ନୂଆଦିଲ୍ଲୀ: IPL 2027 ପୂର୍ବରୁ ଭାରତୀୟ ପ୍ରିମିୟର ଲିଗ୍‌ରେ ଏକ ବଡ଼ ଖେଳାଳି ଅଦଳବଦଳକୁ ନେଇ କ୍ରିକେଟ୍ ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଛି। ମୁମ୍ବାଇ ଇଣ୍ଡିଆନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ବଦଳରେ ପଞ୍ଜାବ କିଙ୍ଗ୍ସର ଷ୍ଟାର୍ ବୋଲର ଅର୍ଶଦୀପ ସିଂହ ମୁମ୍ବାଇ ଦଳରେ ସାମିଲ ହୋଇପାରନ୍ତି। ଏହି ଟ୍ରେଡ୍ ଡିଲ୍‌କୁ ନେଇ ଉଭୟ ଫ୍ରାଞ୍ଚାଇଜ୍ ମଧ୍ୟରେ ସହମତି ହୋଇଥିବା ନେଇ ରିପୋର୍ଟ ପ୍ରକାଶ ପାଇଛି। ତେବେ ଏହା ଉପରେ ବିସିସିଆଇର ଆଧିକାରିକ ମଞ୍ଜୁରୀ ମିଳିବା ବାକି ରହିଛି।

ସ୍ପୋର୍ଟ୍ସ ତକ୍‌ର ରିପୋର୍ଟ ଅନୁସାରେ, ମୁମ୍ବାଇ ଇଣ୍ଡିଆନ୍ସ ଏବଂ ପଞ୍ଜାବ କିଙ୍ଗ୍ସ ଏହି ଟ୍ରେଡ୍‌ ସମ୍ପର୍କିତ କାଗଜପତ୍ର ପ୍ରସ୍ତୁତ କରି ବିସିସିଆଇ ନିକଟକୁ ପଠାଇଛନ୍ତି। ହାର୍ଦ୍ଦିକଙ୍କ ବଦଳରେ କେବଳ ଅର୍ଶଦୀପ ମୁମ୍ବାଇ ଆସିବେ ନା ଏହି ଡିଲ୍‌ରେ ଆଉ ଜଣେ ଖେଳାଳି ସାମିଲ ହେବେ, ତାହା ଏଯାଏଁ ସ୍ପଷ୍ଟ ହୋଇନାହିଁ। ଚର୍ଚ୍ଚା ଅନୁସାରେ, ପଞ୍ଜାବର ୱିକେଟ୍‌କିପର ବ୍ୟାଟର୍ ବିଷ୍ଣୁ ବିନୋଦ ମଧ୍ୟ ମୁମ୍ବାଇ ଦଳକୁ ଆସିପାରନ୍ତି। ଏହି ଟ୍ରେଡ୍‌ ପାଇଁ ହାର୍ଦ୍ଦିକ ଓ ଅର୍ଶଦୀପ ଉଭୟ ନିଜର ସହମତି ଦେଇଥିବା ମଧ୍ୟ ରିପୋର୍ଟରେ ଦାବି କରାଯାଇଛି।

ପଞ୍ଜାବରେ ହାର୍ଦ୍ଦିକଙ୍କୁ ନେଇ ବଢ଼ିବ ଚ୍ୟାଲେଞ୍ଜ

ହାର୍ଦ୍ଦିକ ପାଣ୍ଡ୍ୟାଙ୍କୁ ନେଇ ଗତ କିଛି ସପ୍ତାହ ଧରି ବିଭିନ୍ନ ଆଇପିଏଲ୍ ଫ୍ରାଞ୍ଚାଇଜ୍‌ର ଆଗ୍ରହ ଥିବା ଚର୍ଚ୍ଚା ହେଉଥିଲା। ଚେନ୍ନାଇ ସୁପର କିଙ୍ଗ୍ସ, କୋଲକାତା ନାଇଟ୍ ରାଇଡର୍ସ ଏବଂ ଦିଲ୍ଲୀ କ୍ୟାପିଟାଲ୍ସ ଭଳି ଦଳ ତାଙ୍କୁ ନେବାକୁ ଆଗ୍ରହୀ ଥିବା କୁହାଯାଉଥିଲା। ଏବେ ପଞ୍ଜାବ କିଙ୍ଗ୍ସ ସହ ତାଙ୍କ ନାମ ଯୋଡ଼ା ହେବା ପରେ ଏହି ଚର୍ଚ୍ଚା ଆହୁରି ଜୋର୍ ଧରିଛି।

ହାର୍ଦ୍ଦିକ ପଞ୍ଜାବ ଦଳରେ ସାମିଲ ହେଲେ ଦଳର ବୋଲିଂ ଅଲରାଉଣ୍ଡର ବିଭାଗରେ ବଡ଼ ପରିବର୍ତ୍ତନ ଆସିପାରେ। କାରଣ ପଞ୍ଜାବ ଦଳରେ ପୂର୍ବରୁ ମାର୍କସ ଷ୍ଟୋଇନିସ୍ ଓ ମାର୍କୋ ଜାନସେନ୍‌ଙ୍କ ଭଳି ଦକ୍ଷ ଅଲରାଉଣ୍ଡର ରହିଛନ୍ତି। ତିନି ଜଣ ଦ୍ରୁତ ବୋଲିଂ ଅଲରାଉଣ୍ଡରଙ୍କୁ ଏକାଠି ଚୂଡ଼ାନ୍ତ ଏକାଦଶରେ ସ୍ଥାନ ଦେବା ଦଳ ପାଇଁ ସହଜ ହେବ ନାହିଁ। ତେଣୁ ଏହି ଟ୍ରେଡ୍ ଚୂଡ଼ାନ୍ତ ହେଲେ ଷ୍ଟୋଇନିସ୍ କିମ୍ବା ଜାନସେନ୍‌ଙ୍କ ମଧ୍ୟରୁ କାହାକୁ ଦଳ ଛାଡ଼ିପାରେ ବୋଲି ମଧ୍ୟ ଆକଳନ କରାଯାଉଛି।

ଏହି ଅଦଳବଦଳ ମଧ୍ୟରେ ରିଷଭ ପନ୍ତଙ୍କ ଦିଲ୍ଲୀ କ୍ୟାପିଟାଲ୍ସକୁ ଫେରିବା ଏବଂ କୁଲଦୀପ ଯାଦବଙ୍କ ଲକ୍ଷ୍ନୌ ସୁପର ଜାଏଣ୍ଟସ୍‌ରେ ସାମିଲ ହେବା ଚର୍ଚ୍ଚାରେ ରହିଛି। ସେହିପରି ଜିଶାନ ଅନସାରୀ ଦିଲ୍ଲୀ ପାଇଁ ଖେଳିବାକୁ ଥିବା ବେଳେ ଲିଆମ୍ ଲିଭିଙ୍ଗଷ୍ଟୋନ୍ ଓ ଜ୍ୟାକ୍ ଏଡୱାର୍ଡସ୍ ଚେନ୍ନାଇ ସୁପର କିଙ୍ଗ୍ସରେ ସାମିଲ ହେବାର ଖବର ରହିଛି। ଅନ୍ୟପଟେ ଖଲିଲ ଅହମ୍ମଦ, ନାଥନ ଏଲିସ୍ ଓ ଟି. ନଟରାଜନଙ୍କ ନାମ ସନରାଇଜର୍ସ ହାଇଦ୍ରାବାଦ ସହ ଯୋଡ଼ା ହୋଇଛି।

ଏବେ ସମସ୍ତଙ୍କ ନଜର ହାର୍ଦ୍ଦିକ-ଅର୍ଶଦୀପ ଟ୍ରେଡ୍ ଉପରେ। ବିସିସିଆଇର ଅନୁମୋଦନ ମିଳିଲେ IPL 2027ରେ ଉଭୟ ଖେଳାଳିଙ୍କ ନୂଆ ଦଳ ଓ ନୂଆ ଭୂମିକା ଦେଖିବାକୁ ମିଳିପାରେ। ତେବେ ଆଧିକାରିକ ଘୋଷଣା ନହେବା ପର୍ଯ୍ୟନ୍ତ ଏହି ଟ୍ରେଡ୍‌କୁ ନିଶ୍ଚିତ ଖବର ଭାବେ ଗ୍ରହଣ କରିବା ଠିକ୍ ହେବ ନାହିଁ।

