ଭଦ୍ରକ: ଆଜିଠାରୁ ଆରମ୍ଭ ହେବ ଐତିହାସିକ କାଳୀପୂଜା। ଭଦ୍ରକ କାଳୀପୂଜା ଓଡ଼ିଶା ତଥା ଦେଶରେ ବେଶ୍ ପ୍ରସିଦ୍ଧ। ମା' ଭଦ୍ରକାଳୀଙ୍କ ପୀଠ ଓ ସପ୍ତମାତୃକା ବେଶ: ଭଦ୍ରକର ଅଧିଷ୍ଠାତ୍ରୀ ଦେବୀ ମା' ଭଦ୍ରକାଳୀଙ୍କ ପୀଠରେ ମା'ଙ୍କର ଦୁର୍ଲଭ 'ସପ୍ତମାତୃକା ବେଶ' ଅନୁଷ୍ଠିତ ହୋଇଥାଏ, ଯାହା ଦେଖିବାକୁ ହଜାର ହଜାର ଭକ୍ତଙ୍କ ଭିଡ଼ ଜମେ।

ଆଜି ପ୍ରଥମ ଦିନରେ ବେଦମାତା ବେଶ୍ ରେ ଦର୍ଶନ ଦେଉଛନ୍ତି ମା ଭଦ୍ରକାଳୀ । ଆଜି ମା ଭଦ୍ରକାଳୀ ହାତ ରେ ବେଦ, ଜପାମାଳି, ଗଦା ଓ ପଦ୍ମ ଧାରଣ କରିଛନ୍ତି । ଆଜି ର ବେଶ୍ ଦର୍ଶନ କଲେ ସକଳ ଜ୍ଞାନ ପ୍ରାପ୍ତି ହୁଏ ବୋଲି ବିଶ୍ବାସ ରହିଛି । ସାଳନ୍ଦୀ ନଦୀ ରୁ କଳସ ଆସି ମା ଙ୍କ ପୀଠରେ ସ୍ଥାପନ ହେବା ପରେ ବିଶ୍ଵଶାନ୍ତି ମହାଯଜ୍ଞ ଆରମ୍ଭ ହୋଇଛି । ଆଜିର ବେଶ ଦର୍ଶନ ପାଇଁ ଶ୍ରଦ୍ଧାଳୁ ଙ୍କ ଭିଡ ଜମିଛି ।

 ଭଦ୍ରକ ସହର ଏବଂ ଏହାର ଆଖପାଖ ଅଞ୍ଚଳରେ ବଡ଼ ବଡ଼ ପୂଜାମଣ୍ଡପରେ ଆକର୍ଷଣୀୟ ମୂର୍ତ୍ତି, ବିଶାଳ ତୋରଣ ଏବଂ ରଙ୍ଗବେରଙ୍ଗର ଆଲୋକସଜ୍ଜା କରାଯାଇଛି। କାଳୀପୂଜା ଅବସରରେ ଭଦ୍ରକ ସହରରେ ବିଭିନ୍ନ ଅପେରା, ମହାଯଜ୍ଞ ଏବଂ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି। 

ପୁରୀ: ଆଜି ଆଲୋକର ମହାପର୍ବ ଦୀପାବଳି। ଦୀପର ଆଲୋକରେ ଝଲସୁଛି ଘରଠୁ ମନ୍ଦିର, ସହରଠୁ ଗାଁ। ଆଲୋକମାଳା, ରଙ୍ଗୋଲି ଓ ମିଠାର ମହକରେ ମହକୁଛି ପରିବେଶ। ସୁଖ, ସମୃଦ୍ଧି ଓ ଶାନ୍ତିର କାମନା କରି ଘରେ ଘରେ ଚାଲିଛି ମା' ଲକ୍ଷ୍ମୀ ଓ ପ୍ରଭୁ ଗଣେଶଙ୍କ ପୂଜାର୍ଚ୍ଚନା।

