ନୂଆଦିଲ୍ଲୀ: ବଙ୍ଗୋପସାଗରେ ସୃଷ୍ଟ ଘୂର୍ଣ୍ଣିବଳୟ ସମୁଦ୍ର ଭିତରେ ଧିରେ ଧିରେ ଘନୀଭୂତ ହୋଇ ରବିବାର ଭୋରୁ ଏହା ଅବପାତରେ ପରିଣତ ହୋଇଛି । ସମ୍ଭାବ୍ୟ ବାତ୍ୟା 'ଅକ୍ୱନ' ଆସନ୍ତା ୧୯ ତାରିଖ ବେଳକୁ ଅତି ଭୀଷଣ ବାତ୍ୟାରେ ପରିଣତ ହେବା ନେଇ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛନ୍ତି । 

ପାଣିପାଗ ବିଭାଗର ଆକଳନ ଅନୁସାରେ, ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟ ଘୂର୍ଣ୍ଣିବଳୟ ଧିରେ ଧିରେ ଘନୀଭୂତ ହୋଇ ଆଜି ସକାଳ ୫ଟା ୩୦ ମିନିଟରେ ଅବପାତରେ ପରିଣତ ହୋଇଛି। ଅବପାତରୁ ଗଭୀର ଅବପାତ ଏବଂ ୧୬ ତାରିଖ, ଆସନ୍ତାକାଲି ସନ୍ଧ୍ୟା ସୁଦ୍ଧା ଏହା ବାତ୍ୟାର ରୂପ ନେବ । କ୍ରମଶଃ ୧୭ ତାରିଖରେ ଭୀଷଣ ବାତ୍ୟାରେ ପରିଣତ ହେବାର ସମ୍ଭାବନା ରହିଛି । ୧୯ ତାରିଖ ବେଳକୁ ଏହା ଅତି ଭୀଷଣ ବାତ୍ୟା ରୂପ ନେବାର ପୂର୍ବାନୁମାନ କରିଛି ଆଇଏମଡି । 

ଏହି ସମୟରେ ପବନର ବେଗ ଘଣ୍ଟା ପ୍ରତି ୧୨୦ରୁ ୧୩୦ କିଲୋମିଟର ଏବଂ ଝଟ୍‌କା ପବନର ବେଗ ୧୪୫ କିମି ଛୁଇଁବା ନେଇ ଆକଳନ କରାଯାଇଛି । 

ଆଇଏମଡିର ସଦ୍ୟତମ ସୂଚନା ମୁତାବକ, ଗତ ୩ ଘଣ୍ଟାରେ ଅବପାତ ୧୦ କିମି ବେଗରେ ଆଗକୁ ବଢୁଛି । ଗଞ୍ଜାମ ଜିଲ୍ଲା ଗୋପାଳପୁର ବନ୍ଦରଠାରୁ ୧୧୩୦ କିମି ଏବଂ ବିଶାଖାପାଟଣାଠାରୁ ୧୦୧୦ ଦକ୍ଷିଣ-ଦକ୍ଷିଣପୂର୍ବ ଦିଗରେ କେନ୍ଦ୍ରୀଭୂତ ରହିଛି । ସମ୍ଭବତଃ ଏହା ଆନ୍ଧ୍ର ଉପକୂଳ ଛୁଇଁବା ନେଇ ପୂର୍ବରୁ ଆକଳନ କରାଯାଉଥିଲା । କିନ୍ତୁ ଆଇଏମଡିର ତାଜା ରିପୋର୍ଟ ଅନୁସାରେ ଏହା ଦକ୍ଷିଣ ଓଡ଼ିଶାକୁ ମଧ୍ୟ କ୍ଷତି ଗ୍ରସ୍ତ କରିବାର ଯଥେଷ୍ଟ ସମ୍ଭାବନା ରହିଛି । 

ନଭେମ୍ବର ୧୯, ୨୦ ଓ ୨୧ ତାରିଖରେ ଉପକୂଳ ଓଡ଼ିଶାରେ ପ୍ରବଳ ବର୍ଷା ହୋଇପାରେ । ଓଡ଼ିଶାରେ ୧୯ ଓ ୨୦ ତାରିଖରେ ଅତି ପ୍ରବଳ ବର୍ଷା ଏବଂ ଘଣ୍ଟାପ୍ରତି ୫୦-୬୦ କିମି ବେଗରେ ପବନ ସହ ଝଟକା ୭୦ କିମି ପର୍ଯ୍ୟନ୍ତ ହେବାର ଆକଳନ ରହିଛି। 

ଏହା ସହିତ ଏହି ସମୟରେ ସମୁଦ୍ର ଅଶାନ୍ତ ରହିବ । ତେଣୁ ସମୁଦ୍ର ଭିତରେ ଥିବା ମତ୍ସ୍ୟଜୀବୀଙ୍କ କୂଳକୁ ଫେରି ଆସିବାକୁ ପାଣିପାଗ ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି । 

ବଲାଙ୍ଗୀର:  ଜିଲ୍ଲାର ବେଲପଡ଼ା ଥାନା ଅନ୍ତର୍ଗତ ଘାଗୂର୍ଲି ଗାଁରେ ହାତୀ ଆକ୍ରମଣରେ ଜଣେ ବୃଦ୍ଧଙ୍କ ମୃତ୍ୟୁ ଘଟିଛି। ମୃତକ ହେଲେ ଘାଗୂର୍ଲି ଗାଁର ପଙ୍କଜ କାଣ୍ଡ। ଏହି ଘଟଣାକୁ ନେଇ ଗାଁରେ ଶୋକର ଛାୟା ଖେଳିଯାଇଥିବା ବେଳେ ଅଞ୍ଚଳବାସୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି। 

ସୂଚନା ଅନୁସାରେ, ଆଜି ସକାଳେ ପଙ୍କଜ କାଣ୍ଡ ଶୌଚ ପାଇଁ ଗାଁ ନିକଟକୁ ଯାଇଥିବା ସମୟରେ ଏକ ହାତୀ ତାଙ୍କୁ ଆକ୍ରମଣ କରିବା ସହ ଦଳି ଦେଇଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା। ଖବର ପାଇ ପରିବାର ଲୋକେ ବନ ବିଭାଗକୁ ଅବଗତ କରାଇଥିଲେ। ପରେ ବନ ବିଭାଗର କର୍ମଚାରୀ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଘଟଣାର ତଦନ୍ତ ଆରମ୍ଭ କରିଛନ୍ତି। 