ୱେଲିଂଟନ: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ୫ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍‌ର ଦ୍ୱିତୀୟ ମୁକାବିଲାକୁ ନେଇ ବଢ଼ିଛି ଉତ୍କଣ୍ଠା। ବର୍ଷା ଯୋଗୁଁ ମ୍ୟାଚ୍‌ର ଟସ୍‌ରେ ବିଳମ୍ବ ହୋଇଛି। ୱେଲିଂଟନର ହେନରୀ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍‌ ଉପରେ ଏବେ ପାଣିପାଗର ପ୍ରଭାବ ପଡ଼ିଛି। ଫଳରେ ମ୍ୟାଚ୍ କେତେବେଳେ ଆରମ୍ଭ ହେବ, ତାହାକୁ ନେଇ ଅପେକ୍ଷା କରିଛନ୍ତି କ୍ରିକେଟ୍ ପ୍ରଶଂସକ।

ସିରିଜ୍‌ର ପ୍ରଥମ ମ୍ୟାଚ୍‌ ଜିତି ଭାରତୀୟ ଦଳ ଉତ୍ସାହିତ ରହିଛି। ଦ୍ୱିତୀୟ ମ୍ୟାଚ୍‌କୁ ମଧ୍ୟ ଜିତି ସିରିଜ୍‌ରେ ନିଜ ସ୍ଥିତି ଆହୁରି ମଜଭୁତ କରିବା ଲକ୍ଷ୍ୟରେ ରହିବ ଟିମ୍ ଇଣ୍ଡିଆ। ଅନ୍ୟପଟେ ପ୍ରଥମ ମ୍ୟାଚ୍‌ର ପରାଜୟ ପରେ ଘରୋଇ ମାଟିରେ ବିଜୟ ସହ ପ୍ରତ୍ୟାବର୍ତ୍ତନ କରିବାକୁ ନ୍ୟୁଜିଲାଣ୍ଡ ଦଳ ଚେଷ୍ଟା କରିବ।

ୱେଲିଂଟନରେ ବର୍ଷା ହୋଇପାରେ ବାଧକ

ଦ୍ୱିତୀୟ ଦିନିକିଆ ମ୍ୟାଚ୍‌ରେ ପାଣିପାଗ ବଡ଼ ସମସ୍ୟା ସୃଷ୍ଟି କରିଛି। ସ୍ଥାନୀୟ ପାଣିପାଗ ଆକଳନ ଅନୁସାରେ, ମ୍ୟାଚ୍ ଆରମ୍ଭ ସମୟରୁ ଆକାଶରେ ଘନ କଳାହାଣ୍ଡିଆ ମେଘ ରହିବାର ସମ୍ଭାବନା ରହିଛି। ମଝିରେ କିଛି ସମୟ ପାଇଁ ପାଗ ଶୁଖିଲା ରହିପାରେ। ତଥାପି ବର୍ଷାର ଆଶଙ୍କା ଟଳିନାହିଁ।ଏଭଳି ପରିସ୍ଥିତିରେ ମ୍ୟାଚ୍‌ର ଓଭର କମିବା ସହ ସମ୍ପୂର୍ଣ୍ଣ ଖେଳ ବାତିଲ ହେବାର ଆଶଙ୍କା ମଧ୍ୟ ରହିଛି। ତେଣୁ ଉଭୟ ଦଳ ସହ କ୍ରିକେଟ୍ ପ୍ରଶଂସକଙ୍କ ନଜର ଏବେ ପାଣିପାଗ ଉପରେ।

ଟିମ୍ ଇଣ୍ଡିଆର ଲକ୍ଷ୍ୟ ସିରିଜ୍‌ରେ ଆଗୁଆ 

ପ୍ରଥମ ମ୍ୟାଚ୍‌ରେ ବିଜୟ ପରେ ଭାରତୀୟ ଦଳର ମନୋବଳ ଉଚ୍ଚ ରହିଛି। ଦ୍ୱିତୀୟ ମ୍ୟାଚ୍‌ରେ ମଧ୍ୟ ସେହି ପ୍ରଦର୍ଶନ ଦୋହରାଇବାକୁ ଦଳ ଚାହିଁବ। କିନ୍ତୁ ବର୍ଷା ଯୋଗୁଁ ମ୍ୟାଚ୍‌ରେ ବାଧା ସୃଷ୍ଟି ହେବା ଉଭୟ ଦଳର ଯୋଜନାକୁ ପ୍ରଭାବିତ କରିପାରେ।ଏବେ ସମସ୍ତଙ୍କ ଅପେକ୍ଷା ବର୍ଷା ଛାଡ଼ିବା ଏବଂ ମ୍ୟାଚ୍ ଆରମ୍ଭ ହେବାକୁ। ଟସ୍‌ ଓ ଖେଳ ଆରମ୍ଭର ସଠିକ୍ ସମୟ ନେଇ ଅଧିକାରିକ ଘୋଷଣାକୁ ଅପେକ୍ଷା କରାଯାଇଛି।

ନୂଆଦିଲ୍ଲୀ: ଭାରତୀୟ କ୍ରିକେଟ୍‌ର ଅନ୍ୟତମ ଅଭିଜ୍ଞ ଦ୍ରୁତ ବୋଲର ମହମ୍ମଦ ଶାମି ଟେଷ୍ଟ କ୍ରିକେଟ୍‌ରୁ ଅବସର ଘୋଷଣା କରିଛନ୍ତି। ନଭେମ୍ବର ୬ ତାରିଖ ଶୁକ୍ରବାର ଦିନ ସୋସିଆଲ ମିଡିଆରେ ଏକ ଭିଡିଓ ଓ ଭାବପ୍ରବଣ ବାର୍ତ୍ତା ଜରିଆରେ ସେ ଏହି ନିଷ୍ପତ୍ତି ଜଣାଇଛନ୍ତି। ଏହା ସହ ତାଙ୍କର ଦୀର୍ଘ ଟେଷ୍ଟ କ୍ୟାରିୟରରେ ପୂର୍ଣ୍ଣଚ୍ଛେଦ ପଡ଼ିଛି। ତେବେ ଦିନିକିଆ ଓ ଟି-୨୦ ଭଳି ସୀମିତ ଓଭର କ୍ରିକେଟ୍‌ରେ ସେ ଭାରତ ପାଇଁ ଖେଳିବା ଜାରି ରଖିବେ।

ଦୀର୍ଘ ଦିନ ଧରି ଭାରତୀୟ ଟେଷ୍ଟ ଦଳରୁ ବାଦ୍ ପଡ଼ିଥିବା ଶାମିଙ୍କ ପ୍ରତ୍ୟାବର୍ତ୍ତନ ନେଇ ଆଶା ରଖିଥିଲେ କ୍ରିକେଟ୍ ପ୍ରେମୀ। ଏଥିପାଇଁ ସେ ଘରୋଇ କ୍ରିକେଟ୍‌ରେ ମଧ୍ୟ ନିଜ ଦକ୍ଷତା ପ୍ରମାଣ କରୁଥିଲେ। ରଣଜୀ ଟ୍ରଫିରେ ବଙ୍ଗଳା ପକ୍ଷରୁ ଖେଳି ଗତ ସିଜନରେ ୩୬ଟି ୱିକେଟ୍ ହାସଲ କରିଥିଲେ। ଚଳିତ ସିଜନରେ ମଧ୍ୟ ତିନୋଟି ମ୍ୟାଚ୍‌ରୁ ୧୪ଟି ୱିକେଟ୍ ନେଇ ନିଜ ଫର୍ମର ପରିଚୟ ଦେଇଥିଲେ। ହେଲେ ଏବେ ଟେଷ୍ଟ କ୍ରିକେଟ୍‌କୁ ବିଦାୟ ଦେବାର ନିଷ୍ପତ୍ତି ନେଇଛନ୍ତି ଏହି ଅଭିଜ୍ଞ ପେସର୍।

ଭାବପ୍ରବଣ ବାର୍ତ୍ତାରେ ଜଣାଇଲେ ଅବସର

ଅବସର ଘୋଷଣା ସହ ଶାମି ନିଜ ଟେଷ୍ଟ ଯାତ୍ରାର ଅନେକ ସ୍ମୃତିକୁ ମନେ ପକାଇଛନ୍ତି। ପ୍ରଥମ ଥର ଭାରତୀୟ ଜର୍ସି ପିନ୍ଧିବା ସମୟର ସ୍ୱପ୍ନଠାରୁ ଆରମ୍ଭ କରି ଆହତ ସମସ୍ୟା, ସଂଘର୍ଷ ଓ ପଡ଼ିଆକୁ ଫେରିବାର ଅନୁଭୂତି ପର୍ଯ୍ୟନ୍ତ ସବୁକିଛି ତାଙ୍କ ପାଇଁ ଅବିସ୍ମରଣୀୟ ବୋଲି କହିଛନ୍ତି।

