ନୂଆଦିଲ୍ଲୀ: ଅଣ୍ଡର-୧୯ ଏସିଆ କପ୍ ଫାଇନାଲରେ ପାକିସ୍ତାନକୁ ହରାଇ ଭାରତ ଚାମ୍ପିୟନ ହେବା ପରେ ଏବେ ପୁଣି ଦୁଇ ଦେଶ ମଧ୍ୟରେ କ୍ରିକେଟ୍ ଲଢ଼େଇ ଦେଖିବାକୁ ମିଳିବ। ନଭେମ୍ବର ମାସରେ ହେବାକୁ ଥିବା ଏସିଆ କପ୍ ରାଇଜିଂ ଷ୍ଟାର୍ସ ୨୦୨୬ରେ ଭାରତ-ପାକିସ୍ତାନ ମୁହାଁମୁହିଁ ହେବେ। ଏହି ମ୍ୟାଚ୍‌ରେ ଭାରତୀୟ ଯୁବ ତାରକା ବୈଭବ ସୂର୍ଯ୍ୟବଂଶୀଙ୍କ ଉପରେ ସମସ୍ତଙ୍କ ନଜର ରହିବ। ତିଲକ ବର୍ମାଙ୍କ ନେତୃତ୍ୱରେ ଇଣ୍ଡିଆ-ଏ ଦଳ ଏହି ଟୁର୍ଣ୍ଣାମେଣ୍ଟରେ ଖେଳିବ।

କେବେ ହେବ ଭାରତ-ପାକିସ୍ତାନ ମ୍ୟାଚ୍ ?

ଏସିଆ କପ୍ ରାଇଜିଂ ଷ୍ଟାର୍ସ ୨୦୨୬ ନଭେମ୍ବର ୧୯ରୁ ଆରମ୍ଭ ହେବ। ଏହି ପ୍ରତିଯୋଗିତାରେ ମୋଟ ୮ଟି ଦଳ ଅଂଶଗ୍ରହଣ କରିବେ। ଭାରତ ନିଜର ପ୍ରଥମ ମ୍ୟାଚ୍ ନଭେମ୍ବର ୨୦ରେ ନେପାଳ ବିପକ୍ଷରେ ଖେଳିବ। ଏହାପରେ ନଭେମ୍ବର ୨୨ ରବିବାର ଦିନ ପାକିସ୍ତାନ-ଏ ସହ ଭାରତ-ଏର ମୁକାବିଲା ହେବ।

ଭାରତ-ପାକିସ୍ତାନ ମ୍ୟାଚ୍‌ର ସମ୍ପୂର୍ଣ୍ଣ ବିବରଣୀ

ମ୍ୟାଚ୍: ଭାରତ-ଏ ବନାମ ପାକିସ୍ତାନ-ଏ

ତାରିଖ: ୨୨ ନଭେମ୍ବର ୨୦୨୬, ରବିବାର

ସମୟ: ଅପରାହ୍ନ ୩ଟା ୩୦ ମିନିଟ୍ (ଭାରତୀୟ ସମୟ)

ସ୍ଥାନ: ୱେଷ୍ଟ ଏଣ୍ଡ ପାର୍କ ଇଣ୍ଟରନ୍ୟାସନାଲ୍ କ୍ରିକେଟ୍ ଷ୍ଟାଡିୟମ୍, ଦୋହା, କତାର।

ପାକିସ୍ତାନ ବିପକ୍ଷରେ ଖେଳିବେ ବୈଭବ ସୂର୍ଯ୍ୟବଂଶୀ

ଏହି ମ୍ୟାଚ୍‌ରେ ଭାରତୀୟ ଯୁବ ବ୍ୟାଟର ବୈଭବ ସୂର୍ଯ୍ୟବଂଶୀଙ୍କ ପ୍ରଦର୍ଶନ ଉପରେ ବିଶେଷ ନଜର ରହିବ। ଏହି ଟୁର୍ଣ୍ଣାମେଣ୍ଟ ପାଇଁ ଘୋଷିତ ଭାରତ-ଏ ଦଳରେ ବୈଭବଙ୍କ ସହ ଅଭିଷେକ ଶର୍ମା ଓ ରିଙ୍କୁ ସିଂହଙ୍କ ଭଳି ଅଭିଜ୍ଞ ଖେଳାଳି ମଧ୍ୟ ସାମିଲ ହୋଇଛନ୍ତି।

ଏହାପୂର୍ବରୁ ଏସିଆନ୍ ଗେମ୍ସ ଫାଇନାଲରେ ବୈଭବ ପାକିସ୍ତାନ ବିପକ୍ଷରେ ଖେଳିଥିଲେ। ସେହି ମ୍ୟାଚ୍‌ରେ ଭାରତ ୧୯ ରନ୍‌ରେ ବିଜୟୀ ହୋଇଥିଲା। କିନ୍ତୁ ବୈଭବ ବ୍ୟାଟିଂରେ ବଡ଼ ସ୍କୋର କରିପାରିନଥିଲେ। ଏଥର ପାକିସ୍ତାନ ବିପକ୍ଷରେ ନିଜ ବ୍ୟାଟିଂର ଜଲୱା ଦେଖାଇବାକୁ ତାଙ୍କ ପାଖରେ ଭଲ ସୁଯୋଗ ରହିଛି।

ତିଲକ ବର୍ମାଙ୍କ ହାତରେ ଭାରତର ନେତୃତ୍ୱ

ଏସିଆ କପ୍ ରାଇଜିଂ ଷ୍ଟାର୍ସ ପାଇଁ ବିସିସିଆଇ ୧୫ ଜଣିଆ ଭାରତ-ଏ ଦଳ ଘୋଷଣା କରିଛି। ତିଲକ ବର୍ମାଙ୍କୁ ଦଳର ଅଧିନାୟକ ଦାୟିତ୍ୱ ମିଳିଥିବା ବେଳେ ରଜତ ପାଟିଦାର ଉପଅଧିନାୟକ ରହିଛନ୍ତି।

ଭାରତ-ଏ ଦଳ

ଅଭିଷେକ ଶର୍ମା, ବୈଭବ ସୂର୍ଯ୍ୟବଂଶୀ, ପ୍ରଭସିମରନ ସିଂହ, ତିଲକ ବର୍ମା (ଅଧିନାୟକ), ରଜତ ପାଟିଦାର (ଉପଅଧିନାୟକ), ରିଙ୍କୁ ସିଂହ, କୁମାର କୁଶାଗ୍ର, ସୂର୍ଯ୍ୟାଂଶ ସେଡ୍‌ଗେ, ଶାହବାଜ ଅହମ୍ମଦ, ବିପ୍ରଜ ନିଗମ, ହର୍ଷ ଦୁବେ, ତନୁଷ କୋଟିଆନ୍, ହର୍ଷିତ ରାଣା, ପ୍ରିନ୍ସ ଯାଦବ ଓ ଅର୍ଶଦ ଖାନ୍।

ନୂଆଦିଲ୍ଲୀ: ଶେଷ ବଲ୍‌ରେ ବିଜୟ ପାଇଁ ଦରକାର ଥିଲା ୩ ରନ୍। ହାତରେ ଥିଲା ମାତ୍ର ଗୋଟିଏ ୱିକେଟ୍। ଷ୍ଟାଡିୟମ୍‌ରେ ବଢ଼ୁଥିଲା ଉତ୍କଣ୍ଠା। ଏଭଳି ନାଟକୀୟ ପରିସ୍ଥିତିରେ ଶେଷ ବଲ୍‌କୁ ସୀମାରେଖା ପାର୍ କରାଇ ଭାରତକୁ ଚାମ୍ପିୟନ କରିଛନ୍ତି ମୋହିତ ଉଲୱା। U-19 ଏସିଆ କପ୍ ୨୦୨୬ ଫାଇନାଲରେ ପାକିସ୍ତାନକୁ ଗୋଟିଏ ୱିକେଟ୍‌ରେ ହରାଇ ଟାଇଟଲ୍ ଜିତିଛି ଟିମ୍ ଇଣ୍ଡିଆ। ମ୍ୟାଚ୍‌ର ଶେଷ ତିନି ଓଭରରେ ଯେଉଁଭଳି ଭାବେ ପଲ୍ଲା ବଦଳିଥିଲା, ତାହା କୌଣସି ସିନେମାର କାହାଣୀଠାରୁ କମ୍ ନଥିଲା।

୩୩୮ ରନ୍‌ର ବିଶାଳ ଲକ୍ଷ୍ୟ ପିଛା କରୁଥିବା ଭାରତ ଏକ ସମୟରେ ପରାଜୟ ଦ୍ୱାରଦେଶରେ ପହଞ୍ଚିଯାଇଥିଲା। ତେବେ ମୋହିତ ଉଲୱା ଓ ମନଲ ଚୌହାନଙ୍କ ଲଢ଼ୁଆ ବ୍ୟାଟିଂ ମ୍ୟାଚ୍‌ର ଚିତ୍ର ବଦଳାଇ ଦେଇଥିଲା। ଶେଷରେ ମୋହିତଙ୍କ ଅପରାଜିତ ୪୯ ରନ୍‌ର ଇନିଂସ ଭାରତକୁ ଐତିହାସିକ ବିଜୟ ଦେଇଥିଲା।

