ମାଆଙ୍କ ଅନେକ ନାମ। କେହି ଡାକନ୍ତି ଜଗତଜନନୀ, କେହି ମହିଷାସୁରମର୍ଦ୍ଦିନୀ ତ ଆଉ କେହି ଦୁର୍ଗତିନାଶିନୀ। ହେଲେ ମାଆ ଦୁର୍ଗାଙ୍କ ନାମ ପଛରେ ରହିଛି କି ଏକ ପୌରାଣିକ ରହସ୍ୟ? କାହିଁକି ଦେବୀ ଭଗବତୀଙ୍କୁ ଦୁର୍ଗା ବୋଲି କୁହାଯାଏ? ପୁରାଣରେ ବର୍ଣ୍ଣିତ ଏକ କାହାଣୀ ଏହି ପ୍ରଶ୍ନର ଉତ୍ତର ଦେଇଥାଏ।

ପୌରାଣିକ କଥା ଅନୁସାରେ, ଦୁର୍ଗମ ନାମକ ଜଣେ ଅସୁର ନିଜ ତପସ୍ୟା ବଳରେ ବ୍ରହ୍ମାଙ୍କୁ ସନ୍ତୁଷ୍ଟ କରିଥିଲା। ସେ ବର ପ୍ରଭାବରେ ବେଦଗୁଡ଼ିକୁ ନିଜ ଅଧୀନକୁ ନେଇଯିବା ପରେ ଦେବତାମାନଙ୍କ ଶକ୍ତି କ୍ଷୀଣ ହୋଇଯାଇଥିଲା। ଏହାର ଫାଇଦା ଉଠାଇ ଦୁର୍ଗମ ଅସୁର ସ୍ୱର୍ଗ ଉପରେ ଆଧିପତ୍ୟ ବିସ୍ତାର କରିବା ସହ ଦେବତାମାନଙ୍କୁ ନାନା ପ୍ରକାର ଯନ୍ତ୍ରଣା ଦେବାକୁ ଲାଗିଲା।

ଅସୁରର ଅତ୍ୟାଚାରରେ ଦେବଲୋକରେ ହାହାକାର ଖେଳିଗଲା। ଶେଷରେ ଦେବତାମାନେ ଏକାଠି ହୋଇ ଦେବୀ ଭଗବତୀଙ୍କୁ ଆବାହନ କଲେ। ସେମାନଙ୍କ ଦୁଃଖ ଶୁଣି ଦେବୀ ଅସୁରର ବିନାଶ କରିବାକୁ ଆଗେଇ ଆସିଥିଲେ।

ଦେବୀଙ୍କ ଏହି ନିଷ୍ପତ୍ତି ଜାଣିବା ପରେ ଦୁର୍ଗମ ଅସୁର ଆହୁରି ଉଗ୍ର ହୋଇଉଠିଥିଲା। ଏହାପରେ ଦେବୀ ଭଗବତୀ ଉଗ୍ର ରୂପ ଧାରଣ କରି ଅସୁର ସେନା ସହ ଯୁଦ୍ଧ କରିଥିଲେ। ଦୀର୍ଘ ସଂଘର୍ଷ ପରେ ଦେବୀ ଦୁର୍ଗମ ଅସୁରକୁ ବଧ କରିଥିଲେ। ଏହାଦ୍ୱାରା ଦେବତାମାନେ ଅସୁରର ଅତ୍ୟାଚାରରୁ ମୁକ୍ତି ପାଇଥିଲେ ଏବଂ ସୃଷ୍ଟିରେ ପୁଣି ଶାନ୍ତି ଫେରିଥିଲା।

ଏହି ପୌରାଣିକ ଆଖ୍ୟାନ ଅନୁସାରେ, ଦୁର୍ଗମ ଅସୁରର ସଂହାର କରିଥିବାରୁ ଦେବୀ ଭଗବତୀ ‘ଦୁର୍ଗା’ ନାମରେ ପରିଚିତ ହୋଇଥିଲେ। ସେହିପରି ଭକ୍ତଙ୍କ ଦୁର୍ଗତି ଦୂର କରୁଥିବାରୁ ତାଙ୍କୁ ଦୁର୍ଗତିନାଶିନୀ ବୋଲି ମଧ୍ୟ ସମ୍ବୋଧନ କରାଯାଏ।

ମାଆ ଦୁର୍ଗାଙ୍କ ଏହି କାହାଣୀ ଭକ୍ତଙ୍କୁ ଏକ ବିଶେଷ ବାର୍ତ୍ତା ଦିଏ, ଯେତେ ଶକ୍ତିଶାଳୀ ଅନ୍ୟାୟ ହେଉନା କାହିଁକି, ଶେଷରେ ସତ୍ୟ ଓ ନ୍ୟାୟର ହିଁ ବିଜୟ ହୁଏ।

ଆରମ୍ଭ ହୋଇଛି ଶାରଦୀୟ ଦୁର୍ଗାପୂଜାର ମହାପର୍ବ। ମାଆଙ୍କ ଆଗମନରେ ଉତ୍ସବମୁଖର ହୋଇଉଠିଛି ଚାରିଆଡ଼। ଶଙ୍ଖଧ୍ୱନି, ଘଣ୍ଟଘଣ୍ଟା ଓ ମନ୍ତ୍ରୋଚ୍ଚାରଣରେ ପ୍ରକମ୍ପିତ ହେଉଛି ପୂଜାମଣ୍ଡପ। ଭକ୍ତି ଓ ଆସ୍ଥାର ପରିବେଶ ମଧ୍ୟରେ ଆଜି ପାଳନ ହେଉଛି ପବିତ୍ର ମହାଷଷ୍ଠୀ। ମାଆଙ୍କ ଦର୍ଶନ ପାଇଁ ଭକ୍ତଙ୍କ ମନରେ ରହିଛି ଅସୀମ ଉତ୍ସାହ।