ଶାମିଙ୍କ କହିବା ଅନୁସାରେ, ଟେଷ୍ଟ କ୍ରିକେଟ୍ ତାଙ୍କ ପାଇଁ କେବଳ ଏକ ଖେଳର ଫର୍ମାଟ୍ ନଥିଲା, ବରଂ ଜୀବନର ଏକ ଅତ୍ୟନ୍ତ ମୂଲ୍ୟବାନ ଅଧ୍ୟାୟ ଥିଲା। ଭାରୀ ମନ ଓ ଅନେକ ସୁନ୍ଦର ସ୍ମୃତିକୁ ସାଥୀ କରି ସେ ଏହି ଫର୍ମାଟ୍‌ରୁ ବିଦାୟ ନେଉଥିବା ଉଲ୍ଲେଖ କରିଛନ୍ତି।

ବିସିସିଆଇ ଓ ବଙ୍ଗଳା କ୍ରିକେଟ୍ ସଂଘକୁ ଧନ୍ୟବାଦ

ନିଜ କ୍ରିକେଟ୍ ଯାତ୍ରାରେ ସହଯୋଗ କରିଥିବା ସମସ୍ତ ଖେଳାଳି, ପ୍ରଶିକ୍ଷକ, ପରିବାର ସଦସ୍ୟ ଓ ପ୍ରଶଂସକଙ୍କୁ ଶାମି କୃତଜ୍ଞତା ଜଣାଇଛନ୍ତି। ଏହା ସହ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (BCCI) ଏବଂ କ୍ରିକେଟ୍ ଆସୋସିଏସନ୍ ଅଫ୍ ବେଙ୍ଗଲ (CAB)କୁ ମଧ୍ୟ ସେ ବିଶେଷ ଧନ୍ୟବାଦ ଦେଇଛନ୍ତି।

ତାଙ୍କ ପ୍ରତି ଭରସା ରଖିବା ସହ ନିଜ ପ୍ରତିଭାକୁ ଆଗକୁ ନେବା ପାଇଁ ସୁଯୋଗ ଦେଇଥିବାରୁ ଉଭୟ ସଂସ୍ଥାର ଅବଦାନକୁ ସେ ସ୍ମରଣ କରିଛନ୍ତି। ଟେଷ୍ଟ କ୍ରିକେଟ୍‌ରେ ତାଙ୍କର ଶେଷ ବଲ୍ ବୋଲିଂ ହୋଇସାରିଥିଲେ ମଧ୍ୟ ଭାରତ ପାଇଁ ଖେଳିବାର ଗର୍ବ ସବୁବେଳେ ହୃଦୟରେ ରହିବ ବୋଲି ଶାମି କହିଛନ୍ତି।

ଏମିତି ରହିଛି ଶାମିଙ୍କ ଟେଷ୍ଟ କ୍ୟାରିୟର

ଭାରତ ପାଇଁ ୬୪ଟି ଟେଷ୍ଟ ମ୍ୟାଚ୍ ଖେଳି ଶାମି ନିଜ ଲାଲ୍ ବଲ୍ କ୍ୟାରିୟରର ଅନ୍ତ ଘଟାଇଛନ୍ତି। ଏହି ମ୍ୟାଚ୍‌ଗୁଡ଼ିକର ୧୨୨ଟି ଇନିଂସରେ ବୋଲିଂ କରି ସେ ମୋଟ ୨୨୯ଟି ୱିକେଟ୍ ନେଇଛନ୍ତି। ତାଙ୍କ ବୋଲିଂ ହାର ୨୭.୭୧ ରହିଥିବା ବେଳେ ଗୋଟିଏ ମ୍ୟାଚ୍‌ରେ ଶ୍ରେଷ୍ଠ ପ୍ରଦର୍ଶନ ୯ ୱିକେଟ୍‌ରେ ୧୧୮ ରନ୍ ରହିଛି। ଏହା ବ୍ୟତୀତ ସେ ୬ ଥର ପାଞ୍ଚ କିମ୍ବା ତା'ଠାରୁ ଅଧିକ ୱିକେଟ୍ ନେବାର ସଫଳତା ହାସଲ କରିଛନ୍ତି।

କଟକ: ହକି ଇଣ୍ଡିଆର ନିର୍ବାଚନ ପ୍ରକ୍ରିୟାକୁ ନେଇ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି ଓଡ଼ିଶା ହାଇକୋର୍ଟ। ହକି ଇଣ୍ଡିଆର ନିର୍ବାଚନ ଉପରେ ଅଦାଲତ ରହିତାଦେଶ ଜାରି କରିଛନ୍ତି। ପରବର୍ତ୍ତୀ ଶୁଣାଣି ନହେବା ପର୍ଯ୍ୟନ୍ତ ଏହି ରୋକ୍ ବଳବତ୍ତର ରହିବ। ଏଥିସହ ହକି ଇଣ୍ଡିଆ ପକ୍ଷରୁ ହକି ଓଡ଼ିଶାକୁ ଜାରି କରାଯାଇଥିବା କାରଣ ଦର୍ଶାଅ ନୋଟିସ୍ ଉପରେ ମଧ୍ୟ ହାଇକୋର୍ଟ ରହିତାଦେଶ ଲଗାଇଛନ୍ତି। ଆସନ୍ତା ଡିସେମ୍ବର ୯ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।

ସୂଚନା ଅନୁସାରେ, ହକି ଇଣ୍ଡିଆର ନିର୍ବାଚନ ପ୍ରକ୍ରିୟାରୁ ଓଡ଼ିଶା ହକି ସଂଘକୁ ବାଦ୍ ଦେବା ପାଇଁ ହକି ଇଣ୍ଡିଆ ପକ୍ଷରୁ କାରଣ ଦର୍ଶାଅ ନୋଟିସ୍ ଜାରି ହୋଇଥିଲା। କେବଳ ସେତିକି ନୁହେଁ, ହକି ଓଡ଼ିଶାର ସ୍ଥାୟୀ ସଦସ୍ୟତା ରଦ୍ଦ କରିବା ନେଇ ମଧ୍ୟ ନୋଟିସ୍ ଦିଆଯାଇଥିଲା। ଏହି ପଦକ୍ଷେପକୁ ଚ୍ୟାଲେଞ୍ଜ କରି ମାମଲା ହାଇକୋର୍ଟରେ ପହଞ୍ଚିଥିଲା। ଶୁଣାଣି ସମୟରେ ଅଦାଲତ ଉଭୟ ନିର୍ବାଚନ ପ୍ରକ୍ରିୟା ଏବଂ କାରଣ ଦର୍ଶାଅ ନୋଟିସ୍ ଉପରେ ଅନ୍ତରୀଣ ରୋକ୍ ଲଗାଇଛନ୍ତି।

ଭାରତୀୟ ହକିର ବିକାଶରେ ଓଡ଼ିଶାର ଅବଦାନକୁ ନେଇ ମଧ୍ୟ ଏହି ମାମଲାରେ ଯୁକ୍ତି ଉପସ୍ଥାପନ କରାଯାଇଛି। ଓଡ଼ିଶା ମାଇନିଂ କର୍ପୋରେସନ୍ (OMC) ଭାରତରେ ହକିର ପ୍ରଚାର, ପ୍ରସାର ଓ ଉନ୍ନତି ପାଇଁ ହକି ଇଣ୍ଡିଆକୁ ୧୦୦ କୋଟି ଟଙ୍କାରୁ ଅଧିକ ଆର୍ଥିକ ସହାୟତା ଦେଇଥିବା କୁହାଯାଇଛି। ଏହାବ୍ୟତୀତ ଦେଶକୁ ଅନେକ ପ୍ରତିଭାବାନ ହକି ଖେଳାଳି ଦେବାରେ ମଧ୍ୟ ଓଡ଼ିଶାର ଗୁରୁତ୍ୱପୂର୍ଣ୍ଣ ଭୂମିକା ରହିଛି।