୪୮ତମ ଓଭରରେ ମନଲଙ୍କ ୱିକେଟ୍

୪୭ ଓଭର ଶେଷ ସୁଦ୍ଧା ଭାରତର ସ୍କୋର ୩୦୮/୮ ରହିଥିଲା। ଅର୍ଥାତ୍ ଶେଷ ୧୮ଟି ବଲ୍‌ରୁ ବିଜୟ ପାଇଁ ୩୦ ରନ୍ ଆବଶ୍ୟକ ଥିଲା। ମନଲ ଚୌହାନ ଓ ମୋହିତ ଉଲୱାଙ୍କ ଯୋଡ଼ି ଦଳକୁ ଆଶା ଦେଇଥିଲା। କିନ୍ତୁ ୪୮ତମ ଓଭରରେ ଏହି ଭାଗୀଦାରି ଭାଙ୍ଗିଯାଇଥିଲା।

ନିକାବ ଶଫିକ୍ ବୋଲିଂ କରିବାକୁ ଆସିଥିବା ବେଳେ ପ୍ରଥମ ବଲ୍‌ରେ ମୋହିତ ଗୋଟିଏ ରନ୍ ନେଇ ମନଲଙ୍କୁ ଷ୍ଟ୍ରାଇକ୍ ଦେଇଥିଲେ। କିନ୍ତୁ ପରବର୍ତ୍ତୀ ବଲ୍‌ରେ ମନଲ କ୍ୟାଚ୍ ଆଉଟ୍ ହୋଇଥିଲେ। ସେ ୪୭ ରନ୍ କରି ଆଉଟ୍ ହେବା ସହ ଭାରତର ନବମ ୱିକେଟ୍ ଖସିଥିଲା।

ଏହି ସମୟରେ ଭାରତୀୟ ପ୍ରଶଂସକଙ୍କ ମନରେ ପୁଣି ପରାଜୟର ଭୟ ଦେଖାଦେଇଥିଲା। କାରଣ ହାତରେ ଆଉ ଗୋଟିଏ ୱିକେଟ୍ ଥିବା ବେଳେ ଜିତିବାକୁ ୨୯ ରନ୍ ବାକି ଥିଲା। ୧୧ ନମ୍ବରରେ ବ୍ୟାଟିଂ କରିବାକୁ ଆସିଥିବା ଚିଗୁରୁପତି ଗୋଟିଏ ଚୌକା ମାରିଥିଲେ। ଏହି ଓଭରରୁ ମୋଟ ୫ ରନ୍ ମିଳିଥିବା ବେଳେ ଭାରତର ସ୍କୋର ୩୧୩/୯ରେ ପହଞ୍ଚିଥିଲା।

୪୯ତମ ଓଭରରେ ମୋହିତଙ୍କ ଧମାକା

ଏବେ ମ୍ୟାଚ୍‌ରେ ବାକି ଥିଲା ମାତ୍ର ୧୨ଟି ବଲ୍। ଭାରତକୁ ଜିତିବା ପାଇଁ ଆବଶ୍ୟକ ଥିଲା ୨୫ ରନ୍। ପାକିସ୍ତାନ ପକ୍ଷରୁ ମହମ୍ମଦ ସାୟମ୍ ୪୯ତମ ଓଭର ବୋଲିଂ କରିଥିଲେ। ଏହି ଓଭରରେ ମୋହିତ ନିଜର ଆକ୍ରମଣାତ୍ମକ ରୂପ ଦେଖାଇଥିଲେ।

ସେ ଦୁଇଟି ଚୌକା ଓ ଗୋଟିଏ ବିଶାଳ ଛକା ମାରି ଭାରତର ଆଶାକୁ ପୁଣି ଉଜ୍ଜୀବିତ କରିଥିଲେ। ଏହି ଓଭରରୁ ମୋଟ ୧୭ ରନ୍ ଆସିଥିଲା। ଫଳରେ ଶେଷ ଓଭରରେ ଭାରତକୁ ଜିତିବା ପାଇଁ ଆଉ ୮ ରନ୍ ଆବଶ୍ୟକ ହୋଇଥିଲା।

ଶେଷ ଓଭରରେ  ସଂଘର୍ଷ

ପାକିସ୍ତାନର ଅହମଦ ହୁସେନ୍ ଶେଷ ଓଭର ବୋଲିଂ କରିବାକୁ ଆସିଥିଲେ। ତାଙ୍କ ଉପରେ ଥିଲା ୮ ରନ୍ ବଞ୍ଚାଇବାର ଚାପ। ପ୍ରଥମ ବଲ୍‌ରେ କୌଣସି ରନ୍ ମିଳିନଥିଲା। ଦ୍ୱିତୀୟ ବଲ୍‌ଟି ୱାଇଡ୍ ହୋଇଥିଲା। ପରେ ମୋହିତ ଗୋଟିଏ ରନ୍ ନେଇଥିଲେ।

ଏହାପରେ ଚିଗୁରୁପତି ମଧ୍ୟ ଗୋଟିଏ ରନ୍ ନେଇ ମୋହିତଙ୍କୁ ପୁଣି ଷ୍ଟ୍ରାଇକ୍ ଦେଇଥିଲେ। ଚତୁର୍ଥ ଓ ପଞ୍ଚମ ବଲ୍‌ରେ ମଧ୍ୟ ଗୋଟିଏ ଲେଖାଏଁ ରନ୍ ହୋଇଥିଲା। ଏବେ ଶେଷ ବଲ୍‌ରେ ଭାରତକୁ ବିଜୟ ପାଇଁ ୩ ରନ୍ ଦରକାର ଥିଲା। ମ୍ୟାଚ୍ ଟାଇ କରିବା ପାଇଁ ମଧ୍ୟ ଦୁଇ ରନ୍ ଆବଶ୍ୟକ ଥିଲା।

ସମସ୍ତଙ୍କ ନଜର ଥିଲା ମୋହିତଙ୍କ ଉପରେ। ସେ କୌଣସି ଭୁଲ୍ ନକରି ଶେଷ ବଲ୍‌କୁ ଚୌକା ମାରିଥିଲେ। ଏହା ସହ ଭାରତୀୟ ଶିବିରରେ ଖୁସିର ଲହରୀ ଖେଳିଯାଇଥିଲା। ଶେଷ ବଲ୍‌ରେ ଚୌକା ମାରି ମୋହିତ ଭାରତକୁ ଚାମ୍ପିୟନ କରିଥିଲେ।

ନୂଆଦିଲ୍ଲୀ: ପାକିସ୍ତାନକୁ ହରାଇ U-19 ଏସିଆ କପ୍ ୨୦୨୬ ଟାଇଟଲ୍ ଜିତିବା ପରେ ଭାରତୀୟ ଯୁବ କ୍ରିକେଟ୍ ଦଳକୁ ଚାରିଆଡ଼ୁ ମିଳୁଛି ପ୍ରଶଂସା ଓ ଶୁଭେଚ୍ଛା। ଏହି ସଫଳତାରେ ଖୁସି ପ୍ରକାଶ କରିଛନ୍ତି ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେ ସୋସିଆଲ ମିଡିଆ ପ୍ଲାଟଫର୍ମ X ଜରିଆରେ ଟିମ୍ ଇଣ୍ଡିଆକୁ ଅଭିନନ୍ଦନ ଜଣାଇବା ସହ ଯୁବ ଖେଳାଳିଙ୍କ ପ୍ରଦର୍ଶନକୁ ପ୍ରଶଂସା କରିଛନ୍ତି।

ମୋଦୀ କହିଛନ୍ତି, ଭାରତୀୟ କ୍ରିକେଟ୍ ପାଇଁ ଏହା ଏକ ଚମତ୍କାର ଦିନ। ଯୁବ କ୍ରିକେଟରମାନଙ୍କ ଉପଲବ୍ଧି ପାଇଁ ସେ ଗର୍ବିତ। ଏହି ବିଜୟ ଦେଶର ଅନେକ ଯୁବକଙ୍କୁ କ୍ରିକେଟ୍ ପ୍ରତି ଆକର୍ଷିତ କରିବା ସହ ଆଗକୁ ବଢ଼ିବାକୁ ପ୍ରେରଣା ଯୋଗାଇବ ବୋଲି ସେ ଆଶା ପ୍ରକାଶ କରିଛନ୍ତି। ଏଥିସହ ଭବିଷ୍ୟତରେ ଦଳର ସଫଳତା କାମନା କରିଛନ୍ତି।

