କେନ୍ଦୁଝର: ନିଜ ଜନ୍ମମାଟି ରାଇକଳା କୁ ଦୀପାବଳି ଭେଟି ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରାଇକଳାରେ ପାର୍ବତୀ ଗିରି ବୃହତ୍ ଉଠା ଜଳସେଚନ ପ୍ରକଳ୍ପ ଅନ୍ତର୍ଗତ ୧୧୮ କୋଟି ୫୪ ଲକ୍ଷ ଟଙ୍କା ବ୍ୟୟରେ ୩ଟି ମେଗା ଉଠା ଜଳସେଚନ ପ୍ରକଳ୍ପର ଭୂମିପୂଜନ ଓ ଶିଳାନ୍ୟାସ କରିଛନ୍ତି । ଏହି ତିନୋଟି ପ୍ରକଳ୍ପ ଦ୍ୱାରା କେନ୍ଦୁଝର ଜିଲ୍ଲା ଏବଂ ମୟୁରଭଞ୍ଜ ଜିଲ୍ଲାର ୪୬ଟି ଗାଁର ପ୍ରାୟ ୨୮ ହଜାର ଚାଷୀ ଉପକୃତ ହେବେ ବୋଲି କହିଛନ୍ତି ମୁଖ୍ୟମନ୍ତ୍ରୀ । 

ଆଜି କେନ୍ଦୁଝର ଜିଲ୍ଲା ଗସ୍ତର ୩ୟ ଦିନରେ ଝୁମ୍ପୁରା ରେ ୧୭ କୋଟି ୯୭ଲକ୍ଷ ଟଙ୍କା ବ୍ୟୟରେ ନିର୍ମିତ ଏକ ନୂତନ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଉଦଘାଟନ କରିଛନ୍ତି । ଏହି ସ୍ୱାସ୍ଥ୍ୟକେନ୍ଦ୍ରରେ ସାଧାରଣ ବହିର୍ବିଭାଗ ଏବଂ ଅନ୍ତଃବିଭାଗ ଚିକିତ୍ସା, ବିଶେଷଜ୍ଞ ଡାକ୍ତରଙ୍କ ସେବା ସହିତ ପରୀକ୍ଷାଗାର ସୁବିଧା ସହ ଔଷଧ ଉପଲବ୍ଧ ହେବ। ଏଥିସହ ରୋଗୀଙ୍କ ପାଇଁ ଖାଦ୍ୟ ବ୍ୟବସ୍ଥା, ଆମ୍ବୁଲାନ୍ସ ସେବା, ଟୀକାକରଣ, ସ୍ୱାସ୍ଥ୍ୟ ସଚେତନତା କାର୍ଯ୍ୟକ୍ରମ, ପରିବାର ନିୟୋଜନ ସେବା ଓ ଏକ୍ସ-ରେ ସୁବିଧା ମଧ୍ୟ ଉପଲବ୍ଧ ହେବ। ଏହି ନୂତନ ଭବନ ନିର୍ମାଣ ହେବା ଫଳରେ ଝୁମ୍ପୁରା ସମେତ ଆଖପାଖ ଅଞ୍ଚଳର ଲକ୍ଷାଧିକ ଲୋକ ଉନ୍ନତମାନର ସ୍ୱାସ୍ଥ୍ୟସେବା ପାଇପାରିବେ। 

ଏଥିସହ ରାଇକଳାରେ ପାର୍ବତୀ ଗିରି ବୃହତ୍ ଉଠା ଜଳସେଚନ ପ୍ରକଳ୍ପ ଅନ୍ତର୍ଗତ ୧୧୮ କୋଟି ୫୪ ଲକ୍ଷ ଟଙ୍କା ବ୍ୟୟରେ ୩ଟି ମେଗା ଉଠା ଜଳସେଚନ ପ୍ରକଳ୍ପର ଭୂମିପୂଜନ ଓ ଶିଳାନ୍ୟାସ କରିଛନ୍ତି । ଏହି ତିନୋଟି ପ୍ରକଳ୍ପ ଦ୍ୱାରା କେନ୍ଦୁଝର ଜିଲ୍ଲା ଏବଂ ମୟୁରଭଞ୍ଜ ଜିଲ୍ଲାର ୪୬ଟି ଗାଁର ପ୍ରାୟ ୨୮ ହଜାର ଚାଷୀ ଉପକୃତ ହେବେ । କେନ୍ଦୁଝର ଜିଲ୍ଲାର ରାଇକଳା ଏବଂ ସତୀକୁଦର ଏବଂ ମୟୁରଭଞ୍ଜ ଜିଲ୍ଲା ରାଇରଙ୍ଗପୁର ଅଞ୍ଚଳର ଜାରକାଣି ଠାରେ ଏହି ଉଠା ଜଳସେଚନ ପ୍ରକଳ୍ପ ନିର୍ମିତ ହେବ । ଏହାଦ୍ୱାରା ଚାଷଜମିକୁ ଜଳସେଚନ ସୁବିଧା ମିଳିବା ସହ ଚାଷୀମାନେ ବର୍ଷକୁ ୨ ରୁ ୩ଥର ଫସଲ କରିପାରିବ । ଏହାପରେ ମୁଖ୍ୟମନ୍ତ୍ରୀ ନିଜ ଜନ୍ମମାଟି ରାଇକଳା କୁ ଯାଇ  ସେଠାରେ ଷ୍ଟେଟ୍‌ ବ୍ୟାଙ୍କ ଅଫ୍‌ ଇଣ୍ଡିଆର ଏକ ନୂତନ ଶାଖା ଉଦ୍‌ଘାଟନ କରିଛନ୍ତି । ଏହି ଶାଖାରୁ ସ୍ଥାନୀୟ ଚାଷୀମାନେ ଚାଷଋଣ ପାଇବା ସହ, ସାଧାରଣ ଲୋକେ ମଧ୍ୟ ଉପକୃତ ହୋଇ ପାରିବେ ବୋଲି କହିଛନ୍ତି ମୁଖ୍ୟମନ୍ତ୍ରୀ । 

