ଭୁବନେଶ୍ୱର: ଓଡ଼ିଶାର ଉଚ୍ଚଶିକ୍ଷା କ୍ଷେତ୍ରକୁ ଆହୁରି ମଜଭୁତ କରିବାକୁ ରାଜ୍ୟ ସରକାରଙ୍କ ବଡ଼ ପଦକ୍ଷେପ। ୭ଟି ସରକାରୀ ବିଶ୍ୱବିଦ୍ୟାଳୟକୁ NAAC ମାନ୍ୟତା ନବୀକରଣ ପ୍ରକ୍ରିୟା ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଛନ୍ତି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ।

ବିଶ୍ୱବିଦ୍ୟାଳୟଗୁଡ଼ିକର ଶିକ୍ଷାର ମାନ, ଭିତ୍ତିଭୂମି ଓ ଜାତୀୟ ସ୍ତରରେ ସ୍ଥାନକୁ ଉନ୍ନତ କରିବା ଲକ୍ଷ୍ୟରେ ଏହି ପଦକ୍ଷେପ ନିଆଯାଇଛି। ଏଥିପାଇଁ ଆବଶ୍ୟକ ସମସ୍ତ ପ୍ରଶାସନିକ ଓ ଲଜିଷ୍ଟିକ୍ ସହାୟତା ରାଜ୍ୟ ସରକାର ଯୋଗାଇଦେବେ ବୋଲି ମନ୍ତ୍ରୀ ଆଶ୍ୱାସନା ଦେଇଛନ୍ତି।

କେଉଁ ବିଶ୍ୱବିଦ୍ୟାଳୟକୁ ନିର୍ଦ୍ଦେଶ?

NAAC ମାନ୍ୟତା ନବୀକରଣ ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଯେଉଁ ସଂସ୍ଥାଗୁଡ଼ିକୁ କୁହାଯାଇଛି, ସେଥିରେ ରହିଛି:

• ବିକ୍ରମ ଦେବ ବିଶ୍ୱବିଦ୍ୟାଳୟ
• ରାଜେନ୍ଦ୍ର ବିଶ୍ୱବିଦ୍ୟାଳୟ
• ଧରଣୀଧର ବିଶ୍ୱବିଦ୍ୟାଳୟ
• ମଧୁସୂଦନ ଆଇନ ବିଶ୍ୱବିଦ୍ୟାଳୟ
• ଶ୍ରୀ ଜଗନ୍ନାଥ ସଂସ୍କୃତ ବିଶ୍ୱବିଦ୍ୟାଳୟ
• ଅନ୍ୟ ଦୁଇଟି ସରକାରୀ ବିଶ୍ୱବିଦ୍ୟାଳୟ

୧୪୦୦ରୁ ଅଧିକ ଅଧ୍ୟାପକ ନିଯୁକ୍ତି ପାଇଁ ପ୍ରକ୍ରିୟା

କେବଳ NAAC ମାନ୍ୟତା ନୁହେଁ, ବିଶ୍ୱବିଦ୍ୟାଳୟଗୁଡ଼ିକରେ ଶିକ୍ଷକ ଅଭାବ ଦୂର କରିବା ଉପରେ ମଧ୍ୟ ସରକାର ଗୁରୁତ୍ୱ ଦେଉଛନ୍ତି।

ବିଶ୍ୱବିଦ୍ୟାଳୟଗୁଡ଼ିକରେ କୁଳପତି ନିଯୁକ୍ତି ସରିଛି।

୧୪୦୦ରୁ ଅଧିକ ପ୍ରଫେସର ଓ ଆସୋସିଏଟ୍ ପ୍ରଫେସର ପଦବୀ ପୂରଣ ପାଇଁ ସାକ୍ଷାତକାର ପ୍ରକ୍ରିୟା ଚାଲିଛି।

UGC ସହ ସମନ୍ୱୟ ରଖି ଉଚ୍ଚଶିକ୍ଷାର ଭିତ୍ତିଭୂମିକୁ ସୁଦୃଢ଼ କରାଯାଉଛି।

NIRF ରାଙ୍କିଂରେ ଉନ୍ନତି ଉପରେ ଫୋକସ୍

ରାଜ୍ୟର ସରକାରୀ ବିଶ୍ୱବିଦ୍ୟାଳୟଗୁଡ଼ିକ କେବଳ NAAC ମାନ୍ୟତା ନବୀକରଣରେ ସୀମିତ ନରହି ଜାତୀୟ ସ୍ତରରେ ନିଜର ସ୍ଥାନ ମଜଭୁତ କରିବା ଉପରେ ମଧ୍ୟ ଗୁରୁତ୍ୱ ଦେବେ। ବିଶେଷ କରି NIRF ରାଙ୍କିଂରେ ଉନ୍ନତି ଆଣିବା ସରକାରଙ୍କ ଅନ୍ୟତମ ଲକ୍ଷ୍ୟ। ଏବେ ଦେଖିବାର କଥା, ସରକାରଙ୍କ ଏହି ପଦକ୍ଷେପ ଓଡ଼ିଶାର ସରକାରୀ ବିଶ୍ୱବିଦ୍ୟାଳୟଗୁଡ଼ିକୁ ଜାତୀୟ ସ୍ତରରେ କେତେ ଆଗକୁ ନେଉଛି। 

ଭୁବନେଶ୍ୱର: ରାଜ୍ୟ ପ୍ରଶାସନିକ ସ୍ତରରେ ବଡ଼ ଧରଣର ଅଦଳବଦଳ। ୪ ଜଣ ବରିଷ୍ଠ IAS ଅଧିକାରୀଙ୍କୁ ମିଳିଲା ନୂଆ ଦାୟିତ୍ୱ। ନଭେମ୍ବର ୫ ତାରିଖରେ ରାଜ୍ୟପାଳଙ୍କ ଆଦେଶକ୍ରମେ ସାଧାରଣ ପ୍ରଶାସନ ଓ ଜନଅଭିଯୋଗ ବିଭାଗ ପକ୍ଷରୁ ଏନେଇ ବିଜ୍ଞପ୍ତି ଜାରି ହୋଇଛି।

କାହାକୁ ମିଳିଲା କେଉଁ ବିଭାଗର ଦାୟିତ୍ୱ? ଜାଣନ୍ତୁ ପୂରା ତାଲିକା।

୧. ବିଷ୍ଣୁପଦ ସେଠୀ (IAS, RR-1995)