ଦୁର୍ଗାପୂଜାରେ ମହାଷଷ୍ଠୀର ରହିଛି ବିଶେଷ ମହତ୍ତ୍ୱ। ଏହି ଦିନରେ ବିଧିବିଧାନ ଅନୁସାରେ ଦେବୀଙ୍କ ବୋଧନ, ଆମନ୍ତ୍ରଣ ଓ ଅଧିବାସ କରାଯାଇଥାଏ। ମାଆଙ୍କୁ ଆବାହନ କରିବା ସହ ପୂଜାର୍ଚ୍ଚନାର ଶୁଭାରମ୍ଭ ହୁଏ। ପରମ୍ପରା ଓ ଧାର୍ମିକ ରୀତିନୀତି ଅନୁସାରେ ମଣ୍ଡପଗୁଡ଼ିକରେ ଚାଲିଛି ପୂଜା ପ୍ରସ୍ତୁତି।

ଏପଟେ ମାଆଙ୍କ ସ୍ୱାଗତ ପାଇଁ ମନୋରମ ରୂପରେ ସଜେଇ ହୋଇଛି ପୂଜାମଣ୍ଡପ। ଆକର୍ଷଣୀୟ ତୋରଣ, ଭବ୍ୟ ସାଜସଜ୍ଜା ଓ ରଙ୍ଗିନ ଆଲୋକମାଳା ମଣ୍ଡପର ସୌନ୍ଦର୍ଯ୍ୟକୁ ବଢ଼ାଇ ଦେଇଛି। ମାଆଙ୍କ ମୃଣ୍ମୟୀ ପ୍ରତିମାର ଦର୍ଶନ ପାଇଁ ଭକ୍ତଙ୍କ ଆଗମନ ଜାରି ରହିଛି। ଧୂପଦୀପର ସୁଗନ୍ଧ ସାଙ୍ଗକୁ ଭଜନକୀର୍ତ୍ତନ ଓ ମନ୍ତ୍ରୋଚ୍ଚାରଣ ପରିବେଶକୁ କରିଛି ଭକ୍ତିମୟ।

ମାଆ ଦୁର୍ଗାଙ୍କ ପୂଜା କେବଳ ଏକ ଧାର୍ମିକ ଉତ୍ସବ ନୁହେଁ, ବରଂ ଏହା ଶକ୍ତି, ସାହସ ଓ ସତ୍ୟର ପ୍ରତୀକ। ଅସତ୍ୟ ଉପରେ ସତ୍ୟର, ଅନ୍ୟାୟ ଉପରେ ନ୍ୟାୟର ବିଜୟର ସନ୍ଦେଶ ଦିଏ ଏହି ପର୍ବ। ମହାଷଷ୍ଠୀରୁ ମାଆଙ୍କ ଆବାହନ ସହ ଆରମ୍ଭ ହୋଇଛି ଆନନ୍ଦ, ଉଲ୍ଲାସ ଓ ଭକ୍ତିର ଏହି ମହାପର୍ବ।

ଭୁବନେଶ୍ୱର: ଶେଷ ହୋଇଛି ଛାତ୍ର ସଂସଦ ନିର୍ବାଚନ । ବିଜୟ ମୁକୁଟ ପିନ୍ଧିଛନ୍ତି ବିଭିନ୍ନ ଛାତ୍ର ଦଳର ଛାତ୍ର ନେତା । ଆଜି ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ । ବିଜୟୀ ପ୍ରାର୍ଥୀମାନେ ଶପଥ ନେବେ । 

ଦୀର୍ଘ ଆଠ ବର୍ଷ ପରେ ଗତକାଲି ଅନୁଷ୍ଠିତ ହୋଇଥିଲା ଛାତ୍ର ସଂସଦ ନିର୍ବାଚନ । ନୂତନ ଛାତ୍ରଛାତ୍ରୀମାନେ ପ୍ରଥମ ଥର ପାଇଁ ନିର୍ବାଚନରେ ଅଂଶ ଗ୍ରହଣ କରୁଥିବାରୁ ବେଶ ଉତ୍ସାହ ଦେଖିବାକୁ ମିଳିଥିଲା । ରାଜ୍ୟର ଅଧିକାଂଶ କଲେଜରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ସମର୍ଥିତ ପ୍ରାର୍ଥୀ ବିଜୟ ହାସଲ କରିଥିବାବେଳେ ବିଜୁ ଛାତ୍ର ଜନତା ଦଳ ମଧ୍ୟ ବିପୁଳ ପରିମାଣରେ ବିଜୟ ହାସଲ କରିଛି । ରାଜ୍ୟର ପ୍ରମୁଖ ବିଶ୍ୱ ବିଦ୍ୟାଳୟରେ ଅତି ରୋମାଞ୍ଚକର ମୁକାବିଲା ଦେଖିବାକୁ ମିଳିଥିଲା । ରେଭେନ୍ସା ଓ ରମାଦେବୀ ବିଶ୍ୱବିଦ୍ୟାଳୟରେ ବିସିଜେଡିର ସଭାପତି ପ୍ରାର୍ଥୀ ବିଶ୍ୱଜିତ ସାହୁ ଓ ସୋନାଲି ବେହେରା ଯଥାକ୍ରମେ ବାଜିମାତ କରିନେଇଛନ୍ତି । 

ଆଗାମୀ ଭବିଷ୍ୟତର ରାଜନେତା ତିଆରି କରୁଥିବା ବାଣୀ ବିହାର ବିଶ୍ୱବିଦ୍ୟାଳୟରେ ଏବିଭିପି ଭୋଟ୍ ପୋଛି ନେଇଛି । ବାଣୀବିହାରରେ ଏବିଭିପି ପ୍ରାର୍ଥୀ ଅଭିରାମ ମିଶ୍ର ଛାତ୍ର ସଂସଦର ସଭାପତି ଭାବେ ନିର୍ବାଚିତ ହୋଇଛନ୍ତି । ସେହିପରି ବ୍ରହ୍ମପୁର ବିଶ୍ଵବିଦ୍ୟାଳୟରେ ଏବିଭିପି ସଭାପତି ପ୍ରାର୍ଥୀ କୀର୍ତ୍ତିବନ୍ତ ରଣା ଓ ସମ୍ପାଦକ ରୋଜାଲିନ ମହାନ୍ତି ବିଜୟୀ ମୁକୁଟ ପିନ୍ଧିଛନ୍ତି ।