ବାଣ ବଜାରରେ ଗ୍ରୀନ୍ କ୍ରାକର୍ସର କ୍ରେଜ୍

ପ୍ରଦୂଷଣମୁକ୍ତ ଦୀପାବଳି ପାଳନ ପାଇଁ ଏଥର ଗ୍ରୀନ୍ କ୍ରାକର୍ସ ପ୍ରତି ବଢ଼ିଛି ଲୋକଙ୍କ ଆଗ୍ରହ। ପରିବେଶ ସୁରକ୍ଷାର ବାର୍ତ୍ତା ସହ ଉତ୍ସବକୁ ଆହୁରି ରଙ୍ଗିନ କରିବାରେ ଲାଗିଛନ୍ତି ଲୋକେ।

ପୟା ଶ୍ରାଦ୍ଧରେ ପିତୃପୁରୁଷଙ୍କୁ ସ୍ମରଣ, ଶ୍ରୀକ୍ଷେତ୍ରରେ ଭକ୍ତଙ୍କ ଭିଡ଼

ଓଡ଼ିଆ ପରମ୍ପରାରେ ଦୀପାବଳିର ରହିଛି ସ୍ୱତନ୍ତ୍ର ମହତ୍ତ୍ୱ। ପୟା ଶ୍ରାଦ୍ଧ ଅବସରରେ ପିତୃପୁରୁଷଙ୍କ ଉଦ୍ଦେଶ୍ୟରେ ପିଣ୍ଡଦାନ ସହ କାଉଁରିଆ କାଠି ଜାଳି ବଡ଼ବଡ଼ୁଆଙ୍କୁ ଡାକୁଛନ୍ତି ଶ୍ରଦ୍ଧାଳୁ। ଏହି ପବିତ୍ର ପରମ୍ପରା ପାଳନ ପାଇଁ ଶ୍ରୀକ୍ଷେତ୍ର ପୁରୀରେ ଜମିଛି ଭକ୍ତଙ୍କ ଭିଡ଼।

ଶ୍ରୀମନ୍ଦିରରେ ସ୍ୱତନ୍ତ୍ର ନୀତିକାନ୍ତି, ଭିଡ଼ ନିୟନ୍ତ୍ରଣ ପାଇଁ କଡ଼ା ବ୍ୟବସ୍ଥା

ଦୀପାବଳି ଅବସରରେ ଶ୍ରୀମନ୍ଦିରରେ ଅନୁଷ୍ଠିତ ହେଉଛି ସ୍ୱତନ୍ତ୍ର ନୀତିକାନ୍ତି। ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ଦର୍ଶନ ବ୍ୟବସ୍ଥା ଓ ଭିଡ଼ ନିୟନ୍ତ୍ରଣ ପାଇଁ ପ୍ରଶାସନ ପକ୍ଷରୁ ନିଆଯାଇଛି ବ୍ୟାପକ ପଦକ୍ଷେପ।

ଆଲୋକର ଏହି ମହାପର୍ବ କେବଳ ଦୀପ ଜାଳିବାର ଉତ୍ସବ ନୁହେଁ, ବରଂ ଅନ୍ଧକାରରୁ ଆଲୋକ, ଅଶାନ୍ତିରୁ ଶାନ୍ତି ଏବଂ ଭେଦଭାବରୁ ଭାଇଚାରାର ବାର୍ତ୍ତା ବହନ କରେ। ସାରା ବିଶ୍ୱରେ ଆନନ୍ଦ, ଉଲ୍ଲାସ ଓ ଉତ୍ସାହର ସହ ପାଳିତ ହେଉଛି ଏହି ଆଲୋକର ପର୍ବ।