ଓଡ଼ିଶା ଜଙ୍ଗଲ ଉନ୍ନୟନ ନିଗମର ଅଧ୍ୟକ୍ଷ ଏବଂ KBKର ମୁଖ୍ୟ ପ୍ରଶାସକ ଭାବେ ଦାୟିତ୍ୱରେ ଥିବା ବିଷ୍ଣୁପଦ ସେଠୀଙ୍କୁ ସାଧାରଣ ପ୍ରଶାସନ ଓ ଜନଅଭିଯୋଗ ବିଭାଗରେ Officer on Special Duty (OSD) ଭାବେ ନିଯୁକ୍ତି ମିଳିଛି।

୨. ଗିରିଶ ଏସ୍.ଏନ୍. (IAS, RR-2002)

ପଞ୍ଚାୟତିରାଜ ଓ ପାନୀୟ ଜଳ ବିଭାଗର କମିଶନର-ତଥା-ଶାସନ ସଚିବ ଥିବା ଗିରିଶ ଏସ୍.ଏନ୍.ଙ୍କୁ ଏବେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର କମିଶନର-ତଥା-ଶାସନ ସଚିବ ଦାୟିତ୍ୱ ମିଳିଛି।

୩. ଅଶ୍ୱଥୀ ଏସ୍. (IAS, RR-2003)

ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର କମିଶନର-ତଥା-ଶାସନ ସଚିବ ଥିବା ଅଶ୍ୱଥୀ ଏସ୍.ଙ୍କୁ ଅର୍ଥ ବିଭାଗର ସ୍ୱତନ୍ତ୍ର ସଚିବ ଭାବେ ନିଯୁକ୍ତ କରାଯାଇଛି। ତେବେ ସେ SITI-Odishaର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (CEO) ଭାବେ ଅତିରିକ୍ତ ଦାୟିତ୍ୱ ଜାରି ରଖିବେ।

୪. ରୂପା ମିଶ୍ର (IAS, RR-2004)

କେନ୍ଦ୍ରୀୟ ଡେପୁଟେସନରୁ ଫେରିବା ପରେ ରୂପା ମିଶ୍ରଙ୍କୁ ପଞ୍ଚାୟତିରାଜ ଓ ପାନୀୟ ଜଳ ବିଭାଗର କମିଶନର-ତଥା-ଶାସନ ସଚିବ ଭାବେ ନିଯୁକ୍ତି ମିଳିଛି।

କେଉଁ ବିଭାଗରେ କିଏ ରହିବେ?

ଏହି ପ୍ରଶାସନିକ ଅଦଳବଦଳ ପରେ ସ୍ୱାସ୍ଥ୍ୟ, ଅର୍ଥ ଏବଂ ପଞ୍ଚାୟତିରାଜ ଭଳି ଗୁରୁତ୍ୱପୂର୍ଣ୍ଣ ବିଭାଗରେ ନୂଆ ଅଧିକାରୀ ଦାୟିତ୍ୱ ତୁଲାଇବେ। ରାଜ୍ୟର ପ୍ରଶାସନିକ କାର୍ଯ୍ୟଧାରାରେ ଏହି ପରିବର୍ତ୍ତନ କିପରି ପ୍ରତିଫଳିତ ହେବ, ତାହା ଉପରେ ନଜର ରହିବ।

କୋରାପୁଟ / ଭୁବନେଶ୍ୱର: ସୀମାନ୍ତ କୋଟିଆ ଗ୍ରାମପୁଞ୍ଜରେ ନିର୍ବାଚନକୁ ନେଇ ଓଡ଼ିଶା ଏବଂ ଆନ୍ଧ୍ରପ୍ରଦେଶ ମଧ୍ୟରେ ଚାଲିଥିବା ବିବାଦ ପୁଣିଥରେ ଉଗ୍ରରୂପ ଧାରଣ କରିଛି। ସ୍ଥାନୀୟ ଲୋକଙ୍କ ତୀବ୍ର ବିରୋଧ ପରେ କୋଟିଆକୁ ଆସିଥିବା ଆନ୍ଧ୍ରର ପୁଲିଂ ପାର୍ଟି ଫେରିବାକୁ ବାଧ୍ୟ ହେବା ପରେ, ଏହାକୁ ନେଇ ଦୁଇ ରାଜ୍ୟର ମନ୍ତ୍ରୀଙ୍କ ମଧ୍ୟରେ ତୀକ୍ଷ୍ଣ ବାକ୍ଯୁଦ୍ଧ ଆରମ୍ଭ ହୋଇଯାଇଛି।

ଓଡ଼ିଶା ପ୍ରଶାସନ ବିରୁଦ୍ଧରେ ଆନ୍ଧ୍ର ମନ୍ତ୍ରୀଙ୍କ ସଙ୍ଗୀନ ଅଭିଯୋଗ

କୋଟିଆରେ ପଞ୍ଚାୟତ ଓ ମଣ୍ଡଳ ନିର୍ବାଚନ ପାଇଁ ଆସିଥିବା ପୁଲିଂ ପାର୍ଟି ଫେରିଯିବା ପରେ ଆନ୍ଧ୍ରପ୍ରଦେଶର ଆଦିବାସୀ କଲ୍ୟାଣ ମନ୍ତ୍ରୀ ଗୁମ୍ମଡି ସନ୍ଧ୍ୟାରାଣୀ ଗଣମାଧ୍ୟମ ସମ୍ମୁଖରେ କଡ଼ା ପ୍ରତିକ୍ରିୟା ରଖିଛନ୍ତି। ଓଡ଼ିଶା ସରକାରଙ୍କ ଅଧିକାରୀମାନେ କୋଟିଆର ଆଦିବାସୀଙ୍କ ମୌଳିକ ତଥା ଗଣତାନ୍ତ୍ରିକ ଅଧିକାର ଛଡ଼ାଇ ନେବା ସହ ସେମାନଙ୍କୁ ଆତଙ୍କିତ କରୁଛନ୍ତି ବୋଲି ସେ ଅଭିଯୋଗ ଆଣିଛନ୍ତି।