ଅନ୍ୟପଟେ ମୃତକଙ୍କ ପରିବାରକୁ ଉଚିତ କ୍ଷତିପୂରଣ ପ୍ରଦାନ ପାଇଁ ଗ୍ରାମବାସୀ ଦାବି କରିଛନ୍ତି। ଗତ କିଛି ଦିନ ହେବ ବେଲପଡ଼ା ଅଞ୍ଚଳରେ ବଣୁଆ ହାତୀଙ୍କ ଉପଦ୍ରବ ବୃଦ୍ଧି ପାଇଥିବାରୁ ଅଞ୍ଚଳବାସୀ ଭୟଭୀତ ଅବସ୍ଥାରେ ରହିଛନ୍ତି। ହାତୀଙ୍କ ଗତିବିଧି ଉପରେ ନଜର ରଖିବା ସହ ଲୋକଙ୍କ ସୁରକ୍ଷା ପାଇଁ ବନ ବିଭାଗ ତୁରନ୍ତ ଆବଶ୍ୟକ ପଦକ୍ଷେପ ନେବାକୁ ଦାବି ହେଉଛି।

ଭଦ୍ରକ: ଭଦ୍ରକ ଜିଲ୍ଲା ଚାନ୍ଦବାଲି ଥାନା ଅନ୍ତର୍ଗତ ମହୁଲିଆ ପଞ୍ଚାୟତ ନିଶ୍ଚିନ୍ତା ଜେନା ସାହିରେ ଏକ ଅଭାବନୀୟ ଘଟଣା ଘଟିଯାଇଛି । ଗତ ଚାରି ଦିନ ହେବା ନିଖୋଜ ଥିବା ପୁଅର ଗଳିତ ମୃତ ଦେହ ଏକ କୂଅରୁ ଉଦ୍ଧାର କରାଯାଇଛି । ମୃତକ ହେଲେ ଗ୍ରାମର ସୁବାଷ ସାହୁଙ୍କ ସାନପୁଅ ପବିତ୍ର ସାହୁ । ଭେଣ୍ଡିଆ ପୁଅର ମୃତ ଦେହକୁ ଦେଖି ମୁଣ୍ଡ ପିଟି ପିଟି କାନ୍ଦୁଛନ୍ତି ବାପା ମାଆ । 

ଖବର ଅନୁଯାୟୀ, ୧୨ ତାରିଖ ରାତିରେ ପବିତ୍ର ବାପାଙ୍କ ସହିତ ଚାନ୍ଦବାଲି କାଳୀପୂଜା ଦେଖିବାକୁ ଯାଇଥିଲେ। ଚାନ୍ଦବାଲିରୁ ରାତିରେ ଫେରିବା ପରେ ଖାଇ ପିଇ ଶୋଇଥିଲେ । ସକାଳୁ ପରିବାର ଲୋକେ ଉଠିବା ପରେ ଘରେ ପୁଅ ନ ଥିଲା । କେଉଁ ଆଡ଼େ ଯାଇଥିବା ଭାବି ଖୋଜା ଖୋଜି କରିଥିଲେ । କିନ୍ତୁ ଦିନ ଗଡ଼ିବା ପରେ ପବିତ୍ରଙ୍କର କୌଣସି ସନ୍ଧାନ ମିଳିନଥିଲା । 

ପରିବାର ପକ୍ଷରୁ ଚାନ୍ଦବାଲି ଥାନାରେ ଏକ ନିଖୋଜ ଅଭିଯୋଗ ମଧ୍ୟ କରାଯାଇଥିଲା । ପୋଲିସ ମଧ୍ୟ ଖୋଜାଖୋଜି ଜାରି ରଖିଥିଲା । ତେବେ ଆଜି ସୁବାଷଙ୍କ ଘର ପଛ ପଟେ ଥିବା କୂଅରୁ ଦୁର୍ଗନ୍ଧ ବାହାରିବାରୁ ସନ୍ଦେହ ହୋଇଥିଲା । ପରେ କୂଅ ଭିତରେ ଜଣଙ୍କ ମୃତ ଦେହ ଭାସୁଥିବାର ଦେଖିଥିଲେ । ଖବର ପାଇ ଚାନ୍ଦବାଲି ଅଗ୍ନିଶମ ବିଭାଗ ଟିମ୍ ଘଟଣା ସ୍ଥଳରେ ପହଁଚି ପବିତ୍ରଙ୍କ ଗଳିତ ମୃତ ଦେହକୁ କୂଅ ଭିତରୁ ଉଦ୍ଧାର କରିଛି । 

ପବିତ୍ର କେମିତି କୂଅରେ ପଡ଼ିଲେ ତାହା ବଡ଼ ପ୍ରଶ୍ନବାଚୀ ସୃଷ୍ଟି କରିଛି । ପବିତ୍ର ଆତ୍ମହତ୍ୟା କରିଛନ୍ତି ନାଁ ଏହା ଏକ ହତ୍ୟା କାଣ୍ଡ କିମ୍ବା ଦୁର୍ଘଟଣା ସେ ନେଇ କିଛି ସ୍ପଷ୍ଟ ହୋଇ ପାରିନାହିଁ । ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ଦେଇଥିବାବେଳେ ପରିବାର ସଦସ୍ୟକୁ ପଚରାଉଚରା ଜାରି ରଖିଛି । ପୋଲିସ ତଦନ୍ତ ପରେ ଘଟଣା ଉପରୁ ପରଦା ଉଠିବ ବୋଲି ଆଶା କରାଯାଉଛି । 

ଜଗତସିଂହପୁର: ତିର୍ତ୍ତୋଲ ବିଧାୟକ ରମାକାନ୍ତ ଭୋଇଙ୍କୁ ଅଶାଳୀନ ବ୍ୟବହାର କରିବା ସହ ବନ୍ଧୁକ ଦେଖାଇ ଜୀବନରୁ ମାରିଦେବାକୁ ଧମକ ଦେବା ଅଭିଯୋଗରେ ପୋଲିସ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି ଘଟଣାରେ ରଘୁନାଥପୁର ପଞ୍ଚାୟତ ସମିତି ଉପାଧ୍ୟକ୍ଷ ତଥା ବ୍ଲକ ବିଜେଡି ସଭାପତି ଦେବାଶିଷ ତ୍ରିପାଠୀଙ୍କ ସମେତ ମୋଟ ୫ ଜଣଙ୍କୁ ରଘୁନାଥପୁର ପୋଲିସ ଗିରଫ କରିଛି।

କ'ଣ ଥିଲା ପୂରା ଘଟଣା? 