 ଆଜି ଆଲୋକର ପର୍ବ ଦୀପାବଳି । ସାରାଦେଶରେ ଲୋକମାନେ ଆଜି ଏହି ପର୍ବକୁ ଧୁମ୍‌ଧାମରେ ପାଳନ କରନ୍ତି। ୧୪ ବର୍ଷ ଧରି ଘୋର ବନରେ ବିତାଇଥିବା ଶ୍ରୀରାମ ଅମାବାସ୍ୟା ତିଥିରେ ଅଯୋଧ୍ୟା ଫେରିଥିଲେ। ଏଣୁ ଏହି ଅମାବାସ୍ୟା ରାତିର ଅନ୍ଧାରକୁ ଦୂର କରିବା ଲାଗି ଅଯୋଧ୍ୟାବାସୀ ଘରେ ଘରେ ଦୀପ ଜଳାଇଥିଲେ। ସେହିଦିନଠାରୁ ଏହି ଦିନକୁ ଦୀପାବଳି ଭାବେ ପୂଜା କରାଯାଉଛି।

ଓଡ଼ିଶାରେ ଆଜି ଏହି ଦିନଟିକୁ ପୂର୍ବଜଙ୍କୁ ଦୀପ ଦାନ କରି ସମସ୍ତ ରୀତିନୀତିରେ ପୂଜାର୍ଚ୍ଚନା କରାଯାଇଥାଏ।ଆଜିର ପବିତ୍ର ଦିନରେ ପିତୃପୁରୁଷଙ୍କ ସ୍ମରଣ କରି ବଡ଼ ବଡିଆ ଡକା ହେବ । ବିଶ୍ବାସ କରାଯାଏ ଯେ ପିତୃପକ୍ଷରେ ପୃଥିବୀକୁ ଆସିଥିବା ପୂର୍ବପୁରୁଷମାନେ କାର୍ତ୍ତିକ ଅମାବାସ୍ୟାରେ ପିତୃଲୋକକୁ ଫେରିଯାଆନ୍ତି । ସେମାନଙ୍କ ଫେରିବା ପଥକୁ ଆଲୋକିତ କରିବା ପାଇଁ କାଉଁରିଆ କାଠି ଜଳାଯାଏ । ଏହି ସମୟରେ ପରିବାରର ସଦସ୍ୟମାନେ ଏକାଠି ହୋଇ ପାରମ୍ପରିକ ବଡ଼ବଡ଼ୁଆ ଡାକ ଦେଇଥାନ୍ତି । ବଡ଼ବଡ଼ୁଆ ହୋ, ଅନ୍ଧାରରେ ଆସି ଆଲୁଅରେ ଯାଅ, ଗଙ୍ଗା ଯାଅ, ଗୟା ଯାଅ, ବାଇଶି ପାହାଚେ ଗଡ଼ଗଡ଼ଉଥାଅ। ଏହି ପାରମ୍ପରିକ ଡାକ ମାଧ୍ୟମରେ ପୂର୍ବପୁରୁଷଙ୍କ ପ୍ରତି ସମ୍ମାନ ଓ କୃତଜ୍ଞତା ଦିଆଯାଏ ।

ଦୀପାବଳି ଦିନ ଏହି ଦିନ ମା’ ଲକ୍ଷ୍ମୀଙ୍କ ଆରାଧନା ମଧ୍ୟ କରାଯାଏ। ଦୀପାବଳି ପୂର୍ବରୁ ଘରକୁ ସଜାଇ ନୂଆ ପୋଷାକ, ଗହଣା ପିନ୍ଧି ମା’ ଲକ୍ଷ୍ମୀଙ୍କର ପୂଜାର୍ଚ୍ଚନା କରିଥାନ୍ତି ଲୋକେ।