ମନ୍ତ୍ରୀ ସନ୍ଧ୍ୟାରାଣୀ କହିଛନ୍ତି ଯେ, କୋଟିଆର ୨୯ଟି ଗାଁରେ ବସବାସ କରୁଥିବା ଆଦିବାସୀଙ୍କ ମଧ୍ୟରେ ଓଡ଼ିଶା ପ୍ରଶାସନ ଭୟର ବାତାବରଣ ତିଆରି କରିବା ସହ ନିର୍ବାଚନ ବର୍ଜନ ପାଇଁ ଚାପ ପକାଉଛି। ଭୋଟର ଓ ପ୍ରାର୍ଥୀଙ୍କୁ ଧମକଚମକ ଦେବା ସମ୍ପୂର୍ଣ୍ଣ ଅଗଣତାନ୍ତ୍ରିକ। ଏପରିକି ଆଦିବାସୀ ବାସିନ୍ଦାଙ୍କୁ ଅଟକ ରଖାଯିବା, ଲୁଚାଇ ରଖାଯିବା ଏବଂ ଭୋଟ୍ ଦେବାକୁ ଯାଉଥିବା ସନ୍ଦେହରେ ଗାଡ଼ି ଜବତ କରାଯାଉଥିବା ନେଇ ସେ ଉଦ୍ବେଗ ପ୍ରକାଶ କରିଛନ୍ତି। ସୁପ୍ରିମକୋର୍ଟଙ୍କ ଯଥାସ୍ଥିତି (Status Quo) ବଜାୟ ରଖିବା ନିର୍ଦ୍ଦେଶ ସତ୍ତ୍ୱେ ଓଡ଼ିଶା ଅଧିକାରୀମାନେ ଅଶାନ୍ତି ସୃଷ୍ଟି କରୁଛନ୍ତି ବୋଲି ଦର୍ଶାଇ, ଆନ୍ଧ୍ର ସରକାର ସଦାସର୍ବଦା ଆଦିବାସୀଙ୍କ ସହ ଦୃଢ଼ ଭାବେ ଠିଆ ହୋଇଛି ବୋଲି ସେ ଚେତାବନୀ ଦେଇଛନ୍ତି।

‘ଆନ୍ଧ୍ରର ନିର୍ବାଚନ ପ୍ରହସନ ସଫଳ ହେବାକୁ ଦିଆଯିବନି’: ସୁରେଶ ପୂଜାରୀ

ଆନ୍ଧ୍ର ମନ୍ତ୍ରୀଙ୍କ ଅଭିଯୋଗର କଡ଼ା ପାଲଟା ଜବାବ ଦେଇଛନ୍ତି ଓଡ଼ିଶାର ରାଜସ୍ୱ ମନ୍ତ୍ରୀ ସୁରେଶ ପୂଜାରୀ। କୋଟିଆରେ ଆନ୍ଧ୍ରପ୍ରଦେଶର ନିର୍ବାଚନ ପ୍ରହସନକୁ କୌଣସି ପରିସ୍ଥିତିରେ ବି ସଫଳ ହେବାକୁ ଦିଆଯିବ ନାହିଁ ବୋଲି ଶ୍ରୀ ପୂଜାରୀ ସ୍ପଷ୍ଟ କରିଛନ୍ତି। କୋଟିଆ ପ୍ରସଙ୍ଗରେ ଓଡ଼ିଶାର ସବୁ ରାଜନୈତିକ ଦଳ ଏକଜୁଟ ଥିବା ସେ ପ୍ରକାଶ କରିଛନ୍ତି।

ମନ୍ତ୍ରୀ ଶ୍ରୀ ପୂଜାରୀ କହିଛନ୍ତି ଯେ, ଆଇନ ଉଲ୍ଲଂଘନ କରୁଥିବା ଆନ୍ଧ୍ର ଅଧିକାରୀଙ୍କ ବିରୋଧରେ କୋର୍ଟ ଅବମାନନା ମାମଲା ଦାୟର କରାଯାଇଛି ଏବଂ ଏନେଇ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରାଯିବ। କୋଟିଆରେ ରାସ୍ତାଘାଟ, ସ୍କୁଲ୍ ଏବଂ ସମସ୍ତ ମୌଳିକ ଭିତ୍ତିଭୂମି ଓଡ଼ିଶା ସରକାର ହିଁ ନିର୍ମାଣ କରିଛନ୍ତି। ସେଠାରେ ଓଡ଼ିଶାର କାର୍ଯ୍ୟରତ ସରପଞ୍ଚ ଏବଂ ସମିତି ସଭ୍ୟ ରହିଛନ୍ତି। କୋଟିଆରେ ଆନ୍ଧ୍ରର ଗୋଟିଏ ହେଲେ ପ୍ରଶାସନିକ କାର୍ଯ୍ୟାଳୟ କିମ୍ବା ପୁଲିସ ଚେକ୍ପୋଷ୍ଟ ନାହିଁ। ଗତଥର ଏକ ଚର୍ଚ୍ଚ ଭିତରେ ବେଆଇନ ଭାବେ ପୋଲିଂ ଷ୍ଟେସନ କରି ନିର୍ବାଚନ କରିବାକୁ ଚେଷ୍ଟା କରାଯାଇଥିବା ବେଳେ, ଏଥର କୋଟିଆ ଭିତରେ ଗୋଟିଏ ହେଲେ ବି ପୋଲିଂ ଷ୍ଟେସନ କରିବାକୁ ସୁଯୋଗ ଦିଆଯାଇ ନାହିଁ ବୋଲି ସେ ସ୍ପଷ୍ଟ କରିଛନ୍ତି।

ଆନ୍ଧ୍ରପ୍ରଦେଶରେ ଆଜି ମତଦାନ ଜାରି ରହିଥିବାବେଳେ ଏହାର ପ୍ରଭାବ ଓଡ଼ିଶାର ସୀମାନ୍ତ ଅଞ୍ଚଳରେ ସ୍ପଷ୍ଟ ଭାବେ ଦେଖିବାକୁ ମିଳିଛି। ଓଡ଼ିଶା-ଆନ୍ଧ୍ର ସୀମାନ୍ତର ଦୁଇଟି ଭିନ୍ନ ଜିଲ୍ଲା—ଗଜପତି ଏବଂ କୋରାପୁଟରେ ପ୍ରଶାସନିକ ପ୍ରସ୍ତୁତି ଏବଂ ସ୍ଥାନୀୟ ପରିସ୍ଥିତିକୁ ନେଇ ସମ୍ପୂର୍ଣ୍ଣ ଅଲଗା ଚିତ୍ର ସାମ୍ନାକୁ ଆସିଛି।

ଗଜପତିର ଗଙ୍ଗାବାଡ଼ରେ କଡ଼ା ପ୍ରଶାସନିକ ତତ୍ପରତା

ଆନ୍ଧ୍ର ନିର୍ବାଚନକୁ ଦୃଷ୍ଟିରେ ରଖି ଗଜପତି ଜିଲ୍ଲାର ସୀମାନ୍ତ ଗଙ୍ଗାବାଡ଼ ପଞ୍ଚାୟତରେ ପ୍ରଶାସନିକ କଳ ସମ୍ପୂର୍ଣ୍ଣ ସକ୍ରିୟ ହୋଇଉଠିଛି। ଓଡ଼ିଶାର ୫ଟି ସୀମାନ୍ତ ଗାଁରେ ସ୍ଥିତି ଉପରେ କଡ଼ା ନଜର ରଖିବା ପାଇଁ ପ୍ରଶାସନ ପକ୍ଷରୁ ୫ ଜଣ ବରିଷ୍ଠ ଅଧିକାରୀଙ୍କୁ ଦାୟିତ୍ୱ ଦିଆଯାଇଛି।