ପ୍ରାପ୍ତ ସୂଚନା ଅନୁଯାୟୀ, ଜଗତସିଂହପୁର ଜିଲ୍ଲା ରଘୁନାଥପୁର ବ୍ଲକରେ ଭତ୍ତା ବଣ୍ଟନ କାର୍ଯ୍ୟକ୍ରମ ଚାଲିଥିବା ସମୟରେ ଏହି ଅଭାବନୀୟ ଘଟଣା ଘଟିଥିଲା। ସେଠାରେ ତିର୍ତ୍ତୋଲ ବିଧାୟକ ରମାକାନ୍ତ ଭୋଇଙ୍କୁ ଅଶାଳୀନ ବ୍ୟବହାର ପ୍ରଦର୍ଶନ କରାଯିବା ସହ ବନ୍ଧୁକ ଦେଖାଇ ହତ୍ୟା ଧମକ ଦିଆଯାଇଥିବା ନେଇ ଅଭିଯୋଗ ହୋଇଥିଲା। ଏହି ଅଭିଯୋଗ ଆଧାରରେ ପୋଲିସ ତଦନ୍ତ କରି ମୁଖ୍ୟ ଅଭିଯୁକ୍ତ କୁହାଯାଉଥିବା ବ୍ଲକ ବିଜେଡି ସଭାପତି ଦେବାଶିଷ ତ୍ରିପାଠୀ ଓ ତାଙ୍କର ୪ ଜଣ ସହଯୋଗୀଙ୍କୁ ଗିରଫ କରିଛି।

ଜାମିନ ନାମଞ୍ଜୁର ପରେ ଗଲେ ଆଳିପିଙ୍ଗଳ ଜେଲ୍ 

ଗିରଫ ହେବା ପରେ ଗତକାଲି ପୋଲିସ ପକ୍ଷରୁ ଦେବାଶିଷ ତ୍ରିପାଠୀ ଏବଂ ତାଙ୍କ ସହଯୋଗୀମାନଙ୍କୁ ସ୍ୱାସ୍ଥ୍ୟ ପରୀକ୍ଷା ପାଇଁ ଜଗତସିଂହପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ଏହାପରେ ସେମାନଙ୍କୁ କୋର୍ଟରେ ହାଜର କରାଯାଇଥିଲା। ତେବେ କୋର୍ଟରେ ସେମାନଙ୍କ ଜାମିନ ଆବେଦନ ନାମଞ୍ଜୁର ହୋଇଯିବାରୁ ସମସ୍ତ ୫ ଅଭିଯୁକ୍ତଙ୍କୁ ଆଳିପିଙ୍ଗଳ ଜେଲକୁ ପଠାଇ ଦିଆଯାଇଛି।

ଅନ୍ୟପକ୍ଷରେ, ପୋଲିସର ଏହି କାର୍ଯ୍ୟାନୁଷ୍ଠାନକୁ ବିଜେଡି ପକ୍ଷରୁ ତୀବ୍ର ବିରୋଧ କରାଯାଇଛି। ଗିରଫଦାରୀ ପ୍ରତିବାଦରେ କୋର୍ଟ ପରିସରରେ ବହୁ ସଂଖ୍ୟାରେ ବିଜେଡି ନେତା ଓ କର୍ମୀଙ୍କ ଭିଡ଼ ଜମିଥିବା ଦେଖିବାକୁ ମିଳିଥିଲା।

ଫୁଲବାଣୀ (କନ୍ଧମାଳ): ରାଜ୍ୟର ୭ ଲକ୍ଷ ଯୋଗ୍ୟ ପରିବାରଙ୍କୁ ପକ୍କା ଘର ଯୋଗାଇଦେବା ଲକ୍ଷ୍ୟରେ ଶନିବାର ବଲାଙ୍ଗୀର ଜିଲ୍ଲା ପଥରଚେପା ପଡ଼ିଆରେ ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣ (PMAY-G)ର ରାଜ୍ୟସ୍ତରୀୟ ଶୁଭାରମ୍ଭ ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ରମନ୍ତ୍ରୀ ଶିବରାଜ ସିଂହ ଚୌହାନ ଏହି କାର୍ଯ୍ୟକ୍ରମରେ ଯୋଗଦେଇଥିବା ବେଳେ, ଏହାର ସିଧା ପ୍ରସାରଣ କନ୍ଧମାଳ ଜିଲ୍ଲା ସଦର ମହକୁମା ଫୁଲବାଣୀସ୍ଥିତ ଗାନ୍ଧୀ ସ୍ମୃତି ଭବନଠାରେ ଜିଲ୍ଲା ପ୍ରଶାସନ ପକ୍ଷରୁ କରାଯାଇଥିଲା।

ଜନପ୍ରତିନିଧି ଓ ହିତାଧିକାରୀଙ୍କ ଯୋଗଦାନ 

ପଞ୍ଚାୟତିରାଜ ଓ ପାନୀୟ ଜଳ ବିଭାଗର ନିର୍ଦ୍ଦେଶକ୍ରମେ ଆୟୋଜିତ ଏହି ଜିଲ୍ଲାସ୍ତରୀୟ କାର୍ଯ୍ୟକ୍ରମରେ ବହୁ ସଂଖ୍ୟାରେ ହିତାଧିକାରୀ, ଜନପ୍ରତିନିଧି ଓ ସାଧାରଣ ଲୋକେ ଯୋଗଦେଇ ବଲାଙ୍ଗୀର ମୁଖ୍ୟ ସମାରୋହର ସିଧା ପ୍ରସାରଣ ଦେଖିଥିଲେ। ଏହି କାର୍ଯ୍ୟକ୍ରମରେ ଫୁଲବାଣୀ ବିଧାୟକ ତଥା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ଉମାଚରଣ ମଲ୍ଲିକ, ଜିଲ୍ଲା ପରିଷଦ ଅଧ୍ୟକ୍ଷା ନନ୍ଦିନୀ ମଲ୍ଲିକ, ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ମାନଗୋବିନ୍ଦ ପ୍ରଧାନ, ଜିଲ୍ଲା ପରିଷଦ ଉପାଧ୍ୟକ୍ଷା ସାଧବାଣୀ ନାୟକ, ଫୁଲବାଣୀ ପଞ୍ଚାୟତ ସମିତି ଅଧ୍ୟକ୍ଷା ସସ୍ମିତା କହଁର, ଜି.ଉଦୟଗିରି ପଞ୍ଚାୟତ ସମିତି ଅଧ୍ୟକ୍ଷା ସୁଷମା ପ୍ରଧାନ, ରାଇକିଆ ପଞ୍ଚାୟତ ସମିତି ଅଧ୍ୟକ୍ଷା ରୀନା ପ୍ରଧାନ, ଟିକାବାଲି ପଞ୍ଚାୟତ ସମିତି ଅଧ୍ୟକ୍ଷ ଦିଲୀପ କହଁର ଏବଂ ଜିଲ୍ଲା ପରିଷଦ ସଭ୍ୟା ଅନିତା କହଁର ଓ ନମିତା କହଁର ପ୍ରମୁଖ ଉପସ୍ଥିତ ଥିଲେ।