ଏହାପରେ ରାଇକଳାଠାରେ ଆୟୋଜିତ ଏକ ବିଶାଳ ସଭାରେ ଯୋଗଦେଇ ମୁଖ୍ୟମନ୍ତ୍ରୀ ଉପସ୍ଥିତ ଜନସାଧାରଣଙ୍କୁ ସମ୍ବୋଧିତ କରିଛନ୍ତି । କେନ୍ଦୁଝର ଜିଲ୍ଲାର କାନପୁର ବୃହତ ଜଳସେଚନ ପ୍ରକଳ୍ପ ଆସନ୍ତା ଡିସେମ୍ବର ମାସରେ ଲୋକାର୍ପିତ ହେବ ବୋଲି କହିଥିଲେ ମୁଖ୍ୟମନ୍ତ୍ରୀ । ନିଜେ ହଳ ଧରିଛି । ରୁଆ, ବିହୁଡ଼ା କରିଛି । ବର୍ଷା ଭଲ ନହେଲେ, ସେବର୍ଷ ଚାଷ ଭଲ ହୁଏ ନାହିଁ । ଘର ଚଳିବା ନେଇ ସମସ୍ତଙ୍କ ଚିନ୍ତା ବଢ଼ିଯାଏ । ତେଣୁ କିଭଳି ଭାବେ ନିଜ ଅଞ୍ଚଳର ଜମି ଜଳସେଚିତ ହେବ, ସେନେଇ ସେବେ ଚିନ୍ତା କରୁଥିଲି । ହେଲେ, କେବେବି ଚିନ୍ତା କରି ପାରି ନଥିଲି ଯେ, ନିଜ ଅଞ୍ଚଳ ପାଇଁ ଯାହା ଦିନେ ସ୍ୱପ୍ନ ଦେଖିଥିଲି, ତାହା ଦିନେ ନିଜ ହାତରେ ହିଁ ପୂରଣ ହେବ । ଆସନ୍ତା ୫ ବର୍ଷ ଭିତରେ ଓଡ଼ିଶାରେ ୧୫ ଲକ୍ଷ ହେକ୍ଟର ଚାଷ ଜମି ଜଳସେଚିତ ହେବ ବୋଲି କହିଥିଲେ ମୁଖ୍ୟମନ୍ତ୍ରୀ । ଚାଷୀ ସମୃଦ୍ଧ ହେଲେ, ସମଗ୍ର ଓଡ଼ିଶା ସମୃଦ୍ଧ ହେବ ବୋଲି ସେ କହିଥିଲେ ।

 ପୁରୀ : ପିପିଲି ଟୋଲଗେଟ୍ ନିକଟରୁ ୨୩୦ଟି ଜୀବନ୍ତ କଇଁଛ ଉଦ୍ଧାର କରାଯାଇଛି। ପିପିଲି ପୋଲିସ ଏକ କାର୍‌ରୁ ଏହି ବିପୁଳ ପରିମାଣର କଇଁଛ ଜବତ କରିବା ସହ ଘଟଣାରେ ସମ୍ପୃକ୍ତ ଦୁଇ ଜଣ ଚାଲାଣକାରୀ ଗିରଫ ହୋଇଛନ୍ତି।

 ଏହି କଇଁଛଗୁଡ଼ିକୁ ଏକ ପଶ୍ଚିମବଙ୍ଗ ନମ୍ବର ପ୍ଲେଟ୍ ଥିବା କାର୍ (WB31 AA8531) ଯୋଗେ ପୁରୀରୁ କୋଲକାତା ଚାଲାଣ କରାଯାଉଥିଲା। ଗୁପ୍ତ ସୂଚନା ଆଧାରରେ ପିପିଲି ପୋଲିସ ବିଳମ୍ବିତ ରାତିରେ ପିପିଲି ଟୋଲଗେଟ୍ ନିକଟରେ ନାକାବନ୍ଦୀ କରି ଗାଡ଼ି ଯାଞ୍ଚ କରିଥିଲା ଏବଂ କାର୍ ଭିତରୁ ୮ଟି ବସ୍ତାରେ ରଖାଯାଇଥିବା ୨୩୦ଟି ଜୀବନ୍ତ କଇଁଛ ଉଦ୍ଧାର କରିଥିଲା।

ପୋଲିସ କଇଁଛ ଓ ଜବତ ଗାଡ଼ିକୁ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ପାଇଁ ବନ ବିଭାଗକୁ ହସ୍ତାନ୍ତର କରିଛି। ଏହା ସହିତ ଏହି ବନ୍ୟଜନ୍ତୁ ଚୋରା ଚାଲାଣ ରାକେଟ୍ ପଛରେ ଆଉ କେଉଁମାନେ ଜଡ଼ିତ ଅଛନ୍ତି, ସେନେଇ ତଦନ୍ତ ଆରମ୍ଭ ହୋଇଛି । 

ଭଦ୍ରକ: ଆସନ୍ତାକାଲି ମା’ କାଳୀଙ୍କ ପୂଜା । ମା’ଙ୍କ ଆଗମନ ପାଇଁ ଚଳଚଞ୍ଚଳ ହୋଇପଡ଼ିଛି ଭଦ୍ରକ ଜିଲ୍ଲା । ଏଥିପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଁଚିଛି । ଭଦ୍ରକର ଅଧିଷ୍ଠାତ୍ରୀ ଦେବୀ ମା’ ଭଦ୍ରକାଳୀ ଏହି ଅବସରରେ ସପ୍ତମାତୃକା ବେଶରେ ଦର୍ଶନ ଦେବେ । ଏଥର ମା ଭଦ୍ରକାଳୀ ଙ୍କ ପୀଠ ରେ ମହାଯଜ୍ଞ ର ରୌପ୍ୟ ଜୟନ୍ତୀ ପାଳନ ହେବାକୁ ଯାଉଥିବା ବେଳେ ଚରମ୍ପା ଠାରେ ଆୟୋଜିତ ହେବାକୁ ଥିବା କାଳୀପୂଜା ମେଳା ୯ ଦିନ ଧରି ଆୟୋଜିତ ହେବା ସହ କାଳୀପୂଜା ଗୌରବ ସମ୍ମାନରେ ସମ୍ମାନିତ କରାଯିବ । 