ଭୁବନେଶ୍ୱର: ସାଧାରଣ ନିର୍ବାଚନଠାରୁ ବଳି ଯାଇଛି ଛାତ୍ର ସଂସଦ ନିର୍ବାଚନ । ବିଶେଷକରି ରାଜ୍ୟର ଦୁଇ ପ୍ରମୁଖ ବିଶ୍ୱ ବିଦ୍ୟାଳୟ ଉତ୍କଳ ଏବଂ ରମାଦେବୀରେ ରାତି ଅଧ ଯାଏ ହାଇ ଭୋଲଟେଜ୍ ଡ୍ରାମା ଦେଖିବାକୁ ମିଳିଛି । ଶେଷରେ ଅନେକ ତୁମ୍ବି ତୋଫାନରେ ପରେ ବିଳମ୍ବିତ ରାତିରେ ନିର୍ବାଚନ ଫଳାଫଳ ଘୋଷଣା କରାଯାଇଛି । ଉତ୍କଳ ବିଶ୍ୱବିଦ୍ୟାଳୟରେ ସଭାପତି ସହିତ ୯ ଜଣ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ପ୍ରାର୍ଥୀ ବିଜୟ ହାସଲ କରିଛନ୍ତି । ସେହିପରି ରମାଦେବୀ ମହିଳା ବିଶ୍ୱବିଦ୍ୟାଳୟକୁ ପୁଣି ଥରେ ବିଜୁ ଛାତ୍ର ଜନତା ଦଳ ନିଜର ବିଜୟ ପତାକା ଉଡ଼ାଇଛି । ବିସିଜେଡ଼ି ସମର୍ଥିତ ସଭାପତି ପ୍ରାର୍ଥୀ ସୋନାଲୀ ବେହେରା ବିଜୟନୀ ହୋଇଛନ୍ତି ।  

ବାଣୀବିହାରରେ ଏବିଭିପି ପ୍ରାର୍ଥୀ ଅଭିରାମ ମିଶ୍ର ଛାତ୍ର ସଂସଦର ସଭାପତି ଭାବେ ନିର୍ବାଚିତ ହୋଇଛନ୍ତି । ସେହିପରି ଛାତ୍ର କଂଗ୍ରେସର ଉପସଭାପତି ପ୍ରାର୍ଥୀ ପପୁ ରାଉତ, ସାଧାରଣ ସମ୍ପାଦକ ଭାବେ ଏବିଭିପିର ଆୟୁଶ୍ରୀ ପ୍ରଧାନ, ଯୁଗ୍ମ ସାଧାରଣ ସମ୍ପାଦକ ବିସିଜେଡିର ଭାବେ ଜ୍ୟୋତିଶ୍ରୀ ସାହୁ, କଲଚରାଲ୍ କ୍ଲବ୍ ସମ୍ପାଦକ ଭାବେ ଉତ୍ତମ କୁମାର ମାଝୀ ନିର୍ବାଚିତ ହୋଇଛନ୍ତି । ଏହା ସହିତ ଜୀବନଜ୍ୟୋତି ବିଶ୍ଵାଳ ବାଣୀବିକାଶର ସମ୍ପାଦକ ନିର୍ବାଚିତ ହୋଇଛନ୍ତି। ବିଶ୍ୱବିଦ୍ୟାଳୟର ଆଥଲେଟିକ୍ କ୍ଲବ୍ ସମ୍ପାଦକ ଭାବେ ଏବିଭିପିର ଜ୍ଞାନରଞ୍ଜନ ପରିଡ଼ା ଏବଂ ସହକାରୀ ସମ୍ପାଦକ ଭାବେ ସୁସ୍ମିତା ସାହୁ ନିର୍ବାଚିତ ହୋଇଛନ୍ତି।

ମାତ୍ର କେଇଟା ଭୋଟ୍ ପାଇଁ କାହିଁକି ବିଳମ୍ବ ହେଲା ବୋଲି ପ୍ରଶ୍ନ ଉଠିଥିଲା । କିଛି ଛାତ୍ର ନେତାମାନେ ବାଣୀ ବିହାର ସମ୍ମୁଖ ଗେଟ୍ ସାମ୍ନାରେ ଚକା ଜାମ୍ କରିଥିଲେ । ଏପରିକି ସିପି ଏବଂ ଡିସିପି ନିଜେ ପହଁଚି ସେମାନଙ୍କୁ ବୁଝାସୁଝା କରିଥିଲେ । 

ସେପଟେ ରମାଦେବୀ ମହିଳା ବିଶ୍ବବିଦ୍ୟାଳୟରେ ଦିନ ତମାମ ଉତ୍ତେଜନା ଦେଖା ଦେଇଥିଲା । ବିସିଜେଡ଼ିର ଅଧିକାଂଶ ପ୍ରାର୍ଥୀମାନେ ବିଜୟଲାଭ କରିଛନ୍ତି । ବିସିଜେଡି ସମର୍ଥିତ ପ୍ରାର୍ଥୀ ସୋନାଲି ବେହେରା ସଭାପତି ଭାବେ ନିର୍ବାଚିତ ହୋଇଥିବାବେଳେ ଉପସଭାପତି ଭାବେ ସାଇ ଅର୍ପିତା ମହାପାତ୍ର, ଲକ୍ଷ୍ମୀପ୍ରିୟା ବିଶ୍ଵାଳ ସାଧାରଣ ସମ୍ପାଦକ, ସୁଦେଷ୍ଣା ଖୁଣ୍ଟିଆ ଯୁଗ୍ମ ସାଧାରଣ ସମ୍ପାଦକ, ଅଙ୍କିତା ମଲ୍ଲିକ କ୍ରୀଡ଼ା ସମ୍ପାଦକ, ରୂପାଲି ପାଣି ନାଟ୍ୟ ସମ୍ପାଦକ, ପ୍ରୀତିସ୍ମିତା ବାରିକ ସାଇନ୍ସ ସୋସାଇଟି ସମ୍ପାଦକ, ସମୀକ୍ଷା ସୁମନ ଡିଏସଏ ସମ୍ପାଦକ ଭାବେ ନିର୍ବାଚିତ ହୋଇଛନ୍ତି ।