ସୀମାନ୍ତ ଅଞ୍ଚଳରେ କୌଣସି ପ୍ରକାର ଅପ୍ରୀତିକର ପରିସ୍ଥିତି କିମ୍ବା ଅନଧିକାର ପ୍ରବେଶକୁ ରୋକିବା ପାଇଁ ଅତିରିକ୍ତ ଜିଲ୍ଲାପାଳ, ଜିଲ୍ଲା ଉନ୍ନୟନ ଅଧିକାରୀ, ଉପଜିଲ୍ଲାପାଳ, ତହସିଲଦାର, ବିଡିଓ ଏବଂ ସ୍ୱତନ୍ତ୍ର ଅଧିକାରୀ ପବନ କୁମାର ପ୍ରମୁଖ ମଇଦାନକୁ ଓହ୍ଲାଇଛନ୍ତି। ଅଧିକାରୀମାନେ ନିଜ ନିଜ ଦାୟିତ୍ୱରେ ଥିବା ଗାଁଗୁଡ଼ିକରେ କ୍ୟାମ୍ପ କରି ସ୍ଥିତି ତଦାରଖ କରୁଛନ୍ତି। ଏହାସହ ଏସ୍ଡିପିଓ ମାଧବାନନ୍ଦ ନାୟକ ଏବଂ ଗାରାବନ୍ଧ ଥାନା ଅଧିକାରୀ ପ୍ରଶାନ୍ତ ନିଶିକାଙ୍କ ତତ୍ତ୍ୱାବଧାନରେ ଦୁଇ ପ୍ଲାଟୁନ୍ ପୁଲିସ ଫୋର୍ସ ମୁତୟନ ହୋଇଛନ୍ତି। ସମସ୍ତ ପ୍ରବେଶ ପଥରେ କଡ଼ା ଯାଞ୍ଚ ସାଙ୍ଗକୁ ନିୟମିତ ପାଟ୍ରୋଲିଂ କରାଯାଉଛି। ପୂର୍ବରୁ ଏହି ଅଞ୍ଚଳରେ ଆନ୍ଧ୍ରର ନିର୍ବାଚନୀ ପ୍ରଚାରକୁ ନେଇ ବିବାଦ ଦେଖାଦେଇଥିବାରୁ, ଆଜି ଓଡ଼ିଶା ସୀମା ମଧ୍ୟରେ କୌଣସି ଚାପ ପ୍ରୟୋଗ ବା ଆଇନଶୃଙ୍ଖଳା ସମସ୍ୟା ନଘଟିବା ପାଇଁ ପ୍ରଶାସନ ସଜାଗ ରହିଛି।

କୋରାପୁଟ କୋଟିଆରେ ଭିନ୍ନ ଓ ଚିନ୍ତାଜନକ ଚିତ୍ର

ଗଜପତିରେ ପ୍ରଶାସନିକ କଟକଣା କଡ଼ା ରହିଥିବାବେଳେ କୋରାପୁଟର କୋଟିଆ ଅଞ୍ଚଳରେ ସମ୍ପୂର୍ଣ୍ଣ ଓଲଟା ଚିତ୍ର ଦେଖିବାକୁ ମିଳିଛି। ଆନ୍ଧ୍ରପ୍ରଦେଶରେ ଭୋଟ୍ ଦେଇ କୋଟିଆ ଅଞ୍ଚଳର ଅନେକ ଭୋଟର ନିଜ ଗାଁକୁ ଫେରୁଥିବା ଦେଖିବାକୁ ମିଳିଛି।

ମିଳିଥିବା ସୂଚନା ଅନୁଯାୟୀ, ଅନେକ ଭୋଟର ରାତିରୁ ହିଁ ଆନ୍ଧ୍ରକୁ ଯାଇ ମତଦାନ କରିଥିବା ବେଳେ ଆଉ କିଛି ଲୋକ ଏବେ ମଧ୍ୟ ସେଠାକୁ ଯାଇ ଭୋଟ୍ ଦେବାକୁ ଉଦ୍ୟମ କରୁଛନ୍ତି। ତେବେ ଆନ୍ଧ୍ରରେ ଭୋଟ୍ ଦେବାକୁ ଯାଉଥିବା ଲୋକଙ୍କୁ ପ୍ରଶାସନ ଅଟକାଇବାରେ ବିଫଳ ହୋଇଥିବା ନେଇ ବ୍ୟାପକ ଅଭିଯୋଗ ହୋଇଛି। ଆନ୍ଧ୍ରରେ ମତଦାନ ସାରି ଫେରୁଥିବା ଭୋଟରଙ୍କୁ ସ୍ଥାନୀୟ ନେତୃତ୍ୱ ଏବଂ କର୍ମୀମାନେ ଘୋର ବିରୋଧ କରିଛନ୍ତି। “ଓଡ଼ିଶାର ସୁବିଧା ସୁଯୋଗ ଉପଭୋଗ କରିବ, ଆଉ ଆନ୍ଧ୍ରରେ ଭୋଟ୍ ଦେବ” ବୋଲି ପ୍ରଶ୍ନ କରି ସ୍ଥାନୀୟ ଲୋକେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଏହି ପରିସ୍ଥିତିକୁ ନେଇ କୋଟିଆରେ ତୀବ୍ର ଉତ୍ତେଜନା ଦେଖାଦେଇଛି।

 ଭୂସ୍ଖଳନରେ ନିଶ୍ଚିହ୍ନ ହୋଇଯାଇଥିବା ଭଞ୍ଜନଗର ବ୍ଲକ୍ ବାଇବାଲି ପଞ୍ଚାୟତ ଗିଡ଼ିପାବାଲିରେ ସୃଷ୍ଟି ହୋଇଛି ନୂଆ ଅନିଶ୍ଚିତତା। ପ୍ରଶାସନିକ ସ୍ତରରେ ସମସ୍ତ ପ୍ରସ୍ତୁତି ଶେଷ ହୋଇଥିଲେ ସୁଦ୍ଧା ଶେଷ ମୁହୂର୍ତ୍ତରେ ୧୧ ଜଣ ନିଖୋଜଙ୍କ ପ୍ରତୀକାତ୍ମକ ସଂସ୍କାର ହୋଇପାରି ନାହିଁ। "ଆମକୁ ଶବ ଦରକାର, ମାଟି ଭିତରୁ ଆମ ଲୋକଙ୍କୁ ବାହାର କର"— ଏଭଳି ଜିଦ୍ ଧରି ପରିବାରବର୍ଗ ଶେଷ ମୁହୂର୍ତ୍ତରେ ନିଷ୍ପତ୍ତି ବଦଳାଇବାରୁ ପ୍ରଶାସନିକ ଅଧିକାରୀ ଓ ଉଦ୍ଧାରକାରୀ ଦଳ ନିରାଶ ହୋଇ ଫେରିଆସିଛନ୍ତି।