କାଳୀଙ୍କ ପୂଜା ପାଇଁ ଭଦ୍ରକର ଅଧିଷ୍ଠାତ୍ରୀ ଦେବୀ ମା ଭଦ୍ରକାଳୀ ପୀଠ ସହ ଭଦ୍ରକ ସହରର ଚରମ୍ପା , ବାଇପାସ୍ , ଧୁଷୁରୀ , ବାସୁଦେବପୁର ଓ ଚାନ୍ଦବାଲିରେ ବ୍ୟାପକ ପ୍ରସ୍ତୁତି ହୋଇଛି । ଚରମ୍ପାରେ ମଣ୍ଡପ ଗୁଡ଼ିକରେ ସାଜସଜ୍ଜା ସହ ମୃଣ୍ମୟୀ ମୂର୍ତ୍ତି ଗୁଡ଼ିକ ଶେଷ ସ୍ପର୍ଶ ଅପେକ୍ଷାରେ ରହିଛନ୍ତି । ଏଥର ସମସ୍ତ ମଣ୍ଡପ ଗୁଡିକ ସାମାଜିକ ବାର୍ତ୍ତା ପ୍ରଦାନ କରିବା ସହ ଶ୍ରଦ୍ଧାଳୁ ଙ୍କ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି । ଅପେରା ସହ ମୀନାବଜାର ଓ ମେଳା ପାଇଁ ରାଜ୍ୟ ବାହାରୁ ବ୍ୟବସାୟୀ ମାନେ ଆସିବା ଆରମ୍ଭ କରିଛନ୍ତି । ୧୬ ନମ୍ୱର୍ ଜାତୀୟ ରାଜପଥ ରୁ ଭଦ୍ରକ ରେଳ ଷ୍ଟେସନ ଓ ଅନ୍ୟ ସ୍ଥାନ ରେ ଜବରଦଖଲ ଉଚ୍ଛେଦ ହୋଇଥିବାରୁ ଏଥର ଶ୍ରଦ୍ଧାଳୁଙ୍କ ପାଇଁ ମେଳା ଉପଭୋଗ କରିବା ସହ ସୁରୁଖୁରୁ ରେ ମା’ କାଳୀଙ୍କ ଦର୍ଶନ କରି ପାରିବେ ।

ଏଥର ଭଦ୍ରକ ର ଅଧିଷ୍ଠାତ୍ରୀ ଦେବୀ ମା ଭଦ୍ରକାଳୀ ଙ୍କ ପୀଠ ରେ ଆୟୋଜିତ ହେଉଥିବା ମହାଯଜ୍ଞ ର ରୌପ୍ୟ ଜୟନ୍ତୀ ମହୋତ୍ସବ ପାଳିତ ହେବ । ଦୀପାବଳି ଠାରୁ ୭ ଦିନ ଧରି ମା ଭଦ୍ରକାଳୀ ସପ୍ତମାତୃକା ବେଶ ରେ ଦର୍ଶନ ଦେବେ । ଦେଶ ର ବିଭିନ୍ନ ଧର୍ମ ପୀଠ ରୁ ଆସିଥିବା ସନ୍ଥଙ୍କ ଦ୍ଵାରା ଦିବ୍ୟ ଆଳତି ଆୟୋଜିତ ହେବ । 

ଭଦ୍ରକର ଐତିହାସିକ କାଳୀପୂଜା ପାଇଁ  ଶାନ୍ତିଶୃଙ୍ଖଳା, ସ୍ୱଚ୍ଛତା ଓ ଭବ୍ୟ ଆୟୋଜନ ଉପରେ ଗୁରୁତ୍ୱ ଦିଆଯାଇଛି । ରାସ୍ତା ପ୍ରଶସ୍ତିକରଣ, ସ୍ୱଚ୍ଛତା ଓ ଜନସୁବିଧା ଉପରେ ଗୁରୁତ୍ୱ ଦିଆଯାଇଛି । ପୂଜାସ୍ଥଳୀ ଅଞ୍ଚଳରେ ରାସ୍ତା ପ୍ରଶସ୍ତିକରଣ, ମେଢ଼ ଅଞ୍ଚଳରୁ ପ୍ରତିଦିନ ଆବର୍ଜନା ସଂଗ୍ରହ ଓ ଅପସାରଣ, ନାଳଗୁଡ଼ିକର ସଫେଇ ସହିତ ଜଳ ନିଷ୍କାସନ ବ୍ୟବସ୍ଥାକୁ ସୁଦୃଢ଼ କରାଯିବ । ଭଦ୍ରକ କାଳୀପୂଜା ଗୌରବ ସମ୍ମାନ ପାଇଁ ବିଚାରକମଣ୍ଡଳୀଙ୍କ ଦ୍ୱାରା ପୂଜା ମଣ୍ଡପଗୁଡ଼ିକର ସ୍ଥଳ ପରିଦର୍ଶନ କରାଯାଇ ୧୦୦ ନମ୍ବର ମାନଦଣ୍ଡ ଆଧାରରେ ମୂଲ୍ୟାୟନ କରାଯିବ । ଚୂଡ଼ାନ୍ତ ଫଳାଫଳ ଘୋଷଣା ପରେ ବିଜେତା ତିନିଟି ପୂଜା ମଣ୍ଡପକୁ  ପୁରସ୍କାର ପ୍ରଦାନ କରାଯିବାର ବ୍ୟବସ୍ଥା ରହିଛି ।