ମୋଦୀଙ୍କ ବାର୍ତ୍ତାରେ ଯୁବ ଖେଳାଳିଙ୍କ ପ୍ରଶଂସା

ପ୍ରଧାନମନ୍ତ୍ରୀ ନିଜ X ପୋଷ୍ଟରେ ଭାରତୀୟ ଯୁବ ଦଳର ପ୍ରଦର୍ଶନକୁ ଉଚ୍ଚ ପ୍ରଶଂସା କରିଛନ୍ତି। ଏହି ଐତିହାସିକ ସଫଳତା କେବଳ ଟ୍ରଫି ଜିତିବାରେ ସୀମିତ ନୁହେଁ, ବରଂ ଆଗାମୀ ପିଢ଼ିର ଖେଳାଳିଙ୍କ ପାଇଁ ଏକ ପ୍ରେରଣା ବୋଲି ସେ ଉଲ୍ଲେଖ କରିଛନ୍ତି। ଦଳର ସମସ୍ତ ଖେଳାଳିଙ୍କୁ ଶୁଭେଚ୍ଛା ଜଣାଇ ଆଗାମୀ ଦିନରେ ଆହୁରି ଭଲ ପ୍ରଦର୍ଶନ କରିବାକୁ ମଧ୍ୟ ଶୁଭକାମନା ଦେଇଛନ୍ତି।

ଶେଷ ବଲ୍‌ରେ ପାକିସ୍ତାନକୁ ମାତ୍ ଦେଲା ଭାରତ

ଉଲ୍ଲେଖଯୋଗ୍ୟ, U-19 ଏସିଆ କପ୍ ଫାଇନାଲରେ ଭାରତ ଓ ପାକିସ୍ତାନ ମଧ୍ୟରେ ଜୋରଦାର ମୁକାବିଲା ହୋଇଥିଲା। ପ୍ରଥମେ ବ୍ୟାଟିଂ କରି ପାକିସ୍ତାନ ୩୩୭ ରନ୍ କରିଥିବା ବେଳେ ଭାରତ ସମ୍ମୁଖରେ ଥିଲା ୩୩୮ ରନ୍‌ର ବିଶାଳ ଲକ୍ଷ୍ୟ। ଜବାବରେ ଭାରତ ୯ ୱିକେଟ୍ ହରାଇ ଶେଷ ବଲ୍‌ରେ ବିଜୟ ହାସଲ କରିଥିଲା। 

ମୋହିତ ଉଲୱା ଓ ମୈନାଲ ଚୌହାନଙ୍କ ଲଢ଼ୁଆ ବ୍ୟାଟିଂ ମ୍ୟାଚ୍‌ର ଗତି ବଦଳାଇ ଦେଇଥିଲା। ମୋହିତ ଶେଷ ବଲ୍‌ରେ ଚୌକା ମାରି ଭାରତକୁ ୧ ୱିକେଟ୍‌ରେ ରୋମାଞ୍ଚକର ବିଜୟ ଦେଇଥିଲେ। ଏହି ବିଜୟ ସହ ଭାରତୀୟ ଯୁବ ଦଳ ପୁଣିଥରେ ଏସିଆ କପ୍ ଟ୍ରଫି ନିଜ ନାମରେ କରିଛି। ଦଳର ଏହି ସଫଳତାକୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି।

 ଅଣ୍ଡର-୧୯ ଏସିଆ କପ୍ କ୍ରିକେଟରେ ଖେଳାଯାଇଥିବା ରୋମାଞ୍ଚକର ଫାଇନାଲ୍ ମୁକାବିଲାରେ ପାକିସ୍ତାନକୁ ଗୋଟିଏ ୱିକେଟରେ ପରାସ୍ତ କରି ନବମ ଥର ପାଇଁ ଅଣ୍ଡର-୧୯ ଏସିଆ କପ୍ ଚାମ୍ପିଅନ୍ ହୋଇଛି ଭାରତ।ପାକିସ୍ତାନ ଦେଇଥିବା ୩୩୮ ରନ୍ ର ବିଶାଳ ଲକ୍ଷ୍ୟକୁ ପିଛା କରି ଭାରତୀୟ ଦଳ ଜିତିଛି । 

ଓମାନର ଅଲ୍ ଆମେରାଟ୍ କ୍ରିକେଟ୍ ଗ୍ରାଉଣ୍ଡରେ ଖେଳାଯାଇଥିବା ଫାଇନାଲରେ ପ୍ରଥମେ ବ୍ୟାଟିଂ କରି ପାକିସ୍ତାନ ୫୦ ଓଭରରେ ୯ ୱିକେଟ୍ ହରାଇ ୩୩୭ ରନ୍ କରିଥିଲା। ପାକିସ୍ତାନ ପକ୍ଷରୁ ଉସମାନ ଖାନ୍ ୧୦୭ ରନ୍‌ର ଶତକୀୟ ଇନିଂସ ଖେଳିଥିବା ବେଳେ ଅବଦୁଲ କାଦିର ୮୦ ଏବଂ ଅଧିନାୟକ ଫରହାନ ୟୁସୁଫ ୬୩ ରନ୍ କରିଥିଲେ। ଭାରତ ପାଇଁ କାଭ୍ୟା ପଟେଲ ୪ଟି ଏବଂ ଚିଗୁରୁପତି ଭେଙ୍କଟା ୩ଟି ୱିକେଟ୍ ନେଇଥିଲେ। 

୩୩୮ ରନ୍‌ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିଲା ଭାରତ। ମ୍ୟାଚ ପ୍ରାରମ୍ଭ ରୁ ଭଲ ହୋଇଥିଲେ ମଧ୍ୟ ମଝି ଓଭରରେ ଲଗାତାର ୱିକେଟ୍ ପତନ ଯୋଗୁଁ ଦଳ ଚାପରେ ପଡ଼ିଥିଲା। ଆର୍ଯ୍ୟବୀର ସେହୱାଗ ୫୮ ରନ୍ କରିଥିବା ବେଳେ ଅଧିନାୟକ ଲକ୍ଷ୍ୟ ରାଇଚନ୍ଦାନୀ ୮୦ ରନ୍‌ର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ। ତଥାପି ମ୍ୟାଚ୍‌ର ଶେଷ ଭାଗରେ ଭାରତର ସ୍ଥିତି ଚିନ୍ତାଜନକ ଥିଲା । 

ଏଭଳି ସଙ୍କଟ ସମୟରେ ମନଲ ଚୌହାନ ଓ ମୋହିତ ଉଲ୍ୱାଙ୍କ ଲଢ଼ୁଆ ପ୍ରଦର୍ଶନ ଭାରତ ପାଇଁ ନିର୍ଣ୍ଣାୟକ ହୋଇଥିଲା। ବିଶେଷକରି ମୋହିତ ଶେଷ ପର୍ଯ୍ୟନ୍ତ ଅପରାଜିତ ରହି ୨୬ ବଲ୍‌ରୁ ୪୯ ରନ୍ କରିଥିଲେ। ଶେଷ ୱିକେଟ୍‌ରେ ଚିଗୁରୁପତି ଭେଙ୍କଟାଙ୍କ ସହ ମିଶି ମୋହିତ ଭାରତକୁ ସହଜ ବିଜୟ ଲକ୍ଷ୍ୟ ପାର କରାଇଥିଲେ। ଜିତିବା ପାଇଁ ଶେଷ ବଲ୍‌ରେ ୪ ରନ୍ ଆବଶ୍ୟକ ଥିବାବେଳେ ମୋହିତ ଉଲ୍‌ଭା ଚୌକା ମାରି ଭାରତକୁ ବିଜୟ ଭେଟି ଦେଇଥିଲେ । ୪୯.୬ ଓଭରରେ ୯ ୱିକେଟ୍ ହରାଇ ୩୩୯ ରନ୍ କରି ଭାରତ ଗୋଟିଏ ୱିକେଟ୍‌ରେ ମ୍ୟାଚ୍ ଜିତିଥିଲା। 

ନୂଆଦିଲ୍ଲୀ: ଭାରତୀୟ କ୍ରିକେଟ୍‌ର ଷ୍ଟାର୍ ବ୍ୟାଟର୍ ବିରାଟ କୋହଲିଙ୍କ ନାଁରେ ଯୋଡ଼ି ହୋଇଛି ଏକ ଅଲୋଡ଼ା ରେକର୍ଡ। ଦିନିକିଆ ଅନ୍ତର୍ଜାତୀୟ କ୍ରିକେଟ୍‌ରେ ସେ ୨୦ ଥର ଶୂନ ରନ୍‌ରେ ଆଉଟ୍ ହୋଇଛନ୍ତି। ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଦିନିକିଆରେ ଖାତା ଖୋଲିବା ପୂର୍ବରୁ ପ୍ୟାଭିଲିୟନ ଫେରିବା ପରେ ତାଙ୍କ ନାଁରେ ଏହି ରେକର୍ଡ ଯୋଡ଼ି ହୋଇଛି।