ପୁରାଣରେ ବର୍ଣ୍ଣିତ ଅଛି, ଦୀପାବଳି ପର୍ବ ପଛରେ ଅନେକ ପୌରାଣିକ କାହାଣୀ ରହିଛି। ଏହି ଦିନ ଧନଦାତ୍ରୀ ମା’ ମହାଲକ୍ଷ୍ମୀଙ୍କ ବିବାହ ଭଗବାନ ବିଷ୍ଣୁଙ୍କ ସହ ହୋଇଥିଲା ବୋଲି କେତେକ ପୁରାଣରେ ଉଲ୍ଲେଖ ରହିଛି। କେବଳ ଏତିକି ନୁହେଁ ଏହି ଦିନ ମା’ ମହାଲକ୍ଷ୍ମୀ ଜନ୍ମ ଗ୍ରହଣ କରିଥିବା କେତେକ ଶାସ୍ତ୍ରରୁ ଜଣାପଡ଼ିଛି।

ସବୁ ଧର୍ମର ଲୋକେ ଦୀପାବଳିକୁ ଖୁବ୍ ଧୁମ୍‌ଧାମ୍‌ରେ ପାଳନ କରନ୍ତି। କିନ୍ତୁ ହିନ୍ଦୁ, ଜୈନ, ବୌଦ୍ଧ ଓ ଶିଖ୍ ସମ୍ପ୍ରଦାୟଙ୍କ ପାଇଁ ଏହି ପର୍ବ ପାଳନର ଭିନ୍ନ ଭିନ୍ନ କାରଣ ରହିଛି। ଯେପରି କି, ହିନ୍ଦୁ ସମ୍ପ୍ରଦାୟରେ ଶ୍ରୀରାମ ବନବାସ ସାରି ଅଯୋଧ୍ୟା ଫେରିବା ଖୁସିରେ ଦିପାବଳୀ ପାଳନ କରାଯାଏ।

ଜୈନ ସମ୍ପ୍ରଦାୟରେ ମହାବୀର ଏହିଦିନ ନିର୍ବାଣ ପ୍ରାପ୍ତ କରିଥିଲେ। ସେହିପରି ସମ୍ରାଟ ଅଶୋକ ବୌଦ୍ଧ ଧର୍ମ ଗ୍ରହଣ କରିଥିବା ଅବସରରେ ବୌଦ୍ଧ ସମ୍ପ୍ରଦାୟ ଦୀପାବଳି ପାଳନ କରନ୍ତି।

ଶିଖ୍ ସମୁଦାୟ ଏହାକୁ ଶିଖ୍ ଧର୍ମ ଗୁରୁ ହର୍‌ଗୋବିନ୍ଦ୍‌ ଜୀଙ୍କ ଘରବାହୁଡା ସ୍ମୃତି ଭାବେ ପାଳନ କରନ୍ତି। ଦିପାବଳୀ ଦିନ ଶିଖ୍ ଧର୍ମଗୁରୁ ହର୍‌ଗୋବିନ୍ଦ୍‌ ଜୀଙ୍କ ସହ ଅନ୍ୟ କେତେକ ହିନ୍ଦୁ ଧର୍ମ ଗୁରୁ ସମ୍ରାଟ ଜାହାଙ୍ଗିର୍‌ଙ୍କ ବନ୍ଦୀଶାଳାରୁ ମୁକ୍ତ ହୋଇ ଘରକୁ ବାହୁଡ଼ି ଥିଲେ।

ଭୁବନେଶ୍ୱର: ଓଡ଼ିଶାର କାର୍ଯ୍ୟରତ ସାମ୍ବାଦିକମାନଙ୍କ ପାଇଁ ଖୁସି ଖବର। ଗୋପବନ୍ଧୁ ସାମ୍ବାଦିକ ସ୍ୱାସ୍ଥ୍ୟ ବୀମା ଯୋଜନା (GSSBY) ୨୦୨୬-୨୭ ପାଇଁ ନୂତନ ଆବେଦନ ଗ୍ରହଣ କରିବାକୁ ଅନଲାଇନ୍ ପୋର୍ଟାଲ ଖୋଲାଯାଇଛି। ଯେଉଁ କାର୍ଯ୍ୟରତ ସାମ୍ବାଦିକମାନେ ପୂର୍ବରୁ ଏହି ଯୋଜନାରେ ପଞ୍ଜୀକରଣ କରିନାହାନ୍ତି, ସେମାନେ ନିର୍ଦ୍ଧାରିତ ସମୟ ମଧ୍ୟରେ ନୂଆ ଆବେଦନ କରିପାରିବେ।