ଗଞ୍ଜାମ: ବିରୋଧୀ ଦଳ ନେତା ତଥା ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ଆଜି ଗଞ୍ଜାମ ଜିଲ୍ଲାରେ ବନ୍ୟାଞ୍ଚଳ ବୁଲି ଦେଖିବା ସହିତ କ୍ଷତିଗ୍ରସ୍ତ ଚାଷୀଙ୍କୁ ଭେଟିଛନ୍ତି । ନବୀନ ବନ୍ୟାଞ୍ଚଳ ପରିଦର୍ଶନ କରିବା ସମୟରେ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି । ସେପଟେ ତାଙ୍କ ନିର୍ବାଚନ ମଣ୍ଡଳୀ ହିଞ୍ଜିଳିରେ “ନବୀନ ଗୋ ବ୍ୟାକ୍” ନାରା ଲେଖାଥିବା ପୋଷ୍ଟର ଦେଖିବାକୁ ମିଳିଛି । ଏହା ପୂର୍ବୁର ବନ୍ୟା ସମୟରେ “ନବୀନ ମିସିଂ” ବୋଲି ଲେଖାଯାଇଥିଲା । 

ନବୀନ ଆଜି ଶେରଗଡ଼, ଆସିକା, ହିଞ୍ଜିଳିକାଟୁ ଏବଂ ସୋରଡ଼ା ବନ୍ୟାଞ୍ଚଳ ବୁଲିଛନ୍ତି । ବନ୍ୟା ପ୍ରପୀଡ଼ିତଙ୍କ ସହିତ ସିଧାସଳଖ ଆଲୋଚନା କରିଥିଲେ । ନବୀନ ବାତ୍ୟା ଓ ପରବର୍ତ୍ତୀ ବନ୍ୟା କ୍ଷୟକ୍ଷତି ନେଇ ଚିନ୍ତା ପ୍ରକଟ କରିଛନ୍ତି । କ୍ଷତି ତୁଳନାରେ ସରକାରୀ ସହାୟତା ଅତ୍ୟନ୍ତ ନଗଣ୍ୟ ଅଟେ । ସରକାର ପ୍ରୋ-ଆକ୍ଟିଭ୍‌ ହୋଇ କାମ କରିବାକୁ ନବୀନ ପରାମର୍ଶ ଦେଇଛନ୍ତି । 

ବୌଦ୍ଧ: ବୌଦ୍ଧ ଜିଲ୍ଲା କଣ୍ଟାମାଳ ବିଡିଓ ସାମି ରେଡ୍ଡୀ ଜୟଶ୍ରୀଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ରାଜସ୍ଵ ଓ ବିପର୍ଯ୍ୟୟ ପରିଚାଳନା ବିଭାଗ କଣ୍ଟାମାଳ ବିଡିଓ ସାମି ରେଡ୍ଡୀ ଜୟଶ୍ରୀଙ୍କୁ ନିଲମ୍ବିତ କରିଛି । ନିଲମ୍ବନ ଅବଧି ମଧ୍ୟରେ ସେ ଉତ୍ତରାଞ୍ଚଳ ରାଜସ୍ୱ କମିଶନରଙ୍କ କାର୍ଯ୍ୟାଳୟରେ ରହିବେ । ମୁଖ୍ୟାଳୟ ଛାଡି ଅନ୍ୟ କେଉଁଠାକୁ ଯାଇ ପାରିବେ ନାହିଁ ବୋଲି ନିର୍ଦ୍ଦେଶ ଦିଆଯାଇଛି l

ଭୁବନେଶ୍ୱର: ଦୀପାବଳି ପୂର୍ବରୁ ରକ୍ତ ରଞ୍ଜିତ ହୋଇଛି ରାଜ୍ୟ ରାଜଧାନୀ ଭୁବନେଶ୍ୱର । କମିଶନରେଟ୍ ପୋଲିସର ନିଦ ହଜାଇ ଦେଇଛି ହତ୍ୟା ମାମଲା । ଗତ ଦୁଇ ଦିନ ମଧ୍ୟରେ ଗଡ଼ିଛି ତିନି ତିନୋଟି ମୁଣ୍ଡ । ଶୁକ୍ରବାର ବିଳମ୍ବିତ ରାତିରେ ଭୁବନେଶ୍ୱରରେ ଭିନ୍ନ ଭିନ୍ନ ଦୁଇଟି ସ୍ଥାନରେ ଭିନ୍ନ ମାମଲାରେ  ୨ ଜଣଙ୍କୁ ହତ୍ୟା କରାଯାଇଛି । ଲକ୍ଷ୍ମୀସାଗର ଥାନା ଅନ୍ତର୍ଗତ ବମିଖାଲ ଅଞ୍ଚଳରେ ପଏଣ୍ଟ ବ୍ଲାଙ୍କରୁ ଜଣେ ଯୁବକଙ୍କୁ ଗୁଳି କରି ହତ୍ୟା କରାଯାଇଛି । ମୃତକ ହେଲେ ହଳଦିଆପଡ଼ାର ସୋନୁ ନାଏକ । ସେପଟେ ଭିଏସ୍ଏସ୍ ନଗରରେ ଜଣଙ୍କୁ ପରକୀୟା ପ୍ରୀତି ପାଇଁ ଜଣେ ଯୁବକଙ୍କୁ ପଥରରେ ଛେଚି ଛେଚି ହତ୍ୟା କରାଯାଇଛି । 

ବମିଖାଲ ହତ୍ୟା ମାମଲା 

ଗତକାଲି ରାତି ୩ଟା ସମୟରେ ସୋନୁ ନାଏକ ତାଙ୍କର ସାଙ୍ଗମାନଙ୍କ ଭୋଜି କରିବା ପରେ ସହିତ ରସୁଲଗଡ଼ ପେଟ୍ରୋଲ ପମ୍ପ ଗାଡ଼ିରେ ପେଟ୍ରୋଲ ଭରିବାକୁ ଯାଉଥିଲେ । ଏହି ସମୟରେ କିଛି ଦୁର୍ବୃତ୍ତ ଏକ ଅଟୋରେ ରାସ୍ତାରେ ଗୁଳି ଗୁଳି ଫୁଟାଇ ଫୁଟାଇ ଆସିଥିଲେ । ଏହି ସମୟରେ ସୋନୁଙ୍କୁ ଅଟକାଇ ପଏଣ୍ଟ ବ୍ଲାଙ୍କରୁ ଗୁଳି କରିଥିଲେ । ତୁରନ୍ତ ସୋନୁଙ୍କୁ କ୍ୟାପିଟାଲରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । 