ଗରିବଙ୍କ କଲ୍ୟାଣ ପାଇଁ ସରକାର ପ୍ରତିବଦ୍ଧ 

ସଭାର ପ୍ରାରମ୍ଭରେ ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ଶମ୍ଭୁନାଥ ନନ୍ଦୀ ସ୍ୱାଗତ ଭାଷଣ ଦେଇଥିଲେ। ଏହି ଅବସରରେ ବିଧାୟକ ଉମାଚରଣ ମଲ୍ଲିକ ଓ ମାନଗୋବିନ୍ଦ ପ୍ରଧାନ ଆବାସ ଯୋଜନାର ଗୁରୁତ୍ୱ ତଥା ଗ୍ରାମାଞ୍ଚଳର ଗରିବ ପରିବାରଙ୍କ ପାଇଁ ଏହାର ଉପାଦେୟତା ସମ୍ପର୍କରେ ଆଲୋକପାତ କରିଥିଲେ। ମୋଦୀ ସରକାର ଗରିବଙ୍କ କଲ୍ୟାଣ ପାଇଁ ଅନେକ ଜନହିତକର ଯୋଜନା କାର୍ଯ୍ୟକାରୀ କରୁଛନ୍ତି ବୋଲି ବିଧାୟକ ଶ୍ରୀ ମଲ୍ଲିକ ମତବ୍ୟକ୍ତ କରିଥିଲେ। ଏଥିସହ ଅନ୍ୟାନ୍ୟ ବକ୍ତାମାନେ ମଧ୍ୟ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ କଲ୍ୟାଣକାରୀ ଯୋଜନା ସମ୍ପର୍କରେ ଲୋକଙ୍କୁ ସୂଚନା ଦେଇଥିଲେ। ଶେଷରେ ଫୁଲବାଣୀ ବିଡିଓ ସୌମ୍ୟ ରଞ୍ଜନ ପାତ୍ର ଧନ୍ୟବାଦ ଅର୍ପଣ କରିଥିଲେ।

ବାଲେଶ୍ୱର: ଦୋକାନରୁ ଚୋରି ସନ୍ଦେହରେ ଜଣେ ୧୪ ବର୍ଷୀୟ ନାବାଳକଙ୍କୁ ନିର୍ମମ ଭାବେ ପିଟିପିଟି ହତ୍ୟା କରାଯାଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ବାଲେଶ୍ୱର ଜିଲ୍ଲା ନୀଳଗିରି ବ୍ଲକ୍ ଅଧୀନ ତେନ୍ତୁଳିଆ ବଜାରରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଅଭିଯୁକ୍ତ ବାପପୁଅଙ୍କୁ ଘଟଣାସ୍ଥଳକୁ ଆଣି ପ୍ରତ୍ୟକ୍ଷ ପ୍ରମାଣ ଦେଖାଇବା ଦାବିରେ ଗ୍ରାମବାସୀ ଶବ ଛାଡ଼ୁନାହାନ୍ତି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ଘଟଣାସ୍ଥଳରେ ୨ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଛି।

କ'ଣ ରହିଛି ଘଟଣା? 

ପ୍ରାପ୍ତ ସୂଚନା ଅନୁଯାୟୀ, ଗତକାଲି ସନ୍ଧ୍ୟାରେ ନୀଳଗିରି ବ୍ଲକ୍ ତଥା ବରହମପୁର ଥାନା ଅଧୀନ ତେନ୍ତୁଳିଆ ପଞ୍ଚାୟତ ନୂଆସାହି ଗ୍ରାମର ରାଧାମୋହନ ବାଗସିଂଙ୍କ ପୁଅ ଦୀନେଶ (୧୪) ତେନ୍ତୁଳିଆ ବଜାରର ମାନସ ବେହେରାଙ୍କ ଦୋକାନକୁ ମୁଢ଼ି କିଣିବାକୁ ଯାଇଥିଲେ। ସେ ଘରେ ଫେରିବାରେ ବିଳମ୍ୱ ହେବାରୁ ପରିବାର ଲୋକେ ଚାରିଆଡ଼େ ଖୋଜାଖୋଜି କରିଥିଲେ କୌଣସି ସନ୍ଧାନ ନ ପାଇବାରୁ ବରହମପୁର ଥାନାରେ ଅଭିଯୋଗ କରିଥିଲେ।

ଆଜି ସକାଳେ ପ୍ରାୟ ସାଢ଼େ ସାତଟା ସମୟରେ ତେନ୍ତୁଳିଆ ବଜାର ମାର୍କେଟ୍ କମ୍ପ୍ଲେକ୍ସ ପଛରେ ଥିବା ଏକ ନିର୍ମାଣାଧୀନ ଘର ଭିତରୁ ନାବାଳକଙ୍କ ମୃତଦେହ ଉଦ୍ଧାର କରାଯାଇଥିଲା। ଏହି ଖବର ପ୍ରଚାରିତ ହେବା କ୍ଷଣି ମୃତକଙ୍କ ପରିବାର ଓ ଶହଶହ ଗ୍ରାମବାସୀ ଘଟଣାସ୍ଥଳରେ ରୁଣ୍ଡ ହୋଇଥିଲେ। ଚୋରି ଅଭିଯୋଗ ଆଣି ଦୋକାନୀ ସନ୍ତୋଷ ବେହେରା ଓ ତାଙ୍କ ପୁଅ ମାନସ ନାବାଳକଙ୍କୁ ନିର୍ମମ ଭାବେ ପିଟିମାରି ଦେଇଥିବା ପରିବାର ପକ୍ଷରୁ ଅଭିଯୋଗ କରାଯାଇଛି।

ପୋଲିସ ଆଗରେ ଅସହାୟ ସ୍ଥିତି

ଧାରଣା ଜାରି ଖବର ପାଇ ବରହମପୁର ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ମାନସ ବେହେରାଙ୍କୁ ଥାନାକୁ ନେଇଥିଲା। ମାତ୍ର ଉତ୍ତ୍ୟକ୍ତ ଲୋକମାନେ ଅଭିଯୁକ୍ତ ବାପପୁଅଙ୍କୁ ଘଟଣାସ୍ଥଳକୁ ଆଣି ହତ୍ୟାକାଣ୍ଡର ଡେମୋ (Demo) ଦେଖାଇବା ପାଇଁ ଜିଦ୍ରେ ଅଟଳ ରହିଥିଲେ। ଉତ୍ତ୍ୟକ୍ତ ଲୋକେ ମାନସଙ୍କ ଦୋକାନକୁ ଭଙ୍ଗି ସମସ୍ତ ସାମଗ୍ରୀ ଲୁଟି ନେଇଥିବା ଦେଖିବାକୁ ମିଳିଛି।