ପ୍ରଥମେ ମତଦାନ ବେଳେ ଅନେକ ତୁମ୍ବି ତୋଫାନ ହୋଇଥିଲା । ବିଜୁ ଛାତ୍ର ଦଳର ରାଜ୍ୟ ସଭାନେତ୍ରୀ ଇପସିତା ସାହୁଙ୍କୁ ପୋଲିସ ଉଠାଇ ନେଇଥିଲା । ଏହାରି ପ୍ରବଳ ଉତ୍ତେଜନା ପ୍ରକାଶ ପାଇଥିଲା । ରାତି ଅଧ ଯାଏଁ ଭୋଟ୍ ଗଣତି ଚାଲିଥିବାରୁ ରମାଦେବୀ ଭିତର ପରିସର ଅପେକ୍ଷା ବାହାରେ ଅଧିକ ଭିଡ଼ ଜମିବା ଆରମ୍ଭ ହୋଇଥିଲା । ଧିରେ ଧିରେ ଉଭୟ ଦଳର ରାଜନେତା ମାନେ ମଧ୍ୟ ଭିଡ଼ ଜମାଇଥିଲେ । ବିଜେଡିର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ସଞ୍ଜୟ ଦାସବର୍ମା, ଭୁବନେଶ୍ବର ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ବିଏମସି ମେୟର ସୁଲୋଚନା ଦାସ । ଏପରିକି ବୋମା ମାଡ଼ରେ ଥରି ଉଠିଥିଲା କ୍ୟାମ୍ପସ୍ । ପୋଲିସ ସ୍ଥିତି ନିୟନ୍ତ୍ରଣ କରିବାକୁ ନାକେଦମ ହୋଇଯାଇଥିଲା । 

ପ୍ରଥମେ ବିସିଜେଡ଼ି ବିଜୟୀ ଲାଭ କରିଥିବା ଦାବି କରିଥିଲା । କିନ୍ତୁ ଆନୁଷ୍ଠାନିକ ଫଳାଫଳ ବାହାରିନଥିଲା । ସେପଟେ ରମାଦେବୀ ମହିଳା ବିଶ୍ୱବିଦ୍ୟାଳୟର ପିଜି କାଉନସିଲ ଅଧ୍ୟକ୍ଷା ପ୍ରଫେସର ମଧୁସ୍ମିତା ପତି ଭିଡିଓ ଜାରି କରି ସୂଚନା ଦେଇଥିଲେ ଭୋଟ୍ ଗଣତି ଅଧାରୁ ବନ୍ଦ ହୋଇଯାଇଛି । ଗୋଟିଏ ଦଳର ଏଜେଣ୍ଟମାନେ ନିଜ ସିଟରୁ ଉଠି ପଳାଇବାକୁ ଭୋଟ୍ ଗଣତି ଅଧାରୁ ବନ୍ଦ ରହିଥିଲା । ପୁନର୍ବାର ଭୋଟ୍ ଗଣତି ଆରମ୍ଭ ହୋଇଥିଲା । ଶେଷରେ ରାତି ପ୍ରାୟ ତିନିଟା ବେଳକୁ ଫଳାଫଳ ଆସିଥିଲା । ବିସିଜେଡ଼ି ପ୍ରାର୍ଥୀ ସୋନାଲି ବେହେରା ବିଜୟ ହାସଲ କରିଛନ୍ତି ବୋଲି ଆନୁଷ୍ଠାନିକ ଘୋଷଣା ହୋଇଥିଲା । 

ଭୁବନେଶ୍ୱର: ବାଦବିବାଦ ଏବଂ ଉତ୍ତେଜନା ମଧ୍ୟରେ ସାରା ରାଜ୍ୟରେ ଶେଷ ହୋଇଛି ଛାତ୍ର ସଂସଦ ନିର୍ବାଚନ। ସନ୍ଧ୍ୟା ସୁଦ୍ଧା ଅଧିକାଂଶ ସ୍ଥାନରେ ଫଳାଫଳ ଘୋଷଣା ସରିଥିଲେ ବି ରାଜଧାନୀର ଦୁଇ ହାଇପ୍ରୋଫାଇଲ୍ ଶିକ୍ଷାନୁଷ୍ଠାନ—ଉତ୍କଳ ବିଶ୍ୱବିଦ୍ୟାଳୟ ଓ ରମାଦେବୀ ମହିଳା ବିଶ୍ୱବିଦ୍ୟାଳୟର ନିର୍ବାଚନ ସାରା ରାଜ୍ୟରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା। ଭୋଟ ଗଣତିରେ ବିଳମ୍ବ, ରାଜପଥ ଅବରୋଧ, ହାତାହାତି ଏବଂ ଭଙ୍ଗାରୁଜା ଭଳି ଘଟଣା ଯୋଗୁଁ କ୍ୟାମ୍ପସ ପରିବେଶ ଅଶାନ୍ତ ହୋଇପଡ଼ିଥିଲା।

ରମାଦେବୀରେ ଲଢ଼େଇ ଆରୋପ-ପ୍ରତ୍ୟାରୋପ; ଭଙ୍ଗାରୁଜା ଓ ଗଣ୍ଡଗୋଳ

ରମାଦେବୀ ମହିଳା ବିଶ୍ୱବିଦ୍ୟାଳୟରେ ଛାତ୍ରୀମାନେ ନିର୍ବାଚନ ମଇଦାନକୁ ଓହ୍ଲାଇଥିଲେ ସୁଦ୍ଧା ଏହା ସିଧାସଳଖ ଶାସକ ଓ ବିରୋଧୀ ଦଳର ପ୍ରତିପତ୍ତି ଲଢ଼େଇରେ ପରିଣତ ହୋଇଥିଲା। ବିଜୁ ଛାତ୍ର ଜନତା ଦଳ (BCJD) ଏବଂ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP) ସମର୍ଥିତ ପ୍ରାର୍ଥୀ ଓ ସେମାନଙ୍କ ସମର୍ଥକଙ୍କ ମଧ୍ୟରେ ହୋଇଥିବା ଛକାପଞ୍ଝା ଯୋଗୁଁ ପରିସ୍ଥିତି ଅଣାୟତ୍ତ ହୋଇଥିଲା।