ଘଟଣା ସ୍ଥଳରେ ପୋଲିସ କମିଶନର ନିଜେ ପହଁଚି ତଦନ୍ତ କରିଛନ୍ତି । ଏହି ମାମଲାରେ ୪ ଜଣଙ୍କୁ ଗିରଫ କରାଯାଇଛି । 

ପରକୀୟା ପ୍ରୀତି ପାଇଁ ବିଭତ୍ସ ହତ୍ୟା

ଭିଏସଏସ୍ ନଗର ତାରିଣୀ ବସ୍ତିରେ ଜଣେ ଯୁବକଙ୍କୁ ପଥର ଛେଚି ହତ୍ୟା କରାଯାଇଛି । ଯୁବକ ଜଣକ ଗଞ୍ଜାମର ହୋଇଥିବା ଜଣାପଡ଼ିଛି । ଯୁବକ ଜଣକ ଜଣେ ନେପାଳ ଦମ୍ପତିଙ୍କ ପଡ଼ୋଶୀ ଥିଲେ । ନେପାଳ ମହିଳାଙ୍କ ସହିତ ଯୁବକ ଜଣକଙ୍କର ପରକୀୟା ପ୍ରୀତି ଥିଲା । ଅନେକ ସମୟରେ ସେ ତାଙ୍କ ଘରକୁ ଯାଇ ମହିଳାଙ୍କ ସହିତ ଅନୈତିକ ସମ୍ପର୍କ ରଖୁଥିଲେ । ଏହା ଜାଣିବା ପରେ ମହିଳାଙ୍କ ସ୍ୱାମୀ ଯୁବକଙ୍କୁ ପଥରରେ ଛେଚି ହତ୍ୟା କରିଛନ୍ତି । ତାଙ୍କ ସ୍ତ୍ରୀ କେଉଁଆଡ଼େ ଫେରାର ହୋଇଯାଇଛନ୍ତି । ପୋଲିସ ଉକ୍ତ ବ୍ୟକ୍ତିଙ୍କୁ ଅଟକ ରଖିବା ସହିତ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଛି । 

ଏଠାରେ ଉଲ୍ଲେଖ ଯୋଗ୍ୟ, ଧଉଳି ଥାନା ଅନ୍ତର୍ଗତ ଶିଶୁପାଳ ଗଡ଼ରେ ମଧ୍ୟ ଜଣକୁ ଗୁଳି କରି ହତ୍ୟା କରାଯାଇଥିଲା । 

ଭୁବନେଶ୍ୱର: ଚଳିତ ବର୍ଷ ମୁଖ୍ୟମନ୍ତ୍ରୀଙ୍କ ନିବାସରେ ପାଳନ ହେବନି ପବିତ୍ର ଦୀପାବଳି ଉତ୍ସବ । ବାତ୍ୟା ‘ଅର୍ଣ୍ଣବ’ ପରବର୍ତ୍ତୀ ବନ୍ୟା ଯୋଗୁଁ ରାଜ୍ୟର ବିଭିନ୍ନ ଅଞ୍ଚଳ, ବିଶେଷକରି ଦକ୍ଷିଣ ଓଡ଼ିଶାରେ ଉପୁଜିଥିବା ବିପର୍ଯ୍ୟୟକୁ ଦୃଷ୍ଟିରେ ରଖି ଚଳିତ ବର୍ଷ ମୁଖ୍ୟମନ୍ତ୍ରୀ ନିବାସରେ ଦୀପାବଳୀ ଉତ୍ସବ ପାଳିତ ହେବ ନାହିଁ। 

ମୁଖ୍ୟମନ୍ତ୍ରୀ ଏକ୍ସରେ ପୋଷ୍ଟ କରି, ଦୀପାବଳି ପାଳନ କରିବେ ନାହିଁ ବୋଲି ସୂଚନା ଦେଇଛନ୍ତି  । ଏହି ପରିପ୍ରେକ୍ଷୀରେ ଦୀପାବଳୀ ଅବସରରେ ମୁଖ୍ୟମନ୍ତ୍ରୀ ନିବାସକୁ କୌଣସି ପ୍ରକାର ଉପହାର କିମ୍ବା ଫୁଲତୋଡ଼ା ନେଇ ନ ଆସିବା ପାଇଁ ସମସ୍ତ ଶୁଭେଚ୍ଛୁ ତଥା ନାଗରିକମାନଙ୍କୁ ଅନୁରୋଧ କରିଛନ୍ତି । ପ୍ରଭାବିତ ଅଞ୍ଚଳର ଜନସାଧାରଣଙ୍କ ପ୍ରତି ସମ୍ବେଦନଶୀଳ ରହି ବିପର୍ଯ୍ୟୟ ପ୍ରଭାବିତଙ୍କ ସହାୟତାରେ ସହଯୋଗର ହାତ ବଢ଼ାଇବାକୁ ମାନ୍ୟବର ମୁଖ୍ୟମନ୍ତ୍ରୀ ଆହ୍ୱାନ ଜଣାଇଛନ୍ତି।

ଭଞ୍ଜନଗର/ଘୁ.ଉଦୟଗିରି: ଗଞ୍ଜାମ-କନ୍ଧମାଳ ସୀମାନ୍ତ ଗିଡ଼ିପାବାଲି ଅଞ୍ଚଳରେ ଘଟିଥିବା ଛାତିଥରା ଭୂସ୍ଖଳନକୁ ଇତିମଧ୍ୟରେ ୯ ଦିନ ବିତିଯାଇଛି। ମାଟିତଳେ ପୋତି ହୋଇ ରହିଥିବା ନିଖୋଜ ୬ ଜଣଙ୍କ ସନ୍ଧାନ ପାଇଁ ଉଦ୍ଧାରକାରୀ ଦଳ ପକ୍ଷରୁ ସର୍ଚ୍ଚ ଅପରେସନ୍‌କୁ ଜୋରଦାର କରାଯାଇଥିଲେ ବି ଆଜି କୌଣସି ସଫଳତା ମିଳିପାରିନାହିଁ।