ବେ ଓଭାଲରେ ଖେଳାଯାଇଥିବା ଏହି ମ୍ୟାଚ୍‌ର ପ୍ରଥମ ଓଭରରେ ହିଁ କୋହଲିଙ୍କ ୱିକେଟ୍ ହରାଇଥିଲା ଟିମ୍ ଇଣ୍ଡିଆ। ନ୍ୟୁଜିଲାଣ୍ଡର ଦ୍ରୁତ ବୋଲର ମ୍ୟାଟ୍ ହେନରୀ ତାଙ୍କୁ ବୋଲ୍ଡ କରିଥିଲେ। ହେନରୀଙ୍କ ଏହି ଓଭର ଭାରତୀୟ ବ୍ୟାଟିଂ ଲାଇନ୍‌ଅପ୍ ପାଇଁ ବେଶ୍ ଘାତକ ସାବ୍ୟସ୍ତ ହୋଇଥିଲା। ଗୋଟିଏ ଓଭରରେ ସେ ୩ଟି ୱିକେଟ୍ ନେଇ ଭାରତକୁ ବଡ଼ ଝଟକା ଦେଇଥିଲେ।

କୋହଲିଙ୍କ ସହ ସଚିନଙ୍କ ସମକକ୍ଷ ରେକର୍ଡ

ଦିନିକିଆ କ୍ରିକେଟ୍‌ରେ ଭାରତ ପକ୍ଷରୁ ସର୍ବାଧିକ ଥର ଶୂନରେ ଆଉଟ୍ ହୋଇଥିବା ବ୍ୟାଟରଙ୍କ ତାଲିକାରେ ଏବେ ବିରାଟ କୋହଲି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ସମକକ୍ଷ ହୋଇଛନ୍ତି। ଉଭୟ ବ୍ୟାଟର୍ ନିଜ ଦିନିକିଆ କ୍ୟାରିୟରରେ ୨୦ ଥର ଶୂନରେ ଆଉଟ୍ ହୋଇଛନ୍ତି। ଭାରତୀୟ କ୍ରିକେଟ୍‌ର ଦୁଇ ମହାନ ବ୍ୟାଟରଙ୍କ ନାଁରେ ଏଭଳି ରେକର୍ଡ ରହିବା ନିଶ୍ଚିତ ଭାବେ ଚର୍ଚ୍ଚାର ବିଷୟ ହୋଇଛି।

କୋହଲିଙ୍କୁ ଆଉଟ୍ କରିଥିବା ହେନରୀଙ୍କୁ ଉପହାର ଦେଲେ ଜର୍ସି

ମ୍ୟାଚ୍‌ରେ ବିରାଟ କୋହଲିଙ୍କ ୱିକେଟ୍ ନେଇଥିବା ମ୍ୟାଟ୍ ହେନରୀଙ୍କୁ ନେଇ ମଧ୍ୟ ଏକ ରୋଚକ ଘଟଣା ସାମ୍ନାକୁ ଆସିଛି। ମ୍ୟାଚ୍ ଶେଷରେ କୋହଲି ନିଜ ଅଟୋଗ୍ରାଫ୍ ଥିବା ଏକ ଜର୍ସି ହେନରୀଙ୍କୁ ଉପହାର ଦେଇଥିଲେ। ଏହି ମ୍ୟାଚ୍‌ରେ ହେନରୀ ମୋଟ ୬ଟି ୱିକେଟ୍ ଅକ୍ତିଆର କରିଥିଲେ। ଭାରତ ବିପକ୍ଷରେ ଏକାଧିକ ଥର ୫ ୱିକେଟ୍ ସଫଳତା ପାଇଥିବା ବୋଲରଙ୍କ ତାଲିକାରେ ମଧ୍ୟ ସେ ସାମିଲ ହୋଇଛନ୍ତି।

୧୫ ନଭେମ୍ବରରେ ଶେଷ ଦିନିକିଆ, ସିରିଜ୍ ଜିତିବା ଲକ୍ଷ୍ୟରେ ଭାରତ

ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ୫ ମ୍ୟାଚ୍‌ ବିଶିଷ୍ଟ ଦିନିକିଆ ସିରିଜ୍‌ରେ ଭାରତ ୨-୧ରେ ଆଗୁଆ ରହିଛି। ଶୁଭମନ ଗିଲଙ୍କ ନେତୃତ୍ୱରେ ଭାରତ ପ୍ରଥମ ଦୁଇଟି ମ୍ୟାଚ୍ ଜିତିଥିବା ବେଳେ ତୃତୀୟ ମ୍ୟାଚ୍ ବର୍ଷା ଯୋଗୁଁ ବାତିଲ ହୋଇଥିଲା।

ଅନ୍ୟପକ୍ଷରେ ଚତୁର୍ଥ ଓ ପଞ୍ଚମ ମ୍ୟାଚ୍ ପାଇଁ ଭାରତୀୟ ଦଳରେ କିଛି ପରିବର୍ତ୍ତନ କରାଯାଇଛି। ଟେଷ୍ଟ ଦଳରେ ଯୋଗ ଦେବା ପାଇଁ ଶୁଭମନ ଗିଲ୍ ଦିନିକିଆ ଦଳରୁ ବାଦ୍ ପଡ଼ିଥିବାରୁ ଶ୍ରେୟସ ଆୟର ଦଳର ନେତୃତ୍ୱ ନେଉଛନ୍ତି।

ସିରିଜ୍‌ର ପଞ୍ଚମ ତଥା ଶେଷ ଦିନିକିଆ ନଭେମ୍ବର ୧୫ ତାରିଖ ରବିବାର ଦିନ ବେ ଓଭାଲରେ ଖେଳାଯିବ। ଏହି ମ୍ୟାଚ୍ ଜିତି ସିରିଜ୍ ନିଜ ନାଁରେ କରିବାକୁ ଭାରତ ଲକ୍ଷ୍ୟ ରଖିଥିବା ବେଳେ ନ୍ୟୁଜିଲାଣ୍ଡ ମ୍ୟାଚ୍ ଜିତି ସିରିଜ୍‌କୁ ୨-୨ରେ ବରାବର କରିବାକୁ ଚେଷ୍ଟା କରିବ।

ନୂଆଦିଲ୍ଲୀ: ଦିନିକିଆ କ୍ରିକେଟରେ ଟିମ୍ ଇଣ୍ଡିଆକୁ ମିଳିଛି ଏକ ଲଜ୍ଜାଜନକ ପରାଜୟ। ଚତୁର୍ଥ ଦିନିକିଆ ମ୍ୟାଚ୍‌ରେ ଭାରତୀୟ ଦଳକୁ ମାତ୍ର ୮୯ ରନ୍‌ରେ ଅଲଆଉଟ୍ କରିଦେଇଛି ନ୍ୟୁଜିଲାଣ୍ଡ। ଏହି ମ୍ୟାଚ୍‌କୁ ୨୪୪ ରନ୍‌ର ବଡ଼ ବ୍ୟବଧାନରେ ଜିତିଛି କିୱି ଟିମ୍। ରନ୍ ବ୍ୟବଧାନ ଦୃଷ୍ଟିରୁ ଏହା ଭାରତୀୟ ଦିନିକିଆ କ୍ରିକେଟ୍ ଇତିହାସର ଦ୍ୱିତୀୟ ସର୍ବବୃହତ୍ ପରାଜୟ। ଏଥିସହ ୮୯ ରନ୍ ଭାରତର ଦିନିକିଆ ଇତିହାସର ଷଷ୍ଠ ସର୍ବନିମ୍ନ ସ୍କୋର ହୋଇଛି।

ତେବେ ଭାରତକୁ ୧୦୦ ରନ୍‌ରୁ କମ୍ ସ୍କୋରରେ ଅଲଆଉଟ୍ କରିବା ନ୍ୟୁଜିଲାଣ୍ଡ ପାଇଁ ନୂଆ କଥା ନୁହେଁ। ଏହି କ୍ଷେତ୍ରରେ କିୱି ଦଳ ଏକ ସ୍ୱତନ୍ତ୍ର ରେକର୍ଡର ଅଧିକାରୀ। ଆସନ୍ତୁ ଜାଣିବା, ଦିନିକିଆ କ୍ରିକେଟ୍‌ରେ କେଉଁ ୫ଟି ଦଳ ଭାରତକୁ ୧୦୦ ରନ୍ ପୂର୍ବରୁ ଅଲଆଉଟ୍ କରିଛନ୍ତି।