ଆଲୋଚନା ଓ ପ୍ରଶାସନିକ ପ୍ରସ୍ତୁତି ସୂଚନାନୁସାରେ, ପ୍ରବଳ ବର୍ଷା ଯୋଗୁଁ ଗିଡ଼ିପାବାଲିରେ ଭୂସ୍ଖଳନ ଘଟି ୧୩ ଜଣ ନିଖୋଜ ହୋଇଯାଇଥିଲେ। ଅଗ୍ନିଶମ ବାହିନୀ, ଏସ୍ଓଜି, ଓଡ୍ରାଫ୍, ଏନ୍ଡିଆର୍ଏଫ୍ ଏବଂ ରେଳବାଇର ୩ଟି ଇଞ୍ଜିନିୟରିଂ ଟିମ୍ ଦ୍ୱାରା ବହୁ କଷ୍ଟରେ ୨ ଜଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ବାକି ୧୧ ଜଣଙ୍କ ପତ୍ତା ମିଳିନଥିଲା। ବର୍ଷା ଓ ପୁନଃ ଭୂସ୍ଖଳନର ଭୟ ଥିବାରୁ ଉଦ୍ଧାର କାର୍ଯ୍ୟକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖିବାକୁ ପ୍ରଶାସନ ନିଷ୍ପତ୍ତି ନେଇଥିଲା।

ଗତକାଲି ଗଞ୍ଜାମ ଓ କନ୍ଧମାଳ ଜିଲ୍ଲାପାଳ କିଲାପଙ୍ଗା ପ୍ରାଥମିକ ବିଦ୍ୟାଳୟ ଆଶ୍ରୟସ୍ଥଳରେ ପହଞ୍ଚି ନିଖୋଜଙ୍କ ପରିବାରବର୍ଗଙ୍କ ସହ ସହାଣୁଭୂତିମୂଳକ ଆଲୋଚନା କରିଥିଲେ। ୧୧ ଜଣଙ୍କ ପ୍ରତୀକାତ୍ମକ ସତ୍କାର ପରେ ସରକାରୀ ନିୟମାନୁଯାୟୀ କ୍ଷତିପୂରଣ ପ୍ରଦାନ ପାଇଁ ପ୍ରତିଶ୍ରୁତି ଦିଆଯିବା ପରେ ପରିବାର ସଦସ୍ୟମାନେ ସମ୍ମତି ପ୍ରକାଶ କରିଥିଲେ।

ଶେଷ ମୁହୂର୍ତ୍ତରେ ବଦଳିଲା ନିଷ୍ପତ୍ତି ପ୍ରଶାସନିକ ସମ୍ମତି ଅନୁଯାୟୀ, ନିଖୋଜମାନଙ୍କ ଫଟୋ ଫ୍ରେମ୍ ପ୍ରସ୍ତୁତ କରାଯାଇଥିଲା। ଘୁ.ଉଦୟଗିରି ତହସିଲଦାର ସମୁଦ୍ର ମିଶ୍ରଙ୍କ ନେତୃତ୍ୱରେ ଉଦ୍ଧାରକାରୀ ଦଳ ଆଜି ସକାଳ ୮ଟାରେ ସତ୍କାର ସାମଗ୍ରୀ ଧରି ଦୁର୍ଗମ ପାହାଡ଼ିଆ ରାସ୍ତାରେ ପ୍ରାୟ ୩ ଘଣ୍ଟା ଚାଲି ଭୂସ୍ଖଳନ ସ୍ଥଳରେ ପହଞ୍ଚିଥିଲେ। ମାତ୍ର ସେଠାରେ ପରିବାରବର୍ଗ ହଠାତ୍ ପ୍ରତୀକାତ୍ମକ ସଂସ୍କାର ପାଇଁ ମନା କରିଦେଇଥିଲେ ଏବଂ ଉଦ୍ଧାର କାର୍ଯ୍ୟ ଜାରି ରଖିବାକୁ ଜିଦ୍ ଧରିଥିଲେ। ପ୍ରଶାସନିକ ବୁଝାସୁଝା ସତ୍ତ୍ୱେ କୌଣସି ସୁଫଳ ନମିଳିବାରୁ ଦଳ ଫେରିଆସିବାକୁ ବାଧ୍ୟ ହୋଇଥିଲା।

୧୧ ନିଖୋଜ ଓ ଭବିଷ୍ୟତ ଅନିଶ୍ଚିତତା ଘଟଣାସ୍ଥଳରୁ ରବି ମଲ୍ଲିକ ଓ ସନମାନ ପ୍ରଧାନଙ୍କ ଶବ ଉଦ୍ଧାର କରାଯାଇ ପୂର୍ବରୁ ଶେଷକୃତ୍ୟ ସମ୍ପନ୍ନ ହୋଇସାରିଛି। ମାତ୍ର ବଳଦେବ ପ୍ରଧାନ, ବିଜୟ ପ୍ରଧାନ, ପ୍ରତାପ ପ୍ରଧାନ, ଜୟନ୍ତୀ ପ୍ରଧାନ, ପଦ୍ମା ପ୍ରଧାନ, ଦୁର୍ଗାସିନୀ ପ୍ରଧାନ, ବିଜୟଲକ୍ଷ୍ମୀ ପ୍ରଧାନ, ରାଜଲକ୍ଷ୍ମୀ ପ୍ରଧାନ, ଚିମ୍ପୁ ପ୍ରଧାନ, ତାରାବତୀ ପ୍ରଧାନ ଏବଂ ସୁମିତ୍ରା ପ୍ରଧାନଙ୍କ ସନ୍ଧାନ ଏପର୍ଯ୍ୟନ୍ତ ମିଳିପାରିନାହିଁ। ପରିବାରଲୋକଙ୍କ ଜିଦ୍ ଏବଂ ପ୍ରତିକୂଳ ପରିବେଶ ମଧ୍ୟରେ ଆଗକୁ ଉଦ୍ଧାର କାର୍ଯ୍ୟ କିପରି ଆଗେଇବ, ସେ ନେଇ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି।