ଘଟଣାସ୍ଥଳରେ ବରହମପୁର ଆଇଆଇସି ଜନ୍ ପଟ୍ଟନାୟକ, ରେମୁଣା ଆଇଆଇସି ବିମଳ ନାୟକ ଏବଂ ମାଜିଷ୍ଟ୍ରେଟ୍ ଭାବେ ନୀଳଗିରି ତହସିଲଦାର ଶୁଭଶ୍ରୀ ଜେନା ପ୍ରମୁଖ ପହଞ୍ଚି ଲୋକଙ୍କୁ ବୁଝାସୁଝା କରୁଛନ୍ତି। ମାତ୍ର ଦୀର୍ଘ ସମୟ ଧରି ବୁଝାସୁଝା ଚାଲିଥିଲେ ମଧ୍ୟ ରାତିସୁଦ୍ଧା ଉତ୍ତ୍ୟକ୍ତ ଲୋକେ ଶବ ବ୍ୟବଚ୍ଛେଦ ପାଇଁ ଛାଡ଼ିବାକୁ ରାଜି ହୋଇନାହାନ୍ତି। ନ୍ୟାୟ ଦାବିରେ ଗ୍ରାମବାସୀଙ୍କ ଜିଦ୍ ଜାରି ରହିଥିବାବେଳେ ପୋଲିସ ପ୍ରଶାସନ ସ୍ଥିତି ନିୟନ୍ତ୍ରଣ ପାଇଁ ଉଦ୍ୟମ ଜାରି ରଖିଛି।

ଭୁବନେଶ୍ୱର: ଓଡ଼ିଶା ପାଇଁ ଖୁସି ଖବର। ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣ (PMAY-G) ଅଧୀନରେ ରାଜ୍ୟକୁ ମିଳିବ ଆଉ ଅଧିକ ଘର। ୪ ଲକ୍ଷ ନୁହେଁ, ଓଡ଼ିଶା ପାଇଁ ୫ ଲକ୍ଷ ଘର ମଞ୍ଜୁରି କରାଯିବ ବୋଲି ବଡ଼ ଘୋଷଣା କରିଛନ୍ତି କେନ୍ଦ୍ର ଗ୍ରାମୀଣ ବିକାଶ ମନ୍ତ୍ରୀ ଶିବରାଜ ସିଂହ ଚୌହାନ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୪ ଲକ୍ଷ ଘର ଓଡ଼ିଶା ପାଇଁ ଯଥେଷ୍ଟ ହେବ ନାହିଁ ବୋଲି ମତ ରଖିବା ପରେ ଏହି ସଂଖ୍ୟା ବୃଦ୍ଧି କରି ୫ ଲକ୍ଷ ଘର ମଞ୍ଜୁରି ପାଇଁ ନିଷ୍ପତ୍ତି ନିଆଯାଇଥିବା କହିଛନ୍ତି କେନ୍ଦ୍ରମନ୍ତ୍ରୀ।

କଚ୍ଚା ଘରେ ରହିବେନି ଗରିବ ପରିବାର

ଓଡ଼ିଶାର କୌଣସି ଗରିବ ପରିବାର ଯେପରି କଚ୍ଚା ଘରେ ରହିବାକୁ ବାଧ୍ୟ ନ ହୁଅନ୍ତି, ସେଥିପାଇଁ ସରକାର ପ୍ରତିବଦ୍ଧ। ପ୍ରତ୍ୟେକ ଯୋଗ୍ୟ ପରିବାରକୁ ପକ୍କା ଘର ଯୋଗାଇଦେବା ହେଉଛି ସରକାରଙ୍କ ଲକ୍ଷ୍ୟ ବୋଲି ଶିବରାଜ ସିଂହ ଚୌହାନ କହିଛନ୍ତି।

ପୂର୍ବ ସରକାରଙ୍କ ଉପରେ ଅନିୟମିତତା ଅଭିଯୋଗ

ଏହି ଅବସରରେ ପୂର୍ବ ବିଜେଡି ସରକାରକୁ ମଧ୍ୟ ଟାର୍ଗେଟ କରିଛନ୍ତି କେନ୍ଦ୍ରମନ୍ତ୍ରୀ। ଆବାସ ଯୋଜନାରେ ଅନିୟମିତତା ହୋଇଥିବା ଅଭିଯୋଗ କରି ସେ କହିଛନ୍ତି, ପୂର୍ବରୁ ପକ୍କା ଘର ଥିବା କେତେକ ବ୍ୟକ୍ତିଙ୍କ ନାମ ମଧ୍ୟ ହିତାଧିକାରୀ ତାଲିକାରେ ସାମିଲ ହୋଇଥିଲା। ଅନ୍ୟପଟେ ଅନେକ ପ୍ରକୃତ ଯୋଗ୍ୟ ଗରିବ ପରିବାର ଯୋଜନାର ସୁବିଧାରୁ ବଞ୍ଚିତ ହୋଇଥିଲେ।

ଯୋଗ୍ୟ ପରିବାରଙ୍କୁ ମିଳିବ ପକ୍କା ଘର

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଏବଂ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ସହଯୋଗରେ ଓଡ଼ିଶାର ସମସ୍ତ ଯୋଗ୍ୟ ଗରିବ ପରିବାରଙ୍କୁ ପକ୍କା ଘର ନିର୍ମାଣ ପାଇଁ ଅର୍ଥ ଯୋଗାଇ ଦିଆଯିବ ବୋଲି ଆଶ୍ୱାସନା ଦେଇଛନ୍ତି କେନ୍ଦ୍ରମନ୍ତ୍ରୀ।

ତେବେ ଏବେ ସମସ୍ତଙ୍କ ନଜର ୫ ଲକ୍ଷ ଘରର ମଞ୍ଜୁରି ପ୍ରକ୍ରିୟା, ହିତାଧିକାରୀ ଚୟନ ଏବଂ ଅର୍ଥ ପ୍ରଦାନ ଉପରେ। ଘୋଷଣାର ଲାଭ ପ୍ରକୃତ ଗରିବ ଓ ଯୋଗ୍ୟ ପରିବାରଙ୍କ ପାଖରେ କେବେ ପହଞ୍ଚୁଛି, ତାହା ଉପରେ ରହିଛି ରାଜ୍ୟବାସୀଙ୍କ ନଜର।

ନୂଆଦିଲ୍ଲୀ: ଦିଲ୍ଲୀର ଭାରତ ମଣ୍ଡପମ୍‌ରେ ଆରମ୍ଭ ହୋଇଛି ୪୫ତମ ଇଣ୍ଡିଆ ଇଣ୍ଟରନ୍ୟାସନାଲ ଟ୍ରେଡ୍ ଫେୟାର (IITF) ୨୦୨୬। ଏହି ଆନ୍ତର୍ଜାତୀୟ ବାଣିଜ୍ୟ ମେଳାରେ ଓଡ଼ିଶା ପାଭିଲିୟନ୍ ପାଲଟିଛି ପ୍ରମୁଖ ଆକର୍ଷଣ। ଓଡ଼ିଶାର ସମୃଦ୍ଧ ଐତିହ୍ୟ, ହସ୍ତତନ୍ତ, ହସ୍ତଶିଳ୍ପ, ଆଦିବାସୀ କଳା ଓ ଆଧୁନିକ ଆର୍ଥିକ ସମ୍ଭାବନାକୁ ଗୋଟିଏ ଛାତ ତଳେ ପ୍ରଦର୍ଶିତ କରିଛି ଏହି ପାଭିଲିୟନ୍।