ସରକାରଙ୍କ ପକ୍ଷରୁ ଜାରି ସୂଚନା ଅନୁସାରେ, ନଭେମ୍ବର ୯ ତାରିଖରୁ ନଭେମ୍ବର ୩୦ ତାରିଖ ୨୦୨୬ ପର୍ଯ୍ୟନ୍ତ ଅନଲାଇନ୍‌ରେ ଆବେଦନ ଗ୍ରହଣ କରାଯିବ। ଏଥିପାଇଁ ଇଚ୍ଛୁକ ଓ ଯୋଗ୍ୟ ସାମ୍ବାଦିକମାନେ ନିର୍ଦ୍ଧାରିତ ୱେବସାଇଟ୍‌କୁ ଯାଇ ନିଜର ଆବେଦନ ଦାଖଲ କରିପାରିବେ।

କେଉଁଠି ଓ କିପରି କରିବେ ଆବେଦନ?

ଗୋପବନ୍ଧୁ ସାମ୍ବାଦିକ ସ୍ୱାସ୍ଥ୍ୟ ବୀମା ଯୋଜନାରେ ନୂତନ ପଞ୍ଜୀକରଣ ପାଇଁ ସରକାରଙ୍କ ଅନଲାଇନ୍ ପୋର୍ଟାଲ ଖୋଲାଯାଇଛି। ଆବେଦନକାରୀମାନେ ନିମ୍ନଲିଖିତ ୱେବସାଇଟ୍‌ ମାଧ୍ୟମରେ ଆବେଦନ କରିପାରିବେ।

ଆବେଦନ ୱେବସାଇଟ୍: https://owjws.odisha.gov.in

ଆବେଦନ ଅବଧି: ୯ ନଭେମ୍ବରରୁ ୩୦ ନଭେମ୍ବର ୨୦୨୬।

ଡିସେମ୍ବର ୧ରୁ ଆବେଦନ ଯାଞ୍ଚ

ଆବେଦନ ପ୍ରକ୍ରିୟା ଶେଷ ହେବା ପରେ ଜିଲ୍ଲାସ୍ତରରେ ଦାଖଲ ହୋଇଥିବା ଆବେଦନଗୁଡ଼ିକର ଯାଞ୍ଚ କରାଯିବ। ଏଥିପାଇଁ ଡିସେମ୍ବର ୧ରୁ ଡିସେମ୍ବର ୧୦ ତାରିଖ ୨୦୨୬ ପର୍ଯ୍ୟନ୍ତ ସମୟ ଧାର୍ଯ୍ୟ କରାଯାଇଛି।

ଆବେଦନ କରିବା ସମୟରେ ସମସ୍ତ ଆବଶ୍ୟକ ତଥ୍ୟ ଓ ଦଲିଲପତ୍ର ଠିକ୍ ଭାବେ ପ୍ରଦାନ କରିବାକୁ ସାମ୍ବାଦିକମାନଙ୍କୁ ପରାମର୍ଶ ଦିଆଯାଇଛି। ଯେପରି ଆବେଦନରେ କୌଣସି ତ୍ରୁଟି ନ ରହେ, ସେଥିପ୍ରତି ବିଶେଷ ଧ୍ୟାନ ଦେବାକୁ କୁହାଯାଇଛି।