ଚାଲିଛି ଅତ୍ୟାଧୁନିକ ସର୍ଚ୍ଚ ଅପରେସନ୍

ନିଖୋଜ ମୋଟ ୧୩ ଜଣଙ୍କ ମଧ୍ୟରୁ ପୂର୍ବରୁ ୨ ଜଣ ଏବଂ ଗତକାଲି ୫ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା। ବାକି ୬ ଜଣଙ୍କୁ ଠାବ କରିବା ପାଇଁ ରେଳବାଇ ଇଞ୍ଜିନିୟର, ଏନ୍‌ଡିଆର୍‌ଏଫ୍ (NDRF), ଓଡ୍ରାଫ୍ (ODRAF), ଅଗ୍ନିଶମ ବାହିନୀ, ସନ୍ଧାନୀ କୁକୁର ଏବଂ ଅତ୍ୟାଧୁନିକ ଯନ୍ତ୍ରାଂଶ ନିୟୋଜିତ ହୋଇଛନ୍ତି। ଓଡ୍ରାଫ୍‌ର ୨ଟି ଟିମ୍, ଅଗ୍ନିଶମ ଦଳ ଓ ଗ୍ରାମବାସୀ ପୂର୍ବରୁ ଘର ଥିବା ଅନୁମାନିକ ସ୍ଥାନଗୁଡ଼ିକୁ ଖୋଳି ସନ୍ଧାନ ଚଳାଇଛନ୍ତି। ଆସନ୍ତାକାଲି ପୁଣି ଏହି ଉଦ୍ଧାର କାର୍ଯ୍ୟ ଜାରି ରହିବ।

ଜଙ୍ଗଲ ଓ କାଦୁଅ ଭିତରେ ବଞ୍ଚିବାର ସଂଘର୍ଷ

ଭୂସ୍ଖଳନ ସମୟରେ ପାହାଡ଼ରୁ ପଥର ଓ ମାଟି ଅତଡ଼ା ଖସିବା ଦେଖି ଗ୍ରାମର ୧୦ ଜଣ ଲୋକ ଛାତିରେ ଛାତିଏ ଭୟ ନେଇ ବଣପାହାଡ଼ ଦେଇ ସୁରକ୍ଷିତ ସ୍ଥାନକୁ ପଳାଇବାକୁ ଚେଷ୍ଟା କରିଥିଲେ। ସେମାନଙ୍କ ସହିତ ଦେଢ଼ ବର୍ଷର ଦୁଇ ଯାଆଁଳା ଶିଶୁ ମଧ୍ୟ ଥିଲେ। ମୁଷଳଧାରାରେ ବର୍ଷା, କେନାଲର ପ୍ରବଳ ସ୍ରୋତ ଏବଂ ପାହାଡ଼ିଆ ଅଙ୍କାବଙ୍କା ରାସ୍ତାରେ ବାଟ ହୁଡ଼ି ସେମାନେ ରାତିସାରା ଚାଲିଥିଲେ। ଶେଷରେ ଏକ ନିର୍ଜନ ସ୍ଥାନରେ ଥିବା କୁଡ଼ିଆରେ ଅଟକି, ସେଠାରେ ଥିବା କିଛି ଚାଉଳ ରୋଷେଇ କରି ଭୋକ ମେଣ୍ଟାଇଥିଲେ।

ଆଖିରୁ ଲୁହ ଝରାଇ କହିଲେ ଅନୁଭୂତି

ଭୂସ୍ଖଳନର ସେହି କାଳରାତ୍ରୀକୁ ମନେ ପକାଇ ବର୍ତ୍ତିଯାଇଥିବା ମଧୁ ପ୍ରଧାନ ଓ ସୁବଳ ପ୍ରଧାନ କହନ୍ତି ଯେ ଆଖି ଆଗରେ ସବୁକିଛି ଛାରଖାର ହୋଇଯାଇଥିବାରୁ ସେହି ରାତିରେ କାହାରି ଆଖିକୁ ନିଦ ଆସିନଥିଲା। ପରଦିନ ସକାଳେ ପୁଣି ଚାଲିଚାଲି ସେମାନେ କତିଙ୍ଗିଆ ପଞ୍ଚାୟତର କିଲାପାଙ୍ଗା ଆଶ୍ରୟସ୍ଥଳରେ ପହଞ୍ଚିବା ପରେ ବିପର୍ଯ୍ୟୟର ଭୟାବହତା ବିଷୟରେ ଜାଣିବାକୁ ପାଇଥିଲେ।

ଆଶ୍ରୟସ୍ଥଳକୁ ସ୍ଥାନାନ୍ତର

ବର୍ତ୍ତମାନ କିଲାପାଙ୍ଗା ଆଶ୍ରୟସ୍ଥଳରୁ ମଧୁ ପ୍ରଧାନଙ୍କ ପରିବାରର ୫ ଜଣ ଏବଂ ସୁବଳ ପ୍ରଧାନଙ୍କୁ ଭଞ୍ଜନଗର ବ୍ଲକ ବାଇବାଲି ପଞ୍ଚାୟତର ବଜ୍ରକୋଟ ଆଶ୍ରୟସ୍ଥଳକୁ ଅଣାଯାଇଛି। ଅନ୍ୟପକ୍ଷରେ କିଲାପାଙ୍ଗାରେ ଥିବା ବାକି ପ୍ରଭାବିତଙ୍କୁ ଘୁ.ଉଦୟଗିରି କଲ୍ୟାଣ ମଣ୍ଡପକୁ ସ୍ଥାନାନ୍ତର କରାଯାଇଛି।

 ଆରଡ଼ି (ଭଦ୍ରକ): ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ସୁନ୍ଦରପୁର ଗାଁ ନିକଟରେ ପୁଣି ଏକ ବଡ଼ ଦୁର୍ଘଟଣା ଘଟିଛି। ବୈତରଣୀ ନଦୀର ପ୍ରାୟ ୪୦୦ ଫୁଟ ଲମ୍ବର ନଦୀବନ୍ଧ ନଦୀଗର୍ଭକୁ ଧସିଯାଇଛି। ଏହାଫଳରେ ସୁନ୍ଦରପୁର ସମେତ ଆଖପାଖ ୨୪ଟି ଗାଁର ଲୋକଙ୍କ ମଧ୍ୟରେ ତୀବ୍ର ଆତଙ୍କ ସୃଷ୍ଟି ହୋଇଛି।