ଅନ୍ୟପକ୍ଷରେ, ଭାରତ ସରକାରଙ୍କ ନ୍ୟାସନାଲ ସ୍ପୋର୍ଟସ ଗଭର୍ଣ୍ଣାନ୍ସ ଆଇନର ବ୍ୟବସ୍ଥା ଆଧାରରେ ଓଡ଼ିଶା ହକି ସଂଘକୁ ନିର୍ବାଚନ ପ୍ରକ୍ରିୟାରୁ ବାଦ୍ ଦେବା ଆଇନସମ୍ମତ ନୁହେଁ ବୋଲି ଆଡଭୋକେଟ୍ ଜେନେରାଲ ଯୁକ୍ତି ରଖିଥିଲେ। ଓଡ଼ିଶାର ହକି ପ୍ରତି ଅବଦାନ ଏବଂ ଆଇନଗତ ଅଧିକାରକୁ ଆଧାର କରି ଏହି ଯୁକ୍ତି ଉପସ୍ଥାପନ କରାଯାଇଥିଲା।

ନୂଆଦିଲ୍ଲୀ: ନ୍ୟୁଜିଲାଣ୍ଡ ବିପକ୍ଷ ଚଳିତ ଦିନିକିଆ ସିରିଜ୍ ମଧ୍ୟରେ ଭାରତୀୟ ଦଳରେ ହୋଇଛି ଏକ ବଡ଼ ପରିବର୍ତ୍ତନ। ଅଲରାଉଣ୍ଡର ନୀତିଶ କୁମାର ରେଡ୍ଡୀ ସିରିଜ୍‌ର ବାକି ମ୍ୟାଚ୍‌ଗୁଡ଼ିକରୁ ବାଦ୍ ପଡ଼ିଛନ୍ତି। ଅନ୍ୟପଟେ ଦ୍ରୁତ ବୋଲର ମହମ୍ମଦ ସିରାଜ ଦ୍ୱିତୀୟ ଦିନିକିଆ ପୂର୍ବରୁ ଦଳ ସହ ଯୋଗ ଦେଇଥିବାରୁ ତାଙ୍କୁ ନେଇ ବଢ଼ିଛି ଚର୍ଚ୍ଚା। ନଭେମ୍ବର ୭ ତାରିଖରେ ୱେଲିଂଟନ୍‌ରେ ଖେଳାଯିବ ଏହି ମ୍ୟାଚ୍।

ଆଗାମୀ ଟେଷ୍ଟ ସିରିଜ୍‌କୁ ଆଖିରେ ରଖି ନୀତିଶ ରେଡ୍ଡୀଙ୍କୁ ଦିନିକିଆ ଦଳରୁ ମୁକ୍ତ କରାଯାଇଛି। ନଭେମ୍ବର ୧୯ରୁ ଆରମ୍ଭ ହେବାକୁ ଥିବା ଟେଷ୍ଟ ସିରିଜ୍ ପୂର୍ବରୁ ସେ ନିଜ ପ୍ରସ୍ତୁତିକୁ ଅଧିକ ମଜବୁତ କରିବେ। ଏଥିପାଇଁ ସେ ଭାରତ-A ପକ୍ଷରୁ ନଭେମ୍ବର ୭ରୁ ଆରମ୍ଭ ହେବାକୁ ଥିବା ତୃତୀୟ ଅନଅଫିସିଆଲ୍ ଟେଷ୍ଟ ମ୍ୟାଚ୍ ଖେଳିବେ। ଉଲ୍ଲେଖଯୋଗ୍ୟ, ନୀତିଶ ପ୍ରଥମ ଦିନିକିଆ ମ୍ୟାଚ୍‌ରେ ମଧ୍ୟ ଖେଳିନଥିଲେ। ଏବେ ଟେଷ୍ଟ ଫର୍ମାଟ୍‌ ଉପରେ ଧ୍ୟାନ ଦେବା ପାଇଁ ତାଙ୍କୁ ଅବଶିଷ୍ଟ ଦିନିକିଆ ମ୍ୟାଚ୍‌ରୁ ଦୂରେଇ ରଖାଯାଇଛି।

ଦ୍ୱିତୀୟ ଦିନିକିଆରେ ଖେଳିପାରନ୍ତି ସିରାଜ

ପ୍ରଥମ ଦିନିକିଆରେ ମହମ୍ମଦ ସିରାଜଙ୍କୁ ଭାରତୀୟ ଏକାଦଶରେ ସ୍ଥାନ ମିଳିନଥିଲା। ସେହି ସମୟରେ ସେ ଭାରତ-A ପକ୍ଷରୁ ଦ୍ୱିତୀୟ ଅନଅଫିସିଆଲ୍ ଟେଷ୍ଟ ମ୍ୟାଚ୍ ଖେଳୁଥିଲେ। ଏହି କାରଣରୁ ସେ ପ୍ରଥମ ଦିନିକିଆ ପାଇଁ ଦଳ ସହ ଯୋଗ ଦେଇପାରିନଥିଲେ। କିନ୍ତୁ ଏବେ ସିରାଜ ୱେଲିଂଟନ୍‌ରେ ଭାରତୀୟ ଦଳ ସହ ସାମିଲ ହୋଇଛନ୍ତି। ତେଣୁ ଦ୍ୱିତୀୟ ଦିନିକିଆରେ ତାଙ୍କୁ ଖେଳିବାର ସୁଯୋଗ ମିଳିପାରେ। ତେବେ ତାଙ୍କୁ କେଉଁ ବୋଲରଙ୍କ ସ୍ଥାନରେ ଏକାଦଶରେ ସାମିଲ କରାଯିବ, ତାହା ଉପରେ ସମସ୍ତଙ୍କ ନଜର ରହିଛି।

ପ୍ରଥମ ମ୍ୟାଚ୍‌ରେ ଭାରତର ଦମଦାର ବିଜୟ

ପାଞ୍ଚ ମ୍ୟାଚ୍‌ ବିଶିଷ୍ଟ ଦିନିକିଆ  ସିରିଜ୍‌ର ପ୍ରଥମ ମୁକାବିଲା ନଭେମ୍ବର ୪ରେ ଅକଲାଣ୍ଡରେ ଖେଳାଯାଇଥିଲା। ଏହି ମ୍ୟାଚ୍‌ରେ ଭାରତୀୟ ବୋଲରଙ୍କ ଚମତ୍କାର ପ୍ରଦର୍ଶନ ଯୋଗୁଁ ନ୍ୟୁଜିଲାଣ୍ଡ ମାତ୍ର ୧୮୫ ରନ୍‌ରେ ଅଲଆଉଟ୍ ହୋଇଥିଲା।

ଅଂଶୁଲ କାମ୍ବୋଜ ୧୦ ଓଭରରେ ମାତ୍ର ୨୨ ରନ୍ ଦେଇଥିବା ବେଳେ ଅର୍ଶଦୀପ ସିଂହ ୪ଟି ୱିକେଟ୍ ଅକ୍ତିଆର କରିଥିଲେ। ବର୍ଷା ଯୋଗୁଁ ମ୍ୟାଚ୍‌ରେ ବାଧା ସୃଷ୍ଟି ହେବା ପରେ DLS ନିୟମ ଅନୁସାରେ ଭାରତକୁ ୧୪୩ ରନ୍‌ର ଲକ୍ଷ୍ୟ ମିଳିଥିଲା। ଭାରତ ୫ ୱିକେଟ୍ ବାକି ଥାଇ ଏହି ଲକ୍ଷ୍ୟ ହାସଲ କରିନେଇଥିଲା। ଏହି ବିଜୟ ସହ ଭାରତ ୫ ମ୍ୟାଚ୍‌ ବିଶିଷ୍ଟ ସିରିଜ୍‌ରେ ୧-୦ରେ ଆଗୁଆ ରହିଛି। ଏବେ ଦ୍ୱିତୀୟ ଦିନିକିଆରେ ସିରାଜଙ୍କ ପ୍ରତ୍ୟାବର୍ତ୍ତନ ଏବଂ ଭାରତର ସମ୍ଭାବ୍ୟ ପ୍ଲେଇଂ ଇଲେଭେନ୍‌କୁ ନେଇ କ୍ରିକେଟ୍ ପ୍ରେମୀଙ୍କ ଉତ୍ସାହ ବଢ଼ିଛି।