ଫଳାଫଳକୁ ନେଇ ଗୁଜବ: ସନ୍ଧ୍ୟାରେ ବିସିଜେଡି ପ୍ରାର୍ଥୀ ବିଜୟୀ ହୋଇଥିବା ଖବର ପ୍ରଚାର ହେବା ପରେ କର୍ମୀମାନେ ବିଜୟ ଉତ୍ସବ ମନାଇଥିଲେ। ମାତ୍ର ଫଳାଫଳ ଆନୁଷ୍ଠାନିକ ଭାବେ ଘୋଷଣା ହୋଇନଥିବା ଜଣାପଡ଼ିବା ପରେ ଉତ୍ତେଜନା ପ୍ରକାଶ ପାଇଥିଲା।

ସରକାରୀ ଚାପ ଅଭିଯୋଗ: ବିଜେଡି ସମର୍ଥକଙ୍କ ଅଭିଯୋଗ ଅନୁଯାୟୀ, ସରକାରଙ୍କ ଚାପରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଏବିଭିପି ପ୍ରାର୍ଥୀଙ୍କୁ ଜିତାଇବାକୁ ଉଦ୍ୟମ କରୁଛନ୍ତି।

ହିଂସା ଓ ପୁଲିସ ଛାଉଣି: ଦୁଇ ଦଳର ଛାତ୍ରୀଙ୍କ ମଧ୍ୟରେ ନାରାବାଜି ଓ ହାତାହାତି ହୋଇଥିଲା। ଏହି ସମୟରେ ବିଜେଡି ସମର୍ଥକଙ୍କ ଗାଡ଼ି ଭଙ୍ଗାରୁଜା ହେବା ପରେ ସ୍ଥିତି ନିୟନ୍ତ୍ରଣ ପାଇଁ ବ୍ୟାପକ ପୁଲିସ ମୁତୟନ କରାଯାଇଥିଲା।

ମଧ୍ୟରାତ୍ରିରେ କ୍ୟାମ୍ପସରେ ପହଞ୍ଚିଲେ ବିଜେଡି ନେତା

ରାତି ପ୍ରାୟ ୧୧ଟା ପର୍ଯ୍ୟନ୍ତ ଭୋଟ ଗଣତି ନସରିବାରୁ ବିଜେଡିର ବରିଷ୍ଠ ନେତା ସଞ୍ଜୟ ଦାସବର୍ମା, ବିଧାୟକ ଅନନ୍ତ ନାରାୟଣ ଜେନା, ସୁଶାନ୍ତ କୁମାର ରାଉତ ଏବଂ ଭୁବନେଶ୍ୱର ମେୟର ସୁଲୋଚନା ଦାସ ଘଟଣାସ୍ଥଳରେ ପହଞ୍ଚି ଛାତ୍ରୀମାନଙ୍କ ସହ ଧାରଣାରେ ସାମିଲ ହୋଇଥିଲେ।

ଉତ୍କଳ ବିଶ୍ୱବିଦ୍ୟାଳୟ: ଗଣତି ବିଳମ୍ବକୁ ନେଇ ଜାତୀୟ ରାଜପଥ ଅବରୋଧ

ଅନ୍ୟପଟେ, ଉତ୍କଳ ବିଶ୍ୱବିଦ୍ୟାଳୟରେ ଶାନ୍ତିପୂର୍ଣ୍ଣ ଭାବେ ୨,୬୦୯ ଜଣ ଛାତ୍ରଛାତ୍ରୀ ମତାଧିକାର ସାବ୍ୟସ୍ତ କରିଥିଲେ ସୁଦ୍ଧା ଭୋଟ ଗଣତିରେ ଅହେତୁକ ବିଳମ୍ବ ହୋଇଥିଲା। ରାତି ୧୦ଟା ପର୍ଯ୍ୟନ୍ତ ଗଣତି ନସରିବାରୁ ଛାତ୍ର କଂଗ୍ରେସ ଏବଂ AISFର ସମର୍ଥକମାନେ କୋପରନିକସ୍ ମାର୍ଗ ସମ୍ମୁଖ ଜାତୀୟ ରାଜପଥ ଅବରୋଧ କରିଥିଲେ। ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ବିରୋଧରେ ନାରାବାଜି ହେବା ପରେ ପୁଲିସ ପହଞ୍ଚି ବୁଝାସୁଝା କରି ରାସ୍ତାରୋକ ହଟାଇଥିଲା।

ଭୁବନେଶ୍ୱର:ଓଡ଼ିଶାର ମାନ୍ୟବର ରାଜ୍ୟପାଳ ଡକ୍ଟର ହରିବାବୁ କମ୍ଭମପାଟୀଙ୍କୁ ଲୋକସେବା ଭବନ ପକ୍ଷରୁ ଏକ ଭାବବିହ୍ବଳପୂର୍ଣ୍ଣ ପରିବେଶରେ ବିଦାୟ ସମ୍ବର୍ଦ୍ଧନା ଦିଆଯାଇଛି। ଗୁରୁବାର ଦିନ ଲୋକସେବା ଭବନର ନୂତନ ଅଭିଷେକ ହଲ୍‌ଠାରେ ଆୟୋଜିତ ଏହି ସ୍ୱତନ୍ତ୍ର ଉତ୍ସବରେ ରାଜ୍ୟପାଳଙ୍କ ସହ ପ୍ରଥମ ମହିଳା ଶ୍ରୀମତୀ ଜୟଶ୍ରୀ କମ୍ଭମପାଟୀ ମଧ୍ୟ ଉପସ୍ଥିତ ଥିଲେ। ଏହି ଅବସରରେ ଲୋକସେବା ଭବନର ବରିଷ୍ଠ ଅଧିକାରୀ ଓ କର୍ମଚାରୀମାନେ ରାଜ୍ୟପାଳଙ୍କ କାର୍ଯ୍ୟକାଳକୁ ମନେ ପକାଇ କୃତଜ୍ଞତା ଜଣାଇବା ସହ ତାଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି। ଉପରେ ଦିଆଯାଇଥିବା ଭିଡିଓରେ ଆପଣ ଏହି ସମ୍ବର୍ଦ୍ଧନା କାର୍ଯ୍ୟକ୍ରମର ଦୃଶ୍ୟ ଦେଖିପାରିବେ।