ନଭେମ୍ବର ୧୪, ୨୦୨୬ରେ ଓଡ଼ିଶାର ମୁଖ୍ୟ ଶାସନ ସଚିବ ଅନୁ ଗର୍ଗ ଏହି ପାଭିଲିୟନ୍‌ର ଉଦ୍‌ଘାଟନ କରିଛନ୍ତି। ଚଳିତ ବର୍ଷର ମେଳାର ଥିମ୍ ‘ବିକାଶ ଔର ବିରାସତ’କୁ ଆଧାର କରି ଓଡ଼ିଶା ପାଭିଲିୟନ୍‌ର ମୁଖ୍ୟ ବାର୍ତ୍ତା ରହିଛି ‘Where Virasat Inspires Vikas’ ଅର୍ଥାତ୍ ଐତିହ୍ୟରୁ ପ୍ରେରଣା ନେଇ ବିକାଶ ଆଡ଼କୁ ଅଗ୍ରସର ଓଡ଼ିଶା।

ହସ୍ତତନ୍ତ ଓ ହସ୍ତଶିଳ୍ପର ମନମୁଗ୍ଧକର ପ୍ରଦର୍ଶନ

ପାଭିଲିୟନ୍‌ର ହଲ୍‌-୩ରେ ଓଡ଼ିଶାର ପ୍ରସିଦ୍ଧ ସମ୍ବଲପୁରୀ ବସ୍ତ୍ର, ପଟ୍ଟଚିତ୍ର, ରୁପା ତାରକସି କାମ, ଢୋକ୍ରା ଶିଳ୍ପ ସହ ପଥର ଓ କାଠ ଖୋଦେଇ କଳାର ଅପୂର୍ବ ନମୁନା ପ୍ରଦର୍ଶିତ ହୋଇଛି। ଦର୍ଶକମାନେ କେବଳ ଏହି କଳାକୃତିକୁ ଦେଖିବାର ସୁଯୋଗ ପାଉନାହାନ୍ତି, ବରଂ କାରିଗରଙ୍କ ହାତରେ ଏହା କିପରି ଆକାର ନେଉଛି, ତାହା ମଧ୍ୟ ଦେଖିପାରୁଛନ୍ତି।

ପରମ୍ପରା ସହ ଟେକ୍ନୋଲୋଜିର ନୂଆ ମିଶ୍ରଣ

ଏଥରର ପାଭିଲିୟନ୍‌ର ଅନ୍ୟତମ ଆକର୍ଷଣ ହେଉଛି ପାରମ୍ପରିକ ହସ୍ତତନ୍ତ ସହ ଆଧୁନିକ ଟେକ୍ନୋଲୋଜିର ସମନ୍ୱୟ। ବ୍ଲକଚେନ୍ ଆଧାରିତ ହସ୍ତତନ୍ତ ବୁଣାକାମର ପ୍ରଦର୍ଶନ ଦର୍ଶକଙ୍କ ମଧ୍ୟରେ ବିଶେଷ ଆଗ୍ରହ ସୃଷ୍ଟି କରୁଛି। ଏହା ଓଡ଼ିଶାର ପାରମ୍ପରିକ କଳାକୁ ନୂଆ ପରିଚୟ ଦେବା ସହ ଆଧୁନିକ ବଜାର ସହ ଯୋଡ଼ିବାର ଏକ ପ୍ରୟାସ।

ମହିଳା SHG ଓ ଗ୍ରାମୀଣ ଉଦ୍ୟୋଗୀଙ୍କୁ ମିଳୁଛି ମଞ୍ଚ

ମିଶନ ଶକ୍ତି ଓ ORMAS ପକ୍ଷରୁ ମହିଳା ସ୍ୱୟଂ ସହାୟକ ଗୋଷ୍ଠୀ (SHG) ଏବଂ ଗ୍ରାମୀଣ ଉଦ୍ୟୋଗୀଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ସାମଗ୍ରୀ ପ୍ରଦର୍ଶିତ ହୋଇଛି। ସବାଇ ଘାସ ଓ ସୁବର୍ଣ୍ଣ ଘାସର ହସ୍ତଶିଳ୍ପ, ଜୈବିକ ମସଲା, ମହୁଲ ଜାତୀୟ ଉତ୍ପାଦ ଓ ମାଣ୍ଡିଆରୁ ପ୍ରସ୍ତୁତ ସୁସ୍ୱାଦୁ ଖାଦ୍ୟ ସାମଗ୍ରୀ ଦର୍ଶକଙ୍କ ଆକର୍ଷଣ ପାଲଟିଛି। ଏହା ମହିଳାଙ୍କ ଆର୍ଥିକ ସଶକ୍ତୀକରଣ ଓ ଗ୍ରାମୀଣ ଉଦ୍ୟୋଗକୁ ଆଗକୁ ନେବାର ଏକ ବଡ଼ ପ୍ରୟାସ।

ଆଦିବାସୀ କଳା ଓ ଓଡ଼ିଶାର ଜୈବିକ ସମ୍ପଦର ଝଲକ

ଓଡ଼ିଶାର ଆଦିବାସୀ ପରମ୍ପରା ଓ ପ୍ରାକୃତିକ ସମ୍ପଦକୁ ମଧ୍ୟ ଏଠାରେ ବିଶେଷ ସ୍ଥାନ ଦିଆଯାଇଛି। ଗୋଣ୍ଡ ଓ ଲାଞ୍ଜିଆ ସୌରା ଚିତ୍ରକଳା, ଡଙ୍ଗରିଆ କନ୍ଧଙ୍କ ପାରମ୍ପରିକ ଶାଲ୍, କୋରାପୁଟ କଫି, କଳା ଚାଉଳ ଏବଂ କନ୍ଧମାଳ ହଳଦୀ ଭଳି ସ୍ୱତନ୍ତ୍ର ଉତ୍ପାଦ ଓଡ଼ିଶାର ପରିଚୟକୁ ଜାତୀୟ ଓ ଆନ୍ତର୍ଜାତୀୟ ସ୍ତରରେ ଆହୁରି ମଜବୁତ କରୁଛି।