ନିର୍ଦ୍ଧାରିତ ସମୟ ମଧ୍ୟରେ ଆବେଦନ କରିବାକୁ ଅନୁରୋଧ

ଏହି ଯୋଜନାରେ ପୂର୍ବରୁ ପଞ୍ଜୀକୃତ ହୋଇନଥିବା ଯୋଗ୍ୟ ଓ କାର୍ଯ୍ୟରତ ସାମ୍ବାଦିକମାନେ ଶେଷ ତାରିଖକୁ ଅପେକ୍ଷା ନକରି ଶୀଘ୍ର ଆବେଦନ କରିବାକୁ ଅନୁରୋଧ କରାଯାଇଛି। ନିର୍ଦ୍ଧାରିତ ସମୟସୀମା ପରେ ଆବେଦନ ଗ୍ରହଣ ହେବ କି ନାହିଁ, ସେନେଇ କୌଣସି ସୂଚନା ଦିଆଯାଇନାହିଁ। ତେଣୁ ଯୋଗ୍ୟ ସାମ୍ବାଦିକମାନେ ନଭେମ୍ବର ୩୦ ପୂର୍ବରୁ ନିଜର ପଞ୍ଜୀକରଣ ପ୍ରକ୍ରିୟା ଶେଷ କରିବା ଆବଶ୍ୟକ।

ଭୁବନେଶ୍ୱର: ଓଡ଼ିଶାକୁ ନିଶାମୁକ୍ତ କରିବା ଲକ୍ଷ୍ୟରେ ନୂଆ ପଦକ୍ଷେପ ନେବ କଳିଙ୍ଗ ସେନା। ରାଜ୍ୟର ପ୍ରତ୍ୟେକ ପଞ୍ଚାୟତରେ ଗଠନ ହେବ କଳିଙ୍ଗ ନିଶା ନିବାରଣ କମିଟି। ଏହାସହ ଆତ୍ମନିଯୁକ୍ତି ଯୋଜନା ମାଧ୍ୟମରେ ଯୁବକଯୁବତୀଙ୍କୁ ବ୍ୟାଙ୍କ ଋଣ ଯୋଗାଇଦେବା ଏବଂ ଶିଳ୍ପ ଓ କର୍ପୋରେଟ୍ ସଂସ୍ଥାରେ ନିଯୁକ୍ତି କ୍ଷେତ୍ରରେ ଓଡ଼ିଆଙ୍କୁ ପ୍ରାଥମିକତା ଦେବା ପାଇଁ ଦଳ ଦାବି ଉଠାଇବ। ଭୁବନେଶ୍ୱରରେ ଆୟୋଜିତ କଳିଙ୍ଗ ସେନାର ପ୍ରତିଷ୍ଠା ଦିବସ ସମାରୋହରେ ଏଭଳି ଘୋଷଣା କରିଛନ୍ତି ଦଳର ସୁପ୍ରିମୋ ହେମନ୍ତ ରଥ।

ନିଶା କବଳରୁ ଯୁବପିଢ଼ିଙ୍କୁ ରକ୍ଷା କରିବା ଲକ୍ଷ୍ୟ

ପ୍ରତିଷ୍ଠା ଦିବସ ଅବସରରେ ହେମନ୍ତ ରଥ କହିଛନ୍ତି ଯେ, ଓଡ଼ିଶାର ସ୍ୱାର୍ଥ, ସ୍ୱାଭିମାନ ଓ ଅସ୍ମିତାର ସୁରକ୍ଷା ପାଇଁ କଳିଙ୍ଗ ସେନା ସବୁବେଳେ ସଂଗ୍ରାମ ଜାରି ରଖିଛି। ବର୍ତ୍ତମାନ ରାଜ୍ୟରେ ନିଶା କାରବାର ବଢ଼ିବା ଚିନ୍ତାର ବିଷୟ ପାଲଟିଛି। ଏହାର ସବୁଠାରୁ ଅଧିକ ପ୍ରଭାବ ଯୁବପିଢ଼ିଙ୍କ ଉପରେ ପଡ଼ୁଛି। ନିଶାସକ୍ତି ଯୋଗୁଁ ଅନେକ ପରିବାରରେ ଅଶାନ୍ତି ଓ ବିଶୃଙ୍ଖଳା ସୃଷ୍ଟି ହେଉଛି।