ଓଡ଼ିଶାରେ ବିତାଇଥିବା ସମୟ ଅତ୍ୟନ୍ତ ସ୍ମରଣୀୟ

ବିଦାୟୀ ସମ୍ବର୍ଦ୍ଧନା ସଭାକୁ ସମ୍ବୋଧିତ କରି ରାଜ୍ୟପାଳ ଡକ୍ଟର କମ୍ଭମପାଟୀ ନିଜର ପ୍ରାୟ ୧ ବର୍ଷ ୯ ମାସର କାର୍ଯ୍ୟକାଳ ମଧ୍ୟରେ ସମସ୍ତଙ୍କଠାରୁ ପାଇଥିବା ଅକୁଣ୍ଠ ସହଯୋଗ ଓ ସମନ୍ୱୟ ପାଇଁ ଧନ୍ୟବାଦ ଜଣାଇଛନ୍ତି। ଓଡ଼ିଶାରେ ବିତାଇଥିବା ପ୍ରତ୍ୟେକଟି ମୁହୂର୍ତ୍ତ ତାଙ୍କ ଜୀବନର ଏକ ‘ଅଭୁଲା ସ୍ମୃତି’ ହୋଇ ରହିବ ଏବଂ ଏହା ତାଙ୍କ ହୃଦୟରେ ସଦାସର୍ବଦା ଏକ ସ୍ୱତନ୍ତ୍ର ସ୍ଥାନ ଅଧିକାର କରିବ ବୋଲି ସେ ଆବେଗଭରା କଣ୍ଠରେ ପ୍ରକାଶ କରିଛନ୍ତି। ରାଜଭବନ ତଥା ପ୍ରଶାସନିକ କାର୍ଯ୍ୟକୁ ସୁଚାରୁରୂପେ ପରିଚାଳନା କରିବାରେ କର୍ମଚାରୀମାନଙ୍କ ନିଷ୍ଠାକୁ ସେ ଭୂୟସୀ ପ୍ରଶଂସା କରିଛନ୍ତି।

କର୍ମଚାରୀଙ୍କ ସହ ସୌହାର୍ଦ୍ଦ୍ୟପୂର୍ଣ୍ଣ ସମ୍ପର୍କର ସ୍ମୃତି ଚାରଣ

ଏହି କାର୍ଯ୍ୟକ୍ରମରେ ରାଜ୍ୟପାଳଙ୍କ ସଚିବ ଡକ୍ଟର ରୂପା ରୋଶନ ସାହୁଙ୍କ ସମେତ ଅନ୍ୟାନ୍ୟ ବରିଷ୍ଠ ପଦାଧିକାରୀମାନେ ଉପସ୍ଥିତ ରହି ରାଜ୍ୟପାଳଙ୍କ ମାର୍ଗଦର୍ଶନରେ କାମ କରିବାର ଅଭିଜ୍ଞତା ବାଣ୍ଟିଥିଲେ। ଉପସ୍ଥିତ କର୍ମଚାରୀମାନେ ରାଜ୍ୟପାଳଙ୍କ ସହ ବିତାଇଥିବା ସୌହାର୍ଦ୍ଦ୍ୟପୂର୍ଣ୍ଣ ମୁହୂର୍ତ୍ତଗୁଡ଼ିକୁ ମନେ ପକାଇ ସେମାନଙ୍କର ଗଭୀର ସମ୍ମାନ ଜଣାଇଥିଲେ। ଶେଷରେ ସମଗ୍ର ଲୋକସେବା ଭବନ ପରିବାର ପକ୍ଷରୁ ବିଦାୟୀ ରାଜ୍ୟପାଳ ଦମ୍ପତିଙ୍କୁ ହାର୍ଦ୍ଦିକ ଶୁଭେଚ୍ଛା ସହ ବିଦାୟ ଦିଆଯାଇଥିଲା।

 ଭୁବନେଶ୍ୱର : ଭୁବନେଶ୍ୱରସ୍ଥିତ ରମାଦେବୀ ମହିଳା ବିଶ୍ୱବିଦ୍ୟାଳୟରେ ଛାତ୍ର ସଂସଦ ନିର୍ବାଚନର ଭୋଟ ଗଣତି ଓ ଫଳାଫଳ ଘୋଷଣାକୁ ନେଇ ଦ୍ୱନ୍ଦ୍ୱ ଲାଗିରହିଛି। ବିଶ୍ବବିଦ୍ୟାଳୟ କ୍ଷେତ୍ରୀୟ ପରିସ୍ଥିତି ଏବଂ ବିବାଦ କାରଣରୁ ଏପରି ହୋଇଛି। ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ, କ୍ୟାମ୍ପସରେ ଭୋଟ ଗଣତି ପ୍ରକ୍ରିୟା ଶେଷ ହୋଇନଥିବାରୁ କୌଣସି ଆନୁଷ୍ଠାନିକ ଫଳାଫଳ ପ୍ରକାଶ କରାଯାଇ ନାହିଁ। ଫଳାଫଳ ଘୋଷଣା ବିଳମ୍ବକୁ ନେଇ ପ୍ରତିକ୍ରିୟା ରଖିଲେ ପିଜି କାଉନସିଲ୍ ଅଧ୍ୟକ୍ଷାଙ୍କ ମଧୁସ୍ମିତା ପାଢୀ। ଗଣତି ଜାରି ରଖିବା ପାଇଁ ୩ ସଭାପତି ପ୍ରାର୍ଥୀଙ୍କୁ ଡକାଗଲା। ସଭାପତି ପ୍ରାର୍ଥୀ ନଥିଲେ ଏଜେଣ୍ଟ ପଠାଇବାକୁ ଅନୁରୋଧ କରାଯାଇଛି । 

 ଭୋଟ ଗଣତିରେ ବିଳମ୍ବ ଏବଂ କାର୍ଯ୍ୟାନୁଷ୍ଠାନକୁ ନେଇ ବିଶ୍ୱବିଦ୍ୟାଳୟ ପରିସର ଓ ଗେଟ୍ ବାହାରେ ଛାତ୍ରୀ ଓ ବିଭିନ୍ନ ଛାତ୍ର ସଂଗଠନ (BCJD ଏବଂ ABVP) ମଧ୍ୟରେ ତୀବ୍ର ନାରାବାଜି ସହ ଉତ୍ତେଜନା ପ୍ରକାଶ ପାଇଛି। କ୍ୟାମ୍ପସ ବାହାରେ ଦୁଇ ପକ୍ଷ ମୁହାଁମୁହିଁ ହେବା ସହ ବୋମାମାଡ଼ ଭଳି ଅଭିଯୋଗ ସାମ୍ନାକୁ ଆସିଛି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି ଏବଂ ପୋଲିସ ପକ୍ଷରୁ ଛାତ୍ରୀମାନଙ୍କୁ କ୍ୟାମ୍ପସ ଛାଡ଼ିବାକୁ ନିବେଦନ କରାଯାଇଛି।