ଅସ୍ଥାୟୀ ପ୍ରତିକାର ବିଫଳ, ୮ ଫୁଟ ତଳକୁ ଖସିଲା ପଥର ପ୍ୟାକିଂ ନଦୀବନ୍ଧର ସୁରକ୍ଷା ପାଇଁ ଧାମନଗର ଜଳସମ୍ପଦ ବିଭାଗ ପକ୍ଷରୁ ଜରିପାଲ ଘୋଡ଼ାଯିବା ସହ ବାଲିବସ୍ତା ପକାଯାଇ ପ୍ରତିକାର କରାଯାଇଥିଲା। କିନ୍ତୁ ଏହି ଅସ୍ଥାୟୀ ପଦକ୍ଷେପ ସତ୍ତ୍ୱେ ଶୁକ୍ରବାର ସକାଳେ ବନ୍ଧରେ ପୁନର୍ବାର ଗଭୀର ଫାଟ ସୃଷ୍ଟି ହୋଇଥିଲା। ଦେଖୁ ଦେଖୁ ପ୍ରାୟ ୪୦୦ ଫୁଟ ଲମ୍ବର ପଥରପ୍ୟାକିଂ ବନ୍ଧ ନଦୀ ତଳକୁ ୮ ଫୁଟ ଖସିଯାଇଥିଲା।

ସ୍ଥିତି ଯାଞ୍ଚ କଲେ ଯନ୍ତ୍ରୀ ଖବର ପାଇ ଧାମନଗର ଜଳସମ୍ପଦ ବିଭାଗର ଏସ୍ଡିଓ ଶମ୍ଭୁନାଥ ମଲ୍ଲିକ ଓ କନିଷ୍ଠ ଯନ୍ତ୍ରୀ ବିମଳ ବେହେରା ଘଟଣାସ୍ଥଳରେ ପହଞ୍ଚି ବନ୍ଧର ସ୍ଥିତି ଯାଞ୍ଚ କରିଛନ୍ତି। ବାରମ୍ବାର ନଦୀବନ୍ଧ ଧସୁଥିବାରୁ ଆରଡ଼ି, ଓଳଗ, ସୁନ୍ଦରପୁର ଓ ନାନ୍ଦପୁର ପଞ୍ଚାୟତ ଅନ୍ତର୍ଗତ ୨୪ଟି ଗାଁର ହଜାର ହଜାର ଲୋକ ବନ୍ୟା ଭୟରେ ଦିନ କାଟୁଛନ୍ତି। ବନ୍ଧଟି ସମ୍ପୂର୍ଣ୍ଣ ଭୁଶୁଡ଼ି ପଡ଼ିଲେ ବ୍ୟାପକ ଧନଜୀବନ କ୍ଷୟକ୍ଷତି ହେବାର ଆଶଙ୍କା ରହିଛି।

୧୦ କୋଟି ଖର୍ଚ୍ଚ ପରେ ବି ସ୍ଥିତି ସଙ୍ଗୀନ, ଅଞ୍ଚଳବାସୀଙ୍କ ଅସନ୍ତୋଷ ଅନ୍ୟପକ୍ଷରେ ଗତ ଦୁଇ ବର୍ଷ ମଧ୍ୟରେ ନଦୀବନ୍ଧର ସୁଦୃଢ଼ୀକରଣ ନାଁରେ ୧୦ କୋଟି ଟଙ୍କା ଖର୍ଚ୍ଚ ହୋଇଥିବା ସତ୍ତ୍ୱେ ବାରମ୍ବାର ଏଭଳି ସ୍ଥିତି ଉପୁଜୁଥିବାରୁ ଅଞ୍ଚଳବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ନଦୀବନ୍ଧର ସ୍ଥାୟୀ ମରାମତି ଏବଂ ସୁରକ୍ଷା ବ୍ୟବସ୍ଥା କରା ନଗଲେ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବାକୁ ଗ୍ରାମବାସୀ ଚେତାବନୀ ଦେଇଛନ୍ତି।

ଏ ସମ୍ପର୍କରେ ଧାମନଗର ଜଳସମ୍ପଦ ବିଭାଗର କନିଷ୍ଠ ଯନ୍ତ୍ରୀ ବିମଳ ପ୍ରସାଦ ବେହେରା କହିଛନ୍ତି ଯେ ଦୁର୍ବଳ ନଦୀବନ୍ଧ ଉପରେ ବିଭାଗ ସମ୍ପୂର୍ଣ୍ଣ ନଜର ରଖିଛି ଏବଂ ଖୁବ୍ଶୀଘ୍ର ଉପରିସ୍ଥ ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରି ସ୍ଥିତିର ଅନୁଧ୍ୟାନ କରିବେ।

ଭୁବନେଶ୍ୱର:୨୦୧୪ ମସିହାରେ ରାଜଧାନୀ ଭୁବନେଶ୍ୱରର ନୂଆପଲ୍ଲୀ ଥାନା ଅଞ୍ଚଳରେ ଘଟିଥିବା ବହୁଚର୍ଚ୍ଚିତ ‘ଗଦାଧର ବେହେରା ହତ୍ୟାକାଣ୍ଡ’ ମାମଲାରେ ପୁଲିସକୁ ମିଳିଛି ବଡ଼ ସଫଳତା। ଦୀର୍ଘ ୧୨ ବର୍ଷ ଧରି ଫେରାର ଥିବା ମୁଖ୍ୟ ଅଭିଯୁକ୍ତ ସଞ୍ଜୟ ପଲେଇ ଓରଫ ସଞ୍ଜୁକୁ ନୂଆପଲ୍ଲୀ ଥାନା ପୁଲିସ ଗିରଫ କରି କୋର୍ଟ ଚାଲାଣ କରିଛି।