୧. ନ୍ୟୁଜିଲାଣ୍ଡ – ୩ ଥର

ଏହି ତାଲିକାର ପ୍ରଥମ ସ୍ଥାନରେ ରହିଛି ନ୍ୟୁଜିଲାଣ୍ଡ। କିୱି ଦଳ ଏପର୍ଯ୍ୟନ୍ତ ୩ ଥର ଭାରତକୁ ୧୦୦ ରନ୍‌ରୁ କମ୍ ସ୍କୋରରେ ଅଲଆଉଟ୍ କରିଛି। ୨୦୧୦ରେ ଭାରତ, ଶ୍ରୀଲଙ୍କା ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଇଥିବା ତ୍ରିରାଷ୍ଟ୍ରୀୟ ସିରିଜ୍‌ରେ ଭାରତୀୟ ଦଳ ମାତ୍ର ୮୮ ରନ୍ କରିଥିଲା। ଏହାପରେ ୨୦୧୯ରେ ହାମିଲଟନ୍‌ରେ ଭାରତକୁ ୯୨ ରନ୍‌ରେ ସୀମିତ ରଖିଥିଲା ନ୍ୟୁଜିଲାଣ୍ଡ। ଏବେ ୨୦୨୬ରେ ପୁଣି ଥରେ ଭାରତକୁ ୮୯ ରନ୍‌ରେ ଅଲଆଉଟ୍ କରି ଏହି ରେକର୍ଡକୁ ଆହୁରି ମଜଭୁତ କରିଛି।

୨. ଶ୍ରୀଲଙ୍କା – ୨ ଥର

ଏହି ତାଲିକାର ଦ୍ୱିତୀୟ ସ୍ଥାନରେ ରହିଛି ଶ୍ରୀଲଙ୍କା। ଏହି ପଡ଼ୋଶୀ ଦଳ ଦୁଇଥର ଭାରତୀୟ ବ୍ୟାଟିଂ ଲାଇନ୍‌ଅପ୍‌କୁ ୧୦୦ ରନ୍ ପୂର୍ବରୁ ଧରାଶାୟୀ କରିଛି। ୧୯୮୬ରେ ଭାରତୀୟ ଦଳ ମାତ୍ର ୭୮ ରନ୍ କରିଥିବା ବେଳେ ୨୦୦୦ ମସିହାରେ ଶ୍ରୀଲଙ୍କା ବିପକ୍ଷରେ ମାତ୍ର ୫୪ ରନ୍‌ରେ ଅଲଆଉଟ୍ ହୋଇଥିଲା ଟିମ୍ ଇଣ୍ଡିଆ। ଆଜି ମଧ୍ୟ ଏହା ଭାରତର ଦିନିକିଆ ଇତିହାସର ସର୍ବନିମ୍ନ ସ୍କୋର ଭାବେ ରହିଛି।

୩. ଅଷ୍ଟ୍ରେଲିଆ – ୧ ଥର

ଶକ୍ତିଶାଳୀ ଅଷ୍ଟ୍ରେଲିଆ ମଧ୍ୟ ଏହି ତାଲିକାରେ ସାମିଲ ରହିଛି। ୧୯୮୧ ମସିହାରେ ଅଷ୍ଟ୍ରେଲିଆ ବିପକ୍ଷ ଏକ ଦିନିକିଆ ମ୍ୟାଚ୍‌ରେ ଭାରତୀୟ ଦଳ ମାତ୍ର ୬୩ ରନ୍‌ରେ ଅଲଆଉଟ୍ ହୋଇଥିଲା। ଏହା ଭାରତର ଦିନିକିଆ ଇତିହାସର ଦ୍ୱିତୀୟ ସର୍ବନିମ୍ନ ସ୍କୋର।

୪. ପାକିସ୍ତାନ – ୧ ଥର

ଭାରତର ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନ ମଧ୍ୟ ଏହି ରେକର୍ଡ ତାଲିକାରେ ରହିଛି। ପ୍ରାୟ ୪୮ ବର୍ଷ ପୂର୍ବେ ପାକିସ୍ତାନ ବିପକ୍ଷ ମ୍ୟାଚ୍‌ରେ ଭାରତୀୟ ଦଳ ମାତ୍ର ୭୯ ରନ୍ କରିପାରିଥିଲା। ଏହି ପ୍ରଦର୍ଶନ ଭାରତୀୟ ଦଳ ପାଇଁ ଏକ ସ୍ମରଣୀୟ ନକାରାତ୍ମକ ରେକର୍ଡ ହୋଇ ରହିଛି।

୫. ଦକ୍ଷିଣ ଆଫ୍ରିକା – ୧ ଥର

ଏହି ତାଲିକାର ଅନ୍ୟ ଏକ ଦଳ ହେଉଛି ଦକ୍ଷିଣ ଆଫ୍ରିକା। ୨୦୦୬ ମସିହାରେ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ମ୍ୟାଚ୍‌ରେ ଭାରତୀୟ ଦଳ ମାତ୍ର ୯୧ ରନ୍‌ରେ ଅଲଆଉଟ୍ ହୋଇଥିଲା। ଏହିପରି ଭାବେ ଦକ୍ଷିଣ ଆଫ୍ରିକା ମଧ୍ୟ ଭାରତକୁ ୧୦୦ ରନ୍ ପୂର୍ବରୁ ରୋକିବାରେ ସଫଳ ହୋଇଛି।

ଦିନିକିଆରେ ଭାରତର ୧୦ଟି ସର୍ବନିମ୍ନ ସ୍କୋର

୫୪ ରନ୍ – ଶ୍ରୀଲଙ୍କା ବିପକ୍ଷରେ

୬୩ ରନ୍ – ଅଷ୍ଟ୍ରେଲିଆ ବିପକ୍ଷରେ

୭୮ ରନ୍ – ଶ୍ରୀଲଙ୍କା ବିପକ୍ଷରେ

୭୯ ରନ୍ – ପାକିସ୍ତାନ ବିପକ୍ଷରେ

୮୮ ରନ୍ – ନ୍ୟୁଜିଲାଣ୍ଡ ବିପକ୍ଷରେ

୮୯ ରନ୍ – ନ୍ୟୁଜିଲାଣ୍ଡ ବିପକ୍ଷରେ

୯୧ ରନ୍ – ଦକ୍ଷିଣ ଆଫ୍ରିକା ବିପକ୍ଷରେ

୯୨ ରନ୍ – ନ୍ୟୁଜିଲାଣ୍ଡ ବିପକ୍ଷରେ

ନୂଆଦିଲ୍ଲୀ: ବିଦେଶ ମାଟିରେ ମାଟି କାମୁଡ଼ିଛି ଭାରତୀୟ କ୍ରିକେଟ୍ ଟିମ୍ । ଶୁକ୍ରବାର ମାଉଣ୍ଡ ମାଉଁଗାନୁଈର ୱେ ଓବଲରେ ଆୟୋଜିତ ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଦିନିକିଆ ମୁକାବିଲାରେ ଶତକ ଛୁଇଁ ପାରି ନାହିଁ ଏହି ବିଶ୍ୱ ବିଜେତା ଦଳ । ରୋହିତ ଓ ବିରାଟଙ୍କ ଭଳି ଦିଗ୍ଗଜ ଖେଳାଳି ମାନେ ମଧ୍ୟ ଖାତା ଖୋଲିବାରେ ଅସମର୍ଥ ହୋଇଛନ୍ତି । ମାତ୍ର ୮୯ ରନରେ ଅଲଆଉଟ୍ ହୋଇଛି ଭାରତ । ଶେଷରେ ୨୪୪ ରନର ବିଶାଳ ବ୍ୟବଧାନରେ ଚତୁର୍ଥ ଦିନିକିଆକୁ ନିଜ ନାମରେ କରିଛି ନ୍ୟୁଜିଲାଣ୍ଡ । 

ମ୍ୟାଚ୍ ଆରମ୍ଭରୁ ଭାରତରେ ସପକ୍ଷରେ ଟସ୍ ଥିଲା । ଭାରତ ଅଧିନାୟକ ଶ୍ରେୟସ ଆୟର ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତି ନେଇ ନ୍ୟୁଜିଲାଣ୍ଡକୁ ବ୍ୟାଟିଂ ପାଇଁ ଆମନ୍ତ୍ରିତ କରିଥିଲେ । ନ୍ୟୁଜିଲାଣ୍ଡ ନିଜ ମାଟିରେ ଧୂଆଁଧାର ବ୍ୟାଟିଂ କରିଥିଲା । ସମ୍ପୂର୍ଣ୍ଣ ଓଭର୍ ଖେଳି ସମସ୍ତ ୱିକେଟ୍ ହରାଇ ନ୍ୟୁଜିଲାଣ୍ଡ ୩୩୩ ରନ୍ କରି ଭାରତ ସମ୍ମୁଖରେ ୩୩୪ ରନ୍ ଟାର୍ଗେଟ୍ ଦେଇଥିଲା । ଦଳ ପକ୍ଷରୁ ୱିଲ୍ ୟଙ୍ଗ ୧୦୮ ବଲରେ ଶତକ ସହିତ ସର୍ବାଧିକ ୧୨୫ ରନ୍ କରିଥିଲେ । ନମନ ଧୀର ୱିଲଙ୍କ ୱିକେଟ୍ ନେଇ ତାଙ୍କୁ ପାଭିଲିୟନ ପଠାଇଥିଲେ । ସେହିପରି ଟିମ୍ ସୈଫର୍ଟ ୫୮ (୪୮), ଫିନ୍ ଆଲେନ୍ ୪୧ (୩୦), ସାଣ୍ଟନର୍ ୨୪ (୨୯) ପ୍ରମୁଖ ରନ୍ ଯୋଡ଼ି ଥିଲେ । 