ଟିମ୍ ଇଣ୍ଡିଆର ଷ୍ଟାର ବ୍ୟାଟ୍ସମ୍ୟାନ୍ ବିରାଟ କୋହଲି ଚଳିତ ବର୍ଷ ଅର୍ଥାତ୍ ୨୦୨୬ରେ ସର୍ବାଧିକ ଦିନିକିଆ ରନ୍ କରିଥିବା ଶ୍ରେଷ୍ଠ ୧୦ ବ୍ୟାଟ୍ସମ୍ୟାନଙ୍କ ମଧ୍ୟରେ ନିଜର ସ୍ଥାନ ସୁରକ୍ଷିତ କରିଛନ୍ତି। ଏହି ତାଲିକାରେ ଯୁବ ବ୍ୟାଟ୍ସମ୍ୟାନ୍ ଅଧିନାୟକ ଶୁଭମନ ଗିଲ ଶୀର୍ଷରେ ରହିଛନ୍ତି । ଚଳିତ ବର୍ଷ ଦିନିକିଆରେ ସର୍ବାଧିକ ରନ୍ କରିଥିବା ଶ୍ରେଷ୍ଠ ୧୦ ବ୍ୟାଟ୍ସମ୍ୟାନଙ୍କ ତାଲିକାରେ କୋହଲି ଏବଂ ଗିଲ୍ କେବଳ ଦୁଇ ଜଣ ଭାରତୀୟ।

ଅଧିନାୟକ ଗିଲ୍ ଆଉ ୧୦୦୦ ସ୍କୋର୍ କରିବାକୁ ଆଉ ମାତ୍ର ୬୮ ରନ୍ ଦୂରରେ ବ୍ୟବଧାନରେ ରହିଛନ୍ତି ।  ନ୍ୟୁଜିଲାଣ୍ଡ ବିପକ୍ଷରେ ଚାଲିଥିବା ଏକଦିବସୀୟ ସିରିଜର ପ୍ରଥମ ମ୍ୟାଚ୍‌ରେ ୩୭ ରନ୍‌ର ଏକ ଇନିଂସ ଖେଳିଥିଲେ। ଏହି ଇନିଂସ ପରେ ସେ ୨୦୨୬ ମସିହାରେ ୧୨ ଇନିଂସରେ ୧୦୩.୫୫ ହାରରେ ୯୩୨ ରନ୍ କରିଛନ୍ତି। ଗିଲ୍‌ଙ୍କ ଷ୍ଟ୍ରାଇକ୍ ରେଟ୍ ମଧ୍ୟ ଭଲ ରହିଛି । ସେ ଚଳିତ ବର୍ଷ ୧୧୫.୦୬ ହାରରେ ରନ୍ କରିଛନ୍ତି। ସେ ଗୋଟିଏ ଦ୍ୱିଶତକ ସମେତ ୩ ଶତକ ଏବଂ ୫ ଅର୍ଦ୍ଧଶତକ ହାସଲ କରିଛନ୍ତି।

ଦ୍ୱିତୀୟ ଭାରତୀୟ କ୍ରିକେଟର୍ ବିରାଟ କୋହଲି ୬୨୬ ରନ୍ ସହିତ ଦଶମ ସ୍ଥାନରେ ରହିଛନ୍ତି । ବିରାଟ କୋହଲି ନ୍ୟୁଜିଲ୍ୟାଣ୍ଡ ବିପକ୍ଷ ପ୍ରଥମ ଦିନିକିଆରେ ୭୪ ରନର ଏକ ମ୍ୟାଚ୍ ବିଜୟୀ ଇନିଂସ ଖେଳିଥିଲେ। ତାଙ୍କ ଇନିଂସ ଆଧାରରେ, ଭାରତ ୫ ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ପ୍ରଥମ ମ୍ୟାଚ୍ ୫ ୱିକେଟରେ ଜିତିବାରେ ସଫଳ ହୋଇଥିଲା । ଏହି ବିଜୟ ସହିତ, ଟିମ୍ ଇଣ୍ଡିଆ ସିରିଜରେ ୧-୦ରେ ଆଗୁଆ ରହିଛି । ଏହା ସହିତ, ବିରାଟ କୋହଲି ଏହି ବର୍ଷ ସର୍ବାଧିକ ରନ୍ କରିଥିବା ଶ୍ରେଷ୍ଠ ୧୦ ବ୍ୟାଟ୍ସମ୍ୟାନଙ୍କ ମଧ୍ୟରେ ସାମିଲ ହୋଇଛନ୍ତି। 

ଶ୍ରେଷ୍ଠ ୧୦ ଜଣ ବ୍ୟାଟସମ୍ୟାନ୍

ଶୁଭମନ ଗିଲ (ଭାରତ) – ୯୩୨

ବେନ୍ ଡକେଟ୍ (ଇଂଲଣ୍ଡ) – ୭୩୭

ପବନ ରଥନାୟକ (ଶ୍ରୀଲଙ୍କା) - ୬୯୨

ଜୋ ରୁଟ୍ (ଇଂଲଣ୍ଡ) - ୬୮୦

ଏମଜି ଇରାସମସ୍ (ନାମ୍ବିଆ) - 662

ଜେଏନ ଫ୍ରାଏଲିଙ୍କ (ନାମ୍ବିଆ) – ୬୬୧

ଜତିନ୍ଦର ସିଂହ (ଓମାନ) – ୬୫୮

ଏଲ୍. ଷ୍ଟିନକାମ୍ପ (ନାମ୍ବିଆ) - 648

ଡିଏସ୍ ଏରି (ନେପାଳ) – ୬୩୭

ବିରାଟ କୋହଲି (ଭାରତ) – ୬୨୬

ନୂଆଦିଲ୍ଲୀ: ନ୍ୟୁଜିଲାଣ୍ଡ ଗସ୍ତରେ ଥିବା ଭାରତ-A ଦଳକୁ ମିଳିଛି ଦୁଇ ଅଭିଜ୍ଞ ଖେଳାଳିଙ୍କ ସାଥ୍। ଆଗାମୀ ତୃତୀୟ ଅନ୍‌ଅଫିସିଆଲ୍ ଟେଷ୍ଟ ମ୍ୟାଚ୍‌ରେ ଜସପ୍ରୀତ ବୁମ୍‌ରା ଏବଂ ରବୀନ୍ଦ୍ର ଜାଡେଜା ଖେଳିବାକୁ ଯାଉଥିବାବେଳେ ଆହତ ସମସ୍ୟାରୁ ମୁକୁଳି ନଥିବା ଋଷଭ ପନ୍ତ ଏହି ମ୍ୟାଚ୍‌ରୁ ବାଦ୍ ପଡ଼ିବେ। ନଭେମ୍ବର ୭ରୁ ନ୍ୟୁଜିଲାଣ୍ଡ-A ବିପକ୍ଷରେ ଲିଙ୍କନ୍‌ରେ ଏହି ଚାରିଦିନିଆ ମ୍ୟାଚ୍ ଖେଳାଯିବ।

ଆହତ ସମସ୍ୟା ପାଇଁ ଖେଳିବେନି ପନ୍ତ

ଋଷଭ ପନ୍ତ ଏବେ ବାମ ପାର୍ଶ୍ୱର ମାଂସପେଶୀ ଜନିତ ଆଘାତରୁ ସୁସ୍ଥ ହେଉଛନ୍ତି। ସେ ବେଙ୍ଗାଲୁରୁସ୍ଥିତ BCCI ସେଣ୍ଟର ଅଫ୍ ଏକ୍ସଲେନ୍ସ (CoE)ରେ ରିହାବିଲିଟେସନ୍‌ରେ ଅଛନ୍ତି। ଏହି କାରଣରୁ ସେ ନ୍ୟୁଜିଲାଣ୍ଡ-A ବିପକ୍ଷ ତୃତୀୟ ମ୍ୟାଚ୍‌ରେ ଖେଳିପାରିବେ ନାହିଁ।

ପନ୍ତଙ୍କ ଅନୁପସ୍ଥିତିରେ ତିଳକ ବର୍ମା ଭାରତ-A ଦଳରେ ସାମିଲ ହୋଇଛନ୍ତି। ତେବେ ପନ୍ତଙ୍କ ଆଘାତ ଆଗାମୀ ନ୍ୟୁଜିଲାଣ୍ଡ ବିପକ୍ଷ ଦୁଇଟିକିଆ ଟେଷ୍ଟ ସିରିଜ୍‌ରେ ତାଙ୍କ ଖେଳିବା ନେଇ ମଧ୍ୟ ଆଶଙ୍କା ସୃଷ୍ଟି କରିଛି।