ତେଣୁ ଓଡ଼ିଶାକୁ ନିଶାମୁକ୍ତ କରିବା ପାଇଁ ଦଳ ପକ୍ଷରୁ ରାଜ୍ୟବ୍ୟାପୀ ଅଭିଯାନ ଆରମ୍ଭ କରାଯିବ। ପ୍ରତି ପଞ୍ଚାୟତରେ କଳିଙ୍ଗ ନିଶା ନିବାରଣ କମିଟି ଗଠନ କରି ଏହି ଅଭିଯାନକୁ ତୃଣମୂଳ ସ୍ତରରେ ପହଞ୍ଚାଯିବ ବୋଲି ସେ କହିଛନ୍ତି।

ଆତ୍ମନିଯୁକ୍ତି ପାଇଁ ବ୍ୟାଙ୍କ ଋଣ, ନିଯୁକ୍ତିରେ ଓଡ଼ିଆଙ୍କୁ ଗୁରୁତ୍ୱ

କେବଳ ନିଶା ନିବାରଣ ନୁହେଁ, ରାଜ୍ୟର ଯୁବପିଢ଼ିଙ୍କ ରୋଜଗାରକୁ ମଧ୍ୟ ଦଳ ଗୁରୁତ୍ୱ ଦେବ। ଆତ୍ମନିଯୁକ୍ତି ଯୋଜନା ଜରିଆରେ ଆଗ୍ରହୀ ଯୁବକଯୁବତୀଙ୍କୁ ବ୍ୟାଙ୍କ ଋଣ ଯୋଗାଇଦେବା ଉପରେ ଗୁରୁତ୍ୱ ଦିଆଯିବ। ଏହାଦ୍ୱାରା ସେମାନେ ନିଜସ୍ୱ ବ୍ୟବସାୟ ଓ ରୋଜଗାରର ସୁଯୋଗ ସୃଷ୍ଟି କରିପାରିବେ।

ସେହିପରି ରାଜ୍ୟରେ ଥିବା ବିଭିନ୍ନ ଶିଳ୍ପ ଓ କର୍ପୋରେଟ୍ ସଂସ୍ଥାରେ ନିଯୁକ୍ତି ସମୟରେ ଓଡ଼ିଆ ଯୁବକଯୁବତୀଙ୍କୁ ଅଗ୍ରାଧିକାର ଦେବା ପାଇଁ ଦଳ ଦାବି ଉଠାଇବ ବୋଲି ହେମନ୍ତ ରଥ ସ୍ପଷ୍ଟ କରିଛନ୍ତି।

ପଞ୍ଚାୟତ ନିର୍ବାଚନରେ ମଇଦାନକୁ ଓହ୍ଲାଇବ କଳିଙ୍ଗ ସେନା

ଆଗାମୀ ପଞ୍ଚାୟତ ନିର୍ବାଚନକୁ ନେଇ ମଧ୍ୟ ଦଳ ନିଜର ରଣନୀତି ଘୋଷଣା କରିଛି। ଉଚ୍ଚଶିକ୍ଷିତ ଓ ଯୋଗ୍ୟ ପ୍ରାର୍ଥୀଙ୍କୁ ନିର୍ବାଚନ ମଇଦାନକୁ ଓହ୍ଲାଇବାକୁ ଦଳ ଯୋଜନା କରିଛି। ଏହାସହ ୨୧ଟି ଜିଲ୍ଲାରେ ସମସ୍ତ ଜିଲ୍ଲା ପରିଷଦ ଆସନ ପାଇଁ ପ୍ରାର୍ଥୀ ଦେବ ବୋଲି ହେମନ୍ତ ରଥ ଘୋଷଣା କରିଛନ୍ତି।