ଭାରତ ପକ୍ଷରୁ ଆକ୍ୟୁବ୍ ନବି , ଗୁରନୁର ବ୍ରାର୍ ଓ ଅକ୍ସର୍ ପଟେଲ୍ ୨ଟି ଲେଖାଏଁ ୱିକେଟ୍ ନେଇଥିବାବେଲେ ଅର୍ଶଦୀପ ସିଂହ ଓ ନମନ ଧୀର ଗୋଟିଏ ଲେଖାଏଁ ୱିକେଟ୍ ନେଇଥିଲେ । 

ଏହା ପରେ ଭାରତ ବ୍ୟାଟିଂ ଆରମ୍ଭ କରିଥିଲା । ପ୍ରଥମ ଓଭରରେ ଭାରତ ଝୁଣ୍ଟିଥିଲା । ପ୍ରଥମ ଓଭରେ ରୋହିତ ଶର୍ମା, ବିରାଟ କୋହଲି ଏବଂ ଅଧିନାୟକ ଶ୍ରେୟସ ଆୟର ଝଟକା ପରେ ଝଟକା ଦେଇଥିଲେ । କେହି ଖାତା ଖୋଲି ପାରିନଥିଲେ । ରୋହିତ ପ୍ରଥମ ବଲ, ବିରାଟ ଦ୍ୱିତୀୟ ବଲ୍ ଏବଂ ଅଧିନାୟକ ଶ୍ରେୟସ  ମାତ୍ର ତିନୋଟି ବଲ୍ ଖେଳି ଆଉଟ୍ ହୋଇଥିଲେ । ରନ୍ ଅପେକ୍ଷା ୱିକେଟ୍ ପତନ ଅଧିକ ହୋଇଥିଲା । ଋତୁରାଜ ମଧ୍ୟ ୫ ରନ କରି ଆଉଟ୍ ହୋଇଥିଲେ । ଭାରତ ୧୦ ଓଭର୍ ସୁଦ୍ଧା ୪ଟି ଗୁରୁତ୍ୱପୂର୍ଣ୍ଣ ୱିକେଟ୍ ହରାଇଥିଲା । ଯାହା ଖେଳକୁ ଦୁର୍ବଳ କରିଦେଇଥିଲା । 

ଇଶାନ କିଶାନ କିଛିଟା ଆଶ୍ୱସ୍ତି ଦେଇଥିଲେ ମଧ୍ୟ ସେ କିଛି ଖାସ୍ କରିପାରିନଥିଲେ । ଇଶାନ ସର୍ବାଧିକ ୨୭ ରନ୍ କରିଥିବାବେଳେ ଅକ୍ସର ପଟେଲ୍ ୨୧, ନମନ ଧୀର ୨୧, ନବି ୫, କୁଲଦୀପ ୧ ଏବଂ ଗୁରନୂର ୨ ରନ୍ କରିଥିଲେ । ମାତ୍ର ୨୬.୪ ଓଭରରେ ଭାରତ ସମସ୍ତ ୱିକେଟ୍ ହରାଇ ନ୍ୟୁଜିଲାଣ୍ଡ ଠାରୁ ପରାସ୍ତ ହୋଇଥିଲା । ନ୍ୟୁଜିଲାଣ୍ଡ ୨୪୪ ରନ ବିଶାଳ ବ୍ୟବଧାନରେ ବିଜୟ ହାସଲ କରିଛି । 

ତେବେ ଏହାରି ସହିତ ଏହି ପାଞ୍ଚ ଟିକିଆ ସିରିଜରେ ଭାରତ ୨-୧ରେ ଆଗୁଆ ରହିଛି । ଓକଲାଣ୍ଡ୍ ଓ ୱିଲଙ୍ଗଟନରେ ଖେଳାଯାଇଥିବା ଦୁଇଟି ମ୍ୟାଚରେ ଭାରତ ଜିତି ଥିବାବେଳେ ହ୍ୟାମିଲଟନ୍ ମ୍ୟାଚ୍ ବର୍ଷା ଯୋଗୁଁ ଡ୍ର ରହିଥିଲା । ଅନ୍ତିମ ମୁକାବିଲା ୧୫ ନଭେମ୍ବର (ରବିବାର)କୁ ଏହିଠାରେ ଖେଳାଯିବ । 

ନୂଆଦିଲ୍ଲୀ: ନ୍ୟୁଜିଲାଣ୍ଡ ବିପକ୍ଷ ଚତୁର୍ଥ ଦିନିକିଆ ମ୍ୟାଚ୍ ପୂର୍ବରୁ ଭାରତୀୟ ଦଳରେ ଏକାଧିକ ପରିବର୍ତ୍ତନ ହେବାକୁ ଯାଉଛି। ନଭେମ୍ବର ୧୩ ତାରିଖରେ ମାଉଣ୍ଟ ମାଉଙ୍ଗାନୁଇର ବେ ଓଭାଲ୍‌ରେ ଖେଳାଯିବ ଏହି ମ୍ୟାଚ୍। ଶୁଭମନ ଗିଲ୍, କେଏଲ୍ ରାହୁଲ ଓ ଅଂଶୁଲ କମ୍ବୋଜ ଟେଷ୍ଟ ଦଳ ସହ ଯୋଗଦେଇଥିବାରୁ ଚତୁର୍ଥ ଓ ପଞ୍ଚମ ODIରେ ସେମାନେ ଖେଳିବେ ନାହିଁ। ଏଭଳି ସ୍ଥିତିରେ ଭାରତର ଚୂଡ଼ାନ୍ତ ଏକାଦଶରେ କେଉଁ ଖେଳାଳିଙ୍କୁ ସୁଯୋଗ ମିଳିବ, ତାହାକୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍ସୁକତା ବଢ଼ିଛି।

ଏହି ଦୁଇଟି ମ୍ୟାଚ୍‌ରେ ଭାରତର ନେତୃତ୍ୱ ନେବେ ଶ୍ରେୟସ ଆୟର। ଶୁଭମନ ଗିଲ୍‌ଙ୍କ ଅନୁପସ୍ଥିତିରେ ତାଙ୍କ କାନ୍ଧରେ ରହିବ ଦଳର ଦାୟିତ୍ୱ। ଗିଲ୍‌ଙ୍କ ନେତୃତ୍ୱରେ ଭାରତ ସିରିଜ୍‌ର ପ୍ରଥମ ଦୁଇଟି ମ୍ୟାଚ୍ ଜିତି ୨-୦ରେ ଆଗୁଆ ରହିଛି। ତୃତୀୟ ମ୍ୟାଚ୍ ବର୍ଷା ଯୋଗୁଁ ଗୋଟିଏ ବି ବଲ୍ ଖେଳା ନଯାଇ ବାତିଲ ହୋଇଥିଲା। ତେଣୁ ଚତୁର୍ଥ ମ୍ୟାଚ୍ ଜିତି ସିରିଜ୍‌ ଉପରେ ଆଗୁଆ କବ୍‌ଜା କରିବାକୁ ଭାରତ ଲକ୍ଷ୍ୟ ରଖିବ। ଅନ୍ୟପଟେ ଘରୋଇ ନ୍ୟୁଜିଲାଣ୍ଡ ପାଇଁ ସିରିଜ୍ ଜିତିବାର ସୁଯୋଗ ଆଉ ନାହିଁ। ଅବଶିଷ୍ଟ ଦୁଇଟି ମ୍ୟାଚ୍ ଜିତି ସିରିଜ୍‌କୁ ଡ୍ର କରିବା ହିଁ ଦଳର ଏକମାତ୍ର ଲକ୍ଷ୍ୟ ରହିବ।

ରୋହିତଙ୍କ ସହ ଓପନିଂ କରିପାରନ୍ତି ଋତୁରାଜ

ଶୁଭମନ ଗିଲ୍ ଦଳରେ ନଥିବାରୁ ଓପନିଂ ସ୍ଥାନରେ ଋତୁରାଜ ଗାଏକୱାଡ୍‌ଙ୍କୁ ସୁଯୋଗ ମିଳିବାର ସମ୍ଭାବନା ରହିଛି। ସେ ଅଭିଜ୍ଞ ରୋହିତ ଶର୍ମାଙ୍କ ସହ ଇନିଂସ୍ ଆରମ୍ଭ କରିପାରନ୍ତି। ତେବେ ଏହି ସ୍ଥାନ ପାଇଁ ଈଶାନ କିଶନ ମଧ୍ୟ ଜଣେ ଦୃଢ଼ ଦାବିଦାର। ଦଳରେ କେଏଲ୍ ରାହୁଲ ନଥିବାରୁ ୱିକେଟ୍‌କିପିଂ ଦାୟିତ୍ୱ ଈଶାନଙ୍କ ହାତକୁ ଯିବା ପ୍ରାୟ ନିଶ୍ଚିତ। ଏହି କାରଣରୁ ତାଙ୍କୁ ମଧ୍ୟକ୍ରମରେ ଖେଳାଇବାର ରଣନୀତି ଆପଣାଇପାରେ ଟିମ୍ ମ୍ୟାନେଜମେଣ୍ଟ।