ଆଜି ଦିନରେ ବିଶ୍ୱବିଦ୍ୟାଳୟ ସମ୍ମୁଖରେ ଚାଲିଥିବା ଉତ୍ତେଜନା ମଧ୍ୟରେ ଛାତ୍ର ବିଜେଡି (BCJD) ସଭାପତି ଇପ୍ସିତା ସାହୁଙ୍କୁ ପୋଲିସ ଗେଟ୍ ସାମ୍ନାରୁ ଉଠାଇ ନେଇଥିଲା। ପୂର୍ବରୁ ତାଙ୍କ ନାଁରେ ଥିବା ଏକ ଅଭିଯୋଗ ଆଧାରରେ ପୋଲିସ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ଜଣାପଡ଼ିଛି।

 ଅନ୍ୟପଟେ କିଛି ଗୋଷ୍ଠୀ ପକ୍ଷରୁ ଭୋଟ ଗଣତିରେ ଅନିୟମିତତା ଅଭିଯୋଗ ଆଣି ପୁନଃ ନିର୍ବାଚନ କରାଇବା ପାଇଁ ଦାବି ଜୋର ଧରିଛି।

ସରକାରୀ ସ୍ତରରେ କିମ୍ବା ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ପକ୍ଷରୁ ଆନୁଷ୍ଠାନିକ ବିଜ୍ଞପ୍ତି ପ୍ରକାଶ ପାଇବା ପରେ ହିଁ ଚୂଡ଼ାନ୍ତ ଫଳାଫଳ କିମ୍ବା ପରବର୍ତ୍ତୀ ନିଷ୍ପତ୍ତି ସ୍ପଷ୍ଟ ହେବ । 

 ଭୁବନେଶ୍ବର : ରାଜ୍ୟର ଗରିବ ଓ ଅସହାୟ ଶ୍ରେଣୀର ଲୋକଙ୍କ ପାଇଁ 'ଅନ୍ତ୍ୟୋଦୟ ଗୃହ ଯୋଜନା' ର ଅବଧିକୁ ଆଉ ୨ ବର୍ଷ ବୃଦ୍ଧି କରିଛନ୍ତି ସରକାର । ପୂର୍ବରୁ ଏହି ଯୋଜନାର କାର୍ଯ୍ୟକାଳ ୨୦୨୭ ମସିହା ପର୍ଯ୍ୟନ୍ତ ଥିବା ବେଳେ ଏବେ ଏହାକୁ ୨୦୨୯ ମସିହା ପର୍ଯ୍ୟନ୍ତ ବଢ଼ାଇ ଦିଆଯାଇଛି । ସମସ୍ତଙ୍କୁ ପକ୍କା ଘର ଯୋଗାଇଦେବା ଲକ୍ଷ୍ୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜିଏହି ବଡ଼ ଘୋଷଣା କରିଛନ୍ତି । 

 ଏହି ଯୋଜନା ମାଧ୍ୟମରେ ରାଜ୍ୟରେ ଆହୁରି ୨,୯୧,୬ଟି ନୂଆ ପକ୍କା ଘର ନିର୍ମାଣ କରାଯିବ । ଯୋଜନାର ମୋଟ ବ୍ୟୟବରାଦ ୭,୫୫୦ କୋଟି ଟଙ୍କା ଅପରିବର୍ତ୍ତିତ ରହିବ । ପୂର୍ବରୁ ଘର ମରାମତି ପାଇଁ ଉଦ୍ଦିଷ୍ଟ ଥିବା ୩,୫୦୦ କୋଟି ଟଙ୍କାକୁ ଏବେ ସମ୍ପୂର୍ଣ୍ଣ ରୂପେ ନୂଆ ଘର ତିଆରିରେ ବିନିଯୋଗ କରାଯିବ । 

 ଯେଉଁ ହିତାଧିକାରୀମାନେ ନିର୍ଦ୍ଧାରିତ ସମୟ ପୂର୍ବରୁ ନିଜ ଘର କାମ ଶେଷ କରିବେ, ସେମାନଙ୍କ ପାଇଁ ଆର୍ଥିକ ପ୍ରୋତ୍ସାହନ ବୃଦ୍ଧି କରାଯାଇଛି ।୫ ମାସ ମଧ୍ୟରେ ଘର ସମ୍ପୂର୍ଣ୍ଣ କଲେ ପୂର୍ବରୁ ମିଳୁଥିବା ୨୦ ହଜାର ବଦଳରେ ଏବେ ୩୫,୦୦୦ ଟଙ୍କା ମିଳିବ । ୭ ମାସ ମଧ୍ୟରେ କାମ ଶେଷ କଲେ ପୂର୍ବରୁ ମିଳୁଥିବା ୧୦ ହଜାର ବଦଳରେ ଏବେ ୨୦,୦୦୦ ଟଙ୍କାର ପ୍ରୋତ୍ସାହନ ରାଶି ମିଳିବ । 

 ଯେଉଁ ଗରିବ ପରିବାର ପ୍ରଧାନମନ୍ତ୍ରୀ ଆବାସ ଯୋଜନାରୁ ବଞ୍ଚିତ ହୋଇଛନ୍ତି ସେମାନଙ୍କୁ ଏହି ଯୋଜନାରେ ସାମିଲ କରାଯିବ । ଏଥିପାଇଁ ପଞ୍ଚାୟତିରାଜ ଓ ପାନୀୟ ଜଳ ବିଭାଗକୁ ତୁରନ୍ତ ସର୍ଭେ କରି ନୂତନ ହିତାଧିକାରୀ ଚିହ୍ନଟ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।