ବୁମ୍‌ରା ଓ ଜାଡେଜାଙ୍କ ଉପରେ ରହିବ ନଜର

ଆଗାମୀ ଟେଷ୍ଟ ସିରିଜ୍‌କୁ ଦୃଷ୍ଟିରେ ରଖି ବୁମ୍‌ରା ଏବଂ ଜାଡେଜା ଭାରତ-A ପକ୍ଷରୁ ଖେଳିବେ। ବୁମ୍‌ରା ନ୍ୟୁଜିଲାଣ୍ଡରେ ପହଞ୍ଚିବା ପରେ ଦୁଇଦିନ ଧରି ଦଳ ସହ ଅଭ୍ୟାସ କରିଛନ୍ତି।

ସେହିପରି ରବୀନ୍ଦ୍ର ଜାଡେଜା ରଣଜୀ ଟ୍ରଫିରେ ସୌରାଷ୍ଟ୍ର ପକ୍ଷରୁ ଖେଳି ଭଲ ପ୍ରଦର୍ଶନ କରିଛନ୍ତି। ଦୁଇଟି ମ୍ୟାଚ୍‌ରେ ସେ ମୋଟ ୭ଟି ୱିକେଟ୍ ନେବା ସହ ଗୋଟିଏ ଶତକ ମଧ୍ୟ ହାସଲ କରିଥିଲେ। ତେଣୁ ନ୍ୟୁଜିଲାଣ୍ଡର ପରିବେଶରେ ତାଙ୍କ ପ୍ରଦର୍ଶନ ଉପରେ ନଜର ରହିବ।

ଧ୍ରୁବ ଜୁରେଲଙ୍କ ହାତରେ ଦଳର ନେତୃତ୍ୱ

ତୃତୀୟ ମ୍ୟାଚ୍‌ରେ ମଧ୍ୟ ଧ୍ରୁବ ଜୁରେଲ ଭାରତ-A ଦଳର ନେତୃତ୍ୱ ନେବେ। ପନ୍ତ ନଥିବାରୁ ୱିକେଟ୍ କିପିଂ ଦାୟିତ୍ୱ ମଧ୍ୟ ଜୁରେଲଙ୍କୁ ମିଳିବାର ସମ୍ଭାବନା ରହିଛି। ଏହାବ୍ୟତୀତ ଅଲରାଉଣ୍ଡର ନୀତିଶ କୁମାର ରେଡ୍ଡୀ ମଧ୍ୟ ଦଳରେ ରହିବେ। ହାମଷ୍ଟ୍ରିଙ୍ଗ୍ ଆଘାତରୁ ଫେରୁଥିବା ପ୍ରସିଦ୍ଧ କୃଷ୍ଣ ମଧ୍ୟ ଏହି ମ୍ୟାଚ୍‌ରେ ଖେଳିବାର ସମ୍ଭାବନା ରହିଛି।

ମୋହାଲି: ଏସୀୟ ହକିରେ ପୁଣି ଭାରତର ଦବଦବା। ରୋମାଞ୍ଚକର ଫାଇନାଲ ମୁକାବିଲାରେ ଜାପାନକୁ ୪-୧ ଗୋଲ୍‌ରେ ପରାସ୍ତ କରି ୨୦୨୬ ଏସିଆନ୍ ଚାମ୍ପିଅନ୍ସ ଟ୍ରଫି ହାତେଇଛି ଭାରତୀୟ ହକି ଦଳ। ମ୍ୟାଚ୍‌ର ପ୍ରଥମ ତିନିଟି କ୍ୱାର୍ଟର ଯାଏଁ ଉଭୟ ଦଳ ମଧ୍ୟରେ କଡ଼ା ଟକ୍କର ହୋଇଥିବାବେଳେ ଶେଷ କ୍ୱାର୍ଟରରେ ଲଗାତାର ୩ଟି ଗୋଲ୍‌ ଦେଇ ଚାମ୍ପିଅନ୍ ହୋଇଛି ଟିମ୍ ଇଣ୍ଡିଆ। ଏହା ସହ ଭାରତ ଷଷ୍ଠ ଥର ପାଇଁ ଏହି ସମ୍ମାନଜନକ ଟ୍ରଫି ଜିତିବାର ଗୌରବ ହାସଲ କରିଛି।

ଗୁରୁବାର (ନଭେମ୍ବର ୫) ମୋହାଲିସ୍ଥିତ ଅଲିମ୍ପିଆନ୍ ବଲବୀର ସିଂହ ସିନିୟର ଇଣ୍ଟରନ୍ୟାସନାଲ ହକି ଷ୍ଟାଡିୟମରେ ଖେଳାଯାଇଥିଲା ଏହି ହାଇଭୋଲଟେଜ୍ ଫାଇନାଲ। ମ୍ୟାଚ୍‌ ଆରମ୍ଭରୁ ଜାପାନ ଆକ୍ରମଣାତ୍ମକ ଖେଳ ପ୍ରଦର୍ଶନ କରି ଭାରତକୁ ଚାପରେ ରଖିଥିଲା। ତେବେ ଶେଷ ମୁହୂର୍ତ୍ତରେ ଭାରତୀୟ ଖେଳାଳିଙ୍କ ଚମତ୍କାର ପ୍ରଦର୍ଶନ ମ୍ୟାଚ୍‌ର ଗତିପଥ ବଦଳାଇ ଦେଇଥିଲା।

ପ୍ରଥମାର୍ଦ୍ଧରେ ଆଗୁଆ ରହିଲା ଜାପାନ

ମ୍ୟାଚ୍‌ର ତୃତୀୟ ମିନିଟ୍‌ରେ ଜାପାନ ପକ୍ଷରୁ କଜୁମାସା ମାତ୍ସୁମୋତୋ ଗୋଲ୍‌ କରି ଦଳକୁ ୧-୦ରେ ଆଗୁଆ କରିଥିଲେ। ଏହି ଗୋଲ୍‌ ପରେ ଭାରତୀୟ ଦଳ ମ୍ୟାଚ୍‌କୁ ଫେରିବା ପାଇଁ ଜୋରଦାର ପ୍ରୟାସ କରିଥିଲା। କିନ୍ତୁ ଜାପାନର ଦୃଢ଼ ରକ୍ଷଣଭାଗ ଯୋଗୁଁ ଭାରତକୁ ପ୍ରଥମ ଦୁଇଟି କ୍ୱାର୍ଟରରେ ସଫଳତା ମିଳିନଥିଲା। ଫଳରେ ପ୍ରଥମାର୍ଦ୍ଧ ଶେଷ ସୁଦ୍ଧା ଜାପାନ ୧-୦ ଗୋଲ୍‌ରେ ଆଗରେ ରହିଥିଲା। ଏହି ସ୍ଥିତି ଭାରତୀୟ ସମର୍ଥକଙ୍କ ମଧ୍ୟରେ ଉତ୍କଣ୍ଠା ବଢ଼ାଇ ଦେଇଥିଲା।

ତୃତୀୟ କ୍ୱାର୍ଟରରେ ଭାରତର ପ୍ରତ୍ୟାବର୍ତ୍ତନ

ତୃତୀୟ କ୍ୱାର୍ଟରରେ ଭାରତ ନିଜର ଖେଳର ଗତି ବଢ଼ାଇଥିଲା। ଦୀର୍ଘ ସମୟର ଅପେକ୍ଷା ପରେ ୪୨ତମ ମିନିଟ୍‌ରେ ଶିଲାନନ୍ଦ ଲାକ୍ରା ଗୋଲ୍‌ କରି ଭାରତକୁ ମ୍ୟାଚ୍‌କୁ ଫେରାଇ ଆଣିଥିଲେ। ଏହି ଗୋଲ୍‌ ସହ ସ୍କୋର ୧-୧ ହୋଇଯାଇଥିଲା। ତୃତୀୟ କ୍ୱାର୍ଟର ଶେଷ ସୁଦ୍ଧା ଉଭୟ ଦଳ ସମାନ ସ୍ଥିତିରେ ରହିଥିଲେ। ତେଣୁ ଶେଷ ୧୫ ମିନିଟ୍‌ର ଖେଳ ଉପରେ ସମସ୍ତଙ୍କ ନଜର ରହିଥିଲା।