ଅନ୍ୟପଟେ ବିରାଟ କୋହଲି ତୃତୀୟ ସ୍ଥାନରେ ବ୍ୟାଟିଂ କରିବା ସମ୍ଭାବନା ରହିଛି। ଅଧିନାୟକ ଶ୍ରେୟସ ଆୟର ଚତୁର୍ଥ ସ୍ଥାନରେ ଦଳର ବ୍ୟାଟିଂ ମଙ୍ଗ ସମ୍ଭାଳିପାରନ୍ତି। ଈଶାନ କିଶନ ଓ ନମନ ଧୀର ମଧ୍ୟକ୍ରମକୁ ମଜବୁତ କରିବା ସହ ଦଳର ବ୍ୟାଟିଂ ଗଭୀରତା ବଢ଼ାଇବାରେ ସହାୟକ ହୋଇପାରନ୍ତି।

ସିରାଜଙ୍କ ପାଇଁ ଖୋଲିପାରେ ଦଳର ରାସ୍ତା

ବୋଲିଂ ବିଭାଗରେ ମଧ୍ୟ ପରିବର୍ତ୍ତନ ହେବାର ଆଶା ରହିଛି। ପ୍ରଥମ ଦୁଇଟି ମ୍ୟାଚ୍‌ରେ ନିଜ ପ୍ରଦର୍ଶନରେ ପ୍ରଭାବିତ କରିଥିବା ଅଂଶୁଲ କମ୍ବୋଜ ଏବେ ଟେଷ୍ଟ ଦଳରେ ଯୋଗଦେଇଛନ୍ତି। ତାଙ୍କ ଅନୁପସ୍ଥିତିରେ ଅଭିଜ୍ଞ ଦ୍ରୁତ ବୋଲର ମହମ୍ମଦ ସିରାଜଙ୍କୁ ଚୂଡ଼ାନ୍ତ ଏକାଦଶରେ ସ୍ଥାନ ମିଳିପାରେ। ଚଳିତ ଦିନିକିଆ ସିରିଜ୍‌ରେ ଏପର୍ଯ୍ୟନ୍ତ ସିରାଜ ଗୋଟିଏ ବି ମ୍ୟାଚ୍ ଖେଳିନାହାନ୍ତି। ତେଣୁ ଚତୁର୍ଥ ମ୍ୟାଚ୍‌ରେ ତାଙ୍କୁ ସୁଯୋଗ ଦେବାକୁ ଦଳୀୟ ପରିଚାଳନା ବିଚାର କରିପାରେ।

ତାଙ୍କ ସହ ଅର୍ଶଦୀପ ସିଂହ ଓ ଗୁରନୁର ବରାର ଦ୍ରୁତ ବୋଲିଂ ବିଭାଗ ସମ୍ଭାଳିପାରନ୍ତି। ଆକିବ ନବୀ ମଧ୍ୟ ଦଳର ବୋଲିଂ ବିକଳ୍ପ ଭାବେ ରହିଛନ୍ତି। ଅକ୍ଷର ପଟେଲ ନିଜର ଅଲରାଉଣ୍ଡ ପ୍ରଦର୍ଶନ ସହ ସ୍ପିନ୍ ବିଭାଗର ଦାୟିତ୍ୱ ତୁଲାଇପାରନ୍ତି।

ଚତୁର୍ଥ ODI ପାଇଁ ଭାରତର ସମ୍ଭାବ୍ୟ ପ୍ଲେଇଂ ଇଲେଭେନ୍

ରୋହିତ ଶର୍ମା, ଋତୁରାଜ ଗାଏକୱାଡ୍, ବିରାଟ କୋହଲି, ଶ୍ରେୟସ ଆୟର (ଅଧିନାୟକ), ଈଶାନ କିଶନ (ୱିକେଟ୍‌କିପର), ନମନ ଧୀର, ଅକ୍ଷର ପଟେଲ, ଆକିବ ନବୀ, ଗୁରନୁର ବରାର, ଅର୍ଶଦୀପ ସିଂହ ଓ ମହମ୍ମଦ ସିରାଜ।

ମୁମ୍ବାଇ: କ୍ରିକେଟ୍ ଜଗତର କିମ୍ବଦନ୍ତୀ ଖେଳାଳି ତଥା ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ନିଜ ପ୍ରଶଂସକଙ୍କ ପାଇଁ ଏକ ବଡ଼ ଖୁସି ଖବର ଆଣିଛନ୍ତି। ନିଜର ଐତିହାସିକ କ୍ରିକେଟ୍ ଯାତ୍ରା ସହ ଜଡ଼ିତ ୨୬ଟି ସ୍ୱତନ୍ତ୍ର ବ୍ୟାଟ୍ ମୁମ୍ବାଇ କ୍ରିକେଟ୍ ଆସୋସିଏସନ୍‌ (MCA)କୁ ଉପହାର ଦେବାକୁ ଯାଉଛନ୍ତି ସଚିନ। ଏହି ବ୍ୟାଟ୍‌ଗୁଡ଼ିକୁ ମୁମ୍ବାଇର ଶରଦ ପାୱାର କ୍ରିକେଟ୍ ସଂଗ୍ରହାଳୟରେ ପ୍ରଦର୍ଶିତ କରାଯିବ।

ବିଶେଷ କଥା ହେଉଛି, ଏହି ପ୍ରଦର୍ଶନୀର ଉନ୍ମୋଚନ ନଭେମ୍ବର ୧୬ ତାରିଖରେ ହେବ। ଏହି ଦିନ ସଚିନଙ୍କ ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ନେବାର ୧୩ ବର୍ଷ ପୂରଣ ହେବ। ତାଙ୍କ କ୍ରିକେଟ୍ ଜୀବନର ଅନେକ ସ୍ମରଣୀୟ ମୁହୂର୍ତ୍ତକୁ ଏହି ପ୍ରଦର୍ଶନୀ ମାଧ୍ୟମରେ ପୁଣିଥରେ ଜୀବନ୍ତ କରାଯିବ।

୧୦୦ ଶତକର ସ୍ମୃତି ବହନ କରିବ ୨୬ଟି ବ୍ୟାଟ୍

ସଚିନ ତାଙ୍କ ଅନ୍ତର୍ଜାତୀୟ କ୍ୟାରିୟରରେ ବ୍ୟବହାର କରିଥିବା ୨୬ଟି ବିଶେଷ ବ୍ୟାଟ୍ ଏହି ସଂଗ୍ରହାଳୟକୁ ଦାନ କରିବେ। ଏଥିମଧ୍ୟରୁ କେତେକ ବ୍ୟାଟ୍‌ରେ ସେ ନିଜର ଐତିହାସିକ ଶତକ ହାସଲ କରିଥିଲେ। ଅନ୍ତର୍ଜାତୀୟ କ୍ରିକେଟ୍‌ରେ ୧୦୦ଟି ଶତକ ହାସଲ କରିବାର ଅନନ୍ୟ ରେକର୍ଡ ସଚିନଙ୍କ ନାମରେ ରହିଛି। କେବଳ ବ୍ୟାଟ୍ ନୁହେଁ, ତାଙ୍କ କ୍ରିକେଟ୍ ଜୀବନ ସହ ଜଡ଼ିତ ହେଲମେଟ୍, ଜର୍ସି ଏବଂ ବ୍ୟକ୍ତିଗତ ନୋଟ୍‌ସ ଭଳି ଅନେକ ସ୍ମୃତିଚିହ୍ନ ମଧ୍ୟ ଏଠାରେ ରଖାଯିବ।

'ବ୍ୟାଟୋଗ୍ରାଫି' ନାମରେ ହେବ ସ୍ୱତନ୍ତ୍ର ପ୍ରଦର୍ଶନୀ

ଏହି ସ୍ୱତନ୍ତ୍ର ପ୍ରଦର୍ଶନୀର ନାମ ରଖାଯାଇଛି 'ବ୍ୟାଟୋଗ୍ରାଫି'। ଏହା ମାଧ୍ୟମରେ ସଚିନଙ୍କ କ୍ରିକେଟ୍ ଜୀବନର ବିଭିନ୍ନ ପର୍ଯ୍ୟାୟ ଓ ସଫଳତାର କାହାଣୀକୁ ପ୍ରଶଂସକଙ୍କ ସାମ୍ନାକୁ ଅଣାଯିବ। ଏହି ପ୍ରଦର୍ଶନୀରେ ସଚିନଙ୍କ ଖେଳ ଜୀବନରେ ବ୍ୟବହୃତ ପ୍ରକୃତ ବ୍ୟାଟ୍ ଏବଂ ଅନ୍ୟାନ୍ୟ ସାମଗ୍ରୀ ରହିବ। ଫଳରେ ନୂଆ ପିଢ଼ିର କ୍ରିକେଟ୍ ପ୍ରେମୀମାନେ ତାଙ୍କ ସଫଳତା ପଛରେ ଥିବା ଇତିହାସକୁ ନିକଟରୁ ଜାଣିବାର ସୁଯୋଗ ପାଇବେ।