ବ୍ରହ୍ମପୁର: ବାତ୍ୟା ‘ଅର୍ଣ୍ଣବ’ ଏବଂ ପରବର୍ତ୍ତୀ ବନ୍ୟା ଯୋଗୁଁ ଗଞ୍ଜାମ ଜିଲ୍ଲାରେ ହୋଇଥିବା ବ୍ୟାପକ କ୍ଷୟକ୍ଷତିର କ୍ଷେତ୍ରସ୍ତରୀୟ ସମୀକ୍ଷା ଶେଷ କରିଛି ୮ଜଣିଆ ଅନ୍ତଃମନ୍ତ୍ରାଳୟ କେନ୍ଦ୍ରୀୟ ପ୍ରତିନିଧି ଦଳ। କେନ୍ଦ୍ର ଗୃହ ମନ୍ତ୍ରଣାଳୟର ଯୁଗ୍ମ ସଚିବ ରବିଶଙ୍କରଙ୍କ ନେତୃତ୍ୱରେ ଆସିଥିବା ଏହି ଟିମ୍ ଜିଲ୍ଲାର ବିଭିନ୍ନ ବନ୍ୟା ପ୍ରଭାବିତ ଅଞ୍ଚଳ ବୁଲି ଦେଖିବା ସହ କ୍ଷୟକ୍ଷତିର ପୁଙ୍ଖାନୁପୁଙ୍ଖ ଆକଳନ କରିଛି।

କ୍ଷେତ୍ରସ୍ତରୀୟ ଅନୁଧ୍ୟାନ ଓ ପରିଦର୍ଶନ ଗସ୍ତର ପ୍ରଥମ ପର୍ଯ୍ୟାୟରେ କେନ୍ଦ୍ରୀୟ ଟିମ୍ ପୁରୁଷୋତ୍ତମପୁର ବ୍ଲକ୍ର ଆଛୁଲି, ପ୍ରତାପପୁର, ହାଣ୍ଡିଘର ଓ ହନୁମାନପଲ୍ଲୀସ୍ଥିତ ହୀରାଧରବାଟି ଜଳସେଚନ ପ୍ରକଳ୍ପ ପରିଦର୍ଶନ କରିଥିଲେ। ଏହାପରେ ହିଞ୍ଜିଳି ବ୍ଲକ୍ର ଘୋଡ଼ାହାଡ଼ ପୋଲ ଏବଂ ଜୟମଙ୍ଗଳ ଜଳସେଚନ ପ୍ରକଳ୍ପର କ୍ଷତି ଅନୁଧ୍ୟାନ କରିଥିଲେ। ଆସିକାର ଲକ୍ଷ୍ମୀ ବଜାର, ନବରତ୍ନପୁର ଓ ଉପଖଣ୍ଡ ଚିକିତ୍ସାଳୟ ସମେତ ଧରାକୋଟ ବ୍ଲକ୍ର ଜାହାଡ଼ା ଗ୍ରାମ ଓ ଜାନିବିଲି ଆନିକଟ ମଧ୍ୟ ଟିମ୍ ବୁଲି ଦେଖିଥିଲା।

ଅନୁଧ୍ୟାନ ସମୟରେ ଚାଷଜମିରେ ବାଲିଚର ମାଡ଼ିଯିବା, ନଦୀବନ୍ଧ ଓ ଜଳସେଚନ ପ୍ରକଳ୍ପର କ୍ଷତି, ଗ୍ରାମ୍ୟ ରାସ୍ତା, ବିଦ୍ୟୁତ୍ ଭିତ୍ତିଭୂମି, ବାସଗୃହ, ବ୍ୟବସାୟିକ ପ୍ରତିଷ୍ଠାନ ଏବଂ ସ୍ୱାସ୍ଥ୍ୟସେବା ଭିତ୍ତିଭୂମିର କ୍ଷତି ସମ୍ପର୍କରେ ଟିମ୍ ସବିଶେଷ ତଥ୍ୟ ସଂଗ୍ରହ କରିଥିଲା। ଏଥିସହ ବନ୍ୟା ବିପନ୍ନଙ୍କ ସହ ସିଧାସଳଖ ଆଲୋଚନା କରି ସେମାନଙ୍କ ଦୁଃଖସୁଖ ପଚାରି ବୁଝିବା ସହ ନଷ୍ଟ ହୋଇଥିବା ଫସଲର ନମୁନା ସଂଗ୍ରହ କରିଥିଲେ।

ପ୍ରଶାସନିକ ସମୀକ୍ଷା ଓ ପ୍ରାଥମିକ ଆକଳନ କ୍ଷେତ୍ରସ୍ତରକୁ ଯିବାପୂର୍ବେ ଗୋପାଳପୁର ସର୍କିଟ୍ ହାଉସ୍ରେ ଜିଲ୍ଲା ପ୍ରଶାସନ ସହ କେନ୍ଦ୍ରୀୟ ପ୍ରତିନିଧିଦଳର ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ବସିଥିଲା। ଏଥିରେ ଦକ୍ଷିଣାଞ୍ଚଳ ରାଜସ୍ୱ ଆୟୁକ୍ତ (RDC) ବିଜୟ ଅମୃତ କୁଲାଙ୍ଗେ ଏବଂ ଗଞ୍ଜାମ ଜିଲ୍ଲାପାଳ ଭି. କୀର୍ତ୍ତି ଭାସନ ଜିଲ୍ଲାରେ ହୋଇଥିବା କ୍ଷୟକ୍ଷତି ଏବଂ ପୁନରୁଦ୍ଧାର କାର୍ଯ୍ୟର ସ୍ଥିତି ସମ୍ପର୍କରେ ଏକାନ୍ତ ବିବରଣୀ ଉପସ୍ଥାପନ କରିଥିଲେ।

ପ୍ରାଥମିକ ଆକଳନ ଅନୁଯାୟୀ, ବାତ୍ୟା ଓ ବନ୍ୟା ଯୋଗୁଁ ଗଞ୍ଜାମ ଜିଲ୍ଲାରେ ପ୍ରାୟ ୧୦୦୦ କୋଟି ଟଙ୍କାର ସମ୍ପତ୍ତି ନଷ୍ଟ ହୋଇଛି। ଏହି ଗସ୍ତ ସମୟରେ ସମ୍ପୃକ୍ତ ଅଞ୍ଚଳର ଜନପ୍ରତିନିଧି, ଅତିରିକ୍ତ ଜିଲ୍ଲାପାଳ, ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ, ଉପଜିଲ୍ଲାପାଳ, ବିଡିଓ, ତହସିଲଦାର ଏବଂ ବିଭିନ୍ନ ବିଭାଗୀୟ ଅଧିକାରୀ ଉପସ୍ଥିତ ରହି କେନ୍ଦ୍ରୀୟ ଟିମ୍କୁ ସମସ୍ତ ପ୍ରକାର ସହଯୋଗ ଯାଇଥିଲେ।