ଶେଷ ୧୫ ମିନିଟ୍‌ରେ ଭାରତର ଗୋଲ୍‌ ବର୍ଷା

ଚତୁର୍ଥ କ୍ୱାର୍ଟରରେ ଭାରତୀୟ ଦଳ ସମ୍ପୂର୍ଣ୍ଣ ଆକ୍ରମଣାତ୍ମକ ମୁଡ୍‌କୁ ଆସିଥିଲା। ୪୮ତମ ମିନିଟ୍‌ରେ ଦିଲପ୍ରୀତ ସିଂହ ଗୋଲ୍‌ କରି ଭାରତକୁ ୨-୧ରେ ଆଗୁଆ କରିଥିଲେ। ଏହାର ମାତ୍ର ୫ ମିନିଟ୍‌ ପରେ ଅର୍ଥାତ୍ ୫୩ତମ ମିନିଟ୍‌ରେ ଜୁଗରାଜ ସିଂହ ଆଉ ଏକ ଗୋଲ୍‌ ଦେଇ ଦଳର ଅଗ୍ରଣୀକୁ ୩-୧ କରିଥିଲେ।

ଭାରତର ଆକ୍ରମଣ ଏତିକିରେ ଅଟକି ନଥିଲା। ୫୪ତମ ମିନିଟ୍‌ରେ ବିବେକ ପ୍ରସାଦ ଚତୁର୍ଥ ଗୋଲ୍‌ ଦେଇ ଜାପାନର ଫେରିବା ଆଶାକୁ ପ୍ରାୟ ଶେଷ କରିଦେଇଥିଲେ। ଶେଷ ପର୍ଯ୍ୟନ୍ତ ଜାପାନ ଆଉ କୌଣସି ଗୋଲ୍‌ କରିପାରିନଥିଲା। ଫଳରେ ଭାରତ ୪-୧ ଗୋଲ୍‌ରେ ବିଜୟୀ ହୋଇ ଟ୍ରଫି ହାତେଇଥିଲା।

ଏହି ବିଜୟ ସହ ଏସିଆନ୍ ଚାମ୍ପିଅନ୍ସ ଟ୍ରଫିରେ ଭାରତ ନିଜର ଷଷ୍ଠ ଟାଇଟଲ୍‌ ଜିତିଛି। ଶେଷ କ୍ୱାର୍ଟରରେ ଦଳର ଲଢ଼ୁଆ ମନୋଭାବ ଏବଂ ଆକ୍ରମଣାତ୍ମକ ଖେଳ ଭାରତୀୟ ହକିପ୍ରେମୀଙ୍କୁ ଆଉ ଏକ ସ୍ମରଣୀୟ ବିଜୟର ଉପହାର ଦେଇଛି।

ନୂଆଦିଲ୍ଲୀ: ଦିଲ୍ଲୀର ବିଷାକ୍ତ ବାୟୁ ଏବଂ ଷ୍ଟାଡିୟମରେ ନବୀକରଣ କାର୍ଯ୍ୟକୁ ଦୃଷ୍ଟିରେ ରଖି ଭାରତ-ଶ୍ରୀଲଙ୍କା ଦିନିକିଆ ସିରିଜ୍‌ର ପ୍ରଥମ ମ୍ୟାଚ୍‌ର ଭେନ୍ୟୁ ପରିବର୍ତ୍ତନ କରିଛି ଭାରତୀୟ କ୍ରିକେଟ୍‌ କଣ୍ଟ୍ରୋଲ ବୋର୍ଡ (BCCI)। ଦିଲ୍ଲୀର ଅରୁଣ ଜେଟଲୀ ଷ୍ଟାଡିୟମ ବଦଳରେ ଏବେ ଏହି ମ୍ୟାଚ୍‌ ଆନ୍ଧ୍ରପ୍ରଦେଶର ବିଶାଖାପାଟଣାରେ ଖେଳାଯିବ।

ଆସନ୍ତା ଡିସେମ୍ବରରେ ଶ୍ରୀଲଙ୍କା କ୍ରିକେଟ୍‌ ଦଳ ଭାରତ ଗସ୍ତରେ ଆସିବ। ଏହି ଗସ୍ତରେ ଉଭୟ ଦଳ ମଧ୍ୟରେ ଦିନିକିଆ ଏବଂ ଟି-୨୦ ସିରିଜ୍‌ ଖେଳାଯିବ। ଡିସେମ୍ବର ୧୩ ତାରିଖରୁ ଦିନିକିଆ ସିରିଜ୍‌ ଆରମ୍ଭ ହେବାକୁ ଥିବାବେଳେ ପ୍ରଥମ ମ୍ୟାଚ୍‌ର ଆୟୋଜନ ଦାୟିତ୍ୱ ପୂର୍ବରୁ ଦିଲ୍ଲୀକୁ ମିଳିଥିଲା।

ତେବେ ଦିଲ୍ଲୀରେ ବଢୁଥିବା ବାୟୁ ପ୍ରଦୂଷଣ ଏବଂ ଅରୁଣ ଜେଟଲୀ ଷ୍ଟାଡିୟମରେ ଚାଲିଥିବା ନବୀକରଣ କାର୍ଯ୍ୟ ଯୋଗୁଁ ମ୍ୟାଚ୍‌ ଆୟୋଜନକୁ ନେଇ ଆଶଙ୍କା ସୃଷ୍ଟି ହୋଇଥିଲା। ଏହି ପରିସ୍ଥିତିରେ ଦିଲ୍ଲୀ ଆଣ୍ଡ ଡିଷ୍ଟ୍ରିକ୍ଟ କ୍ରିକେଟ୍‌ ଆସୋସିଏସନ୍‌ (DDCA) ବିସିସିଆଇକୁ ମ୍ୟାଚ୍‌ର ସ୍ଥାନ ପରିବର୍ତ୍ତନ କରିବାକୁ ଅନୁରୋଧ କରିଥିଲା।

ନଭେମ୍ବର ୫ ତାରିଖ ଗୁରୁବାର ଦିନ ବିସିସିଆଇ ଏକ ଅଧିକାରିକ ବିବୃତି ଜାରି କରି ଏହି ନିଷ୍ପତ୍ତି ସମ୍ପର୍କରେ ସୂଚନା ଦେଇଛି। ଡିଡିସିଏର ଅନୁରୋଧକୁ ଗ୍ରହଣ କରି ପ୍ରଥମ ଦିନିକିଆକୁ ବିଶାଖାପାଟଣାର ACA-VDCA କ୍ରିକେଟ୍‌ ଷ୍ଟାଡିୟମକୁ ସ୍ଥାନାନ୍ତର କରାଯାଇଥିବା ବୋର୍ଡ ସ୍ପଷ୍ଟ କରିଛି। ବିସିସିଆଇ ପକ୍ଷରୁ କୁହାଯାଇଛି ଯେ, ସମ୍ଭାବ୍ୟ ପାଣିପାଗଜନିତ ସମସ୍ୟା ଏବଂ ଷ୍ଟାଡିୟମରେ ପ୍ରସ୍ତାବିତ ନବୀକରଣ କାର୍ଯ୍ୟକୁ ବିଚାରକୁ ନେଇ ଏହି ପରିବର୍ତ୍ତନ କରାଯାଇଛି।

ଭାରତ-ଶ୍ରୀଲଙ୍କା ସିରିଜ୍‌ର ସମ୍ପୂର୍ଣ୍ଣ କାର୍ଯ୍ୟସୂଚୀ

୧୩ ଡିସେମ୍ବର, ରବିବାର – ପ୍ରଥମ ଦିନିକିଆ, ବିଶାଖାପାଟଣା (ଅପରାହ୍ନ ୨ଟା)

୧୬ ଡିସେମ୍ବର, ବୁଧବାର – ଦ୍ୱିତୀୟ ଦିନିକିଆ, ବେଙ୍ଗାଲୁରୁ (ଅପରାହ୍ନ ୨ଟା)

୧୯ ଡିସେମ୍ବର, ଶନିବାର – ତୃତୀୟ ଦିନିକିଆ, ଅହମ୍ମଦାବାଦ (ଅପରାହ୍ନ ୨ଟା)

ଟି-୨୦ ସିରିଜ୍‌

୨୨ ଡିସେମ୍ବର, ମଙ୍ଗଳବାର – ପ୍ରଥମ ଟି-୨୦, ରାଜକୋଟ (ସନ୍ଧ୍ୟା ୭ଟା)

୨୪ ଡିସେମ୍ବର, ଗୁରୁବାର – ଦ୍ୱିତୀୟ ଟି-୨୦, କଟକ (ସନ୍ଧ୍ୟା ୭ଟା)