MCA ଅଧ୍ୟକ୍ଷ ଅଜିଙ୍କ୍ୟ ନାଏକ କହିଛନ୍ତି ଯେ, ଏହି ପ୍ରଦର୍ଶନୀ ସଂଗ୍ରହାଳୟକୁ ଏକ ନୂଆ ପରିଚୟ ଦେବ। ସଚିନଙ୍କ ଐତିହାସିକ ଉପଲବ୍ଧି ପଛରେ ଥିବା ପ୍ରକୃତ ଉପକରଣଗୁଡ଼ିକୁ ଦେଖିବା ସହ ସେହି ସମୟର ଅନୁଭୂତି ପାଇବାକୁ ଦର୍ଶକଙ୍କୁ ସୁଯୋଗ ମିଳିବ।

ନୂଆଦିଲ୍ଲୀ: ଭାରତୀୟ କ୍ରିକେଟ୍ ଦଳର ପୂର୍ବତନ ଅଲରାଉଣ୍ଡର ଇରଫାନ ପଠାନ ନିଜ ପସନ୍ଦର ବର୍ତ୍ତମାନର ODI ୱାର୍ଲ୍ଡ ଇଲେଭେନ ଚୟନ କରି ଚର୍ଚ୍ଚାକୁ ଆସିଛନ୍ତି। ତାଙ୍କ ଏହି ଟିମ୍‌ରେ ଭାରତର ତିନି ଜଣ ଖେଳାଳି ସ୍ଥାନ ପାଇଥିବା ବେଳେ ଭାରତୀୟ ଅଧିନାୟକ ଶୁଭମନ ଗିଲ୍ ଓ ଦ୍ରୁତ ବୋଲର ଯଶପ୍ରୀତ ବୁମ୍‌ରାଙ୍କୁ ବାଦ୍ ଦିଆଯାଇଛି। ଏହି ଚୟନ କ୍ରିକେଟ୍ ପ୍ରଶଂସକଙ୍କ ମଧ୍ୟରେ ନୂଆ ଆଲୋଚନା ଆରମ୍ଭ କରିଛି।

କ୍ରିକେଟ୍ ବିଶ୍ଳେଷଣ ସମୟରେ ପଠାନ ନିଜର ଏହି ଏକାଦଶ ବିଷୟରେ ମତ ରଖିଛନ୍ତି। ତାଙ୍କ ଟିମ୍‌ରେ ଭାରତ ବ୍ୟତୀତ ନ୍ୟୁଜିଲାଣ୍ଡ, ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକାରୁ ଦୁଇ ଜଣ ଲେଖାଏଁ ଖେଳାଳି ସ୍ଥାନ ପାଇଛନ୍ତି। ଏହାସହ ଆଫଗାନିସ୍ତାନ ଓ ୱେଷ୍ଟଇଣ୍ଡିଜରୁ ଜଣେ ଲେଖାଏଁ ଖେଳାଳିଙ୍କୁ ସୁଯୋଗ ମିଳିଛି।

ରୋହିତଙ୍କ ସହ ଓପନିଂ କରିବେ ଶେ ହୋପ୍

ଇରଫାନ ପଠାନ ନିଜ ଏକାଦଶର ଓପନିଂ ଦାୟିତ୍ୱ ଭାରତର ଅଭିଜ୍ଞ ବ୍ୟାଟର ରୋହିତ ଶର୍ମା ଏବଂ ୱେଷ୍ଟଇଣ୍ଡିଜ ଅଧିନାୟକ ଶେ ହୋପ୍‌ଙ୍କୁ ଦେଇଛନ୍ତି। ତୃତୀୟ ସ୍ଥାନରେ ବିରାଟ କୋହଲିଙ୍କୁ ରଖିଛନ୍ତି। ଏହାପରେ ଚତୁର୍ଥ ସ୍ଥାନରେ ନ୍ୟୁଜିଲାଣ୍ଡର ଡାରିଲ ମିଚେଲଙ୍କୁ ବାଛିଛନ୍ତି। ପଞ୍ଚମ ସ୍ଥାନରେ ଭାରତର ୱିକେଟକିପର ବ୍ୟାଟର କେଏଲ୍ ରାହୁଲଙ୍କୁ ରଖାଯାଇଛି। ଷଷ୍ଠ ସ୍ଥାନରେ ନ୍ୟୁଜିଲାଣ୍ଡର ଅଲରାଉଣ୍ଡର ଗ୍ଲେନ୍ ଫିଲିପ୍ସଙ୍କୁ ସାମିଲ କରିଛନ୍ତି।

ବୋଲିଂ ବିଭାଗରେ ରାଶିଦ, କମିନ୍ସ ଓ ରବାଡା

ବୋଲିଂ ବିଭାଗରେ ଆଫଗାନିସ୍ତାନର ଷ୍ଟାର ସ୍ପିନର ରାଶିଦ ଖାନଙ୍କୁ ସପ୍ତମ ସ୍ଥାନରେ ରଖିଛନ୍ତି ପଠାନ। ଅଷ୍ଟମ ସ୍ଥାନରେ ଅଷ୍ଟ୍ରେଲିଆର ଅଧିନାୟକ ତଥା ଦ୍ରୁତ ବୋଲର ପ୍ୟାଟ୍ କମିନ୍ସଙ୍କୁ ସୁଯୋଗ ଦେଇଛନ୍ତି। ସେହିପରି ଦକ୍ଷିଣ ଆଫ୍ରିକାର ଦୁଇ ଅଭିଜ୍ଞ ବୋଲର କାଗିସୋ ରବାଡା ଓ କେଶବ ମହାରାଜଙ୍କୁ ମଧ୍ୟ ଟିମ୍‌ରେ ସ୍ଥାନ ମିଳିଛି। ଏକାଦଶ ଖେଳାଳି ଭାବେ ଅଷ୍ଟ୍ରେଲିଆର ଦ୍ରୁତ ବୋଲର ଜୋଶ ହାଜେଲଉଡ୍‌ଙ୍କୁ ବାଛିଛନ୍ତି ସେ।

ଇରଫାନ ପଠାନଙ୍କ ପସନ୍ଦର ODI ୱାର୍ଲ୍ଡ ଇଲେଭେନ

ରୋହିତ ଶର୍ମା(ଭାରତ), ଶେ ହୋପ୍ (ୱେଷ୍ଟଇଣ୍ଡିଜ),  ବିରାଟ କୋହଲି(ଭାରତ), ଡାରିଲ ମିଚେଲ (ନ୍ୟୁଜିଲାଣ୍ଡ), କେଏଲ୍ ରାହୁଲ (ୱିକେଟକିପର)(ଭାରତ), ଗ୍ଲେନ୍ ଫିଲିପ୍ସ (ନ୍ୟୁଜିଲାଣ୍ଡ), ରାଶିଦ ଖାନ(ଆଫଗାନିସ୍ତାନ), ପ୍ୟାଟ୍ କମିନ୍ସ (ଅଷ୍ଟ୍ରେଲିଆ), କାଗିସୋ ରବାଡା(ଦକ୍ଷିଣ ଆଫ୍ରିକା), କେଶବ ମହାରାଜ(ଦକ୍ଷିଣ ଆଫ୍ରିକା), 

ଜୋଶ ହାଜେଲଉଡ୍(ଅଷ୍ଟ୍ରେଲିଆ)

ତେବେ ଏହି ଏକାଦଶରେ ଶୁଭମନ ଗିଲ୍ ଓ ଯଶପ୍ରୀତ ବୁମ୍‌ରାଙ୍କ ଅନୁପସ୍ଥିତି ସବୁଠାରୁ ଅଧିକ ଚର୍ଚ୍ଚାର ବିଷୟ ହୋଇଛି। ଉଭୟ ଭାରତୀୟ ଖେଳାଳି ବର୍ତ୍ତମାନର କ୍ରିକେଟ୍‌ରେ ନିଜ ଦକ୍ଷତା ପାଇଁ ପରିଚିତ। ତଥାପି ପଠାନ ନିଜ ପସନ୍ଦର ଟିମ୍‌ରେ ଅନ୍ୟ ଖେଳାଳିଙ୍କୁ ଅଗ୍ରାଧିକାର ଦେଇଛନ୍ତି।