ଛତ୍ରପୁର: ବାତ୍ୟା ‘ଅର୍ଣ୍ଣବ’ ପରେ ଆସିଥିବା ବନ୍ୟା ଗଞ୍ଜାମ ଜିଲ୍ଲାର ଶିକ୍ଷା ବ୍ୟବସ୍ଥାକୁ ବେଶ୍ ପ୍ରଭାବିତ କରିଛି। ଜିଲ୍ଲାର ୪୯୮ଟି ବିଦ୍ୟାଳୟ ବନ୍ୟାରେ କ୍ଷତିଗ୍ରସ୍ତ ହୋଇଥିବା ପ୍ରାଥମିକ ଆକଳନରୁ ଜଣାପଡ଼ିଛି। ଏଭଳି ସ୍ଥିତିରେ ଛାତ୍ରଛାତ୍ରୀଙ୍କ ସୁରକ୍ଷାକୁ ଗୁରୁତ୍ୱ ଦେଇ ନଭେମ୍ବର ୭ ତାରିଖ ପର୍ଯ୍ୟନ୍ତ ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ବନ୍ଦ ରଖିବାକୁ ପ୍ରଶାସନ ନିଷ୍ପତ୍ତି ନେଇଛି।

ପ୍ରାଥମିକ ରିପୋର୍ଟ ଅନୁଯାୟୀ, ବନ୍ୟା ଯୋଗୁଁ ଜିଲ୍ଲାର ୪୯୮ଟି ଉଚ୍ଚ ପ୍ରାଥମିକ ଓ ଉଚ୍ଚ ବିଦ୍ୟାଳୟରେ କ୍ଷୟକ୍ଷତି ହୋଇଛି। ଏଥିମଧ୍ୟରେ ୧,୦୩୨ଟି ଶ୍ରେଣୀଗୃହ ପ୍ରଭାବିତ ହୋଇଥିବା ବେଳେ ୨୧୫ଟି ସ୍କୁଲର ପାଚେରି ନଷ୍ଟ ହୋଇଛି। ଫଳରେ ଅନେକ ଶିକ୍ଷାନୁଷ୍ଠାନରେ ପାଠପଢ଼ା ପାଇଁ ଅନୁକୂଳ ପରିବେଶ ରହିନାହିଁ।

ମରାମତି ଓ ପୁନରୁଦ୍ଧାର କାମ ଜାରି

ବନ୍ୟା ପାଣି ଛାଡ଼ିବା ପରେ କ୍ଷତିଗ୍ରସ୍ତ ବିଦ୍ୟାଳୟଗୁଡ଼ିକର ସ୍ଥିତି ଯାଞ୍ଚ ସହ ମରାମତି କାର୍ଯ୍ୟ ଆରମ୍ଭ ହୋଇଛି। କେଉଁ ସ୍କୁଲରେ କେତେ କ୍ଷୟକ୍ଷତି ହୋଇଛି, ତାହାର ଆକଳନ କରାଯାଉଛି। ଶ୍ରେଣୀଗୃହ ଓ ପାଚେରିର ମରାମତି ସହ ଅନ୍ୟାନ୍ୟ ଆବଶ୍ୟକ ପୁନରୁଦ୍ଧାର କାମକୁ ମଧ୍ୟ ପ୍ରାଥମିକତା ଦିଆଯାଇଛି।

ବିଦ୍ୟାଳୟ ପରିସରରେ ବନ୍ୟା ପରବର୍ତ୍ତୀ ସ୍ଥିତି ସ୍ୱାଭାବିକ ହୋଇନଥିବାରୁ ପିଲାମାନଙ୍କ ସୁରକ୍ଷା ଦୃଷ୍ଟିରୁ ଛୁଟି ଅବଧି ବଢ଼ାଯାଇଛି। ଏହି ନିଷ୍ପତ୍ତି ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ପାଇଁ ଲାଗୁ ହେବ।

ନଭେମ୍ବର ୯ରୁ ଖୋଲିବ ସ୍କୁଲ

ଗଞ୍ଜାମ ଜିଲ୍ଲାପାଳ ଭି. କୀର୍ତ୍ତି ଭାସନଙ୍କ ସୂଚନା ଅନୁସାରେ, ନଭେମ୍ବର ୮ ତାରିଖ ପର୍ଯ୍ୟନ୍ତ ଛୁଟି ରହିବା ପରେ ନଭେମ୍ବର ୯ ତାରିଖରୁ ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନବାଡ଼ି କେନ୍ଦ୍ର ପୁନର୍ବାର ଖୋଲିବ। ଏହା ପୂର୍ବରୁ କ୍ଷତିଗ୍ରସ୍ତ ଶିକ୍ଷାନୁଷ୍ଠାନର ଆବଶ୍ୟକ ମରାମତି ଓ ସୁରକ୍ଷା ସମ୍ପର୍କିତ କାର୍ଯ୍ୟ ଶେଷ କରିବାକୁ ପ୍ରଶାସନ ଉଦ୍ୟମ ଜାରି ରଖିଛି। ବନ୍ୟା ଯୋଗୁଁ ଶିକ୍ଷାନୁଷ୍ଠାନରେ ହୋଇଥିବା କ୍ଷତି ଶିକ୍ଷାଦାନକୁ ପ୍ରଭାବିତ କରିଥିବା ବେଳେ ପିଲାଙ୍କ ସୁରକ୍ଷା ଓ ପାଠପଢ଼ା ସ୍ୱାଭାବିକ କରିବା ଏବେ ଜିଲ୍ଲା ପ୍ରଶାସନ ପାଇଁ ମୁଖ୍ୟ ଚ୍ୟାଲେଞ୍ଜ ହୋଇଛି।

 ଗଞ୍ଜାମ : ଆସନ୍ତା ନଭେମ୍ବର ୭ ତାରିଖ ଯାଏଁ ଗଞ୍ଜାମ ଜିଲ୍ଲାର ସମସ୍ତ ସ୍କୁଲ ଛୁଟି ଘୋଷଣା କରାଯାଇଛି। ବାତ୍ୟା 'ଅର୍ଣ୍ଣବ' ପରବର୍ତ୍ତୀ ପୁନରୁଦ୍ଧାର ଏବଂ ସଫେଇ କାର୍ଯ୍ୟ ପାଇଁ ଗଞ୍ଜାମ ଜିଲ୍ଲା ଶିକ୍ଷା ଅଧିକାରୀ ଏବଂ ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ଏହି ନିଷ୍ପତ୍ତି ନିଆଯାଇଛି।

ସୂଚନା ଅନୁଯାୟୀ ଜିଲ୍ଲାର ପ୍ରାଥମିକ ଠାରୁ ଆରମ୍ଭ କରି ଉଚ୍ଚ ପର୍ଯ୍ୟନ୍ତ ସମସ୍ତ ସରକାରୀ ଓ ବେସରକାରୀ ବିଦ୍ୟାଳୟ ଏବଂ ଅଙ୍ଗନବାଡ଼ି କେନ୍ଦ୍ରଗୁଡ଼ିକ ବନ୍ଦ ରହିବ। 