କଟକ: ଛାତ୍ର ସଂସଦ ନିର୍ବାଚନରେ ବିଭିନ୍ନ ମହାବିଦ୍ୟାଳୟ ଏବଂ ବିଶ୍ୱବିଦ୍ୟାଳୟର ଫଳାଫଳ ଧିରେ ଧିରେ ସ୍ପଷ୍ଟ ହେବାକୁ ଲାଗିଛି । ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ଆଗରେ ରହିଥିବାବେଳେ ବିଜୁ ଛାତ୍ର ଜନତା ଦଳ ଦ୍ୱିତୀୟରେ ରହିଛି । ତେବେ ଛାତ୍ର କଂଗ୍ରେସର ଅତ୍ୟନ୍ତ ଶୋଚନୀୟ ରହିଛି । ବିଶ୍ୱ ବିଦ୍ୟାଳୟ ଫଳାଫଳ ଉପରେ ସମସ୍ତଙ୍କ ନଜର ରହିଛି । 

ରାଜ୍ୟର ଦୁଇଟି ପ୍ରମୁଖ ବିଶ୍ୱ ବିଦ୍ୟାଳୟରେ ବିଜୁ ଛାତ୍ର ଜନତା ଦଳ ବାଜିମାତ କରିଛି । କଟକ ରେଭେନ୍ସା ବିଶ୍ୱ ବିଦ୍ୟାଳୟ ଏବଂ ରମାଦେବୀ ବିଶ୍ୱବିଦ୍ୟାଳୟରେ ବିସିଜେଡିର ସଭାପତି ପ୍ରାର୍ଥୀ ବିଜୟୀଲାଭ କରିଛନ୍ତି । କଟକ ରେଭେନ୍ସା ବିଶ୍ୱ ବିଦ୍ୟାଳୟକୁ ବିସିଜେଡି କବଜା କରିଛି । ବିସିଜେଡି ସଭାପତି ପ୍ରାର୍ଥୀ ବିଶ୍ୱଜିତ ସାହୁ, ଏବିଭିପି ପ୍ରାର୍ଥୀ ଅରବିନ୍ଦ ରଥଙ୍କୁ ପରାସ୍ତ କରିଛନ୍ତି । ସେହିପରି ରମାଦେବୀ ଅନେକ ଆରୋପ ପ୍ରତ୍ୟାରୋପ ପରେ ବିସିଜେଡ଼ି ପ୍ରାର୍ଥୀନୀ ସୋନାଲି ବେହେରା ଶେଷରେ ବିଜୟୀ ହୋଇଛନ୍ତି । ସେ ଏବିଭିପି ପ୍ରାର୍ଥୀଙ୍କୁ ହରାଇଛନ୍ତି । ତେବେ ଆନୁଷ୍ଠାନିକ ଭାବେ କୌଣସି ବିଶ୍ୱବିଦ୍ୟାଳୟ ଫଳାଫଳ ଘୋଷଣା କରିଛନ୍ତି । 

ସେପଟେ ବ୍ରହ୍ମପୁର ବିଶ୍ଵବିଦ୍ୟାଳୟରେ ଏବିଭିପି ପ୍ରାର୍ଥୀ ବିଜୟ ହାସଲ କରିଛନ୍ତି । ଏବିଭିପି ସଭାପତି ପ୍ରାର୍ଥୀ କୀର୍ତ୍ତିବନ୍ତ ରଣା ଓ ସମ୍ପାଦକ ରୋଜାଲିନ ମହାନ୍ତି ବିଜୟୀ ମୁକୁଟ ପିନ୍ଧିଛନ୍ତି । 

କଟକ ଶୈଳବାଳା ମହିଳା ମହାବିଦ୍ୟାଳୟରେ ସ୍ୱାଧୀନ ପ୍ରାର୍ଥୀ ପ୍ରଜ୍ଞା ପରମିତା ନାୟକ ସଭାପତି ପଦରେ ବିଜୟୀ ହୋଇଛନ୍ତି । 

ସେହିପରି ଭୁବନେଶ୍ୱର ବକ୍ସି ଜଗବନ୍ଧୁ ସ୍ୱଂୟଶାସିତ ମହାବିଦ୍ୟାଳୟରେ ଏବିଭିପି ଆସନ ପୋଛି ନେଇଛି । ଆର୍ଯ୍ୟନ ମହାପାତ୍ର ସଭାପତି ଭାବେ ନିର୍ବାଚିତ ହୋଇଛନ୍ତି । ସେହିପରି ରାଜଧାନୀ କଲେଜରେ ଅବିନାଶ ପାଢ଼ୀ ସଭାପତି ଭାବେ ବିଜୟୀ ହୋଇଛନ୍ତି। 

କୋରାପୁଟ ଜିଲ୍ଲା ଜୟପୁରର ସୌରା ସାହି ଛକ ନିକଟରେ ଥିବା ଏକ ଲୁଗା ଦୋକାନରେ ଭୟାବହ ଅଗ୍ନିକାଣ୍ଡ ଘଟିଛି। ଏକ ଲୁଗା ଦୋକାନରେ ନିଆଁ ଲାଗିଯିବାରୁ ଅଞ୍ଚଳରେ ଆତଙ୍କ ଖେଳିଯାଇଛି।

ସୂଚନା ଅନୁଯାୟୀ ଅଗ୍ନିକାଣ୍ଡ ଫଳରେ ଦୋକାନରେ ଥିବା ଲକ୍ଷାଧିକ ଟଙ୍କାର ଲୁଗାପଟା ଏବଂ ଅନ୍ୟାନ୍ୟ ସାମଗ୍ରୀ ସମ୍ପୂର୍ଣ୍ଣ ରୂପେ ଜଳି ପୋଡ଼ି ନଷ୍ଟ ହୋଇଯାଇଛି।ଅଗ୍ନିକାଣ୍ଡ ସମ୍ପର୍କରେ ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁ ଲିଭାଇଥିଲା । ନିଆଁ ଲାଗିବାର ସଠିକ୍ କାରଣ ସ୍ପଷ୍ଟ ଜଣାପଡ଼ି ନଥିଲେ ମଧ୍ୟ ଶର୍ଟ ସର୍କିଟ୍‌ ଯୋଗୁଁ ଏହି ନିଆଁ ଲାଗିଥିବା ଆଶଙ୍କା କରାଯାଉଛି। ଏହି ଅଗ୍ନିକାଣ୍ଡ ଦ୍ୱାରା ବ୍ୟାପକ କ୍ଷୟକ୍ଷତି ଘଟିଛି।