ମୁନିଗୁଡ଼ା: ରାୟଗଡ଼ା ଜିଲ୍ଲାର ଅମ୍ବାଦୋଳା ଅଞ୍ଚଳରେ ଜଣେ କାର୍ଯ୍ୟରତ ପୋଲିସ ଅଧିକାରୀଙ୍କ ମୃତ୍ୟୁକୁ ନେଇ ଚାଞ୍ଚଲ୍ୟ ଖେଳିଯାଇଛି। ଅମ୍ବାଦୋଳା ଥାନାରେ ସବ୍‌ଇନ୍ସପେକ୍ଟର (ଏସ୍‌ଆଇ) ଭାବେ କାର୍ଯ୍ୟରତ ଅଶୋକ ପ୍ରଧାନଙ୍କ ମୃତଦେହ ତାଙ୍କ ସରକାରୀ କ୍ୱାର୍ଟରରୁ ଉଦ୍ଧାର କରାଯାଇଛି। ତାଙ୍କ ମୃତ୍ୟୁର ପ୍ରକୃତ କାରଣ ଏଯାଏଁ ଜଣାପଡ଼ିନାହିଁ।

ସୂଚନା ଅନୁସାରେ, ଅଶୋକ ପ୍ରଧାନ ନିଜ ପରିବାର ସହ ଅମ୍ବାଦୋଳାରେ ରହୁଥିଲେ। ଘଟଣା ଦିନ ସେ ନିୟମିତ ଭାବେ ଥାନାକୁ ଡ୍ୟୁଟି କରିବାକୁ ଆସିଥିଲେ। ତେବେ ପରେ ତାଙ୍କ ମୃତଦେହ ଝୁଲନ୍ତା ଅବସ୍ଥାରେ ସରକାରୀ କ୍ୱାର୍ଟରରୁ ମିଳିଥିବା ଜଣାପଡ଼ିଛି।

ମୃତ୍ୟୁର କାରଣ ଅସ୍ପଷ୍ଟ, ତଦନ୍ତ ଆରମ୍ଭ

ଏସ୍‌ଆଇ ଅଶୋକ ପ୍ରଧାନଙ୍କ ମୃତ୍ୟୁ କେଉଁ ପରିସ୍ଥିତିରେ ହେଲା, ସେନେଇ ଏବେ ଅନେକ ପ୍ରଶ୍ନ ଉଠିଛି। ଘଟଣା ସମ୍ପର୍କରେ ଖବର ପାଇବା ପରେ ପୋଲିସ ପକ୍ଷରୁ ତଦନ୍ତ ଆରମ୍ଭ କରାଯାଇଛି। ମୃତ୍ୟୁ ପଛରେ କୌଣସି କାରଣ ରହିଛି କି ନାହିଁ ଏବଂ କେଉଁ ପରିସ୍ଥିତିରେ ଏଭଳି ଘଟଣା ଘଟିଲା, ତାହା ଜାଣିବାକୁ ତଦନ୍ତ ଜାରି ରହିଛି।

ତଦନ୍ତ ଶେଷ ହେବା ପରେ ହିଁ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ। ଜଣେ କାର୍ଯ୍ୟରତ ପୋଲିସ ଅଧିକାରୀଙ୍କ ଏଭଳି ଅକାଳ ମୃତ୍ୟୁ ଘଟଣା ଅମ୍ବାଦୋଳା ସମେତ ସମଗ୍ର ଅଞ୍ଚଳରେ ଶୋକ ଓ ଆଲୋଡ଼ନ ସୃଷ୍ଟି କରିଛି।

Also Read: ପିପିଲି ଟୋଲଗେଟ୍‌ ନିକଟରୁ କଇଁଛ ଉଦ୍ଧାର,ପୁରୀରୁ କୋଲକାତା ହେଉଥିଲା ଚାଲାଣ