଞ୍ଜନ ରଥ କହିଛନ୍ତି ଯେ, ଚଳିତ ଥର ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଇକୋ ରିଟ୍ରିଟ୍‌କୁ ଆହୁରି ଆକର୍ଷିତ କରାଯିବ। ଏଥିସହ ପର୍ଯ୍ୟଟନକ୍ଷେତ୍ର କଫି ବଗିଚା, ଲଭର୍ସ ପଏଣ୍ଟ, ମିଡିୟୁବାନ୍ଦା ଜଳପ୍ରପାତ, ଡୁଲୁରୀ ପାଇନ ବଣ, ଆଦି ରୂପାନ୍ତର କାର୍ଯ୍ୟ ହାତକୁ ନିଆଯାଇଥିବା ସେ କହିଛନ୍ତି। ଇକୋ ରିଟ୍ରିଟ୍‌ ଖୋଲିବା ପରେ ଦାରିଙ୍ଗବାଡ଼ିକୁ ପର୍ଯ୍ୟଟକଙ୍କ ଆଗମନ ମଧ୍ୟ ବୃଦ୍ଧି ପାଇବ ବୋଲି ସେ କହିଛନ୍ତି।

ଅଧିକ ପଢନ୍ତୁ: ଓଡ଼ିଶାର କୋରାପୁଟ କଫି ଅତ୍ୟନ୍ତ ସ୍ୱାଦିଷ୍ଟ: ପ୍ରଧାନମନ୍ତ୍ରୀ ମୋଦୀ