ପର୍ଯ୍ୟଟନରୁ ବାଣିଜ୍ୟ, ନିବେଶ ପର୍ଯ୍ୟନ୍ତ ଓଡ଼ିଶାର ନୂଆ ଦିଗ

ଓଡ଼ିଶା ପର୍ଯ୍ୟଟନ ବିଭାଗ ପକ୍ଷରୁ କୋଣାର୍କ ସୂର୍ଯ୍ୟମନ୍ଦିର, ଶ୍ରୀଜଗନ୍ନାଥ ଧାମ ପୁରୀ ଓ ଚିଲିକା ଭଳି ପ୍ରସିଦ୍ଧ ପର୍ଯ୍ୟଟନସ୍ଥଳୀର ପ୍ରଚାର କରାଯାଉଛି। ଏହା ସହ ବିଭିନ୍ନ B2B ପ୍ଲାଟଫର୍ମ ମାଧ୍ୟମରେ ରପ୍ତାନି ବଜାର ସହ ସଂଯୋଗ ଏବଂ ନିବେଶକଙ୍କ ସହ ଭାଗିଦାରୀ ସୃଷ୍ଟି ଉପରେ ଗୁରୁତ୍ୱ ଦିଆଯାଉଛି।

ନଭେମ୍ବର ୨୭ ପର୍ଯ୍ୟନ୍ତ ଚାଲିବ ମେଳା

ନଭେମ୍ବର ୧୪ରୁ ୨୭, ୨୦୨୬ ପର୍ଯ୍ୟନ୍ତ ଚାଲିବ ଏହି ଆନ୍ତର୍ଜାତୀୟ ବାଣିଜ୍ୟ ମେଳା। ଏହି ମଞ୍ଚରେ ଓଡ଼ିଶା ନିଜର ପ୍ରାଚୀନ ଐତିହ୍ୟ, ସମୃଦ୍ଧ ସଂସ୍କୃତି ଓ ଆଧୁନିକ ବିକାଶର ଚିତ୍ରକୁ ବିଶ୍ୱ ଦରବାରରେ ଉପସ୍ଥାପନ କରୁଛି। ପରମ୍ପରାକୁ ପାଥେୟ କରି ଆଧୁନିକତା ଆଡ଼କୁ ଓଡ଼ିଶାର ଏହି ଯାତ୍ରା କେବଳ ରାଜ୍ୟର କଳା ଓ ସଂସ୍କୃତିକୁ ପ୍ରଚାର କରୁନାହିଁ, ବରଂ ମହିଳା ଉଦ୍ୟୋଗୀ, କାରିଗର, କୃଷକ ଓ ଗ୍ରାମୀଣ ଉତ୍ପାଦକଙ୍କ ପାଇଁ ନୂଆ ବଜାର ଓ ସୁଯୋଗର ଦ୍ୱାର ଖୋଲିବାର ଆଶା ସୃଷ୍ଟି କରୁଛି।

 ଭୁବନେଶ୍ୱର : ବଙ୍ଗୋପସାଗରରେ ସମ୍ଭାବ୍ୟ ବାତ୍ୟା ଏବଂ ଅଶାନ୍ତ ସମୁଦ୍ରକୁ ଦୃଷ୍ଟିରେ ରଖି ସ୍ୱତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟ ପକ୍ଷରୁ ସତର୍କ ସୂଚନା ଜାରି କରାଯାଇଛି। ଧୀରେ ଧୀରେ ଶକ୍ତିଶାଳୀ ହେବାରେ ଲାଗିଛି ଲଘୁଚାପ।ଆସନ୍ତା ନଭେମ୍ବର ୧୬ ତାରିଖରେ ଏହା ବାତ୍ୟାର ରୂପ ନେବା ସହ ୧୮ ତାରିଖ ସୁଦ୍ଧା ଭୀଷଣ ବାତ୍ୟାରେ ପରିଣତ ହେବାର ସମ୍ଭାବନା ରହିଛି।

ନଭେମ୍ବର ୧୭ରୁ ୨୦ ତାରିଖ ପର୍ଯ୍ୟନ୍ତ ଦକ୍ଷିଣ ଓଡ଼ିଶା ଉପକୂଳ ଓ ଗଭୀର ସମୁଦ୍ର ଭିତରକୁ ନ ଯିବା ପାଇଁ ମତ୍ସ୍ୟଜୀବୀମାନଙ୍କୁ କଡ଼ା ବାରଣ କରାଯାଇଛି। ଯେଉଁ ମତ୍ସ୍ୟଜୀବୀମାନେ ଗଭୀର ସମୁଦ୍ରରେ ଅଛନ୍ତି, ସେମାନଙ୍କୁ ନଭେମ୍ବର ୧୫ ତାରିଖ ସୁଦ୍ଧା କୂଳକୁ ଫେରି ଆସିବାକୁ ପରାମର୍ଶ ଦିଆଯାଇଛି। ନଭେମ୍ବର ୧୭ ଓ ୧୮ ତାରିଖରେ ଦକ୍ଷିଣ ଓଡ଼ିଶା ଉପକୂଳରେ ଘଣ୍ଟାପ୍ରତି ୪୫ରୁ ୫୫ କିଲୋମିଟର ବେଗରେ ପବନ ବହିବା ସହ ଝଟ୍‌କା ପବନର ବେଗ ୬୫ କିଲୋମିଟର ପର୍ଯ୍ୟନ୍ତ ରହିପାରେ। ଏହି ସମୟରେ ସମୁଦ୍ର ଅତ୍ୟନ୍ତ ଅଶାନ୍ତ ରହିବ।

ପାଣିପାଗ ବିଭାଗ ଆକଳନ ଅନୁଯାୟୀ, ନଭେମ୍ବର ୧୮ରୁ ୨୦ ତାରିଖ ମଧ୍ୟରେ ଓଡ଼ିଶାର ବିଭିନ୍ନ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ସହ ବଜ୍ରପାତ ଓ ଝଡ଼ତୋଫାନ ହେବାର ସମ୍ଭାବନା ରହିଛି। ଉପକୂଳବର୍ତ୍ତୀ ଏବଂ ଦକ୍ଷିଣ ଓଡ଼ିଶାର ଜିଲ୍ଲାପାଳମାନଙ୍କୁ ପରିସ୍ଥିତି ଉପରେ ତୀକ୍ଷ୍ଣ ନଜର ରଖିବା, ବାତ୍ୟା ଆଶ୍ରୟସ୍ଥଳୀ ପ୍ରସ୍ତୁତ ରଖିବା ଏବଂ ଜରୁରୀକାଳୀନ ଟିମ୍‌କୁ ସଜାଗ ରଖିବାକୁ ନିର୍ଦ୍ଦେଶ ଦିଆଯାଇଛି।