ବାତ୍ୟା ଓ ପ୍ରବଳ ବର୍ଷା ଯୋଗୁଁ ଜିଲ୍ଲାର ପ୍ରାୟ ୪୯୮ଟି ସ୍କୁଲ କ୍ଷତିଗ୍ରସ୍ତ ହୋଇଛି। ସେଠାରେ ପୋଷ୍ଟ-ଫ୍ଲଡ୍ କ୍ଲିନିଂ, ସାନିଟାଇଜେସନ ଏବଂ ମରାମତି କାର୍ଯ୍ୟ ଚାଲୁଥିବାରୁ ପିଲାମାନଙ୍କ ସୁରକ୍ଷା ଦୃଷ୍ଟିରୁ ଛୁଟି ଅବଧିକୁ ବଢ଼ାଯାଇଛି। 

ତେବେ ସ୍କୁଲଗୁଡ଼ିକରେ ଛାତ୍ରଛାତ୍ରୀଙ୍କ ପାଇଁ ପାଠପଢ଼ା ବନ୍ଦ ରହିଲେ ମଧ୍ୟ ସମସ୍ତ ଶିକ୍ଷକ ଏବଂ ଅଣ-ଶିକ୍ଷକ କର୍ମଚାରୀମାନେ ନିୟମିତ ଭାବେ ସ୍କୁଲକୁ ଆସି ପୁନରୁଦ୍ଧାର ଓ ନିଜର ଅନ୍ୟାନ୍ୟ ଦାୟିତ୍ୱ ତୁଲାଇବେ। 

ଭୁବନେଶ୍ୱର: ବାତ୍ୟା ‘ଅର୍ଣ୍ଣବ’ ଦ୍ୱାରା କ୍ଷତିଗ୍ରସ୍ତ ପରିବାରଙ୍କୁ ଆର୍ଥିକ ସହାୟତା ଯୋଗାଇଦେବା ପାଇଁ ରାଜ୍ୟ ସରକାର ବଡ଼ ପଦକ୍ଷେପ ନେଇଛନ୍ତି। ପ୍ରଭାବିତ ପରିବାରଙ୍କୁ ନଗଦ ଅନୁଗ୍ରହ ରାଶି ପ୍ରଦାନ ନିମନ୍ତେ ରାଜ୍ୟ ବିପର୍ଯ୍ୟୟ ପ୍ରଶମନ ପାଣ୍ଠି (SDRF)ରୁ ୧୦୭ କୋଟି ୭୦ ଲକ୍ଷ ଟଙ୍କାରୁ ଅଧିକ ଅର୍ଥ ମଞ୍ଜୁର କରାଯାଇଛି। SRCଙ୍କ ପକ୍ଷରୁ ଏହି ଅର୍ଥ ଗଞ୍ଜାମ ଓ କୋରାପୁଟ ଜିଲ୍ଲା ପାଇଁ ଅନୁମୋଦନ କରାଯାଇଛି।

ମଞ୍ଜୁର ହୋଇଥିବା ମୋଟ ଅର୍ଥରୁ ଗଞ୍ଜାମ ଜିଲ୍ଲାକୁ ୧୦୭ କୋଟି ୪୪ ଲକ୍ଷ ୫୫ ହଜାର ଟଙ୍କା ମିଳିଥିବା ବେଳେ କୋରାପୁଟ ଜିଲ୍ଲା ପାଇଁ ୨୬ ଲକ୍ଷ ୨୭ ହଜାର ୫୦୦ ଟଙ୍କା ମଞ୍ଜୁର ହୋଇଛି। ମୁଖ୍ୟମନ୍ତ୍ରୀଙ୍କ ଘୋଷିତ ସ୍ୱତନ୍ତ୍ର ପ୍ୟାକେଜ୍ ଅନୁସାରେ ଏହି ସହାୟତା ରାଶି ବଣ୍ଟନ କରାଯିବ।

ସୂଚନା ଅନୁଯାୟୀ, ଗଞ୍ଜାମ ଜିଲ୍ଲାର ୪ ଲକ୍ଷ ୨୯ ହଜାର ୭୮୨ଟି ପ୍ରଭାବିତ ପରିବାର ଏହି ଯୋଜନାରେ ଲାଭ ପାଇବେ। ପ୍ରତ୍ୟେକ ପରିବାରକୁ ୨,୫୦୦ ଟଙ୍କା ଲେଖାଏଁ ନଗଦ ସହାୟତା ଦିଆଯିବ। ସେହିପରି କୋରାପୁଟ ଜିଲ୍ଲାର ୧,୦୫୧ଟି ପ୍ରଭାବିତ ପରିବାର ମଧ୍ୟ ସମାନ ହାରରେ ଅନୁଗ୍ରହ ରାଶି ପାଇବେ। ଏହି ଅର୍ଥ ଉଭୟ ଜିଲ୍ଲାର ଜିଲ୍ଲାପାଳଙ୍କୁ ହସ୍ତାନ୍ତର କରାଯାଇଛି। ସରକାରୀ ନିୟମ ଓ ନିର୍ଦ୍ଦେଶାବଳୀ ଅନୁସାରେ ଯୋଗ୍ୟ ପରିବାରଙ୍କୁ ଯଥାଶୀଘ୍ର ଅର୍ଥ ପ୍ରଦାନ କରିବାକୁ ପଦକ୍ଷେପ ନିଆଯିବ।

ବାତ୍ୟା ପରବର୍ତ୍ତୀ ସ୍ଥିତିରେ ଅନେକ ପରିବାର ଆର୍ଥିକ ଓ ଜୀବିକାଗତ ସମସ୍ୟାର ସମ୍ମୁଖୀନ ହୋଇଥିବାରୁ ଏହି ସହାୟତା ସେମାନଙ୍କୁ କିଛି ମାତ୍ରାରେ ଆଶ୍ୱସ୍ତି ଦେବ ବୋଲି ଆଶା କରାଯାଉଛି। ବିପର୍ଯ୍ୟୟ ସମୟରେ ପ୍ରଭାବିତ ଲୋକଙ୍କ ନିକଟରେ ତୁରନ୍ତ ଆର୍ଥିକ ସହାୟତା ପହଞ୍ଚାଇବା ଉପରେ ସରକାର ଗୁରୁତ୍ୱ ଦେଇଛନ୍ତି।

Also Read: ଗଞ୍ଜାମରେ ବାତ୍ୟା ଓ ବନ୍ୟାରେ ୫୦୦ କୋଟିର କ୍ଷୟକ୍ଷତି, ସ୍ଥିତି ପରଖିଲା ୮ ଜଣିଆ କେନ୍ଦ୍ରୀୟ ଟିମ୍