୨୭ ଡିସେମ୍ବର, ରବିବାର – ତୃତୀୟ ଟି-୨୦, ପୁଣେ (ସନ୍ଧ୍ୟା ୭ଟା)

ଦିଲ୍ଲୀର ପ୍ରଦୂଷଣକୁ ନେଇ କ୍ରିକେଟ୍‌ ମ୍ୟାଚ୍‌ ଆୟୋଜନରେ ସମସ୍ୟା ଉପୁଜିବା ପରେ ବିସିସିଆଇର ଏହି ପଦକ୍ଷେପକୁ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି। ଏବେ ବିଶାଖାପାଟଣାରେ ଭାରତ-ଶ୍ରୀଲଙ୍କା ସିରିଜ୍‌ର ପ୍ରଥମ ମ୍ୟାଚ୍‌କୁ ନେଇ କ୍ରିକେଟ୍‌ପ୍ରେମୀଙ୍କ ମଧ୍ୟରେ ଉତ୍ସାହ ବଢ଼ିଛି।

ନୂଆଦିଲ୍ଲୀ: କୋଟି କୋଟି ଫୁଟବଲ ପ୍ରେମୀଙ୍କ ପାଇଁ ଆସିଛି ନୈରାଶ୍ୟଜନକ ଖବର । ପଡ଼ିଆରେ ଆଉ ଦେଖିବାକୁ ମିଳିବନି ଦିଗ୍ଗଜ ଫୁଟବଲ୍ ଖେଳାଳୀ କ୍ରୀଷ୍ଟିଆନୋ ରୋନାଲ୍ଡୋଙ୍କ ପାଦର ଯାଦୁ । ଅନ୍ତର୍ଜାତୀୟ ଫୁଟବଲରୁ ସନ୍ନ୍ୟାସ ନେଇଛନ୍ତି ପର୍ତ୍ତୁଗାଲ ଫୁଟବୋଲର୍ କ୍ରୀଷ୍ଟିଆନୋ ରୋନାଲ୍ଡୋ । ଗୁରୁବାର ଏକ ସାମାଜିକ ଗଣମାଧ୍ୟମ ପୋଷ୍ଟ ଜରିଆରେ ରୋନାଲ୍ଡୋ ପ୍ରଶଂସକଙ୍କୁ ତାଙ୍କର ଅବସର ନେଇ ସୂଚନା ଦେଇଛନ୍ତି । ରୋନାଲ୍ଡୋ ନିଜ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରି ଅବସର ଘୋଷଣା କରିଛନ୍ତି।

୨୩ ବର୍ଷର ଫୁଟବଲ୍ ଜୀବନ 

୪୧ ବର୍ଷୀୟ ରୋନାଲ୍ଡୋ ଦୀର୍ଘ ଦୁଇ ଦଶନ୍ଧିର ଫୁଟବଲ ଜୀବନରେ ପୂର୍ଣ୍ଣଚ୍ଛେଦ ପକାଇଛନ୍ତି ।  ରୋନାଲ୍ଡୋ ସର୍ବଶ୍ରେଷ୍ଠ ଫୁଟବଲ ଖେଳାଳିମାନଙ୍କ ମଧ୍ୟରୁ ଅନ୍ୟତମ । ତାଙ୍କର ୨୩ ବର୍ଷର ଖେଳ ଜୀବନରେ ସେ ପର୍ତ୍ତୁଗାଲ ପାଇଁ ଅନେକ ସଫଳତା ଭେଟି ଦେଇଛନ୍ତି ।  ସେ ନିଜ ଦେଶ ପାଇଁ ପାଞ୍ଚଟି ବିଶ୍ୱକପ୍ ଖେଳିଥିଲେ ଏବଂ ୟୁରୋପୀୟ ଚାମ୍ପିୟନସିପ୍‌ରେ ଛଅ ଥର ନିଜ ଦଳକୁ ପ୍ରତିନିଧିତ୍ୱ କରିଥିଲେ। କିନ୍ତୁ ତାଙ୍କ ଦେଶକୁ ବିଶ୍ୱ କପ୍ ଦେବାରେ ସେ ବିଫଳ ରହିଛନ୍ତି । 

ସେ ଚଳିତ ବର୍ଷ ଫିଫା ବିଶ୍ୱକପ୍ ପୂର୍ବରୁ ହିଁ ସ୍ପଷ୍ଟ କରିଦେଇଥିଲେ ଯେ ଏହା ତାଙ୍କର ଶେଷ ଟୁର୍ଣ୍ଣାମେଣ୍ଟ ହେବ। ୨୦୨୬ ଫିଫା ବିଶ୍ୱକପ୍‌ରେ ୱେଲ୍ସ ବିପକ୍ଷ ମ୍ୟାଚ୍‌ଟି ଥିଲା ରୋନାଲ୍ଡୋଙ୍କ ଶେଷ ମ୍ୟାଚ୍। ଏହି ଟୁର୍ଣ୍ଣାମେଣ୍ଟରେ ନୈରାଶ୍ୟଜନକ ପ୍ରଦର୍ଶନ ପରେ ସେ ଅବସର ନେବାକୁ ନିଷ୍ପତ୍ତି ନେଇଛନ୍ତି। 

ନିକଟରେ ରୋନାଲ୍ଡୋ ବିବାଦରେ ରହିଥିଲେ । ଜାତୀୟ ଦଳର ପ୍ରଶିକ୍ଷଣ ଶିବିର ଛାଡ଼ି ଚାଲିଯାଇଥିବା ନେଇ ଅଭିଯୋଗ ଆସିବା ପରେ, ପର୍ତ୍ତୁଗାଲ୍ ଫୁଟବଲ୍ ଫେଡେରେସନ୍ ତାଙ୍କ ଉପରେ ୩୦ ଦିନର ପ୍ରତିବନ୍ଧକ ଲଗାଇଥିଲା।

୨୩୪ ମ୍ୟାଚ ଓ ୧୪୬ଟି ଗୋଲ୍ 

୨୦ ଅଗଷ୍ଟ, ୨୦୦୩ ମସିହାରେ ରୋନାଲ୍ଡୋ କାଜାଖସ୍ତାନ ବିପକ୍ଷରେ ନିଜର ଅନ୍ତର୍ଜାତୀୟ ଫୁଟବଲ୍ ଜୀବନ ଆରମ୍ଭ କରିଥିଲେ। ସେବେଠାରୁ ସେ ଏହି କ୍ରୀଡ଼ା ଜଗତରେ ନିଜର ପ୍ରାଧାନ୍ୟ ବିସ୍ତାର କରିବା ସହ ଅନ୍ୟତମ ଶ୍ରେଷ୍ଠ ଫୁଟବଲ୍ ଖେଳାଳି ଭାବେ ନିଜକୁ ପ୍ରତିଷ୍ଠିତ କରିପାରିଛନ୍ତି। ୨୦୦୪ରେ ଗ୍ରୀସ୍ ବିପକ୍ଷରେ ସେ ନିଜର ପ୍ରଥମ ଅନ୍ତର୍ଜାତୀୟ ଗୋଲ୍ ଦେଇଥିଲେ ।  ରୋନାଲ୍ଡୋ ପର୍ତ୍ତୁଗାଲ ପାଇଁ ମୋଟ ୨୩୪ଟି ମ୍ୟାଚ୍ ଖେଳିଛନ୍ତି । ଯେଉଁଥିରେ ୧୪୬ଟି ଗୋଲ୍ ସାମିଲ ରହିଛି । 

୧୦ଟି ହାଟ୍ରିକ୍ 

ସେ ବିଶ୍ୱ ସ୍ତରରେ ୧୦ଟି ହାଟ୍ରିକ୍ ହାସଲ କରିଛନ୍ତି । ଏହା ସହିତ ଦୁଇଟି ମ୍ୟାଚରେ ସେ ଲଗାତର ୪ଟି ଲେଖାଏଁ ଗୋଲ୍ କରିଥିଲେ । ସେହିପରି ୫ଟି ବିଶ୍ୱ କପରେ ମୋଟ ୧୧ଟି ଗୋଲ୍ କରିଛନ୍ତି । ଯାହା ସେ ୨୦୦୬, ୨୦୧୦, ୨୦୧୪, ୨୦୧୮, ୨୦୨୨ ଏବଂ ୨୦୨୬ ବିଶ୍ୱ କପରେ ଖେଳିଛନ୍ତି ।