ଦୀପାବଳି ପାଇଁ ଗାଁକୁ ଆସି ଧରାପଡ଼ିଲା ଅଭିଯୁକ୍ତ

ହତ୍ୟାକାଣ୍ଡ ପରେ ସଞ୍ଜୁ ଆଇନ ଆଖିରେ ଧୂଳି ଦେଇ କେରଳ ପଳାଇଥିଲା ଏବଂ ସେଠାରେ ଆତ୍ମଗୋପନ କରି ରହିଥିଲା। ତେବେ ଦୀପାବଳି ପାଳନ କରିବା ପାଇଁ ସେ କଟକ ନିଆଳିସ୍ଥିତ ନିଜ ଗାଁ ମାଧବକୁ ଆସିଥିବା ନେଇ ପୁଲିସ ଗୁପ୍ତ ସୂଚନା ପାଇଥିଲା। ଏହା ପରେ ନୂଆପଲ୍ଲୀ ଥାନା ପୁଲିସର ଏକ ସ୍ୱେଶାଲ ଟିମ୍ ଗତକାଲି ରାତିରେ ଚଢ଼ାଉ କରି ତା’ ଘରୁ ତାକୁ ଉଠାଇ ଆଣିଥିଲା।

ଅନୈତିକ ସମ୍ପର୍କରୁ ଯୋଜନାବଦ୍ଧ ହତ୍ୟାକାଣ୍ଡ

ମିଳିଥିବା ସୂଚନା ଅନୁଯାୟୀ, ମୃତ ଗଦାଧର ବେହେରା ଏକ ଘରୋଇ ସଂସ୍ଥାରେ ଅଫିସ୍ ଆସିଷ୍ଟାଣ୍ଟ ଭାବେ କାମ କରୁଥିଲେ ଏବଂ ସେଠାରେ ସସ୍ତ୍ରୀକ ରହୁଥିଲେ। ତେବେ ଉକ୍ତ ସଂସ୍ଥାର ସୁରକ୍ଷାକର୍ମୀ ବିଶ୍ୱକଲ୍ୟାଣ ପଶୁପାଳକ ସହ ଗଦାଧରଙ୍କ ପତ୍ନୀଙ୍କ ଅନୈତିକ ସମ୍ପର୍କ ଗଢ଼ିଉଠିଥିଲା। ଗଦାଧର ଏହା ଜାଣିବା ପରେ ପତ୍ନୀଙ୍କୁ ବାପଘରକୁ ପଠାଇ ଦେବା ସହ ବିଶ୍ୱକଲ୍ୟାଣକୁ ତାଗିଦ କରିଥିଲେ। ଏଥିରେ ପ୍ରତିଶୋଧପରାୟଣ ହୋଇ ବିଶ୍ୱକଲ୍ୟାଣ ଗଦାଧରଙ୍କୁ ହଟାଇବାକୁ ଷଡ଼ଯନ୍ତ୍ର ରଚିଥିଲା।

୨୦୧୪ ଜାନୁଆରୀ ୧୭ ତାରିଖ ବିଳମ୍ବିତ ରାତିରେ ବିଶ୍ୱକଲ୍ୟାଣ, ସଞ୍ଜୁ ଓ ପିତନ ଭୋଇ ଗଦାଧରଙ୍କ କ୍ୱାର୍ଟର୍ସରେ ପଶି ଶୋଇଥିବା ଅବସ୍ଥାରେ ତାଙ୍କ ମୁଣ୍ଡକୁ ଲୁହାରଡ୍‌ରେ ପିଟିବା ସହ ଛୁରୀରେ ଗଳା କାଟି ହତ୍ୟା କରିଥିଲେ। ଏହାପରେ ମୃତଦେହକୁ ଅଖାରେ ପୂରାଇ ସହଯୋଗୀ ଛବି ମଳିକର କାର୍‌ ଯୋଗେ ନିଆଳି ମାଧବ ଗାଁକୁ ନେଇ ବିଶ୍ୱକଲ୍ୟାଣ ଘର ପଛପଟେ ପୋତି ଦେଇଥିଲେ।

ରକ୍ତଛିଟାରୁ ଫୁଟିଥିଲା ଗୁମର, ଏବେ ବି ଜଣେ ଫେରାର

ପରଦିନ ଗଦାଧରଙ୍କ ମୋବାଇଲ୍ ସୁଇଚ୍‌ଅଫ୍ ରହିବାରୁ ପରିବାର ଲୋକେ ନିଖୋଜ ଅଭିଯୋଗ କରିଥିଲେ। ତଦନ୍ତ ବେଳେ ପୁଲିସ କ୍ୱାର୍ଟର୍ସ କାନ୍ଥରେ ରକ୍ତଛିଟା ଦେଖି ସନ୍ଦେହ କରିଥିଲା। ପରିବାର ଲୋକଙ୍କ ସୂଚନା ଆଧାରରେ ବିଶ୍ୱକଲ୍ୟାଣକୁ ଆଣି ପଚରାଉଚରା କରିବାରୁ ସେ ସବୁ ସତ ମାନିଯାଇଥିଲା। ଜାନୁଆରୀ ୨୧ରେ ପୁଲିସ ମାଟି ତଳୁ ମୃତଦେହ ବାହାର କରିବା ସହ ମୁଖ୍ୟ ଅଭିଯୁକ୍ତ ବିଶ୍ୱକଲ୍ୟାଣ, ଛବି ମଳିକ ଓ ବଳରାମ ପାଢ଼ୀଙ୍କୁ ଗିରଫ କରିଥିଲା।

ତେବେ ଘଟଣା ଦିନଠାରୁ ସଞ୍ଜୁ ଓ ପିତନ ଫେରାର ଥିଲେ। ୧୨ ବର୍ଷ ପରେ ସଞ୍ଜୁ ଗିରଫ ହୋଇଥିବା ବେଳେ ଏହି ମାମଲାରେ ସମ୍ପୃକ୍ତ ଅନ୍ୟତମ ଅଭିଯୁକ୍ତ ପିତନ ଭୋଇ ଏବେ ବି ଫେରାର ଅଛି। ତାକୁ ଧରିବା ପାଇଁ ପୁଲିସ ଉଦ୍ୟମ ଜାରି ରଖିଛି।