ଭୁବନେଶ୍ୱର: ବଙ୍ଗୋପସାଗରରେ ପୁଣି ଏକ ସମ୍ଭାବ୍ୟ ବାତ୍ୟାକୁ ନେଇ ବଢ଼ିଲା ଚିନ୍ତା। ଓଡ଼ିଶା ଉପକୂଳ ପାଇଁ ସତର୍କତା ଜାରି ହୋଇଥିବା ବେଳେ ଆସନ୍ତା ନଭେମ୍ବର ୧୬ ସୁଦ୍ଧା ସାମୁଦ୍ରିକ ଝଡ଼ର ରୂପ ନେଇପାରେ ଘୂର୍ଣ୍ଣିବଳୟ। ଏହା ପରବର୍ତ୍ତୀ ୪୮ ଘଣ୍ଟା ମଧ୍ୟରେ ଅଧିକ ଶକ୍ତିଶାଳୀ ହୋଇ ନଭେମ୍ବର ୧୮ ସୁଦ୍ଧା ଭୀଷଣ ବାତ୍ୟାରେ ପରିଣତ ହେବାର ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ (IMD)।

୧୬ରେ ବାତ୍ୟା, ୧୮ରେ ନେଇପାରେ ଭୀଷଣ ରୂପ

IMDର ସଦ୍ୟତମ ସାମୁଦ୍ରିକ ପାଣିପାଗ ଆକଳନ ଅନୁଯାୟୀ, ଦକ୍ଷିଣ-ପୂର୍ବ ବଙ୍ଗୋପସାଗରରେ ଥିବା ଘନୀଭୂତ ଲଘୁଚାପ କ୍ଷେତ୍ର ଧୀରେ ଧୀରେ ଅଧିକ ଶକ୍ତିଶାଳୀ ହେଉଛି। ଏହା ନଭେମ୍ବର ୧୫ ସୁଦ୍ଧା ଅବପାତ ଏବଂ ନଭେମ୍ବର ୧୬ ସୁଦ୍ଧା ସାମୁଦ୍ରିକ ଝଡ଼ର ରୂପ ନେଇପାରେ। ପରେ ଏହା ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରି ନଭେମ୍ବର ୧୮ ସୁଦ୍ଧା ଭୀଷଣ ବାତ୍ୟାରେ ପରିଣତ ହେବାର ଆକଳନ ରହିଛି।

ପବନର ବେଗ ବଢ଼ିବ, ସମୁଦ୍ର ହେବ ଅଶାନ୍ତ

ବାତ୍ୟା ଶକ୍ତିଶାଳୀ ହେବା ସହ ବଙ୍ଗୋପସାଗରରେ ପବନର ବେଗ ମଧ୍ୟ ବଢ଼ିବାର ଆଶଙ୍କା ରହିଛି। IMDର ପୂର୍ବାନୁମାନ ଅନୁଯାୟୀ, ନଭେମ୍ବର ୧୮ ସୁଦ୍ଧା ପବନର ବେଗ ଘଣ୍ଟାପ୍ରତି ୭୫ରୁ ୮୫ କିଲୋମିଟର ଏବଂ ଝଟକା ପବନର ବେଗ ୯୫ କିଲୋମିଟର ପର୍ଯ୍ୟନ୍ତ ପହଞ୍ଚିପାରେ। ସମୁଦ୍ର ଅଶାନ୍ତ ରହିବା ସହ ଉଚ୍ଚ ଢେଉ ସୃଷ୍ଟି ହେବାର ଆଶଙ୍କା ରହିଛି।

ମତ୍ସ୍ୟଜୀବୀଙ୍କୁ ସମୁଦ୍ର ମନା

ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ସମୁଦ୍ରକୁ ନଯିବା ପାଇଁ ମତ୍ସ୍ୟଜୀବୀଙ୍କୁ ସତର୍କ କରାଯାଇଛି। ଦକ୍ଷିଣ ଓଡ଼ିଶା ଉପକୂଳରେ ନଭେମ୍ବର ୧୭ ଓ ୧୮ ତାରିଖରେ ମାଛ ଧରିବାକୁ ସମୁଦ୍ରକୁ ନଯିବାକୁ ପରାମର୍ଶ ଦିଆଯାଇଛି। ପୂର୍ବରୁ ସମୁଦ୍ର ମଧ୍ୟରେ ଥିବା ମତ୍ସ୍ୟଜୀବୀଙ୍କୁ ନଭେମ୍ବର ୧୫ ସୁଦ୍ଧା ଉପକୂଳକୁ ଫେରିଆସିବାକୁ IMD ପରାମର୍ଶ ଦେଇଛି।

ସତର୍କ ରହିବେ ଉପକୂଳବର୍ତ୍ତୀ ଜିଲ୍ଲାର ଲୋକେ

ସମ୍ଭାବ୍ୟ ବାତ୍ୟାର ମୁକାବିଲା ପାଇଁ ପ୍ରଶାସନକୁ ପ୍ରସ୍ତୁତ ରହିବାକୁ କୁହାଯାଇଛି। ବାତ୍ୟା ଆଶ୍ରୟସ୍ଥଳୀର ସ୍ଥିତି, ଜରୁରୀକାଳୀନ ସାମଗ୍ରୀ ଓ ଉଦ୍ଧାରକାରୀ ଦଳର ପ୍ରସ୍ତୁତି ଉପରେ ନଜର ରଖାଯାଉଛି। ଉପକୂଳବର୍ତ୍ତୀ ଜିଲ୍ଲାର ଲୋକଙ୍କୁ ପାଣିପାଗ ବିଭାଗର ନିୟମିତ ସୂଚନା ଉପରେ ନଜର ରଖିବାକୁ ପରାମର୍ଶ ଦିଆଯାଇଛି।

କେଉଁଠି ହେବ ଲ୍ୟାଣ୍ଡଫଲ୍?

ଏବେ ସବୁଠାରୁ ବଡ଼ ପ୍ରଶ୍ନ ହେଉଛି, ସମ୍ଭାବ୍ୟ ବାତ୍ୟା କେଉଁ ଦିଗକୁ ଗତି କରିବ ଏବଂ କେଉଁଠି ସ୍ଥଳଭାଗ ଛୁଇଁବ? ବର୍ତ୍ତମାନ ସୁଦ୍ଧା ବାତ୍ୟାର ନିର୍ଦ୍ଦିଷ୍ଟ ଗତିପଥ କିମ୍ବା ଲ୍ୟାଣ୍ଡଫଲ୍ ସ୍ଥାନ ସ୍ପଷ୍ଟ ହୋଇନାହିଁ। ଆଗାମୀ ୪୮ ଘଣ୍ଟାରେ ଏହାର ଗତିପଥ ଓ ପ୍ରଭାବ ସମ୍ପର୍କରେ ଅଧିକ ସ୍ପଷ୍ଟ ଚିତ୍ର ମିଳିପାରେ।